ଭୁବନେଶ୍ଵର : ଡାକ୍ତରାଣୀଙ୍କୁ ବିବାହ କରିବା ଆଶାରେ ପଡ଼ି ଯୁବକ ହରାଇଛନ୍ତି ୪ଲକ୍ଷ ଟଙ୍କା। ସାଇବର ଠକ ତାଙ୍କ ସହ ବନ୍ଧୁତା କରି ବିଭିନ୍ନ ଆଳରେ ଲୁଟିନେଇଛନ୍ତି ଟଙ୍କା ଠକେଇର ଶିକାର ହୋଇଥିବା ଯୁବକ ହେଲେ କଟକ ଜିଲ୍ଲା ଗୋପୀନାଥପୁର ଗ୍ରାମର ସର୍ବପ୍ରସନ୍ନ ପଣ୍ଡା | ସେ ଏନେଇ ସାଇବର ହେକ୍ସଡେସ୍କରେ ଅଭିଯୋଗ କରିଛନ୍ତି। ତାଙ୍କ ଅଭିଯୋଗ ଆଧାରରେ ସାଇବର ହେଲ୍ସ ଡେସ୍କ ଏହି ମାମଲାକୁ କ୍ରାଇମବ୍ରାଞ୍ଚ ନିକଟକୁ ପଠାଇ ଦେଇଥିବା ଜଣାପଡ଼ିଛି । ସର୍ବପ୍ରସନ୍ନ ବିବାହ କରିବା ପାଇଁ ଏକ ଓଡ଼ିଶା ମାଟ୍ରିମୋନିଆଲ ସାଇଟ୍‌ରେ ବିଜ୍ଞାପନ ଦେଇଥିଲେ। ସାଇବର ଠକ ଉକ୍ତ ସାଇଟ୍‌ରୁ ସର୍ବପ୍ରସନ୍ନଙ୍କ ଫୋନ୍ ନମ୍ବର ନେଇ ତାଙ୍କୁ ଫୋନ୍ କରିଥିଲେ ।

ଜଣେ ଯୁବତୀ ନିଜକୁ ଲଣ୍ଡନର ଜଣେ ଡାକ୍ତର ବୋଲି ପରିଚୟ ଦେଇ ସର୍ବପ୍ରସନ୍ନଙ୍କ ସହ କଥା ହୋଇଥିଲେ। ସେ ତାଙ୍କୁ ବିବାହ କରିବା ପାଇଁ ରାଜି ଥିବା କହି ସମ୍ପର୍କ ବଢ଼ାଇଥିଲେ। ଏପରିକି ସେ ଲଣ୍ଡନରେ ଅନେକ ଲୋକଙ୍କୁ ସେବା କରୁଛନ୍ତି। ତେଣୁ ଏଥର ଓଡ଼ିଶାରେ ରହି ଲୋକଙ୍କ ସେବା କରିବାକୁ ଚାହୁଁଥିବା କହିଥିଲେ । ତେଣୁ ସେ ତାଙ୍କୁ ବିବାହ କଲେ ଓଡ଼ିଶାରେ ରହି ଏହି ସୁଯୋଗ ପାଇବେ ବୋଲି ସର୍ବପ୍ରସନ୍ନଙ୍କୁ କହି ତାଙ୍କ ମନରେ ବିଶ୍ବାସ ଜମାଇଥିଲେ | ତେଣୁ ସେ ଖୁବ୍‌ଶୀଘ୍ର ଓଡ଼ିଶା ଗଲେ ତାଙ୍କୁ ବିବାହ କରିବେ ବୋଲି କହିଥିଲେ। ସର୍ବପ୍ରସନ୍ନ ଯୁବତୀଙ୍କ ଠାରୁ ଏହି କଥା ଶୁଣି ତାଙ୍କ ଉପରେ ବିଶ୍ବାସ କରି ଯାଇଥିଲେ। ଏହାର କିଛି ଦିନ ଉଭୟ କଥା ହେବା ପରେ ଯୁବତୀ ଜଣଙ୍କ ସର୍ବପ୍ରସନ୍ନଙ୍କ ପାଇଁ ଏକ ଗିଫ୍ ପଠାଇବେ ବୋଲି କହିଥିଲେ । ଏପରିକି ଗତ ସପ୍ତାହରେ ଏକ ଗିଫ୍ ବକ୍ସ ପଠାଇଥିବା ଯୁବତୀ ଜଣଙ୍କ ଫୋନ କରି ସର୍ବପ୍ରସନ୍ନକୁ କହିଥିଲେ। ଏହି ବକ୍ସରେ ସୁନା ଚେନ୍ ମୁଦୀ, ସୁନା ଘଣ୍ଟା, ଡଲାଣ ଆଦି ଥିବା ଯୁବତୀ କହିଥିଲେ।

ଗିଫ୍ଟ ପଠାଇବାର ଦୁଇ ଦିନ ପରେ ଜଣେ ବ୍ୟକ୍ତି ଫୋନ୍ କରି ଦିଲ୍ଲୀ ବିମାନ ବନ୍ଦରକୁ କହୁଥିବା କହିଥିଲେ । ତାଙ୍କ ନାମରେ ଏକ ଗିଫ୍‌ ଆସିଛି, ତେଣୁ ପ୍ରୋସେସିଂ ଫିସ୍ ବାବଦକୁ ୩୦ ହଜାର ଟଙ୍କା ଦିଅନ୍ତୁ ବୋଲି କହିଥିଲେ। ବିଶ୍ଵାସ କରି ସର୍ବପ୍ରସନ୍ନ ପ୍ରଥମେ ୩୦ ହଜାର ଟଙ୍କା ପଠାଇବା ପରେ ପୁଣି ସାଇବର୍ ଠିକ ତାଙ୍କୁ ପଞ୍ଜୀକରଣ ଆଳରେ ଆହୁରି ୩୦ ହଜାର ଟଙ୍କା ମାଗିଥିଲେ । ପୁଣି ଟଙ୍କା ପଠାଇବା ପରେ ଜିଏସ୍‌ଟି ଟ୍ୟାକ୍ସ, ଡଲାରକୁ ଭାରତୀୟ ମୁଦ୍ରାରେ ବଦଳାଇବା ପାଇଁ ଫିସ୍ ଏବଂ କଷ୍ଟମ ବିଭାଗ ଫିସ୍ ଆଳରେ ୪ଲକ୍ଷ ଟଙ୍କା ଲୁଟି ନେଲେ ।

ସାଇବର ଅପରାଧୀମାନେ ଏବେ ବେଶ୍‍ ସକ୍ରିୟ ହୋଇ ଉଠିଛନ୍ତି। ଗତ କିଛି ଦିନ ହେବ ସାଇବର ଅପରାଧ ସଂଖ୍ୟା ବଢ଼ିବାରେ ଲାଗିଛି। କରୋନା ମହାମାରୀ ସମୟରେ ସରକାରୀ ଓ ଘରୋଇ କମ୍ପାନୀ ଗୁଡିକର କର୍ମଚାରୀ ଘରେ ରହି ଅନ୍‍ଲାଇନ୍‍ରେ କାର୍ଯ୍ୟ କରୁଛନ୍ତି। ଏହାର ସୁଯୋଗ ଉଠାଇ ସାଇବର ଅପରାଧୀମାନେ ବ୍ୟାଙ୍କ କର୍ମଚାରୀଙ୍କ ପରିଚୟ ଦେବା ସହ ଆକାଉଣ୍ଟ ସଂକ୍ରାନ୍ତୀୟ ବିଭିନ୍ନ ଆଳ ଦେଖାଇ ଟଙ୍କା ଠକି ନେଉଛନ୍ତି। ଏ ନେଇ ବିଭିନ୍ନ ଥାନାରେ ଅଭିଯୋଗର ଫର୍ଦ୍ଦ ବଢ଼ିବା ପରେ ଏଥିପ୍ରତି ସତର୍କ ରହିବାକୁ ଡିସିପି ପ୍ରତୀକ ସିଂହ ପରାମର୍ଶ ଦେଇଛନ୍ତି।

ଦେଢ ବର୍ଷ ହେବ କରୋନା ମହାମାରୀ ପୂରା ବିଶ୍ୱକୁ କବଳିତ କରିଛି। ଏହି ସମୟ ମଧ୍ୟରେ ଏକାସାଙ୍ଗେ ଜୀବନ ଓ ଜୀବିକା ରକ୍ଷା କରିବା ଉପରେ ଗୁରୁତ୍ୱ ଦିଆଯାଉଛି। ସଂକ୍ରମଣ ନିୟନ୍ତ୍ରଣକୁ ଆଣିବା ଲାଗି ସରକାରଙ୍କ ପକ୍ଷରୁ ଲକ୍‍ଡାଉନ୍‍ ଓ ସଟଡାଉନ୍‍ କରାଯାଉଛି। ଏପରି ସମୟରେ ବହୁ ଘରୋଇ ଓ ସରକାରୀ ସଂସ୍ଥାର କର୍ମଚାରୀମାନେ ଘରେ ରହି ଅନ୍‍ଲାଇନ୍‍ରେ କାର୍ଯ୍ୟ କରୁଛନ୍ତି। ସାଇବର ଅବରାଧୀମାନେ ଏହାର ସୁଯୋଗ ଉଠାଉଛନ୍ତି। ସେମାନେ ନିଜକୁ ବ୍ୟାଙ୍କ, ସେବି,ଆଇଆରଡିଏ ଓ ସରକାରୀ ଅଫିସର ଭାବେ ପରିଚୟ ଦେଇ ଲୋକମାନଙ୍କୁ ଫୋନ୍‍ କରୁଛନ୍ତି। ଆକାଉଣ୍ଟ ଓ ଜମାରାଶୀ ସଂକ୍ରାନ୍ତୀୟ ସମସ୍ତ ତଥ୍ୟ ପ୍ରଦାନ କରି ଲୋକଙ୍କୁ ଭ୍ରମିତ କରୁଛନ୍ତି। ଏଥିସହ ଆଇଆରଡିଏର ବିଭିନ୍ନ ପଲିସି ସଂକ୍ରାନ୍ତରେ କହି ଲକ୍ଷାଧିକ ଟଙ୍କାର ଫାଇଦା ଉଠାଇବାକୁ ପରାମର୍ଶ ଦେଉଛନ୍ତି। ସେମାନେ ଏପରି ପ୍ରଲୋଭିତ କରି ନିଜ ଜାଲରେ ଫସାଇବା ପରେ ଏଟିଏମ୍‍ ନମ୍ବର ଓ ଓଟିପି ହାସଲ କରି ଆକାଉଣ୍ଟରୁ ଟଙ୍କା ଗାୟବ କରି ନେଉଛନ୍ତି। ଗତ ମାସକ ମଧ୍ୟରେ କଟକ ସହରାଞ୍ଚଳରେ ଏହିପରି ୧୦ରୁ ଅଧିକ ଅପରାଧିକ ମାମଲା ରୁଜୁ ହୋଇଛି। ଜନସାଧାରଣ ସାଇବର ଅପରାଧୀଙ୍କ ଜାଲରେ ଫସି ଲକ୍ଷାଧିକ ଟଙ୍କା ହରାଇଛନ୍ତି। ଗୁରୁତ୍ୱପୂର୍ଣ୍ଣ କଥା ହେଉଛି ଠକାମିର ଶିକାର ହୋଇଥିବା ବହୁ ଲୋକେ ଲକ୍‍ଡାଉନ୍‍ ସମୟରେ ଘରେ ରହି କାମ କରୁଥିବା ପୁଲିସ ତଦନ୍ତ ବେଳେ ଜାଣିବାକୁ ପାଇଛି।

ଏପରିକି ସାଇବର ଅପରାଧୀମାନେ ସେନା କର୍ମଚାରୀଙ୍କ ପରିଚୟ ଦେଇ ଟଙ୍କା ଠକୁଥିବା ଦେଖିବାକୁ ମିଳିଛି। ଅପରାଧୀମାନେ ସେକେଣ୍ଡ ହ୍ୟାଣ୍ଡ ବାଇକ୍‍ ଓ କାର କମ୍‍ ଦରରେ ବିକିବା ପାଇଁ ବିଜ୍ଞାପନ ଦେଉଛନ୍ତି। ସେମାନେ ସେନା ଅଧିକାରୀଙ୍କ ନାମରେ ନକଲି ଆଇଡି ଓ ଫଟୋ ଉକ୍ତ ବିଜ୍ଞାପନରେ ଦର୍ଶାଉଛନ୍ତି। ସେନା କର୍ମଚାରୀଙ୍କ ଗାଡି ହୋଇଥିବା ଭାବି ବହୁ ଲୋକେ ଏହାକୁ କିଣିବା ଲାଗି ଆଗ୍ରହ ପ୍ରକାଶ କରୁଛନ୍ତି। ଅପରାଧୀମାନେ ଏହାର ସୁଯୋଗ ଉଠାଇ ଏକାଧିକ ବ୍ୟକ୍ତିଙ୍କ ଠାରୁ ଅନଲାଇନ୍‍ ପେମେଣ୍ଟ ଯୋଗେ ଅଗ୍ରିମ ଟଙ୍କା ଠକି ନେଉଛନ୍ତି। ବହୁ ଲୋକଙ୍କଠାରୁ ଲକ୍ଷାଧିକ ଟଙ୍କା ଠକି ନେବା ପରେ ଉକ୍ତ ବିଜ୍ଞାପନ ଆଇଡିକୁ ବନ୍ଦ କରି ଦେଉଛନ୍ତି। ଏପରି ଭାବେ କଟକ ଓ ଭୁବନେଶ୍ୱର ଅଞ୍ଚଳରେ ବହୁ ଲୋକେ ଠକାମିର ଶିକାର ହୋଇ ସାରିଲେଣି। ଏ ନେଇ ସେମାନେ ଥାନାରେ ଅଭିଯୋଗ କରିଥିଲେ ମଧ୍ୟ ସାଇବର ଅପରାଧୀଙ୍କୁ ଧରିବା ସହଜ ହେଉନାହିଁ। ତେବେ ଉତ୍ତରପ୍ରଦେଶ, ଦିଲ୍ଲୀ, ଓ ଛତିଶଗଡ ଅଞ୍ଚଳରୁ ଏହି ଅପରାଧର ଅପରେଟ୍‍ ହେଉଥିବା ପୁୁଲିସ ଜାଣିବାକୁ ପାଇଛି। ମାତ୍ର ଏହି ଗ୍ୟାଙ୍ଗ ସଂକ୍ରାନ୍ତରେ କୌଣସି ସ୍ପଷ୍ଟ ସୂଚନା ମିଳିପାରିନାହିଁ। ଏପରି ସାଇବର ଅପରାଧୀଙ୍କ କବଳରୁ ନିଜକୁ ସୁରକ୍ଷିତ ରଖିବା ଲାଗି କମିସନରେଟ ପୁଲିସ ପକ୍ଷରୁ ସତର୍କ ସୂଚନା ଜାରି କରାଯାଇଛି। କୌଣସି ବିଜ୍ଞପନ କିମ୍ବା ଫୋନ୍‍ କଲ ଆସିଲେ ବ୍ୟାଙ୍କ ଆକାଉଣ୍ଟ ସଂକ୍ରାନ୍ତୀୟ ସବିଶେଷ ତଥ୍ୟ ବିଶେଷ କରି ଓଟିପି ପ୍ରଦାନ ନକରିବା ଲଗି ସଚେତନ କରାଯାଇଛି। ଜନସାଧାରଣ ସଚେତନ ରହିଲେ ସାଇବର ଅପରାଧ ଘଟିବ ନାହିଁ ବୋଲି ଡିସିପି ଶ୍ରୀ ସିଂହ କହିଛନ୍ତି।