କୋଲକାତା: ପ୍ରେମିକା ଅନ୍‌ଲାଇନରେ ସପିଂ କରିବାକୁ ଭଲ ପାଉଥିଲେ। ସବୁବେଳେ ଉପହାର ମାଗୁଥିଲେ। କିନ୍ତୁ ବିଚରା ପ୍ରେମିକ ପ୍ରେମିକାର ଏହି ଇଚ୍ଛାକୁ ପୂରଣ କରିପାରି ନ ଥିଲା। ମହଙ୍ଗା ଉପହାର ଦେଇପାରୁ ନ ଥିଲା। ଶେଷରେ ଯାହା ହେବା କଥା ତାହା ହୋଇଥିଲା। ସମ୍ପର୍କରେ ଫାଟ ସୃଷ୍ଟି ହେଲା। ଆଉ ପ୍ରେମିକା ସମ୍ପର୍କ ଭାଙ୍ଗି ଦେଇଥିଲା। ଏହା ପରେ ପୂର୍ବତନ ପ୍ରେମିକାଠାରୁ ପ୍ରତିଶୋଧ ନେବା ପାଇଁ ପ୍ରେମିକ ଚାହିଁଥିଲା। ସେ ପୂର୍ବତନ ପ୍ରେମିକାର ପାର୍ସଲ ନିଶା ପୂରଣ କରି ହଇରାଣ କରିବାକୁ ଚାହିଁଥିଲା।

ଏଥିପାଇଁ କ୍ୟାସ୍‌-ଅନ୍‌-ଡେଲିଭରିରେ ପ୍ରତି ଦିନ ପୂର୍ବତନ ପ୍ରେମିକା ଘରକୁ ପାର୍ସଲ ପଠାଇ ଥିଲା। ଏମିତି ପ୍ରାୟ ସବୁଦିନ ଚାଲିଥିଲା। ୪ ମାସ ମଧ୍ୟରେ ପ୍ରାୟ ୩୦୦ ପାର୍ସଲ ଆସିଥିଲା। ‘ଭାଲେଣ୍ଟାଇନ ଡେ’ ସମୟରେ ଏହା ବଢ଼ି ଯାଇଥିଲା। ଦିନକୁ ଦୁଇ ଥର ଲେଖାଏଁ ଉପହାର ଏବଂ ପୋଷାକର ପାର୍ସଲ ଆସିଥିଲା। ଏହା ଦେଖି ଯୁବତୀ ବିରକ୍ତି ହୋଇ ଯାଇଥିଲେ। ଅବସାଦଗ୍ରସ୍ତ ହୋଇ ଡେଲିଭରି ଏଜେଣ୍ଟଙ୍କ ସହ ଝଗଡ଼ା କରିଥିଲେ। ଶେଷରେ ବାଧ୍ୟ ହୋଇ ଯୁବତୀ ଥାନାରେ ଏତଲା ଦେଇଥିଲେ। ପୁଲିସ ତଦନ୍ତରୁ ସତ ସାମ୍‌ନାକୁ ଆସିଥିଲା। କୋଲକାତା ଲେକ୍‌ ଟାଉନ ଅଞ୍ଚଳରେ ଏହି ଘଟଣା ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟି ଯାଇଛି। ପୂର୍ବତନ ପ୍ରେମିକାକୁ ଉତ୍ପୀଡ଼ନ ଦେବାକୁ ନେଇ ପୁଲିସ ପ୍ରେମିକ ସୁମନ ସିକଦର (୨୫) ଗିରଫ କରିଛି। ମାତ୍ର ବୁଧବାର କୋର୍ଟ ତାକୁ ଜାମିନ ପ୍ରଦାନ କରିଛନ୍ତି। ଏହି ମାମଲା ‘ଇ-ହାରାସମେଣ୍ଟ’ର ନୂଆ ଆହ୍ବାନକୁ ଦର୍ଶାଉଛି ବୋଲି ପୁଲିସ ପକ୍ଷରୁ କୁହାଯାଇଛି। ସୁମନଙ୍କ ପୂର୍ବତନ ପ୍ରେମିକା ଏକ ବ୍ୟାଙ୍କରେ କାମ କରୁଥିଲେ। ଏହି ପାର୍ସଲ ପାଇଁ ସେ ପ୍ରଥମେ ନିଜ ଅଫିସ ସହଯୋଗୀଙ୍କୁ ସନ୍ଦେହ କରୁଥିଲେ। ମାତ୍ର କାହାର ଭୂମିକା ନ ଥିବା ଜାଣିବା ପରେ ସେ ଗତ ମାର୍ଚ୍ଚରେ ବିଧାନନଗର ଥାନାରେ ଏତଲା ଦେଇଥିଲେ। ପୁଲିସ ଗତ ନଭେମ୍ବରରୁ ଫେବୃଆରୀ ମଧ୍ୟରେ ଆସିଥିବା ଅନ୍‌ଲାଇନ ଅର୍ଡର ଟ୍ରେସ କରିଥିଲା। ଏ ସବୁ ସୁମନ ଠିକଣାରୁ ଆସୁଥିବା ଜଣା ପଡ଼ିଥିଲା।