ଆଲ୍ଲାହାବାଦ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇ କହିଛନ୍ତି ଯେ ସ୍କୁଲ୍ ୟୁନିଫର୍ମ ସହ ହିଜାବ ପିନ୍ଧିବାକୁ ଅନୁମତି ଦିଆଯାଇପାରିବ ନାହିଁ। ବିଦ୍ୟାଳୟ ପରିସରରେ ଶୃଙ୍ଖଳା ଏବଂ ସମାନତା ବଜାୟ ରଖିବା ପାଇଁ ସମସ୍ତଙ୍କ ନିମନ୍ତେ ସମାନ ଡ୍ରେସ କୋଡ୍ (ସମାନ ୟୁନିଫର୍ମ) ଲାଗୁ ହେବା ଉଚିତ ବୋଲି କୋର୍ଟ ସ୍ପଷ୍ଟ କରିଛନ୍ତି। ଏହି ପ୍ରସଙ୍ଗରେ ହାଇକୋର୍ଟ ଛାତ୍ରୀଙ୍କ ଆବେଦନକୁ ଖାରଜ କରିଛନ୍ତି।

ହିଜାବ ବିବାଦ ଉପରେ ହାଇକୋର୍ଟଙ୍କ ବଡ଼ ରାୟ

ଉତ୍ତରପ୍ରଦେଶର ପ୍ରୟାଗରାଜ ସ୍ଥିତ ଟାଗୋର ପବ୍ଲିକ୍ ସ୍କୁଲର ଜଣେ ମୁସଲିମ୍ ଛାତ୍ରୀଙ୍କ ଆବେଦନ ଉପରେ ଶୁଣାଣି କରି କୋର୍ଟ ଏହି ରାୟ ପ୍ରଦାନ କରିଛନ୍ତି। ଏହି ଛାତ୍ରୀ ଜଣକ ସ୍କୁଲ୍ ୟୁନିଫର୍ମ ସହିତ ହିଜାବ ବା ହେଡ୍ ସ୍କାର୍ଫ ପିନ୍ଧିବାକୁ ଅନୁମତି ମାଗି ଏକ ପିଟିସନ ଦାଖଲ କରିଥିଲେ। ବିଚାରପତି ଜେଜେ ମୁନିର ଏବଂ ବିଚାରପତି ଇନ୍ଦ୍ରଜିତ୍ ଶୁକ୍ଳାଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି କହିଛନ୍ତି ଯେ, ହିଜାବ ପିନ୍ଧିବା ଇସଲାମ ଧର୍ମର କୌଣସି ଅତ୍ୟାବଶ୍ୟକ ଧାର୍ମିକ ପ୍ରଥା ନୁହେଁ।

ଛାତ୍ରୀଙ୍କ ଯୁକ୍ତି ଏବଂ ସ୍କୁଲର ନିଷ୍ପତ୍ତି

ଆବେଦନକାରୀ ଛାତ୍ରୀ ଜଣକ ଦଶମ ଶ୍ରେଣୀ ପାସ୍ କରିବା ପରେ ଏକାଦଶ ଶ୍ରେଣୀରେ ନାମ ଲେଖାଇବାକୁ ଯାଉଥିଲେ। ସେ ପୂର୍ବରୁ ହିଜାବ ପିନ୍ଧି ସ୍କୁଲ ଆସୁଥିଲେ ବୋଲି ଯୁକ୍ତି ବାଢିଥିଲେ, କିନ୍ତୁ ଏଥର ସ୍କୁଲ କର୍ତ୍ତୃପକ୍ଷ ତାଙ୍କୁ ହିଜାବ ପିନ୍ଧିବାକୁ ବାରଣ କରିଥିଲେ ଏବଂ ଆଡମିଶନ ଦେବାକୁ ମନା କରିଦେଇଥିଲେ। ବିଦ୍ୟାଳୟ କର୍ତ୍ତୃପକ୍ଷଙ୍କ କହିବା ଅନୁଯାୟୀ, ସ୍କୁଲରେ ବିଭିନ୍ନ ଧର୍ମର ପିଲାମାନେ ପଢୁଛନ୍ତି ଏବଂ ସମସ୍ତଙ୍କ ପାଇଁ ସମାନ ଡ୍ରେସ୍ କୋଡ୍ ଲାଗୁ କରାଯାଇଛି। ଯଦି ଜଣେ ଛାତ୍ରୀଙ୍କୁ ସ୍ୱତନ୍ତ୍ର ଅନୁମତି ଦିଆଯାଏ, ତେବେ ଏହା ବିଦ୍ୟାଳୟର ପ୍ରଶାସନିକ ଶୃଙ୍ଖଳା ଉପରେ ନକାରାତ୍ମକ ପ୍ରଭାବ ପକାଇବ।

କର୍ଣ୍ଣାଟକ ହାଇକୋର୍ଟଙ୍କ ରାୟକୁ ସମର୍ଥନ

ଏହି ରାୟ ପ୍ରଦାନ କରିବା ସମୟରେ ଆଲ୍ଲାହାବାଦ ହାଇକୋର୍ଟ ୨୦୨୨ ମସିହାରେ କର୍ଣ୍ଣାଟକ ହାଇକୋର୍ଟଙ୍କ ଦ୍ୱାରା ଦିଆଯାଇଥିବା ରାୟକୁ ଆଧାର କରିଥିଲେ। କର୍ଣ୍ଣାଟକ ହାଇକୋର୍ଟ ମଧ୍ୟ ସ୍ପଷ୍ଟ କରିଥିଲେ ଯେ ଶିକ୍ଷାନୁଷ୍ଠାନ ଗୁଡ଼ିକରେ ହିଜାବ ଉପରେ କଟକଣା ଲଗାଇବା ବୈଧ ଅଟେ ଏବଂ ଏହା ଧାର୍ମିକ ସ୍ୱାଧୀନତାର ଉଲ୍ଲଂଘନ କରୁନାହିଁ। ସୁପ୍ରିମକୋର୍ଟଙ୍କ ପକ୍ଷରୁ ଏହି ବିବାଦ ଉପରେ ଏଯାଏଁ କୌଣସି ଚୂଡ଼ାନ୍ତ ରାୟ ଆସିନଥିବାରୁ, କର୍ଣ୍ଣାଟକ ହାଇକୋର୍ଟଙ୍କ ରାୟକୁ ବିଚାରକୁ ନିଆଯାଇଛି ବୋଲି ଆଲ୍ଲାହାବାଦ ହାଇକୋର୍ଟଙ୍କ ଖଣ୍ଡପୀଠ ମତବ୍ୟକ୍ତ କରିଛନ୍ତି।

ବୁର୍ଲା: ବୀର ସୁରେନ୍ଦ୍ର ସାଏ ପ୍ରଯୁକ୍ତିବିଦ୍ୟା ବିଶ୍ୱବିଦ୍ୟାଳୟ(ଭିସୁଟ୍‌) ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରାଯାଇଛି। ଭିସୁଟ୍‌ ପକ୍ଷରୁ କ୍ୟାମ୍ପସ୍‌ରେ ବାଧ୍ୟତାମୂଳକ ଡ୍ରେସ୍ କୋଡ୍ ଲାଗୁ କରାଯାଇଛି। ସୁରକ୍ଷା ଏବଂ ନିରାପତ୍ତା ଦୃଷ୍ଟିରୁ ପ୍ରଥମ ବର୍ଷର ଛାତ୍ରଛାତ୍ରୀଙ୍କ ପାଇଁ ଏହି ଡ୍ରେସ୍ କୋଡ୍ ଲାଗୁ ହୋଇଛି। ବିଶ୍ୱବିଦ୍ୟାଳୟରେ ପ୍ରଥମ ଥର ପାଇଁ, ଛାତ୍ରଛାତ୍ରୀଙ୍କ ପାଇଁ ଏଭଳି ଡ୍ରେସ୍ କୋଡ୍ ଲାଗୁ କରାଯାଇଛି। ଏହି ବାଧ୍ୟତାମୂଳକ ଡ୍ରେସ୍ କୋଡ୍ ୨୦୨୫-୨୬ ବର୍ଷ ପାଇଁ ନାମ ଲେଖାଇଥିବା ସମସ୍ତ ପ୍ରଥମ ବର୍ଷର ଛାତ୍ରଛାତ୍ରୀଙ୍କ ପାଇଁ ଲାଗୁ ହୋଇଛି।

ଛାତ୍ରମାନଙ୍କ ପାଇଁ ଫର୍ମାଲ୍ ପ୍ୟାଣ୍ଟ ଏବଂ ସାର୍ଟ ବାଧ୍ୟତାମୂଳକ ହୋଇଛି। ସେହିପରି ଛାତ୍ରୀମାନଙ୍କ ପାଇଁ ୱେଷ୍ଟକୋଟ୍ ସହିତ ସାଲୱାର କମିଜ୍ ବାଧ୍ୟତାମୂଳକ କରାଯାଇଛି। ସୁରକ୍ଷା ଦୃଷ୍ଟିରୁ, ଝିଅମାନଙ୍କ ପାଇଁ ଦୁପଟ୍ଟା କିମ୍ବା ଚୁନରିକୁ ନିଷିଦ୍ଧ କରାଯାଇଛି। ସେହିପରି ଜିନ୍ସ ପିନ୍ଧିବାକୁ ନିଷେଧ କରାଯାଇଛି। କୁହାଯାଇଛି ଯେ ପ୍ୟାଣ୍ଟ, ସାଲୱାର ଏବଂ କମରକୋଟର ରଙ୍ଗ ନେଭି ବ୍ଲୁ ଏବଂ ସାର୍ଟର ରଙ୍ଗ ନୀଳ ହେବ। ଡ୍ରେସ୍ କୋଡର ଏହି ନିୟମ ପିଜି ଏବଂ ପିଏଚଡି ଛାତ୍ରଛାତ୍ରୀମାନଙ୍କ ପାଇଁ ଲାଗୁ ହେବ ନାହିଁ।