ନୂଆଦିଲ୍ଲୀ: ପାକିସ୍ତାନକୁ ଲାଗିଲା ଝଟକା । ବିଶ୍ୱ ବ୍ୟାଙ୍କ ମୁଖ୍ୟ ଅଜୟ ବାଙ୍ଗା ପାକିସ୍ତାନକୁ ଏକ ବଡ଼ ଝଟକା ଦେଇଛନ୍ତି। ସେ ସିନ୍ଧୁ ଜଳ ଚୁକ୍ତି (IWT) ଉପରେ ଏକ ବିବୃତ୍ତି ଦେଇଛନ୍ତି। ବାଙ୍ଗା ସ୍ପଷ୍ଟ କରିଛନ୍ତି ଯେ, ମଧ୍ୟସ୍ଥତା ବ୍ୟତୀତ ଆମର ଅନ୍ୟ କୌଣସି ଭୂମିକା ନାହିଁ। ବାଙ୍ଗା ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଦ୍ୱାରା ଚୁକ୍ତିନାମା ସ୍ଥଗିତ ରଖିବା ପାଇଁ ଆନ୍ତର୍ଜାତୀୟ ଆର୍ଥିକ ପ୍ରତିଷ୍ଠାନ କୌଣସି ପଦକ୍ଷେପ ନେବ ନାହିଁ।

ବିଶ୍ୱ ବ୍ୟାଙ୍କ ସଭାପତି ଅଜୟ ବାଙ୍ଗା କହିଛନ୍ତି, “ଆମର ଭୂମିକା କେବଳ ଜଣେ ମଧ୍ୟସ୍ଥିର। ବିଶ୍ୱ ବ୍ୟାଙ୍କ ଏହି ସମସ୍ୟାର ସମାଧାନ କିପରି କରିବ ସେ ବିଷୟରେ ଗଣମାଧ୍ୟମରେ ବହୁତ କଳ୍ପନାଜଳ୍ପନା ଚାଲିଛି, କିନ୍ତୁ ଏସବୁ ଅର୍ଥହୀନ। ବିଶ୍ୱ ବ୍ୟାଙ୍କର ଭୂମିକା କେବଳ ଜଣେ ମଧ୍ୟସ୍ଥିର।”

ସବୁ ଦିଗରୁ ବିରୋଧର ସମ୍ମୁଖୀନ ହେଉଥିବା ପାକିସ୍ତାନକୁ ଏବେ ବିଶ୍ୱ ବ୍ୟାଙ୍କ ମଧ୍ୟ ଏକ ବଡ଼ ଝଟକା ଦେଇଛି। ଭାରତ ଦ୍ୱାରା ଅପରେସନ ସିନ୍ଦୂର କରାଯିବା ପରେ, ପାକିସ୍ତାନ ଆତଙ୍କିତ ଅବସ୍ଥାରେ ଅଛି ଏବଂ ଭାରତ ଉପରେ ଆକ୍ରମଣ କରିବାକୁ ଚେଷ୍ଟା କରୁଛି, କିନ୍ତୁ ଏହାର ପ୍ରୟାସ ବାରମ୍ବାର ବିଫଳ ହେଉଛି।