ତାମିଲନାଡୁ: ନବନିର୍ବାଚିତ ମୁଖ୍ୟମନ୍ତ୍ରୀ ତଥା ତାମିଲଗା ଭେଟ୍ରି କାଜାଗମ୍ (TVK) ମୁଖ୍ୟ ସି. ଜୋସେଫ୍ ବିଜୟ ବୁଧବାର ଦିନ ତାମିଲନାଡୁ ବିଧାନସଭାରେ ଆସ୍ଥା ଭୋଟ୍ ଜିତିଛନ୍ତି। ତାଙ୍କ ସପକ୍ଷରେ ୧୪୪ଟି ଭୋଟ୍ ପଡ଼ିଥିବା ବେଳେ ବିପକ୍ଷରେ ମାତ୍ର ୨୨ଟି ଭୋଟ୍ ପଡ଼ିଛି ଏବଂ ୫ ଜଣ ବିଧାୟକ ଭୋଟଦାନରୁ ବିରତ ରହିଛନ୍ତି। ଏହି ବିଜୟ ସହିତ ସେ ରାଜ୍ୟରେ ନିଜ ସରକାରର ସ୍ଥିତିକୁ ସୁଦୃଢ଼ କରିଛନ୍ତି।

ରିପୋର୍ଟ ଅନୁଯାୟୀ, ବିରୋଧୀ ଦଳ ଏଆଇଏଡିଏମକେ (AIADMK)ର ୨୫ ଜଣ ବିଧାୟକ ଦଳୀୟ ହ୍ୱିପ୍‌କୁ ଅମାନ୍ୟ କରି ବିଜୟଙ୍କୁ ସମର୍ଥନ ଜଣାଇଛନ୍ତି। ଦଳର ସାଧାରଣ ସମ୍ପାଦକ ଏଡାପାଡ଼ି କେ ପଲାନିସ୍ୱାମୀ ସମସ୍ତ ୪୭ ଜଣ ବିଧାୟକଙ୍କୁ ଟିଭିକେ ସରକାର ବିପକ୍ଷରେ ଭୋଟ୍ ଦେବାକୁ ନିର୍ଦ୍ଦେଶ ଦେଇଥିଲେ। ମାତ୍ର ବିଧାନସଭା ଭିତରେ ଦଳର ନେତାଙ୍କ ମଧ୍ୟରେ ତୀବ୍ର ବିବାଦ ଦେଖିବାକୁ ମିଳିଥିଲା। ପଲାନିସ୍ୱାମୀ ଅଭିଯୋଗ କରିଛନ୍ତି ଯେ ବିଧାୟକମାନଙ୍କୁ ମନ୍ତ୍ରୀପଦ ଓ ଅନ୍ୟାନ୍ୟ ଲାଭଜନକ ପଦବୀର ପ୍ରଲୋଭନ ଦେଖାଇ ନିଜ ଆଡ଼କୁ ଆଣିବାକୁ ଉଦ୍ୟମ କରାଯାଇଛି।

ଭୋଟଗ୍ରହଣ ସମୟରେ ବିରୋଧୀ ଡିଏମକେ (DMK) ବିଧାୟକମାନେ କକ୍ଷତ୍ୟାଗ କରିଥିଲେ। ବିରୋଧୀ ଦଳ ନେତା ଉଦୟନିଧି ଷ୍ଟାଲିନ୍ କଟାକ୍ଷ କରି କହିଛନ୍ତି ଯେ, ଆମେ କକ୍ଷତ୍ୟାଗ କରୁଛୁ ଏବଂ ଏହାଦ୍ୱାରା ଆପଣ ସହଜରେ ବହୁମତ ହାସଲ କରିପାରିବେ। ସେ ମଧ୍ୟ ପୂର୍ବ ସରକାରଙ୍କ ଜନକଲ୍ୟାଣକାରୀ ଯୋଜନାକୁ ରାଜନୀତିକରଣ ନକରିବାକୁ ଅନୁରୋଧ କରିଥିଲେ। ଅନ୍ୟପକ୍ଷରେ କଂଗ୍ରେସ, ସିପିଆଇ, ସିପିଆଇ (ଏମ), ଭିସିକେ ଏବଂ ଆଇୟୁଏମଏଲ ଭଳି ଦଳଗୁଡ଼ିକ ଟିଭିକେକୁ ପୂର୍ଣ୍ଣ ସମର୍ଥନ ଜଣାଇଛନ୍ତି। ଏହା ବ୍ୟତୀତ ବହିଷ୍କୃତ ଏଏମଏମକେ ବିଧାୟକ କାମରାଜ ମଧ୍ୟ ସରକାରଙ୍କୁ ସମର୍ଥନ ଦେଇ ବିଜୟଙ୍କ ନେତୃତ୍ୱକୁ ପ୍ରଶଂସା କରିଛନ୍ତି।

ସି. ଜୋସେଫ୍ ବିଜୟ ତ୍ରିଚି ଇଷ୍ଟ ଆସନରୁ ଇସ୍ତଫା ଦେଇ ପେରାମ୍ବୁର ଆସନ ନିଜ ପାଖରେ ରଖିବା ପରେ ବିଧାନସଭାରେ ଟିଭିକେର ନିଜସ୍ୱ ସଦସ୍ୟ ସଂଖ୍ୟା ୧୦୭ ରହିଛି। ମେଣ୍ଟ ସହଯୋଗୀଙ୍କୁ ମିଶାଇ ଦଳର ସଂଖ୍ୟାବଳ ୧୨୦ ଥିଲା। ତେବେ କୋର୍ଟଙ୍କ ନିର୍ଦ୍ଦେଶ ଯୋଗୁଁ ଜଣେ ବିଧାୟକ ଭୋଟ୍ ଦେବାରୁ ବଞ୍ଚିତ ହୋଇଛନ୍ତି। ଟିଭିକେ ନିର୍ବାଚନରେ ସବୁଠାରୁ ବଡ଼ ଦଳ ଭାବେ ଉଭା ହୋଇ ଡିଏମକେ ଏବଂ ଏଆଇଏଡିଏମକେର ଦୀର୍ଘ ଦିନର ଦ୍ରାବିଡ଼ ଆଧିପତ୍ୟକୁ ଶେଷ କରି ରାଜ୍ୟ ରାଜନୀତିରେ ଏକ ନୂଆ ଅଧ୍ୟାୟ ସୃଷ୍ଟି କରିଛି।

ତାମିଲନାଡୁ ବିଧାନସଭାରେ ନବନିର୍ବାଚିତ ମୁଖ୍ୟମନ୍ତ୍ରୀ ଥାଲାପତି ବିଜୟ ବହୁମତ ସାବ୍ୟସ୍ତ କରିବାକୁ ଯାଉଥିବା ବେଳେ ରାଜ୍ୟ ରାଜନୀତିରେ ଘନ ଘନ ପରିବର୍ତ୍ତନ ଦେଖିବାକୁ ମିଳୁଛି। ବୁଧବାର ଦିନ ବିଜୟଙ୍କ ନେତୃତ୍ୱାଧୀନ ତମିଝାଗା ଭେତ୍ରି କାଝାଗାମ୍ (TVK) ସରକାରଙ୍କ ଫ୍ଲୋର ଟେଷ୍ଟ (ବହୁମତ ପରୀକ୍ଷା) ହେବାକୁ ଥିବା ବେଳେ ଏହା ପୂର୍ବରୁ ପ୍ରମୁଖ ଦଳ AIADMK ର ଏକ ଗୋଷ୍ଠୀ ତାଙ୍କୁ ସମର୍ଥନ ଜଣାଇଛନ୍ତି। ଏହା ବିଜୟଙ୍କ ପାଇଁ ଏକ ବଡ଼ ଆଶ୍ୱସ୍ତି ଆଣିଦେଇଛି।

ବିଜୟଙ୍କ ସପକ୍ଷରେ AIADMK ର ବିଦ୍ରୋହୀ ଗୋଷ୍ଠୀ

ବରିଷ୍ଠ AIADMK ନେତା ସିଭି ସନମୁଗମ୍ ଙ୍କ ନେତୃତ୍ୱରେ ପ୍ରାୟ ୩୦ ଜଣ ବିଧାୟକ ମୁଖ୍ୟମନ୍ତ୍ରୀ ବିଜୟ ଏବଂ ତାଙ୍କ ମେଣ୍ଟ ସରକାରଙ୍କୁ ସମର୍ଥନ ଜଣାଇଛନ୍ତି। ଉଲ୍ଲେଖଯୋଗ୍ୟ ଯେ, ସଦ୍ୟ ସମାପ୍ତ ନିର୍ବାଚନରେ AIADMK ୪୭ଟି ଆସନ ଜିତିଥିବା ବେଳେ ସନମୁଗମ୍ ଦାବି କରିଛନ୍ତି ଯେ ଦଳର ସଂଖ୍ୟାଗରିଷ୍ଠ ବିଧାୟକ ତାଙ୍କ ସହ ଅଛନ୍ତି। DMK ସହ AIADMK ର ମେଣ୍ଟ ଗୁଜବକୁ ନେଇ ଅସନ୍ତୋଷ ବ୍ୟକ୍ତ କରି ସେ ଏହି ନିଷ୍ପତ୍ତି ନେଇଥିବା ପ୍ରକାଶ କରିଛନ୍ତି। ଅବଶ୍ୟ ସେ ଦଳ ଭାଙ୍ଗିବାକୁ ଚାହୁଁନାହାନ୍ତି ବୋଲି ସ୍ପଷ୍ଟ କରିଛନ୍ତି।

ବାଚସ୍ପତି ନିର୍ବାଚନ ଓ ବହୁମତ ସମୀକରଣ

ତାମିଲନାଡୁର ୨୩୪ ସଦସ୍ୟ ବିଶିଷ୍ଟ ବିଧାନସଭାରେ ସଂଖ୍ୟାଗରିଷ୍ଠତା ପାଇଁ ୧୧୮ ବିଧାୟକଙ୍କ ସମର୍ଥନ ଆବଶ୍ୟକ। ନିର୍ବାଚନରେ TVK ଏକାକୀ ୧୦୮ଟି ଆସନ ଜିତି ସର୍ବବୃହତ୍ତ ଦଳ ଭାବେ ଉଭା ହୋଇଛି। କଂଗ୍ରେସ (୫), CPI (୨), CPI-M (୨), VCK (୨) ଏବଂ ମୁସଲିମ୍ ଲିଗ୍ (୨) ର ସମର୍ଥନ ସହ ମେଣ୍ଟର ସଂଖ୍ୟା ୧୨୧ ରେ ପହଞ୍ଚିଛି। ଅନ୍ୟପକ୍ଷରେ, TVK ନିଜର ବରିଷ୍ଠ ନେତା ଜେସିଡି ପ୍ରଭାକର ଙ୍କୁ ବାଚସ୍ପତି ପଦ ପାଇଁ ମନୋନୀତ କରିଛି। ସେ ବାଚସ୍ପତି ହେବା ପରେ ସାଧାରଣ ଭୋଟିଂରେ ସାମିଲ ହୋଇପାରିବେ ନାହିଁ (କେବଳ ଟାଇ ସ୍ଥିତି ବ୍ୟତୀତ), ଯାହାଫଳରେ ଶାସକ ଦଳର ସଂଖ୍ୟାରୁ ଜଣେ ବିଧାୟକ କମିଯିବେ। ତଥାପି ମେଣ୍ଟ ପାଖରେ ପର୍ଯ୍ୟାପ୍ତ ସଂଖ୍ୟା ଥିବାରୁ ସରକାର ସୁରକ୍ଷିତ ଥିବା ଜଣାପଡ଼ିଛି।

ବିରୋଧୀ ନେତାଙ୍କ ସହ ସୌଜନ୍ୟମୂଳକ ସାକ୍ଷାତ

ଫ୍ଲୋର ଟେଷ୍ଟ ପୂର୍ବରୁ ମୁଖ୍ୟମନ୍ତ୍ରୀ ବିଜୟ ରାଜ୍ୟର ପ୍ରମୁଖ ବିରୋଧୀ ନେତାମାନଙ୍କୁ ଭେଟି ଏକ ନୂଆ ରାଜନୈତିକ ସୌହାର୍ଦ୍ଦ୍ୟର ବାର୍ତ୍ତା ଦେଇଛନ୍ତି। ସେ ପୂର୍ବତନ ମୁଖ୍ୟମନ୍ତ୍ରୀ ତଥା DMK ମୁଖ୍ୟ ଏମକେ ଷ୍ଟାଲିନ, ବିରୋଧୀ ଦଳ ନେତା ଉଦୟନିଧି ଷ୍ଟାଲିନ ଙ୍କ ସମେତ PMK, NTK ଏବଂ MDMK ନେତାମାନଙ୍କୁ ସେମାନଙ୍କ ବାସଭବନରେ ଯାଇ ଭେଟିଛନ୍ତି। ଏହି ସାକ୍ଷାତକାରଗୁଡ଼ିକ ରାଜ୍ୟରେ ଏକ ସ୍ଥିର ସରକାର ଗଠନ ଦିଗରେ ବିଜୟଙ୍କ ପରିପକ୍ୱତାକୁ ଦର୍ଶାଉଛି ବୋଲି ରାଜନୈତିକ ସମୀକ୍ଷକମାନେ ମତ ଦେଉଛନ୍ତି।

ତାମିଲନାଡୁ: ତାମିଲନାଡୁ ବିଧାନସଭା ନିର୍ବାଚନ ୨୦୨୬ ର ଫଳାଫଳ ପ୍ରକାଶ ପାଇବା ପରେ ରାଜ୍ୟ ରାଜନୀତିରେ ଅନିଶ୍ଚିତତା ଲାଗି ରହିଛି। ଅଭିନେତାରୁ ରାଜନେତା ପାଲଟିଥିବା ବିଜୟ ଙ୍କ ନେତୃତ୍ୱାଧୀନ ତାମିଲାଗା ଭେଟ୍ରି କାଜାଗମ୍ (ଟିଭିକେ) ବିଧାନସଭା ନିର୍ବାଚନରେ ୧୦୮ଟି ଆସନ ଜିତି ଏକ ବଡ଼ ପ୍ରଭାବ ପକାଇଛି। ତେବେ ବହୁମତ ସାବ୍ୟସ୍ତ କରିବାକୁ ଦଳକୁ ଅନ୍ୟ ଦଳଗୁଡ଼ିକର ସମର୍ଥନ ଆବଶ୍ୟକ ହେଉଛି। ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକର ଗୁରୁବାର ଚେନ୍ନାଇଠାରେ ଦ୍ୱିତୀୟ ପର୍ଯ୍ୟାୟ ଆଲୋଚନା ସମୟରେ ବହୁମତ ପ୍ରମାଣ କରିବା ସହ ସମର୍ଥନ କରୁଥିବା ବିଧାୟକଙ୍କ ତାଲିକା ଦାଖଲ କରିବାକୁ ବିଜୟଙ୍କୁ ନିର୍ଦ୍ଦେଶ ଦେଇଛନ୍ତି। କଂଗ୍ରେସ ନିଜର ୫ଟି ଆସନ ସହ ଟିଭିକେକୁ ସମର୍ଥନ ଜଣାଇବା ପରେ ଅନ୍ୟ ସହଯୋଗୀ ଦଳଗୁଡ଼ିକ ଉପରେ ଏବେ ସମସ୍ତଙ୍କ ନଜର ରହିଛି।

ସରକାର ଗଠନ ନେଇ ଚାଲିଥିବା ଛକାପଞ୍ଝା ମଧ୍ୟରେ ରାଜ୍ୟରେ ଥିବା ଛୋଟ ଦଳଗୁଡ଼ିକ ଏବେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ସିପିଆଇ(ଏମ) ଏବଂ ସିପିଆଇ ପୃଥକ ଭାବରେ କାର୍ଯ୍ୟକାରିଣୀ ବୈଠକ କରି ପରିସ୍ଥିତି ଉପରେ ଆଲୋଚନା କରୁଛନ୍ତି। ଉଭୟ ଦଳ ନିକଟରେ ୨ଟି ଲେଖାଏଁ ଆସନ ରହିଛି। ସେହିପରି ଡିଏମକେ ମେଣ୍ଟର ଅଂଶ ଥିବା ଭିସିକେ ମଧ୍ୟ ନିଜର ଉଚ୍ଚସ୍ତରୀୟ କମିଟିର ବୈଠକ ଡାକିଛି। ଏହି ଦଳ ମଧ୍ୟ ନିର୍ବାଚନରେ ୨ଟି ଆସନ ହାସଲ କରିଛି। ଯଦି ଏହି ତିନୋଟି ଦଳ କଂଗ୍ରେସ ସହ ମିଶି ବିଜୟଙ୍କୁ ସମର୍ଥନ କରନ୍ତି, ତେବେ ଟିଭିକେ ବହୁମତ ଆକଳନ ପାର୍ କରିପାରିବ ବୋଲି ଆଶା କରାଯାଉଛି। ଉଲ୍ଲେଖଯୋଗ୍ୟ ଯେ ୨୩୪ ଆସନ ବିଶିଷ୍ଟ ବିଧାନସଭାରେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ଦରକାର, ଯାହାକି ଟିଭିକେ ପାଖରେ ନାହିଁ।

ଅନ୍ୟପକ୍ଷରେ ଏକ ଆଶ୍ଚର୍ଯ୍ୟଜନକ ଘଟଣାକ୍ରମରେ ଡିଏମକେ ଏବଂ ଏଆଇଏଡିଏମକେ ମଧ୍ୟରେ ମେଣ୍ଟ ହେବାର ସମ୍ଭାବନା ସୃଷ୍ଟି ହୋଇଛି। ଗୁରୁବାର ଦିନ ଡିଏମକେ ସଭାପତି ତଥା ବିଦାୟୀ ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନ ଚେନ୍ନାଇଠାରେ ବାମପନ୍ଥୀ ନେତା ଏବଂ ଭିସିକେ ସଭାପତିଙ୍କ ସହ ଆଲୋଚନା କରିଛନ୍ତି। ରାଜ୍ୟରେ ରାଜନୈତିକ ଅସ୍ଥିରତା ଦୂର କରିବା ପାଇଁ ଡିଏମକେ ଏଆଇଏଡିଏମକେ କୁ ସମର୍ଥନ ଦେବା ନେଇ ସେ ବିଚାର କରୁଥିବା ଜଣାପଡିଛି। ତେବେ ସିପିଆଇ ଏବଂ ସିପିଆଇ(ଏମ) ଶୁକ୍ରବାର ବୈଠକ ପରେ ଚୂଡ଼ାନ୍ତ ନିଷ୍ପତ୍ତି ନେବେ ବୋଲି ଷ୍ଟାଲିନଙ୍କୁ ଜଣାଇଛନ୍ତି। ଡିଏମକେ ଦଳର ସୂତ୍ରରୁ ପ୍ରକାଶ ଯେ, ସେମାନେ ସରକାରରେ ସାମିଲ ନହୋଇ ଏଆଇଏଡିଏମକେ ସରକାରକୁ ବାହାରୁ ସମର୍ଥନ ଦେବାକୁ ଆଗ୍ରହୀ ଅଛନ୍ତି। ନିର୍ବାଚନରେ ଡିଏମକେ ୫୯ଟି ଆସନ ଜିତିଥିବା ବେଳେ ଏଆଇଏଡିଏମକେ ୪୭ଟି ଆସନ ହାସଲ କରିଛି। ଏଭଳି ପରିସ୍ଥିତିରେ ତାମିଲନାଡୁର ପରବର୍ତ୍ତୀ ସରକାର କିଏ ଗଠନ କରିବ, ତାହା ଦେଖିବା ବାକି ରହିଲା।

ତାମିଲନାଡୁର ୨୦୨୬ ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇବା ପରେ ରାଜ୍ୟରେ ଏକ ଅଭୂତପୂର୍ବ ରାଜନୈତିକ ସଙ୍କଟ ଦେଖାଦେଇଛି। ଦକ୍ଷିଣ ଭାରତୀୟ ସୁପରଷ୍ଟାର ବିଜୟଙ୍କ ଦ୍ୱାରା ଗଠିତ ନୂତନ ଦଳ ତାମିଲଗା ଭେତ୍ରି କାଜଗମ୍ (ଟିଭିକେ) ନିର୍ବାଚନରେ ସବୁଠାରୁ ବଡ଼ ଦଳ ଭାବରେ ଉଭା ହୋଇଥିଲେ ସୁଦ୍ଧା ସରକାର ଗଠନ ପାଇଁ ଆବଶ୍ୟକୀୟ ବହୁମତ ହାସଲ କରିପାରିନାହିଁ। ଏହାକୁ ନେଇ ସରକାର ଗଠନ ପ୍ରକ୍ରିୟାରେ ଅନିଶ୍ଚିତତା ଦେଖାଦେଇଛି।

ବହୁମତଠାରୁ ଦୂରରେ ଟିଭିକେ

ଦୀର୍ଘ ପାଞ୍ଚ ଦଶନ୍ଧି ଧରି ତାମିଲନାଡୁରେ ରାଜୁତି କରୁଥିବା ଦ୍ରାବିଡ଼ ଦଳଗୁଡ଼ିକର ଏକଚାଟିଆ ଶାସନକୁ ଶେଷ କରି ଟିଭିକେ ମୋଟ ୨୩୪ ଆସନରୁ ୧୦୮ଟି ଆସନ ହାତେଇଛି। ତେବେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ୧୧୮ ଥିବାବେଳେ ଦଳ ଏଥିରୁ ପଛରେ ପଡ଼ିଯାଇଛି। ଅନ୍ୟପକ୍ଷରେ ନିଜର ଦୁଇଟି ଆସନରୁ ବିଜୟୀ ହୋଇଥିବା ବିଜୟଙ୍କୁ ନିୟମ ଅନୁଯାୟୀ ଗୋଟିଏ ଆସନ ଛାଡ଼ିବାକୁ ପଡ଼ିବ, ଯାହା ଫଳରେ ଦଳର ବିଧାୟକ ସଂଖ୍ୟା ୧୦୭କୁ ଖସିଆସିବ। ଦୀର୍ଘ ଦିନର ସହଯୋଗୀ ଡିଏମକେ ସହ ମେଣ୍ଟ ଭାଙ୍ଗି କଂଗ୍ରେସ ନିଜର ୫ ବିଧାୟକଙ୍କ ସମର୍ଥନ ଟିଭିକେକୁ ଦେଇଛି। ଏହା ସତ୍ତ୍ୱେ ମେଣ୍ଟର ସଂଖ୍ୟା ୧୧୨ରେ ପହଞ୍ଚିଛି, ଯାହା ବହୁମତଠାରୁ ଏବେ ବି କମ୍ ରହିଛି।

ରାଜ୍ୟପାଳଙ୍କ ସହ ଆଲୋଚନା ଓ ବିକ୍ଷୋଭ

ସରକାର ଗଠନ ପାଇଁ ଦାବି ଜଣାଇ ବିଜୟ ତାମିଲନାଡୁର ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କୁ ଭେଟିଥିଲେ। କିନ୍ତୁ ରାଜ୍ୟପାଳ ତାଙ୍କୁ ଆବଶ୍ୟକୀୟ ୧୧୮ ବିଧାୟକଙ୍କ ସମର୍ଥନ ପତ୍ର ଦାଖଲ କରିବାକୁ କହିଛନ୍ତି। ରାଜ୍ୟପାଳଙ୍କ ଏହି ନିଷ୍ପତ୍ତି ପରେ ସରକାର ଗଠନରେ ବିଳମ୍ବ ହେଉଥିବାରୁ ଅସନ୍ତୋଷ ପ୍ରକାଶ କରି ଟିଭିକେ ଏବଂ କଂଗ୍ରେସ କର୍ମୀମାନେ ଚେନ୍ନାଇସ୍ଥିତ ଲୋକ ଭବନ ବାହାରେ ବିକ୍ଷୋଭ ପ୍ରଦର୍ଶନ କରିଛନ୍ତି। ବିଜୟ ଏବେ ସରକାର ଗଠନ କରିବା ପାଇଁ ଅନ୍ୟ ଛୋଟ ଦଳଗୁଡ଼ିକ ସହ ଆଲୋଚନା ଚଳାଇଛନ୍ତି।

ଡିଏମକେ ଏବଂ ଏଆଇଏଡିଏମକେର ରଣନୀତି

ଚଳିତ ନିର୍ବାଚନରେ କ୍ଷମତାସୀନ ଡିଏମକେ (DMK) ମାତ୍ର ୫୯ଟି ଆସନ ପାଇଥିବା ବେଳେ ପ୍ରମୁଖ ବିରୋଧୀ ଦଳ ଏଆଇଏଡିଏମକେ (AIADMK) ୪୭ଟି ଆସନରେ ସୀମିତ ରହିଛି। ବିଜୟଙ୍କୁ କ୍ଷମତାରୁ ଦୂରେଇ ରଖିବା ପାଇଁ ଏହି ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଦଳ ଏକାଠି ହୋଇ ସରକାର ଗଠନ କରିବା ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି। ଏହାର କଡ଼ା ଜବାବ ଦେଇ ଟିଭିକେ ପକ୍ଷରୁ ଚେତାବନୀ ଦିଆଯାଇଛି ଯେ ଯଦି ଡିଏମକେ କିମ୍ବା ଏଆଇଏଡିଏମକେକୁ ସରକାର ଗଠନ ପାଇଁ ସୁଯୋଗ ଦିଆଯାଏ, ତେବେ ଟିଭିକେର ସମସ୍ତ ୧୦୭ ବିଧାୟକ ଗଣଇସ୍ତଫା ଦେବେ। ବର୍ତ୍ତମାନ ପରିସ୍ଥିତିରେ ତାମିଲନାଡୁ ରାଜନୀତି ଏକ ରୋଚକ ମୋଡ଼ ନେଇଛି।

ତାମିଲନାଡୁ ରାଜନୀତିରେ ଏବେ ଏକ ବଡ଼ ଧରଣର ସଙ୍କଟ ଦେଖାଦେଇଛି। ୨୦୨୬ ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇବା ପରେ ଅଭିନେତାରୁ ରାଜନେତା ପାଲଟିଥିବା ଥଲପତି ବିଜୟ ଏବଂ ତାଙ୍କ ଦଳ ତାମିଲଗା ଭେତ୍ରି କାଜାଗମ୍ (TVK) ସବୁଠାରୁ ବଡ଼ ଦଳ ଭାବେ ଉଭା ହୋଇଛନ୍ତି। ତେବେ ବହୁମତ ନଥିବାରୁ ସରକାର ଗଠନ ପାଇଁ ଏବେ ମେଣ୍ଟ ରାଜନୀତି ଜୋର ଧରିଛି।

ସଂଖ୍ୟାଗରିଷ୍ଠତା ଠାରୁ ଦୂରରେ ଟିଭିକେ

୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭାରେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ହେଉଛି ୧୧୮। କିନ୍ତୁ ବିଜୟଙ୍କ ଦଳ ଟିଭିକେ (TVK) ଏକାକୀ ୧୦୮ ଟି ଆସନ ଜିତିଛି। କଂଗ୍ରେସ ନିଜର ୫ ଜଣ ବିଧାୟକଙ୍କ ସମର୍ଥନ ଦେବା ପରେ ମଧ୍ୟ ଏହି ସଂଖ୍ୟା ୧୧୩ ରେ ପହଞ୍ଚିଛି। ଅନ୍ୟପକ୍ଷରେ, ଥଲପତି ବିଜୟ ଦୁଇଟି ଆସନରୁ ବିଜୟୀ ହୋଇଥିବାରୁ ତାଙ୍କୁ ଗୋଟିଏ ଆସନ ଛାଡ଼ିବାକୁ ପଡ଼ିବ। ଏହା ଫଳରେ ଗୃହର ମୋଟ ସଦସ୍ୟ ସଂଖ୍ୟା ୨୩୩ କୁ ଖସି ଆସିବ ଏବଂ ବହୁମତ ପାଇଁ ୧୧୭ ଆସନର ଆବଶ୍ୟକତା ପଡ଼ିବ। ଏବେ ସରକାର ଗଠନ କରିବା ପାଇଁ ବିଜୟଙ୍କୁ ଆଉ ୫ ଜଣ ବିଧାୟକଙ୍କ ସମର୍ଥନ ଦରକାର।

କଂଗ୍ରେସର ସମର୍ଥନ ଏବଂ ନୂଆ ସମୀକରଣ

ବହୁମତ ହାସଲ କରିବା ପାଇଁ ରାଜ୍ୟରେ ଏବେ ସମୀକରଣ ବଦଳିବାରେ ଲାଗିଛି। କଂଗ୍ରେସ ତାର ପୁରୁଣା ମେଣ୍ଟ ସାଥୀ ଡିଏମକେ (DMK) ର ହାତ ଛାଡ଼ି ବିଜୟଙ୍କୁ ସମର୍ଥନ ଜଣାଇଛି। ସଂଖ୍ୟାଗରିଷ୍ଠତା ହାସଲ କରିବା ଲକ୍ଷ୍ୟରେ ବିଜୟ ଏବେ ଭିସିକେ (VCK), ବାମପନ୍ଥୀ ଦଳ ଏବଂ ଆଇୟୁଏମଏଲ (IUML) ଭଳି ଦଳଗୁଡ଼ିକ ସହ ଆଲୋଚନା ଚଳାଇଛନ୍ତି, ଯେଉଁମାନେ ବର୍ତ୍ତମାନ ସୁଦ୍ଧା ଡିଏମକେ ମେଣ୍ଟରେ ଅଛନ୍ତି।

ଏଆଇଏଡିଏମକେ ଏବଂ ଡିଏମକେର ଚାଲ୍

ଅନ୍ୟପଟେ ରାଜ୍ୟର ଦୁଇ ପ୍ରମୁଖ ଦଳ ଡିଏମକେ (DMK) ଏବଂ ଏଆଇଏଡିଏମକେ (AIADMK) ମଧ୍ୟ ନିଜର ରଣନୀତି ପ୍ରସ୍ତୁତ କରୁଛନ୍ତି। ରିପୋର୍ଟ ଅନୁଯାୟୀ, ଥଲପତି ବିଜୟଙ୍କୁ କ୍ଷମତାରୁ ଦୂରେଇ ରଖିବା ପାଇଁ ଏହି ଦୁଇ ପାରମ୍ପରିକ ବିରୋଧୀ ଦଳ ଏକାଠି ହେବାର ସମ୍ଭାବନା ସୃଷ୍ଟି ହୋଇଛି। ଏହାରି ଭିତରେ ଏଆଇଏଡିଏମକେ ନିଜର ନବନିର୍ବାଚିତ ବିଧାୟକମାନଙ୍କୁ ପଡ଼ୋଶୀ ରାଜ୍ୟ ପୁଡୁଚେରୀକୁ ସ୍ଥାନାନ୍ତର କରିଦେଇଛି।

ତାମିଲନାଡୁ ରାଜନୀତିରେ ଦେଖାଦେଇଥିବା ଏହି ଅସ୍ଥିରତା ଏବେ ଜାତୀୟ ସ୍ତରରେ ଚର୍ଚ୍ଚାର ବିଷୟ ପାଲଟିଛି। ଆଗାମୀ ଦିନରେ କିଏ ସରକାର ଗଢ଼ିବ ଏବଂ କେଉଁ ଦଳ କାହାକୁ ସମର୍ଥନ ଦେବେ, ତାହା ଉପରେ ସମସ୍ତଙ୍କ ନଜର ରହିଛି।

ତାମିଲନାଡୁ: ତାମିଲନାଡୁ ବିଧାନସଭା ନିର୍ବାଚନରେ ଖଣ୍ଡିତ ଜନାଦେଶ ଆସିବା ପରେ ରାଜ୍ୟ ରାଜନୀତିରେ ହଟଚମଟ ସୃଷ୍ଟି ହୋଇଛି। ଅଭିନେତାରୁ ରାଜନେତା ପାଲଟିଥିବା ବିଜୟଙ୍କ ଦଳ ଟିଭିକେ (TVK) ୧୦୮ଟି ଆସନ ସହ ସବୁଠାରୁ ବଡ଼ ଦଳ ଭାବେ ଉଭା ହୋଇଥିବା ବେଳେ ସରକାର ଗଠନ ପାଇଁ କସରତ ଆରମ୍ଭ କରିଛି। ୨୩୪ ସଦସ୍ୟ ବିଶିଷ୍ଟ ତାମିଲନାଡୁ ବିଧାନସଭାରେ ବହୁମତ ସଂଖ୍ୟା ୧୧୮ ଥିବା ବେଳେ ଟିଭିକେକୁ ଆହୁରି ୧୦ଟି ଆସନର ଆବଶ୍ୟକତା ରହିଛି। ଏଥିପାଇଁ ଦଳ କଂଗ୍ରେସ, ପିଏମକେ (PMK), ବାମଦଳ ଏବଂ ଭିସିକେ (VCK) ଭଳି ଛୋଟ ଦଳଗୁଡ଼ିକର ସମର୍ଥନ ଲୋଡ଼ିଛି। ସରକାର ଗଠନ ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ବିଜୟ ରାଜ୍ୟପାଳ ରାଜେନ୍ଦ୍ର ଆର୍ଲେକରଙ୍କୁ ଭେଟିବାକୁ ସମୟ ମାଗିଛନ୍ତି। 

ଦୀର୍ଘଦିନର ମେଣ୍ଟ ସହଯୋଗୀ ଡିଏମକେ (DMK)କୁ ଛାଡ଼ି କଂଗ୍ରେସ ଏବେ ବିଜୟଙ୍କ ଦଳକୁ ସମର୍ଥନ କରିବାକୁ ନିଷ୍ପତ୍ତି ନେଇଛି। କଂଗ୍ରେସ ନେତା କାର୍ତ୍ତି ଚିଦାମ୍ବରମ କହିଛନ୍ତି ଯେ ତାମିଲନାଡୁରେ ଏକ ଧର୍ମନିରପେକ୍ଷ ଏବଂ ସ୍ଥିର ସରକାର ଗଠନ ପାଇଁ ଦଳ ସର୍ବସମ୍ମତି କ୍ରମେ ଟିଭିକେକୁ ସମର୍ଥନ କରିବାକୁ ନିଷ୍ପତ୍ତି ନେଇଛି। ମଙ୍ଗଳବାର ବିଳମ୍ବିତ ରାତିରେ ଅନୁଷ୍ଠିତ ତାମିଲନାଡୁ କଂଗ୍ରେସର ରାଜନୈତିକ ବ୍ୟାପାର କମିଟି (PAC) ବୈଠକରେ ଏହି ନିଷ୍ପତ୍ତି ନିଆଯାଇଥିଲା। ଅନ୍ୟପକ୍ଷରେ, କଂଗ୍ରେସର ଏଭଳି ପଦକ୍ଷେପକୁ ନେଇ ଡିଏମକେ ତୀବ୍ର ପ୍ରତିକ୍ରିୟା ପ୍ରକାଶ କରିଛି। ଡିଏମକେ ମୁଖପାତ୍ର ସରବଣନ ଅନ୍ନାଦୁରାଇ କଂଗ୍ରେସକୁ 'ବିଶ୍ୱାସଘାତକ' ବୋଲି କହିବା ସହ ଏହା ଏକ ଅଦୂରଦର୍ଶୀ ନିଷ୍ପତ୍ତି ବୋଲି ସମାଲୋଚନା କରିଛନ୍ତି। ସେ କହିଛନ୍ତି ଯେ ଏହା 'ଇଣ୍ଡିଆ' (INDIA) ମେଣ୍ଟ ଭାଗିଦାରୀଙ୍କ ପ୍ରତି ଧୋକା ଏବଂ ଆଗାମୀ ୨୦୨୯ ନିର୍ବାଚନରେ କଂଗ୍ରେସ ଏଥିପାଇଁ ଅନୁତାପ କରିବ।

ଅନ୍ୟପଟେ, ପ୍ରମୁଖ ବିରୋଧୀ ଦଳ ଏଆଇଏଡିଏମକେ (AIADMK) ମଧ୍ୟରେ ଅନ୍ତର୍ଦ୍ୱନ୍ଦ୍ୱ ଦେଖାଦେଇଛି। ଦଳର ଗୋଟିଏ ଗୋଷ୍ଠୀ ଇଡାପ୍ପାଡି ପଲାନିସ୍ୱାମୀଙ୍କ ନେତୃତ୍ୱରେ ଅସନ୍ତୁଷ୍ଟ ଥିବା ବେଳେ ସେମାନେ ବିଜୟଙ୍କୁ ସରକାର ଗଠନରେ ସମର୍ଥନ ଦେବାକୁ ଚାହୁଁଥିବା ଚର୍ଚ୍ଚା ହେଉଛି। ଏସବୁ ମଧ୍ୟରେ ଘୋଡ଼ା ବେପାର ଆଶଙ୍କାକୁ ଏଡ଼ାଇବା ପାଇଁ ଟିଭିକେ ତାର ସମସ୍ତ ୧୦୮ ବିଧାୟକଙ୍କୁ ମାମଲ୍ଲାପୁରମର ଏକ ବିଳାସପୂର୍ଣ୍ଣ ରିସର୍ଟରେ ରଖିଛି। ବିଧାୟକମାନଙ୍କ ସୁରକ୍ଷା ପାଇଁ ରିସର୍ଟ ଚାରିପଟେ କଡ଼ା ପୋଲିସ ପହରା ଲଗାଯାଇଛି। ସରକାର ଗଠନର ସମୀକରଣ ଯାହା ବି ହେଉନା କାହିଁକି, ତାମିଲନାଡୁ ରାଜନୀତିରେ ଏବେ ବିଜୟଙ୍କ ଯୁଗ ଆରମ୍ଭ ହୋଇଛି ବୋଲି ରାଜନୈତିକ ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।

ତାମିଲନାଡୁ: ତାମିଲନାଡୁ ବିଧାନସଭା ନିର୍ବାଚନରେ ବଡ଼ ଧରଣର ବିପର୍ଯ୍ୟୟ ଦେଖିବାକୁ ମିଳିଛି। ରାଜ୍ୟରେ ଏପରି ସରକାର ବିରୋଧୀ ହାୱା ବହିଛି ଯେ ମୁଖ୍ୟମନ୍ତ୍ରୀ ଏମ୍.କେ ଷ୍ଟାଲିନ୍ ନିଜ ଆସନ ମଧ୍ୟ ବଞ୍ଚାଇ ପାରିନାହାଁନ୍ତି। କୋଲାଥୁର ବିଧାନସଭା ଆସନରୁ ମୁଖ୍ୟମନ୍ତ୍ରୀ ଷ୍ଟାଲିନ୍ ପରାଜୟର ସାମ୍ନା କରିଛନ୍ତି।

ତାମିଲନାଡୁ ରାଜନୀତିରେ ଅଭିନେତାରୁ ନେତା ପାଲଟିଥିବା ଥାଲାପତି ବିଜୟଙ୍କ ପାର୍ଟି ତାମିଲାଗା ଭେଟ୍ରି କାଜାଗମ୍ (TVK) ଚମତ୍କାର ପ୍ରଦର୍ଶନ କରିଛି। ମୁଖ୍ୟମନ୍ତ୍ରୀ ଷ୍ଟାଲିନ୍ ଙ୍କୁ ବିଜୟଙ୍କ ଦଳର ପ୍ରାର୍ଥୀ ପରାସ୍ତ କରିଛନ୍ତି। ପ୍ରାରମ୍ଭିକ ଧାରା ଅନୁଯାୟୀ, ବିଜୟଙ୍କ ଦଳ ପ୍ରାୟ ୧୦୮ଟି ଆସନରେ ଆଗୁଆ ରହିଛି। ଅନ୍ୟପକ୍ଷରେ ଡିଏମକେ ନେତୃତ୍ୱାଧୀନ ମେଣ୍ଟ ୭୧ଟି ଆସନରେ ଆଗୁଆ ଥିବା ବେଳେ ଏଆଇଏଡିଏମକେ ନେତୃତ୍ୱାଧୀନ ଏନଡିଏ ୫୪ଟି ଆସନ ସହ ତୃତୀୟ ସ୍ଥାନରେ ରହିଛି।

ନିର୍ବାଚନ ଆୟୋଗଙ୍କ ୱେବସାଇଟ୍ ଅନୁଯାୟୀ, ବର୍ତ୍ତମାନ ସୁଦ୍ଧା ୫ଟି ଆସନର ଫଳାଫଳ ଘୋଷଣା କରାଯାଇଛି। ଏଥିମଧ୍ୟରୁ ୩ଟି ଆସନରେ ଡିଏମକେ ପ୍ରାର୍ଥୀ ବିଜୟୀ ହୋଇଥିବା ବେଳେ କଂଗ୍ରେସ ଏବଂ ଟିଭିକେ ଗୋଟିଏ ଲେଖାଏଁ ଆସନରେ ଜିତିଛନ୍ତି।

ତାମିଲନାଡୁ: ତାମିଲନାଡୁ ବିଧାନସଭା ନିର୍ବାଚନ ୨୦୨୬ର ଭୋଟ୍ ଗଣତି ଜାରି ରହିଛି । ପ୍ରାରମ୍ଭିକ ଟ୍ରେଣ୍ଡରୁ ରାଜ୍ୟରେ ଏକ ବଡ଼ ରାଜନୈତିକ ପରିବର୍ତ୍ତନର ସଙ୍କେତ ମିଳିଛି। ଅଭିନେତାରୁ ରାଜନେତା ପାଲଟିଥିବା ବିଜୟଙ୍କ ପାର୍ଟି TVK ବହୁମତ ଆଡ଼କୁ ଅଗ୍ରସର ହେଉଥିବା ଦେଖାଯାଇଛି। ତାଙ୍କ ଦଳ 'ତାମିଲଗା ଭେଟ୍ରି କାଝାଗମ' (TVK) ରାଜ୍ୟର ପାରମ୍ପରିକ ରାଜନୈତିକ ସମୀକରଣକୁ ସମ୍ପୂର୍ଣ୍ଣ ଓଲଟପାଲଟ କରିଦେଇଛି । ବିଜୟ ଏକାକି ଲଢ଼ି ସବୁ ବଡ଼ ମେଣ୍ଟ ପାଇଁ ଟେନସନ୍ ପାଲଟିଛନ୍ତି । ବିଜୟଙ୍କ ଲୋକପ୍ରିୟତା ଏବଂ ତାଙ୍କ ଦଳ ପ୍ରତି ଯୁବପିଢ଼ିଙ୍କ ଆକର୍ଷଣ ଅନେକ ସ୍ଥାନରେ ସ୍ଥାପିତ ଦଳଗୁଡ଼ିକୁ ପଛରେ ପକାଇ ଦେଇଛି । ଯାହା ଆଜିର ଫଳାଫଳରୁ ସ୍ପଷ୍ଟ ଜଣାପଡୁଛି । 

ତାମିଲନାଡୁର ସମୁଦାୟ ୨୩୪ ବିଧାନସଭା ଆସନ ପାଇଁ ଗଣତି ଜାରି ରହିଛି। ସରକାର ଗଠନ ପାଇଁ ମ୍ୟାଜିକ୍ ନମ୍ବର ବା ବହୁମତ ସଂଖ୍ୟା ହେଉଛି ୧୧୮। ନିର୍ବାଚନ କମିଶନ (ECI) ଙ୍କ ତଥ୍ୟ ଅନୁଯାୟୀ, ପ୍ରାରମ୍ଭିକ ଟ୍ରେଣ୍ଡରେ ଟିଭିକେ ସର୍ବବୃହତ ଦଳ ଭାବରେ ଉଭା ହୋଇଛି ଏବଂ ଶତାଧିକ ଆସନରେ ଆଗୁଆ ରହିଛି। ସର୍ବଶେଷ ରିପୋର୍ଟ ଅନୁଯାୟୀ ଟିଭିକେ ୧୦୮ଟି ଆସନରେ ଆଗୁଆ ଥିବା ବେଳେ ଏଆଇଏଡିଏମକେ (AIADMK) ୬୯ଟି ଆସନ ରେ ଆଗୁଆ ରହିଛି। ସେହିପରି ବର୍ତ୍ତମାନର ମୁଖ୍ୟମନ୍ତ୍ରୀ ତଥା ଡିଏମକେ ମୁଖ୍ୟ ଏମକେ ଷ୍ଟାଲିନଙ୍କ DMK ୫୭ଟି ଆସନରେ ଆଗୁଆ ରହିଛି ।

ଚଳିତ ବର୍ଷ ଏପ୍ରିଲ ୨୩ ତାରିଖରେ ତାମିଲନାଡୁରେ ଏକକ ପର୍ଯ୍ୟାୟରେ ମତଦାନ ହୋଇଥିଲା। ଏଥର ରାଜ୍ୟରେ ରେକର୍ଡ ୮୪.୬୯ ପ୍ରତିଶତ ମତଦାନ ହୋଇଥିଲା, ଯାହାକି ପୂର୍ବର ସର୍ବାଧିକ ରେକର୍ଡ ୭୮.୩୯ ପ୍ରତିଶତ କୁ ଅତିକ୍ରମ କରିଥିଲା। ଏଥର ନିର୍ବାଚନରେ ମୁଖ୍ୟତଃ ଏନଡିଏ (NDA) ଏବଂ ଇଣ୍ଡିଆ ମେଣ୍ଟ (INDIA bloc) ମଧ୍ୟରେ କଡ଼ା ଟକ୍କର ହେବ ବୋଲି ଆଶା କରାଯାଉଥିଲା। କିନ୍ତୁ ବିଜୟଙ୍କ ଏଣ୍ଟ୍ରି ଏହାକୁ ଏକ ରୋମାଞ୍ଚକର ତ୍ରିମୁଖୀ ଲଢ଼େଇରେ ପରିଣତ କରିଦେଇଛି। ଏହି ନିର୍ବାଚନରେ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ୍, ଉପମୁଖ୍ୟମନ୍ତ୍ରୀ ଉଦୟନିଧି ଷ୍ଟାଲିନ୍, ବିରୋଧୀ ଦଳ ନେତା ଏଡାପ୍ପାଡି କେ. ପଲାନିସ୍ୱାମୀ ଏବଂ ବିଜୟ ଙ୍କ ଭଳି ହେଭିୱେଟ୍ ନେତାଙ୍କ ଭାଗ୍ୟ ପରୀକ୍ଷା ହେଉଛି।

ତାମିଲନାଡୁ ବିଧାନସଭା ନିର୍ବାଚନ ୨୦୨୬ର ଫଳାଫଳ ଆଜି ପ୍ରକାଶ ପାଉଛି। ଏହି ନିର୍ବାଚନରେ ସବୁଠାରୁ ବଡ଼ ଚର୍ଚ୍ଚାର ବିଷୟ ପାଲଟିଛନ୍ତି ସାଉଥ୍ ସୁପରଷ୍ଟାର ଥଲାପତି ବିଜୟ। ତାଙ୍କ ନବଗଠିତ ରାଜନୈତିକ ଦଳ ତାମିଲଗା ଭେଟ୍ରି କାଜାଗମ୍ (TVK) ରାଜ୍ୟର ପାରମ୍ପରିକ ରାଜନୀତିରେ ଏକ ବଡ଼ ପରିବର୍ତ୍ତନ ଆଣିବାକୁ ଯାଉଥିବା ପ୍ରାରମ୍ଭିକ ଟ୍ରେଣ୍ଡରୁ ସ୍ପଷ୍ଟ ହୋଇଛି। ଗତ ୫୦ ବର୍ଷ ଧରି ତାମିଲନାଡୁ ରାଜନୀତିରେ ରାଜ୍ କରୁଥିବା ଡିଏମକେ (DMK) ଏବଂ ଏଆଇଏଡିଏମକେ (AIADMK) ପରି ଦୁଇ ପ୍ରମୁଖ ଦଳକୁ କଡ଼ା ଟକ୍କର ଦେଉଛି ବିଜୟଙ୍କ ଦଳ।

ରଜନୀକାନ୍ତ ଓ କମଲ ହାସନଙ୍କୁ ପଛରେ ପକାଇଲେ

ତାମିଲନାଡୁରେ ସିନେମା ଏବଂ ରାଜନୀତିର ସମ୍ପର୍କ ବହୁ ପୁରୁଣା। କିନ୍ତୁ ବିଗତ ଦିନରେ ରଜନୀକାନ୍ତ ଏବଂ କମଲ ହାସନଙ୍କ ଭଳି ବଡ଼ ତାରକା ରାଜନୀତିରେ ପ୍ରବେଶ କରିଥିଲେ ମଧ୍ୟ ବିଶେଷ ସଫଳତା ପାଇପାରି ନଥିଲେ। ମାତ୍ର ୫୧ ବର୍ଷୀୟ ଥଲାପତି ବିଜୟ ଏହି ଧାରାକୁ ବଦଳାଇ ଦେଇଛନ୍ତି। ବକ୍ସ ଅଫିସରେ ନିଜର ଯାଦୁ ଦେଖାଇବା ପରେ ଏବେ ଭୋଟ୍ ବାକ୍ସରେ ମଧ୍ୟ ସେ ନିଜର ପ୍ରଭାବ ବିସ୍ତାର କରିଛନ୍ତି। ସେ କେବଳ ଜଣେ ଫିଲ୍ମ ଷ୍ଟାର୍ ନୁହଁନ୍ତି, ବରଂ ଜଣେ ପ୍ରକୃତ ଜନନେତା ଭାବେ ଉଭା ହୋଇଛନ୍ତି।

ଦୁଇଟି ଆସନରୁ ଆଗୁଆ ଥଲାପତି

ନିର୍ବାଚନ ଆୟୋଗଙ୍କ ସଦ୍ୟତମ ତଥ୍ୟ ଅନୁଯାୟୀ, ବିଜୟ ନିଜେ ପ୍ରତିଦ୍ୱନ୍ଦ୍ୱିତା କରୁଥିବା ଦୁଇଟି ଯାକ ଆସନ— ପେରମ୍ବୁର୍ ଏବଂ ତ୍ରିଚି ଇଷ୍ଟରୁ ଆଗୁଆ ରହିଛନ୍ତି। ବିଶେଷ କରି ଡିଏମକେର ଗଡ଼ କୁହାଯାଉଥିବା ପେରମ୍ବୁର୍ ଏବଂ ଶ୍ରମିକ ବର୍ଗ ବହୁଳ ତ୍ରିଚିରେ ବିଜୟଙ୍କ ଆଗୁଆ ରହିବା ଏକ ବଡ଼ ରାଜନୈତିକ ସଫଳତା ବୋଲି ବିବେଚନା କରାଯାଉଛି। ତାଙ୍କ ଦଳ TVK ସମଗ୍ର ରାଜ୍ୟରେ ଏକାଧିକ ଆସନରେ ଅଗ୍ରଣୀ ରହିଛି, ଯାହା ଆଗାମୀ ସରକାର ଗଠନରେ ଏକ ନିର୍ଣ୍ଣାୟକ ଭୂମିକା ଗ୍ରହଣ କରିପାରେ।

ଯୁବ ଏବଂ ମହିଳା ଭୋଟରଙ୍କ ବିପୁଳ ସମର୍ଥନ

ବିଜୟଙ୍କ ସଫଳତାର ମୂଳ କାରଣ ହେଉଛି ରାଜ୍ୟର ଯୁବ ଏବଂ ମହିଳା ଭୋଟର। ନିର୍ବାଚନ ପ୍ରଚାର ସମୟରେ ବିଜୟ ବେକାର ଯୁବକମାନଙ୍କୁ ପ୍ରତି ମାସରେ ୪,୦୦୦ ଟଙ୍କା ଏବଂ ଡିପ୍ଲୋମାଧାରୀଙ୍କୁ ୨,୫୦୦ ଟଙ୍କାର ଆର୍ଥିକ ସହାୟତା ଦେବାକୁ ପ୍ରତିଶ୍ରୁତି ଦେଇଥିଲେ। ଏହା ସହିତ ନିଜକୁ ଏକ ବିକଳ୍ପ ଭାବେ ଉପସ୍ଥାପନ କରି ସେ ଭୋଟରଙ୍କ ହୃଦୟ ଜିଣିବାରେ ସଫଳ ହୋଇଛନ୍ତି।

ନୂଆଦିଲ୍ଲୀ: କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ମଙ୍ଗଳବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ 'ଆତଙ୍କବାଦୀ' କହି ଏକ ନୂଆ ବିବାଦ ସୃଷ୍ଟି କରିଛନ୍ତି। ଚେନ୍ନାଇରେ ଏକ ସାମ୍ବାଦିକ ସମ୍ମିଳନୀରେ ଏଆଇଏଡିଏମକେ (AIADMK) ଏବଂ ବିଜେପି (BJP) ମେଣ୍ଟକୁ ସମାଲୋଚନା କରିବା ସମୟରେ ସେ ଏହି ମନ୍ତବ୍ୟ ଦେଇଛନ୍ତି।

ଏଆଇଏଡିଏମକେ କିପରି ପ୍ରଧାନମନ୍ତ୍ରୀଙ୍କ ସହ ହାତ ମିଳାଇଲା ତାହାକୁ ନେଇ ଖଡ଼ଗେ ପ୍ରଶ୍ନ କରିଛନ୍ତି। ସେ କହିଛନ୍ତି, "ଅନ୍ନାଦୁରାଇଙ୍କ ଫଟୋ ଲଗାଉଥିବା ଏଆଇଏଡିଏମକେ ନେତାମାନେ ମୋଦୀଙ୍କ ସହ କିପରି ମିଶିପାରିବେ? ସେ ଜଣେ ଆତଙ୍କବାଦୀ। ତାଙ୍କ ଦଳ ସମାନତା ଏବଂ ନ୍ୟାୟରେ ବିଶ୍ୱାସ କରେ ନାହିଁ। ଏହି ଲୋକମାନେ ତାଙ୍କ ସହ ମିଶୁଛନ୍ତି; ଏହାର ଅର୍ଥ ସେମାନେ ଗଣତନ୍ତ୍ରକୁ ଦୁର୍ବଳ କରୁଛନ୍ତି।" ଆଜି ଏଆଇଏଡିଏମକେ ନିଜର ପରିଚୟ ହରାଇ ବିଜେପିର ଏକ ନୀରବ ଦାସ ପାଲଟିଛି ଏବଂ ତାମିଲନାଡ଼ୁର ସ୍ୱାର୍ଥ ରକ୍ଷା କରିବା ପାଇଁ ଏମକେ ଷ୍ଟାଲିନଙ୍କ ଭଳି ଲଢୁଆ ନେତାଙ୍କ ଆବଶ୍ୟକତା ରହିଛି ବୋଲି ସେ ଦୋହରାଇଥିଲେ।

ନିଜର ବିବାଦୀୟ ମନ୍ତବ୍ୟ ଉପରେ ବିବାଦ ବଢ଼ିବା ପରେ ଖଡ଼ଗେ ସ୍ପଷ୍ଟୀକରଣ ଦେଇ କହିଥିଲେ ଯେ ସେ ମୋଦୀଙ୍କୁ ଆତଙ୍କବାଦୀ କହିନାହାଁନ୍ତି, ବରଂ ସେ ସବୁବେଳେ ଲୋକ ଓ ରାଜନୈତିକ ଦଳଗୁଡ଼ିକୁ 'ଭୟଭୀତ' ବା ଟେରରାଇଜ୍ କରୁଛନ୍ତି। ସେ କହିଛନ୍ତି, "ମୋର କହିବାର ଅର୍ଥ ହେଉଛି ମୋଦୀ ସର୍ବଦା ଧମକ ଦେଉଛନ୍ତି। ଇଡି (ED), ଆଇକର ବିଭାଗ (I-T) ଏବଂ ସିବିଆଇ (CBI) ଭଳି ସଂସ୍ଥା ତାଙ୍କ ହାତରେ ଅଛି ଏବଂ ସେ ପରିସୀମନ (Delimitation) କୁ ମଧ୍ୟ ନିଜ ହାତକୁ ନେବାକୁ ଚାହୁଁଛନ୍ତି।"

ସମ୍ବିଧାନ (୧୩୧ ତମ ସଂଶୋଧନ) ବିଲ୍, ୨୦୨୬ ସଂସଦରେ ପାରିତ ନହେବା ପରେ ପ୍ରଧାନମନ୍ତ୍ରୀ ଜାତିକୁ ସମ୍ବୋଧିତ କରି ନିର୍ବାଚନ ଆଚରଣ ବିଧି (MCC) ଉଲ୍ଲଂଘନ କରିଥିବା ଖଡ଼ଗେ ଅଭିଯୋଗ କରିଛନ୍ତି। ଏହା ସହିତ ନିର୍ବାଚନ କମିଶନ ବିଜେପିର ଏକ ଶାଖା ଭଳି କାମ କରୁଛନ୍ତି ବୋଲି ସେ କହିଛନ୍ତି। ମହିଳା ସଂରକ୍ଷଣ ବିଲ୍ ସମ୍ପର୍କରେ ସ୍ପଷ୍ଟ କରି ସେ କହିଛନ୍ତି ଯେ କଂଗ୍ରେସ ୨୦୨୩ ମସିହାରେ ଏହି ବିଲ୍‌କୁ ପୂର୍ଣ୍ଣ ସମର୍ଥନ ଦେଇଥିଲା, କିନ୍ତୁ ବିଦ୍ୟମାନ ୫୪୩ ଆସନ ସହିତ ଏହାକୁ ତୁରନ୍ତ ଲାଗୁ କରିବାକୁ ସେମାନେ ଦାବି କରିଥିଲେ। ମାତ୍ର ମୋଦୀ ଏବେ ଏକ ଭିନ୍ନ ତଥ୍ୟ ଉପସ୍ଥାପନ କରୁଛନ୍ତି ବୋଲି ଖଡ଼ଗେ କହିଛନ୍ତି।

ଏହି ପ୍ରସଙ୍ଗରେ ବିଜେପିର ରାଷ୍ଟ୍ରୀୟ ମୁଖପାତ୍ର ଶହଜାଦ୍ ପୁନାୱାଲା କଂଗ୍ରେସକୁ କଡ଼ା ସମାଲୋଚନା କରିଛନ୍ତି। ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସ (X) ରେ ପୋଷ୍ଟ କରି ସେ କହିଛନ୍ତି ଯେ କଂଗ୍ରେସ ଏପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କୁ ୧୭୫ ଥର ଅପମାନିତ କରିସାରିଲାଣି। ଆତଙ୍କବାଦୀ ଏବଂ ନକ୍ସଲଙ୍କୁ ନିର୍ଦ୍ଦୋଷ କହୁଥିବା କଂଗ୍ରେସ ପାଇଁ ଜଣେ 'ଚା'ବାଲା ଓବିସି (OBC)' ପ୍ରଧାନମନ୍ତ୍ରୀ ଆତଙ୍କବାଦୀ ଏବଂ ସନାତନ ଧର୍ମ ଏକ ରୋଗ ବୋଲି ସେ କଟାକ୍ଷ କରିଛନ୍ତି।

ଏଆଇଏଡିଏମକେ (AIADMK) ଦଳର 'ଦୁଇ ପତ୍ର' ନିର୍ବାଚନୀ ଚିହ୍ନ ସହ ଜଡିତ ମନି ଲଣ୍ଡରିଂ (ଅର୍ଥ ହେରଫେର) ମାମଲାରେ ମହାଠକ ସୁକେଶ ଚନ୍ଦ୍ରଶେଖରଙ୍କୁ ଏକ ବଡ଼ ଆଶ୍ୱସ୍ତି ମିଳିଛି। ମଙ୍ଗଳବାର ଦିନ ଦିଲ୍ଲୀର ଏକ କୋର୍ଟ ତାଙ୍କୁ ଏହି ବହୁଚର୍ଚ୍ଚିତ ମାମଲାରେ ଜାମିନ ପ୍ରଦାନ କରିଛନ୍ତି। ତେବେ ଜାମିନ ମିଳିବା ସତ୍ତ୍ୱେ ସୁକେଶଙ୍କୁ ଜେଲରେ ହିଁ ରହିବାକୁ ପଡ଼ିବ, କାରଣ ତାଙ୍କ ନାମରେ ଅନ୍ୟ କେତେକ ଅପରାଧିକ ମାମଲା ବିଚାରାଧୀନ ରହିଛି।

କ'ଣ ଥିଲା ଏହି ମାମଲା?

ଏହି ମାମଲାଟି ୨୦୧୭ ମସିହାର। ଅଭିଯୋଗ ଅନୁଯାୟୀ, ଏଆଇଏଡିଏମକେ ନେତା ଟିଟିଭି ଦିନାକରନ ଏବଂ ଭି.କେ ଶଶିକଳା ଗୋଷ୍ଠୀ ପାଇଁ ଦଳର ଲୋକପ୍ରିୟ 'ଦୁଇ ପତ୍ର' ନିର୍ବାଚନୀ ଚିହ୍ନ ହାସଲ କରିବା ଉଦ୍ଦେଶ୍ୟରେ ସୁକେଶ ମଧ୍ୟସ୍ଥି ଭାବରେ କାମ କରିଥିଲେ। ଭାରତୀୟ ନିର୍ବାଚନ ଆୟୋଗ (ECI) ଅଧିକାରୀଙ୍କୁ ଲାଞ୍ଚ ଦେବା ପାଇଁ ସେ ଏକ ବଡ଼ ଧରଣର ଯୋଜନା କରିଥିଲେ। ତଦନ୍ତ ସମୟରେ ଅଭିଯୁକ୍ତଙ୍କ ନିକଟରୁ ପ୍ରାୟ ୧.୩ କୋଟି ଟଙ୍କା ନଗଦ ଜବତ କରାଯାଇଥିଲା।

ଜେଲରେ ରହିବେ ସୁକେଶ

ଦିଲ୍ଲୀ କୋର୍ଟ ଏହି ନିର୍ଦ୍ଦିଷ୍ଟ ଲାଞ୍ଚ ଏବଂ ମନି ଲଣ୍ଡରିଂ ମାମଲାରେ ସୁକେଶଙ୍କୁ ଜାମିନ ଦେଇଥିଲେ ମଧ୍ୟ ସେ ତୁରନ୍ତ ଜେଲରୁ ମୁକୁଳି ପାରିବେ ନାହିଁ। କାରଣ ତାଙ୍କ ନାମରେ ପୂର୍ବରୁ ୨୦୦ କୋଟି ଟଙ୍କାର ବଟି ଆଦାୟ ଏବଂ ଅନ୍ୟାନ୍ୟ ପ୍ରମୁଖ ଠକେଇ ମାମଲା ରହିଛି। ଫୋର୍ଟିସ୍ ହେଲ୍ଥକେୟାରର ପୂର୍ବତନ ପ୍ରମୋଟରଙ୍କ ପତ୍ନୀ ଅଦିତି ସିଂହଙ୍କ ସମେତ ଅନେକ ବିଶିଷ୍ଟ ବ୍ୟକ୍ତିଙ୍କୁ ଠକିଥିବା ଅଭିଯୋଗରେ ସେ ବର୍ତ୍ତମାନ ଜେଲରେ ବନ୍ଦୀ ଅଛନ୍ତି।

ତାମିଲନାଡୁର ସେଲମରେ ଅଭିନେତା ତଥା ରାଜନେତା ବିଜୟଙ୍କ ପାର୍ଟି 'ତାମିଲଗା ଭେଟ୍ରି କାଝଗମ୍' (TVK) ର ଏକ ରାଲି ବେଳେ ପୁଣି ଥରେ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ରାଲିରେ ସାମିଲ ହୋଇଥିବା ଜଣେ ୩୭ ବର୍ଷୀୟ ଯୁବକଙ୍କ ମୃତ୍ୟୁ ଘଟିଛି। ମୃତକ ଜଣକ ମହାରାଷ୍ଟ୍ରର ବୋଲି ଜଣାପଡିଛି ଏବଂ ସେ ବିଜୟଙ୍କୁ ଦେଖିବା ପାଇଁ ସୁଦୂର ମହାରାଷ୍ଟ୍ରରୁ ଆସିଥିଲେ। ଏହି ଘଟଣା ପରେ ତାମିଲନାଡୁର ପ୍ରମୁଖ ବିରୋଧୀ ଦଳ AIADMK ବିଜୟଙ୍କୁ କଡ଼ା ସମାଲୋଚନା କରିଛି।

'ସାଙ୍ଗରେ କଫିନ୍ ଧରି ଆସନ୍ତୁ'

ଏହି ଘଟଣାକୁ ନେଇ AIADMK ପକ୍ଷରୁ ଏକ ବିବାଦୀୟ ତଥା କଡ଼ା ବୟାନ ଜାରି କରାଯାଇଛି। ଦଳ ପକ୍ଷରୁ କୁହାଯାଇଛି ଯେ, "ଭବିଷ୍ୟତରେ ବିଜୟଙ୍କ କାର୍ଯ୍ୟକ୍ରମରେ ଯୋଗଦେବାକୁ ଚାହୁଁଥିବା ଲୋକମାନେ ନିଜ ସାଙ୍ଗରେ କଫିନ୍ (ଶବପେଟିକା) ନେଇ ଆସିବା ଉଚିତ୍।" ଏହି ବୟାନ ରାଜ୍ୟ ରାଜନୀତିରେ ହଇଚଇ ସୃଷ୍ଟି କରିଛି। ବିଜୟଙ୍କ ରାଲିରେ ବାରମ୍ବାର ଅବ୍ୟବସ୍ଥା ଏବଂ ସୁରକ୍ଷା ଅଭାବକୁ ନେଇ ବିରୋଧୀ ଦଳ ପ୍ରଶ୍ନ ଉଠାଇଛି।

କିପରି ଘଟିଲା ଅଘଟଣ?

ରିପୋର୍ଟ ଅନୁଯାୟୀ, ମୃତକଙ୍କ ନାମ ସୁରଜ ଏବଂ ତାଙ୍କ ଘର ମହାରାଷ୍ଟ୍ରରେ। ସେଲମରେ ଆୟୋଜିତ TVKର ଏହି ବିଶାଳ ଜନସଭାରେ ପ୍ରବଳ ଭିଡ଼ ହୋଇଥିଲା। ଅତ୍ୟଧିକ ଗରମ ଏବଂ ଭିଡ଼ କାରଣରୁ ସୁରଜ ହଠାତ୍ ଅସୁସ୍ଥ ହୋଇପଡିଥିଲେ। ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା, କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ୍ ସୂତ୍ରରୁ ମିଳିଥିବା ସୂଚନା ମୁତାବକ, ହୃଦଘାତ କାରଣରୁ ତାଙ୍କର ମୃତ୍ୟୁ ହୋଇଥାଇପାରେ ବୋଲି ଅନୁମାନ କରାଯାଉଛି।

ପୂର୍ବରୁ ମଧ୍ୟ ଘଟିଛି ଅଘଟଣ

ଉଲ୍ଲେଖଯୋଗ୍ୟ ଯେ, ବିଜୟ ରାଜନୀତିରେ ପ୍ରବେଶ କରିବା ପରେ ତାଙ୍କ ରାଲିରେ ପ୍ରବଳ ଜନସମାଗମ ହେଉଛି। ତେବେ ଏହା ପ୍ରଥମ ଘଟଣା ନୁହେଁ; ପୂର୍ବରୁ ମଧ୍ୟ ବିଜୟଙ୍କ ଏକ ରାଲିରେ ଅବ୍ୟବସ୍ଥା ଯୋଗୁଁ ଅନେକ ଲୋକ ଅସୁସ୍ଥ ହୋଇପଡିଥିଲେ ଏବଂ କିଛି ଦୁର୍ଘଟଣା ଘଟିଥିଲା। ଏବେ ନିର୍ବାଚନ ପାଖେଇ ଆସୁଥିବା ବେଳେ ବିରୋଧୀ ଦଳମାନେ ଏହି ପ୍ରସଙ୍ଗକୁ ନେଇ ବିଜୟଙ୍କ ନେତୃତ୍ୱ ଏବଂ ଆୟୋଜନ ଶୈଳୀ ଉପରେ ପ୍ରଶ୍ନବାଚୀ ସୃଷ୍ଟି କରୁଛନ୍ତି।