ନୂଆଦିଲ୍ଲୀ: ଦିଲ୍ଲୀରେ ଆତଙ୍କ । ଦିଲ୍ଲୀର ଦୁଇଟି ପ୍ରମୁଖ ସେନା ସ୍କୁଲକୁ ବୋମା ଧମକ । ସୋମବାର ସକାଳେ ଇମେଲ ଯୋଗେ ଦିଲ୍ଲୀର ଧୌଲା କୁଆଁସ୍ଥିତ ଆର୍ମି ପବ୍ଲିକ୍ ସ୍କୁଲ ଏବଂ ଲୋଧି ରୋଡ୍ ବାୟୁସେନା ବାଲ ଭାରତୀ ସ୍କୁଲକୁ ବୋମା ଧମକ ମିଳିବା ପରେ ରାଜଧାନୀରେ ପୁଣିଥରେ ଆତଙ୍କ ଖେଳିଯାଇଛି। ଏହି ଖବର ପାଇବା ମାତ୍ରେ ପୋଲିସ ଏବଂ ସୁରକ୍ଷା ଏଜେନ୍ସି ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।

ଧମକ ମିଳିବା ପରେ ତୁରନ୍ତ ସ୍କୁଲ ପରିସରକୁ ଖାଲି କରାଯାଇଥିଲା। ଘଟଣାସ୍ଥଳରେ ଦିଲ୍ଲୀ ପୋଲିସ, ବୋମା ନିଷ୍କ୍ରିୟକାରୀ ଦଳ, ଡଗ୍ ସ୍କ୍ୱାଡ୍ ଏବଂ ଅଗ୍ନିଶମ ବାହିନୀ ପହଞ୍ଚି ବ୍ୟାପକ ତଲାସି ଅଭିଯାନ ଚଳାଇଛନ୍ତି। ଜଣେ ବରିଷ୍ଠ ପୋଲିସ ଅଧିକାରୀଙ୍କ ସୂଚନା ମୁତାବକ, ବର୍ତ୍ତମାନ ସୁଦ୍ଧା କୌଣସି ସନ୍ଦେହଜନକ ବସ୍ତୁ ମିଳିନାହିଁ। ତଥାପି ସୁରକ୍ଷା ଦୃଷ୍ଟିରୁ ସମସ୍ତ ପ୍ରକାର ସତର୍କତା ଅବଲମ୍ବନ କରାଯାଉଛି।

ସ୍କୁଲ ପ୍ରଶାସନ ପକ୍ଷରୁ ସୂଚନା ମିଳିବା ପରେ ଦିଲ୍ଲୀ ପୋଲିସର ସାଇବର ସେଲ୍‌କୁ ମଧ୍ୟ କାର୍ଯ୍ୟରେ ଲଗାଯାଇଛି। କେଉଁଠାରୁ ଏବଂ କିଏ ଏହି ଇମେଲ ପଠାଇଛି, ତାହାର ଯାଞ୍ଚ କରାଯାଉଛି। ପୋଲିସ ଏହା ମଧ୍ୟ ଯାଞ୍ଚ କରୁଛି ଯେ ଅନ୍ୟ କୌଣସି ଶିକ୍ଷାନୁଷ୍ଠାନକୁ ଏଭଳି ଧମକ ଆସିଛି କି ନାହିଁ।

ଗତ କିଛି ଦିନ ହେବ ଦିଲ୍ଲୀ-ଏନସିଆର ଅଞ୍ଚଳରେ ସ୍କୁଲଗୁଡିକୁ ବୋମା ଧମକ ମିଳିବା ଘଟଣା ବୃଦ୍ଧି ପାଇଛି। ଗତ ଗୁରୁବାର ଦିନ ରୋହିଣୀର CRPF Public School, ଦ୍ୱାରକାର St. Thomas School ଏବଂ ପଶ୍ଚିମ ବିହାରର DAV Centenary Public School କୁ ମଧ୍ୟ ସମାନ ଧରଣର ଧମକ ମିଳିଥିଲା, ଯାହା ପରେ ମିଥ୍ୟା ବୋଲି ପ୍ରମାଣିତ ହୋଇଥିଲା। ଗତ ବର୍ଷ ଏଭଳି ପ୍ରାୟ ୫୦୦ଟି ମାମଲା ସାମ୍ନାକୁ ଆସିଥିଲା। ପୋଲିସ ଅଭିଭାବକମାନଙ୍କୁ ଭୟଭୀତ ନହେବାକୁ ଏବଂ ଶାନ୍ତି ବଜାୟ ରଖିବାକୁ ପରାମର୍ଶ ଦେଇଛି।

ଭୁବନେଶ୍ବର : ସେଲ୍‌…ସେଲ୍‌…ସେଲ୍‌…. ଆପଣ ବଜାରକୁ ଯିବା ସମୟରେ ବିଭିନ୍ନ ଦୋକାନ ସାମ୍ନାରେ ହେଉ କିମ୍ବା ଅନ୍‌ଲାଇନରେ କୌଣସି ଇ-କମର୍ସ ପ୍ଲାଟ୍‌ଫର୍ମରେ ଏହା ଲେଖାଥିବା ଦେଖିଥିବେ। ଲୋକଙ୍କୁ ବିଭିନ୍ନ ସାମଗ୍ରୀ କିଣିବା ପାଇଁ ଇ-କମର୍ସ କମ୍ପାନୀ ଓ ଦୋକାନୀମାନେ ଆକର୍ଷଣୀୟ ଅଫର ଦେବା ସହ ସେଲ୍‌..ସେଲ୍‌ ଲେଖନ୍ତି। କିନ୍ତୁ ଏବେ ସୋସିଆଲ ମିଡିଆରେ ଯୁବତୀମାନଙ୍କ ଅଶ୍ଳିଳ ଭିଡିଓ ବିକ୍ରି କରିବାକୁ ଏପରି ସେଲ୍‌ ସେଲ୍‌ ଲେଖି ଯୁଜର୍ସଙ୍କୁ ଆକୃଷ୍ଠ କରୁଛନ୍ତି କିଛି ଅସାମାଜିକ ବ୍ୟକ୍ତି। ଆଉ ତାହା ପୁଣି କୌଣସି ଆଡଲ୍ଟ ସାଇଡ୍‌ ନୁହେଁ ଫେସ୍‌ବୁକ୍‌, ଇନ୍‌ଷ୍ଟାଗ୍ରାମ ଓ ଟେଲିଗ୍ରାମ ପରି ଅଧିକ ବ୍ୟବହାର ହେଉଥିବା ସୋସିଆଲ ଆପ୍‌ରେ ଏହା ହେଉଛି।

ଫେସବୁକ୍‌, ୟୁ-ଟ୍ୟୁବ ଠାରୁ ଆରମ୍ଭ କରି ଇନଷ୍ଟାଗ୍ରାମ ଏବେ ଆମ ଦୈନଦିନ ଜୀବନର ଏକ ଅଂଶ ହୋଇଯାଇଛି। ହେଲେ ବିଡମ୍ବନାର ବିଷୟ ହେଉଛି ଯେ, ଲୋକଙ୍କ ସୁବିଧା ପାଇଁ ବାହାରିଥିବା ଏହି ଟେକ୍ନୋଲୋଜି ଧିରେ ଧିରେ ବିପଦମୁଖୀ ହେବାରେ ଲାଗିଛି। ସୋସିଆଲ ମିଡିଆରେ ଏବେ ଖୋଲାଖୋଲି ବିକ୍ରି ହେବାରେ ଲାଗିଛି ମହିଳାଙ୍କ ମାନ, ସମ୍ମାନ, ଇଜ୍ଜତ। କିଛିଟା ଲାଇକ୍‌ ଆଉ ପଲୋଅର୍ସ ପାଇଁ ମହିଳାଙ୍କ ଇଜ୍ଜତକୁ ବଜାରରେ ବିକ୍ରି କରୁଛନ୍ତି ୟୁଜର୍ସ। ମହିଳାଙ୍କ ଆପତ୍ତିଜନକ ନଗ୍ନ ଭିଡିଓକୁ ସୋସିଆଲ ମିଡିଆରେ ଖୁଲମ୍ଖୁ‌ଲା ସେୟାର କରାଯାଉଛି, ଆଉ ଏହି ନଗ୍ନ ଭିଡିଓ ମୋବାଇଲ ରୁ ମୋବାଇଲ ଘୂରିବୁଲିବାର ମାଧ୍ୟମ ସାଜିଛି ଟେଲିଗ୍ରାମ ଭଳି ମେସେଜିଂ ଆପ୍‌।

ଆଉ ସବୁଠୁ ବଡ଼ କଥା ହେଉଛି ଯୁବତୀମାନଙ୍କ ଇଜ୍ଜତକୁ ସୋସିଆଲ ମିଡିଆରେ ବିକ୍ରୀ କରାଯାଉଥିଲେ ମଧ୍ୟ ସାଇବର ପୁଲିସ ଚୁପ୍‌ ରହୁଛି। ଆମ ରାଜ୍ୟ ଓଡ଼ିଶାରେ ଗତ କିଛି ଦିନ ହେବ ଯୁବତୀମାନଙ୍କର ଅଶ୍ଳିଳ ଭିଡିଓ ଭାଇରାଲ ହେବାର ଏକ ଟ୍ରେଣ୍ଡରେ ପରିଣତ ହୋଇଛି। ଆଉ ଏହାରି ମଧ୍ୟରେ କିଛି ଅସାମାଜିକ ଯୁବକ ସୋସିଆଲ ମିଡିଆରେ କିଛିଟା ଲାଇକ ଓ ଫଲୋଅର୍ସ ପାଇଁ ଏପରି କରୁଥିବା ବେଳେ ଆଉ କିିଛି ଅଶ୍ଳିଳ ଭିଡିଓ ଦେବା ପାଇଁ ଟଙ୍କା ମଧ୍ୟ ଦାବି କରୁଛନ୍ତି।

ପ୍ରଥମେ ଇନଷ୍ଟାଗ୍ରାମରେ ଏହି ଅସାମାଜିକ ଯୁବକମାନେ ଭିଡିଓ ଯୁବତୀଙ୍କ ଫଟୋ କିମ୍ବା ଭିଡିଓ ସହ ଇନଷ୍ଟା ଆଇଡି ଦେଖାଇ ଭିଡିଓ ଆସିଥିବା କହୁଛନ୍ତି। ଆଉ ଏହାପରେ କ ଭିଡିଓ ପାଇଁ ଟଙ୍କା ଦାବି କରୁଛନ୍ତି ତ ଆଉ କିଛି ଲାଇକ୍‌ ଓ ଫଲୋ ପାଇଁ କହୁଛନ୍ତି। ଏଥି ସହିତ ସେମାନଙକ ଇନଷ୍ଟାଗ୍ରାମ ବାୟୋରେ ଥିବା ଟେଲିଗ୍ରାମ୍‌ ଲିଙ୍କ୍‌କୁ ଯାଇ ଭିଡିଓ ଦେଖିବାକୁ କହୁଛନ୍ତି। ଟେଲିଗ୍ରାମ ଲିଙ୍କ୍‌କୁ ଗଲେ ସେଠାରେ ଟେରାବକ୍ସ କିମ୍ବା ଷ୍ଟ୍ରିମ୍‌ ପରି ଭିଡିଓ ଷ୍ଟ୍ରିମଙ୍ଗ ଆପ୍‌ ଖୋଲୁଛି। ଯେଉଁଠି ଭିଡିଓ ରହୁଛି। ଆଉ ଯେତେ ଲୋକ ଏହି ଭିଡିଓ ଦେଖୁଛନ୍ତି, ତାହା ମାଧ୍ୟମରେ ଏହି ଅସାମାଜିକ ବ୍ୟକ୍ତିମାନେ ଟଙ୍କା ରୋଜଗାର କରୁଛନ୍ତି। ଗତ କିଛି ଦିନ ହେବ ଏପରି ଖୁଲମଖୁଲା ଚାଲିଥିଲେ ବି ନାଁ ସାଇବର ପୁଲିସ ନାଁ କୌଣସି ସାମାଜିକ ସଙ୍ଗଠନ ଏହା ଉପରେ ଦୃଷ୍ଟି ଦେଉନାହାନ୍ତି।

ବେଧ୍‌ଡକ୍‌ ଭାବେ ଗର୍ବର ସହିତ କିଛି ଅସାମାଜିକ ଯୁବକ ଇନଷ୍ଟାଗ୍ରାମରେ ଯୁବତୀଙ୍କ ନଗ୍ନ ଭିଡିଓ ନେବା ପାଇଁ ଅନ୍ୟ ୟୁଜର୍ସମାନଙ୍କୁ ନିମନ୍ତ୍ରଣ କରୁଛନ୍ତି। ପ୍ରତିଟି ଭିଡିଓରେ ସେ ଭିନ୍ନ ଭିନ୍ନ ଯୁବତୀ ଓ ମହିଳାଙ୍କ ଫଟୋକୁ ବ୍ୟବହାର କରି ସେମାନଙ୍କ ଆପତିଜନକ ଭିଡିଓକୁ ସେୟାର କରିବା ପାଇଁ ଖୁଲମଖୁଲା ପ୍ରଚାର କରାଯାଉଛି। ତେବେ ଏଠି ପ୍ରଶ୍ନ ଉଠୁଛି ସୋସିଆଲ ମିଡିଆରେ ମହିଳାଙ୍କ ଏଭଳି ନଗ୍ନ ଭିଡିଓ ଭାଇରାଲ ହେଉଥିବା ବେଳେ କଣ କରୁଛି ରାଜ୍ୟର ପୁଲିସ ପ୍ରଶାସନ? କ’ଣ କରୁଛି ପୁଲିସ ବିଭାଗର ସାଇବର ସେଲ୍‌? ଯଦି ଆର୍ଥିକ କାରବାର ଜାଲିଆତି କରିବା ସାଇବର ଅପରାଧର ଶ୍ରେଣୀ ଭୁକ୍ତ ତେବେ ଖୁଲମଖୁଲ୍ଲା ସାମାଜିକ ଗଣମାଧ୍ୟମରେ ମହିଳାମାନଙ୍କ ଏଭଳି ଆପତ୍ତିଜନକ ଭିଡିଓ ପରିବେଷଣ କରିବା ସାଇବର ଅପରାଧ ନୁହେଁ କି?