ନୀଳଗିରି: ନୀଳଗିରି ଏନଏସି ୮ ନଂ ୱାର୍ଡରେ ଭାଲୁ ଆତଙ୍କ। ଭାଲୁ ଆକ୍ରମଣରେ ତିନି ଗୁରୁତର ନୀଳଗିରି ମେଡିକାଲରେ ଭର୍ତ୍ତି। ବାଡିକୁ ଫୁଲ ତୋଳିବାକୁ ଯାଇଥିବା ବେଳେ ଆକ୍ରମଣ କରିଛି ଭାଲୁ । ତିନି ଗୁରୁତର ହେଲେ ନୀଳଗିରି ଏନଏସି ୮ ନଂ ୱାର୍ଡ  ସାନଅତା ଗ୍ରାମର ନିତ୍ୟାନନ୍ଦ ସାହୁ, ପଲକ କୁଅଁର ଓ ପୁଷ୍ପଲତା ଓଝା।

ସୂଚନା ଅନୁସାରେ, ଆଜି ସକାଳ ୬ ଟା ସମୟରେ ନୀଳଗିରି ସହର ଭିତରୁ ଏକ ଭାଲୁ ଏନସି ୮ ନମ୍ବର ୱାର୍ଡ ସାନହତା ଗାଁ ଦେଇ ପାହାଡ଼କୁ ଫେରୁଥିଲା। ସେହି ସମୟରେ କିଛି ଗ୍ରାମବାସୀ ଭାଲୁ ହାବୁଡ଼ରେ ପଡି ଯାଇଥିଲେ। ପୁଷ୍ପ ବୈଠା ନାମକ ମହିଳା ଫୁଲ ତୋଳିବା ବେଳେ ଭାଲୁ ତାଙ୍କୁ ଆକ୍ରମଣ କରି ରକ୍ତାକ୍ତ କରି ପକାଇ ଥିଲା।ଏହାପରେ କନକ କୁଅଁର ନାମକ ବୃଦ୍ଧାଙ୍କୁ ଭାଲୁ କଚାଡି ଦେବାରୁ ତାଙ୍କର ଗୋଡ଼ ଭାଙ୍ଗି ଯାଇଛି। ପରେ ନିତ୍ୟାନନ୍ଦ ସାହୁ ଘରୁ ଆସୁଥିବା ବେଳେ ତାଙ୍କୁ ମଧ୍ୟ ଭାଲୁ ଆକ୍ରମଣ କରିଥିଲା।ତିନି ଜଣଙ୍କୁ ଗୁରୁତର ଭାବେ ହସ୍ପିଟାଲରେ ଭର୍ତ୍ତି କରାଯାଇଛି।ତେବେ ସକାଳେ ସହରରେ ଭାଲୁ ବୁଲିବା ନେଇ ସହରବାସୀ ଆତଙ୍କିତ ହୋଇପଡିଛନ୍ତି।

ନୂଆଦିଲ୍ଲୀ: ପାକିସ୍ତାନୀ ଆତଙ୍କବାଦୀ ସଂଗଠନ ଜୈସ-ଇ-ମହମ୍ମଦ (ଜେଇଏମ) ମୁଖ୍ୟ ତଥା ଦୁର୍ଦ୍ଦାନ୍ତ ଆତଙ୍କବାଦୀ ମାସୁଦ ଆଝାର ଭାରତ ବିରୋଧରେ ବଡ଼ ଧରଣର ଷଡ଼ଯନ୍ତ୍ର ଚଳାଇଛି ।  ଭାରତର ବିଭିନ୍ନ ସ୍ଥାନରେ ବିସ୍ଫୋରଣ ପାଇଁ ସେ ଆତ୍ମଘାତୀ ଆତଙ୍କବାଦୀଙ୍କ ସେନା ପ୍ରସ୍ତୁତ କରିଛି।  ବଡ଼ଧରଣର ବିସ୍ଫୋରଣ ପାଇଁ ଜଣେ କି ଦୁଇ ଜଣ ନୁହେଁ, ହଜାରରୁ ଅଧିକ ଆତ୍ମଘାତୀଙ୍କୁ ଭାରତରେ ଅନୁପ୍ରବେଶ କରାଇବାକୁ ଚାହିଁ ବସିଛି । ବିଶ୍ବ ଆତଙ୍କବାଦୀ ମାସୁଦ ଆଝାରର ଏକ ଭାଇରାଲ ଅଡିଓରୁ ଏହି ସୂଚନା ମିଳିଛି । ଭାରତ ବିରୋଧୀ ଆତଙ୍କବାଦୀ କାର୍ଯ୍ୟକଳାପରେ ଏହି ଆତଙ୍କବାଦୀକୁ ପାକିସ୍ତାନ ସରକାର ଏବଂ ସେନା ମଧ୍ୟ ସହାୟତା କରୁଛି । ଦୀର୍ଘ ଦିନ ହେଲା ସେ ଭାରତ ବିରୋଧରେ ଛାମୁଆ ଯୁଦ୍ଧ ଚଳାଇଛି ।

ମାସୁଦର ଭାଇରାଲ ରେକର୍ଡିଂରୁ ଶୁଣିବାକୁ ମିଳୁଛି ଯେ ହଜାରେରୁ ଅଧିକ ଆତ୍ମଘାତୀ ଅପେକ୍ଷା କରି ବସିଛନ୍ତି। ସେମାନେ ଭାରତରେ ଅନୁପ୍ରେବଶ ପାଇଁ ଚାପ ପକାଉଛନ୍ତି। ଯଦି ଏହି ଆତ୍ମଘାତୀଙ୍କ ପ୍ରକୃତ ସଂଖ୍ୟା ସାର୍ବଜନୀନ କରି ଦିଆଯିବ ତେବେ ବିଶ୍ବର ହଇଚଇ ସୃଷ୍ଟି ହେବ ବୋଲି ଆଝାର କହୁଛି। ସେ ଦାବି କରିଛି ଯେ ଏହି ଆତଙ୍କବାଦୀ ଆକ୍ରମଣ କରିବାକୁ ସମ୍ପୂର୍ଣ୍ଣ ଭାବେ ପ୍ରଶିକ୍ଷଣ ପାଇଛନ୍ତି। ନିଜ ଲକ୍ଷ୍ୟ ହାସଲ ପାଇଁ ଜୀବନ ଦେବାକୁ ଏହି ଆତଙ୍କବାଦୀ ଚାହିଁ ବସିଛନ୍ତି। ମାତ୍ର ଏହି ଅଡିଓର ସତ୍ୟାସତ୍ୟ ଏବଂ କେବେ ଏହା ରେକର୍ଡିଂ ହୋଇଥିଲା ତାହା ଜଣାପଡ଼ିନାହିଁ । ଏହାକୁ ନେଇ ସୁରକ୍ଷାବାହିନୀ ଗୁଡ଼ିକ ସତର୍କ ହୋଇଯାଇଛନ୍ତି । ସୀମାରେ ସୁରକ୍ଷାକୁ କଡ଼ାକଡ଼ି କରିଦିଆଯାଇଛି । ତୁଷାରପାତର ସୁଯୋଗ ନେଇ ଆତଙ୍କବାଦୀ ସୀମାରେ ଅନୁପ୍ରବେଶ କରିପାରନ୍ତି ବୋଲି ଆଶଙ୍କା ପ୍ରକାଶ ପାଇଛି ।
 
୨୦୦୮ ମୁମ୍ବଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ଆତଙ୍କବାଦୀ ମାସୁଦ ଆଝାର ଦୀର୍ଘ ବର୍ଷ ହେଲା ଭାରତ ବିରୋଧୀ ବୟାନ ଦେଇଚାଲିଛି। ସେ ଭାରତରେ ହୋଇଥିବା ଅନେକ ଆତଙ୍କବାଦୀ ଆକ୍ରମଣର ମୁଖ୍ୟ ରହିଛି। ପହଲଗାମ ଆକ୍ରମଣର ଜବାବରେ ଭାରତ ଚଳାଇଥିବା ‘ଅପରେସନ ସିନ୍ଦୂର’ରେ ଜେଇଏମର ବାହାବଲପୁର ସ୍ଥିତ ଠିକଣାକୁ ଧ୍ବଂସ କରିଦିଆଯାଇଥିଲା । ଏଥିରେ ମାସୁଦ ଆଝାର ପରିବାରର ଅନେକ ବ୍ୟକ୍ତି ନିହତ ହୋଇଥିଲେ ।  ଅନ୍ୟପଟେ ମାସୁଦ ପାକିସ୍ତାନ ସେନାର ଛତ୍ରଛାୟାରେ ରହି ଭାରତ ବିରୋଧୀ ଷଡ଼ଯନ୍ତ୍ର କରୁଛି । ତେବେ ୨୦୧୯ରୁ ତାକୁ ସାର୍ବଜନୀନ ସ୍ଥାନରେ ଦେଖାଯାଇ ନାହିଁ। ବାହାବଲପୁର ଆକ୍ରମଣରୁ ସେ ଅଳ୍ପକେ ବର୍ତ୍ତି ଯାଇଥିଲା ।

ଭୁବନେଶ୍ବର : ସବକା ସାଥ ସବକା ବିକାଶ ନାରା ଦେଇ ସରକାରକୁ ଆସିଥିଲା ବିଜେପି। ହେଲେ ସବକା ବିକାଶ କଥା ଭୁଲି ଏବେ ଅପନା ବିକାଶରେ ମାତିଛି। ଯାହାର ଏକ ଜ୍ବଳନ୍ତ ଉଦାହରଣ ରାୟଗଡା ଜିଲ୍ଲାରେ ଦେଖିବାକୁ ମିଳିଛି। ଯାହାକୁ ନେଇ ଆଜି ବିଜେଡି ଶାସକ ଦଳ ବିଜେପି ଉପରେ ବର୍ଷିଛି।

ରାୟଗଡା ଜିଲ୍ଲାରେ ବିଜେପି ଜିଲ୍ଲା ସଭାପତିଙ୍କ ଗୁଣ୍ଡାରାଜ ବିରୋଧରେ ଶଙ୍ଖ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ବିଜେପି ଉପରେ ବର୍ଷିଛନ୍ତି ବିଜେଡି ନେତା ପ୍ରଦୀପ ମାଝୀ । ସବକା ସାଥ ସବକା ବିକାଶ ନାରା ଦେଇ ସରକାରକୁ ଆସିଥିଲା ବିଜେପି। ଓଡ଼ିଶାରେ ସରକାରକୁ ଆସିବା ପରେ କିଭଳି ଭାବେ ମହିଳା ସୁରକ୍ଷା ନେଇ ପ୍ରଶ୍ନ ଉଠିଛି ଓ ଶୋଷଣ ଚାଲିଛି।

ବିଭିନ୍ନ ସ୍ଥାନରେ ଅଫିସରଙ୍କ ଉପରେ ଚାପ ପ୍ରୟୋଗ କରି ଭୟ ସୃଷ୍ଟି କରାଯାଉଛି। ପ୍ରଶାସନକୁ କବଜାକୁ ନେଵାକୁ ବିଜେପି ଆତଙ୍କରାଜ ଚଳାଇଛି। ମାସକ ତଳେ ବିଜେପି ଜିଲ୍ଲା ସଭାପତିଙ୍କୁ ନିଯୁକ୍ତି ଦିଆଗଲା। ବିଜେପି ଜିଲ୍ଲା ସଭାପତି ରାୟଗଡାର ଗୋପୀ ଆନନ୍ଦ ଯେ କି ଜଣେ ଓକିଲ । ସେ ସାଧାରଣ ଲୋକ, ବ୍ୟବସାୟୀକୁ ଧମକାଇ ଟଙ୍କା କଲେକ୍ସନ କରୁଛନ୍ତି। ପାର୍ଟି ଓ୍ବିଥ୍ ଡିଫରେନ୍ସ କହୁଥିବା ବିଜେପିର ପଦାଧିକାରୀ କଲେକ୍ସନରେ ମାତିଛନ୍ତି। ପ୍ରତ୍ୟେକ ଗହଣା ଦୋକାନରୁ ଏକ ଲକ୍ଷ ଟଙ୍କା । ମିଲରସ ମାନଙ୍କ ଠାରୁ ୨ ଲକ୍ଷ, ଶିଳ୍ପସଂସ୍ଥାଠାରୁ ୫ ଲକ୍ଷ ଧମକାଇ ଆଦାୟ କରୁଛନ୍ତି ଜିଲ୍ଲା ସଭାପତି ।

ବ୍ୟବସାୟୀ ସଂଘ ମୁଖ୍ୟମନ୍ତ୍ରୀଙ୍କୁ ଏ ପ୍ରସଙ୍ଗରେ ଲେଖି ସୁରକ୍ଷା ମାଗିଛନ୍ତି। ଏହା ବିଜେପିର ଚିତ୍ର ଓ ଚରିତ୍ର। କିଛି ଦିନ ତଳେ ଏଡିଏମଙ୍କୁ ଜିଲ୍ଲା ସଭାପତି ଓ ସମ୍ପୂର୍ଣ୍ଣ ବିଜେପି ୟୁନିଟ ଧମକ ଚମକ ଦେଇ ଅଶାଳୀନ ବ୍ୟବହାର କରି ଡକ୍ୟୁମେଣ୍ଟ ମଗାଯାଇଥିଲା। ଯାହା କହୁଛୁ କର ବୋଲି ଧମକ ଦିଆଯାଉଛି। ଯାହାକୁ ବିଜେଡି ଦୃଢ ନିନ୍ଦା କରିିଛି। ବିଜେଡି ବ୍ୟବସାୟୀମାନଙ୍କୁ ସୁରକ୍ଷା ଦେବ। ଯେଉଁ ପତ୍ର ବ୍ୟବସାୟୀ ସଙ୍ଘ ଲେଖିକି ଦେଇଛି ତା ଉପରେ କାର୍ଯାନୁଷ୍ଠାନ ନିଆଯାଉ ଓ ଜିଲ୍ଲା ସଭାପତିଙ୍କୁ ପଦରୁ ବହିଷ୍କାର କରି ଜେଲରେ ଭର୍ତ୍ତି କରାଯାଉ ବୋଲି ଦାବି ରଖିଛନ୍ତି ବରିଷ୍ଠ ବିଜେଡି ନେତା ପ୍ରଦୀପ ମାଝୀ।