ମିଆମି ଆନ୍ତର୍ଜାତୀୟ ବିମାନବନ୍ଦରରେ ରବିବାର ଏକ ବଡ଼ ଧରଣର ବିମାନ ଦୁର୍ଘଟଣା ଘଟିଛି। ଆମାଜନ ପ୍ରାଇମ୍ ଏୟାରର ଏକ କାର୍ଗୋ ବିମାନ ଅବତରଣ ସମୟରେ ରନୱେରୁ ଖସିଯାଇ ଏକାଧିକ ଯାନବାହନ ସହ ଧକ୍କା ହେବା ଫଳରେ ଏଥିରେ ଭୟାବହ ନିଆଁ ଲାଗିଯାଇଛି। ଏହି ମର୍ମନ୍ତୁଦ ଦୁର୍ଘଟଣାରେ ଅତିକମରେ ୫ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ୫ ଜଣ ଆହତ ହୋଇଛନ୍ତି।

ରନୱେ ଅତିକ୍ରମ କରି ଗାଡ଼ି ସହ ଧକ୍କା

ମିଳିଥିବା ସୂଚନା ଅନୁଯାୟୀ, ବୋଇଂ ୭୬୭-୩୦୦ ବିମାନଟି ପୁଏର୍ତ୍ତୋ ରିକୋର ସାନ ଜୁଆନରୁ ଉଡ଼ାଣ ଭରି ମିଆମିରେ ପହଞ୍ଚିଥିଲା। ଏହାକୁ ୨୧ ଏୟାର (21 Air) ନାମକ କମ୍ପାନୀ ପ୍ରାଇମ୍ ଏୟାର ଫ୍ଲାଇଟ୍ ୭୫୯୮ ଭାବରେ ପରିଚାଳନା କରୁଥିଲା। ଅବତରଣ କରିବା ସମୟରେ ବିମାନଟି ନିୟନ୍ତ୍ରଣ ହରାଇ ଡାଇଗୋନାଲ୍ ରନୱେ ବାହାରକୁ ଚାଲିଯାଇଥିଲା। ଏହାପରେ ଏୟାରପୋର୍ଟ ପରିସର ବାହାରେ ଥିବା ରାସ୍ତାରେ ଯାଉଥିବା ଏକାଧିକ ଗାଡ଼ିକୁ ଧକ୍କା ଦେଇ ବିମାନଟିରେ ନିଆଁ ଲାଗିଯାଇଥିଲା।

ଉଦ୍ଧାର କାର୍ଯ୍ୟ ଏବଂ ତଦନ୍ତ

ଦୁର୍ଘଟଣା ସମ୍ପର୍କରେ ଖବର ପାଇ ମିଆମି-ଡେଡ୍ ଫାୟାର ରେସକ୍ୟୁ (MDFR) ର ୬୦ରୁ ଅଧିକ ୟୁନିଟ୍ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଉଦ୍ଧାରକାରୀ ଦଳ ବିମାନର କକ୍‌ପିଟ୍‌ରେ ଫସି ରହିଥିବା ପାଇଲଟ୍ ଓ କୋ-ପାଇଲଟ୍‌ଙ୍କ ସମେତ ଗାଡ଼ି ଭିତରେ ଫସିଥିବା ଲୋକଙ୍କୁ ଉଦ୍ଧାର କରିଥିଲେ। ଆହତମାନଙ୍କ ମଧ୍ୟରୁ ୩ ଜଣଙ୍କ ଅବସ୍ଥା ଗୁରୁତର ରହିଛି। ଆମେରିକାର ଫେଡେରାଲ୍ ଆଭିଏସନ୍ ଆଡମିନିଷ୍ଟ୍ରେସନ୍ (FAA) ଏବଂ ନ୍ୟାସନାଲ୍ ଟ୍ରାନ୍ସପୋର୍ଟେସନ୍ ସେଫ୍ଟି ବୋର୍ଡ (NTSB) ପକ୍ଷରୁ ଏହି ଘଟଣାର ତଦନ୍ତ ଆରମ୍ଭ କରାଯାଇଛି।

ବିମାନ ଚଳାଚଳ ବାଧାପ୍ରାପ୍ତ

ଏହି ଭୟଙ୍କର ଦୁର୍ଘଟଣା ପରେ ମିଆମି ଏୟାରପୋର୍ଟରେ ହାହାକାର ପରିସ୍ଥିତି ସୃଷ୍ଟି ହୋଇଥିଲା। ସୁରକ୍ଷାକୁ ଦୃଷ୍ଟିରେ ରଖି ବିମାନବନ୍ଦରର ସମସ୍ତ ରନୱେ ଏବଂ ଟ୍ୟାକ୍ସିୱେକୁ ବନ୍ଦ କରିଦିଆଯାଇଥିଲା। ଫଳରେ ରବିବାର ଅପରାହ୍ନରେ ଶହ ଶହ ବିମାନ ଉଡ଼ାଣରେ ବିଳମ୍ବ ଦେଖାଦେଇଥିଲା ଏବଂ ଅନେକ ବିମାନ ବାତିଲ ମଧ୍ୟ କରାଯାଇଛି। ଆମାଜନର ମୁଖପାତ୍ର କେଲି ନାଣ୍ଟେଲ ଘଟଣାରେ ଦୁଃଖ ପ୍ରକାଶ କରିବା ସହ ସ୍ଥାନୀୟ ପ୍ରଶାସନକୁ ସମ୍ପୂର୍ଣ୍ଣ ସହଯୋଗ କରାଯାଉଥିବା ସୂଚନା ଦେଇଛନ୍ତି।

🚨 Update: Deadly Cargo Plane Crash at Miami International Airport

At least five people have died and five others were injured after an Amazon Prime Air cargo aircraft overran the runway at Miami International Airport on Sunday afternoon, striking multiple vehicles and bursting… pic.twitter.com/6XLpT6mVaP

— FL360aero (@fl360aero) September 7, 2026

ଆମେରିକାରେ ପିଲାମାନଙ୍କର ପାସପୋର୍ଟ ତିଆରି କରିବା ପାଇଁ ନୂତନ ନିୟମ ପ୍ରସ୍ତାବିତ କରାଯାଇଛି। ଏହି ନୂତନ ପ୍ରସ୍ତାବ ଅନୁଯାୟୀ, ଆମେରିକାରେ ଜନ୍ମିତ ପିଲାଙ୍କ ପାଇଁ ପାସପୋର୍ଟ ଆବେଦନ କଲାବେଳେ ଏବେ ବାପା-ମା' କିମ୍ବା ଆଇନଗତ ଅଭିଭାବକଙ୍କୁ ସେମାନଙ୍କର ନାଗରିକତ୍ୱ କିମ୍ବା ଇମିଗ୍ରେସନ୍ ସ୍ଥିତି (ପ୍ରବାସୀ ମାନ୍ୟତା)ର ପ୍ରମାଣ ଦେବା ବାଧ୍ୟତାମୂଳକ ହୋଇପାରେ। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ଦ୍ୱାରା ଜନ୍ମ ଆଧାରିତ ନାଗରିକତ୍ୱ ନୀତିରେ ପରିବର୍ତ୍ତନ ଆଣିବା ଉଦ୍ଦେଶ୍ୟରେ ଏହି ପଦକ୍ଷେପ ଗ୍ରହଣ କରାଯାଉଛି।

ଜନ୍ମଗତ ନାଗରିକତ୍ୱ ନିୟମରେ ପରିବର୍ତ୍ତନ ଆଣିବାକୁ ଉଦ୍ୟମ

ଏହି ନୂତନ ନିୟମ ହେଉଛି ଗତ ଅଗଷ୍ଟ ୬ ତାରିଖରେ ଟ୍ରମ୍ପ ପ୍ରଶାସନ ଦ୍ୱାରା ଜାରି କରାଯାଇଥିବା ଏକ କାର୍ଯ୍ୟନିର୍ବାହୀ ଆଦେଶର ଅଂଶ। ଆମେରିକାରେ ଜନ୍ମଗ୍ରହଣ କଲେ ସାଧାରଣତଃ ସ୍ୱତଃପ୍ରବୃତ୍ତ ଭାବେ ନାଗରିକତ୍ୱ ମିଳିଥାଏ। ତେବେ ଟ୍ରମ୍ପ ପ୍ରଶାସନ ଖାସ୍ କରି 'ବର୍ଥ ଟୁରିଜିମ୍' (Birth Tourism) କୁ ରୋକିବା ପାଇଁ ଏହି କଠୋର ନିୟମ ଲାଗୁ କରିବାକୁ ଚାହୁଁଛି। ଅନେକ ସମୟରେ ବିଦେଶୀ ମହିଳାମାନେ କେବଳ ପିଲା ଜନ୍ମ କରି ସେମାନଙ୍କୁ ଆମେରିକୀୟ ନାଗରିକତ୍ୱ ଦେବା ଉଦ୍ଦେଶ୍ୟରେ ଆମେରିକା ଯାତ୍ରା କରିଥାନ୍ତି, ଯାହାକୁ ବର୍ଥ ଟୁରିଜିମ୍ କୁହାଯାଏ।

ପୂର୍ବ ଓ ନୂଆ ନିୟମ ମଧ୍ୟରେ ପାର୍ଥକ୍ୟ

ବର୍ତ୍ତମାନର ନିୟମ ଅନୁଯାୟୀ, ପିଲାର ପାସପୋର୍ଟ ବନାଇବା ପାଇଁ ବାପା-ମା'ଙ୍କୁ କେବଳ ପିଲା ସହିତ ସେମାନଙ୍କର ସମ୍ପର୍କର ପ୍ରମାଣ ଏବଂ ସରକାରୀ ପରିଚୟ ପତ୍ର ଦେଖାଇବାକୁ ପଡ଼ିଥାଏ। ଏଥିପାଇଁ ବାପା-ମା'ଙ୍କର ଇମିଗ୍ରେସନ୍ ଷ୍ଟାଟସ୍ ବା ଆଇନଗତ ସ୍ଥିତି ଦେବାର କୌଣସି ବାଧ୍ୟତାମୂଳକ ଆବଶ୍ୟକତା ନଥିଲା। କିନ୍ତୁ ନୂଆ ପ୍ରସ୍ତାବ ଅନୁଯାୟୀ, ଆମେରିକୀୟ ନାଗରିକ ଥିବା ବାପା-ମା'ଙ୍କୁ ନିଜର ପାସପୋର୍ଟ କିମ୍ବା ଜନ୍ମ ପ୍ରମାଣପତ୍ର ଦେଖାଇବାକୁ ପଡ଼ିବ। ଅନ୍ୟପକ୍ଷରେ, ଅନ୍ୟ ଦେଶର ଲୋକଙ୍କୁ ଆମେରିକାରେ ସେମାନଙ୍କ ରହଣିର ବୈଧତା କିମ୍ବା ଆଇନଗତ ସ୍ଥିତି ପ୍ରମାଣିତ କରିବାକୁ ପଡ଼ିବ।

କୋର୍ଟରେ ଆଇନଗତ ଚ୍ୟାଲେଞ୍ଜ

ଟ୍ରମ୍ପ ପ୍ରଶାସନର ଏହି ନୂତନ ଆଦେଶ ବିରୋଧରେ ଆଇନଗତ ଲଢ଼େଇ ମଧ୍ୟ ଆରମ୍ଭ ହୋଇଯାଇଛି। ଆମେରିକାର ମେରିଲ୍ୟାଣ୍ଡ ଫେଡେରାଲ୍ କୋର୍ଟରେ ଏହି ମାମଲାର ଶୁଣାଣି ହୋଇଛି। ଯେଉଁ ପିଲାମାନଙ୍କର ନାଗରିକତ୍ୱ ଏହି ନିୟମ ଦ୍ୱାରା ପ୍ରଭାବିତ ହେବାର ଆଶଙ୍କା ରହିଛି, ସେମାନଙ୍କ ତରଫରୁ ଓକିଲମାନେ କୋର୍ଟରେ ଏକ ମାମଲା ଦାୟର କରିଛନ୍ତି। ବିଚାରପତି ଡେବୋରା ବୋର୍ଡମ୍ୟାନ୍ ଏହି ନୂତନ ନିୟମକୁ ନେଇ ପ୍ରଶ୍ନ ଉଠାଇବା ସହ ମାମଲାକୁ ଆଗକୁ ବଢ଼ାଇବା ପାଇଁ ଅନୁମତି ଦେଇଛନ୍ତି। ଏହି ନିୟମ ଲାଗୁ ହେଲେ ବିଶେଷ କରି ଭାରତୀୟ ଆଇଟି ପେସାଦାର ଏବଂ H-1B କିମ୍ବା L-1 ଭିସାରେ ଆମେରିକାରେ ରହୁଥିବା ପ୍ରବାସୀମାନଙ୍କ ଉପରେ ଏହାର ବଡ଼ ପ୍ରଭାବ ପଡ଼ିବାର ଆଶଙ୍କା ରହିଛି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବଡ଼ ଝିଅ ଇଭାଙ୍କା ଟ୍ରମ୍ପଙ୍କୁ ହତ୍ୟା କରିବା ପାଇଁ ହୋଇଥିବା ଏକ ଭୟଙ୍କର ଷଡ଼ଯନ୍ତ୍ରର ପର୍ଦ୍ଦାଫାଶ ହୋଇଛି। ଇରାନର ସାମରିକ ବାହିନୀ 'ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ' (IRGC) ଠାରୁ ତାଲିମ ପ୍ରାପ୍ତ ଜଣେ ବିପଜ୍ଜନକ ଆତଙ୍କବାଦୀ ଏହି ହତ୍ୟା ଯୋଜନା ପ୍ରସ୍ତୁତ କରିଥିଲା।

ନିକଟରେ ତୁର୍କୀରୁ ଗିରଫ ହୋଇଥିବା ଏହି ଆତଙ୍କବାଦୀକୁ ଆମେରିକାକୁ ପ୍ରତ୍ୟର୍ପଣ କରାଯାଇଛି। ମିଳିଥିବା ତଥ୍ୟ ଅନୁଯାୟୀ, ସେ ୨୦୨୦ ମସିହାରେ ଆମେରିକୀୟ ଡ୍ରୋନ୍ ଆକ୍ରମଣରେ ନିହତ ହୋଇଥିବା ଇରାନୀୟ ସାମରିକ କମାଣ୍ଡର କାସିମ୍ ସୁଲେମାନୀଙ୍କ ମୃତ୍ୟୁର ପ୍ରତିଶୋଧ ନେବା ଉଦ୍ଦେଶ୍ୟରେ ଏହି ଷଡ଼ଯନ୍ତ୍ର ରଚିଥିଲା।

ସନ୍ଦିଗ୍ଧ ଆତଙ୍କବାଦୀର ପରିଚୟ ଏବଂ ଯୋଜନା

ଗିରଫ ହୋଇଥିବା ୩୨ ବର୍ଷୀୟ ସନ୍ଦିଗ୍ଧ ଆତଙ୍କବାଦୀର ନାମ ମହମ୍ମଦ ବାକିର ସାଦ ଦାଉଦ ଅଲ-ସାଦି ବୋଲି ଜଣାପଡିଛି। ସେ ଇରାକର ନାଗରିକ ଏବଂ ଇରାନ ସମର୍ଥିତ ଆତଙ୍କବାଦୀ ଗୋଷ୍ଠୀ କତାଏବ ହିଜବୁଲ୍ଲା ସହ ଜଡିତ ଥିଲା। ଆମେରିକୀୟ ଗଣମାଧ୍ୟମ 'ଦି ନ୍ୟୁୟର୍କ ପୋଷ୍ଟ'ର ରିପୋର୍ଟ ଅନୁଯାୟୀ, ଅଲ-ସାଦି ପାଖରୁ ଇଭାଙ୍କା ଟ୍ରମ୍ପଙ୍କ ଫ୍ଲୋରିଡା ସ୍ଥିତ ବାସଭବନର ଏକ ବ୍ଲୁପ୍ରିଣ୍ଟ ଜବତ କରାଯାଇଛି।

ସେ ସୋସିଆଲ ମିଡିଆରେ ଆମେରିକୀୟମାନଙ୍କୁ ଧମକ ଦେଇ ଲେଖିଥିଲା ଯେ, "ତୁମର ବିଳାସପୂର୍ଣ୍ଣ ପ୍ରାସାଦ କିମ୍ବା ସିକ୍ରେଟ୍ ସର୍ଭିସ୍ କେହି ବି ତୁମକୁ ରକ୍ଷା କରିପାରିବେ ନାହିଁ।"

ପ୍ରତିଶୋଧ ନେବାର ଥିଲା ଜିଦ୍

ପୂର୍ବତନ ଇରାକୀ କୂଟନୀତିଜ୍ଞ ଏଣ୍ଟିଫାଦ କାନବାର ଗଣମାଧ୍ୟମକୁ କହିଛନ୍ତି ଯେ, ସୁଲେମାନୀଙ୍କ ମୃତ୍ୟୁ ପରେ ଅଲ-ସାଦି ଲୋକମାନଙ୍କୁ କହୁଥିଲା, "ସେମାନେ ଯେପରି ଆମ ଘର ଜାଳିଦେଲେ, ଆମକୁ ମଧ୍ୟ ଟ୍ରମ୍ପଙ୍କ ଘର ସେହିଭଳି ଜାଳିବାକୁ ପଡିବ ଏବଂ ଏଥିପାଇଁ ଇଭାଙ୍କାଙ୍କୁ ହତ୍ୟା କରିବା ଜରୁରୀ।"

ଗତ ମେ ୧୫ ତାରିଖରେ ଅଲ-ସାଦିକୁ ତୁର୍କୀରେ ଗିରଫ କରାଯିବା ପରେ ଆମେରିକାକୁ ହସ୍ତାନ୍ତର କରାଯାଇଥିଲା। ତା' ନାମରେ ୟୁରୋପ ଏବଂ ଉତ୍ତର ଆମେରିକାରେ ୧୮ଟି ଆକ୍ରମଣ ଏବଂ ଆକ୍ରମଣ ଉଦ୍ୟମର ଅଭିଯୋଗ ରହିଛି, ଯେଉଁଥିରେ ଇହୁଦୀ ପ୍ରତିଷ୍ଠାନ ଏବଂ ଆମେରିକୀୟ କୂଟନୈତିକ କାର୍ଯ୍ୟାଳୟକୁ ଟାର୍ଗେଟ କରାଯାଇଥିଲା। ଏହି ଘଟଣା ସାମ୍ନାକୁ ଆସିବା ପରେ ଇଭାଙ୍କା ଟ୍ରମ୍ପ ଏବଂ ତାଙ୍କ ପରିବାରର ସୁରକ୍ଷା ବ୍ୟବସ୍ଥାକୁ ନେଇ ଆମେରିକା ପ୍ରଶାସନ ଅଧିକ ସତର୍କ ହୋଇପଡିଛି।

ଆମେରିକାର ସିଆଟେଲରେ ପୋଲିସ ଗାଡ଼ି ଧକ୍କାରେ ପ୍ରାଣ ହରାଇଥିବା ୨୩ ବର୍ଷୀୟା ଭାରତୀୟ ଛାତ୍ରୀ ଜାହ୍ନବୀ କାନ୍ଦୁଲାଙ୍କ ପରିବାରକୁ ମିଳିବ ବଡ଼ ଧରଣର କ୍ଷତିପୂରଣ। ସିଆଟେଲ ପ୍ରଶାସନ ମୃତ ଛାତ୍ରୀଙ୍କ ପରିବାରକୁ ୨୯ ମିଲିୟନ ଡଲାର ବା ଭାରତୀୟ ମୁଦ୍ରାରେ ପ୍ରାୟ ୨୪୨ କୋଟି ଟଙ୍କା ପ୍ରଦାନ କରିବାକୁ ରାଜି ହୋଇଛି। ଜାହ୍ନବୀ ସିଆଟେଲର ନର୍ଥ ଇଷ୍ଟର୍ଣ୍ଣ ୟୁନିଭରସିଟିରେ ମାଷ୍ଟର୍ସ ଡିଗ୍ରୀ କରୁଥିଲେ।

୨୦୨୩ ମସିହା ଜାନୁଆରୀ ମାସରେ ଜାହ୍ନବୀ ରାସ୍ତା ପାର ହେଉଥିବା ସମୟରେ ପୋଲିସ ଅଧିକାରୀ କେଭିନ୍ ଡେଭଙ୍କ ଦ୍ରୁତଗାମୀ ପାଟ୍ରୋଲିଂ ଗାଡ଼ି ତାଙ୍କୁ ଧକ୍କା ଦେଇଥିଲା। ରିପୋର୍ଟ ଅନୁଯାୟୀ, ଦୁର୍ଘଟଣା ସମୟରେ ପୋଲିସ ଗାଡ଼ିଟି ଘଣ୍ଟା ପ୍ରତି ୧୧୯ କିଲୋମିଟର (୭୪ ମାଇଲ୍) ବେଗରେ ଗତି କରୁଥିଲା, ଯେତେବେଳେ କି ସେଠାରେ ସର୍ବାଧିକ ବେଗ ସୀମା ମାତ୍ର ୪୦ କିଲୋମିଟର ରହିଥିଲା।

ବିବାଦୀୟ ମନ୍ତବ୍ୟ ଓ କାର୍ଯ୍ୟାନୁଷ୍ଠାନ

ଏହି ଦୁଃଖଦ ଘଟଣା ପରେ ଅନ୍ୟ ଜଣେ ପୋଲିସ ଅଧିକାରୀ ଡାନିଏଲ ଅଡେରରଙ୍କ ବଡି କ୍ୟାମେରା ରେକର୍ଡିଂ ସାମ୍ନାକୁ ଆସିବା ପରେ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇଥିଲା। ଭିଡିଓରେ ଅଧିକାରୀ ଜଣକ ଜାହ୍ନବୀଙ୍କ ମୃତ୍ୟୁକୁ ନେଇ ହସିବା ସହ ଅପମାନଜନକ ମନ୍ତବ୍ୟ ଦେଇଥିଲେ। ସେ କହିଥିଲେ ଯେ ଜାହ୍ନବୀଙ୍କ ଜୀବନର ମୂଲ୍ୟ 'ସୀମିତ' ଏବଂ ସହର କେବଳ ଏକ ଚେକ୍ ଲେଖିଦେଲେ ସମସ୍ୟା ସମାଧାନ ହୋଇଯିବ। ଏହି ଭିଡିଓ ଭାଇରାଲ ହେବା ପରେ ଭାରତ ସମେତ ବିଶ୍ୱବ୍ୟାପୀ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା ଏବଂ ନ୍ୟାୟ ଦାବି ହୋଇଥିଲା।

ତଦନ୍ତ ପରେ ବିବାଦୀୟ ମନ୍ତବ୍ୟ ଦେଇଥିବା ଅଧିକାରୀ ଅଡେରରଙ୍କୁ ଚାକିରିରୁ ବରଖାସ୍ତ କରାଯାଇଥିଲା। ଅନ୍ୟପକ୍ଷରେ, ଦୁର୍ଘଟଣା ଘଟାଇଥିବା ଡ୍ରାଇଭର କେଭିନ୍ ଡେଭଙ୍କୁ ଅବହେଳା ପାଇଁ ୫,୦୦୦ ଡଲାର ଜରିମାନା କରାଯାଇଥିଲେ ମଧ୍ୟ ତାଙ୍କ ବିରୋଧରେ କୌଣସି ଅପରାଧିକ ମାମଲା ରୁଜୁ କରାଯାଇ ନାହିଁ।

ସିଆଟେଲ ସିଟି ଆଟର୍ଣ୍ଣି ଏରିକା ଇଭାନ୍ସ ବୁଧବାର ଏକ ବିବୃତ୍ତିରେ କହିଛନ୍ତି ଯେ ଜାହ୍ନବୀଙ୍କ ମୃତ୍ୟୁ ଅତ୍ୟନ୍ତ ହୃଦୟବିଦାରକ ଥିଲା। ଏହି ଆର୍ଥିକ ସମାଧାନ ପରିବାରକୁ କିଛି ମାତ୍ରାରେ ଆଶ୍ୱସ୍ତି ଦେବ ବୋଲି ଆଶା କରାଯାଉଛି। ତେବେ ଏହି ୨୯ ମିଲିୟନ ଡଲାର ମଧ୍ୟରୁ ପ୍ରାୟ ୨୦ ମିଲିୟନ ଡଲାର ସହରର ବୀମା କମ୍ପାନୀ ବହନ କରିବ ବୋଲି ସୂଚନା ମିଳିଛି।

ନ୍ୟୁୟର୍କ: ଭାରତୀୟ ବଂଶୋଦ୍ଭବ ଡେମୋକ୍ରାଟ୍‌ ପାର୍ଟି ପ୍ରାର୍ଥୀ ଜୋହରାନ ମମ୍‌ଦାନୀ ଆମେରିକାର ଅନ୍ୟତମ ବୃହତ୍ତମ ସହର ନ୍ୟୁୟର୍କର ମେୟର ନିର୍ବାଚିତ ହୋଇ ଚାଞ୍ଚଲ୍ୟ ଖେଳାଇ ଦେଇଛନ୍ତି। ତାଙ୍କୁ ହରାଇବା ଲାଗି ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ସମସ୍ତ ରଣନୀତି ଫେଲ୍ ମାରିଛି। କେବଳ ଏତିକି ନୁହେଁ, ଟ୍ରମ୍ପଙ୍କ  ପ୍ରାର୍ଥୀ ତୃତୀୟ ସ୍ଥାନକୁ ଖସିଯାଇଛନ୍ତି। ରାଷ୍ଟ୍ରପତି ନିର୍ବାଚନ ପରେ ଆମେରିକାରେ ପ୍ରଥମ ଥର ଲାଗି ହୋଇଥିବା ଏହି ନିର୍ବାଚନରେ ରିପବ୍ଲିକାନ ପ୍ରୀର୍ଥୀଙ୍କ ଶୋଚନୀୟ ପରାଜୟ ଟ୍ରମ୍ପଙ୍କ ପାଇଁ ବଡ଼ ଧରଣର ଝଟକା ହୋଇଛି।

କେବଳ ନ୍ୟୁୟର୍କ ନୁହେଁ, ସିନସିନାଟି ଓ ଭିର୍ଜିନିଆରେ ମଧ୍ୟ ଟ୍ରମ୍ପଙ୍କ ପ୍ରାର୍ଥୀଙ୍କୁ ଝଟକା ଦେଇଛନ୍ତି ଆଉ ଦୁଇ ଜଣ ଭାରତୀୟ ବଂଶୋଦ୍ଭବ।  ସେମାନେ ହେଲେ ଆଫତାବ ପୁରେୱାଲ ଏବଂ ଗଜାଲା ହାସମୀ ଗତକାଲି ଅନୁଷ୍ଠିତ ନ୍ୟୁୟର୍କ ମେୟର ନିର୍ବାଚନରେ ବିଜୟୀ ହୋଇ ଇତିହାସ ରଚିଛନ୍ତି ମମଦାନୀ।  ୩୪ ବର୍ଷୀୟ ମମ୍‌ଦାନୀ ନ୍ୟୁୟର୍କର ସର୍ବକନିଷ୍ଠ,  ପ୍ରଥମ ଭାରତୀୟ ବଂଶୋଦ୍ଭବ ଓ ପ୍ରଥମ ମୁସ୍‌ଲିମ ମେୟର ଭାବେ ନିର୍ବାଚିତ ହୋଇଛନ୍ତି। ଗତ ଗତ ୧୦୦ ବର୍ଷରେ ପ୍ରଥମ ଥର ଲାଗି ନ୍ୟୁୟର୍କରେ ଏଭଳି ବ୍ୟକ୍ତି ମେୟର ନିର୍ବାଚିତ ହୋଇଥିବା କୁହାଯାଉଛି। ଜାନୁଆରୀ ପହିଲାରେ ସେ ନ୍ୟୁୟର୍କର ମେୟର ଭାବେ ଦାୟିତ୍ୱ ଗ୍ରହଣ କରିବେ।

ଏହା ଡେମୋକ୍ରାଟିକ ଦଳ ପାଇଁ ଏବ ବଡ଼ ବିଜୟ ବିବେଚିତ ହେଉଛି। ୧୯୬୯ ପରେ ନ୍ୟୁୟର୍କରେ ପ୍ରଥମଥର ପାଇଁ କୌଣସି ନେତାଙ୍କୁ ୧୦ ଲକ୍ଷ ଭୋଟ ମିଳିଛି। ମମ୍‌ଦାନୀଙ୍କୁ ୧୦ ଲକ୍ଷରୁ ଅଧିକ ଭୋଟ ମିଳିଛି। ମମ୍‌ଦାନୀ ନିର୍ବାଚନ ଜିତିବା ପରେ ନିଜ ଭାଷଣରେ ଭାରତର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହରୁଙ୍କ ବିଷୟରେ ଉଲ୍ଲେଖ କରିଥିଲେ। ମେୟର ଭାବେ ମମଦାନୀଙ୍କ ଅନେକ କ୍ଷମତା ଓ ଦାୟିତ୍ବ ରହିଛି। ତାଙ୍କ ଅଧୀନରେ ତିନି ଲକ୍ଷ କର୍ମଚାରୀ କାମ କରିବେ। ବିଭିନ୍ନ ବିଭାଗ ପାଇଁ ମୁଖ୍ୟ ନିଯୁକ୍ତ କରିବା ସହିତ ଜଜ ନିଯୁକ୍ତ କରିବାର କ୍ଷମତା ମଧ୍ୟ ରହିଛି।

ମମ୍‌ଦାନୀ ହେଉଛନ୍ତି ଭାରତୀୟ ଫିଲ୍ମ ନିର୍ଦ୍ଦେଶିକା ମୀରା ନାଏରଙ୍କ ପୁଅ। ତାଙ୍କ ପିତା ହେଉଛନ୍ତି ବିଶିଷ୍ଟ ଲେଖକ ଉଗାଣ୍ଡାରେ ଜନ୍ମିତ ମହମୁଦ ମମଦାନୀ। ମମଦାନୀଙ୍କ ପୂର୍ବପୁରୁଷ ଗୁଜରାଟରେ ରହୁଥିଲେ।  ସେ ୧୯୯୧ ଅକ୍ଟୋବର ୧୮ରେ ଉଗାଣ୍ଡାର କାମ୍ପାଲାରେ ଜନ୍ମଗ୍ରହଣ କରିଥିଲେ। ପ୍ରଥମେ ସେ ନିଜ ପରିବାର ସହ ଉଗାଣ୍ଡାରୁ ଦକ୍ଷିଣ ଆଫ୍ରିକା ଓ ପରେ ନ୍ୟୁୟର୍କ ସିଟିରେ ଆସି ରହିଥିଲେ।ଆଉ ଜଣେ ଭାରତୀୟ ବଂଶୋଦ୍ଭବ ୪୩ ବର୍ଷୀୟ ଆଫତାବ ପୁରେୱାଲ ପୁଣିଥରେ ଇତିହାସ ସୃଷ୍ଟି କରିଛନ୍ତି। ସେ ଆମେରିକା ଓହିଓ ରାଜ୍ୟର ସିନ୍‌ସିନାଟି ସହରର ମେୟର ନିର୍ବାଚିତ ହୋଇଛନ୍ତି। ସେ ଦ୍ୱିତିୀୟଥର ପାଇଁ ବିଜୟୀ ହୋଇ ଏହି ହାଇପ୍ରୋଫାଲ ପଦକୁ ନିର୍ବାଚିତ ହୋଇଛନ୍ତି।  ଡେମୋକ୍ରାଟିକ ଦଳ ତରଫରୁ ନିର୍ବାଚନ ଲଢିଥିବା ଆଫତାବ୍‌ ରିପବ୍ଲିକାନ ପ୍ରତିଦ୍ୱନ୍ଦ୍ୱୀ ତଥା ଆମେରିକା ଉପରାଷ୍ଟ୍ରପତି ଜେଡି ଭାନ୍ସଙ୍କ ସାବତ୍‌ ଭାଇ କୋରି ବୋମ୍ୟାନଙ୍କୁ ପରାସ୍ତ କରିଛନ୍ତି। ସେ ଏହାପୂର୍ବରୁ ୨୦୨୧ରେ ପ୍ରଥମ ଏସୀୟ ଆମେରିକୀୟ ଭାବେ ସିନ୍‌ସିନାଟିର ମେୟର ଭାବେ ନିର୍ବାଚିତ ହୋଇଥିଲେ। ସେ ଓହିଓରେ ଜଣେ ପଞ୍ଜାବୀ ପିତା ଓ ତିବ୍ବତୀୟ ମାଙ୍କଠାରୁ ଜନ୍ମଗ୍ରହଣ କରିଥିଲେ।

ସେହିଭଳି ଭାରତୀୟ ବଂଶୋଦ୍ଭବ ଡେମୋକ୍ରାଟ ପ୍ରାର୍ଥୀ ଗଜାଲା ହାସ୍‌ମୀ ଆମେରିକାର ଦକ୍ଷିଣପୂର୍ବ ରାଜ୍ୟ ଭିର୍ଜିନିଆର ଉପରାଜ୍ୟପାଳ ଭାବେ ନିର୍ବାଚିତ ହୋଇଛନ୍ତି। ସେ ରିପବ୍ଲିକାନ ପ୍ରାର୍ଥୀ ଜନ୍‌ ରେଡଙ୍କୁ ପରାସ୍ତ କରି ବାଜି ମାରିଛନ୍ତି। ହାସ୍‌ମୀ ପ୍ରଥମ ମୁସ୍‌ଲିମ ଓ ଦକ୍ଷିଣ ଏସିଆ ଆମେରିକୀୟ ଭାବେ ଭିର୍ଜିିନିଆ ସିନେଟ୍‌କୁ ନିର୍ବାଚିତ ହୋଇଛନ୍ତି। ୧୯୬୪ରେ ସେ ଭାରତର ହାଇଦରାବାଦ୍‌ରେ ଜିଆ ହାସମୀ ଓ ତନବୀର ହାସମୀଙ୍କଠାରୁ ଜନ୍ମଗ୍ରହଣ କରିଥିଲେ। ମହଲକପେଟ୍‌ରେ ସେ ନିଜର ଅଜା ଓ ଆଇ ଘରେ ବାଲ୍ୟକାଳ ବିତାଇଥିଲେ। ୪ ବର୍ଷ  ବୟସରେ ସେ ନିଜର ମା ଓ ବଡ଼ ଭାଇଙ୍କ ସହ ଆମେରିକା ଚାଲିଆସିଥିଲେ ଓ ଜର୍ଜିଆରେ ନିଜ ପିତାଙ୍କ ସହ ରହିଥିଲେ। ଗଜାଲାଙ୍କ ପିତା ଜିଆ ହାସ୍‌ମୀ ଜଣେ ଫ୍ରଫେସର ଥିଲେ।