ନୂଆଦିଲ୍ଲୀ: ଆମେରିକା ଏବଂ ଇରାନ ମଧ୍ୟରେ ଚାଲିଥିବା ୧୪ ଦିନିଆ ଅସ୍ତ୍ରବିରତି ଆସନ୍ତାକାଲି ଅର୍ଥାତ ଏପ୍ରିଲ ୨୨ରେ ଶେଷ ହେବାକୁ ଯାଉଛି। ଏହା ପରେ ଯୁଦ୍ଧ ପୁଣିଥରେ ଆରମ୍ଭ ହେବ ନା ଗଲ୍ଫ ଦେଶଗୁଡ଼ିକ ଉପରେ ପୁଣି ଆକ୍ରମଣ ହେବ, ତାହାକୁ ନେଇ ଆଶଙ୍କା ପ୍ରକାଶ ପାଇଛି। ଏହା ସହିତ ହର୍ମୁଜ ପ୍ରଣାଳୀ ପୁଣି ଥରେ ବନ୍ଦ ହେବାର ସମ୍ଭାବନା ମଧ୍ୟ ରହିଛି।

ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ ଆଜି ପାକିସ୍ତାନ ଗସ୍ତରେ ଯାଉଛନ୍ତି, ଯେଉଁଠାରେ ଇରାନ ସହ ସମ୍ଭାବ୍ୟ ଆଲୋଚନା ହୋଇପାରେ। ତେବେ ଇରାନ ସଂସଦର ବାଚସ୍ପତି ମହମ୍ମଦ-ବାଗେର ଗାଲିବାଫ ସ୍ପଷ୍ଟ କରିଛନ୍ତି ଯେ, ଆମେରିକା ଧମକ ଦେଇ ଆଲୋଚନା କରିବାକୁ ଚାହୁଁଛି ଯାହାକୁ ଇରାନ ଗ୍ରହଣ କରିବ ନାହିଁ। ସେ ଆହୁରି ମଧ୍ୟ କହିଛନ୍ତି ଯେ ଇରାନ ଯୁଦ୍ଧର ଦ୍ୱିତୀୟ ପର୍ଯ୍ୟାୟ ପାଇଁ ପ୍ରସ୍ତୁତ ଅଛି ଏବଂ ଡୋନାଲ୍ଡ ଟ୍ରମ୍ପ ନିଜ ସ୍ବାର୍ଥ ପାଇଁ ଅସ୍ତ୍ରବିରତି ଉଲ୍ଲଂଘନ କରୁଛନ୍ତି।

ଇରାନ ତରଫରୁ ଏକ ୧୦-ଦଫା ସମ୍ବଳିତ ଦାବି ଉପସ୍ଥାପନ କରାଯାଇଛି। ଏଥିରେ ଆମେରିକା ସହିତ ଅଣ-ଆକ୍ରମଣ ଚୁକ୍ତି, ହର୍ମୁଜ ପ୍ରଣାଳୀ ଉପରେ ନିୟନ୍ତ୍ରଣ, ପରମାଣୁ ସମୃଦ୍ଧିକରଣ ଅଧିକାରକୁ ସ୍ୱୀକୃତି, ସମସ୍ତ ପ୍ରାଥମିକ ଏବଂ ଦ୍ୱିତୀୟକ ଆମେରିକୀୟ କଟକଣା ହଟାଇବା, କ୍ଷତିପୂରଣ ଏବଂ ଆମେରିକୀୟ ସେନା ପ୍ରତ୍ୟାହାର ଆଦି ସାମିଲ ଅଛି। ବିଶେଷ କରି ଇସ୍ରାଏଲ୍ ଲେବାନନରେ ଆକ୍ରମଣ ବନ୍ଦ କଲା ପରେ ଇରାନ ହର୍ମୁଜ ପ୍ରଣାଳୀ ଖୋଲିବାକୁ ରାଜି ହୋଇଥିଲା ଏବଂ ଏବେ ଏହା ଖୋଲା ଅଛି।

ଇରାନର ପ୍ରସ୍ତାବକୁ ଆମେରିକା 'କାର୍ଯ୍ୟକ୍ଷମ' ବୋଲି ବର୍ଣ୍ଣନା କରିଥିଲେ ମଧ୍ୟ ଟ୍ରମ୍ପ ପ୍ରଶାସନ ଏଥିପାଇଁ ନିଜର ସର୍ତ୍ତ ରଖିଛି। ରିପୋର୍ଟ ଅନୁଯାୟୀ, ଆମେରିକାର ୧୫ଟି ସର୍ତ୍ତ ମଧ୍ୟରୁ ପ୍ରମୁଖ ହେଉଛି: ଇରାନ ପରମାଣୁ ଅସ୍ତ୍ର ନିର୍ମାଣ ନକରିବା, ଉଚ୍ଚ ମାନର ୟୁରାନିୟମ ହସ୍ତାନ୍ତର କରିବା, ନିଜର ପ୍ରତିରକ୍ଷା କ୍ଷମତାକୁ ସୀମିତ କରିବା ଏବଂ ସ୍ଥାନୀୟ ପ୍ରକ୍ସି ଗୋଷ୍ଠୀ (ଯେପରିକି ହିଜବୁଲ୍ଲା) କୁ ସମର୍ଥନ ବନ୍ଦ କରିବା। ଇରାନ ଏହି ଦାବିଗୁଡ଼ିକୁ ଅଯୌକ୍ତିକ ବୋଲି ଦର୍ଶାଇଛି।

ଇରାନ ଏବଂ ଆମେରିକା ମଧ୍ୟରେ ଆଲୋଚନା ବିଫଳ ହେବାର ଅନ୍ୟ ଏକ କାରଣ ହେଉଛି ଲେବାନନରେ ଇସ୍ରାଏଲର କ୍ରମାଗତ ଆକ୍ରମଣ। ଏଥିରେ ଏପ୍ରିଲ ୧୭ ସୁଦ୍ଧା ୨୦୦୦ ରୁ ଅଧିକ ଲୋକଙ୍କର ମୃତ୍ୟୁ ହୋଇସାରିଛି। ଯଦିଓ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇସ୍ରାଏଲ୍ ଏବଂ ଲେବାନନ୍ ମଧ୍ୟରେ ୧୦ ଦିନିଆ ଅସ୍ତ୍ରବିରତି କରାଇଛନ୍ତି, ତଥାପି ଆଗକୁ ଆମେରିକା-ଇରାନ ଆଲୋଚନା ପ୍ରମୁଖ ତିନୋଟି ଦିଗ ଉପରେ ନିର୍ଭର କରିବ - ଇସ୍ରାଏଲ୍-ହିଜବୁଲ୍ଲା ଯୁଦ୍ଧର ସ୍ଥିତି, ପରମାଣୁ ପ୍ରସଙ୍ଗରେ ଅଗ୍ରଗତି ଏବଂ ହର୍ମୁଜ ପ୍ରଣାଳୀ ର ସ୍ଥିତି।

ନୂଆଦିଲ୍ଲୀ: ହିଜବୁଲା ମୁଖିଆ ନଇମ କାସିମଙ୍କ ପୁତୁରା ଅଲି ୟୁସୁଫ୍ ହର୍ଶି ନିହତ । ନଇମ କାସିମଙ୍କ ପୁତୁରା ତଥା ବ୍ୟକ୍ତିଗତ ସଚିବ ୟୁସୁଫ୍ ହର୍ଶିଙ୍କୁ ହତ୍ୟା କରିଥିବା ଇସ୍ରାଏଲର ଦାବି । ଇରାନ ସହିତ ଆମେରିକା-ଇସ୍ରାଏଲର ଯୁଦ୍ଧବିରାମ ଘୋଷଣା ସତ୍ତ୍ୱେ ଲେବାନନ ଉପରେ ଇସ୍ରାଏଲର ଆକ୍ରମଣ ଜାରି ରହିଛି। ଗୁରୁବାର ରାତିରେ ବେରୁଟ୍ ଠାରେ ଇସ୍ରାଏଲ୍ ସେନା ଦ୍ୱାରା କରାଯାଇଥିବା ଏକ ବିମାନ ଆକ୍ରମଣରେ ହିଜବୁଲ୍ଲା ସେକ୍ରେଟାରୀ ଜେନେରାଲ୍ ନଇମ୍ କାସିମ୍ ଙ୍କ ପୁତୁରା ତଥା ବ୍ୟକ୍ତିଗତ ସଚିବ ଅଲି ୟୁସୁଫ୍ ହର୍ଶି ନିହତ ହୋଇଛନ୍ତି। ଏହି ଘଟଣା ମଧ୍ୟପ୍ରାଚ୍ୟରେ ଚାଲିଥିବା ଉତ୍ତେଜନାକୁ ଆହୁରି ବୃଦ୍ଧି କରିଛି।

ଇସ୍ରାଏଲ୍ ପ୍ରତିରକ୍ଷା ବାହିନୀ (IDF) ପକ୍ଷରୁ ସୂଚନା ଦିଆଯାଇଛି ଯେ, ଅଲି ୟୁସୁଫ୍ ହର୍ଶି ହିଜବୁଲ୍ଲା ମୁଖ୍ୟଙ୍କ ଜଣେ ଘନିଷ୍ଠ ସହଯୋଗୀ ଏବଂ ବ୍ୟକ୍ତିଗତ ଉପଦେଷ୍ଟା ଥିଲେ। ସେ ନଇମ୍ କାସିମ୍ଙ୍କ କାର୍ଯ୍ୟାଳୟ ପରିଚାଳନା ଏବଂ ତାଙ୍କ ବ୍ୟକ୍ତିଗତ ସୁରକ୍ଷା ପ୍ରଦାନ କ୍ଷେତ୍ରରେ ଏକ ପ୍ରମୁଖ ଭୂମିକା ଗ୍ରହଣ କରୁଥିଲେ।

ବୁଧବାର ଦିନ ଇସ୍ରାଏଲ୍ ପକ୍ଷରୁ କୌଣସି ପୂର୍ବ ସୂଚନା ନଦେଇ ବେରୁଟର ବ୍ୟବସାୟିକ ଏବଂ ଆବାସିକ ଅଞ୍ଚଳରେ ଘନଘନ ଆକ୍ରମଣ କରାଯାଇଥିଲା। ଲେବାନନ ସରକାରଙ୍କ ତଥ୍ୟ ଅନୁଯାୟୀ, ଏହି ଆକ୍ରମଣରେ ଅତିକମ୍‌ରେ ୧୮୨ ଜଣଙ୍କ ମୃତ୍ୟୁ ଘଟିଥିବା ବେଳେ ଶତାଧିକ ଲୋକ ଆହତ ହୋଇଛନ୍ତି। ଇସ୍ରାଏଲ୍ ସେନା ମାତ୍ର ୧୦ ମିନିଟ୍ ମଧ୍ୟରେ ବେରୁଟ୍, ଦକ୍ଷିଣ ଲେବାନନ ଏବଂ ପୂର୍ବ ବେକା ଉପତ୍ୟକାରେ ୧୦୦ରୁ ଅଧିକ ହିଜବୁଲ୍ଲା ଠିକଣା ଉପରେ ଆକ୍ରମଣ କରିଥିଲା, ଯାହାକି ସାମ୍ପ୍ରତିକ ଯୁଦ୍ଧର ସବୁଠାରୁ ଭୟଙ୍କର ଦିନ ଥିଲା।

ଆମେରିକା ଏବଂ ଇସ୍ରାଏଲର ଇରାନ ସହିତ ଯୁଦ୍ଧବିରାମ ଘୋଷଣା ହେବାର କିଛି ଘଣ୍ଟା ପରେ ଏହି ଆକ୍ରମଣ ହୋଇଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସ୍ପଷ୍ଟ କରିଛନ୍ତି ଯେ, ହିଜବୁଲ୍ଲା ଗୋଷ୍ଠୀ କାରଣରୁ ଲେବାନନକୁ ଏହି ଶାନ୍ତି ଚୁକ୍ତିରେ ସାମିଲ କରାଯାଇ ନାହିଁ। ଇସ୍ରାଏଲ୍ ମଧ୍ୟ କହିଛି ଯେ ଏହି ଯୁଦ୍ଧବିରାମ ଚୁକ୍ତି ହିଜବୁଲ୍ଲା ସହିତ ଯୁଦ୍ଧ ଉପରେ ଲାଗୁ ହେବ ନାହିଁ। ବର୍ତ୍ତମାନ ବେରୁଟ୍ ସହରରେ ଆକ୍ରମଣ ଯୋଗୁଁ କଳା ଧୂଆଁ ଉଠୁଥିବା ଦେଖାଯାଇଛି ଏବଂ ଆମ୍ବୁଲାନ୍ସଗୁଡ଼ିକ ଘଟଣାସ୍ଥଳକୁ ଦୌଡ଼ୁଛନ୍ତି। ତେବେ ପ୍ରାଥମିକ ପର୍ଯ୍ୟାୟରେ ହିଜବୁଲ୍ଲା ପକ୍ଷରୁ କୌଣସି ଜବାବୀ ଆକ୍ରମଣର ଖବର ମିଳିନାହିଁ।

ଇରାନରେ ଚାଲିଥିବା ଯୁଦ୍ଧ ଏବେ ଏକ ନୂଆ ମୋଡ଼ ନେଇଛି। ଆମେରିକା ଏବଂ ଇସ୍ରାଏଲ ପକ୍ଷରୁ ମିଳିତ ଭାବେ ଇରାନର ଗୁରୁତ୍ୱପୂର୍ଣ୍ଣ ଭିତ୍ତିଭୂମି ଉପରେ ଆକ୍ରମଣ ଜୋରଦାର କରାଯାଇଛି। ବିଶେଷ କରି ସେଠାରେ ଥିବା ବ୍ରିଜ୍, ଷ୍ଟିଲ୍ ପ୍ଲାଣ୍ଟ ଏବଂ ମେଡିକାଲ୍ ସାଇଟ୍‌ଗୁଡ଼ିକୁ ଟାର୍ଗେଟ୍ କରି ଲଗାତାର ବୋମାମାଡ଼ କରାଯାଉଥିବାରୁ ଏହା ଅନ୍ତର୍ଜାତୀୟ ଆଇନର ଉଲ୍ଲଂଘନ ବୋଲି ବର୍ତ୍ତମାନ ଚର୍ଚ୍ଚା ହେଉଛି। ନିକଟରେ ତେହେରାନରେ ଥିବା ଏକ ମେଡିକାଲ୍ ରିସର୍ଚ୍ଚ ସେଣ୍ଟର ଉପରେ ଆକ୍ରମଣ ହେବା ପରେ ଜେନେଭା କନଭେନସନ୍ (Geneva Convention) ର ନିୟମକୁ ନେଇ ବିଶ୍ୱସ୍ତରରେ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି।

କ'ଣ ଏହି ଜେନେଭା କନଭେନସନ୍?

ଜେନେଭା କନଭେନସନ୍ ହେଉଛି କିଛି ଅନ୍ତର୍ଜାତୀୟ ଚୁକ୍ତିନାମାର ଏକ ସମୂହ, ଯାହା ଯୁଦ୍ଧ ସମୟରେ ମାନବାଧିକାରର ସୁରକ୍ଷା ପାଇଁ ଉଦ୍ଦିଷ୍ଟ। ଏହାର ଇତିହାସ ୧୮୫୯ ମସିହାରୁ ଆରମ୍ଭ ହୋଇଥିଲା, ଯେତେବେଳେ ଇଟାଲୀରେ ଲଢ଼ାଯାଇଥିବା ବ୍ୟାଟେଲ୍ ଅଫ୍ ସଲଫେରିନୋ (Battle of Solferino) ରେ ହଜାର ହଜାର ସୈନିକ ଆହତ ହୋଇ ମଇଦାନରେ ତଡ଼ପି ତଡ଼ପି ପଡ଼ି ରହିଥିଲେ। ସେହି ସମୟରେ ଯୁଦ୍ଧରେ ମାନବିକତା ସମ୍ପୂର୍ଣ୍ଣ ରୂପେ ଶେଷ ହୋଇଯାଇଥିବା ପରି ମନେ ହେଉଥିଲା। ତେବେ ସେଠାରେ ପହଞ୍ଚିଥିବା ଜଣେ ସୁଇସ୍ ବ୍ୟବସାୟୀ ହେନେରୀ ଡୁନାଣ୍ଟ (Henry Dunant) ଏହି ହୃଦୟବିଦାରକ ଦୃଶ୍ୟ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। ସେ ଆହତମାନଙ୍କୁ ଚିକିତ୍ସା ଯୋଗାଇବା ସହ 'ଏ ମେମୋରୀ ଅଫ୍ ସଲଫେରିନୋ' ନାମକ ଏକ ପୁସ୍ତକ ରଚନା କରିଥିଲେ। ଯୁଦ୍ଧରେ ଆହତ ସୈନିକ ଏବଂ ପୀଡ଼ିତଙ୍କ ସୁରକ୍ଷା ପାଇଁ ଏକ ନିୟମାବଳୀ ପ୍ରସ୍ତୁତ କରିବାକୁ ସେ ଦୁନିଆର ସମସ୍ତ ଦେଶକୁ ଏହି ପୁସ୍ତକ ମାଧ୍ୟମରେ ନିବେଦନ କରିଥିଲେ।

ପ୍ରଥମ ଅନ୍ତର୍ଜାତୀୟ ଚୁକ୍ତି ଏବଂ ଏହାର ସମ୍ପ୍ରସାରଣ

ଏହି ଘଟଣା ପରେ ୧୮୬୪ ମସିହାରେ ସୁଇଜରଲ୍ୟାଣ୍ଡର ଜେନେଭା ସହରରେ ଫ୍ରାନ୍ସ, ଅଷ୍ଟ୍ରିଆ, ପ୍ରୁସିଆ ଏବଂ ଇଟାଲୀ ସମେତ ମୋଟ ୧୨ଟି ଦେଶ ଏକାଠି ବସି ପ୍ରଥମ ଅନ୍ତର୍ଜାତୀୟ ଚୁକ୍ତି ସ୍ୱାକ୍ଷର କରିଥିଲେ, ଯାହାକୁ ଜେନେଭା କନଭେନସନ୍ କୁହାଗଲା। ଏଥିରେ ବିନା କୌଣସି ଭେଦଭାବରେ ଯୁଦ୍ଧରେ ଆହତ ସୈନିକମାନଙ୍କୁ ଚିକିତ୍ସା ସୁବିଧା ଯୋଗାଇବା ମୂଳ ଲକ୍ଷ୍ୟ ଥିଲା। ଏହା ପରେ ୧୯୪୯ ମସିହାରେ ଏହି କନଭେନସନ୍‌କୁ ବିସ୍ତାର କରାଯାଇ ୪ଟି ପ୍ରମୁଖ ବୁଝାମଣା ପ୍ରସ୍ତୁତ କରାଗଲା। ଏଥିରେ କେବଳ ଆହତ ସୈନିକ ନୁହେଁ, ବରଂ ସମୁଦ୍ରରେ ଫସିଥିବା ସୈନିକ, ଯୁଦ୍ଧବନ୍ଦୀ ଏବଂ ସାଧାରଣ ନାଗରିକମାନଙ୍କ ସୁରକ୍ଷାକୁ ମଧ୍ୟ ସାମିଲ କରାଗଲା। ପରବର୍ତ୍ତୀ ସମୟରେ ବିଶ୍ୱର ପ୍ରାୟ ସମସ୍ତ ଦେଶ ଏହାକୁ ଗ୍ରହଣ କରିଥିଲେ।

ଏହି ଯୁଦ୍ଧରେ କିପରି ହେଉଛି ନିୟମର ଉଲ୍ଲଂଘନ?

ବର୍ତ୍ତମାନର ପରିସ୍ଥିତିରେ ଆମେରିକା ଏବଂ ଇସ୍ରାଏଲ ଦ୍ୱାରା ଇରାନର ହସ୍ପିଟାଲ, ମେଡିକାଲ୍ ସାଇଟ୍ ଏବଂ ସାଧାରଣ ନାଗରିକ ବ୍ୟବହାର କରୁଥିବା ଭିତ୍ତିଭୂମି ଉପରେ ହେଉଥିବା ବୋମାମାଡ଼ ଏହି ମାନବୀୟ ନିୟମର ସିଧାସଳଖ ଉଲ୍ଲଂଘନ କରୁଛି ବୋଲି ବିଶେଷଜ୍ଞମାନେ ମତ ଦେଉଛନ୍ତି। ଯୁଦ୍ଧ ସମୟରେ ସାଧାରଣ ନାଗରିକ କିମ୍ବା ଚିକିତ୍ସା କେନ୍ଦ୍ରଗୁଡ଼ିକୁ ଟାର୍ଗେଟ୍ କରିବା ଜେନେଭା କନଭେନସନ୍ ଅନୁସାରେ ଏକ ଗମ୍ଭୀର ଅପରାଧ ଏବଂ ଏହାକୁ ଯୁଦ୍ଧ ଅପରାଧ (War Crime) ବିବେଚନା କରାଯାଇଥାଏ। ତେଣୁ ଏହି ଯୁଦ୍ଧରେ ଆମେରିକାର ଆକ୍ରମଣାତ୍ମକ ଆଭିମୁଖ୍ୟ ବିଶ୍ୱ ଶାନ୍ତି ଏବଂ ଅନ୍ତର୍ଜାତୀୟ ଆଇନ ପାଇଁ ଏକ ବଡ଼ ବିପଦ ସୃଷ୍ଟି କରିଛି।

ନୂଆଦିଲ୍ଲୀ: ଦୁବାଇର ଆର୍ଥିକ କେନ୍ଦ୍ରସ୍ଥଳୀରେ ଏକ ଅଟ୍ଟାଳିକାରେ ଆକ୍ରମଣକୁ ପ୍ରତିହତ କରିବା ସମୟରେ ଖସିଥିବା ଭଗ୍ନାବଶେଷ ପଡ଼ିଛି। ଆମେରିକା-ଇସ୍ରାଏଲ-ଇରାନ ଯୁଦ୍ଧ ୧୫ତମ ଦିନରେ ପହଞ୍ଚିଥିବା ବେଳେ, ୨୪ ଘଣ୍ଟା ମଧ୍ୟରେ ଏହା ଦ୍ୱିତୀୟ ଥର ପାଇଁ ଦୁବାଇ ଉପରେ ଆକ୍ରମଣ ହୋଇଛି। ତେବେ ଏହି ଘଟଣାରେ କୌଣସି ଅଗ୍ନିକାଣ୍ଡ କିମ୍ବା ମୃତାହତ ହୋଇନଥିବା ସୂଚନା ମିଳିଛି। 

ଏହି ଘଟଣା ସମ୍ପର୍କରେ ଦୁବାଇ ମିଡିଆ ଅଫିସ ଏକ୍ସ (X) ପ୍ଲାଟଫର୍ମରେ ସୂଚନା ଦେଇ କହିଛି ଯେ, 'ଏକ ସଫଳ ପ୍ରତିରୋଧ କାରଣରୁ ଦୁବାଇର ଏକ ଅଟ୍ଟାଳିକାର ସମ୍ମୁଖ ଭାଗରେ କିଛି ଭଗ୍ନାବଶେଷ ପଡ଼ିଥିଲା। ବର୍ତ୍ତମାନ ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣରେ ଅଛି।' ଶୁକ୍ରବାର ଦିନ ଦୁବାଇ ଇଣ୍ଟରନ୍ୟାସନାଲ ଫାଇନାନ୍ସିଆଲ ସେଣ୍ଟରରେ ଥିବା ଏକ କୋଠାର ସମ୍ମୁଖ ଭାଗରେ ଏହି ଭଗ୍ନାବଶେଷ ପଡ଼ିଥିଲା। ଏହି ସମୟରେ ସ୍ଥାନୀୟ ଅଞ୍ଚଳରେ ପ୍ରବଳ ଶବ୍ଦ ଶୁଣିବାକୁ ମିଳିଥିଲା ଏବଂ କଳା ଧୂଆଁ ବାହାରୁଥିବା ଦେଖିବାକୁ ମିଳିଥିଲା। ଏହି ଘଟଣା ସମ୍ପର୍କରେ ଜଣେ ପ୍ରତ୍ୟକ୍ଷଦର୍ଶୀ କହିଛନ୍ତି ଯେ, ଏହା ତାଙ୍କ ଜୀବନର ସବୁଠାରୁ ଭୟଙ୍କର ଶବ୍ଦ ଥିଲା ଏବଂ ମାଟି ଥରି ଉଠିଥିଲା।

ଅନ୍ୟପଟେ, ଇରାକର ରାଜଧାନୀ ବାଗଦାଦରେ ଥିବା ଆମେରିକା ଦୂତାବାସ ଉପରେ ମଧ୍ୟ ଏକ ଡ୍ରୋନ ଆକ୍ରମଣ ହୋଇଛି। ଇରାକୀ ସୁରକ୍ଷା ଅଧିକାରୀଙ୍କ ସୂଚନା ଅନୁଯାୟୀ, ଦୂତାବାସ ପରିସରରୁ ଧୂଆଁ ବାହାରୁଥିବା ଦେଖିବାକୁ ମିଳିଥିଲା। ଆସୋସିଏଟେଡ୍ ପ୍ରେସ୍ ର ରିପୋର୍ଟ ଅନୁସାରେ, ଏକ କ୍ଷେପଣାସ୍ତ୍ର ଆମେରିକୀୟ ଦୂତାବାସ କମ୍ପାଉଣ୍ଡ ଭିତରେ ଥିବା ହେଲିପ୍ୟାଡରେ ବାଜିଥିଲା।

ବାଗଦାଦରେ ଆମେରିକୀୟ ଦୂତାବାସ ଉପରେ ଆକ୍ରମଣ ପୂର୍ବରୁ ଇରାନ ସମର୍ଥିତ ଶକ୍ତିଶାଳୀ ଗୋଷ୍ଠୀ କାତାଏବ ହିଜବୁଲ୍ଲାକୁ ଟାର୍ଗେଟ କରି ଦୁଇଟି ଆକ୍ରମଣ କରାଯାଇଥିଲା। ସୁରକ୍ଷା ସୂତ୍ର ଅନୁଯାୟୀ, ଶୁକ୍ରବାର ରାତିରେ ଏକ କ୍ଷେପଣାସ୍ତ୍ର ମାଡ଼ରେ କାତାଏବ ହିଜବୁଲ୍ଲାର ଜଣେ ପ୍ରମୁଖ ନେତାଙ୍କ ସମେତ ଦୁଇ ଜଣ ସଦସ୍ୟ ନିହତ ହୋଇଛନ୍ତି ଏବଂ ଅନ୍ୟ ଦୁଇ ଜଣ ଆହତ ହୋଇଛନ୍ତି।

ସୋସିଆଲ୍ ମିଡିଆରେ ଏବେ ଏକ ଖବର ଖୁବ୍ ଜୋରରେ ଭାଇରାଲ୍ ହେବାରେ ଲାଗିଛି। ଦାବି କରାଯାଉଛି ଯେ ଇରାନ ଯୁଦ୍ଧ ମଧ୍ୟରେ ତେହେରାନ ସ୍ଥିତ ଉତ୍ତର କୋରିଆ ଦୂତାବାସ ଉପରେ ଇସ୍ରାଏଲ୍ ମିସାଇଲ୍ ମାଡ଼ କରିଛି। ଏହା ପରେ ଉତ୍ତର କୋରିଆର ଶାସକ କିମ୍ ଜୋଙ୍ଗ୍ ଉନ୍ ଇସ୍ରାଏଲକୁ ଏହା ଏକ 'ବଡ଼ ଭୁଲ୍' ବୋଲି ଚେତାବନୀ ଦେଇଛନ୍ତି।

ସୋସିଆଲ୍ ମିଡିଆରେ ଭାଇରାଲ୍ ଦାବି

ଏକ୍ସ (X) ସମେତ ବିଭିନ୍ନ ସୋସିଆଲ୍ ମିଡିଆ ପ୍ଲାଟଫର୍ମରେ ୟୁଜରମାନେ ଦାବି କରୁଛନ୍ତି ଯେ ଇସ୍ରାଏଲର ଆକ୍ରମଣ ପରେ କିମ୍ ଜୋଙ୍ଗ୍ ଉନ୍ ଏକ କଡ଼ା ଚେତାବନୀ ଜାରି କରିଛନ୍ତି। ସୂଚନାଯୋଗ୍ୟ ଯେ, ଆମେରିକା ଏବଂ ଇସ୍ରାଏଲର ମିଳିତ ଆକ୍ରମଣରେ ଇରାନର ସର୍ବୋଚ୍ଚ ନେତା ଆୟାତୁଲ୍ଲା ଖାମେନୀଙ୍କ ନିହତ ହେବା ଖବର ପରେ ତିନି ଦେଶ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ଏହା ପରେ ଉଭୟ ଇସ୍ରାଏଲ୍ ଏବଂ ଇରାନ ପରସ୍ପରର ଶକ୍ତି ଭିତ୍ତିଭୂମି ସମେତ ପ୍ରମୁଖ ସ୍ଥାନଗୁଡ଼ିକୁ ଟାର୍ଗେଟ୍ କରି ଆକ୍ରମଣ ଜାରି ରଖିଛନ୍ତି।

ଖବରର ସତ୍ୟତା

ତେବେ ତେହେରାନରେ ଥିବା ଉତ୍ତର କୋରିଆ ଦୂତାବାସକୁ ଟାର୍ଗେଟ୍ କରାଯାଇଥିବା ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ। ଏଆଇ ଚାଟବଟ୍ ଗ୍ରୋକ୍ (Grok) ମଧ୍ୟ ଏହି ଖବରର ଫ୍ୟାକ୍ଟ-ଚେକ୍ କରି ଏହାକୁ ଏକ 'ଅପ୍ରମାଣିତ ଗୁଜବ' ବୋଲି ବର୍ଣ୍ଣନା କରିଛି। ରଏଟର୍ସ, ଏନକେ ନ୍ୟୁଜ୍ କିମ୍ବା ଉତ୍ତର କୋରିଆର ରାଷ୍ଟ୍ରୀୟ ଗଣମାଧ୍ୟମ କେସିଏନଏ (KCNA) ପରି ପ୍ରମୁଖ ଗଣମାଧ୍ୟମ ପକ୍ଷରୁ ଏନେଇ କୌଣସି ପୃଷ୍ଟିକରଣ ଦିଆଯାଇନାହିଁ।

ଇରାନକୁ ଉତ୍ତର କୋରିଆର ସମର୍ଥନ

ଗୁଜବ ମିଥ୍ୟା ହୋଇଥିଲେ ମଧ୍ୟ, ଇରାନରେ ଆମେରିକା ଓ ଇସ୍ରାଏଲର ଆକ୍ରମଣକୁ ଉତ୍ତର କୋରିଆ 'ବେଆଇନ ଆକ୍ରମଣ' କହି ନିନ୍ଦା କରିଛି। ଆଲ୍ ଜଜିରା (Al Jazeera) ରିପୋର୍ଟ ଅନୁଯାୟୀ, ଇରାନର ନୂତନ ସର୍ବୋଚ୍ଚ ନେତା ଭାବରେ ମୋଜତାବା ଖାମେନୀଙ୍କ ଚୟନକୁ ଉତ୍ତର କୋରିଆ ସମର୍ଥନ ଜଣାଇଛି। ଦେଶର ବୈଦେଶିକ ମନ୍ତ୍ରଣାଳୟର ମୁଖପାତ୍ର କହିଛନ୍ତି ଯେ ସେମାନେ ଇରାନବାସୀଙ୍କ ନିଷ୍ପତ୍ତିକୁ ସମ୍ମାନ ଜଣାଉଛନ୍ତି। ଏଥିସହ ଆମେରିକା ଓ ଇସ୍ରାଏଲର କାର୍ଯ୍ୟକଳାପ ଆଞ୍ଚଳିକ ଶାନ୍ତି ଓ ସୁରକ୍ଷା ପ୍ରତି ବିପଦ ସୃଷ୍ଟି କରୁଛି ବୋଲି ମଧ୍ୟ ଅଭିଯୋଗ କରାଯାଇଛି।

ନୂଆଦିଲ୍ଲୀ: ପଶ୍ଚିମ ଏସିଆରେ ଯୁଦ୍ଧ ବୁଧବାର ଦିନ ୧୨ତମ ଦିନରେ ପହଞ୍ଚିଥିବା ବେଳେ ଉତ୍ତେଜନା ଆହୁରି ବୃଦ୍ଧି ପାଇଛି। ତେହେରାନର ଏକ ବ୍ୟାଙ୍କ ଉପରେ ହୋଇଥିବା ଆକ୍ରମଣ ପରେ, ଇରାନର ସେନା ଆମେରିକା ଏବଂ ଇସ୍ରାଏଲର ବ୍ୟାଙ୍କ ସମେତ ବିଭିନ୍ନ ଆର୍ଥିକ କେନ୍ଦ୍ରଗୁଡ଼ିକ ଉପରେ ଆକ୍ରମଣ କରିବାକୁ ଘୋଷଣା କରିଛି।

ଇରାନ ସେନାର କେନ୍ଦ୍ରୀୟ ଅପରେସନାଲ୍ କମାଣ୍ଡ, ଖାତମ ଅଲ-ଅନବିୟା (Khatam Al-Anbiya) ତରଫରୁ ଏକ ବିବୃତ୍ତିରେ କୁହାଯାଇଛି ଯେ, ଶତ୍ରୁମାନେ ଆମେରିକା ଏବଂ ଜିଓନିଷ୍ଟ ଶାସନର (ଇସ୍ରାଏଲ୍) ବ୍ୟାଙ୍କ ତଥା ଅର୍ଥନୈତିକ କେନ୍ଦ୍ରଗୁଡ଼ିକୁ ଟାର୍ଗେଟ କରିବା ପାଇଁ ଆମକୁ ପୂର୍ଣ୍ଣ ସ୍ୱାଧୀନତା ଦେଇଛନ୍ତି। ଯୁଗ୍ମ କମାଣ୍ଡର ମୁଖପାତ୍ର ଇବ୍ରାହିମ୍ ଜୋଲଫାକାରୀ (Ebrahim Zolfaqari) ଲୋକମାନଙ୍କୁ ବ୍ୟାଙ୍କଠାରୁ ଦୂରରେ ରହିବାକୁ ସତର୍କ କରାଇ ଦେଇଛନ୍ତି। ସୂଚନାଯୋଗ୍ୟ ଯେ, ଇସ୍ରାଏଲ୍-ଆମେରିକୀୟ ବିମାନ ଆକ୍ରମଣରେ ତେହେରାନର ଏକ ବ୍ୟାଙ୍କରେ କାର୍ଯ୍ୟରତ ଅନେକ କର୍ମଚାରୀଙ୍କ ମୃତ୍ୟୁ ଘଟିଥିବା ରିପୋର୍ଟ ପ୍ରକାଶ ପାଇବା ପରେ ଇରାନ ଏହି ନିଷ୍ପତ୍ତି ନେଇଛି।

ଇରାନର ଆଇଆରଜିସି-ଅନୁବନ୍ଧିତ ତସନିମ୍ ନ୍ୟୁଜ୍ ଏଜେନ୍ସି (Tasnim News Agency) ପ୍ରମୁଖ ଆମେରିକୀୟ ଟେକ୍ନୋଲୋଜି କମ୍ପାନୀଗୁଡ଼ିକର ଏକ ତାଲିକା ପ୍ରକାଶ କରିଛି। ଏହି କମ୍ପାନୀଗୁଡ଼ିକର ଇସ୍ରାଏଲ୍ ସହିତ ସମ୍ପର୍କ ଥିବା ଏବଂ ସେମାନଙ୍କର ଜ୍ଞାନକୌଶଳ ସାମରିକ ଉଦ୍ଦେଶ୍ୟରେ ବ୍ୟବହୃତ ହେଉଥିବା ଇରାନ ଦାବି କରିଛି। ଟାର୍ଗେଟ୍ ତାଲିକାରେ ଗୁଗୁଲ୍ (Google), ମାଇକ୍ରୋସଫ୍ଟ (Microsoft), ପାଲାଣ୍ଟିର୍ (Palantir), ଆଇବିଏମ୍ (IBM), ଏନଭିଡିଆ (Nvidia), ଏବଂ ଓରାକଲ୍ (Oracle) ପରି ବଡ଼ କମ୍ପାନୀର ନାମ ସାମିଲ ଅଛି। ଏହି ବିବାଦକୁ ଏକ 'ଭିତ୍ତିଭୂମି ଯୁଦ୍ଧ' ବା ଇନଫ୍ରାଷ୍ଟ୍ରକ୍ଚର ୱାରର ଆଖ୍ୟା ଦିଆଯାଇଛି ଏବଂ ଇରାନର ଟାର୍ଗେଟ ପରିସର ମଧ୍ୟ ବୃଦ୍ଧି ପାଇବ ବୋଲି ଚେତାବନୀ ଦିଆଯାଇଛି।

ବୁଧବାର ସକାଳେ ଇସ୍ରାଏଲ୍ ଏବଂ ଇରାନ ମଧ୍ୟରେ ଗୁଳି ବିନିମୟ ହୋଇଥିଲା। ତେହେରାନ ତୈଳ ଭିତ୍ତିଭୂମି ଏବଂ ଜାହାଜଗୁଡ଼ିକୁ ଟାର୍ଗେଟ କରିଥିବା ବେଳେ, ଦୁବାଇ ଆନ୍ତର୍ଜାତୀୟ ବିମାନବନ୍ଦର ନିକଟରେ ଦୁଇଟି ଇରାନୀୟ ଡ୍ରୋନ୍ ମାଡ଼ ହୋଇଛି, ଯେଉଁଥିରେ ୪ ଜଣ ଆହତ ହୋଇଛନ୍ତି। ସେହିପରି ଓମାନ ଉପକୂଳରେ ହୋରମୁଜ୍ ପ୍ରଣାଳୀରେ ଏକ କଣ୍ଟେନର ଜାହାଜ ଉପରେ ଆକ୍ରମଣ ହେବାରୁ କର୍ମଚାରୀମାନେ ଜାହାଜ ଛାଡିବାକୁ ବାଧ୍ୟ ହୋଇଥିଲେ। କୁଏତ ଏବଂ ସାଉଦି ଆରବ ଯଥାକ୍ରମେ ୮ଟି ଏବଂ ୫ଟି ଇରାନୀୟ ଡ୍ରୋନକୁ ଖସାଇ ଦେଇଥିବା ଦାବି କରିଛନ୍ତି। ବର୍ତ୍ତମାନ ଇରାନ ପାରସ୍ୟ ଉପସାଗରରୁ ତୈଳ ପରିବହନ କରୁଥିବା ହୋରମୁଜ୍ ପ୍ରଣାଳୀ ଦେଇ କାର୍ଗୋ ଚଳାଚଳକୁ ସମ୍ପୂର୍ଣ୍ଣ ରୂପେ ବନ୍ଦ କରିଦେଇଛି ଏବଂ ଉପସାଗରୀୟ ଆରବ ଦେଶର ରିଫାଇନାରୀଗୁଡ଼ିକୁ ମଧ୍ୟ ଟାର୍ଗେଟ କରୁଛି।

ତେଲ ଆଭିଭ: ଇସ୍ରାଏଲ ପାହାନ୍ତିଆରେ ଆକ୍ରମଣ କରି ଇରାନକୁ ଦୋହଲାଇ ଦେଇଛି। ଏହି ଆକ୍ରମଣକୁ ଏଭଳି ଭାବେ ଗୋପନୀୟ ରଖା ଯାଇଥିଲା ଯେ ତାହାର ଟିକିଏ ହେଲେ ବି ସୂଚନା ଇରାନ ପାଇପାରି ନ ଥିଲା। କିନ୍ତୁ ଆମେରିକାକୁ ପ୍ରଥମେ ଜଣାଇ ଦିଆଯାଇଥିଲା। ପୂର୍ବରୁ ପରମାଣୁ କାର୍ଯ୍ୟକ୍ରମକୁ ନେଇ ଆମେରିକା ରାଷ୍ଟ୍ରପତି ଡୋନଲ୍ଡ ଟ୍ରମ୍ପ ବାରମ୍ବାର ଇରାନକୁ ଧମକ ଦେଇ ଚାଲିଥିଲେ। ପରମାଣୁ ଚୁକ୍ତି ନ କଲେ ବଡ଼ ପରିଣତି ଭୋଗିବ ବୋଲି ଚେତାଇ ଦେଇଥିଲା। ଏହା ପରେ ଇସ୍ରାଏଲ ଇରାନର ପରମାଣୁ କେନ୍ଦ୍ର, କ୍ଷେପଣାସ୍ତ୍ର ମହଜୁଦ କେନ୍ଦ୍ର ଏବଂ ପ୍ରମୁଖ ନେତୃତ୍ବଙ୍କୁ ନିଶାଣ କରି ଆକ୍ରମଣ କରିଥିଲା। କେହି କିଛି ବୁଝିବା ଆଗରୁ ଆଇଡିଏଫର ଲଢୁଆ ବିମାନ ରାମ, ସୌଫା, ଏବଂ ଏଡିଆର ଆଦି ଧ୍ବଂସଲୀଳା ରଚି ଫେରି ଆସିଥିଲା। ଏବେ ଇସ୍ରାଏଲକୁ ଏହି ଅଭିଯାନ କରିବାର କ’ଣ ଆବଶ୍ୟକତା ପଡ଼ିଲା ବୋଲି ପ୍ରଶ୍ନ ଉଠୁଛି। ଏହା ପଛରେ ଇରାନ ପରମାଣୁ କାର୍ଯ୍ୟକ୍ରମ ବଡ଼ କାରଣ ରହିଛି। ଗତ ଫେବୃଆରୀରୁ ଆମେରିକା ଗୁଇନ୍ଦା ଏଜେନ୍ସି ସତର୍କ କରି ଆସୁଥିଲା। ଇରାନ ଆଣବିକ କାର୍ଯ୍ୟକ୍ରମ ସହ ଜଡ଼ିତ ଏକାଧିକ ପ୍ରତିଷ୍ଠାନ ଉପରେ ଇସ୍ରାଏଲ ଆକ୍ରମଣ କରିପାରେ ବୋଲି କୁହାଯାଇଥିଲା। ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ମଧ୍ୟ ଇରାନକୁ ପୂର୍ବରୁ ଅନେକ ଥର ଧମକ ଦେଇଥିଲେ।

କିଛି ଦିନ ତଳେ ଆମେରିକା ଗୁଇନ୍ଦା ରିପୋର୍ଟରେ କୁହାଯାଇଥିଲା ଯେ ଅକ୍ଟୋବରରେ ମିସାଇଲ ଉତ୍ପାଦନ କେନ୍ଦ୍ର ଓ ଏୟାର ଡିଫେନ୍ସ ସିଷ୍ଟମ ଉପରେ ହୋଇଥିବା ଆକ୍ରମଣର ପ୍ରତିଶୋଧ ନେବା ପାଇଁ ଇସ୍ରାଏଲ ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଛି। ଇରାନରେ କ୍ଷମତା ପରିବର୍ତ୍ତନ କରି ନିଜର କର୍ତ୍ତୃତ୍ବ ଜାହିର କରିବାକୁ ମଧ୍ୟ ଇସ୍ରାଏଲ ଚାହୁଁଥିବା କୁହାଯାଇଥିଲା। ଆଜି ଇସ୍ରାଏଲ ଏହାକୁ ସତ କରି ଦେଖାଇଛି। ଯଦି ଇରାନ ଆଣବିକ ବୋମା ପାଇଯାଏ ତେବେ ତେଲ ଆଭିଭ ସବୁଠାରୁ ଅଧିକ କ୍ଷତି ସହିବ ବୋଲି ଇସ୍ରାଏଲ କହି ଆସୁଥିଲା। କାରଣ ଇରାନ ଇସ୍ରାଏଲର ଦୃଢ଼ ବିରୋଧୀ। ଇସ୍ରାଏଲକୁ ନିପାତ କରିବା ପାଇଁ ଇରାନ ଚାହୁଁଛି। ଦୀର୍ଘ ଦଶନ୍ଧି ଧରି ଇସ୍ରାଏଲ ବିରୋଧରେ ଛାୟା ଯୁଦ୍ଧ ଚଳାଇଛି। ହମାସ, ହୁତି ବିଦ୍ରୋହୀ ଏବଂ ହିଜବୁଲ୍ଲା ମାଧ୍ୟମରେ ଇସ୍ରାଏଲ ଉପରେ ଆକ୍ରମଣ ଜାରି ରଖିଛି। ଏହି ଆତଙ୍କବାଦୀ ଗୋଷ୍ଠୀ ଗୁଡିକୁ ଇରାନ ସହାୟତା ଦେଉଛି। ଗାଜାରେ ଇସ୍ରାଏଲ ଆକ୍ରମଣ ପରଠାରୁ ଏହି ସଂଗଠନ ଗୁଡ଼ିକ ପାଲେଷ୍ଟାଇନ ସମର୍ଥନରେ ବାହାରିଛନ୍ତି। ସେମାନେ ଇସ୍ରାଏଲ ବିରୋଧରେ ନିଜର ଆକ୍ରମଣକୁ ଜୋରଦାର କରିଛନ୍ତି।

ଅନ୍ୟପକ୍ଷରେ ମିଳିତ ଜାତିସଂଘର ଆଣବିକ ୱାଚଡଗ ଗୁରୁବାର ଗୋଟିଏ ସଂକଳ୍ପ ପାରିତ କରିଥିଲା। ଏଥିରେ ଇରାନ ନିଜର ଆଣବିକ ନିରସ୍ତ୍ରୀକରଣ ଚୁକ୍ତିକୁ ଉଲ୍ଲଙ୍ଘନ କରିବା ସ୍ଥିତିରେ ରହିଛି ବୋଲି କୁହାଯାଇଥିଲା। ଏହାର ଜବାବରେ ଇରାନ ଆଣବିକ କାର୍ଯ୍ୟକ୍ରମକୁ ବିସ୍ତାର କରିବାକୁ ଘୋଷଣା କରିଥିଲା। ଇରାନ ପରମାଣୁ କାର୍ଯ୍ୟକ୍ରମକୁ ଜୋରଦାର କରିବାରୁ ଇସ୍ରାଏଲ ଆକ୍ରମଣ କରିଥିଲା। ସବୁ ରାସ୍ତା ବନ୍ଦ ହୋଇ ଯାଇଥଇବାରୁ ବାଧ୍ୟବାଧ୍ୟକତାରେ ଏହି ନିଷ୍ପତ୍ତି ନିଆଯାଇଥିଲା ବୋଲି ଇସ୍ରାଏଲ ବିଦେଶମନ୍ତ୍ରୀ ଗିଦୋନ ସାର୍‌ କହିଛନ୍ତି। ଇରାନ ଅଟକିବାକୁ ଚାହୁଁ ନ ଥିଲା। ତେଣୁ ତାକୁ ରୋକିବାର ଆବଶ୍ୟକତା ଥିଲା।

ତେହରାନ: ଇରାନ୍‌ ଉପରେ ଶୁକ୍ରବାର ପ୍ରତ୍ୟୁଷରେ ଇସ୍ରାଏଲ୍‌ର ଅପ୍ରତ୍ୟାଶିତ ଆକ୍ରମଣରେ ଥରି ଉଠିଛି ମଧ୍ୟପ୍ରାଚ୍ୟ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଚେତାବନୀର ଦିନକ ପରେ ଇରାନ ଉପରେ ଇସ୍ରାଏଲର ପ୍ରଚଣ୍ଡ ଆକ୍ରମଣ ଏହି ଭୟାବହ ସ୍ଥିତି ସୃଷ୍ଟି କରିଛି। ଅପରେସନ ‘ରାଇଜିଂ ଲାୟନ’ ଅଧୀନରେ ଭାରତୀୟ ସମୟ ୫ଟା ୧୫ରେ ୨୦୦ରୁ ଅଧିକ ଲଢୁଆ ବିମାନ ଇରାନରେ ଜୋରଦାର ଏୟାର ଷ୍ଟ୍ରାଇକ କରିଛି। ଇରାନର ୧୨ଟି ପ୍ରଦେଶର ୬ଟି ସାମରିକ ଠିକଣାକୁ ନିଶାଣ କରି ୩୩୦ରୁ ଅଧିକ ବୋମାବର୍ଷା କରାଯାଇଛି। ଆକ୍ରମଣରେ ଇରାନର ବିପୁଳ କ୍ଷୟକ୍ଷତି ହୋଇଛି; ଯାହାକୁ ଭରଣା କରିବା ଇରାନ ପକ୍ଷେ କଷ୍ଟକର। ବିଧ୍ବଂସକ ଆକ୍ରମଣରେ ୪ଟି ପରମାଣୁ କେନ୍ଦ୍ର, ବାଲିଷ୍ଟିକ କ୍ଷେପଣାସ୍ତ୍ର ମହଜୁଦ କେନ୍ଦ୍ର ସମେତ ୬ଟି ସାମରିକ ଠିକଣା ଧ୍ବଂସ ହୋଇଯାଇଛି। ଏୟାର ଷ୍ଟ୍ରାଇକରେ ୧୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବାବେଳେ ୫୦୦ରୁ ଅଧିକ ଆହତ ହୋଇଛନ୍ତି। ଅନେକଙ୍କ ସ୍ବାସ୍ଥ୍ୟାବସ୍ଥା ଗୁରୁତର ଥିବାରୁ ମୃତ୍ୟୁସଂଖ୍ୟା ବୃଦ୍ଧି ପାଇବାର ସମ୍ଭାବନା ରହିଛି। ମୃତକଙ୍କ ମଧ୍ୟରେ ଇରାନ ରିଭୋଲ୍ୟୁସନାରୀ ଗାର୍ଡ କ୍ରପ୍ସ (ଆଇଆରଜିସି)ମୁଖ୍ୟ ତଥା ସର୍ବୋଚ୍ଚ ଶାସକ ଅୟତୁହ୍ଲା ଅଲ ଖାମନେଇଙ୍କ ଘନିଷ୍ଠ ଜେନେରାଲ ହୋସେନ ସଲାମୀ, ସଶସ୍ତ୍ର ବାହିନୀ ମୁଖ୍ୟ ମହମ୍ମଦ ବାଘେରୀଙ୍କ ସମେତ ୨୦ ପ୍ରମୁଖ କମାଣ୍ଡରଙ୍କ ଜୀବନ ଯାଇଛି। ୬ ଜଣ ପ୍ରମୁଖ ପରମାଣୁ ଏବଂ ସାମରିକ ବୈଜ୍ଞାନିକ ମଧ୍ୟ ପ୍ରାଣ ହରାଇଛନ୍ତି। ଇସ୍ରାଏଲର ଏହି ଆକ୍ରମଣ ଇରାନର ପରମାଣୁ କାର୍ଯ୍ୟକ୍ରମ ପାଇଁ ଶକ୍ତ ଝଟ୍‌କା ସାବ୍ୟସ୍ତ ହୋଇଛି।

ଏହି ଆକ୍ରମଣ ମଧ୍ୟପ୍ରାଚ୍ୟରେ ଉତ୍ତେଜନାକୁ ଚରମରେ ପହଞ୍ଚାଇ ଦେଇଛି। ଏହାକୁ ନେଇ ଇରାନ ସର୍ବୋଚ୍ଚ ଶାସକ ଅୟତୁହ୍ଲା ଅଲ ଖାମନେଇ ଇସ୍ରାଏଲକୁ ଚେତାବନୀ ଦେଇଛନ୍ତି। ଏହି ଆକ୍ରମଣର ଦଣ୍ଡ ଇସ୍ରାଏଲକୁ ମିଳିବ ବୋଲି କହିଛନ୍ତି। ଏହା ପରେ ଇରାନ ଜବାବୀ କାର୍ଯ୍ୟାନୁଷ୍ଠାନ ନେଇଛି। ଇସ୍ରାଏଲ ଉପରେ ଇରାନ ଶହେରୁ ଅଧିକ ଡ୍ରୋନ ମାଡ଼ କରିଛି। ତେବେ ସବୁ ଡ୍ରୋନ୍‌କୁ ଖସାଇ ଦିଆଯାଇଛି। କୌଣସି ଡ୍ରୋନ ଇସ୍ରାଏଲ ସୀମାରେ ପ୍ରବେଶ କରିପାରିନି ବୋଲି ଇସ୍ରାଏଲ ସେନା (ଆଇଡିଏଫ) ପକ୍ଷରୁ କୁହାଯାଇଛି। ଇରାନର ଜବାବୀ କାର୍ଯ୍ୟାନୁଷ୍ଠାନକୁ ଦେଖି ଇସ୍ରାଏଲ ସତର୍କ ହୋଇ ରହିଛି। ନିଜ ସୀମାରେ ଲଢୁଆ ବିମାନକୁ ମୁତୟନ କରି ରଖିଛି। ଦୁଇ ଦେଶ ମୁହାଁମୁହିଁ ସ୍ଥିତିରେ ଥିବା ବେଳେ ରାତିରେ ମଧ୍ୟ ପୁଣି ପ୍ରଚଣ୍ଡ ଆକ୍ରମଣ କରିଛି ଇସ୍ରାଏଲ୍‌। ଇରାନ୍‌ର ପରମାଣୁ ଠିକଣାକୁ ନିଶାଣ କରି ୧୦୦ରୁ ଊର୍ଦ୍ଧ୍ବ କ୍ଷେପଣାସ୍ତ୍ର ମାଡ଼ କରିଥିବା ବେଳେ ଏଥିରେ ୧୮ଜଣଙ୍କ ମୃତ୍ୟୁ ଘଟିଛି।

ଭାରତ ଏହି ଯୁଦ୍ଧ ସ୍ଥିତିକୁ ନେଇ ଗଭୀର ଚିନ୍ତା ପ୍ରକଟ କରିଛି। ବୈଦେଶିକ ମନ୍ତ୍ରାଳୟ ଶାନ୍ତି ନିବେଦନ କରିଛି। ଉତ୍ତେଜନାକୁ ବଢ଼ାଇବା ଭଳି କୌଣସି ପଦକ୍ଷେପ ନ ନେବା ପାଇଁ ଦୁଇ ଦେଶକୁ ପରାମର୍ଶ ଦେଇଛି। କୂଟନୈତିକ ସ୍ତରରେ ଆଲୋଚନା କରି ବିବାଦର ସମାଧାନ କରିବାକୁ କୁହାଯାଇଛି। ଯଥାସମ୍ଭବ ସହାୟତା ଲାଗି ଭାରତ ପ୍ରସ୍ତୁତ ବୋଲି କୁହାଯାଇଛି। ଏହା ମଧ୍ୟରେ ଇରାନ ସ୍ଥିତ ଭାରତୀୟ ଦୂତାବାସ ନାଗରିକଙ୍କ ପାଇଁ ଚେତାବନୀ ଜାରି କରିଛି। ଭାରତୀୟ ନାଗରିକଙ୍କୁ ସତର୍କ ରହିବା ପାଇଁ କୁହାଯାଇଛି।

ଅନ୍ୟପକ୍ଷରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁ ଆକ୍ରମଣର ସୂଚନା ଆମେରିକା ଏବଂ ରୁଷ୍‌କୁ ଦେଇଛନ୍ତି। ସେ ସନ୍ଧ୍ୟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ କଥା ହୋଇଛନ୍ତି। ନେତନ୍ୟାହୁ ତାଙ୍କୁ ସ୍ଥିତି ବିଷୟରେ ସୂଚନା ଦେଇଛନ୍ତି। ଅଞ୍ଚଳରେ ଶାନ୍ତି ଏବଂ ସ୍ଥିରତା ବଜାୟ ରଖିବା ଲାଗି ନେତନ୍ୟାହୁଙ୍କୁ ମୋଦୀ କହିଛନ୍ତି। ଆକ୍ରମଣ ପରେ ନେତନ୍ୟାହୁ ଦେଶକୁ ସମ୍ବୋଧନ କରିଥିଲେ। ଇସ୍ରାଏଲର କ୍ଷତି କରିବା ପାଇଁ ଇରାନ ପାଖରେ କ୍ଷମତା ରହିଛି। ଏହାର ମୁକାବିଲା ପାଇଁ ପ୍ରସ୍ତୁତି କରାଯାଇଛି। ଏଥିରେ ସହଯୋଗ କରିବା ପାଇଁ ସେ ଲୋକଙ୍କୁ ନିବେଦନ କରିଛନ୍ତି। ଇରାନ ପରମାଣୁ ଅସ୍ତ୍ରଶସ୍ତ୍ର ନିର୍ମାଣ ଦିଗରେ ଅତ୍ୟନ୍ତ ବିପଜ୍ଜନକ ପଦକ୍ଷେପ ନେଇଥିଲା। ୯ଟି ପରମାଣୁ ବୋମା ନିର୍ମାଣ ଲାଗି ଇରାନ ପାଖରେ ପର୍ଯ୍ୟାପ୍ତ ୟୁରାନିୟମ ଥିଲା। ୬ ବର୍ଷରେ ୨୦ ହଜାର ବାଲିଷ୍ଟିକ ମିସାଇଲ ନିର୍ମାଣ କରିବାକୁ ଯୋଜନା ମଧ୍ୟ କରିଥିଲା। ଏହି କ୍ଷେପଣାସ୍ତ୍ର ମିନିଟ୍‌କ ମଧ୍ୟରେ ଇସ୍ରାଏଲରେ ପହଞ୍ଚି ଯାଇଥାନ୍ତା। ତେଣୁ ଏହି ଆକ୍ରମଣ କରାଯାଇଥିଲା। ଯଦି ଏବେ କାର୍ଯ୍ୟାନୁଷ୍ଠାନ ନିଆଯାଇ ନ ଥାଆନ୍ତା ତେବେ ଆଗାମୀ ପିଢିର ଭବିଷ୍ୟତ ସୁରକ୍ଷିତ ରହି ନ ଥାଆନ୍ତା। ଇସ୍ରାଏଲ କେବଳ ନିଜ ପାଇଁ ନୁହେଁ, ବରଂ ସମଗ୍ର ବିଶ୍ବ ପାଇଁ ଏହି ପଦକ୍ଷେପ ନେଇଛି। ଏହି ଅଭିଯାନ ଏବେ ଶେଷ ହୋଇନାହିଁ ବୋଲି ନେତନ୍ୟାହୁ କହିଛନ୍ତି। ସେ ଇରାନ ନାଗରିକଙ୍କୁ ମଧ୍ୟ ନିବେଦନ କରିଛନ୍ତି। ଇରାନ ନାଗରିକ ନୁହେଁ, ବରଂ ଆମେ ଇରାନ ସରକାର ବିରୋଧରେ ଲଢୁଛୁ।

ଅନେକ ବର୍ଷ ହେଲା ଇରାନ ନିଜ ଲୋକଙ୍କ ସ୍ବରକୁ ଚପାଇ ରଖିଛି। ଏହା ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ଆକ୍ରମଣ ସମର୍ଥନ ଦେଇଛନ୍ତି। ଏହି ଆକ୍ରମଣ ବହୁତ ବଢ଼ିଆ ଥିଲା ବୋଲି କହିଛନ୍ତି। ଇରାନକୁ ଗୋଟିଏ ସୁଯୋଗ ଦିଆଯାଇଥିଲା। କିନ୍ତୁ ଇରାନ ୬୦ ଦିନ ମଧ୍ୟରେ ଏହାର ଲାଭ ଉଠାଇ ପାରି ନ ଥିଲା। ଏବେ ଏହି ଦେଶକୁ ବହୁତ ବଡ଼ ଝଟ୍‌କା ଲାଗିଛି। ଯଦି ପରମାଣୁ ଚୁକ୍ତି ପାଇଁ ଆଲୋଚନା କରା ନ ଯିବ ତେବେ ଆହୁରି ପ୍ରଚଣ୍ଡ ଆକ୍ରମଣ ହେବ ବୋଲି ଟ୍ରମ୍ପ ଧମକ ଦେଇଛନ୍ତି। ତେବେ ଟ୍ରମ୍ପଙ୍କ ଏହି ପ୍ରସ୍ତାବକୁ ଇରାନ ପ୍ରତ୍ୟାକ୍ଷାନ କରିଦେଇଛି। ଏପରି ସମୟରେ ଇରାନ ରାଷ୍ଟ୍ରପତି ମସୁଦ ପେଜସକିଆନ ଇସ୍ରାଏଲକୁ ଧମକ ଦେଇଛନ୍ତି। ଏହି ଦେଶ ବହୁତ ବଡ଼ ଭୁଲ କରିଦେଲା ବୋଲି କହିଛନ୍ତି। ଏହି ଦୁଃସାହସ ପାଇଁ ଇସ୍ରାଏଲକୁ ପଶ୍ଚାତାପ କରିବାକୁ ପଡ଼ିବ। ଏହି ଅପରାଧକୁ ଦେଖି ଇରାନ ଚୁପ୍‌ ହୋଇ ରହିପାରିବ ନାହିଁ। ଇରାନ ବିଦେଶ ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ ସାମରିକ ଏବଂ ପରମାଣୁ ଠିକଣାରେ ଆକ୍ରମଣ କରି ଇସ୍ରାଏଲ ଯୁଦ୍ଧ ଘୋଷଣା କରିଛି। ଏହି ଘଟଣାକୁ ନେଇ ମିଳିତ ଜାତିସଂଘ ସୁରକ୍ଷା ପରିଷଦକୁ ଇରାନ ବିଦେଶମନ୍ତ୍ରୀ ଚିଠି ଲେଖିଛନ୍ତି। ଇସ୍ରାଏଲ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି।

ଦୁବାଇ: ଗତକାଲି ରାତିରେ ଇସ୍ରାଏଲ ଉପରେ ଇରାନର ଆକ୍ରମଣ ପରେ ପଶ୍ଚିମ ଏସିଆରେ ଯୁଦ୍ଧ ପରିସ୍ଥିତିି ସୃଷ୍ଟି ହୋଇଛି। ଆକ୍ରମଣକୁ ୟୁରୋପୀୟ ଦେଶ ବିରୋଧ କରିଥିବା ବେଳେ ଆରବ ଦେଶ ନିରବ ରହିଛନ୍ତି। ଆକ୍ରମଣର ପ୍ରତିଶୋଧ ନେବ ବୋଲି ଘୋଷଣା କରିଛି ଇସ୍ରାଏଲ। ଆମେରିକା ସହିତ ଆଲୋଚନା କରି ରଣନୀତି ଚୂଡ଼ାନ୍ତ କରୁଛି। ଇରାନ ଉପରେ ଯେକୌଣସି ମୁହୂର୍ତ୍ତରେ ଆକ୍ରମଣ ହୋଇପାରେ ବୋଲି କୁହାଯାଉଛି।

ମିଳିଥିବା ସୂଚନା ଅନୁସାରେ ଇରାନର ଆଧ୍ୟାତ୍ମିକ ନେତା ଖାମନେଇ ଏବଂ ଇରାନର ଆଣବିକ କେନ୍ଦ୍ରକୁ ଟାର୍ଗେଟ କରିବା ଲାଗି ଇସ୍ରାଏଲ ଯୋଜନା କରିଛି। ଏହାସହିତ ଇରାନର ତୈଳ ଉତ୍ପାଦନ କେନ୍ଦ୍ର, ବିମାନଘାଟୀ ଓ ସାମରିକ ପ୍ରତିଷ୍ଠାନ ଉପରେ ମଧ୍ୟ ଆକ୍ରମଣ କରିବ। ତେବେ ଆଣବିକ କେନ୍ଦ୍ର ଉପରେ ଆକ୍ରମଣ ଯୋଜନାକୁ ନେଇ ଇସ୍ରାଏଲ ଓ ଆମେରିକା ମଧ୍ୟରେ ମତଭେଦ ରହିଛି। ଇସ୍ରାଏଲ ପାଲଟା ଆକ୍ରମଣ କଲେ କଡ଼ା ଜବାବ ଦିଆଯିବ ବୋଲି ଇରାନ ଧମକ ଦେଇଥିବାରୁ ସୀମିତ କାର୍ଯ୍ୟାନୁଷ୍ଠାନ ପାଇଁ ଇସ୍ରାଏଲକୁ ପରାମର୍ଶ ଦେଇଛି ଆମେରିକା। ଇରାନର ଆଣବିକ କେନ୍ଦ୍ର ଉପରେ ଆକ୍ରମଣ ନ କରିବା ଲାଗି ଇସ୍ରାଏଲକୁ ପରାମର୍ଶ ଦେଇଛନ୍ତି ଆମେରିକା ରାଷ୍ଟ୍ରପତି ବାଇଡେନ୍। ଏହା ପରିସ୍ଥିତିକୁ ଆହୁରି ଜଟିଳ କରିବ ବୋଲି ସେ ସତର୍କ କରାଇଛନ୍ତି। ଇସ୍ରାଏଲକୁ ସବୁ ପ୍ରକାର ସହାୟତା ଦେବାଲାଗି ସେ ପ୍ରତିଶ୍ରୁତି ଦେଇଛନ୍ତି। ତେବେ ସାମରିକ କାର୍ଯ୍ୟାନୁଷ୍ଠାନରେ ଆମେରିକା ପ୍ରତ୍ୟକ୍ଷ ଭାବେ ସାମିଲ ହେବନାହିଁ। ଇରାନ ଉପରେ କଠୋର କଟକଣା ଜାରି କରାଯିବ ବୋଲି ସେ କହିଛନ୍ତି।

ଭାରତରେ ଇସ୍ରାଏଲର ରାଷ୍ଟ୍ରଦୂତ କହିଛନ୍ତି ଯେ ଗତକାଲି ଇରାନ ୧୮୧ଟି ବାଲିଷ୍ଟିକ କ୍ଷେପଣାସ୍ତ୍ର ମାଡ଼ କରିଥିଲା। ପ୍ରତ୍ୟେକ କ୍ଷେପଣାସ୍ତ୍ରରେ ୭୦୦ରୁ ହଜାର କିଲୋ ଓଜନର ବିସ୍ଫୋରକ ଥିଲା। ଆକାଶରେ ଏହାକୁ ନଷ୍ଟ କରାଯାଇ ନଥିଲେ ଇସ୍ରାଏଲର ବଡ଼ ଧରଣର କ୍ଷତି ଘଟିଥାଆନ୍ତା। ତେବେ ଇରାନର ଏଭଳି ଆକ୍ରମଣର ଇସ୍ରାଏଲ ଜୋରଦାର ଜବାବ ଦେବ ବୋଲି ସେ କହିଛନ୍ତି।

ଇତିମଧ୍ୟରେ ଇସ୍ରାଏଲରୁ ମିଳିଥିବା ସୂଚନା ଅନୁଯାୟୀ, ଗତକାଲି ଇରାନ ଆକ୍ରମଣ କରିବା ପୂର୍ବରୁ ଇସ୍ରାଏଲର ବିଭିନ୍ନ ସ୍ଥାନରେ ଆତଙ୍କବାଦୀମାନେ ଆଖିବୁଜା ଗୁଳି ଚଳାଇବାରୁ ୭ ଜଣ ବ୍ୟକ୍ତି ପ୍ରାଣ ହରାଇଥିଲେ ଏବଂ ୨୦ରୁ ଅଧିକ ଆହତ ହୋଇଥିଲେ। ଇରାନର କ୍ଷେପଣାସ୍ତ୍ର ମାଡ଼ରେ ଇସ୍ରାଏଲ ଗୁଇନ୍ଦା ସଂସ୍ଥା ମୋସାଡର ମୁଖ୍ୟାଳୟ କ୍ଷତିଗ୍ରସ୍ତ ହୋଇଥିବା ଜଣାପଡ଼ିଛି। ସେପଟେ ହିଜବୁଲ୍ଲାକୁ ମୂଳପୋଛ କରିବା ଲାଗି ଲେବାନନରେ ଇସ୍ରାଲର ସ୍ଥଳ ସେନା ପକ୍ଷରୁ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି। ସେମାନେ ହିଜବୁଲ୍ଲା ପକ୍ଷରୁ ଦୃଢ଼ ବିରୋଧର ସମ୍ମୁଖୀନ ହେଉଛନ୍ତି। ମୁହାଁମୁହିଁ ସଂଘର୍ଷରେ ଇସ୍ରାଏଲର ୮ ଜଣ ସୈନ୍ୟ ନିହତ ହୋଇଥିବା ତେଲ ଆଭିଭ ପକ୍ଷରୁ କୁହାଯାଇଛି। ତେବେ ହିଜବୁଲ୍ଲାର ରକେଟ ମାଡ଼ କ୍ଷମତା ଧ୍ବଂସ ନହେବା ପର୍ଯ୍ୟନ୍ତ ସାମରିକ କାର୍ଯ୍ୟାନୁଷ୍ଠାନ ଜାରି ରହିବ ବୋଲି କୁହାଯାଇଛି।

ବେରୁଟ୍‌: ଇସ୍ରାଏଲ ଆକ୍ରମଣରେ ହିଜବୁଲ୍ଲା ସଂଗଠନ ମୁଖ୍ୟ ହାସନ ନସରଲ୍ଲା ନିହତ ହୋଇଛନ୍ତି। ଶୁକ୍ରବାର ଭାରତୀୟ ସମୟ ରାତି ପ୍ରାୟ ୯ଟାରେ ଇସ୍ରାଏଲ ସେନା ପକ୍ଷରୁ ବେରୁଟସ୍ଥିତ ହିଜବୁଲ୍ଲାର ମୁଖ୍ୟାଳୟ ଉପରେ ପ୍ରଚଣ୍ଡ ବୋମାମାଡ଼ କରାଯାଇଥିଲା। ହିଜବୁଲ୍ଲା ମୁଖ୍ୟାଳୟ ଏବଂ ଏହାର ଆଖପାଖ ଅଞ୍ଚଳରେ ୮୦ ଟନରୁ ଅଧିକ ବୋମାମାଡ଼ କରାଯାଇଥିଲା ବେଳେ ଏହି ସମୟରେ ହାସନ ନସରଲ୍ଲାଙ୍କ ମୃତ୍ୟୁ ହୋଇଥିବା ପ୍ରଥମେ ଇସ୍ରାଏଲ ସେନା ପକ୍ଷରୁ ଦାବି କରାଯାଇଥିଲା। କିନ୍ତୁ ହିଜବୁଲ୍ଲା ଏ ସମ୍ପର୍କରେ କିଛି ସ୍ପଷ୍ଟ କରି ନଥିଲା। ତେବେ ଏହି ଘଟଣାର ପ୍ରାୟ ୨୦ ଘଣ୍ଟା ପରେ ଅର୍ଥାତ ଶନିବାର ସନ୍ଧ୍ୟାରେ ହିଜବୁଲ୍ଲା ଏହାର ମୁଖ୍ୟ ହାସନଙ୍କ ମୃତ୍ୟୁକୁ ନେଇ ସ୍ପଷ୍ଟ କରିଛି।

ହାସନଙ୍କୁ ହତ୍ୟା କରାଯିବା ପରେ ଇସ୍ରାଏଲ ସେନା ପକ୍ଷରୁ ଯେଉଁ ବିବୃତ୍ତି ଦିଆଯାଇଛି ତାହାକୁ ନେଇ ଇରାନ ଚିନ୍ତିତ ହୋଇପଡ଼ିଛି। ‘ହାସନଙ୍କ ମୃତ୍ୟୁ ଆମ ଅଭିଯାନର ଶେଷ ଲକ୍ଷ୍ୟ ନୁହେଁ, ବରଂ ଯେ କେହି ଇସ୍ରାଏଲୀମାନଙ୍କ ପ୍ରତି ବିପଦ ସୃଷ୍ଟି କରିବେ ସେମାନଙ୍କ ଠିକଣାରେ ପହଞ୍ଚିବାକୁ ଆମକୁ ସମୟ ଲାଗିବ ନାହିଁ ’ ବୋଲି ଇସ୍ରାଏଲ ସେନା ମୁଖ୍ୟ କହିବା ପରେ ଇରାନ ଏହାର ସର୍ବୋଚ୍ଚ ନେତା ଆୟାତୋଲ୍ଲା ଖାମନେଇଙ୍କ ସୁରକ୍ଷାକୁନ୍ଇେ ସତର୍କ ହୋଇପଡ଼ିଛି। ଖେମନେଇଙ୍କ ସୁରକ୍ଷା ବଢାଇ ଦିଆଯିବା ସହିତ ତାଙ୍କୁ ଶନିବାର ସନ୍ଧ୍ୟା ସୁଦ୍ଧା ଏକ ସୁରକ୍ଷିତ ସ୍ଥାନକୁ ନିଆଯାଇଥିବା ଜଣାପଡ଼ିଛି। ଉଲ୍ଲେଖଯୋଗ୍ୟ ଯେ, ବର୍ଷ ବର୍ଷ ଧରି ଇସ୍ରାଏଲ ବିରୋଧରେ ଲଢେଇ କରୁଥିବା ହିଜବୁଲ୍ଲା ସଂଗଠନକୁ ଇରାନ ପ୍ରୋତ୍ସାହିତ କରି ଆସିଥିଲା ବେଳେ ଅର୍ଥ ଠାରୁ ଆରମ୍ଭ କରି ସାମରିକ ସହାୟତା ଯୋଗାଇ ଦେଇ ଆସୁଛି। ଯାହାକୁ ନେଇ ଇରାନ ସହ ଇସ୍ରାଏଲର ମଧ୍ୟ ପରୋକ୍ଷ ଶତ୍ରୁତା ରହିଛି।

ଇସ୍ରାଏଲ ପକ୍ଷରୁ କିଛି ଦିନ ତଳେ ହିଜବୁଲ୍ଲା ସଂଗଠନକୁ ନିଶାଣ କରି ପ୍ରଥମେ ପେଜର ବିସ୍ଫୋରଣ କରାଯାଇଥିଲା ବେଳେ ଏହା ପରେ ପରେ ୱାକିଟକି ଏବଂ ମୋବାଇଲ ଫୋନରେ ବିସ୍ଫୋରଣ କରାଯାଇଥିଲା। ଏହି ଘଟଣାରେ ପ୍ରାୟ ୩୫ ଜଣଙ୍କ ମୃତ୍ୟୁ ହେବା ସହିତ ୫ ହଜାରରୁ ଅଧିକ ଲୋକ ଆହତ ହୋଇଥିଲେ। କିନ୍ତୁ ଏହି ଘଟଣା ପରେ ବି ଇସ୍ରାଏଲ ସେନା ଆକ୍ରମଣରୁ ବିରତ ହୋଇ ନଥିଲା। ହିଜବୁଲ୍ଲା ପକ୍ଷରୁ ଉତ୍ତର ଇସ୍ରାଏଲର ବିଭିନ୍ନ ସହରକୁ ନିଶାଣ କରାଯାଇ ରକେଟ୍‌ ମାଡ଼ କରାଯାଇଥିଲା ବେଳେ ଇସ୍ରାଏଲ ସେନା ହିଜବୁଲ୍ଲାକୁ ପୁରାପୁରି ନିର୍ମୂଳ କରିବାକୁ ପଣ କରିଥିଲା। ଏହାପରେ ବେରୁଟ୍‌ ସହ ଦକ୍ଷିଣ ଲେବାନନର ବିଭିନ୍ନ ଇଲାକାରେ ଇସ୍ରାଏଲ ଆକାଶମାର୍ଗରୁ ଘନ ଘନ ଆକ୍ରମଣ କରିଥିଲା। ଏହି ଆକ୍ରମଣରେ ହିଜବୁଲ୍ଲାର ବହୁ ପ୍ରମୁଖ କମାଣ୍ଡର ନିହତ ହୋଇଥିଲେ। ଏହାପରେ ଇସ୍ରାଏଲ ଗାଜା ଭଳି ଲେବାନନରେ ପ୍ରବେଶ କରି ସ୍ଥଳଭାଗରେ ଆକ୍ରମଣ କରିବା ସହିତ ହିଜବୁଲ୍ଲାକୁ ନିପାତ କରିବାକୁ ଘୋଷଣା କରିଥିଲା। କିନ୍ତୁ ଏହାଦ୍ବାରା ପଶ୍ଚିମ ଏସିଆରେ ସ୍ଥିତି ଆହୁରି ବିଗିଡ଼ି ଯିବା ଆଶଙ୍କା କରି ଆମେରିକା ଏବଂ ଫ୍ରାନ୍ସ ଇସ୍ରାଏଲକୁ ଆକ୍ରମଣରୁ ନିବୃତ୍ତ ରହିବାକୁ ପରାମର୍ଶ ଦେଇଥିଲେ। କିନ୍ତୁ ଇସ୍ରାଏଲ ଏହାକୁ ଆଦୌ କର୍ଣ୍ଣପାତ କରି ନଥିଲା। ବରଂ ଯୁଦ୍ଧ ପ୍ରସ୍ତୁତିକୁ ତ୍ବରାନ୍ବିତ କରି ଇସ୍ରାଏଲ ସେନା(ଆଇଡିଏଫ୍‌)କୁ ତୁରନ୍ତ ଲେବାନନ ସୀମାରେ ପହଞ୍ଚିବାକୁ ପ୍ରତିରକ୍ଷା ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଥିଲା। ସେହି ଅନୁସାରେ ଟ୍ୟାଙ୍କ, କମାଣ ଏବଂ ଗୁଳିଗୋଳା ସହ ଆଇଡିଏଫ ଗତକାଲି ଲେବାନନ ସୀମାରେ ପହଞ୍ଚିଥିଲା ବେଳେ କୌଣସି ମୁହୂର୍ତ୍ତରେ ଆଇଡିଏଫ ଆକ୍ରମଣ ଆରମ୍ଭ କରିଦେଇ ପାରେ ବୋଲି ସୂଚନା ମିଳିଥିଲା।

ଅନ୍ୟପକ୍ଷରେ ଗତକାଲି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁ ଜାତିସଂଘ ସାଧାରଣ ସଭାକୁ ସମ୍ବୋଧିତ କରିବାକୁ ପହଞ୍ଚିଥିଲା ବେଳେ ଇରାନ ସମେତ ବହୁ ରାଷ୍ଟ୍ରର ପ୍ରତିନିଧିମାନେ ସଭାଗୃହ ଛାଡି ପଳାଇଥିଲେ। ଇସ୍ରାଏଲ ଲେବାନନ ଉପରେ ଯୁଦ୍ଧ ଆରମ୍ଭ କରିବାକୁ ପ୍ରସ୍ତୁତି ନେଇଥିବାରୁ ଏହାକୁ ବିରୋଧ କରି ବହୁ ପ୍ରତିନିଧି କକ୍ଷତ୍ୟାଗ କରିଥିଲେ। ଏହାସତ୍ତ୍ବେ ନେତନ୍ୟାହୁ ସାଧାରଣ ସଭାରେ ହିଜବୁଲ୍ଲା ଏବଂ ହମାସ ଭଳି ଆତଙ୍କବାଦୀ ସଂଗଠନ ଉପରେ ବର୍ଷିଥିଲେ। ଇସ୍ରାଏଲ ନିଜର ଅସ୍ତିତ୍ବ ରକ୍ଷା ପାଇଁ ଲଢେଇ କରୁଥିଲା ବେଳେ ଏହିସବୁ ଆତଙ୍କୀ ସଂଗଠନଗୁଡିକୁ ନିପାତ ନ କରିବା ଯାଏ ଯୁଦ୍ଧରୁ ହଟିବ ନାହିଁ ବୋଲି ନେତନ୍ୟାହୁ ଅତ୍ୟନ୍ତ ଦୃଢତାର ସହ କହିଥିଲେ। ହିଜବୁଲ୍ଲାକୁ ଶେଷ କରିବା ପରେ ହିଁ ଯୁଦ୍ଧ ବନ୍ଦ ହେବ ବୋଲି କହିଥିଲେ। ଏହି ସମୟରେ ସେ ଜାତିସଂଘ ଆଭିମୁଖ୍ୟକୁ ମଧ୍ୟ ତୀବ୍ର ସମାଲୋଚନା କରିବାକୁ ପଛାଇ ନଥିଲେ। ଇସ୍ରାଏଲ ନିଜର ଅସ୍ତିତ୍ବ ପାଇଁ ବର୍ଷ ବର୍ଷ ଧରି ଲଢେଇ କରୁଥିଲା ବେଳେ କିଛି ରାଷ୍ଟ୍ର କେବଳ ରାଜନୀତି କରିବା ଉଦ୍ଦେଶ୍ୟରେ ଏଠାରେ ଟିକା ଟିପ୍ପଣୀ ଦେଉଛନ୍ତି ବୋଲି ନେତନ୍ୟାହୁ କହିଥିଲେ। ତେବେ ନେତନ୍ୟାହୁଙ୍କ ଏହି ଭାଷଣର ମାତ୍ର କିଛି ଘଣ୍ଟା ପରେ ହାସନ ନସରଲ୍ଲାଙ୍କୁ ହତ୍ୟା କରାଯାଇଛି। ତେବେ ନସରଲ୍ଲାଙ୍କ ମୃତ୍ୟୁ ଖବର ପ୍ରସାରିତ ହେବା ପରେ ମଧ୍ୟପ୍ରାଚ୍ୟରେ ଉତ୍ତେଜନା ବଢିଛି। ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଖେମନେଇ ତୁରନ୍ତ ଜରୁରୀ ବୈଠକ ଡାକି ସ୍ଥିତି ସମୀକ୍ଷା କରିଥିଲା ବେଳେ ଇସ୍ରାଏଲ ବିରୋଧରେ ସବୁ ଇସଲାମିକ୍‌ ରାଷ୍ଟ୍ର ଏକାଠି ହେବାକୁ ଆହ୍ବାନ ଦେଇଛନ୍ତି।

ନୂଆଦିଲ୍ଲୀ: ଇସ୍ରାଏଲ ବିରୋଧରେ ପ୍ରତିଶୋଧ ନେବାକୁ ପଣ କରିଥିବା ଇରାନ ବଡ଼ ଧରଣର ଆକ୍ରମଣ କରିବାକୁ ପ୍ରସ୍ତୁତି ଚଳାଇଛି। ସୋମବାର ସୁଦ୍ଧା ମିଳିଥିବା ସୂଚନା ଅନୁସାରେ ଇରାନ ଆକ୍ରମଣ ପାଇଁ ହିଜବୁଲ୍ଲା ଏବଂ ହୁତି ବିଦ୍ରୋହୀଙ୍କ ବ୍ୟତୀତ ରୁଷର ସହାୟତା ନେଇଛି। ଇତିମଧ୍ୟରେ ରୁଷିଆ ଗୁପ୍ତରେ ବହୁ ଅତ୍ୟାଧୁନିକ କ୍ଷେପଣାସ୍ତ୍ର ସହ ଅନ୍ୟ ଯୁଦ୍ଧ ସରଞ୍ଜାମ ଇରାନକୁ ଯୋଗାଇ ସାରିଥିବା ଆନ୍ତର୍ଜାତିକ ଗଣମାଧ୍ୟମରେ ଖବର ପ୍ରକାଶ ପାଇଛି। ସେପଟେ ଲେବାନନ ପଟୁ ହିଜବୁଲ୍ଲା ଆତଙ୍କବାଦୀ ଗତକାଲି ଠାରୁ ଇସ୍ରାଏଲ ଉପରେ କ୍ଷେପଣାସ୍ତ୍ର ମାଡ଼ ଆରମ୍ଭ କରିଥିଲା ବେଳେ ଆସନ୍ତା ୨୪ ଘଣ୍ଟା ମଧ୍ୟରେ ଯେକୌଣସି ମୁହୂର୍ତ୍ତରେ ଇରାନ ଇସ୍ରାଏଲ ଉପରେ ଆକ୍ରମଣ କରିବା ଆଶଙ୍କା ବଢିଛି। ଏଭଳି ସ୍ଥିତିରେ ଆମେରିକା ଜି-୭ ଗୋଷ୍ଠୀର ସହଯୋଗୀ ରାଷ୍ଟ୍ରମାନଙ୍କ ସହ ଆଲୋଚନା କରିଛି। ଆମେରିକା ବୈଦେଶିକ ସଚିବ ଆଣ୍ଟୋନୀ ବ୍ଲିନ୍କେନ ଭିଡିଓ କଲ୍ ଯୋଗେ ଜି-୭ ରାଷ୍ଟ୍ର ମୁଖ୍ୟମାନଙ୍କ ସହ ଆଲୋଚନା କରି ପରବର୍ତ୍ତୀ ରଣନୀତି ପ୍ରସ୍ତୁତ କରିବା ନେଇ ଆଲୋଚନା କରିଥିବା କୁହାଯାଇଛି। ରାଷ୍ଟ୍ରପତି ଜୋ ବାଇଡେନ ମଧ୍ୟ ଜାତୀୟ ସୁରକ୍ଷା ଟିମ୍ ସହ ଆଲୋଚନା କରିଛନ୍ତି।

ଗୋଟିଏ ପଟେ ଇରାନ, ହିଜବୁଲ୍ଲା ଏବଂ ୟେମେନର ହୁତି ବିଦ୍ରୋହୀ ମିଳିତ ଭାବେ ଇରାନ ଉପରେ ଆକ୍ରମଣ କରିବାକୁ ପ୍ରସ୍ତୁତି ଚଳାଇଥିଲା ବେଳେ ରୁଷ ଇରାନ ସହ ହାତ ମିଳାଇବା ଘଟଣା ଆମେରିକାକୁ ଚିନ୍ତିତ କରିଛି। ଏହାକୁ ନେଇ ମଧ୍ୟପ୍ରାଚ୍ୟ ଏକ ଭୀଷଣ ଯୁଦ୍ଧ କ୍ଷେତ୍ରକୁ ଠେଲି ହୋଇଯିବା ଆଶଙ୍କା ବଢିଛି। ସେପଟେ ଇରାନର ଯେକୌଣସି ଆହ୍ବାନକୁ ମୁକାବିଲା କରିବାକୁ ପ୍ରସ୍ତୁତ ରହିଥିବା ଇସ୍ରାଏଲ ପ୍ରଧାନମନ୍ତ୍ରୀ ନେତନ୍ୟାହୁ ବେଞ୍ଜାମିନ କହିଥିଲେ ହେଁ ତାଙ୍କର ସୁରକ୍ଷା ଲାଗି ନେତନ୍ୟାହୁଙ୍କ ସମେତ ତାଙ୍କ ମନ୍ତ୍ରିମଣ୍ଡଳର କେତେକ ପ୍ରମୁଖ ମନ୍ତ୍ରୀଙ୍କୁ ସୁଡ଼ଙ୍ଗ ଭିତରେ ସୁରକ୍ଷା କବଚ ମଧ୍ୟରେ ରଖାଯାଇଥିବା ସୂଚନା ମିଳିଛି।

ପୂର୍ବରୁ ଇରାନ କେବଳ ଡ୍ରୋନ ମାଧ୍ୟମରେ ଇସ୍ରାଏଲ ଉପରେ ଆକ୍ରମଣ କରିଥିଲା। ଯାହାକୁ ଇସ୍ରାଏଲ ଜୋର୍ଡାନ ଆକାଶରେ ନିରସ୍ତ୍ର କରିବାକୁ ସକ୍ଷମ ହୋଇଥିଲା। ଏହାବ୍ୟତୀତ ଯେଉଁ କେତେକ ଡ୍ରୋନ ଇସ୍ରାଏଲ ଆକାଶରେ ପ୍ରବେଶ କରିଥିଲା ସେଗୁଡିକୁ ଇସ୍ରାଏଲ ସେନା ନିଜର ଅତ୍ୟାଧୁନିକ ଡୋମ କବଚ ବ୍ୟବସ୍ଥା ଦ୍ବାରା ପ୍ରତିହତ କରିଦେଇଥିଲା। କିନ୍ତୁ ଏଥର ଇରାନ ପ୍ରଧାନମନ୍ତ୍ରୀ ନେତନ୍ୟାହୁଙ୍କ ସମେତ ପ୍ରତିରକ୍ଷା ମନ୍ତ୍ରୀଙ୍କ ଭଳି କିଛି ପ୍ରମୁଖ ନେତାଙ୍କୁ ନିଶାଣ କରିଛି। ଇସ୍ରାଏଲ ଯେଭଳି ହମାସ ନେତା ଇସ୍ମାଇଲ ହାନିଆଙ୍କୁ ଉଡାଇ ଦେଇଥିଲା ସେହି ଢଙ୍ଗରେ କ୍ଷେପଣାସ୍ତ୍ର ମାଡ଼ କରି ଏହି ନେତାମାନଙ୍କୁ ହତ୍ୟା କରିବାକୁ ଯୋଜନା କରିଛି। ତେଣୁ ଆକ୍ରମଣ ଆଶଙ୍କାକୁ ଦୃଷ୍ଟିରେ ରଖି ନେତନ୍ୟାହୁଙ୍କ ସମେତ ଅନ୍ୟ ନେତାମାନଙ୍କୁ ସୁଡ଼ଙ୍ଗ ମଧ୍ୟରେ ରଖାଯାଇଥିବା କୁହାଯାଇଛି। ଅନ୍ୟପଟେ ଇରାନର ଆକ୍ରମଣ ଯୋଜନାକୁ ନେଇ ସାରା ମଧ୍ୟପ୍ରାଚ୍ୟରେ ଗମ୍ଭୀର ପରିସ୍ଥିତି ସୃଷ୍ଟି ହୋଇଛି। ଏହି ଲଢେଇରେ ସିରିଆ , ଲେବାନନ ସମେତ ଅନ୍ୟ କିଛି ଇସଲାମିକ ରାଷ୍ଟ୍ର ସାମିଲ ହୋଇପାରନ୍ତି ବୋଲି କୁହାଯାଉଛି। ଏଭଳି ସ୍ଥିତିରେ ମଧ୍ୟପ୍ରାଚ୍ୟରେ ଉପୁଜିଥିବା ସଙ୍କଟ ସାରା ବିଶ୍ବକୁ ପ୍ରଭାବିତ କରିପାରେ ବୋଲି ସାମରିକ ବିଶେଷଜ୍ଞମାନେ ଆକଳନ କରିଛନ୍ତି।

ନୂଆଦିଲ୍ଲୀ: ଇରାନରେ ଆକ୍ରମଣ କରି ହମାସ ମୁଖ୍ୟ ଇସ୍‌ମାଇଲ ହାନିୟେଙ୍କୁ ଇସ୍ରାଏଲ ହତ୍ୟା କରିଛି। ଏହାକୁ ନେଇ ଦୁଇ ଦେଶ ମଧ୍ୟରେ ଚାପା ଉତ୍ତେଜନା ପ୍ରକାଶ ପାଇଛି। ଇରାନ ସର୍ବୋଚ୍ଚ ନେତା ଅୟତୁଲ୍ଲାହ ଖାମନେଇ ହତ୍ୟାର ପ୍ରତିଶୋଧ ନେବାକୁ ଇସ୍ରାଏଲ ଉପରେ ଆକ୍ରମଣ କରିବାକୁ ନିର୍ଦ୍ଦେଶ ଦେଇଛନ୍ତି। ଇରାନ ତିଶା ବି’ଏଭି (ଅଗଷ୍ଟ ୧୨ ଏବଂ ୧୩) ଦିନ ଇସ୍ରାଏଲ ଉପରେ ଆକ୍ରମଣ କରିପାରେ ବୋଲି ପଶ୍ଚିମ ଦେଶର ଗୁଇନ୍ଦା ସୂତ୍ରରୁ ସୂଚନା ମିଳିଛି। ଇରାନ ଏବଂ ହିଜବୁଲ୍ଲା ମିଶି ଏହି ଆକ୍ରମଣ କରିପାରନ୍ତି ବୋଲି କୁହାଯାଇଛି। ଏହାକୁ ନେଇ ମଧ୍ୟ-ପ୍ରାଚ୍ୟରେ ଉତ୍ତେଜନା ବୃଦ୍ଧି ପାଇଛି। ଏବେ ଇସ୍ରାଏଲ ସତର୍କ ହୋଇ ରହିଛି। ଦେଶର ଯେକୌଣସି ସ୍ଥିତିର ମୁକାବିଲା କରିବାକୁ ପ୍ରସ୍ତୁତ ଅଛି ବୋଲି ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁ କହିଛନ୍ତି। ଇସ୍ରାଏଲ ବିରୋଧରେ କାର୍ଯ୍ୟାନୁଷ୍ଠାନ ନେଲେ ଭୟଙ୍କର ପରିଣତି ଭୋଗିବ ବୋଲି ଚେତାବନୀ ଦେଇଛନ୍ତି। ଏଭଳି ସ୍ଥିତିକୁ ଦେଖି ଏୟାର ଇଣ୍ଡିଆ ଇସ୍ରାଏଲକୁ ସମସ୍ତ ଉଡ଼ାଣକୁ ୮ ତାରିଖ ପର୍ଯ୍ୟନ୍ତ ବନ୍ଦ କରିଦେଇଛି। ପଶ୍ଚିମ ଏସିଆର ସ୍ଥିତିକୁ ଦେଖି ତତ୍କାଳ ପ୍ରଭାବରେ ଏହି ନିଷ୍ପତ୍ତି ନିଆଯାଇଥିବା କୁହାଯାଇଛି। ସ୍ଥିତି ଉପରେ ନଜର ରଖାଯାଇଛି। ଟିକଟ ବୁକ୍‌ କରିଥିବା ଯାତ୍ରୀଙ୍କୁ ଟଙ୍କା ଫେରାଇ ଦିଆଯିବ ବୋଲି କୁହାଯାଇଛି।

ଏହା ମଧ୍ୟରେ ଆମେରିକା ରାଷ୍ଟ୍ରପତି ଜୋ ବାଇଡେନ ଇସ୍ରାଏଲ ସପକ୍ଷରେ ବାହାରିଛନ୍ତି। ଇରାନ ଆକ୍ରମଣ କଲେ ଇସ୍ରାଏଲକୁ ଆମେରିକା ସୁରକ୍ଷା ଦେବ ବୋଲି ଘୋଷଣା କରିଛନ୍ତି। ଏପରି ସମୟରେ ଲେବାନନର ଆତଙ୍କବାଦୀ ସଂଗଠନ ହିଜବୁଲ୍ଲା ମୁଖ୍ୟ ହସନ ନସରଲ୍ଲାହ ଇସ୍ରାଏଲଠାରୁ ପ୍ରତିଶୋଧ ନେବ ବୋଲି ଧମକ ଦେଇଛି। ଏବେ ଇସ୍ରାଏଲ ଖୁସି ହେଉଛି, ଆଗକୁ କାନ୍ଦିବ ବୋଲି କହିଛି। ଏହାର କିଛି ଘଣ୍ଟା ପରେ ହିଜବୁଲ୍ଲା ଇତ୍ତର ଇସ୍ରାଏଲରେ ଅନେକ ରକେଟ ମାଡ଼ କରିଛି। ଅନ୍ୟପକ୍ଷରେ ଶୁକ୍ରବାର ହମାସ ମୁଖ୍ୟଙ୍କୁ କାତାରର ରାଜଧାନୀ ଦୋହାରେ କବର ଦିଆଯାଇଛି। ଏହି ସମୟରେ କାତାର ଏବଂ ପାଲେଷ୍ଟାଇନ ଗୋଷ୍ଠୀର ଅନେକ ନେତା ସାମିଲ ଥିଲେ। ଏହା ମଧ୍ୟରେ ଏନୱାଇଟି ପକ୍ଷରୁ ଜାରି ରିପୋର୍ଟରେ ବୋମା ବିସ୍ଫୋରଣରେ ହାନିୟେଙ୍କ ମୃତ୍ୟୁ ହୋଇଥିବା କୁହାଯାଇଛି। ଏଥିପାଇଁ ୨ ମାସ ପୂର୍ବରୁ ହାନିୟେ ଥିବା ଘରେ ବୋମା ରଖା ଯାଇଥିଲା। ସେ ପହଞ୍ଚିବା ପରେ ରିମୋଟ ମାଧ୍ୟମରେ ବିସ୍ଫୋରଣ କରାଯାଇଥିଲା।