ଆମେରିକାର ଏକ ଫେଡେରାଲ କୋର୍ଟ ସୋମବାର ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ଟ୍ରମ୍ପ ପ୍ରଶାସନ ଦ୍ୱାରା H-1B ଭିସା ପାଇଁ ଲାଗୁ କରାଯାଇଥିବା ୧,୦୦,୦୦୦ ଡଲାର (ପ୍ରାୟ ୮୩ ଲକ୍ଷ ଟଙ୍କା) ଆବେଦନ ଫି'କୁ ମାସାଚୁସେଟ୍ସର ବୋଷ୍ଟନ କୋର୍ଟ ବେଆଇନ ଘୋଷଣା କରିବା ସହ ରଦ୍ଦ କରିଦେଇଛନ୍ତି। ଏହି ନିଷ୍ପତ୍ତି ଫଳରେ ଆମେରିକାରେ କାମ କରୁଥିବା ହଜାର ହଜାର କୁଶଳୀ ଭାରତୀୟ ପେସାଦାର ଓ ଅନ୍ୟ ପ୍ରବାସୀମାନେ ଏକ ବଡ଼ ଆଶ୍ୱସ୍ତି ପାଇଛନ୍ତି।

ଟ୍ରମ୍ପଙ୍କ ନିଷ୍ପତ୍ତି କ'ଣ ଥିଲା?

ଗତ ବର୍ଷ ସେପ୍ଟେମ୍ବର ମାସରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ H-1B ଭିସାର ଆବେଦନ ଫି'କୁ ହାରାହାରି ୨,୦୦୦ ଡଲାରରୁ ବୃଦ୍ଧି କରି ସିଧାସଳଖ ୧,୦୦,୦୦୦ ଡଲାର କରିଦେଇଥିଲେ। ଆମେରିକାରେ କାମ କରିବା ପାଇଁ ଯେଉଁ କମ୍ପାନୀମାନେ କୁଶଳୀ ବିଦେଶୀ କର୍ମଚାରୀଙ୍କୁ ସ୍ପୋନ୍ସର କରନ୍ତି, ସେମାନଙ୍କୁ ଏହି ବର୍ଦ୍ଧିତ ଫି' ଦେବାକୁ ପଡ଼ୁଥିଲା। ଆମେରିକୀୟ ନାଗରିକଙ୍କ ନିଯୁକ୍ତି ଯେପରି ପ୍ରଭାବିତ ନ ହୁଏ ଏବଂ କମ୍ପାନୀଗୁଡ଼ିକ ଯେପରି ବିଦେଶୀ କର୍ମଚାରୀଙ୍କ ଉପରେ କମ୍ ନିର୍ଭର କରନ୍ତି, ସେହି ଉଦ୍ଦେଶ୍ୟରେ ଟ୍ରମ୍ପ ପ୍ରଶାସନ ଏପରି ଏକ କଠୋର ପଦକ୍ଷେପ ନେଇଥିଲେ।

ଏହା ପୂର୍ବରୁ ଡିସେମ୍ବର ୨୦୨୫ ରେ ୱାଶିଂଟନ୍ ଡିସିର ଅନ୍ୟ ଏକ ଫେଡେରାଲ କୋର୍ଟ, ୟୁଏସ୍ ଚାମ୍ବର ଅଫ୍ କମର୍ସ ଦ୍ୱାରା ଦାଖଲ ହୋଇଥିବା ଏକ ମାମଲାରେ ଏହି ଫି' ବୃଦ୍ଧି ସପକ୍ଷରେ ରାୟ ଦେଇଥିଲେ। କିନ୍ତୁ ବର୍ତ୍ତମାନ ବୋଷ୍ଟନ କୋର୍ଟଙ୍କ ଏହି ନିଷ୍ପତ୍ତି ପୂର୍ବ ରାୟକୁ ପରିବର୍ତ୍ତନ କରିଦେଇଛି।

ଭାରତୀୟଙ୍କ ପାଇଁ ଏହାର ଅର୍ଥ କ'ଣ?

ନୂତନ ରାୟ ଭାରତୀୟମାନଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ। ଆମେରିକାରେ H-1B ଭିସା ପାଉଥିବା ପ୍ରବାସୀଙ୍କ ମଧ୍ୟରେ ଭାରତୀୟଙ୍କ ସଂଖ୍ୟା ସର୍ବାଧିକ। ଆମେରିକା ପ୍ରଶାସନର ତଥ୍ୟ ଅନୁଯାୟୀ, ୨୦୨୪ ମସିହାରେ ଅନୁମୋଦିତ ହୋଇଥିବା ମୋଟ H-1B ଭିସାରୁ ପ୍ରାୟ ୭୦ ପ୍ରତିଶତ ଭିସା କେବଳ ଭାରତୀୟ କର୍ମଚାରୀଙ୍କୁ ମିଳିଥିଲା। ଏହା ପରେ ଚୀନ୍ ନାଗରିକଙ୍କ ସ୍ଥାନ ରହିଥିଲା, ଯେଉଁମାନେ ମାତ୍ର ୧୧ ରୁ ୧୨ ପ୍ରତିଶତ ଭିସା ପାଇଥିଲେ।

ଏହି ପ୍ରୋଗ୍ରାମ ଯୋଗୁଁ ଆମେରିକାରେ ଭାରତୀୟ-ଆମେରିକୀୟମାନେ ସର୍ବୋଚ୍ଚ ଶିକ୍ଷିତ ଏବଂ ସର୍ବାଧିକ ରୋଜଗାର କରୁଥିବା ଗୋଷ୍ଠୀ ଭାବରେ ଉଭା ହୋଇପାରିଛନ୍ତି ବୋଲି 'ଦି ଅଦର ୱାନ ପରସେଣ୍ଟ' ନାମକ ଏକ ଅଧ୍ୟୟନରେ ଦର୍ଶାଯାଇଥିଲା। ବର୍ତ୍ତମାନ କୋର୍ଟଙ୍କ ଏହି ନିଷ୍ପତ୍ତି ପରେ ଭାରତୀୟ ଆଇଟି ପେସାଦାର ଏବଂ ଆମେରିକାରେ କାର୍ଯ୍ୟରତ ବିଭିନ୍ନ ଟେକ କମ୍ପାନୀଗୁଡ଼ିକୁ ଆର୍ଥିକ ଦୃଷ୍ଟିରୁ ଏକ ବଡ଼ ଆଶ୍ୱସ୍ତି ମିଳିବ। ଏହା ଦ୍ୱାରା ନୂତନ ପ୍ରତିଭାମାନଙ୍କ ପାଇଁ ଆମେରିକାରେ କାମ କରିବାର ସୁଯୋଗ ମଧ୍ୟ ପୂର୍ବ ପରି ସହଜ ହୋଇପାରିବ।

ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶୁଳ୍କ ନୀତିରେ ଲାଗିଛି ରୋକ୍‌। ଟ୍ରମ୍ପ୍‌ଙ୍କ ଯେଉଁ ନୀତି କାରଣରୁ ସାରା ବିଶ୍ବରେ ଆରମ୍ଭ ହୋଇଛି ବାଣିଜ୍ୟିକ ଯୁଦ୍ଧ। ମୁହାଁମୁହିଁ ହୋଇଛନ୍ତି ଆମେରିକା-ଚୀନ୍‌। ଅବଶ୍ୟ ଏହି ନୀତି ଉପରେ ବେ ସାମୟିକ ଭାବେ ରୋକ୍‌ ଲାଗିଛି। ଆମେରିକା କୋର୍ଟ ଟ୍ରମ୍ପ୍‌ଙ୍କ ଶୁଳ୍କ ଉପରେ ରୋକ୍ ଲଗାଇଛନ୍ତି। ଏହା ସତ୍ତ୍ବେ ଟ୍ରମ୍ପ୍‌ ଆଗକୁ ପୁଣି ଥରେ ଶୁଳ୍କ ଲଗାଇପାରନ୍ତି ବୋଲି ଆଶାଙ୍କରା କରାଯାଇଛି। ଶୁଳ୍କ ନୀତି ବିରୋଧରେ ହୋଇଥିବା ଆବେଦନର ଶୁଣାଣି କରି ଅଦାଲତ ଏହି ପଦକ୍ଷେପ ଗ୍ରହଣ କରିଛନ୍ତି।
ଟ୍ରମ୍ପଙ୍କ ଟାରିଫ୍‌ ନୀତି ଉପରେ ରୋକ ଲଗାଇଲେ ଆମେରିକାର ଫେଡେରାଲ ଟ୍ରେଡ କୋର୍ଟ। ଏହି ଶୁଳ୍କ ନୀତି ଅସାମ୍ବିଧାନିକ ଦର୍ଶାଇ କୋର୍ଟ ଏହି ରୋକ୍ ଲଗାଇଛନ୍ତି। କୋର୍ଟ ସ୍ପଷ୍ଟ ଭାବରେ କହିଛନ୍ତି, ଟ୍ରମ୍ପ ନିଜ ଶକ୍ତିର ଦୂରୁପଯୋଗ କରିଛନ୍ତି। ସେ ନିଜ ଶକ୍ତିର ଦୁରୂପଯୋଗ କରି ସମ୍ବିଧାନର ନିୟମ ବାହାରକୁ ଯାଇ ଏହି ଟାରିଫ୍ ଲଗାଇବାକୁ ଚେଷ୍ଟା କରିଛନ୍ତି। ମ୍ୟାନହାଟନର ଫେଡେରାଲ କୋର୍ଟ ଅଫ୍‌ ଇଣ୍ଟରନାସନାଲ ଟ୍ରେଡର ତିନି ବିଚାରପତିଙ୍କ ବେଞ୍ଚ କହିଛନ୍ତି, ଟ୍ରମ୍ପ ଅନ୍ତର୍ଜାତୀୟ ଇମରଜେନ୍ସୀ ଇକୋନୋମିକ ପାୱାର୍ସ ଆକ୍ଟ (ଆଇଇଇପିଏ)ର ଅପବ୍ୟବହାର କରିଛନ୍ତି। ଏହି ଆଇନ ରାଷ୍ଟ୍ରପତିଙ୍କୁ ଜରୁରୀକାଳୀନ ସ୍ଥିତିରେ ଏଭଳି ଶକ୍ତି ଦେଇଥାଏ, କିନ୍ତୁ ଟ୍ରମ୍ପ ଏହାକୁ ବିନା କୌଣସି ଦୃଢ଼ କାରଣ ନଥାଇ ବ୍ୟବହାର କରିଛନ୍ତି।

ସୂଚନାଥାଉକି, ଟ୍ରମ୍ପଙ୍କ ଟାରିଫ୍ ନୀତି ବିରୋଧରେ ଲିବର୍ଟୀ ଜଷ୍ଟିସ ସେଣ୍ଟରରେ ୫ ଛୋଟ ଆମେରିକୀୟ ବ୍ୟବସାୟୀ ଏବଂ ୧୨ ଆମେରିକୀୟ ଆମଦାନୀକାରୀ ମଧ୍ୟ ମାମଲା ରୁଜୁ କରାଇଥିଲେ। ଏମାନେ ଯୁକ୍ତି ରଖିଥିଲେ, ଟାରିଫ୍‌ କାରଣରୁ ଛୋଟ ବ୍ୟବସାୟୀଙ୍କୁ ବଡ଼ କ୍ଷତି ହେଉଛି। କାରଣ ଆମଦାନୀ ହେଉଥିବା ସାମଗ୍ରୀର ଦାମ ବଢ଼ିବା କାରଣରୁ ତାହାର ଖର୍ଚ୍ଚ ବଢ଼ୁଛି। ତେବେ କୋର୍ଟ ଏହି ଆବେଦନକୁ ଯଥାର୍ଥ ବୋଲି କହିବା ସହ କହିଛନ୍ତି ରାଷ୍ଟ୍ରପତିଙ୍କ ପାଖରେ ଏତେ ବଡ଼ ପରିମାଣରେ ଟାରିଫ୍‌ ଲଗାଇବା ପାଇଁ ସାମ୍ବିଧାନିକ ଅଧିକାର ନାହିଁ।
ଅପରପକ୍ଷେ କୋର୍ଟଙ୍କ ଏହି ନିଷ୍ପତ୍ତି ବିରୋଧରେ ଉପର କୋର୍ଟରେ ଅପିଲ କରିବ ଟ୍ରମ୍ପ ପ୍ରଶାସନର। ଟ୍ରମ୍ପ ନିଜ ସୋସିଆଲ ମିଡିଆ ସାଇଟରେ ଦାବି କରିଛନ୍ତି ଯେ, ତାଙ୍କ ଶୁଳ୍କ ନୀତି ‘ଆମେରିକାକୁ ପୁଣି ଥରେ ମହାନ କରିବା’ ପାଇଁ ଜରୁରୀ ଥିଲା। ଅବଶ୍ୟ କୋର୍ଟ ପରାମର୍ଶ ଦେଇଛନ୍ତି ଯେ, ଟ୍ରମ୍ପ ଟ୍ରେଡ ଆକ୍ଟ ୧୯୭୪ର ଧାରା ୧୨୨ ଅନ୍ତର୍ଗତ ୧୫୦ ଦିନ ପାଇଁ ୧୫% ପର୍ଯ୍ୟନ୍ତ ଟାରିଫ ଲଗାଇପାରିବେ। କିନ୍ତୁ ଏଥିପାଇଁ ମଧ୍ୟ ଠୋସ ଆଧାର ଦରକାର। ତେବେ ଟ୍ରମ୍ପ ପ୍ରଶାସନର ଅପିଲ ଏବଂ କୋର୍ଟଙ୍କ ଆଗାମୀ ନିଷ୍ପତ୍ତି ଏହି ମାମଲାର ଦିଗ ନିର୍ଦ୍ଧାରଣ କରିବ। ଟ୍ରମ୍ପ ପୂର୍ବରୁ ହିଁ କିଛି ଟାରିଫକୁ ୯୦ ଦିନ ପାଇଁ ସ୍ଥଗିତ କରିଥିଲେ। ଯାହାଦ୍ବାରା ଅନ୍ୟ ଦେଶଙ୍କ ସହ ବାଣିଜ୍ୟିକ ବୁଝାମଣା ହୋଇପାରିବ। ଆଉ ଏବେ କୋର୍ଟଙ୍କ ନିଷ୍ପତ୍ତି ଏହି ନୀତିକୁ ଆହୁରି ଦୁର୍ବଳ କରିଛି। ଏହା ପୂର୍ବରୁ ବିଶ୍ବ ବାଣିଜ୍ୟ ସଂଗଠନ (ଡବ୍ଲ୍ୟୁଟିଓ) ମଧ୍ୟ ପୂର୍ବରୁ ଚେତାବନୀ ଦେଇଥିଲା। ଡବ୍ଲୁଟିଓ କହିଥିଲା ଟ୍ରମ୍ପଙ୍କ ଟାରିଫ କାରଣରୁ ବିଶ୍ବ ବ୍ୟାପାରରେ ୮୧% ପର୍ଯ୍ୟନ୍ତ ହ୍ରାସ ଆସିପାରେ। ହେଲେ କୋର୍ଟଙ୍କ ଏହି ନିଷ୍ପତ୍ତି ସେହି ଆଶଙ୍କାକୁ କମ୍ କରୁଛି।

ସୂଚନାଥାଉକି, ୨୦୨୫ ଏପ୍ରିଲ ୨ରେ ଟ୍ରମ୍ପ ‘ଲିବରେସନ ଡେ’ ନାମରେ ୧୦୦ରୁ ଅଧିକ ଦେଶରୁ ଆମେରିକାକୁ ଆମଦାନୀ ହେଉଥିବା ସାମଗ୍ରୀ ଉପରେ ନୂଆ ଶୁଳ୍କ ଲାଗୁ ଘୋଷଣା କରିଥିଲେ। ସେ ଦାବି କରିଥିଲେ ଯେ, ଏହି ଶୁଳ୍କ ଆମେରିକା ଅର୍ଥ ବ୍ୟବସ୍ଥାକୁ ମଜଭୁତ କରିବ ଏବଂ ସେହି ଦେଶକୁ ଶିକ୍ଷା ଦେବ ଯେଉଁ ଦେଶ ଆମେରିକାଠାରୁ କମ୍ ସାମଗ୍ରୀ କିଣୁଛନ୍ତି କିନ୍ତୁ ଅଧିକ ବିକୁଛନ୍ତି।