ଇଣ୍ଡିଆନ ପ୍ରିମିୟର ଲିଗ୍ (IPL) ୨୦୨୬ ର ଏକ ରୋମାଞ୍ଚକର ମୁକାବିଲାରେ ଚେନ୍ନାଇ ସୁପର କିଙ୍ଗସ୍ (CSK) ପକ୍ଷରୁ ଖେଳି ସଞ୍ଜୁ ସାମସନ ନିଜର ପ୍ରଥମ ଶତକ ହାସଲ କରିଛନ୍ତି। ଆରମ୍ଭରୁ ଖରାପ ଫର୍ମ ଦେଇ ଗତି କରୁଥିବା ଏହି ତାରକା ବ୍ୟାଟ୍ସମ୍ୟାନ୍ ଦିଲ୍ଲୀ କ୍ୟାପିଟାଲ୍ସ (DC) ବିପକ୍ଷ ମ୍ୟାଚରେ ଏକ ବିସ୍ଫୋରକ ଇନିଂସ ଖେଳି ସମାଲୋଚକମାନଙ୍କୁ କଡ଼ା ଜବାବ ଦେଇଛନ୍ତି। ବିଶ୍ୱକପରେ ଭାରତୀୟ ଦଳ ପାଇଁ ଯେପରି ସେ ସଫଳତା ଆଣିଦେଇଥିଲେ, ଏବେ ପ୍ରଶ୍ନ ଉଠୁଛି କି ସେ ସିଏସକେକୁ ମଧ୍ୟ ସେହିଭଳି ଚାମ୍ପିଅନ୍ କରାଇପାରିବେ କି?

ସିଏସକେ ଉପରେ ବିଶ୍ୱାସ ଏବଂ ସଞ୍ଜୁଙ୍କ ପ୍ରତ୍ୟାବର୍ତ୍ତନ

ଏହି ସିଜିନରେ ରାଜସ୍ଥାନ ରୟାଲ୍ସ (RR) ରୁ ବ୍ଲକବଷ୍ଟର ଟ୍ରେଡ୍ ହୋଇ ଚେନ୍ନାଇ ସୁପର କିଙ୍ଗସ୍ ରେ ଯୋଗ ଦେଇଥିବା ସଞ୍ଜୁ ସାମସନ ପ୍ରଥମ ୩ଟି ମ୍ୟାଚରେ ସମ୍ପୂର୍ଣ୍ଣ ଫ୍ଲପ୍ ସାବ୍ୟସ୍ତ ହୋଇଥିଲେ ଏବଂ ଏକକ ଅଙ୍କରେ ଆଉଟ୍ ହୋଇଥିଲେ। ତେବେ ଖରାପ ସମୟରେ ମଧ୍ୟ ଫ୍ରାଞ୍ଚାଇଜି ତାଙ୍କ ଉପରେ ଭରସା ଦେଖାଇଥିଲା। ସାମସନ କହିଛନ୍ତି ଯେ ତିନୋଟି ମ୍ୟାଚ୍ ହାରିବା ପରେ ମଧ୍ୟ ସିଏସକେର ବୈଠକ ମାତ୍ର ୫୦ ସେକେଣ୍ଡ ଧରି ଚାଲିଥିଲା। ଏହି ଶାନ୍ତ ଏବଂ ସକାରାତ୍ମକ ପରିବେଶ ତାଙ୍କୁ ବିଶ୍ୱାସ ଯୋଗାଇଥିଲା। ଏକ ବିସ୍ଫୋରକ ଶତକ ସହ ସେ କେବଳ ଦଳକୁ ବିଜୟ ଦେଇନାହାଁନ୍ତି ବରଂ ଇତିହାସ ମଧ୍ୟ ରଚିଛନ୍ତି। ଏହି ଶତକ ସହ ସଞ୍ଜୁ ଆଇପିଏଲରେ ୩ଟି ଭିନ୍ନ ଭିନ୍ନ ଫ୍ରାଞ୍ଚାଇଜି ପାଇଁ ଶତକ ହାସଲ କରିଥିବା ପ୍ରଥମ ଖେଳାଳି ହୋଇପାରିଛନ୍ତି।

କୋଚ୍ ଷ୍ଟିଫେନ୍ ଫ୍ଲେମିଙ୍ଗଙ୍କୁ ସ୍ୱତନ୍ତ୍ର ସଲାମ୍

ଶତକ ହାସଲ କରିବା ପରେ ସଞ୍ଜୁ ସାମସନ ଖୁବ୍ ଭାବୁକ ହୋଇପଡିଥିଲେ ଏବଂ ଏକ ସ୍ୱତନ୍ତ୍ର ଶୈଳୀରେ ସାଲ୍ୟୁଟ୍ କରି ନିଜର ଖୁସି ବ୍ୟକ୍ତ କରିଥିଲେ। ପରେ ଏହି ସେଲିବ୍ରେସନର ରହସ୍ୟ ଖୋଲି ସେ କହିଛନ୍ତି ଯେ, ଏହି ସାଲ୍ୟୁଟ୍ ଏମଏସ ଧୋନି କିମ୍ବା ଅନ୍ୟ କାହା ପାଇଁ ନୁହେଁ ବରଂ ସିଏସକେର ମୁଖ୍ୟ କୋଚ୍ ଷ୍ଟିଫେନ୍ ଫ୍ଲେମିଙ୍ଗ ଙ୍କ ପାଇଁ ଥିଲା। ଫ୍ଲେମିଙ୍ଗ୍ ଦୀର୍ଘ ବର୍ଷ ଧରି ସିଏସକେର ସଫଳତା ପଛରେ ଏକ ପ୍ରମୁଖ ଭୂମିକା ଗ୍ରହଣ କରିଆସିଛନ୍ତି। ସଞ୍ଜୁଙ୍କ ଏହି ବଡ଼ପଣ ଏବଂ କୋଚଙ୍କ ପ୍ରତି ଥିବା ସମ୍ମାନକୁ କ୍ରିକେଟ୍ ପ୍ରଶଂସକମାନେ ଖୁବ୍ ପ୍ରଶଂସା କରୁଛନ୍ତି।

ଚାମ୍ପିଅନ୍ କରାଇବାର ଆଶା

ଗତ ଟି-୨୦ ବିଶ୍ୱକପରେ 'ପ୍ଲେୟାର ଅଫ୍ ଦି ଟୁର୍ଣ୍ଣାମେଣ୍ଟ' ବିବେଚିତ ହୋଇଥିବା ସଞ୍ଜୁ ଏବେ ଆଇପିଏଲରେ ନିଜର ପୁରୁଣା ରୂପକୁ ଫେରିଛନ୍ତି। ଚେନ୍ନାଇ ସୁପର କିଙ୍ଗସ୍ (CSK) ର ଆଇକୋନିକ୍ ହଳଦିଆ ଜର୍ସି ପିନ୍ଧି ସେ ନିଜକୁ ଏକ ଚାମ୍ପିଅନ୍ ଭଳି ଅନୁଭବ କରୁଥିବା ବେଳେ ଏହି ପ୍ରତ୍ୟାବର୍ତ୍ତନ ଇନିଂସ ଦଳ ପାଇଁ ନୂଆ ଆଶା ସୃଷ୍ଟି କରିଛି। କ୍ରିକେଟ୍ ବିଶେଷଜ୍ଞ ଏବଂ ପ୍ରଶଂସକମାନେ ଏବେ ଆଶା ବାନ୍ଧିଛନ୍ତି ଯେ, ଟିମ୍ ଇଣ୍ଡିଆକୁ ବିଶ୍ୱକପ୍ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଥିବା ସଞ୍ଜୁ ସାମସନ, ଏହି ସିଜିନରେ ନିଜର ଚମତ୍କାର ବ୍ୟାଟିଂ ଜରିଆରେ ସିଏସକେକୁ ମଧ୍ୟ ଆଇପିଏଲ୍ ଚାମ୍ପିଅନ୍ କରାଇବାରେ ସକ୍ଷମ ହେବେ।

ଜୟପୁର: ଟିନ୍‌ଏଜ୍‌ ଓପନର ବୈଭବ ସୂର୍ଯ୍ୟବଂଶୀ (୩୮ବଲ୍‌ରେ ୧୦୧ରନ୍‌)ଙ୍କ ବିସ୍ଫୋରକ ଶତକ ବଳରେ ଘରୋଇ ମାଟିରେ ଖେଳୁଥିବା ରାଜସ୍ଥାନ ରୟାଲ୍ସ ୮ ୱିକେଟରେ ଗୁଜରାଟ ଜାଏଣ୍ଟ୍‌ସକୁ ପରାସ୍ତ କରିଛି। ଏହା ଫଳରେ ୧୦ମ ମ୍ୟାଚ୍‌ରୁ ୩ୟ ବିଜୟ ହାସଲ କରିଥିଲେ ମଧ୍ୟ ରାଜସ୍ଥାନ ପ୍ଲେ ଅଫ୍‌ ଦୌଡ଼ରେ ତିଷ୍ଠି ରହିଛି। ଏଠାରେ ଗୁଜରାଟ ପ୍ରଦତ୍ତ ୨୧୦ ରନ୍‌ର ବିଶାଳ ଲକ୍ଷ୍ୟକୁ ପିଛା କରି ସୂର୍ଯ୍ୟବଂଶୀ ଆଇପିଏଲ୍‌ରେ ସର୍ବକନିଷ୍ଠ ଖେଳାଳି ଓ ଦ୍ୱିତୀୟ ଦ୍ରୁତତମ ଶତକ ହାସଲ କରିଥିଲେ। ଏହା ଫଳରେ ରାଜସ୍ଥାନ ୧୫.୫ ଓଭରରେ ମାତ୍ର ୨ ୱିକେଟ ହରାଇ ବିଜୟ ଲାଗି ଆବଶ୍ୟକ ରନ୍‌ ସଂଗ୍ରହ କରିନେଇଥିଲେ। ଏହି ବିଜୟରେ ହିରୋ ସାଜିଥିବା ବୈଭବ ସୂର୍ଯ୍ୟବଂଶୀ ମାତ୍ର ୧୪ ବର୍ଷ ୩୨ ଦିନରେ ଶତକ ହାସଲ କରି ସର୍ବକନିଷ୍ଠ ଖେଳାଳି ଭାବେ ରେକର୍ଡ କରିଥିଲେ ବିହାରର ଏହି ଓପନର। ଏହା ଛଡ଼ା ସେ ମାତ୍ର ୩୫ ବଲ୍‌ରେ ୧୦୦ ରନ୍‌ ପୂରଣ କରି ଦ୍ୱିତୀୟ ଦ୍ରୁତତମ ଶତକ ହାସଲ କରିବାରେ ସମର୍ଥ ହୋଇଥିଲେ।

ପୂର୍ବରୁ କ୍ରିସ୍‌ ଗେଲ ୩୦ ବଲ୍‌ରେ ୧୦୦ ରନ୍‌ କରି ଆଇପିଏଲ୍‌ ଇତିହାସରେ ଦ୍ରୁତତମ ଶତକ ହାସଲ କରିବାର ରେକର୍ଡ କରିଥିଲେ। ବୈଭବ ୩୫ ବଲ୍‌ରେ ୭ ଚୌକା ଓ ୧୧ ଛକା ସହ ଶତକ ପୂରଣ କରିଥିଲେ ମଧ୍ୟ ଆଉ ୩ଟି ବଲ୍‌ ଖେଳି ସମାନ ସ୍କୋରରେ ଆଉଟ ହୋଇଯାଇଥିଲେ। ସେ ଆଉଟ ହେବା ପୂର୍ବରୁ ପ୍ରଥମ ୱିକେଟରେ ଯଶସ୍ୱୀ ଜୟସ୍ୱାଲଙ୍କ ସହ ୭୧ ବଲ୍‌ରୁ ୧୬୬ ରନ୍‌ ଉଠାଇ ଦଳର ବିଜୟ ରାସ୍ତା ପରିଷ୍କାର କରିଦେଇଥିଲେ। ଅନ୍ୟତମ ଓପନର ଯଶସ୍ୱୀ ଜୟସ୍ୱାଲ ୪୦ ବଲ୍‌ରୁ ୯ ଚୌକା ଓ ୨ ଛକା ସହ ୭୦ ଏବଂ କାମଚଳା ଅଧିନାୟକ ରିୟାନ ପରାଗ ୧୫ ବଲ୍‌ରୁ ୨ଟି ଲେଖାଏଁ ଚୌକା ଓ ଛକା ସହ ୩୨ ରନ୍‌ରେ ଅପରାଜିତ ରହିଥିଲେ।

ଗୁଜରାଟ ଟାଇଟନ୍ସ ପ୍ରଥମେ ବ୍ୟାଟିଂ କରି ୪ ୱିକେଟରେ ୨୦୯ ରନ୍‌ ସଂଗ୍ରହ କରିଥିଲେ। ଏହି ବିଜୟ ପରେ ରାଜସ୍ଥାନ ରୟାଲ୍ସ ୧୦ଟି ମ୍ୟାଚ୍‌ ଖେଳି ୩ ବିଜୟ ଓ ୭ ପରାଜୟ ସହ ୬ ପଏଣ୍ଟ ପାଇ ୮ମ ସ୍ଥାନକୁ ଉନ୍ନୀତ ହୋଇଛି। କିନ୍ତୁ ୪.୧ ଓଭର ବାକିଥାଇ ଏହି ମ୍ୟାଚ୍‌ ହାରିବା ଫଳରେ ମୁମ୍ବାଇ ଇଣ୍ଡିଆନ୍ସ ପଛକୁ ପଏଣ୍ଟ ଟେବଲରେ ତୃତୀୟ ସ୍ଥାନକୁ ଖସି ଆସିଛି।

ଆଇପିଏଲ୍‌ରେ ବିସ୍ମୟ ବାଳକ; ବୈଭବ ସୂର୍ଯ୍ୟବଂଶୀ

ଯେଉଁ ବୟସରେ ପିଲାମାନେ ବିଦ୍ୟାଳୟରେ ପାଠ ପଢ଼ି କ୍ୟାରିୟର ଗଢ଼ିବାରେ ବ୍ୟସ୍ତ ରହିଥାନ୍ତି, ସେ ସମୟରେ ବିଶ୍ୱର ସବୁଠୁ ବ୍ୟୟବହୁଳ ଟି-୨୦ ଲିଗ୍‌ ଆଇପିଏଲ୍‌ରେ ଶତକ ଅର୍ଜନ କରି ରାତାରାତି ଚର୍ଚ୍ଚାକୁ ଆସିଛନ୍ତି ବୈଭବ ସୂର୍ଯ୍ୟବଂଶୀ। ବୟସ ମାତ୍ର ୧୪। ସର୍ବକନିଷ୍ଠ ଖେଳାଳି ଭାବେ ଆଇପିଏଲ୍‌ରେ ଦ୍ରୁତତମ ଶତକ ହାସଲ କରି ବିସ୍ମୟ ବାଳକ ସାଜିଛନ୍ତି। ସୋମବାର ସେ ତାଙ୍କର ୩ୟ ଆଇପିଏଲ୍‌ ମ୍ୟାଚ୍‌ରେ ବିଧ୍ୱଂସୀ ଶତକୀୟ ପାଳି ଖେଳି ଶୀର୍ଷ ତାଲିକାରେ ଦ୍ବିତୀୟ ସ୍ଥାନରେ ଥିବା ଗୁଜରାଟ ଜାଏଣ୍ଟ୍‌ସକୁ ଧୂଳି ଚଟାଇବା ସହ ତୃତୀୟ ସ୍ଥାନକୁ ଖସାଇ ଦେଇଛନ୍ତି। ଗୁଜରାଟ ଜାଏଣ୍ଟ୍‌ସର ୨୧୦ ରନ୍‌ର ଲକ୍ଷ୍ୟକୁ ପିଛା କରି ରାଜସ୍ଥାନ ପାଇଁ ଇନିଂସ ଓପନ୍‌ କରିଥିଲେ ବାମହାତୀ ବ୍ୟାଟର ବୈଭବ ସୂର୍ଯ୍ୟବଂଶୀ। ସେ ୧୭ ବଲ୍‌ରେ ଅର୍ଦ୍ଧଶତକ ଓ ୩୫ ବଲ୍‌ରେ ଶତକ ହାସଲ କରିଥିଲେ। ଏହି ଇନିଂସରେ ସେ ଗୁଜରାଟ ବୋଲରଙ୍କୁ ନିର୍ଦ୍ଧୁମ ପ୍ରହାର କରି ୭ ଚୌକା ଓ ୧୧ ବିଶାଳ ଛକା ମାରି ଏକାଧିକ ବିଶ୍ୱ ରେକର୍ଡକୁ ନିଜ ନାମରେ ଲିପିବଦ୍ଧ କରିଛନ୍ତି। ଆଇପିଏଲ୍‌ରେ ପ୍ରଥମ ଭାରତୀୟ ଭାବେ ୨୦୧୦ରେ ଦ୍ରୁତତମ ଶତକ ହାସଲ କରି ୟୁସୁଫ୍‌ ପଠାନ (୩୭/୧୦୦)ରଚିଥିବା ରେକର୍ଡକୁ ଭାଙ୍ଗି ବୈଭବ ନୂଆ କୀର୍ତ୍ତିମାନ ସ୍ଥାପନ କରିଛନ୍ତି।

ପିତା ହିଁ ଆଦ୍ୟଗୁରୁ
ଭାରତ ଦ୍ୱିତୀୟଥର ଲାଗି ୨୦୧୧ରେ ବିଶ୍ୱକପ୍‌ ଜିତିବାର ଠିକ୍‌ ୫ ଦିନ ପୂର୍ବରୁ ଅର୍ଥାତ୍‌ ୨୭ ମାର୍ଚ୍ଚ ୨୦୧୧ରେ ବିହାରର ସମସ୍ତିପୁର ଜିଲ୍ଲାର ତାଜପୁରରେ ବୈଭବ ଜନ୍ମଗ୍ରହଣ କରିଥିଲେ। ମାତ୍ର ୯ ବର୍ଷ ବୟସରେ ସେ ଏକ କ୍ରିକେଟ୍‌ ଏକାଡେମୀରେ ଯୋଗଦେଇଥିଲେ। କିନ୍ତୁ ଏଥିପୂର୍ବରୁ ବୈଭବଙ୍କ ପିତା ତାଙ୍କୁ ପ୍ରାରମ୍ଭିକ ଭାବେ କ୍ରିକେଟ୍‌ ଖେଳିବା ଶିଖାଇଥିଲେ।