ମୁମ୍ବାଇ : ଟି-୨୦ ପରେ କ୍ରିକେଟର  ସବୁଠାରୁ ଲମ୍ବା ଫର୍ମାଟକୁ ଟେଷ୍ଟରୁ ମଧ୍ୟ ରୋହିତ ଶର୍ମା ଏବଂ ବିରାଟ କୋହଲିଙ୍କ ଯୁଗ ଶେଷ ହୋଇଯାଇଛି। ଚଳିତ ମାସ ୭ ତାରିଖରେ ରୋହିତ ଶର୍ମା ଟେଷ୍ଟରୁ ଅବସର ନେବା ପରେ ୧୨ ତାରିଖରେ ବିରାଟ କୋହଲି ତାଙ୍କ ଇନଷ୍ଟାଗ୍ରାମ ପୋଷ୍ଟ ମାଧ୍ୟମରେ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲେ ଏବଂ ତାଙ୍କ ଟେଷ୍ଟ କ୍ୟାରିୟରର ଅନ୍ତ ଘଟାଇଥିଲେ। ଟି-୨୦ ଓ ଟେଷ୍ଟରୁ ଅବସର ନେବା ପରେ ରୋହିତ ଏବଂ ବିରାଟ ଏବେ କେବଳ ଦିନିକିଆ ଖେଳିବା ଜାରି ରଖିବେ। ଗଣମାଧ୍ୟମ ରିପୋର୍ଟରେ ଏହା ମଧ୍ୟ ପ୍ରକାଶ ପାଉଛି ଯେ କୋହଲି ଏବଂ ରୋହିତ ଉଭୟଙ୍କର ୨୦୨୭ ଦିନିକିଆ ବିଶ୍ୱକପ୍ ଖେଳିବାର ଯୋଜନା ଅଛି, କିନ୍ତୁ ଆଜି ଭାରତୀୟ କ୍ରିକେଟର କିମ୍ବଦନ୍ତୀ ସୁନୀଲ ଗାଭାସ୍କର ତାଙ୍କ ବୟାନରେ ସମସ୍ତଙ୍କୁ ଅଣନିଶ୍ୱାସୀ କରିଦେଇଛନ୍ତି। ଗାଭାସ୍କରଙ୍କ ଅନୁଯାୟୀ, ରୋହିତ-କୋହଲି ୨୦୨୭ ବିଶ୍ୱକପ୍‌ ଟିମର ଅଂଶ ହେବେ ନାହିଁ।

ଗାଭାସ୍କର କଣ କହିଲେ ?

୨୦୨୭ ବିଶ୍ୱକପ୍ ଦକ୍ଷିଣ ଆଫ୍ରିକାରେ ଅନୁଷ୍ଠିତ ହେବାକୁ ଯାଉଛି। ଗାଭାସ୍କର ରୋହିତ-ବିରାଟଙ୍କ ୨୦୨୭ ବିଶ୍ବକପ୍‌ ଖେଳିବା ବିଷୟରେ କହିଥିଲେ, ‘ସବୁକିଛି ଚୟନକର୍ତ୍ତାଙ୍କ ଉପରେ ନିର୍ଭର କରେ ଯେ ରୋହିତ ଏବଂ ବିରାଟ ଦଳରେ କେତେ ଯୋଗଦାନ ଦେଇପାରିବେ।’ ରୋହିତ ଏବଂ ବିରାଟ ODI ଫର୍ମାଟରେ ଉତ୍କୃଷ୍ଟ ପ୍ରଦର୍ଶନ କରିଛନ୍ତି। କିନ୍ତୁ ଏବେ ଚୟନକର୍ତ୍ତାମାନେ ୨୦୨୭ ବିଶ୍ୱକପକୁ ମନରେ ରଖି ଦଳକୁ ପ୍ରସ୍ତୁତ କରିବେ। ସେମାନେ ଦେଖିବେ ଯେ ସେମାନେ ଦୁହେଁ ଆଗାମୀ ବିଶ୍ୱକପ୍ ପର୍ଯ୍ୟନ୍ତ ଦଳରେ ରହିପାରିବେ କି ନାହିଁ।

ଚୟନକର୍ତ୍ତାଙ୍କ ପାଇଁ ବଡ଼ ଚ୍ୟାଲେଞ୍ଜ

ସେ ଆହୁରି କହିଛନ୍ତି, ‘ଚୟନକର୍ତ୍ତାମାନେ ଦେଖିବେ ଯେ ଉଭୟ ଏବେ ଯେପରି ଦଳରେ ଯୋଗଦାନ ଦେଉଛନ୍ତି, ସେହିପରି ଭାବରେ ସେ ଦଳରେ ଯୋଗଦାନ ଦେଇପାରିବେ କି ନାହିଁ।’ ଏହା ଚୟନକର୍ତ୍ତାଙ୍କ ପାଇଁ ମଧ୍ୟ ଏକ ବଡ଼ ଚ୍ୟାଲେଞ୍ଜ ହେବ। ତଥାପି, ଯଦି ଚୟନକର୍ତ୍ତାମାନେ ଏପରି ଅନୁଭବ କରନ୍ତି, ତେବେ ଦୁହେଁ ନିଶ୍ଚିତ ଭାବରେ ଖେଳିପାରିବେ। ସତ କହିବାକୁ ଗଲେ, ବର୍ତ୍ତମାନର ଫର୍ମକୁ ଦେଖି, ମୁଁ ଭାବୁନାହିଁ ଯେ ରୋହିତ ଏବଂ ବିରାଟ ୨୦୨୭ ODI ବିଶ୍ୱକପର ଅଂଶ ହେବେ। କିନ୍ତୁ ଯଦି ତାଙ୍କର ଫର୍ମ ଆଗାମୀ ୨ ବର୍ଷ ପର୍ଯ୍ୟନ୍ତ ଭଲ ରହେ ଏବଂ ସେ ଶତକ ମାରି ଚାଲନ୍ତି, ତେବେ ଭଗବାନ ମଧ୍ୟ ତାଙ୍କୁ ଦଳରରେ ନନେଇ ରହିପାରିବେ ନାହିଁ। ରୋହିତଙ୍କୁ ନିଜ ଫର୍ମ ସହିତ ଫିଟନେସ ଉପରେ ମଧ୍ୟ କାମ କରିବାକୁ ପଡିବ।

ଫିଟନେସ୍ ସମ୍ପର୍କରେ ଗାଭାସ୍କର କହିଛନ୍ତି, ‘ଫିଟନେସ୍ ଯୋଗୁଁ ତାଙ୍କୁ IPLର ପ୍ରାୟ ପ୍ରତ୍ୟେକ ମ୍ୟାଚ୍‌ରେ ଜଣେ ପ୍ରଭାବଶାଳୀ ଖେଳାଳି ଭାବରେ ଖେଳିବାକୁ ପଡୁଛି। ବିରାଟଙ୍କ ଫିଟନେସ୍ ସମସ୍ୟା ନାହିଁ। ସେ ୨୦୨୩ ODI ବିଶ୍ୱକପ୍ ପରେ ୨୦୨୫ IPLରେ ଭଲ ଫର୍ମରେ ଦେଖାଯାଉଛନ୍ତି ଏବଂ ୧୧ଟି ମ୍ୟାଚ୍‌ରେ ୫୦୫ ରନ୍ କରିଛନ୍ତି। ସେ ମ୍ୟାଚ୍ ପାଇଁ ନିଜକୁ କିପରି ଫିଟ୍ ରଖନ୍ତି ତାହା ଦେଖିବା ବାକି ରହିଲା। ଏଥିପାଇଁ ତାଙ୍କ ପାଖରେ ବହୁତ କମ୍ ସମୟ ଅଛି।

ଦୁବାଇ : ୨୦୨୫ ଚାମ୍ପିଅନ୍ସ ଟ୍ରଫିର ସେମିଫାଇନାଲରେ ଭାରତଠାରୁ ପରାଜୟ ପରେ ଅଷ୍ଟ୍ରେଲିଆ କ୍ରିକେଟ୍ ଦଳକୁ ଆଉ ଏକ ଝଟକା ଲାଗିଛି। ଟୁର୍ଣ୍ଣାମେଣ୍ଟରେ ଅଷ୍ଟ୍ରେଲିଆ ଦଳର ନେତୃତ୍ୱ ନେଇଥିବା ଷ୍ଟିଭ୍ ସ୍ମିଥ୍ ଦିନିକିଆ ଫର୍ମାଟକୁ ଅଲବିଦା କହିଛନ୍ତି। କ୍ରିକେଟ୍ ଅଷ୍ଟ୍ରେଲିଆ ବୁଧବାର ଏହା ଘୋଷଣା କରିଛି। ମଙ୍ଗଳବାର ଦିନ ଅଷ୍ଟ୍ରେଲିଆ ଭାରତଠାରୁ ଚାରି ୱିକେଟରେ ପରାସ୍ତ ହୋଇଥିଲା। ପ୍ୟାଟ୍ କମିନ୍ସଙ୍କ ଅନୁପସ୍ଥିତିରେ ସ୍ମିଥ୍ ଦଳର ନେତୃତ୍ୱ ନେଉଥିଲେ। ଆଉ ଗତକାଲିର ପରାଜୟ ପରେ ସେ ଦିନିକିଆ କ୍ରିକେଟରୁ ଅବସର ନେଇଛନ୍ତି। ଷ୍ଟିଭ୍ ସ୍ମିଥ୍  ଦିନିକିଆ ଫର୍ମାଟ ଖେଳୁନଥିବା ବେଳେ ସେ ଟେଷ୍ଟ ଓ ଟି-୨୦ ଖେଳିବା ଜାରି ରଖିବେ ବୋଲି ଜଣାପଡିଛି।

The great Steve Smith has called time on a superb ODI career 👏 pic.twitter.com/jsKDmVSG1h

— Cricket Australia (@CricketAus) March 5, 2025

ସ୍ମିଥଙ୍କ ଦିନିକିଆ କ୍ୟାରିଅର

ସ୍ମିଥ୍ ଅଷ୍ଟ୍ରେଲିଆ ପାଇଁ ମୋଟ ୧୭୦ଟି ଦିନିକିଆ ଖେଳି ୫୮୦୦ ରନ କରିଥିଲେ। ଦିନିକିଆରେ ତାଙ୍କର ସର୍ବୋତ୍ତମ ଇନିଂସ ହେଉଛି ୧୬୪ ରନ। ସେ ଦିନିକିଆରେ ୩୫ଟି ଅର୍ଦ୍ଧଶତକ ଏବଂ ୧୨ଟି ଶତକ ମାରିଛନ୍ତି। ୨୦୨୫ ଚାମ୍ପିଅନ୍ସ ଟ୍ରଫିରେ ସ୍ମିଥ୍ ଫର୍ମରେ ନଥିଲେ। ସେ ତିନୋଟି ଇନିଂସରେ ୪୮.୫୦ ହାରରେ ୯୭ ରନ କରିଥିଲେ। ତାଙ୍କର ସର୍ବୋତ୍ତମ ଇନିଂସ ଭାରତ ବିପକ୍ଷରେ ୭୩ ରନ ଥିଲା। ସ୍ମିଥ୍ ଫୁଲ୍ ଟସ୍ ବଲରେ ଶାମିଙ୍କ ଦ୍ୱାରା କ୍ଲିନ୍ ବୋଲ୍ଡ ହୋଇଥିଲେ। ସ୍ମିଥ୍ ୧୯ ଫେବୃଆରୀ ୨୦୧୦ରେ ମେଲବୋର୍ଣ୍ଣ କ୍ରିକେଟ୍ ଗ୍ରାଉଣ୍ଡରେ ୱେଷ୍ଟଇଣ୍ଡିଜ୍ ବିପକ୍ଷରେ ତାଙ୍କର ଏକଦିବସୀୟ ଡେବ୍ୟୁ କରିଥିଲେ। ସେ ୨୦୧୫ ଏବଂ ୨୦୨୩ ରେ ଦୁଇଥର ଦିନିକିଆ ବିଶ୍ୱକପ୍ ଜିତିଥିବା ଅଷ୍ଟ୍ରେଲିଆ ଦଳର ଅଂଶ ଥିଲେ।