ବାଲୁଗାଁ/ବାଣପୁର : ରାଜ୍ୟରେ ବାରମ୍ବାର ନୂଆ ନୂଆ ଉପାୟରେ ଲୋକଙ୍କୁ ଠକି ସର୍ବସ୍ବାନ୍ତ କରିଚାଲିଛନ୍ତି ସାଇବର ଲୁଟେରାମାନେ। ଏହି ପରିପ୍ରେକ୍ଷୀରେ ଖୋର୍ଦ୍ଧା ଜିଲ୍ଲାର ବାଣପୁର ଅଞ୍ଚଳର ଜଣେ ଯୁବକଙ୍କୁ ବିଦେଶରେ ଚାକିରି କରାଇ ଦେବେ ନେଇ ବିଭିନ୍ନ ବାହାନା କରି ତିନୋଟି କିସ୍ତିରେ ଆକାଉଣ୍ଟରୁ ୬୧ ହଜାରରୁ ଉର୍ଦ୍ଧ୍ଵ ଟଙ୍କା ଠକି ନେଲେ ସାଇବର ଲୁଟେରା। ଅପରପକ୍ଷରେ ବିଦେଶରେ ଚାକିରୀ ପାଇବା ଖୁସିରେ ନିଜର ବର୍ତ୍ତମାନ ଚାକିରୀ ଛାଡିଦେଇ ଯୁବକ ଏବେ ସାଇବର ଲୁଟରାଙ୍କ ଶିକାର ହୋଇଥିବାର ଜାଣିବାକୁ ପାଇ ତାଙ୍କ ପାଦ ତଳୁ ମାଟି ଖସିପଡିଛି ।

ସୁଚନା ମୁତାବକ ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ମଙ୍ଗଳପୁର ଗ୍ରାମର ଅନୀଲ କୁମାର ମାଝୀ (୨୮) ମୁମ୍ବାଇରେ ଅବସ୍ଥିତ ଟାଟା କମ୍ପାନୀରେ ସିଭିଲ ଇଞ୍ଜିନିଅର ଭାବେ କାର୍ଯ୍ୟରତ ଥିଲେ। ଗତ ଜୁନ ମାସ ୧୫ ତାରିଖରେ ‘ଅଲ ସଫର ଷ୍ଟିଲ ଇଞ୍ଜିନିଅରିଙ୍ଗ ଲିମିଟେଡ଼’ ନାମକ ଦୁବାଇ ସ୍ଥିତ ଏକ କମ୍ପାନୀରେ ଚାକିରି ନିମନ୍ତେ ଅଫର ଲେଟର ଅନୀଲଙ୍କ ପାଖକୁ ତାଙ୍କ ଇ-ମେଲରେ ଆସିଥିଲା। ଉକ୍ତ ଇ-ମେଲରେ ଦୁବାଇରେ ଚାକିରିର ଅଫର ଲେଟର ପାଇ ଅନୀଲ ଖୁସି ହୋଇ ସେଥିରେ ଦିଆଯାଇଥିବା କମ୍ପାନୀର ଜଣେ ଅଧିକାରୀଙ୍କ ମୋବାଇଲ ନମ୍ବରରେ ଯୋଗାଯୋଗ କରିଥିଲେ । ଟେଲିଫୋନ ମାଧ୍ୟମରେ ଅନୀଲ ସେ କମ୍ପାନୀରେ ଚାକିରି ପାଇଁ ଏକ ସାକ୍ଷାତକାର ମଧ୍ୟ ଦେଇଥିଲେ। ଜୁନ ୧୮ ତାରିଖରେ ଅନୀଲ ପ୍ରୋସେସିଙ୍ଗ ଫିସ ବାବଦକୁ ୧୦ ହଜାର ଟଙ୍କା ଡିପୋଜିଟ କରିବା ନିମନ୍ତେ ଏକ ମେଲ ପାଇ ନୂଆ ଦିଲ୍ଲୀର ଏକ ଷ୍ଟେଟ ବ୍ୟାଙ୍କ ଆକଉଣ୍ଟକୁ ନିଜ ଗୁଗୁଲ ପେ ମାଧ୍ୟମରେ ୧୦ହଜାର ଟଙ୍କା ପଠାଇଥିଲେ। ପୁଣିଥରେ ଜୁନ ୨୨ ତାରିଖରେ ଏକ ନକଲି ଭିସା ଅନିଲଙ୍କ ପାଖକୁ ମେଲରେ ପଠାଇ ୨୫ହଜାର ଟଙ୍କା ଡିପୋଜିଟ କରିବାକୁ ମେଲରେ ଲେଖିଥିଲା ସାଇବର ଲୁଟେରା। ଭିସା ପାଇ ଅନୀଲ ଖୁସି ହୋଇ ୨୫ହଜାର ଟଙ୍କା ଏବଂ ପୁଣିଥରେ ବିମାନ ଟିକେଟ ଓ ଅନ୍ୟାନ୍ୟ ଗସ୍ତ ଖର୍ଚ୍ଚ ବାବଦକୁ ୨୬ହଜାର ଟଙ୍କା ଉକ୍ତ ଆକାଉଣ୍ଟକୁ ପଠେଇଥିଲେ। ଏହିଭଳି ନିଜ ଗୁଗୁଲ ପେ ମାଧ୍ୟମରେ ୬୧ ହଜାରରୁ ଉର୍ଦ୍ଧ ଟଙ୍କା ସମ୍ପୃକ୍ତ ଆକାଉଣ୍ଟକୁ ଅନୀଲ ପଠାଇ ସାରିଛନ୍ତି। ପୁଣି ବାରମ୍ବାର ଉକ୍ତ କମ୍ପାନୀ ଅଧିକାରୀ ବିଭିନ୍ନ ବାହାନାରେ ଟଙ୍କା ମାଗିବାରୁ ଅନୀଲ ସନ୍ଦେହ କରି ଉକ୍ତ କମ୍ପାନୀର ୱେବସାଇଟ ଓ ବିଭିନ୍ନ ମାଧ୍ୟମରେ ଯାଞ୍ଚ କରି ସେହିଭଳି କୌଣସି କମ୍ପାନୀ ନ ଥିବାର ଜାଣିବାକୁ ପାଇଲେ । ସେ ଜାଣିଗଲେ ଯେ ସେ ଏକ ସାଇବର ଲୁଟେରାର ଶିକାର ହୋଇଛନ୍ତି ।

ବିଦେଶରେ ଚାକିରୀ ଲୋଭରେ ନିଜ ଟଙ୍କା ହରାଇବା ସହ ନିଜେ ଚାକିରି କରିଥିବା ମୁମ୍ବାଇର ଟାଟା କମ୍ପାନୀରୁ ମଧ୍ୟ ଇସ୍ତଫା ଦେଇ ପଳାଇ ଆସି ବର୍ତ୍ତମାନ ଅନୀଲ ଘରେ ବସି ଦୁଃଖରେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି। ଶେଷରେ ଅନୀଲ ଏ ନେଇ କଟକ ସାଇବର ସେଲ ଓ ବାଣପୁର ଥାନାରେ ଏକ ଲିଖିତ ଅଭିଯୋଗ କରିବା ସହ ବାଲୁଗାଁ ଏସଡ଼ିପିଓଙ୍କ ନିକଟରେ ଅଭିଯୋଗ କରିଛନ୍ତି।

ସାଇବର ଅପରାଧୀମାନେ ଏବେ ବେଶ୍‍ ସକ୍ରିୟ ହୋଇ ଉଠିଛନ୍ତି। ଗତ କିଛି ଦିନ ହେବ ସାଇବର ଅପରାଧ ସଂଖ୍ୟା ବଢ଼ିବାରେ ଲାଗିଛି। କରୋନା ମହାମାରୀ ସମୟରେ ସରକାରୀ ଓ ଘରୋଇ କମ୍ପାନୀ ଗୁଡିକର କର୍ମଚାରୀ ଘରେ ରହି ଅନ୍‍ଲାଇନ୍‍ରେ କାର୍ଯ୍ୟ କରୁଛନ୍ତି। ଏହାର ସୁଯୋଗ ଉଠାଇ ସାଇବର ଅପରାଧୀମାନେ ବ୍ୟାଙ୍କ କର୍ମଚାରୀଙ୍କ ପରିଚୟ ଦେବା ସହ ଆକାଉଣ୍ଟ ସଂକ୍ରାନ୍ତୀୟ ବିଭିନ୍ନ ଆଳ ଦେଖାଇ ଟଙ୍କା ଠକି ନେଉଛନ୍ତି। ଏ ନେଇ ବିଭିନ୍ନ ଥାନାରେ ଅଭିଯୋଗର ଫର୍ଦ୍ଦ ବଢ଼ିବା ପରେ ଏଥିପ୍ରତି ସତର୍କ ରହିବାକୁ ଡିସିପି ପ୍ରତୀକ ସିଂହ ପରାମର୍ଶ ଦେଇଛନ୍ତି।

ଦେଢ ବର୍ଷ ହେବ କରୋନା ମହାମାରୀ ପୂରା ବିଶ୍ୱକୁ କବଳିତ କରିଛି। ଏହି ସମୟ ମଧ୍ୟରେ ଏକାସାଙ୍ଗେ ଜୀବନ ଓ ଜୀବିକା ରକ୍ଷା କରିବା ଉପରେ ଗୁରୁତ୍ୱ ଦିଆଯାଉଛି। ସଂକ୍ରମଣ ନିୟନ୍ତ୍ରଣକୁ ଆଣିବା ଲାଗି ସରକାରଙ୍କ ପକ୍ଷରୁ ଲକ୍‍ଡାଉନ୍‍ ଓ ସଟଡାଉନ୍‍ କରାଯାଉଛି। ଏପରି ସମୟରେ ବହୁ ଘରୋଇ ଓ ସରକାରୀ ସଂସ୍ଥାର କର୍ମଚାରୀମାନେ ଘରେ ରହି ଅନ୍‍ଲାଇନ୍‍ରେ କାର୍ଯ୍ୟ କରୁଛନ୍ତି। ସାଇବର ଅବରାଧୀମାନେ ଏହାର ସୁଯୋଗ ଉଠାଉଛନ୍ତି। ସେମାନେ ନିଜକୁ ବ୍ୟାଙ୍କ, ସେବି,ଆଇଆରଡିଏ ଓ ସରକାରୀ ଅଫିସର ଭାବେ ପରିଚୟ ଦେଇ ଲୋକମାନଙ୍କୁ ଫୋନ୍‍ କରୁଛନ୍ତି। ଆକାଉଣ୍ଟ ଓ ଜମାରାଶୀ ସଂକ୍ରାନ୍ତୀୟ ସମସ୍ତ ତଥ୍ୟ ପ୍ରଦାନ କରି ଲୋକଙ୍କୁ ଭ୍ରମିତ କରୁଛନ୍ତି। ଏଥିସହ ଆଇଆରଡିଏର ବିଭିନ୍ନ ପଲିସି ସଂକ୍ରାନ୍ତରେ କହି ଲକ୍ଷାଧିକ ଟଙ୍କାର ଫାଇଦା ଉଠାଇବାକୁ ପରାମର୍ଶ ଦେଉଛନ୍ତି। ସେମାନେ ଏପରି ପ୍ରଲୋଭିତ କରି ନିଜ ଜାଲରେ ଫସାଇବା ପରେ ଏଟିଏମ୍‍ ନମ୍ବର ଓ ଓଟିପି ହାସଲ କରି ଆକାଉଣ୍ଟରୁ ଟଙ୍କା ଗାୟବ କରି ନେଉଛନ୍ତି। ଗତ ମାସକ ମଧ୍ୟରେ କଟକ ସହରାଞ୍ଚଳରେ ଏହିପରି ୧୦ରୁ ଅଧିକ ଅପରାଧିକ ମାମଲା ରୁଜୁ ହୋଇଛି। ଜନସାଧାରଣ ସାଇବର ଅପରାଧୀଙ୍କ ଜାଲରେ ଫସି ଲକ୍ଷାଧିକ ଟଙ୍କା ହରାଇଛନ୍ତି। ଗୁରୁତ୍ୱପୂର୍ଣ୍ଣ କଥା ହେଉଛି ଠକାମିର ଶିକାର ହୋଇଥିବା ବହୁ ଲୋକେ ଲକ୍‍ଡାଉନ୍‍ ସମୟରେ ଘରେ ରହି କାମ କରୁଥିବା ପୁଲିସ ତଦନ୍ତ ବେଳେ ଜାଣିବାକୁ ପାଇଛି।

ଏପରିକି ସାଇବର ଅପରାଧୀମାନେ ସେନା କର୍ମଚାରୀଙ୍କ ପରିଚୟ ଦେଇ ଟଙ୍କା ଠକୁଥିବା ଦେଖିବାକୁ ମିଳିଛି। ଅପରାଧୀମାନେ ସେକେଣ୍ଡ ହ୍ୟାଣ୍ଡ ବାଇକ୍‍ ଓ କାର କମ୍‍ ଦରରେ ବିକିବା ପାଇଁ ବିଜ୍ଞାପନ ଦେଉଛନ୍ତି। ସେମାନେ ସେନା ଅଧିକାରୀଙ୍କ ନାମରେ ନକଲି ଆଇଡି ଓ ଫଟୋ ଉକ୍ତ ବିଜ୍ଞାପନରେ ଦର୍ଶାଉଛନ୍ତି। ସେନା କର୍ମଚାରୀଙ୍କ ଗାଡି ହୋଇଥିବା ଭାବି ବହୁ ଲୋକେ ଏହାକୁ କିଣିବା ଲାଗି ଆଗ୍ରହ ପ୍ରକାଶ କରୁଛନ୍ତି। ଅପରାଧୀମାନେ ଏହାର ସୁଯୋଗ ଉଠାଇ ଏକାଧିକ ବ୍ୟକ୍ତିଙ୍କ ଠାରୁ ଅନଲାଇନ୍‍ ପେମେଣ୍ଟ ଯୋଗେ ଅଗ୍ରିମ ଟଙ୍କା ଠକି ନେଉଛନ୍ତି। ବହୁ ଲୋକଙ୍କଠାରୁ ଲକ୍ଷାଧିକ ଟଙ୍କା ଠକି ନେବା ପରେ ଉକ୍ତ ବିଜ୍ଞାପନ ଆଇଡିକୁ ବନ୍ଦ କରି ଦେଉଛନ୍ତି। ଏପରି ଭାବେ କଟକ ଓ ଭୁବନେଶ୍ୱର ଅଞ୍ଚଳରେ ବହୁ ଲୋକେ ଠକାମିର ଶିକାର ହୋଇ ସାରିଲେଣି। ଏ ନେଇ ସେମାନେ ଥାନାରେ ଅଭିଯୋଗ କରିଥିଲେ ମଧ୍ୟ ସାଇବର ଅପରାଧୀଙ୍କୁ ଧରିବା ସହଜ ହେଉନାହିଁ। ତେବେ ଉତ୍ତରପ୍ରଦେଶ, ଦିଲ୍ଲୀ, ଓ ଛତିଶଗଡ ଅଞ୍ଚଳରୁ ଏହି ଅପରାଧର ଅପରେଟ୍‍ ହେଉଥିବା ପୁୁଲିସ ଜାଣିବାକୁ ପାଇଛି। ମାତ୍ର ଏହି ଗ୍ୟାଙ୍ଗ ସଂକ୍ରାନ୍ତରେ କୌଣସି ସ୍ପଷ୍ଟ ସୂଚନା ମିଳିପାରିନାହିଁ। ଏପରି ସାଇବର ଅପରାଧୀଙ୍କ କବଳରୁ ନିଜକୁ ସୁରକ୍ଷିତ ରଖିବା ଲାଗି କମିସନରେଟ ପୁଲିସ ପକ୍ଷରୁ ସତର୍କ ସୂଚନା ଜାରି କରାଯାଇଛି। କୌଣସି ବିଜ୍ଞପନ କିମ୍ବା ଫୋନ୍‍ କଲ ଆସିଲେ ବ୍ୟାଙ୍କ ଆକାଉଣ୍ଟ ସଂକ୍ରାନ୍ତୀୟ ସବିଶେଷ ତଥ୍ୟ ବିଶେଷ କରି ଓଟିପି ପ୍ରଦାନ ନକରିବା ଲଗି ସଚେତନ କରାଯାଇଛି। ଜନସାଧାରଣ ସଚେତନ ରହିଲେ ସାଇବର ଅପରାଧ ଘଟିବ ନାହିଁ ବୋଲି ଡିସିପି ଶ୍ରୀ ସିଂହ କହିଛନ୍ତି।