୯୦ ଦଶକର ପ୍ରସିଦ୍ଧ ଅଭିନେତା ଗୋବିନ୍ଦା ନିଜର କ୍ୟାରିୟର ଏବଂ ଇଣ୍ଡଷ୍ଟ୍ରିର ରାଜନୀତିକୁ ନେଇ ବଡ଼ ଖୁଲାସା କରିଛନ୍ତି। ସେ ନିଜ ଜୀବନର କଠିନ ସମୟ, ବିଶେଷ କରି ଚର୍ଚ୍ଚିତ 'ଥାପ୍ପଡ଼ କାଣ୍ଡ' ଏବଂ ସୋସିଆଲ ମିଡିଆରେ ବ୍ୟାପିଥିବା ଗୁଜବ ବିଷୟରେ ଖୋଲାଖୋଲି ଭାବେ ଆଲୋଚନା କରିଛନ୍ତି। ନିକଟରେ ମୁକେଶ ଖାନ୍ନା-ଙ୍କ ପୋଡକାଷ୍ଟରେ ଯୋଗ ଦେଇ ସେ ବଲିଉଡର କଳା ସତ୍ୟ ସାମ୍ନାକୁ ଆଣିଛନ୍ତି।
ଥାପ୍ପଡ଼ କାଣ୍ଡ ଏବଂ ବଦଳିଥିବା ଭାଗ୍ୟ
ମୁକେଶ ଖାନ୍ନାଙ୍କ ପୋଡକାଷ୍ଟରେ ଗୋବିନ୍ଦା କହିଛନ୍ତି ଯେ ଏକ ଥାପ୍ପଡ଼ କାଣ୍ଡ ତାଙ୍କ ଭାଗ୍ୟ ବଦଳାଇ ଦେଇଥିଲା। ସେ କହିଛନ୍ତି, "ଜଣେ ବ୍ୟକ୍ତି ମୋ ସହ ଖରାପ ବ୍ୟବହାର କରୁଥିଲା, ତେଣୁ ମୁଁ ତାକୁ ଚାପୁଡ଼ା ମାରିଥିଲି। ସେହି ମାମଲା ମୋ ପାଇଁ ବହୁତ ଲକି ସାବ୍ୟସ୍ତ ହୋଇଥିଲା। ମାମଲାଟି ୯ ବର୍ଷ ଧରି ଚାଲିଥିଲା। ଶେଷରେ ମୁଁ ସେହି ବ୍ୟକ୍ତିର ଏକ ଭିଡିଓ ରେକର୍ଡ କରି କୋର୍ଟରେ ପେଶ କରିଥିଲି |" ତେବେ ଏହି ଘଟଣାରୁ ତାଙ୍କୁ ଇଣ୍ଡଷ୍ଟ୍ରିର ପ୍ରକୃତ ଚେହେରା ଦେଖିବାକୁ ମିଳିଥିଲା। ଗୋବିନ୍ଦା କ୍ଷୋଭର ସହ ପ୍ରକାଶ କରିଛନ୍ତି ଯେ, ଏହି ସମୟରେ ଇଣ୍ଡଷ୍ଟ୍ରିର କୌଣସି ବ୍ୟକ୍ତି ତାଙ୍କ ସମର୍ଥନରେ ଛିଡ଼ା ହୋଇନଥିଲେ, ଏପରିକି ଯେଉଁମାନେ ତାଙ୍କ ଯୋଗୁଁ ନାମ କମାଇଥିଲେ, ସେମାନେ ମଧ୍ୟ ନୀରବ ରହିଥିଲେ। ଏଥିଯୋଗୁଁ ତାଙ୍କର ବିଶ୍ୱାସ ଭାଙ୍ଗିଯାଇଥିଲା।
ଇଣ୍ଡଷ୍ଟ୍ରି ପଲିଟିକ୍ସ ଉପରେ କ୍ଷୋଭ
ଗୋବିନ୍ଦା ନିଜର କ୍ୟାରିୟର ପତନ ପାଇଁ ନିଜେ ଦାୟୀ ବୋଲି ସୋସିଆଲ ମିଡିଆରେ ଚାଲିଥିବା ଖବରକୁ ନେଇ ମଧ୍ୟ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, "କେବେ କେବେ ମୁହଁ ଖୋଲିବା ଜରୁରୀ ହୋଇପଡ଼େ। ଯଦି ଆପଣ ଚୁପ୍ ରହିବେ, ତେବେ ଲୋକେ ଭାବିବେ ଯେ ପ୍ରକୃତରେ ଆପଣଙ୍କର କିଛି ଦୋଷ ଅଛି |" ସେ ଆହୁରି ମଧ୍ୟ କହିଛନ୍ତି ଯେ ଯେଉଁମାନେ ତାଙ୍କ କ୍ୟାରିୟରକୁ ନଷ୍ଟ କରିବାକୁ ଚାହୁଁଛନ୍ତି, ସେମାନଙ୍କୁ ସେ ହିଁ ସଜାଇଥିଲେ। ଗୋବିନ୍ଦାଙ୍କ ମତରେ ତାଙ୍କୁ ବିନା କାରଣରେ ଗାଳି ଶୁଣିବାକୁ ପଡ଼ିଛି। ସେ ନିଜର ସଂଘର୍ଷର ଦିନଗୁଡ଼ିକୁ ମନେ ପକାଇ କହିଛନ୍ତି ଯେ ମୁଁ ଲୋକାଲ ଟ୍ରେନରେ ସିଟ୍ ପାଇବା ପାଇଁ ମଧ୍ୟ ଗାଳି ଶୁଣିଛି। ବିନା କାରଣରେ ଆମେ ଗାଳି ଖାଇଛୁ, ତେଣୁ କେହି ଆମକୁ କଣ ବଦନାମ କରିପାରିବେ?
ବଲିଉଡର ଦୋଗଲାପଣକୁ ନିନ୍ଦା
ବଲିଉଡ ଶବ୍ଦ ହିଁ ଭୁଲ ବୋଲି ଗୋବିନ୍ଦା କହିଛନ୍ତି। ତାଙ୍କ ମତରେ ଏଠାରେ ଲୋକଙ୍କୁ ରୋଗ ଆପେ ଆପେ ହୁଏ ନାହିଁ ବରଂ ରୋଗ ଦିଆଯାଏ। ଏମାନେ ଭଲ ଲୋକ ନୁହଁନ୍ତି। କିଛି ଭଲ ଏବଂ ସମ୍ଭ୍ରାନ୍ତ ଲୋକ ଅଛନ୍ତି। ମୁଁ କହୁଛି ଯାହାକୁ ଯେମିତି ରୋଜଗାର କରିବାର ଅଛି କରନ୍ତୁ, କିନ୍ତୁ କାହାର ହୃଦୟରେ ରହି ତାଙ୍କୁ ଧୋକା ଦିଅନ୍ତୁ ନାହିଁ। ସୂଚନାଯୋଗ୍ୟ ଯେ, ଗୋବିନ୍ଦାଙ୍କ ବ୍ୟକ୍ତିଗତ ଜୀବନ ଓ ପତ୍ନୀ ସୁନୀତା ଆହୁଜା-ଙ୍କୁ ନେଇ ମଧ୍ୟ ଅନେକ ସମୟରେ ବିବାଦ ଦେଖିବାକୁ ମିଳିଛି। ତେବେ ଗୋବିନ୍ଦା ଏବେ ନିଜର ଅତୀତକୁ ପଛରେ ପକାଇ ପ୍ରଶଂସକମାନଙ୍କ ହୃଦୟରେ ଆଜି ମଧ୍ୟ ରାଜ କରୁଛନ୍ତି |

ବଲିଉଡର ଲୋକପ୍ରିୟ ଅଭିନେତା ଗୋବିନ୍ଦା ନିକଟରେ ନିଜ ପତ୍ନୀ ସୁନୀତା ଆହୁଜାଙ୍କ ଏକ ଅଭିଯୋଗ ଉପରେ ନିରବତା ଭାଙ୍ଗିଛନ୍ତି। ସୁନୀତା ଅଭିଯୋଗ କରିଥିଲେ ଯେ ଗୋବିନ୍ଦା ସେମାନଙ୍କ ପୁଅ ଯଶବର୍ଦ୍ଧନ ଆହୁଜାଙ୍କ ବଲିଉଡ କ୍ୟାରିୟର ଗଢିବାରେ କୌଣସି ସାହାଯ୍ୟ କରିନାହାନ୍ତି। ଏହାର ଜବାବରେ ଗୋବିନ୍ଦା କହିଛନ୍ତି ଯେ ସେ କେବଳ ନିଜ ପିଲାମାନଙ୍କ ଭବିଷ୍ୟତ ପାଇଁ ହିଁ ରାଜନୀତିରୁ ଦୂରେଇ ଯାଇଥିଲେ।

ସାଜିଦ୍ ନାଦିଆଡୱାଲାଙ୍କୁ କରିଥିଲେ ଅନୁରୋଧ

ଏକ ସାକ୍ଷାତକାରରେ ଗୋବିନ୍ଦା ସ୍ପଷ୍ଟ କରିଛନ୍ତି ଯେ ସେ ପୁଅର କ୍ୟାରିୟର ପାଇଁ ଚେଷ୍ଟା କରିଥିଲେ। ସେ ପ୍ରଖ୍ୟାତ ପ୍ରଯୋଜକ ସାଜିଦ୍ ନାଦିଆଡୱାଲାଙ୍କୁ ଭେଟି ଯଶବର୍ଦ୍ଧନଙ୍କୁ ଫିଲ୍ମ ନିର୍ମାଣ ସମ୍ପର୍କରେ ମାର୍ଗଦର୍ଶନ ଦେବାକୁ ଅନୁରୋଧ କରିଥିଲେ। ଗୋବିନ୍ଦା କହିଛନ୍ତି, "ମୁଁ ସାଜିଦଙ୍କୁ ଅନୁରୋଧ କରିଥିଲି ଏବଂ ସେ ଯଶବର୍ଦ୍ଧନଙ୍କୁ ଗାଇଡ୍ ମଧ୍ୟ କରିଥିଲେ। କିନ୍ତୁ ଏ ବିଷୟରେ ମୋତେ କେହି ବିଶେଷ ପଚାରି ନଥିଲେ।"

ରାଜନୀତି ଛାଡିବାର କାରଣ

ଗୋବିନ୍ଦା କହିଛନ୍ତି ଯେ ଯେତେବେଳେ ସେ ରାଜନୀତି ଛାଡିଲେ, ସେତେବେଳେ ତାଙ୍କର ଏକମାତ୍ର ଉଦ୍ଦେଶ୍ୟ ଥିଲା ପରିବାରର ସୁରକ୍ଷା। ସେ ଚାହୁଁ ନଥିଲେ ଯେ ରାଜନୀତିର ପ୍ରଭାବ ତାଙ୍କ ପିଲାମାନଙ୍କ ଉପରେ ପଡୁ। "ମୋ ପରିବାର ଏବଂ ପିଲାମାନଙ୍କୁ କୌଣସି ଅସୁବିଧା ନ ହେଉ, ସେଥିପାଇଁ ମୁଁ ରାଜନୀତିରୁ ସନ୍ନ୍ୟାସ ନେଇଥିଲି," ବୋଲି ଗୋବିନ୍ଦା ପ୍ରକାଶ କରିଛନ୍ତି।

ସୁନୀତାଙ୍କ ଅଭିଯୋଗ କଣ ଥିଲା?

ପୂର୍ବରୁ ଏକ ସାକ୍ଷାତକାରରେ ସୁନୀତା ଆହୁଜା କ୍ଷୋଭ ପ୍ରକାଶ କରି କହିଥିଲେ ଯେ ଯଶବର୍ଦ୍ଧନ ଜଣେ 'ସେଲ୍ଫ ମେଡ୍' (ନିଜେ ଗଢିଥିବା) କଳାକାର। ସେ ଅଭିଯୋଗ କରିଥିଲେ ଯେ ଶାହରୁଖ ଖାନ ଓ ସୁନୀଲ ଶେଟ୍ଟୀଙ୍କ ଭଳି ଷ୍ଟାରମାନେ ନିଜ ପିଲାଙ୍କୁ ସାହାଯ୍ୟ କରୁଥିବା ବେଳେ ଗୋବିନ୍ଦା ନିଜ ପୁଅ ପାଇଁ କାହାକୁ କଲ୍ ମଧ୍ୟ କରିନାହାନ୍ତି। ଯଶବର୍ଦ୍ଧନଙ୍କୁ ନିଜ ଚେଷ୍ଟାରେ ଅନେକ ଅଡିସନ୍ ଦେବାକୁ ପଡିଛି ବୋଲି ସୁନୀତା ଦାବି କରିଥିଲେ।

ମୁମ୍ବାଇ: ଦୀର୍ଘ ଦିନ ଧରି ବି-ଟାଉନରେ ଚାଲିଥିବା ଚର୍ଚ୍ଚା ସତ ହୋଇଛି। ଶେଷରେ ସୁପରଷ୍ଟାର ଗୋବିନ୍ଦାଙ୍କ ଛାଡ଼ପତ୍ର ହେବାକୁ ଯାଉଛି। ପତ୍ନୀ ସୁନିତା ଏହି ଅଭିନେତାଙ୍କ ଠାରୁ ଅଲଗା ହେବାକୁ ନିଷ୍ପତ୍ତି ନେଇଛନ୍ତି। ଏଥିପାଇଁ ସେ ବାନ୍ଦ୍ରା ପରିବାର କୋର୍ଟରେ ଛାଡ଼ପତ୍ର ଆବେଦନ କରିଛନ୍ତି। ଆଉ ସ୍ବାମୀ ଗୋବିନ୍ଦାଙ୍କ ବିରୋଧରେ ଗମ୍ଭୀର ଅଭିଯୋଗ ମଧ୍ୟ ଲଗାଇଛନ୍ତି। ଗୋବିନ୍ଦା ଅନ୍ୟ ମହିଳାଙ୍କ ସହ ଶାରୀରିକ ସମ୍ବନ୍ଧ ରଖିଥିବା ଏବଂ ନିଷ୍ଠୁରତାର ଅଭିଯୋଗ ଲଗାଇ ସୁନିତା ଏହି ଆବେଦନ କରିଥିବା ସୂଚନା ମିଳିଛି। ତେବେ ଗୋବିନ୍ଦାଙ୍କ କିଛି ଘନିଷ୍ଠ ଏହି ଖବରକୁ ଭ୍ରମାତ୍ମକ କହିଥିବା ରିପୋର୍ଟ ପ୍ରକାଶ ପାଇଛି।

ସୂଚନା ଅନୁଯାୟୀ ପରିବାର କୋର୍ଟ ଏ ନେଇ ଗତ ମେ’ ୨୫ ତାରିଖରେ ଗୋବିନ୍ଦାଙ୍କୁ ସମନ ଜାରି କରିଥିଲେ। ପରେ ଜୁନ୍‌ରୁ ଉଭୟେ ମାମଲାର ସମାଧାନ ଲାଗି ପ୍ରୟାସ କରୁଛନ୍ତି। ସୁନିତା ଶୁଣାଣି ସମୟରେ କୋର୍ଟରେ ହାଜର ହେଉଥିବାବେଳେ ଗୋବିନ୍ଦା ଉପସ୍ଥିତ ହୋଇନାହାନ୍ତି। ପୂର୍ବରୁ ଜଣେ ମରାଠୀ ଅଭିନେତ୍ରୀଙ୍କ ସହ ଗୋବିନ୍ଦାଙ୍କ ନାମ ଯୋଡ଼ା ଯାଉଥିଲା।