ନୂଆଦିଲ୍ଲୀ : ସାଢ଼େ ତିନି ମାସ ହେବ ବଢୁନି କି କମୁନି ତେଲ ଦର। ତେବେ କ୍ରମାଗତ ଭାବେ ବୃଦ୍ଧି ପାଉଥିବା ପେଟ୍ରୋଲ ଏବଂ ଡିଜେଲ ମୂଲ୍ୟ ବୃଦ୍ଧିରେ ଲାଗିଛି ସାମୟିକ ବ୍ରେକ୍‌। ଯଦିବା ଏଥିଯୋଗୁ ଖାଉଟି ଆଶ୍ବସ୍ତ ତେବେ ଏହି ବ୍ରେକ୍ ଆଉ ବେଶୀ ଦିନ ନୁହେଁ। କାରଣ ଦେଶର ୫ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ କାରଣରୁ ନିତି ଦିନ ବଢ଼ିଚାଲୁଥିବା ତେଲ ଦରରେ ଏବେ ଆଉ କୌଣସି ପରିବର୍ତ୍ତନ ହେଉନାହିଁ। ବିଶେଷ କରି ଅନ୍ତରାଷ୍ଟ୍ରୀୟ ବଜାରରେ କ୍ରୁଡ୍ ଅଏଲ୍ ବା ଅଶୋଧିତ ତେଲ ଦର ବ୍ୟାରେଲ୍ ପିଛା ଇତି ମଧ୍ୟରେ ରେକର୍ଡ ୯୫ ଡଲାର ଟପିଯାଇଛି। ପୂର୍ବରୁ ଅନ୍ତରାଷ୍ଟ୍ରୀୟ ବଜାରରେ ଅଶୋଧିତ ତେଲ ଦର ଅଳ୍ପ ବହୁତ ବଢ଼ିଲେ ବି ଘରୋଇ ବଜାରରେ ପେଟ୍ରୋଲ ଏବଂ ଡିଜେଲ ମୂଲ୍ୟରେ ନିଆଁ ଲାଗିଯାଉଥିଲା।

ଏବେ କିନ୍ତୁ ରାଜ୍ୟଗୁଡିକରେ ଚାଲିଥିବା ନିର୍ବାଚନ ଯୋଗୁ ଅନ୍ତର୍ଜାତୀୟ ବଜାରରେ ଦର ଯେତେ ବଢ଼ିଲେ ବି ଘରୋଇ ବଜାରରେ କେନ୍ଦ୍ର ସରକାର ଦର ବଢ଼ାଇ କୌଣସି ରିସ୍କ ନେବାକୁ ଚାହୁଁନାହାଁନ୍ତି। କାରଣ ଏହି ନିର୍ବାଚନୀ ଋତୁରେ ବଜାର ଦର ଜନିତ ମହଙ୍ଗା ମାଡ଼ରେ ତେଲ ଦର ବଢ଼ାଇ ସରକାର ଆଉ ଭୋଟରଙ୍କ ରୋଷ ଶିକାର ହେବାକୁ ଇଚ୍ଛା କରୁନାହାଁନ୍ତି। ରାଜ୍ୟ ନିର୍ବାଚନ ପାଇଁ ବର୍ତ୍ତମାନ ସମୟରେ ଦୈନିକ ପେଟ୍ରୋଲ ଏବଂ ଡିଜେଲ ଦରରେ ହେଉଥିବା ଦୈନିକ ସଂଶୋଧନ ବନ୍ଦ ହୋଇଯାଇଛି। ଏମିତିକି ଦୀପାବଳି ପରଠାରୁ ଦେଶରେ ପେଟ୍ରୋଲ ଏବଂ ଡିଜେଲ ଦରରେ କୌଣସି ପରିବର୍ତ୍ତନ ହୋଇନାହିଁ। ନିର୍ବାଚନ ଶେଷ ହେବା ଖାଉଟିଙ୍କୁ ପେଟ୍ରୋଲ ଏବଂ ଡିଜେଲ ଦର ଆକାରର ଆଉ ଏକ ବଡ଼ ମହଙ୍ଗା ମାଡ଼ ହେବାକୁ ଯାଉଛି।

ବିଶେଷଜ୍ଞମାନେ କରିଥିବା ଆକଳନ ଅନୁଯାୟୀ, ନିର୍ବାଚନ ପରେ ଘରୋଇ ବଜାରରେ ପେଟ୍ରୋଲ ଡିଜେଲ ଦର ପିଛା ୧୫ ଟଙ୍କା ବୃଦ୍ଧି ଘଟିବାର ସମ୍ଭାବନା ରହିଛି। ବର୍ତ୍ତମାନ ଅନ୍ତରାଷ୍ଟ୍ରୀୟ ବଜାରରେ ଗୋଟିଏ ପଟେ ଅଶୋଧୃତ ତୈଳ ଦର ବୃଦ୍ଧି ପାଉଥିବାବେଳେ ଅନ୍ୟପଟରେ ପେଟ୍ରୋଲ ଡିଜେଲ ଦର କିନ୍ତୁ ସ୍ଥିର ରହିଛି। ଷାଥେର ପାଇଁ ୨୦୦୮ରେ ବିଶ୍ୱ ବଜାରରେ ଅଶୋଧିତ ତୈଳ ଦର ବ୍ୟାରେଲ ପିଛା ୧୪୭୨୭ ଡଲାର ରହିଥିଲା । ସେତେବେଳେ ଦେଶରେ ପେଟ୍ରୋଲ ଲିଟର ପିଛା ୪୫ ଟଙ୍କା ଉପରେ ରହିଥିଲା। ବର୍ତ୍ତମାନ ଅଶୋଧ ତୈଳ ମୂଲ୍ୟ ବିଗତ ୮ ବର୍ଷର ସର୍ବୋଚ୍ଚ ସ୍ତରରେ ପହଞ୍ଚିଛି। ଏହାପୂର୍ବରୁ ୨୦୧୪ ରେ ଅଶୋଧ । ତୈଳ ଦର ୯୫ ଡଲାର ଅତିକ୍ରମ କରିଥିଲା। ୨୦୨୧ ଡିସେମ୍ବର ପହିଲାରେ ଅଶୋଧ ତୈଳ ମୂଲ୍ୟ ବ୍ୟାରେଲ ପିଛା ୬୯ ଡଲାର ରହିଥିଲା, ଯାହା ବର୍ତ୍ତମାନ ବ୍ୟାରେଲ ପିଛା ୯୫ ଡଲାରରେ ପହଞ୍ଚିଛି।

ଅର୍ଥାତ୍ ଏହି ଅଢ଼େଇ ମାସ ମଧ୍ୟରେ ଅଶୋଧୃତ ତୈଳ ଦର ୩୭% ବୃଦ୍ଧି ପାଇଛି । ବିଶେଷଜ୍ଞଙ୍କ ଅନୁଯାୟୀ, ଖୁବ୍ ଶୀଘ୍ର ଏହା ବ୍ୟାରେଲ ପିଛା ୧୦୦ ଡଲାରର ସ୍ତର ଅତିକ୍ରମ କରିବ। ଯଦି ରୁଷ ଯୁକ୍ରେନ୍ ଉପରେ ଆକ୍ରମଣ କରେ, ତେବେ ଅଶୋଧୂତ ତୈଳ ବ୍ୟାରେଲ ପିଛା ୧୦୦ରୁ ୧୨୦ ଡଲାରରେ ପହଞ୍ଚିପାରେ। ବର୍ତ୍ତମାନ ବଜାରରେ ଯେତିକି ଚାହିଦା ରହିଛି ସେହି ଅନୁପାତରେ ଯୋଗାଣ ନାହିଁ, ଯେଉଁଥିପାଇଁ ତୈଳ ଦର ବଢ଼ୁଛି । ବିଶେଷଜ୍ଞଙ୍କ କହିବାନୁସାରେ ବିଗତ ବର୍ଷଗୁଡ଼ିକରେ ଏହା ଦେଖାଦେଇଛି ଯେ, ନିର୍ବାଚନ ସମୟରେ ସରକାର ଜନସାଧାରଣଙ୍କୁ ଖୁସି କରିବା ପାଇଁ ପେଟ୍ରୋଲ ଏବଂ ଡିଜେଲ ଦର ବୃଦ୍ଧି କରନ୍ତି ନାହିଁ ।

ଗତ ବର୍ଷର ଧାରା କହୁଛି ଯେ ନିର୍ବାଚନ ଋତୁରେ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧିରୁ ଜନସାଧାରଣ ନିସ୍ତାର ପାଇଛନ୍ତି। ଆଇଆଇଏଫ୍ଏଲ୍ ସିକ୍ୟୁରିଟିଜ୍‌ର ଉପସଭାପତି ନୁଜ ଗୁପ୍ତା କହିଛନ୍ତି ଯେ, ଆଗାମୀ ଦିନରେ ଅନ୍ତର୍ଜାତୀୟ ବଜାରରେ ଅଶୋଧ ତୈଳ ଦର ବ୍ୟାରେଲ ପିଛା ୧୦୦ ଡଲାର ଛୁଇଁପାରେ। ତୈଳ କମ୍ପାନୀଗୁଡିକ ନଭେମ୍ବର ୩ରୁ ପେଟ୍ରୋଲ ମୂଲ୍ୟରେ କୌଣସି ପରିବର୍ତ୍ତନ କରିନାହାଁନ୍ତି । କିନ୍ତୁ ସେବେଠାରୁ ଅଶୋଧ ତୈଳ ବ୍ୟାରେଲ ପିଛା ୧୫ ଡଲାରରୁ ଅଧିକ ମହଙ୍ଗା ହୋଇଛି। କେବଳ ଏତିକି ନୁହେଁ, ଭବିଷ୍ୟତରେ ମଧ୍ୟ ଆହୁରି ବଢ଼ିପାରେ। ଏଭଳି ପରିସ୍ଥିତିରେ ଆଗାମୀ ଦିନରେ ପେଟ୍ରୋଲ ଏବଂ ଡିଜେଲର ମୂଲ୍ୟ ୧୫ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇପାରେ।

ବାଲେଶ୍ଵର: ମହାମାରୀ କରୋନାର ପ୍ରଭାବ ଓ ଡିଜେଲର ଦରବୃଦ୍ଧି ଯୋଗୁଁ ବାଲେଶ୍ବର ଜିଲ୍ଲାର ହଜାର ହଜାର ମତ୍ସ୍ୟଜୀବି କାମ ଧନ୍ଦା ହରାଇଛନ୍ତି। ଫଳରେ ସେମାନେ ଢୋକେ ପି ଦଣ୍ଡେ ଜିଇଁବା ଭଳି ସ୍ଥିତିରେ ରହିଛନ୍ତି।ଅତି ଶୋଚନୀୟ ଅବସ୍ଥାରେ କାଳାତିପାତ କରୁଥିବା ଏହି ମତ୍ସ୍ୟଜୀବୀ ପରିବାର ଗୁଡ଼ିକୁ ସରକାର ସହାୟତାର ହାତ ବଢାନ୍ତୁ ବୋଲି ସବୁ ମହଲରୁ ଦାବି ହେଉଛି।

ବାଲେଶ୍ଵର ଜିଲ୍ଲାର ବାହାନଗା ଠାରୁ ପଶ୍ଚିମବଙ୍ଗର ବିସ୍ତିର୍ଣ୍ଣ ଅଞ୍ଚଳ ଯାଏଁ ସମୁଦ୍ର ବେଳାଭୂମିର ପାର୍ଶ୍ଵବର୍ତ୍ତୀ ଗାଁ ଗୁଡିକରେ ହଜାର ହଜାର ମତ୍ସ୍ୟଜୀବୀ ବାସ କରୁଛନ୍ତି କରିଥାନ୍ତି। ସମୁଦ୍ର ହିଁ ଏମାନଙ୍କ ପାଇଁ ରୋଜଗାରର ଏକମାତ୍ର ମାଧ୍ୟମ।କିଏ ଗଭୀର ସମୁଦ୍ର କୁ ଯାଇ ମାଛ ଧରେ ତ ଆଉ କିଏ ବୋର୍ଟ,ଟ୍ରଲର ଓ ଡଙ୍ଗା ମରାମତି କରେ। ପୁଣି କିଏ ମାଛ ଖଟିରେ ଶ୍ରମିକ ଭାବେ କାମ କରେ ତ ଆଉ କିଏ ମାଛଧରା ଜାଲ ସିଲାଇ କରି ପରିବାର ଚଳାଇଥାଏ। ବାଲେଶ୍ଵର ଓ ପଶ୍ଚିମବଙ୍ଗର ବିଭିନ୍ନ ବେଳାଭୂମିରେ ଯେ କେବଳ ସ୍ଥାନୀୟ ମତ୍ସ୍ୟଜୀବୀ ନିର୍ଭର କରିଥାନ୍ତି ତାହା ନୁହେଁ ଓଡିଶାର ଅନ୍ୟ ଜିଲ୍ଲା ସମେତ ପଶ୍ଚିମବଙ୍ଗ,ଆନ୍ଧ୍ରପ୍ରଦେଶ ଓ ତେଲେଙ୍ଗାନା ଆଦି ପ୍ରଦେଶର ମତ୍ସ୍ୟଜୀବୀମାନେ ମଧ୍ୟ ଏହି ଅଞ୍ଚଳରେ ଉପରୋକ୍ତ କାମ ସବୁରେ ନିୟୋଜିତ ଥାନ୍ତି। ତେବେ ୨୦୨୦ ମିସହା ପ୍ରଥମାର୍ଦ୍ଧରୁ ଅର୍ଥାତ ମହାମାରୀ କରୋନା ଆସିବା ପରଠାରୁ ଏହି ମତ୍ସଜୀବୀ ମାନଙ୍କ ଉପରେ ଦୁଃଖ ର ପାହାଡ଼ ମାଡ଼ି ବସିଛି। କରୋନା ଯୋଗୁଁ ମାଛଧରା ବହୁକାଂଶରେ ପ୍ରଭାବିତ ହୋଇଥିବାବେଳେ ପୁଣି ଡିଜେଲ ଓ ବିଦ୍ୟୁତ ଦର ବୃଦ୍ଧି ମଧ୍ୟ ମତ୍ସ୍ୟଜୀବୀଙ୍କ ପେଟପାଟଣା ଉପରେ ଗଭୀର ପ୍ରଭା ପକାଇଛି। ବିଶେଷ କରି ତେଲରେ ବୃଦ୍ଧି ଯୋଗୁଁ ସମୁଦ୍ରକୁ ବୋର୍ଟ ଓ ଟ୍ରଲରରେ ଯାଇ ମାଛ ଧରିବା ବ୍ୟଯ ସାପେକ୍ଷ ହୋଇଛି। ସେହିପରି ବରଫର ମୂଲ୍ୟ ମଧ୍ୟ ହୁ ହୁ ହୋଇ ବୃଦ୍ଧି ପାଇଥିବା ବେଳେ ଦେଶ ଭିତରକୁ ଏପରିକି ବିଦେଶକୁ ମଧ୍ୟ ମାଛ ରପ୍ତାନି ହୋଇପାରୁନାହିଁ। ଡଙ୍ଗା ଓ ବୋର୍ଟ ମାଲିକ ମାନେ ପୂର୍ବରୁ ମାଛ ଧରା ବାବଦରେ ଯାହା ଖର୍ଚ୍ଚ କରୁଥିଲେ ତାକୁ ଛାଡି ମାସକୁ ଲକ୍ଷାଧିକ ଟଙ୍କା ରୋଜଗାର କରୁଥିଲେ‌। ହେଲେ ବର୍ତମାନ ମାସ ଶେଷରେ ହିସାବ କରିବା ବେଳକୁ କାହାର ଖର୍ଚ୍ଚ ଓ ଆୟ ସମାନ ତ ଆଉ କାହାର ହାତରୁ ଚାଲିଯାଉଛି। ଏହି କାରଣରୁ ସମୁଦ୍ରକୁ ଅଧିକ ସଙ୍ଖ୍ୟକ ଡଙ୍ଗା,ବୋର୍ଟ ଓ ଟ୍ରଲର ମାଛ ଧରିବାକୁ ଯାଉନାହିଁ କି ଜାଲ ସିଲେଇ,ବୋର୍ଟ ମରାମତି,ମାଛଧରା ତଥା ତଥା ଅନ୍ୟ କାମରେ ନିୟୋଜିତ ଥିବା ମତ୍ସ୍ୟଜୀବୀ ମାନେ ମଧ୍ୟ କାମ ହରାଉଛନ୍ତି। ସେହିପରି ୟାସ ବାତ୍ୟା ସମୟରେ ମଧ୍ୟ ସମୁଦ୍ର ବେଳାଭୂମିରେ ଅସ୍ଥାୟୀ ଘର କରି ରହୁଥିବା ମତ୍ସଜୀବୀ ଶ୍ରମିକ ମାନଙ୍କ ଘର ଭାଙ୍ଗି ଯିବା ସହ ଜୁଆର ପାଣି ଘରେ ପଶି ଲକ୍ଷ ଲକ୍ଷ ଟଙ୍କାର ଜାଲ ତଥା ଅନ୍ୟ ମାଛଧରା ସାମଗ୍ରୀ ମଧ୍ୟ ଭାସିଯାଇଛି।

କରୋନା ସଂକ୍ରମଣ ଦିନକୁ ଦିନ ବଢିବା ସହିତ ତୈଳଦର ମଧ୍ୟ ଦିନକୁ ଦିନ ବଢ଼ିବାରେ ଲାଗିଛି । ଶୁକ୍ରବାର ଲଗାତାର ଚତୁର୍ଥ ଦିନରେ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଇଛି । ଦେଶର ରାଜଧାନୀ ଦିଲ୍ଲୀରେ ଆଜି ପେଟ୍ରୋଲ ଲିଟର ପିଛା ୨୮ ପଇସା ବୃଦ୍ଧି ପାଇ ୯୧ ଟଙ୍କା ୨୭ ପଇସାରେ ବିକ୍ରି ହେଉଛି । ସେହିଭଳି ଡିଜେଲ ଲିଟର ପିଛା ୩୧ ପଇସା ବଢ଼ି ୮୧ ଟଙ୍କା ୭୩ ପଇସାରେ ପହଞ୍ଚିଛି ।

ଓଡ଼ିଶାରେ ମଧ୍ୟ ତୈଳଦର ବଢ଼ିଛି । ରାଜ୍ୟର ସମସ୍ତ ଜିଲ୍ଲାରେ ପେଟ୍ରୋଲ ଦର ୯୦ ଟଙ୍କା ଉପରେ ଥିବାବେଳେ ୪ ଜିଲ୍ଲାରେ ପେଟ୍ରୋଲ ଦର ୯୫ ଟଙ୍କା ଉପରେ ରହିଛି । ରାଜ୍ୟରେ ପେଟ୍ରୋଲ ଲିଟର ପିଛା ସର୍ବାଧିକ ୯୭ ଟଙ୍କା ୩ ପଇସା ମାଲକାନଗିରିରେ ରହିଛି । ନବରଙ୍ଗପୁର ଓ କୋରାପୁଟରେ ପେଟ୍ରୋଲ ଲିଟର ପିଛା ୯୬ ଟଙ୍କା ୧୫ ପଇସାରେ ବିକ୍ରି ହେଉଛି । ରାୟଗଡ଼ାରେ ୯୫ ଟଙ୍କା ୭୩ ପଇସା ରହିଛି ପେଟ୍ରୋଲ ।

ପେଟ୍ରୋଲ ଭଳି ଡିଜେଲ ଦରରେ ନିଆଁ ଲାଗିଛି । ମାଲକାନଗିରିରେ ଡିଜେଲର ସର୍ବାଧିକ ମୂଲ୍ୟ ଲିଟର ପିଛା ୯୩ ଟଙ୍କା ୯୪ ପଇସା ରହିଛି । ନବରଙ୍ଗପୁର ଓ କୋରାପୁଟରେ ଡିଜେଲ୍ ଲିଟର ପିଛା ୯୩ ଟଙ୍କା ୯ ପଇସାରେ ବିକ୍ରି ହେଉଥିବା ବେଳେ ରାୟଗଡ଼ାରେ ୯୨ ଟଙ୍କା ୬୬ ପଇସା ରହିଛି । ୪ ଦିନ ଭିତରେ ପଟ୍ରୋଲ ଲିଟର ପିଛା ୯୦ ପଇସା ବଢ଼ିଥିବା ବେଳେ ଡିଜେଲ୍ ୧ ଟଙ୍କା ବଢ଼ିଛି ।