ବାଲେଶ୍ବର: ଅଧ୍ୟାପକଙ୍କ ଦୁର୍ବ୍ୟବହାର ଅଭିଯୋଗରେ ଛାତ୍ରୀଙ୍କ ଜୀବନ ହାରିବା ଉଦ୍ୟମ। ଫକୀର ମୋହନ ସ୍ଵୟଂ ଶାସିତ ମହା ବିଦ୍ୟାଳୟରେ ଜଣେ ଛାତ୍ରୀ ପେଟ୍ରୋଲ ଢାଳି ଆତ୍ମହତ୍ୟା ଉଦ୍ୟମ କରିଥିବା ଜଣାପଡ଼ିଛି। ଆଜି ଛାତ୍ରୀ ଜଣକ ଜଣେ ଅଧ୍ୟାପକଙ୍କ ନାଁରେ ଦୁର୍ବ୍ୟବହାର ଅଭିଯୋଗ ନେଇ କଲେଜ ସମ୍ମୁଖରେ ଧାରଣାରେ ବସିଥିଲେ। ତେବେ ହଠାତ ନିଜ ଦେହରେ ନିଆଁ ଲଗାଇ ଆତ୍ମହତ୍ୟା ଉଦ୍ୟମ କରିଥିଲେ। ତେବେ ସ୍ଥାନୀୟ ଛାତ୍ରଛାତ୍ରୀ ତୁରନ୍ତ ଛାତ୍ରୀ ଜଣଙ୍କୁ ଉଦ୍ଧାରକରି ବାଲେଶ୍ଵର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ତାଙ୍କ ସ୍ବାସ୍ଥ୍ୟ ଅବସ୍ଥା ବିିଗିଡ଼ିବାରୁ ଭୁବନେଶ୍ୱର ସ୍ଥାନାନ୍ତର କରାଯାଇଥିବା ଜଣାପଡ଼ିଛି।

ଜଳେଶ୍ଵର/ କଟକ/ ସୁନ୍ଦରଗଡ଼: ରାଜ୍ୟରେ ଆଜି ପୃଥକ ପୃଥକ ଜିଲ୍ଲାରୁ ୩ ଛାତ୍ରୀଙ୍କ ଆତ୍ମହତ୍ୟା ଘଟଣା ସାମ୍ନାକୁ ଆସିଛି। ବାଳେଶ୍ବର ଜିଲ୍ଲାରେ ଜଣେ ୭ମ ଶ୍ରେଣୀ ଛାତ୍ରୀ, କଟକ ଜିଲ୍ଲାରୁ ଜଣେ ୧୦ମ ଶ୍ରେଣୀ ଓ ସୁନ୍ଦରଗଡ଼ ଜିଲ୍ଲାରୁ ଜଣେ ୯ମ ଶ୍ରଣାୀ ଛାତ୍ରୀ ଆତ୍ମହତ୍ୟା କରିଥିବା ଖବର ଜଣାପଡ଼ିଛି।

ଖବର ଅନୁଯାୟୀ, ବାଲେଶ୍ବର ଜିଲ୍ଲା ଗମ୍ଭାରିଆ ପଞ୍ଚାନନ ଏମଇ.ସ୍କୁଲର ସପ୍ତମ ଶ୍ରେଣୀର ଛାତ୍ରୀ ଘରକୁ ଖାଇବାକୁ ଆସି ଘର ଆଗରେ ଥିବା ଗଛରେ ରଶି ଲଗାଇ ଆତ୍ମହତ୍ୟା କରିଥିବା ଅଭିଯୋଗ ହେଇଛି । ମୃତ ନାବାଳିକା ହେଲେ ଗମ୍ଭାରିଆ ଗାଁର ଗୈରହରୀ ସେନାପତିଙ୍କ ଝିଅ ରାଜଶ୍ରୀ ସେନାପତି। ସ୍କୁଲରେ କୌଣସି ଅପ୍ରୀତିକର ପରିସ୍ଥିତି ଘଟିଥିବାରୁ ମାନସିକ ଭାରସାମ୍ୟ ହରାଇ ଆତ୍ମହତ୍ୟା କରିଥିବା ଛାତ୍ରୀଙ୍କ ବାପା ଅଭିଯୋଗ କରିଛନ୍ତି।

ସେହିପରି କଟକ ରେଭେନ୍ସା ବାଳିକା ଉଚ୍ଚ ବିଦ୍ୟାଳୟର ଜଣେ ଦଶମ ଶ୍ରେଣୀ ଛାତ୍ରୀଙ୍କ ଆତ୍ମହତ୍ୟା ଅଭିଯୋଗ ହୋଇଛି। ହଷ୍ଟେଲରେ ଛାତ୍ରୀ ଜଣକ ଆତ୍ମହତ୍ୟା କରିଥିବା ଜଣାପଡ଼ିଛି। ଉକ୍ତ ଛାତ୍ରୀଙ୍କ ଘର ଢେଙ୍କାନାଳରେ ବୋଲି ସୂଚନା ।

ସେହିପରି, ଝାରସୁଗୁଡ଼ା ଜିଲ୍ଲା ହେମଗିରି ଥାନା ଅନ୍ତର୍ଗତ ତୁମୁଲିଆ ମାଣିକେଶ୍ବରୀ ହାଇସ୍କୁଲର ଜଣେ ଛତ୍ରୀ ଆତ୍ମହତ୍ଯା କରିଥିବା ଅଭିଯୋଗ ହୋଇଛି। ସ୍କୁଲ ହଷ୍ଟେଲରେ ଉକ୍ତ ନବମ ଶ୍ରେଣୀ ଛାତ୍ରୀ ଆତ୍ମହତ୍ୟା କରିଥିବା ଜଣାପଡ଼ିଛି। ସେ ହଷ୍ଟେଲ ରୁମ ପଙ୍ଖାରେ ରଶି ଲଗାଇ ଆତ୍ମହତ୍ୟା କରିଥିବା ସୂଚନା।

ଖବର ଅନୁଯାୟୀ, ସ୍କୁଲରେ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ଫେରୱେଲ ବୈଠକ ଚାଲିଥିବାବେଳେ ଅଧାରୁ ଉଠିଯାଇଥିଲେ ଉକ୍ତ ଛାତ୍ରୀ ଜଣଙ୍କ। ପରେ ତାଙ୍କର ମୃତଦେହ ହଷ୍ଟେଲରୁ ଝୁଲନ୍ତା ଅବସ୍ଥାରେ ମିଳିଥିଲା।
ହଷ୍ଟେଲ ରୁମରୁ ସୁଇସାଇଡ଼ ନୋଟ ମିଳିଥିବା ସୂଚନା ।