ଭୁବନେଶ୍ୱର: ସ୍କୁଲ ପାଠ୍ୟପୁସ୍ତକରେ ବ୍ୟାପକ ତ୍ରୁଟି ବିବାଦ ଏବେ ଗମ୍ଭୀର ରୂପ ନେଇଛି। ଏହି ଘଟଣାରେ କ୍ରାଇମବ୍ରାଞ୍ଚ ଏକ ବିସ୍ତୃତ ତଦନ୍ତ ଆରମ୍ଭ କରିଛି। ଓସେପା କାର୍ଯ୍ୟାଳୟରେ କ୍ରାଇମବ୍ରାଞ୍ଚ ଜୋରଦାର ଖୋଳତାଡ଼ କରିଛି । ଶୁକ୍ରବାର ଦିନ ଡିଏସପି ନରେନ୍ଦ୍ର ବେହେରାଙ୍କ ନେତୃତ୍ୱରେ ଏକ ପାଞ୍ଚ ଜଣିଆ ଟିମ୍ ଓଡ଼ିଶା ସ୍କୁଲ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣ ବା ଓସେପା (OSEPA) କାର୍ଯ୍ୟାଳୟରେ ପହଞ୍ଚି ପାଠ୍ୟପୁସ୍ତକ ପ୍ରସ୍ତୁତି ଏବଂ ପ୍ରକାଶନ ପ୍ରକ୍ରିୟାର ଯାଞ୍ଚ ଆରମ୍ଭ କରିଛନ୍ତି। ସୂତ୍ରରୁ ପ୍ରକାଶ ଯେ, ଏହି ଟିମ୍ ଉପ-ନିର୍ଦ୍ଦେଶକଙ୍କୁ ପାଠ୍ୟପୁସ୍ତକ ପ୍ରସ୍ତୁତି ଏବଂ ଅନୁମୋଦନ ପ୍ରକ୍ରିୟା ସମ୍ପର୍କରେ ଜେରା କରିଛନ୍ତି। ସୂଚନାଯୋଗ୍ୟ ଯେ, ଚଳିତ ସପ୍ତାହ ଆରମ୍ଭରେ ପୂର୍ବତନ ଏସସିଇଆରଟି (SCERT) ନିର୍ଦ୍ଦେଶକ ମନୋଜ ପାଢ଼ୀଙ୍କ ଗିରଫଦାରୀ ପରେ ଏହି ତଦନ୍ତ କରାଯାଉଛି।

ରାଜ୍ୟ ସରକାର ସ୍ୱୀକାର କରିଛନ୍ତି ଯେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ୍ୟପୁସ୍ତକରେ ବ୍ୟାପକ ତ୍ରୁଟି ରହିଛି । ଏଥିରେ ବ୍ୟାକରଣଗତ, ତଥ୍ୟଗତ, ଐତିହାସିକ ଏବଂ ଭୌଗୋଳିକ ଅଶୁଦ୍ଧି ସାମିଲ ରହିଛି। ପୂର୍ବରୁ ଓସେପା ପକ୍ଷରୁ ଶିକ୍ଷକମାନଙ୍କ ରେଫରେନ୍ସ ପାଇଁ ଜିଲ୍ଲା ଶିକ୍ଷା ଅଧିକାରୀମାନଙ୍କୁ ଏକ ୧୨୨ ପୃଷ୍ଠା ବିଶିଷ୍ଟ ସଂଶୋଧନ ତାଲିକା ପ୍ରଦାନ କରାଯାଇଥିଲା, କିନ୍ତୁ ସେହି ତାଲିକାରେ ମଧ୍ୟ ଅନେକ ଭୁଲ ଥିବା ଅଭିଯୋଗ ହୋଇଛି।

ଜାତୀୟ ଶିକ୍ଷା ନୀତି (NEP-2020) ଅଧୀନରେ ଏହି ପାଠ୍ୟପୁସ୍ତକଗୁଡ଼ିକ ପ୍ରସ୍ତୁତ କରାଯାଇଥିଲା। ତ୍ରୁଟିପୂର୍ଣ୍ଣ ମୁଦ୍ରଣ ଏବଂ ବିତରଣ କାରଣରୁ ରାଜ୍ୟ ରାଜକୋଷର ପ୍ରାୟ ୧୭୫ କୋଟି ଟଙ୍କାର ଆର୍ଥିକ କ୍ଷତି ହୋଇଥିବା ପ୍ରାଥମିକ ତଦନ୍ତରୁ ଜଣାପଡିଛି। ଏହି ପ୍ରକ୍ରିୟାରେ ରହିଥିବା ଅବହେଳା ଓ ଦାୟିତ୍ୱହୀନତାକୁ ଚିହ୍ନଟ କରିବା ପାଇଁ କ୍ରାଇମବ୍ରାଞ୍ଚ ବିଭିନ୍ନ ଡିଜିଟାଲ୍ ରେକର୍ଡ, ଚିଠିପତ୍ର ଏବଂ କ୍ରୟ ସମ୍ବନ୍ଧୀୟ କାଗଜପତ୍ରର ଯାଞ୍ଚ କରୁଛି।

ଭୁବନେଶ୍ୱର: ପ୍ରଥମରୁ ଅଷ୍ଟମ ଶ୍ରେଣୀ ବହିରେ ରହିଛି ୧୬୭୮ଟି ତ୍ରୁଟି। ଓଡ଼ିଶାରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପ୍ରସ୍ତୁତ ହୋଇଥିବା ନୂଆ ପାଠ୍ୟପୁସ୍ତକଗୁଡ଼ିକରେ ଏପରି ବ୍ୟାପକ ତ୍ରୁଟି ଦେଖିବାକୁ ମିଳିଛି। ସୂଚନା ଅନୁଯାୟୀ, ଏହି ବହିଗୁଡ଼ିକରେ ପ୍ରାୟ ୧୬୭୮ଟି ତ୍ରୁଟି ଚିହ୍ନଟ ହୋଇଛି, ଯାହା ଶିକ୍ଷକ, ଅଭିଭାବକ ଏବଂ ଛାତ୍ରଛାତ୍ରୀଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି। 

ଅଷ୍ଟମ ଶ୍ରେଣୀ ପାଠ୍ୟପୁସ୍ତକରେ ସର୍ବାଧିକ ୭୦୫ଟି ତ୍ରୁଟି ରହିଛି। ଏଥିରେ ବନାନ ଭୁଲ, ତଥ୍ୟଗତ ତ୍ରୁଟି, ବିଶିଷ୍ଟ ବ୍ୟକ୍ତିଙ୍କ ଭୁଲ ନାମ ଏବଂ ଭୁଲ ଫଟୋଗ୍ରାଫ୍ ଆଦି ସାମିଲ ରହିଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଓଡ଼ିଶା ବିଧାନସଭା ବଦଳରେ କର୍ଣ୍ଣାଟକ ବିଧାନସଭାର ଫଟୋ ଦିଆଯାଇଛି। ସେହିପରି ଅନ୍ୟ ଏକ ସ୍ଥାନରେ ଓଡିଶାର ନିୟମଗିରି ପାହାଡ଼କୁ ଝାଡ଼ଖଣ୍ଡରେ ଥିବା ଦର୍ଶାଯାଇଛି। ଏପରିକି ବ୍ରହ୍ମପୁର ଗଞ୍ଜାମ ଜିଲ୍ଲାର ଏକ ସହର ହୋଇଥିବା ବେଳେ ବହିରେ ଗଞ୍ଜାମ ଜିଲ୍ଲାକୁ ବ୍ରହ୍ମପୁର ଜିଲ୍ଲା ଭାବରେ ଉଲ୍ଲେଖ କରାଯାଇଛି।

ଜାତୀୟ ଶିକ୍ଷାନୀତି ୨୦୨୦କୁ ଆଧାର କରି ପ୍ରସ୍ତୁତ ହୋଇଛି ନୂଆ ପାଠ୍ୟକ୍ରମ । ପ୍ରଥମରୁ ଅଷ୍ଟମ ଶ୍ରେଣୀ ପାଠ୍ୟପୁସ୍ତକ ପରିବର୍ତ୍ତନ ହୋଇଛି । ଏପରିକି ସ୍କୁଲରେ ପିଲାଙ୍କୁ ମଧ୍ୟ ବଣ୍ଟନ କରାଗଲାଣି । ହେଲେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ସମସ୍ତ ପାଠ୍ୟକ୍ରମରେ ମାଳ ମାଳ ଭୁଲ୍ ଦେଖିବାକୁ ମିଳିଛି । ଏଗୁଡ଼ିକୁ ୨୦୨୬-୨୭ ଶିକ୍ଷାବର୍ଷରୁ ଲାଗୁ କରିବାକୁ ଯୋଜନା ରହିଥିଲା।

ଅନ୍ୟପଟେ ନୂତନ ପାଠ୍ୟପୁସ୍ତକରେ ପ୍ରିଣ୍ଟିଂ ତ୍ରୁଟି ଥିବା ଅଭିଯୋଗକୁ ସ୍ୱୀକାର କରିଛନ୍ତି ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ। ପାଠ୍ୟପୁସ୍ତକରେ ତ୍ରୁଟି ନେଇ ସରକାର ଅବଗତ ଅଛନ୍ତି। ଏହାକୁ ସଂଶୋଧନ କରାଯିବ ଏବଂ ଶିକ୍ଷକମାନଙ୍କୁ ଭୁଲ ଗୁଡିକୁ ସଂଶୋଧନ କରି ପିଲାଙ୍କୁ ପଢାଇବାକୁ କୁହାଯାଇଛି ବୋଲି କହିଛନ୍ତି ମନ୍ତ୍ରୀ ।

ନୂଆଦିଲ୍ଲୀ: ପ୍ରକାଶ ପାଇଲା ସିବିଏସଇ ଦ୍ବାଦଶ ପରୀକ୍ଷା ରେଜଲ୍ଟ । ପରୀକ୍ଷାର୍ଥୀମାନେ ଅଫିସିଆଲ୍ ୱେବସାଇଟ୍ ଯେପରିକି results.cbse.nic.in, cbse.gov.in, ଏବଂ digilocker.gov.in ମାଧ୍ୟମରେ ସେମାନଙ୍କର ମାର୍କ ଦେଖିପାରିବେ। ଏହା ବ୍ୟତୀତ UMANG ମୋବାଇଲ୍ ଆପ୍ ଏବଂ ଏସଏମଏସ୍ (SMS) ସେବା ମାଧ୍ୟମରେ ମଧ୍ୟ ଫଳାଫଳ ଉପଲବ୍ଧ ଅଛି। ଚଳିତବର୍ଷ ପାସ୍‌ ହାର ୮୫.୨୦% ରହିଛି । ଗତବର୍ଷ ତୁଳନାରେ ପରୀକ୍ଷା ପାସ୍ ହାର ୩.୧୯% କମ୍ । ଗତବର୍ଷ ପାସ୍ ହାର ୮୮.୯୩% ରହିଥିଲା ।

କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE) ପକ୍ଷରୁ ବୁଧବାର ଅପରାହ୍ନରେ ୨୦୨୬ ଦ୍ୱାଦଶ ଶ୍ରେଣୀ ଫଳାଫଳ ପ୍ରକାଶ ପାଇଛି। ଚଳିତ ବର୍ଷ ସିବିଏସ୍ଇ ଦ୍ୱାଦଶ ଶ୍ରେଣୀ ପରୀକ୍ଷା ପାଇଁ ମୋଟ ୧୭,୮୦,୩୬୫ ଜଣ ଛାତ୍ରଛାତ୍ରୀ ପଞ୍ଜିକରଣ କରିଥିବା ବେଳେ ସେମାନଙ୍କ ମଧ୍ୟରୁ ୧୭,୬୮,୯୬୮ ଜଣ ପରୀକ୍ଷା ଦେଇଥିଲେ ଏବଂ ୧୫,୦୭,୧୦୯ ଜଣ ପାସ୍ କରିଛନ୍ତି। ତେବେ ଚଳିତ ବର୍ଷ ସାମଗ୍ରିକ ପାସ୍ ହାର ୮୫.୨% ରହିଛି, ଯାହା ଗତ ବର୍ଷର ୮୮.୩୯% ତୁଳନାରେ ୩.୧୯% କମ୍ ଅଟେ।

ଚଳିତ ବର୍ଷ ମଧ୍ୟ ପୁଅମାନଙ୍କ ତୁଳନାରେ ଝିଅମାନେ ବାଜିମାତ୍ କରିଛନ୍ତି। ଝିଅମାନଙ୍କ ପାସ୍ ହାର ପୁଅମାନଙ୍କ ତୁଳନାରେ ୬.୭୩% ଅଧିକ ରହିଛି। ଆଞ୍ଚଳିକ ସ୍ତରରେ ଦେଖିବାକୁ ଗଲେ, ତ୍ରିଭେନ୍ଦ୍ରମ ସର୍ବାଧିକ ୯୫.୬୨% ପାସ୍ ହାର ସହ ଶୀର୍ଷରେ ଥିବାବେଳେ, ପ୍ରୟାଗରାଜ ସର୍ବନିମ୍ନ ୭୨.୪୩% ପାସ୍ ହାର ରେକର୍ଡ କରିଛି। ଅନ୍ୟପକ୍ଷରେ, ସ୍ୱତନ୍ତ୍ର ଆବଶ୍ୟକତା ଥିବା ପିଲାମାନଙ୍କ (CWSN) ପାସ୍ ହାର ୯୦.୧୬% ରହିଛି।

ଭୁବନେଶ୍ବର: ରାଜ୍ୟରେ ନୂଆ ଜାତୀୟ ଶିକ୍ଷା ନୀତି(ଏନଇପି)-୨୦୨୦ ଲାଗୁ ପାଇଁ ବିଜ୍ଞପ୍ତି ପ୍ରକାଶ କରିଛି ଗଣଶିକ୍ଷା ବିଭାଗ। ବୁଧବାର ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ କରାଯାଇଛି। ଶିକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ କରିବା ଲାଗି ଏହି ନିଷ୍ପତ୍ତି ନିଆଯାଇଥିବା ସରକାରଙ୍କ ପକ୍ଷରୁ କୁହାଯାଇଛି। ଏହି ଶିକ୍ଷାନୀତି ଲାଗୁ ହେବା ପରେ ଆଞ୍ଚଳିକ ବିଷୟବସ୍ତୁକୁ ବିଚାରକୁ ନିଆଯାଇ ପାଠ୍ୟକ୍ରମ ପ୍ରସ୍ତୁତ କରାଯିବ ବୋଲି କୁହାଯାଇଛି।

[wp-embedder-pack width=”100%” height=”400px” download=”all” download-text=”” attachment_id=”143965″ /]