ବଲିଉଡର ଅନ୍ୟତମ ବହୁ ପ୍ରତୀକ୍ଷିତ ଫିଲ୍ମ ତଥା ନୀତେଶ ତିୱାରୀଙ୍କ ନିର୍ଦ୍ଦେଶିତ ମେଗା ବଜେଟ୍ ଫିଲ୍ମ 'ରାମାୟଣ' ର ଟିଜର ପବିତ୍ର ହନୁମାନ ଜୟନ୍ତୀ ଅବସରରେ ଗୁରୁବାର ଦିନ ରିଲିଜ୍ ହୋଇଛି। ଏହି ଟିଜରରେ ବଲିଉଡ ସୁପରଷ୍ଟାର ରଣବୀର କପୁରଙ୍କୁ ପ୍ରଭୁ ଶ୍ରୀରାମଙ୍କ ଅବତାରରେ ଦେଖିବାକୁ ମିଳିଛି। ନମିତ ମାଲହୋତ୍ରା ଏବଂ କେଜିଏଫ୍ ଫେମ୍ ୟଶଙ୍କ ଦ୍ୱାରା ମିଳିତ ଭାବେ ପ୍ରଯୋଜିତ ଏହି ଫିଲ୍ମର ପ୍ରଥମ ଝଲକକୁ ନେଇ ଦର୍ଶକଙ୍କ ମଧ୍ୟରେ ଉତ୍ସାହ ଦ୍ୱିଗୁଣିତ ହୋଇଛି।

ଦମଦାର ଭିଏଫଏକ୍ସ (VFX) ଏବଂ ସଙ୍ଗୀତ

ଦୁଇ ମିନିଟରୁ ଅଧିକ ସମୟର ଏହି ଟିଜରରେ ଦମଦାର ଭିଏଫଏକ୍ସ (VFX) ଦେଖିବାକୁ ମିଳିଛି। ଓସ୍କାର ବିଜେତା କମ୍ପାନୀ ଡିଏନଇଜି (DNEG) ଏହାର ଭିଜୁଆଲ୍ ଉପରେ କାମ କରିଥିବା ବେଳେ ଏହାକୁ ଭାରତର ସବୁଠାରୁ ବଡ଼ ତଥା ମହଙ୍ଗା ଫିଲ୍ମ ବୋଲି କୁହାଯାଉଛି। କେବଳ ସେତିକି ନୁହେଁ, ଏହାର ସଙ୍ଗୀତ ନିର୍ଦ୍ଦେଶନା ଦାୟିତ୍ୱ ବିଶ୍ୱସ୍ତରୀୟ ସଙ୍ଗୀତକାର ହାନସ୍ ଜିମର (Hans Zimmer) ଏବଂ ଭାରତର ଗର୍ବ ଏଆର୍ ରହମାନ (AR Rahman) ମିଳିତ ଭାବେ ତୁଲାଉଛନ୍ତି। ଲସ୍ ଆଞ୍ଜେଲସ୍ ଏବଂ ମୁମ୍ବାଇରେ ଏକ ସ୍ୱତନ୍ତ୍ର ଇଭେଣ୍ଟ ମାଧ୍ୟମରେ ଏହି ଟିଜରକୁ ପ୍ରଦର୍ଶିତ କରାଯାଇଥିଲା।

ଚରିତ୍ର ଏବଂ ଷ୍ଟାର କାଷ୍ଟ

ଫିଲ୍ମରେ ରଣବୀର କପୁର ପ୍ରଭୁ ଶ୍ରୀରାମଙ୍କ ଭୂମିକାରେ ଅଭିନୟ କରୁଥିବା ବେଳେ ମାତା ସୀତାଙ୍କ ଭୂମିକାରେ ଦକ୍ଷିଣ ଭାରତୀୟ ଅଭିନେତ୍ରୀ ସାଇ ପଲ୍ଲବୀ ଏବଂ ରାବଣ ଭୂମିକାରେ ସୁପରଷ୍ଟାର ୟଶ ନଜର ଆସିବେ। ସେହିପରି ପ୍ରଭୁ ହନୁମାନଙ୍କ ଭୂମିକାରେ ସନ୍ନି ଦେଓଲ ଏବଂ ଲକ୍ଷ୍ମଣ ଭୂମିକାରେ ରବି ଦୁବେ ଅଭିନୟ କରୁଛନ୍ତି। ନିଜ ଚରିତ୍ର ସମ୍ପର୍କରେ ରଣବୀର କହିଛନ୍ତି ଯେ, "ମୁଁ ପ୍ରଭୁ ରାମଙ୍କୁ ଉପସ୍ଥାପନ କରିବାକୁ ନୁହେଁ, ବରଂ ତାଙ୍କଠାରୁ ଶିଖିବାକୁ ଆସିଛି। ସେ ହେଉଛନ୍ତି ମର୍ଯ୍ୟାଦା ପୁରୁଷୋତ୍ତମ"।

କେବେ ଆସିବ ଫିଲ୍ମ?

ନୀତେଶ ତିୱାରୀ ଏହି ମେଗା ପ୍ରୋଜେକ୍ଟକୁ ଦୁଇଟି ଭାଗରେ ନିର୍ମାଣ କରୁଛନ୍ତି। ମିଳିଥିବା ସୂଚନା ଅନୁଯାୟୀ, ଫିଲ୍ମର ପ୍ରଥମ ଭାଗ (Part One) ଦୀପାବଳି ୨୦୨୬ ରେ ଏବଂ ଦ୍ୱିତୀୟ ଭାଗ (Part Two) ଦୀପାବଳି ୨୦୨୭ ରେ ସିନେମାଘରକୁ ଆସିବ। ଦର୍ଶକ ଏବଂ ସମାଲୋଚକମାନେ ଟିଜରର ଦୃଶ୍ୟପଟ୍ଟ ଏବଂ ରଣବୀରଙ୍କ ଲୁକକୁ ଭୂୟସୀ ପ୍ରଶଂସା କରୁଛନ୍ତି |

ବଲିଉଡ୍ ବକ୍ସ ଅଫିସ୍‌ରେ ୨୦୨୬ ମସିହାର ସବୁଠାରୁ ବଡ଼ ଲଢ଼େଇ ଦେଖିବାକୁ ମିଳିବ। ଇଦ୍ ଅବସରରେ ଦକ୍ଷିଣ ଭାରତୀୟ ସୁପରଷ୍ଟାର ୟଶଙ୍କ ଅଭିନୀତ ଫିଲ୍ମ ‘ଟକ୍ସିକ୍’ ଏବଂ ବଲିଉଡ୍ ତାରକା ରଣବୀର ସିଂଙ୍କ ‘ଧୁରନ୍ଧର-୨’ ଏକାସାଙ୍ଗରେ ମୁକ୍ତିଲାଭ କରିବାକୁ ଯାଉଛି। ଏହି ବହୁପ୍ରତୀକ୍ଷିତ ମୁକାବିଲାକୁ ନେଇ ଚର୍ଚ୍ଚା ଜୋର ଧରିଥିବା ବେଳେ ପ୍ରଖ୍ୟାତ ନିର୍ଦ୍ଦେଶକ ସଞ୍ଜୟ ଗୁପ୍ତା ନିଜର ପ୍ରତିକ୍ରିୟା ରଖିଛନ୍ତି।

ଉଭୟ ଫିଲ୍ମ ପାଇଁ କ୍ଷତିକାରକ

ସଞ୍ଜୟ ଗୁପ୍ତା ଏହି ମୁହାଁମୁହିଁ ପରିସ୍ଥିତିକୁ ‘ଦୁର୍ଭାଗ୍ୟଜନକ’ ବୋଲି ଅଭିହିତ କରିଛନ୍ତି। ସେ କହିଛନ୍ତି ଯେ, ଯେତେବେଳେ ଦୁଇଟି ବଡ଼ ବଜେଟ୍ ଏବଂ ଲୋକପ୍ରିୟ ଚଳଚ୍ଚିତ୍ର ଗୋଟିଏ ଦିନରେ ମୁକ୍ତିଲାଭ କରେ, ସେତେବେଳେ ଉଭୟଙ୍କ ବ୍ୟବସାୟ ପ୍ରଭାବିତ ହୁଏ। ଦର୍ଶକ ବାଣ୍ଟି ହୋଇଯାନ୍ତି ଏବଂ କୌଣସି ଫିଲ୍ମ ନିଜର ପୂର୍ଣ୍ଣ କ୍ଷମତା ଅନୁଯାୟୀ ରୋଜଗାର କରିପାରେ ନାହିଁ। ସେ ନିଜର ‘କାବିଲ୍’ ଏବଂ ଶାହାରୁଖ ଖାନଙ୍କ ‘ରଇସ୍’ ମଧ୍ୟରେ ହୋଇଥିବା କ୍ଲାସ୍‌ର ଉଦାହରଣ ଦେଇ ଏହି କଥା ବୁଝାଇଛନ୍ତି।

ଦର୍ଶକଙ୍କ ପକେଟ୍ ଉପରେ ଚାପ

ସଞ୍ଜୟ ଗୁପ୍ତା ଯୁକ୍ତି ବାଢିଛନ୍ତି ଯେ ଭାରତ ଏକ ଅତ୍ୟନ୍ତ ଧନୀ ଦେଶ ନୁହେଁ। ସାଧାରଣ ଦର୍ଶକଙ୍କ ପାଖରେ ଏତେ ଟଙ୍କା ନଥାଏ ଯେ ସେମାନେ ଗୋଟିଏ ମାସରେ କିମ୍ବା ଗୋଟିଏ ସପ୍ତାହରେ ଦୁଇ-ଦୁଇଟି ବଡ଼ ସିନେମା ଦେଖିପାରିବେ। ତେଣୁ ଏହି କ୍ଲାସ୍ ଯୋଗୁଁ ଉଭୟ ଫିଲ୍ମର କଲେକ୍ସନ୍ କମିବାର ସମ୍ଭାବନା ରହିଛି। ଯଦି ଏହି ଦୁଇଟି ଚଳଚ୍ଚିତ୍ର ଅଲଗା ଅଲଗା ସମୟରେ ଆସିଥାନ୍ତେ, ତେବେ ଉଭୟ ବ୍ଲକବଷ୍ଟର ହୋଇପାରିଥାନ୍ତେ।

ମାର୍ଚ୍ଚ ୧୯ରେ ମହାମୁକାବିଲା

ସୂଚନାଯୋଗ୍ୟ ଯେ, ଆଦିତ୍ୟ ଧରଙ୍କ ନିର୍ଦ୍ଦେଶିତ ‘ଧୁରନ୍ଧର-୨’ ଏବଂ ଗୀତୁ ମୋହନଦାସଙ୍କ ନିର୍ଦ୍ଦେଶିତ ‘ଟକ୍ସିକ୍’ ଆଗାମୀ ୧୯ ମାର୍ଚ୍ଚ ୨୦୨୬ରେ ପ୍ରେକ୍ଷାଳୟକୁ ଆସୁଛି। ‘କେଜିଏଫ୍’ ପରେ ୟଶଙ୍କ ଏହି ଫିଲ୍ମକୁ ଦର୍ଶକ ଉତ୍କଣ୍ଠାର ସହ ଅପେକ୍ଷା କରିଥିବା ବେଳେ ରଣବୀରଙ୍କ ସ୍ପାଏ-ଥ୍ରୀଲର ମଧ୍ୟ ବେଶ୍ ଚର୍ଚ୍ଚାରେ ରହିଛି।

ମୁମ୍ବାଇ: କେଜିଏଫ୍ ପରେ ପୁଣି ଥରେ ବଡ଼ ପରଦାରେ ଧମାକା କରିବାକୁ ପ୍ରସ୍ତୁତ ରକିଂ ଷ୍ଟାର ୟଶ। ଦୀର୍ଘ ଦିନର ଅପେକ୍ଷା ପରେ ତାଙ୍କର ଆଗାମୀ ଆକ୍ସନ୍ ଥ୍ରୀଲର ଚଳଚ୍ଚିତ୍ର ‘ଟକ୍ସିକ୍: ଏ ଫେୟାରୀଟେଲ୍ ଫର୍ ଗ୍ରୋନ୍-ଅପ୍ସ’ର ଅଫିସିଆଲ୍ ଟିଜର ଆଜି ମୁକ୍ତିଲାଭ କରିଛି। ଆସନ୍ତା ମାର୍ଚ୍ଚ ୧୯ ତାରିଖରେ ଏହି ଚଳଚ୍ଚିତ୍ରଟି ବିଶ୍ୱବ୍ୟାପୀ ମୁକ୍ତିଲାଭ କରିବାକୁ ଥିବାବେଳେ, ଏହାର ଟିଜର ଦର୍ଶକଙ୍କ ମଧ୍ୟରେ ଉତ୍କଣ୍ଠା ବଢାଇ ଦେଇଛି।

୨ ମିନିଟର ଏହି ଟିଜରରେ ୟଶଙ୍କୁ ଏକ ଭୟଙ୍କର ଏବଂ ଷ୍ଟାଇଲିସ୍ ଅବତାରରେ ଦେଖିବାକୁ ମିଳିଛି। ଏକ ପାର୍ଟିର ଦୃଶ୍ୟରୁ ଆରମ୍ଭ ହୋଇଥିବା ଏହି ଟିଜରରେ ଭରପୂର ଆକ୍ସନ୍ ରହିଛି। ୟଶଙ୍କ ଚରିତ୍ର ‘ରାୟା’କୁ ବେଶ୍ ଶକ୍ତିଶାଳୀ ଭାବେ ଉପସ୍ଥାପନ କରାଯାଇଛି। ଟିଜରରେ ୟଶ କହୁଛନ୍ତି, “ଖେଳ ସେତେବେଳେ ସରିବ, ଯେତେବେଳେ ମୁଁ କହିବି... ସେପର୍ଯ୍ୟନ୍ତ କିଛି ସମ୍ମାନ ଶିଖ।” ଟିଜରର ଶେଷ ଭାଗରେ ୟଶ ହାତରେ ଏକ ଚେନ୍ କରତ (chainsaw) ଧରି ଶତ୍ରୁ ସଂହାର କରୁଥିବା ଦୃଶ୍ୟ ସମସ୍ତଙ୍କୁ ଚମକାଇ ଦେଇଛି। ନିର୍ମାତାମାନେ ଏହି ଟିଜରକୁ କନ୍ନଡ, ହିନ୍ଦୀ, ତେଲୁଗୁ, ତାମିଲ ଏବଂ ମାଲାୟାଲମ୍ ଭାଷାରେ ରିଲିଜ୍ କରିଛନ୍ତି।

ଏହି ଚଳଚ୍ଚିତ୍ରରେ କେବଳ ୟଶ ନୁହନ୍ତି, ବରଂ ଏକାଧିକ ବଡ଼ ତାରକାଙ୍କୁ ଦେଖିବାକୁ ମିଳିବ। ଫିଲ୍ମରେ ନୟନତାରା ‘ଗଙ୍ଗା’ ଭୂମିକାରେ, କିଆରା ଆଡଭାନୀ ‘ନାଦିଆ’ ଭୂମିକାରେ, ହୁମା କୁରେଶୀ ‘ଏଲିଜାବେଥ୍’ ଭାବରେ ଏବଂ ତାରା ସୁତାରିଆ ‘ରେବେକା’ ଭୂମିକାରେ ନଜର ଆସିବେ। ପ୍ରଖ୍ୟାତ ନିର୍ମାତା ଗୀତୁ ମୋହନଦାସ ଏହାର ନିର୍ଦ୍ଦେଶନା ଦେଇଥିବାବେଳେ, ଏହା କନ୍ନଡ ଏବଂ ଇଂରାଜୀ ଭାଷାରେ ଏକକାଳୀନ ସୁଟିଂ କରାଯାଇଛି।

‘ଟକ୍ସିକ୍’ର କାହାଣୀ ୧୯୪୦ ରୁ ୧୯୭୦ ଦଶକ ମଧ୍ୟରେ ଗୋଆରେ ସେଟ୍ ହୋଇଥିବା କୁହାଯାଉଛି। ଏହା ଏକ ଗ୍ୟାଙ୍ଗଷ୍ଟର ଡ୍ରାମା, ଯେଉଁଥିରେ ଅପରାଧ ଜଗତର କଳା ସାମ୍ରାଜ୍ୟ, ଭୟ ଏବଂ ବିଶ୍ୱାସଘାତକତାର କାହାଣୀ ଦେଖିବାକୁ ମିଳିବ। ଆସନ୍ତା ବର୍ଷ ମାର୍ଚ୍ଚ ୧୯ରେ ଇଦ୍, ଉଗାଡି ଏବଂ ଗୁଡି ପାଡୱା ଅବସରରେ ଏହା ରିଲିଜ୍ ହେବ। ତେବେ ବକ୍ସ ଅଫିସରେ ଏହା ରଣବୀର ସିଂହଙ୍କ ଅଭିନୀତ ଚଳଚ୍ଚିତ୍ର ‘ଧୁରନ୍ଧର: ଦ ରିଭେଞ୍ଜ’ ସହ ମୁହାଁମୁହିଁ ହେବ ବୋଲି ଜଣାପଡିଛି।

କେଜିଏଫ୍ ଷ୍ଟାର୍ ୟଶଙ୍କ ଆଗାମୀ ଚଳଚ୍ଚିତ୍ର 'ଟକ୍ସିକ୍' (Toxic: A Fairy Tale for Grown-ups) ପୁଣି ଥରେ ବିବାଦ ଘେରକୁ ଆସିଛି। ଫିଲ୍ମର ଟିଜରରେ କିଛି ନିର୍ଦ୍ଦିଷ୍ଟ ଦୃଶ୍ୟକୁ ନେଇ ନ୍ୟାସନାଲ ଖ୍ରୀଷ୍ଟିୟାନ ଫେଡେରେସନ୍ (NCF) ତୀବ୍ର ଆପତ୍ତି ଉଠାଇଛି। ଏହି ଦୃଶ୍ୟଗୁଡ଼ିକ ଖ୍ରୀଷ୍ଟିୟାନ ସମ୍ପ୍ରଦାୟର ଧାର୍ମିକ ଭାବନାକୁ ଆଘାତ ଦେଇଥିବା ଅଭିଯୋଗ କରି ସଙ୍ଗଠନ ପକ୍ଷରୁ ଏକ ଆନୁଷ୍ଠାନିକ ଅଭିଯୋଗ ଦାଖଲ କରାଯାଇଛି।

କ’ଣ ରହିଛି ଅଭିଯୋଗ?

ନ୍ୟାସନାଲ ଖ୍ରୀଷ୍ଟିୟାନ ଫେଡେରେସନ୍ ଅଭିଯୋଗ କରିଛି ଯେ, ଫିଲ୍ମର ଟିଜରରେ ଖ୍ରୀଷ୍ଟିୟାନ ଧର୍ମର ପବିତ୍ର ପ୍ରତୀକ ଏବଂ ସେଣ୍ଟ ମାଇକେଲ (Saint Michael the Archangel) ଙ୍କ ଚିତ୍ରକୁ ଅପମାନଜନକ ଭାବରେ ଚିତ୍ରଣ କରାଯାଇଛି। ଅଭିଯୋଗ ଅନୁଯାୟୀ, ଟିଜରରେ ଦେଖାଯାଇଥିବା କିଛି ଅଶ୍ଳୀଳ ଏବଂ ଆପତ୍ତିଜନକ ଦୃଶ୍ୟ ପବିତ୍ର ଧାର୍ମିକ ଚିତ୍ର ସାମ୍ନାରେ ସୁଟିଂ କରାଯାଇଛି, ଯାହା ସମ୍ପ୍ରଦାୟ ପାଇଁ ଅତ୍ୟନ୍ତ ଅସହ୍ୟ। ଏହା ଧର୍ମ ପ୍ରତି ଘୋର ଅପମାନ ବୋଲି ସଙ୍ଗଠନ ଦାବି କରିଛି।

କ୍ଷମା ମାଗିବାକୁ ଦାବି

ଫେଡେରେସନ୍ ପକ୍ଷରୁ ଦାବି କରାଯାଇଛି ଯେ, ନିର୍ମାତାମାନେ ତୁରନ୍ତ ୟୁଟ୍ୟୁବ୍ ଏବଂ ଅନ୍ୟାନ୍ୟ ପ୍ଲାଟଫର୍ମରୁ ଏହି ବିବାଦୀୟ ଦୃଶ୍ୟ ହଟାନ୍ତୁ। ଏହା ସହିତ ଖ୍ରୀଷ୍ଟିୟାନ ସମ୍ପ୍ରଦାୟର ଭାବନାକୁ ଆଘାତ ଦେଇଥିବାରୁ ସେମାନେ ସର୍ବସାଧାରଣରେ କ୍ଷମା ମାଗିବାକୁ ମଧ୍ୟ କୁହାଯାଇଛି। ଯଦି ଏହି ଦାବି ପୂରଣ ନହୁଏ, ତେବେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସଙ୍ଗଠନ ଚେତାବନୀ ଦେଇଛି। ଏନେଇ ସେନ୍ସର ବୋର୍ଡ (CBFC), ରାଜ୍ୟ ମୁଖ୍ୟ ଶାସନ ସଚିବ ଏବଂ ଗୃହ ସଚିବଙ୍କ ନିକଟରେ ଅଭିଯୋଗ ପତ୍ର ଦାଖଲ କରାଯାଇଛି।

ପୂର୍ବରୁ ମହିଳା ଆୟୋଗ କରିଥିଲେ ବିରୋଧ

ଏହା ପ୍ରଥମ ଘଟଣା ନୁହେଁ ଯେତେବେଳେ 'ଟକ୍ସିକ୍' ବିବାଦରେ ଫସିଛି। ଏହା ପୂର୍ବରୁ ଟିଜରରେ ଥିବା କିଛି ଦୃଶ୍ୟକୁ ନେଇ କର୍ଣ୍ଣାଟକ ରାଜ୍ୟ ମହିଳା ଆୟୋଗ ମଧ୍ୟ ଆପତ୍ତି ଉଠାଇଥିଲେ। ସେତେବେଳେ ଅଭିଯୋଗ ହୋଇଥିଲା ଯେ, ଟିଜରରେ ମହିଳାଙ୍କ ପ୍ରତି ଅସମ୍ମାନଜନକ ଏବଂ ହିଂସାତ୍ମକ ଦୃଶ୍ୟ ରହିଛି। ବର୍ତ୍ତମାନ ଧାର୍ମିକ ଭାବନାକୁ ନେଇ ଉଠିଥିବା ଏହି ନୂଆ ବିବାଦ ଫିଲ୍ମ ନିର୍ମାତାଙ୍କ ପାଇଁ ଅଡୁଆ ବଢାଇପାରେ।

ବଲିଉଡ ଅଭିନେତ୍ରୀ ତାରା ସୁତାରିଆ ବର୍ତ୍ତମାନ ନିଜର ବ୍ୟକ୍ତିଗତ ଜୀବନକୁ ନେଇ ଚର୍ଚ୍ଚାରେ ରହିଛନ୍ତି। କିଛି ଦିନ ତଳେ ଅଭିନେତା ବୀର ପାହାଡ଼ିଆଙ୍କ ସହ ତାଙ୍କର ସମ୍ପର୍କ ଭାଙ୍ଗିଥିବା ନେଇ ଖବର ସାମ୍ନାକୁ ଆସିଥିଲା। ଏହି ଚର୍ଚ୍ଚା ଏବଂ ବିବାଦ ମଧ୍ୟରେ ତାରା ଏବେ ନିଜ ମାନସିକ ଶାନ୍ତି, କାମ ଏବଂ ସଫଳତା ବିଷୟରେ ଖୋଲାଖୋଲି ମତ ରଖିଛନ୍ତି।

ଏଲ୍ ଇଣ୍ଡିଆ (Elle India)କୁ ଦେଇଥିବା ଏକ ସାକ୍ଷାତକାରରେ ତାରା କହିଛନ୍ତି ଯେ, ସଫଳତା କେବଳ ବାହ୍ୟିକ ନୁହେଁ, ବରଂ ଏହା ଆଭ୍ୟନ୍ତରୀଣ ଅଟେ। "ମାନସିକ ଶାନ୍ତି, ନିଜ ଲୋକଙ୍କ ଭଲପାଇବା ଏବଂ ନିଜକୁ ଜାଣିବା ମୋର ମୂଳ ଲକ୍ଷ୍ୟ," ବୋଲି ସେ କହିଛନ୍ତି। ତାରା ଆହୁରି ମଧ୍ୟ କହିଛନ୍ତି ଯେ ସେ ନିଜର ଶାନ୍ତିକୁ କିପରି ସୁରକ୍ଷିତ ରଖିବେ, ତାହା ଶିଖି ନେଇଛନ୍ତି। ପିଲାଦିନରୁ କ୍ୟାମେରା ସାମନାରେ ରହିଥିବାରୁ ନିଜକୁ ଶାନ୍ତ ରଖିବା ତାଙ୍କ ପାଇଁ ଏକ ଚ୍ୟାଲେଞ୍ଜ ଥିଲା, କିନ୍ତୁ ଆତ୍ମ-ଚିନ୍ତନ (Self-reflection) ଦ୍ୱାରା ସେ ଏହା ହାସଲ କରିଛନ୍ତି।

ଲୋକଙ୍କ କଥାକୁ ଖାତିର କରନ୍ତି ନାହିଁ

ସେଲିବ୍ରିଟିମାନଙ୍କୁ ଅନେକ ସମୟରେ ଲୋକମାନେ ଭୁଲ ବୁଝନ୍ତି। କିନ୍ତୁ ତାରା ଏବେ ଲୋକଙ୍କ ଧାରଣା ବଦଳାଇବାକୁ ଚେଷ୍ଟା କରନ୍ତି ନାହିଁ। ସେ କହିଛନ୍ତି, "ଯେପର୍ଯ୍ୟନ୍ତ ମୁଁ ଏବଂ ମୋର ନିକଟତର ଲୋକମାନେ ସତ ଜାଣିଛନ୍ତି, ସେତିକି ଯଥେଷ୍ଟ"। ଗତ ବର୍ଷ ମୁମ୍ବାଇରେ ଗାୟକ ଏପି ଧିଲୋନ୍ଙ୍କ କନ୍ସର୍ଟରେ ଘଟିଥିବା ଏକ ଘଟଣା ପରେ ତାରା ଏବଂ ବୀର ପାହାଡ଼ିଆଙ୍କ ବ୍ରେକଅପ୍ ଖବର ଜୋର ଧରିଥିଲା। ସେହି ସମୟରେ ଏପି ଧିଲୋନ୍ ତାରାଙ୍କୁ ଆଲିଙ୍ଗନ କରିବା ଏବଂ କିସ୍ କରିବା ଘଟଣା ବେଶ୍ ବିବାଦୀୟ ହୋଇଥିଲା। ଯଦିଓ ଉଭୟ ତାରା କିମ୍ବା ବୀର ଏହି ବ୍ରେକଅପ୍ ନେଇ କୌଣସି ଆନୁଷ୍ଠାନିକ ଘୋଷଣା କରିନାହାନ୍ତି।

'ଟକ୍ସିକ୍'ରେ ନଜର ଆସିବେ ତାରା

କାମ କଥା କହିଲେ, ତାରା ସୁତାରିଆଙ୍କୁ ଖୁବଶୀଘ୍ର ଫିଲ୍ମ 'ଟକ୍ସିକ୍' (Toxic)ରେ ଦେଖିବାକୁ ମିଳିବ। ଏହି ଫିଲ୍ମରେ କେଜିଏଫ୍ ଷ୍ଟାର ୟଶ ମୁଖ୍ୟ ଭୂମିକାରେ ଅଛନ୍ତି। ତାଙ୍କ ସହ କିଆରା ଆଡଭାନୀ, ନୟନତାରା, ହୁମା କୁରେଶୀ ଏବଂ ରୁକ୍ମିଣୀ ବସନ୍ତ ମଧ୍ୟ ଅଭିନୟ କରୁଛନ୍ତି। ଫିଲ୍ମଟି ୧୯ ମାର୍ଚ୍ଚ ୨୦୨୬ରେ ମୁକ୍ତିଲାଭ କରିବ।

ସାଉଥ୍ ସୁପରଷ୍ଟାର ୟଶ ତାଙ୍କ ଆଗାମୀ ଫିଲ୍ମ ‘ଟକ୍ସିକ’ (Toxic) ମାଧ୍ୟମରେ ପୁଣି ଥରେ ବଡ଼ ପରଦାରେ ଧମାକା କରିବାକୁ ପ୍ରସ୍ତୁତ ଅଛନ୍ତି। ଦର୍ଶକମାନେ ୨୦୨୬ ମାର୍ଚ୍ଚ ୧୯ ତାରିଖକୁ ଅପେକ୍ଷା କରି ରହିଛନ୍ତି, କାରଣ ଏହି ଦିନ ବକ୍ସ ଅଫିସରେ ଏକ ବଡ଼ ଲଢେଇ ଦେଖିବାକୁ ମିଳିବ। ଗୋଟିଏ ପଟେ ରଣବୀର ସିଂଙ୍କ ‘ଧୁରନ୍ଧର’ ଏବଂ ଅନ୍ୟ ପଟେ ୟଶଙ୍କ ‘ଟକ୍ସିକ’ ମୁହାଁମୁହିଁ ହେବେ। ତେବେ ରିଲିଜ୍ ପୂର୍ବରୁ ଫିଲ୍ମର ଏକ ବଡ଼ ଡିଲକୁ ନେଇ ଚର୍ଚ୍ଚା ଜୋର ଧରିଛି।

୧୨୦ କୋଟିର ଡିଲ୍ ଚର୍ଚ୍ଚା

ସଦ୍ୟ ରିପୋର୍ଟ ଅନୁଯାୟୀ, ଲୋକପ୍ରିୟ ପ୍ରଯୋଜକ ଦିଲ୍ ରାଜୁ ଆନ୍ଧ୍ରପ୍ରଦେଶ ଓ ତେଲେଙ୍ଗାନା ପାଇଁ ‘ଟକ୍ସିକ’ର ଡିଷ୍ଟ୍ରିବ୍ୟୁସନ୍ ରାଇଟ୍ସ କିଣିଛନ୍ତି। ଦିଲ୍ ରାଜୁଙ୍କ ପ୍ରଡକ୍ସନ୍ କମ୍ପାନୀ ‘ଶ୍ରୀ ଭେଙ୍କଟେଶ୍ୱର କ୍ରିଏସନ୍ସ’ ଏହି ରାଇଟ୍ସ ପାଇଁ ପ୍ରାୟ ୧୨୦ କୋଟି ଟଙ୍କା ଖର୍ଚ୍ଚ କରିଥିବା କୁହାଯାଉଛି। ଯଦି ଏହି ଖବର ସତ ହୁଏ, ତେବେ କୌଣସି ଅଣ-ତେଲୁଗୁ (Non-Telugu) ଫିଲ୍ମ ପାଇଁ ଏହା ଏକ ରେକର୍ଡ ବୋଲି ବିବେଚନା କରାଯାଉଛି।

ପିଆର୍ ଷ୍ଟଣ୍ଟ୍ ନା ବାସ୍ତବତା?

ଏତେ ବଡ଼ ଡିଲ୍ ବିଷୟରେ ଖବର ଆସିବା ପରେ ଏହାକୁ ନେଇ ବିଭିନ୍ନ ପ୍ରଶ୍ନ ମଧ୍ୟ ଉଠୁଛି। କିଛି ଟ୍ରେଡ୍ ବିଶେଷଜ୍ଞଙ୍କ ମତରେ ଏହି ୧୨୦ କୋଟିର ତଥ୍ୟ କେବଳ ଫିଲ୍ମର ହାଇପ୍ ବଢାଇବା ପାଇଁ ଏକ ପିଆର୍ ଷ୍ଟଣ୍ଟ୍ (PR Stunt) ହୋଇପାରେ। ବର୍ତ୍ତମାନ ସମୟରେ ଦିଲ୍ ରାଜୁ ଏତେ ବଡ଼ ଆର୍ଥିକ ରିସ୍କ ନେଉନାହାନ୍ତି, ବିଶେଷକରି ଯେତେବେଳେ ସାମ୍ନାରେ ରଣବୀର ସିଂଙ୍କ ଭଳି ତାରକାଙ୍କ ଫିଲ୍ମ ରହିଛି। ଏହା ବ୍ୟତୀତ, ‘ଟକ୍ସିକ’ ରିଲିଜର ଠିକ୍ ଗୋଟିଏ ସପ୍ତାହ ପରେ ପୱନ କଲ୍ୟାଣଙ୍କ ବହୁପ୍ରତୀକ୍ଷିତ ଫିଲ୍ମ ‘ଉସ୍ତାଦ ଭଗତ ସିଂ’ ମଧ୍ୟ ରିଲିଜ୍ ହେବାର ଅଛି, ଯାହା ଫିଲ୍ମର ବ୍ୟବସାୟ ଉପରେ ପ୍ରଭାବ ପକାଇପାରେ।

ଫିଲ୍ମର ଷ୍ଟାରକାଷ୍ଟ ଏବଂ ନିର୍ଦ୍ଦେଶନା

ଏହି ଚର୍ଚ୍ଚିତ ଫିଲ୍ମର ନିର୍ଦ୍ଦେଶନା ଗୀତୁ ମୋହନଦାସ ଦେଉଛନ୍ତି। କେଜିଏଫ୍-୨ ପରେ ୟଶଙ୍କ ଏହି ପ୍ରତ୍ୟାବର୍ତ୍ତନକୁ ନେଇ ପ୍ରଶଂସକମାନେ ଉତ୍ସାହିତ ଅଛନ୍ତି। ଫିଲ୍ମରେ କିଆରା ଆଡଭାନୀ, ନୟନତାରା, ତାରା ସୁତାରିଆ, ହୁମା କୁରେଶୀ ଏବଂ ରୁକ୍ମିଣୀ ବସନ୍ତଙ୍କ ଭଳି ୫ ଜଣ ଅଭିନେତ୍ରୀ ନଜର ଆସିବେ। ତେବେ ୧୨୦ କୋଟିର ଡିଲ୍ ସତ କି ମିଛ, ତାହା ଆଗାମୀ ଦିନରେ ଅଫିସିଆଲ ଘୋଷଣା ପରେ ସ୍ପଷ୍ଟ ହେବ।

କନ୍ନଡ ଫିଲ୍ମ ଇଣ୍ଡଷ୍ଟ୍ରିର ‘ରକିଂ ଷ୍ଟାର୍’ ଯଶ (Yash) ଙ୍କ ଫ୍ୟାନ୍ସମାନଙ୍କ ପାଇଁ ଆଜିର ଦିନଟି କୌଣସି ଉତ୍ସବଠାରୁ କମ୍ ନୁହେଁ। ଆଜି ଅଭିନେତାଙ୍କ ୪୦ତମ ଜନ୍ମଦିନ ଅବସରରେ ତାଙ୍କର ବହୁ ପ୍ରତୀକ୍ଷିତ ଫିଲ୍ମ 'ଟକ୍ସିକ୍' (Toxic: A Fairy Tale for Grown-ups) ର ଟିଜର ରିଲିଜ୍ କରାଯାଇଛି। 'କେଜିଏଫ୍ ୨' ପରେ ଦୀର୍ଘ ଦିନ ଧରି ଦର୍ଶକ ଯଶଙ୍କୁ ବଡ଼ ପରଦାରେ ଦେଖିବାକୁ ଅପେକ୍ଷା କରିଥିଲେ, ଆଉ ଆଜି ଏହି ଟିଜର ସେମାନଙ୍କ ଉତ୍ସାହକୁ ଦ୍ୱିଗୁଣିତ କରିଦେଇଛି।

ପ୍ରାୟ ୩ ମିନିଟର ଏହି ଟିଜରଟି ଏକ କବରସ୍ଥାନର ଦୃଶ୍ୟରୁ ଆରମ୍ଭ ହୁଏ, ଯେଉଁଠାରେ ଜଣେ ବ୍ୟକ୍ତିର ଅନ୍ତିମ ସଂସ୍କାର ଚାଲିଥାଏ। ସେଠାରେ ଉପସ୍ଥିତ ଥିବା ଜଣେ ବ୍ୟକ୍ତି କହୁଛନ୍ତି ଯେ, କେହି ବି ଏତେ ପାଗଳ ନୁହଁନ୍ତି ଯେ ଏଠାକୁ ଆସିବେ। ଠିକ୍ ସେହି ସମୟରେ ଏକ ଜବରଦସ୍ତ ବିସ୍ଫୋରଣ ଘଟେ ଏବଂ ଏଣ୍ଟ୍ରି ହୁଏ 'ରାୟା' (Raya) ରୂପୀ ଯଶଙ୍କର। ହାତରେ ମେସିନ୍ ଗନ୍ ଏବଂ ପାଟିରେ ସିଗାର୍ ଧରି ଯଶ ଶତ୍ରୁମାନଙ୍କ ଉପରେ ଗୁଳି ବର୍ଷା କରୁଥିବା ଦେଖିବାକୁ ମିଳିଛି। ଟିଜର ଶେଷରେ ଯଶଙ୍କ ମୁହଁରୁ ଶୁଣିବାକୁ ମିଳେ ଏକ ଦମଦାର୍ ଡାଇଲଗ୍- "ଡାଡିସ୍ ହୋମ୍" (Daddy's Home)।

ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି ଲୋକପ୍ରିୟ ନିର୍ଦ୍ଦେଶିକା ଗୀତୁ ମୋହନଦାସ। କେବଳ ଯଶ ନୁହଁନ୍ତି, ଫିଲ୍ମରେ ଏକ ବଡ଼ ତାରକା ସମାହାର ଦେଖିବାକୁ ମିଳିବ। ଏଥିରେ କିଆରା ଆଡଭାନୀ, ନୟନତାରା, ହୁମା କୁରେଶୀ, ତାରା ସୁତାରିଆ ଏବଂ ରୁକ୍ମିଣୀ ବସନ୍ତଙ୍କ ଭଳି ଅଭିନେତ୍ରୀମାନେ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ। ଟିଜରରେ ଦେଖାଯାଇଥିବା ଭିଜୁଆଲ୍ସ ଏବଂ ବ୍ୟାକଗ୍ରାଉଣ୍ଡ୍ ମ୍ୟୁଜିକ୍ ଦର୍ଶକଙ୍କୁ ହଲିଉଡ୍ ଫିଲ୍ମର ଅନୁଭବ ଦେଉଛି।

ଯଶଙ୍କ ଏହି ଆକ୍ସନ୍ ଥ୍ରୀଲର ଫିଲ୍ମଟି ଆସନ୍ତା ୧୯ ମାର୍ଚ୍ଚ ୨୦୨୬ ରେ ପ୍ରେକ୍ଷାଳୟରେ ମୁକ୍ତିଲାଭ କରିବ। ଟିଜର ରିଲିଜ୍ ହେବାର କିଛି ସମୟ ମଧ୍ୟରେ ହିଁ ସୋସିଆଲ ମିଡିଆରେ ଏହା ଟ୍ରେଣ୍ଡ କରିବା ଆରମ୍ଭ କରିଦେଇଛି। ଫ୍ୟାନ୍ସମାନେ ଯଶଙ୍କ ନୂଆ ଲୁକ୍ ଏବଂ ଆକ୍ସନ୍ ଅବତାରକୁ ବେଶ୍ ପସନ୍ଦ କରିଛନ୍ତି।

ବାତ୍ୟା ‘ୟସ୍’ ରାଜ୍ୟରେ ତାଣ୍ଡବ ରଚୁଥିବା ବେଳେ କ୍ୟାପିଟାଲ ହସ୍ପିଟାଲରେ ଶୁଭିଥିଲା କୁଆଁ କୁଆଁ ସ୍ବର। କ୍ୟାପିଟାଲ ହସ୍ପିଟାଲରେ ୧୧ଟି ପିଲା ଜନ୍ମଗ୍ରହଣ କରିଛନ୍ତି। ସେଥିରୁ ୮ଟି ପୁଅ ଥିବା ବେଳେ ୩ଟି ଶିଶୁ କନ୍ୟା ରହିଥିବା କ୍ୟାପିଟାଲ ହସ୍ପିଟାଲ କର୍ତ୍ତୃପକ୍ଷ ସୂଚନା ଦେଇଛନ୍ତି। ବାଲିଅନ୍ତା ଥାନା ଅଞ୍ଚଳର ଜଣେ ମହିଳା ବୁଧବାର ସକାଳୁ ପ୍ରସବ ଯନ୍ତ୍ରଣା ଭୋଗିବାରୁ କ୍ୟାପିଟାଲ ହସ୍ପିଟାଲକୁ ଆସିଥିଲେ। ସକାଳ ସାଢ଼େ ୯ଟା ବେଳେ ଏକ ଶିଶୁପୁତ୍ର ଜନ୍ମ ଦେଇଥିଲେ । ଉଭୟ ମା’ ପୁଅ ସୁସ୍ଥ ଅଛନ୍ତି। ତେବେ ଜନ୍ମ ପରେ ନବଜାତକର ନାଁ ପରିବାରଲୋକେ ‘ୟସ’ ରଖୁଛନ୍ତି । ଏହି ନାଁକୁ ନେଇ ପରିବାରର ସମସ୍ତେ ଲୋକେ ଖୁସିଥିବା ରହିଥିବା ନର୍ସମାନେ ସୂଚନା ଦେଇଛନ୍ତି।

ଏହି ଗୋଟିଏ ଘଟଣା ନୁହେଁ କ୍ୟାପିଟାଲ ହସ୍ପିଟାଲରେ ଜନ୍ମ ନେଇଥିବା ଅନ୍ୟ ୧୦ ପିଲାଙ୍କ ନାଁ ପରିବାର ଲୋକେ ‘ୟସ୍’ ରଖୁଥିବା ଜଣାପଡ଼ିଛି। କାରଣ ପୁଅ ହେଉ କି ଝିଅ ‘ୟସ୍’ ନାଁଟି ସମସ୍ତଙ୍କୁ ସୁହାଉଛି। ତେଣୁ ଅଧିକାଂଶ ବାପା, ମା’ ଓ ପରିବାରଲୋକେ ବାତ୍ୟାରେ ଜନ୍ମ ହେଉଥିବାରୁ ସ୍ମୃତିକୁ ମନେ ରଖୁବା ପାଇଁ ‘ୟସ୍’ ନାମକରଣ କରିବାକୁ ଚାହୁଁଥିବା କ୍ୟାପିଟାଲ ହସ୍ପିଟାଲର ସୂତ୍ରରୁ ସୂଚନା ମିଳିଛି। ସେହିପରି ରାଜଧାନୀର ଘରୋଇ ନସିଂହୋମ ଓ ବେସରକାରୀ ହସ୍ପିଟାଲରେ ଜନ୍ମ ନେଇଥିବା ନବଜାତକଙ୍କ ନାଁର ବାତ୍ୟା ନାଁରେ ନାମକରଣ କରାଯାଇଥିବା ଜଣାପଡ଼ିଛି ।

ଭୁବନେଶ୍ୱର: ଆଗୁଆ ଆସିବ ଦକ୍ଷିଣପଶ୍ଚିମ ମୌସୁମୀ ବାୟୁ । ୨୧ ତାରିଖ ସୁଦ୍ଧା ଦକ୍ଷିଣ ଆଣ୍ଡାମାନ ସାଗର ଓ ଦକ୍ଷିଣପୂର୍ବ ବଙ୍ଗୋପସାଗରରେ ଦକ୍ଷିଣପଶ୍ଚିମ ମୌସୁମୀ ଆସିପାରେ । ଅନ୍ୟପଟେ ଉତ୍ତର ଆଣ୍ଡାମାନ ସାଗର ଓ ତତସଂଲଗ୍ନ ଉତ୍ତରକେନ୍ଦ୍ରୀୟ ବଙ୍ଗୋପସାଗରରେ ୨୨ ସୁଦ୍ଧା ଲଘୁଚାପ କ୍ଷେତ୍ର ସୃଷ୍ଟି ହେବାର ଆଶଙ୍କା ରହିଛି । ଏହା ପରବର୍ତ୍ତୀ ୭୨ ଘଣ୍ଟାରେ ସାମୁଦ୍ରିକ ଝଡ଼ରେ ପରିଣତ ହୋଇ ଉତ୍ତରପଶ୍ଚିମ ଦିଗକୁ ଗତି କରି ୨୬ ତାରିଖ ସନ୍ଧ୍ୟାରେ ଓଡ଼ିଶା-ପଶ୍ଚିମବଙ୍ଗ ଉପକୂଳ ଅତିକ୍ରମ କରିବ ।

ଏହାର ପ୍ରଭାବରେ ଉପକୂଳ ଓଡ଼ିଶାରେ ୨୫ ତାରିଖ ସନ୍ଧ୍ୟାରୁ ବର୍ଷାର ପରିମାଣ ବୃଦ୍ଧି ପାଇବ । ୨୩ ତାରିଖରେ ପବନର ବେଗ ଘଣ୍ଟାପ୍ରତି ୪୫ରୁ ୫୫ କିଲୋମିଟର ରହିପାରେ । ୨୪ରୁ ୨୬ ତାରିଖ ଯାଏଁ ପବନର ବେଗ ଘଣ୍ଟାପ୍ରତି ୫୦ରୁ ୬୦ କିଲୋମିଟର ରହିବ ।

ଆଣ୍ଡାମାନ ସାଗର ଓ ତତସଂଲଗ୍ନ ବଙ୍ଗୋପସାଗର ୨୩ ତାରିଖରୁ ଅଶାନ୍ତ ରହିବ । ଫଳରେ ୨୭ ତାରିଖ ଯାଏଁ ମତ୍ସ୍ୟଜୀବୀଙ୍କୁ ସମୁଦ୍ର ବାରଣ କରାଯାଇଛି । ଯେଉଁମାନେ ଗଭୀର ସମୁଦ୍ରକୁ ଯାଇଛନ୍ତି ୨୩ ତାରିଖ ସୁଦ୍ଧା ଫେରି ଆସିବାକୁ ପାଣିପାଗ ବିଭାଗ ପକ୍ଷରୁ କୁହାଯାଇଛି । ବାତ୍ୟା ସୁନ୍ଦରବନରେ ଲ୍ୟାଣ୍ଡଫଲ୍ କରିବା ନେଇ ଅନୁମାନ କରାଯାଉଛି ।

ବଲିଉଡ୍‌ରେ ତାଙ୍କ ସ୍ବତନ୍ତ୍ର ନୃତ୍ୟ ଶୈଳୀ ପାଇଁ ଚର୍ଚ୍ଚାରେ ରହିଥିବା ଅଭିନେତ୍ରୀ ନୋରା ଫତେହିଙ୍କୁ ନେଇ ଏକ ନୂଆ ଖବର ପ୍ରକାଶ ପାଇଛି। ନୋରାଙ୍କ ହାତରେ ଏବେ ଏକ ବଡ଼ ପ୍ରୋଜକ୍ଟ ରହିଛି | ନୋରା ଏହି ପ୍ରୋଜେକ୍ଟ ହାତକୁ ନେଇ ଟେଲିଭିଜନରୁ ବଲିଉଡ୍‌ରେ ପାଦ ଦେଇଥିବା ଅଭିନେତ୍ରୀ ମୌନି ରାୟଙ୍କୁ ପଛରେ ପକାଇ ଦେଇଛନ୍ତି ।

ନୋରା ‘କେଜିଏଫ୍-୨’ରେ ଏକ ଆଇଟମ୍ ଗୀତରେ ନଜର ଆସିବେ । ଏହି ଗୀତରେ ଚୋରା ଓ ୟଶ୍ ରୋମାନ୍ସ କରୁଥିବାର ନଜର ଆସିବେ। ଅବଶ୍ୟ ‘କେଜିଏଫ୍ ୨’ପକ୍ଷରୁ ଏସମ୍ପର୍କିତ କୌଣସି ବିଧିବଦ୍ଧ ଘୋଷଣା କରାଯାଇ ନାହିଁ । ନାରା ୧୯୭୫ର ସୁପରହିଟ୍ ଫିଲ୍ମ ‘ସୋଲେ’ର ଲୋକପ୍ରିୟ ଗୀତ ‘ମେହବୁବା’ର ନୂଆ ସଂସ୍କରଣରେ ‘କେଜିଏଫ୍-୨’ରେ ନାଚୁଥିବାର ଦେଖାଯିବେ ।

ଏହାପୂର୍ବରୁ ‘କେଜିଏଫ୍-୧’ରେ ମୌନି ରାୟ କରିଥିବା ଆଇଟମ୍ ଗୀତ ‘ଗଲି ଗଲି’ ଗୀତ ଦର୍ଶକଙ୍କୁ ବେଶ୍ ଆକୃଷ୍ଟ କରିଥିଲା । ଜୁଲାଇ ୧୬ ତାରଖରେ କେଜିଏଫ୍-୨ ମୁକ୍ତିଲାଭ କରିବ ।