ଧର୍ମଶାଳା: ଯାଜପୁର  ଫ୍ଲାଇଙ୍ଗ ସ୍କ୍ୱାର୍ଡ ପୁଲିସ ହାତରେ ଏବେ ୪ ଧଳା ଜହର ବେପାରୀ। ସେମାନଙ୍କୁ ଧର୍ମଶାଳା ପୁଲିସର ଜିମା ଦିଆଯାଇଛି। ତଦନ୍ତରେ ବାଧା ଦୃଷ୍ଟିରୁ ସୂଚନାକୁ ଗୋପନୀୟ ରଖାଯାଇଛି। ତେବେ ବିଶେଷ ସୂତ୍ରରୁ ମିଳିଥିବା ସୂଚନା ମୁତାବକ, ଧରାପଡିଥିବା ଅଭିଯୁକ୍ତ ବେପାରୀକୁ ଗତ କିଛି ଦିନ ହେଲା ଫ୍ଲାଇଙ୍ଗ ସ୍କ୍ୱାର୍ଡ ପୁଲିସ ତାର ଗତିବିଧିକୁ ନଜର କରି ଆସୁଥିଲା। ମୋବାଇଲ  ଫୋନକୁ ମଧ୍ୟ ଟ୍ରାକ କରୁଥିଲା। ଏନେଇ ଗତ କାଲି ପୁଲିସ ଅଭିଯୁକ୍ତକୁ ଧର୍ମଶାଳା ଥାନା ଠାରୁ କେଇ ମିଟର ଦୂରତାରେ ଥିବା ତା ଘର ପାଖରେ ତାକୁ ମାଡ଼ି ବସିଥିଲା। ଅଭିଯୁକ୍ତ ନିକଟରୁ କିଛି ପ୍ୟାକେଟ ଧଳାଜହର ମଧ୍ୟ ଜବତ କରାଯାଇଥିଲା।  ଏହା ପରେ ଅଭିଯୁକ୍ତକୁ ଧର୍ମଶାଳା ପୁଲିସର ଜିମା ଦିଆଯାଇଥିଲା। ଉକ୍ତ ଅଭିଯୁକ୍ତ ଠାରୁ  ଅନ୍ୟ ୩ ଜଣ ବେପାରୀଙ୍କ ସମ୍ପର୍କରେ ସୂଚନା ପାଇ ଧଳା ଜହର ଆଣିବା ପାଇଁ ତାଙ୍କୁ ଡକା ଯାଇଥିଲା। ପୂର୍ବ ପ୍ରସ୍ତୁତ ଅନୁଯାଇ ସେମାନଙ୍କୁ କାବୁ କରାଯାଇ ସେମାନଙ୍କୁ ମଧ୍ୟ ଥାନାରେ ଅଟକ ରଖାଯାଇଛି। ସେମାନଙ୍କ ଘର ଭଦ୍ରକ ଜିଲ୍ଲାରେ ବୋଲି ଜଣାଯାଇଛି।  ପାଖାପାଖି ୫ଶହ ପ୍ୟାକେଟ ଜବତ ହୋଇଥିବା ସୂଚନା ମିଳିଛି।  ତେବେ ଧର୍ମଶାଳା ଥାନା ଆଗରେ ବେପାରୀ ରହୁଥିବା ବେଳେ ସ୍ଥାନୀୟ ପୁଲିସ କିପରି ଜାଣି ପାରୁ ନ ଥିଲା ତାକୁ ନେଇ ସାଧାରଣରେ ଚର୍ଚ୍ଚା ହେଉଛି।

ଧର୍ମଶାଳା : ଗତ ୫ ତାରିଖରୁ ଲକ ଡାଉନ ବଳବତ୍ତର ରହିଛି। ସକାଳ ୬ରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଅତ୍ୟାବଶ୍ୟକ ସାମଗ୍ରୀ ଦୋକାନ ସହିତ, ଆମିଷ, ଫଳ, କ୍ଷୀର, ପରିବା, ଗ୍ୟାରେଜ୍, ଗ୍ୟାସ, ବହି ଦୋକାନ ସହ ସରକାରଙ୍କ ଦ୍ୱାରା ସ୍ଥିରିକୁତ କେତେକ ନିର୍ଦ୍ଧିଷ୍ଟ କଟକଣା ମୁକ୍ତ ଦୋକାନ ଖୋଲା ରହିବ। ଲୋକମାନେ ଚାଲିଚାଲି ଆସି ନିଜର ଜିନିଷ ପତ୍ର କିଣିପାରିବେ। ମାତ୍ର ସରକାରଙ୍କ ଏସବୁ କଟକଣା ଧର୍ମଶାଳା ବ୍ଲକର ଜାରକା ଅଞ୍ଚଳରେ ଲାଗୁନଥିବା ପରି ମନେହୁଏ। ସକାଳ ୬ରୁ ଦିନ ୧୨ ପର୍ଯ୍ୟନ୍ତ ଜାରକା ବଜାର ଗହଳି ଚହଳି ଦେଖିବାକୁ ମିଳୁଛି। ଅମାନିଆଙ୍କ କାମ ଥାଉ ନଥାଉ ବଜାରରେ ୧୨ ପର୍ଯ୍ୟନ୍ତ ବୁଲାବୁଲି କରୁଛନ୍ତି। ଯାନବାହାନ ଯାତାୟତ ପ୍ରତି କୌଣସି କଟକଣା ନାହିଁ। ଯିଏ ଯେଉଁଠି ପାଇଲା ବାଇକ ଚଢି ଗଲା। କୌଣସି ଦୋକାନ ଆଗରେ ସାମାଜିକ ଦୂରତା ରହୁ ନାହିଁ। ବଜାରରେ ପୁଲିସ ପ୍ରହରା ଥାଇବି କଟକଣାକୁ ପାଳନ କରିବା କ୍ଷେତ୍ରରେ କୋହଳ ମନଭାବ ରଖୁଛି। ଲକ ଡାଉନର ପ୍ରଥମ ଦୁଇତିନି ଦିନ ଲୋକେ ସଚେତନ ହୋଇ ବାହାରକୁ ବାହାରି ନଥିଲେ। କିନ୍ତୁ ଏବେ ସବୁ ଖୁଲମଖୁଲା।

ସଟ ଡାଉନରେ ସବୁ ଦୋକାନ ବଜାର ବନ୍ଦ ରହୁଥିବାରୁ ଶନିବାର ଓ ରବିବାର ବନ୍ଦର ପ୍ରଭାବ ରହୁଛି। କିନ୍ତୁ ସୋମବାର ଠାରୁ ଶୁକ୍ରବାର ପର୍ଯ୍ୟନ୍ତ ଲକ ଡାଉନର କୌଣସି ପ୍ରଭାବ ଦେଖିବାକୁ ମିଳୁ ନାହିଁ। ଏହାବାଦ କଟକଣା ମୁକ୍ତ ନଥିବା କେତେକ ଦୋକାନ ଖୁଲମଖୁଲା ଦୋକାନ ଖୋଲି ବେପାର କରୁଛନ୍ତି। ବିଶେଷ କରି ଜାରକା ଅଞ୍ଚଳରେ ଥିବା ଲୁଗା, ଡ୍ରେସ, ଜୋତା ଓ ସୁନା ଦୋକାନ ଆଦି ଆଗ ବନ୍ଦ ରଖି ପଛ ବାଟରେ ବେପାର କରୁଛନ୍ତି। କେହି କେହି ଗ୍ରାହକଙ୍କୁ ଭିତରେ ପଶାଇ ଆଗ ସଟର ବନ୍ଦ ରଖି ବେପାର କରୁଥିବା ଦେଖାଦେଇଛି। ଏ ନେଇ ଆଜି ପ୍ରଶାସନ ପକ୍ଷରୁ ଚଢାଉକୁ ଯୋରଦାର କରାଯାଇଥିଲା। ଜାରକା ଠାରେ ଶ୍ରୀମାନ ଶ୍ରୀମତୀ ଲୁଗା ଦୋକାନ ଉପରେ ପ୍ରଶାସନ ପକ୍ଷରୁ ଦୋକାନ ଖୋଲି ବେପାର କରୁଥିବା ଅଭିଯୋଗରେ ୨ ହଜାର ଟଙ୍କା ଜରିମାନା ଆଦାୟ କରାଯାଇଥିବା ବେଳେ ସୁଭଦ୍ରା ଡ୍ରେସ ହାଉସ ଓ ସାବିତ୍ରୀ ଷ୍ଟେସନାରୀ ଦୋକାନ ଠାରୁ ଠାରୁ ୫ଶହ ଟଙ୍କା ଲେଖାଏ ଜରିମାନା ଆଦାୟ ହୋଇଥିବା ସୂଚନା ମିଳିଛି। ସେହିପରି ଶାନ୍ତି ବଜାର ଠାରେ ଏକ ମାଂସ ଦୋକାନରେ ସାମାଜିକ ଦୂରତା ନଥିବାରୁ ଦୋକାନୀ ଠାରୁ ମଧ୍ୟ ପ୍ରଶାସନ ୨ଶହ ଟଙ୍କା ଜରିମାନା ଆଦାୟ କରିଥିବା ଜଣାଯାଇଛି। ଏହାବାଦ ଆରୁହା ହାଟ ଓ ଗାଁ ଗହଳିରେ ମଧ୍ୟ ଚଢାଉ କରାଯାଇ ମାକ୍ସ ପାଇଁ ଜରିମାନା ଆଦାୟ କରାଯାଇଥିବା ଜଣାଯାଇଛି।