ନିୟୁୟର୍କ: ଆମେରିକାର ନିୟୁୟର୍କ ମେୟର ଜୋହରାନ ମମଦାନୀ ଜଣେ ଛାତ୍ରୀଙ୍କ ମୁକ୍ତି ପାଇଁ ସିଧାସଳଖ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ କଥା ହୋଇଛନ୍ତି। ମେୟରଙ୍କ ଏହି ହସ୍ତକ୍ଷେପ ପରେ ଇମିଗ୍ରେସନ ଆଣ୍ଡ କଷ୍ଟମ୍ସ ଏନଫୋର୍ସମେଣ୍ଟ (ICE) ଏଜେଣ୍ଟମାନେ ତୁରନ୍ତ ଉକ୍ତ ଛାତ୍ରୀଙ୍କୁ ମୁକ୍ତ କରିଦେଇଛନ୍ତି। ମୁକୁଳିଥିବା ଛାତ୍ରୀ ଜଣଙ୍କ ନାମ ଏଲମିନା ଅଘାୟେଭା ବୋଲି ଜଣାପଡିଛି।

କିଏ ଏହି ଏଲମିନା?

ଏଲମିନା ଆମେରିକାର କଲମ୍ବିଆ ୟୁନିଭରସିଟିରେ ପାଠ ପଢନ୍ତି। ସେ ମୂଳତଃ ଅଜରବୈଜାନର ବାସିନ୍ଦା। ସୋସିଆଲ ମିଡିଆରେ ତାଙ୍କର ଏକ ଲକ୍ଷରୁ ଅଧିକ ଫଲୋଅର୍ସ ଅଛନ୍ତି ଏବଂ ସେ ଜଣେ ଜଣାଶୁଣା ଇନଫ୍ଲୁଏନ୍ସର। ସୂଚନା ଅନୁଯାୟୀ, ୨୦୧୬ ମସିହାରେ ତାଙ୍କର ଷ୍ଟୁଡେଣ୍ଟ ଭିସା ଅବଧି ଶେଷ ହୋଇଯାଇଥିଲା। ଏହି କାରଣରୁ ICE ତାଙ୍କୁ ଗିରଫ କରିଥିଲା। ଏଲମିନା ୟୁନିଭରସିଟିର ସ୍କୁଲ ଅଫ୍ ଜେନେରାଲ ଷ୍ଟଡିଜରେ ସିନିୟର ଛାତ୍ରୀ ଏବଂ ସେ ନ୍ୟୁରୋସାଇନ୍ସ ଓ ପଲିଟିକାଲ ସାଇନ୍ସରେ ଅଧ୍ୟୟନ କରୁଛନ୍ତି।

ଏଲମିନାଙ୍କୁ ଫେବୃଆରୀ ୨୬ରେ ଘଣ୍ଟା ଘଣ୍ଟା ଧରି DHS ହେପାଜତରେ ରଖାଯାଇଥିଲା। ଏନେଇ ମେୟର ଜୋହରାନ ମମଦାନୀ ଚିନ୍ତା ପ୍ରକଟ କରିବା ସହ ରାଷ୍ଟ୍ରପତି ଟ୍ରମ୍ପଙ୍କ ସହ ଫୋନରେ ଆଲୋଚନା କରିଥିଲେ। ଆଲୋଚନା ପରେ ଟ୍ରମ୍ପ ଏଲମିନାଙ୍କୁ ମୁକ୍ତ କରିବାକୁ ନିର୍ଦ୍ଦେଶ ଦେଇଥିଲେ। ମୁକୁଳିବା ପରେ ଏଲମିନା ସୋସିଆଲ ମିଡିଆରେ ଏକ ପୋଷ୍ଟ କରି ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି। ସେ ବର୍ତ୍ତମାନ ସୁରକ୍ଷିତ ଅଛନ୍ତି କିନ୍ତୁ ଏହି ଘଟଣା ଯୋଗୁଁ ସେ ମାନସିକ ସ୍ତରରେ ଆଘାତ ପାଇଥିବା କହିଛନ୍ତି।

ନୂଆଦିଲ୍ଲୀ: ଦୀର୍ଘ ୫ ବର୍ଷରୁ ଉର୍ଦ୍ଧ୍ୱ ସମୟ ଧରି ଜେଲରେ ଥିବା ଛାତ୍ର ନେତା ଉମର ଖାଲିଦଙ୍କ ସମର୍ଥନରେ ଏବେ ଆମେରିକାରୁ ସ୍ୱର ଉଠିବା ଆରମ୍ଭ ହୋଇଛି। ନିକଟରେ ନ୍ୟୁୟର୍କ ସିଟିର ନୂତନ ମେୟର ଭାବେ ଶପଥ ଗ୍ରହଣ କରିଥିବା ଜୋହରାନ ମମଦାନୀ ଉମରଙ୍କ ଉଦ୍ଦେଶ୍ୟରେ ଏକ ସମବେଦନାପୂର୍ଣ୍ଣ ଚିଠି ପଠାଇବା ପରେ, ବର୍ତ୍ତମାନ ଆମେରିକାର ୮ ଜଣ ପ୍ରମୁଖ ସାଂସଦ ଭାରତ ସରକାରଙ୍କୁ ଚିଠି ଲେଖି ଉମରଙ୍କ ପାଇଁ ନିରପେକ୍ଷ ବିଚାର ଦାବି କରିଛନ୍ତି।

ନ୍ୟୁୟର୍କ ସିଟିର ମେୟର ଜୋହରାନ ମମଦାନୀ ଶପଥ ଗ୍ରହଣ କରିବାର ଠିକ୍ ପରେ ପରେ ଉମର ଖାଲିଦଙ୍କ ପାଇଁ ଏକ ହାତ ଲେଖା ଚିଠି ପଠାଇଥିଲେ। ଉମରଙ୍କ ସହଯୋଗୀ ବନଜ୍ୟୋତ୍ସ୍ନା ଲାହିରି ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ଏହି ଚିଠିକୁ ସେୟାର କରିଛନ୍ତି। ମମଦାନୀ ତାଙ୍କ ଚିଠିରେ ଉଲ୍ଲେଖ କରିଛନ୍ତି ଯେ, ସେ ପ୍ରାୟତଃ ଉମରଙ୍କ ଲେଖା ଏବଂ ଜେଲ ଜୀବନର ସଂଘର୍ଷ ବିଷୟରେ ଚିନ୍ତା କରନ୍ତି। ବିଶେଷକରି "ତିକ୍ତତାକୁ ନିଜ ଭିତରେ ଘର କରିବାକୁ ନ ଦେବା" ସମ୍ପର୍କରେ ଉମରଙ୍କ ଚିନ୍ତାଧାରାକୁ ସେ ପ୍ରଶଂସା କରିଛନ୍ତି। ସେ ଆହୁରି ମଧ୍ୟ ଲେଖିଛନ୍ତି, "ଆମେ ସମସ୍ତେ ତୁମ କଥା ଭାବୁଛୁ।"

ମମଦାନୀଙ୍କ ଏହି ବାର୍ତ୍ତା ପରେ ଉମର ଖାଲିଦଙ୍କ ମାମଲା ଉପରେ ଆନ୍ତର୍ଜାତୀୟ ଦୃଷ୍ଟି ଆକର୍ଷିତ ହୋଇଛି। ଆମେରିକାର ୮ ଜଣ ସାଂସଦ ଭାରତୀୟ ରାଷ୍ଟ୍ରଦୂତ ବିନୟ ମୋହନ କ୍ୱାତ୍ରାଙ୍କୁ ଏକ ଚିଠି ଲେଖି ଆନ୍ତର୍ଜାତୀୟ ଆଇନ ଅନୁଯାୟୀ ଉମରଙ୍କୁ ଏକ ନିରପେକ୍ଷ ଏବଂ ସମୟୋଚିତ ବିଚାର ପ୍ରଦାନ କରିବାକୁ ଅନୁରୋଧ କରିଛନ୍ତି। ଏହି ଚିଠିର ନେତୃତ୍ୱ ନେଇଥିଲେ ଆମେରିକା ହାଉସ୍ ରୁଲ୍ସ କମିଟିର ବରିଷ୍ଠ ସଦସ୍ୟ ଜିମ୍ ମ୍ୟାକଗଭର୍ନ।

ସାଂସଦ ଜିମ୍ ମ୍ୟାକଗଭର୍ନ ଏକ ସାର୍ବଜନୀନ ପୋଷ୍ଟରେ କହିଛନ୍ତି ଯେ, ସେ ଏବଂ ଅନ୍ୟ ସାଂସଦମାନେ ଚଳିତ ମାସ ଆରମ୍ଭରେ ଉମରଙ୍କ ପିତାମାତାଙ୍କୁ ଭେଟିଥିଲେ। ୫ ବର୍ଷରୁ ଅଧିକ ସମୟ ଧରି ବିନା ବିଚାରରେ ଉମରଙ୍କୁ ଜେଲରେ ରଖାଯାଇଥିବାରୁ ସେମାନେ ଉଦବେଗ ପ୍ରକାଶ କରିଛନ୍ତି। ୟୁଏପିଏ ଅଧୀନରେ ଦୀର୍ଘ ଦିନର ଅଟକ ରଖିବା ନ୍ୟାୟିକ ପ୍ରକ୍ରିୟା ଏବଂ ନିର୍ଦ୍ଦୋଷତାର ଅନୁମାନ ଉପରେ ପ୍ରଶ୍ନବାଚୀ ସୃଷ୍ଟି କରୁଛି ବୋଲି ସେମାନେ ମତ ଦେଇଛନ୍ତି। ଏହି ଚିଠିରେ ସ୍ୱାକ୍ଷର କରିଥିବା ଅନ୍ୟ ସାଂସଦମାନଙ୍କ ମଧ୍ୟରେ ଜେମି ରାସ୍କିନ୍, କ୍ରିସ୍ ଭାନ୍ ହୋଲେନ୍, ପିଟର ୱେଲ୍ଚ, ପ୍ରମିଳା ଜୟପାଲ ଏବଂ ରସିଦା ତଲିବ ପ୍ରମୁଖ ସାମିଲ ଅଛନ୍ତି।

ଜେଏନୟୁ (JNU)ର ପୂର୍ବତନ ଛାତ୍ର ଉମର ଖାଲିଦଙ୍କୁ ସେପ୍ଟେମ୍ବର ୨୦୨୦ରେ ଦିଲ୍ଲୀ ଦଙ୍ଗା ମାମଲାରେ ଷଡ଼ଯନ୍ତ୍ର ଅଭିଯୋଗରେ ଗିରଫ କରାଯାଇଥିଲା। ତାଙ୍କ ବିରୋଧରେ ବେଆଇନ କାର୍ଯ୍ୟକଳାପ ନିବାରଣ ଆଇନ ଲଗାଯାଇଛି। ତେବେ ଉମର ଏହି ସମସ୍ତ ଅଭିଯୋଗକୁ ଖଣ୍ଡନ କରିଆସୁଛନ୍ତି। ବର୍ତ୍ତମାନ ତାଙ୍କର ଜାମିନ ଆବେଦନ ସୁପ୍ରିମକୋର୍ଟରେ ବିଚାରାଧୀନ ରହିଛି।

ନୂଆଦିଲ୍ଲୀ: ନ୍ୟୁୟର୍କ ସିଟିର ନୂତନ ମେୟର ଭାବରେ ଦାୟିତ୍ୱ ଗ୍ରହଣ କରିଛନ୍ତି ଭାରତୀୟ ବଂଶୋଦ୍ଭବ ଜୋହରାନ ମମଦାନୀ। ଗୁରୁବାର ମଧ୍ୟରାତ୍ରି ପରେ ମ୍ୟାନହଟ୍ଟନର ଏକ ଐତିହାସିକ ତଥା ବନ୍ଦ ପଡିଥିବା ସବୱେ ଷ୍ଟେସନରେ ସେ ଆନୁଷ୍ଠାନିକ ଭାବେ ଶପଥ ଗ୍ରହଣ କରିଛନ୍ତି। ୩୪ ବର୍ଷୀୟ ଡେମୋକ୍ରାଟ୍ ନେତା ଜୋହରାନ ଆମେରିକାର ସବୁଠାରୁ ବଡ ସହରର ପ୍ରଥମ ମୁସଲିମ ମେୟର ହୋଇ ଇତିହାସ ସୃଷ୍ଟି କରିଛନ୍ତି।

ପୁରାତନ ସିଟି ହଲ୍ ସବୱେ ଷ୍ଟେସନରେ ଆୟୋଜିତ ଏହି ସ୍ୱତନ୍ତ୍ର ସମାରୋହରେ ଜୋହରାନ କୁରାନ ଉପରେ ହାତ ରଖି ଶପଥ ନେଇଥିଲେ। ନ୍ୟୁୟର୍କର ଆଟର୍ଣ୍ଣି ଜେନେରାଲ ଲେଟିଟିଆ ଜେମ୍ସ ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ ଏବଂ ଏହି ସମୟରେ ତାଙ୍କ ପତ୍ନୀ ରମା ଦୁୱାଜି କୁରାନ ଧରିଥିଲେ। ମେୟର ଭାବରେ ନିଜର ପ୍ରଥମ ଅଭିଭାଷଣରେ ସେ ଏହି ସ୍ଥାନକୁ ସହରର ଜୀବନରେଖା ବୋଲି ବର୍ଣ୍ଣନା କରିଥିଲେ। ଏହି ଅବସରରେ ସେ ମାଇକ୍ ଫ୍ଲିନ୍ଙ୍କୁ ସହରର ପରିବହନ ବିଭାଗର କମିଶନର ଭାବେ ଘୋଷଣା କରିଥିଲେ।

ରିପୋର୍ଟ ଅନୁଯାୟୀ, ଜୋହରାନ ପୁନର୍ବାର ସିଟି ହଲ୍‌ରେ ଏକ ବଡ଼ ସାଧାରଣ କାର୍ଯ୍ୟକ୍ରମରେ ଶପଥ ନେବେ, ଯାହାକୁ ଆମେରିକୀୟ ସିନେଟର ବର୍ଣ୍ଣି ସ୍ୟାଣ୍ଡର୍ସ ପରିଚାଳନା କରିବେ। ୧୯୯୧ ମସିହାରେ ଉଗାଣ୍ଡାରେ ଜନ୍ମିତ ଜୋହରାନ ହେଉଛନ୍ତି ପ୍ରସିଦ୍ଧ ଚଳଚ୍ଚିତ୍ର ନିର୍ମାତା ମୀରା ନାୟାର ଏବଂ ଶିକ୍ଷାବିତ୍ ମହମୁଦ ମମଦାନୀଙ୍କ ପୁତ୍ର। ସେ କେବଳ ପ୍ରଥମ ମୁସଲିମ ନୁହନ୍ତି, ବରଂ ଦକ୍ଷିଣ ଏସୀୟ ବଂଶୋଦ୍ଭବ ତଥା ଆଫ୍ରିକାରେ ଜନ୍ମିତ ପ୍ରଥମ ବ୍ୟକ୍ତି ଭାବେ ନ୍ୟୁୟର୍କର ମେୟର ହୋଇଛନ୍ତି।

ନ୍ୟୁୟର୍କ: ଭାରତୀୟ ବଂଶୋଦ୍ଭବ ଡେମୋକ୍ରାଟ୍‌ ପାର୍ଟି ପ୍ରାର୍ଥୀ ଜୋହରାନ ମମ୍‌ଦାନୀ ଆମେରିକାର ଅନ୍ୟତମ ବୃହତ୍ତମ ସହର ନ୍ୟୁୟର୍କର ମେୟର ନିର୍ବାଚିତ ହୋଇ ଚାଞ୍ଚଲ୍ୟ ଖେଳାଇ ଦେଇଛନ୍ତି। ତାଙ୍କୁ ହରାଇବା ଲାଗି ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ସମସ୍ତ ରଣନୀତି ଫେଲ୍ ମାରିଛି। କେବଳ ଏତିକି ନୁହେଁ, ଟ୍ରମ୍ପଙ୍କ  ପ୍ରାର୍ଥୀ ତୃତୀୟ ସ୍ଥାନକୁ ଖସିଯାଇଛନ୍ତି। ରାଷ୍ଟ୍ରପତି ନିର୍ବାଚନ ପରେ ଆମେରିକାରେ ପ୍ରଥମ ଥର ଲାଗି ହୋଇଥିବା ଏହି ନିର୍ବାଚନରେ ରିପବ୍ଲିକାନ ପ୍ରୀର୍ଥୀଙ୍କ ଶୋଚନୀୟ ପରାଜୟ ଟ୍ରମ୍ପଙ୍କ ପାଇଁ ବଡ଼ ଧରଣର ଝଟକା ହୋଇଛି।

କେବଳ ନ୍ୟୁୟର୍କ ନୁହେଁ, ସିନସିନାଟି ଓ ଭିର୍ଜିନିଆରେ ମଧ୍ୟ ଟ୍ରମ୍ପଙ୍କ ପ୍ରାର୍ଥୀଙ୍କୁ ଝଟକା ଦେଇଛନ୍ତି ଆଉ ଦୁଇ ଜଣ ଭାରତୀୟ ବଂଶୋଦ୍ଭବ।  ସେମାନେ ହେଲେ ଆଫତାବ ପୁରେୱାଲ ଏବଂ ଗଜାଲା ହାସମୀ ଗତକାଲି ଅନୁଷ୍ଠିତ ନ୍ୟୁୟର୍କ ମେୟର ନିର୍ବାଚନରେ ବିଜୟୀ ହୋଇ ଇତିହାସ ରଚିଛନ୍ତି ମମଦାନୀ।  ୩୪ ବର୍ଷୀୟ ମମ୍‌ଦାନୀ ନ୍ୟୁୟର୍କର ସର୍ବକନିଷ୍ଠ,  ପ୍ରଥମ ଭାରତୀୟ ବଂଶୋଦ୍ଭବ ଓ ପ୍ରଥମ ମୁସ୍‌ଲିମ ମେୟର ଭାବେ ନିର୍ବାଚିତ ହୋଇଛନ୍ତି। ଗତ ଗତ ୧୦୦ ବର୍ଷରେ ପ୍ରଥମ ଥର ଲାଗି ନ୍ୟୁୟର୍କରେ ଏଭଳି ବ୍ୟକ୍ତି ମେୟର ନିର୍ବାଚିତ ହୋଇଥିବା କୁହାଯାଉଛି। ଜାନୁଆରୀ ପହିଲାରେ ସେ ନ୍ୟୁୟର୍କର ମେୟର ଭାବେ ଦାୟିତ୍ୱ ଗ୍ରହଣ କରିବେ।

ଏହା ଡେମୋକ୍ରାଟିକ ଦଳ ପାଇଁ ଏବ ବଡ଼ ବିଜୟ ବିବେଚିତ ହେଉଛି। ୧୯୬୯ ପରେ ନ୍ୟୁୟର୍କରେ ପ୍ରଥମଥର ପାଇଁ କୌଣସି ନେତାଙ୍କୁ ୧୦ ଲକ୍ଷ ଭୋଟ ମିଳିଛି। ମମ୍‌ଦାନୀଙ୍କୁ ୧୦ ଲକ୍ଷରୁ ଅଧିକ ଭୋଟ ମିଳିଛି। ମମ୍‌ଦାନୀ ନିର୍ବାଚନ ଜିତିବା ପରେ ନିଜ ଭାଷଣରେ ଭାରତର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହରୁଙ୍କ ବିଷୟରେ ଉଲ୍ଲେଖ କରିଥିଲେ। ମେୟର ଭାବେ ମମଦାନୀଙ୍କ ଅନେକ କ୍ଷମତା ଓ ଦାୟିତ୍ବ ରହିଛି। ତାଙ୍କ ଅଧୀନରେ ତିନି ଲକ୍ଷ କର୍ମଚାରୀ କାମ କରିବେ। ବିଭିନ୍ନ ବିଭାଗ ପାଇଁ ମୁଖ୍ୟ ନିଯୁକ୍ତ କରିବା ସହିତ ଜଜ ନିଯୁକ୍ତ କରିବାର କ୍ଷମତା ମଧ୍ୟ ରହିଛି।

ମମ୍‌ଦାନୀ ହେଉଛନ୍ତି ଭାରତୀୟ ଫିଲ୍ମ ନିର୍ଦ୍ଦେଶିକା ମୀରା ନାଏରଙ୍କ ପୁଅ। ତାଙ୍କ ପିତା ହେଉଛନ୍ତି ବିଶିଷ୍ଟ ଲେଖକ ଉଗାଣ୍ଡାରେ ଜନ୍ମିତ ମହମୁଦ ମମଦାନୀ। ମମଦାନୀଙ୍କ ପୂର୍ବପୁରୁଷ ଗୁଜରାଟରେ ରହୁଥିଲେ।  ସେ ୧୯୯୧ ଅକ୍ଟୋବର ୧୮ରେ ଉଗାଣ୍ଡାର କାମ୍ପାଲାରେ ଜନ୍ମଗ୍ରହଣ କରିଥିଲେ। ପ୍ରଥମେ ସେ ନିଜ ପରିବାର ସହ ଉଗାଣ୍ଡାରୁ ଦକ୍ଷିଣ ଆଫ୍ରିକା ଓ ପରେ ନ୍ୟୁୟର୍କ ସିଟିରେ ଆସି ରହିଥିଲେ।ଆଉ ଜଣେ ଭାରତୀୟ ବଂଶୋଦ୍ଭବ ୪୩ ବର୍ଷୀୟ ଆଫତାବ ପୁରେୱାଲ ପୁଣିଥରେ ଇତିହାସ ସୃଷ୍ଟି କରିଛନ୍ତି। ସେ ଆମେରିକା ଓହିଓ ରାଜ୍ୟର ସିନ୍‌ସିନାଟି ସହରର ମେୟର ନିର୍ବାଚିତ ହୋଇଛନ୍ତି। ସେ ଦ୍ୱିତିୀୟଥର ପାଇଁ ବିଜୟୀ ହୋଇ ଏହି ହାଇପ୍ରୋଫାଲ ପଦକୁ ନିର୍ବାଚିତ ହୋଇଛନ୍ତି।  ଡେମୋକ୍ରାଟିକ ଦଳ ତରଫରୁ ନିର୍ବାଚନ ଲଢିଥିବା ଆଫତାବ୍‌ ରିପବ୍ଲିକାନ ପ୍ରତିଦ୍ୱନ୍ଦ୍ୱୀ ତଥା ଆମେରିକା ଉପରାଷ୍ଟ୍ରପତି ଜେଡି ଭାନ୍ସଙ୍କ ସାବତ୍‌ ଭାଇ କୋରି ବୋମ୍ୟାନଙ୍କୁ ପରାସ୍ତ କରିଛନ୍ତି। ସେ ଏହାପୂର୍ବରୁ ୨୦୨୧ରେ ପ୍ରଥମ ଏସୀୟ ଆମେରିକୀୟ ଭାବେ ସିନ୍‌ସିନାଟିର ମେୟର ଭାବେ ନିର୍ବାଚିତ ହୋଇଥିଲେ। ସେ ଓହିଓରେ ଜଣେ ପଞ୍ଜାବୀ ପିତା ଓ ତିବ୍ବତୀୟ ମାଙ୍କଠାରୁ ଜନ୍ମଗ୍ରହଣ କରିଥିଲେ।

ସେହିଭଳି ଭାରତୀୟ ବଂଶୋଦ୍ଭବ ଡେମୋକ୍ରାଟ ପ୍ରାର୍ଥୀ ଗଜାଲା ହାସ୍‌ମୀ ଆମେରିକାର ଦକ୍ଷିଣପୂର୍ବ ରାଜ୍ୟ ଭିର୍ଜିନିଆର ଉପରାଜ୍ୟପାଳ ଭାବେ ନିର୍ବାଚିତ ହୋଇଛନ୍ତି। ସେ ରିପବ୍ଲିକାନ ପ୍ରାର୍ଥୀ ଜନ୍‌ ରେଡଙ୍କୁ ପରାସ୍ତ କରି ବାଜି ମାରିଛନ୍ତି। ହାସ୍‌ମୀ ପ୍ରଥମ ମୁସ୍‌ଲିମ ଓ ଦକ୍ଷିଣ ଏସିଆ ଆମେରିକୀୟ ଭାବେ ଭିର୍ଜିିନିଆ ସିନେଟ୍‌କୁ ନିର୍ବାଚିତ ହୋଇଛନ୍ତି। ୧୯୬୪ରେ ସେ ଭାରତର ହାଇଦରାବାଦ୍‌ରେ ଜିଆ ହାସମୀ ଓ ତନବୀର ହାସମୀଙ୍କଠାରୁ ଜନ୍ମଗ୍ରହଣ କରିଥିଲେ। ମହଲକପେଟ୍‌ରେ ସେ ନିଜର ଅଜା ଓ ଆଇ ଘରେ ବାଲ୍ୟକାଳ ବିତାଇଥିଲେ। ୪ ବର୍ଷ  ବୟସରେ ସେ ନିଜର ମା ଓ ବଡ଼ ଭାଇଙ୍କ ସହ ଆମେରିକା ଚାଲିଆସିଥିଲେ ଓ ଜର୍ଜିଆରେ ନିଜ ପିତାଙ୍କ ସହ ରହିଥିଲେ। ଗଜାଲାଙ୍କ ପିତା ଜିଆ ହାସ୍‌ମୀ ଜଣେ ଫ୍ରଫେସର ଥିଲେ।