ଭୁବନେଶ୍ୱର: ରାଜ୍ୟର ଆଇନଶୃଙ୍ଖଳା ବ୍ୟବସ୍ଥାକୁ ନେଇ ଅକସ୍ମାତ ସକ୍ରିୟ ହୋଇଛି ପୁଲିସ । ଡିଜି ପାହ୍ୟାରୁ ଆଇଜି ପାହ୍ୟା ପର୍ଯ୍ୟନ୍ତ ୧୫ଜଣ ବରିଷ୍ଠ ଆଇପିଏସ୍‌ ଅଫିସରଙ୍କ ଉପରେ ୧୭ଟି ଜିଲ୍ଲାର ଆଇନଶୃଙ୍ଖଳାର ସ୍ୱତନ୍ତ୍ର ନିରୀକ୍ଷଣ ଓ ତଦାରଖ ଦାୟିତ୍ୱ ନ୍ୟସ୍ତ କରାଯାଇଛି। ସମ୍ପୃକ୍ତ ଆଇପିଏସ୍‌ ଅଫିସରମାନେ ଜିଲ୍ଲାକୁ ଗସ୍ତ କରି ସେଠାରେ ଆଇନଶୃଙ୍ଖଳା ପରିସ୍ଥିତି, ଅପରାଧ ନିୟନ୍ତ୍ରଣ, ପୁଲିସ ଥାନାର କାର୍ଯ୍ୟକାରିତା, ଜିଲ୍ଲା ପୁଲିସ କାର୍ଯ୍ୟାଳୟ, ସଂରକ୍ଷିତ କାର୍ଯ୍ୟାଳୟ ଓ ସାମଗ୍ରିକ ପୁଲିସ ପରିଚାଳନାର ତଦାରଖ କରିବେ। କ୍ରାଇମବ୍ରାଞ୍ଚ ଡିଜି ବିନୟତୋଷ ମିଶ୍ରଙ୍କୁ ବାଲେଶ୍ୱର ଓ ଭଦ୍ରକ, ଏଡିଜି ସଞ୍ଜୀବ ପଣ୍ଡାଙ୍କୁ କୋରାପୁଟ ଓ ରାୟଗଡ଼ା ଜିଲ୍ଲାର ନିରୀକ୍ଷଣ ଦାୟିତ୍ୱ ପ୍ରଦାନ କରାଯାଇଛି। 

ସେହିପରି ୧୩ଜଣ ବରିଷ୍ଠ ଆଇପିଏସ ଅଫିସରଙ୍କୁ ଗୋଟିଏ ଲେଖାଏଁ ଜିଲ୍ଲା ଦାୟିତ୍ୱ ଦିଆଯାଇଛି। ଏଡିଜି ସୌମେନ୍ଦ୍ର ପ୍ରିୟଦର୍ଶୀଙ୍କୁ ଜଗତସିଂହପୁର, ରେଳବାଇ ଏଡିଜି ଅରୁଣ ବୋଥ୍ରାଙ୍କୁ ଅନୁଗୁଳ, ଏଡିଜି ସଞ୍ଜୟ କୁମାରଙ୍କୁ ସମ୍ୱଲପୁର, ଏଡିଜି ରାଜେଶ କୁମାରଙ୍କୁ ନୟାଗଡ଼, ଏଡିଜି ପ୍ରତୀକ ମହାନ୍ତିଙ୍କୁ ଯାଜପୁର, ଏଡିଜି ୟତୀନ୍ଦ୍ର କୋଏଲଙ୍କୁ କଳାହାଣ୍ଡି, ଏଡିଜି ଏସ.ସାଇନିଙ୍କୁ ବଲାଙ୍ଗୀର ଜିଲ୍ଲାର ତଦାରଖ ଦାୟିତ୍ୱ ଦିଆଯାଇଛି। ପୁନଶ୍ଚ ଆଇଜି ଏସ.ପ୍ରବୀଣ କୁମାରଙ୍କୁ କନ୍ଧମାଳ, ଆଇଜି ଗଜଭିୟେ ସତୀଶ କୁମାର ଈଶ୍ୱରଦାସଙ୍କୁ ଢେଙ୍କାନାଳ, ଆଇଜି ଦୀପକ କୁମାରଙ୍କୁ ମାଲକାନଗିରି, ଆଇଜି ଅନୁପ କୁମାର ସାହୁଙ୍କୁ ପୁରୀ, ଆଇଜି ଅବିନାଶ କୁମାରଙ୍କୁ ମୟୂରଭଞ୍ଜ ଓ ଆଇଜି ସାର୍ଥକ ଷଡ଼ଙ୍ଗୀଙ୍କୁ କେନ୍ଦ୍ରାପଡ଼ା ଜିଲ୍ଲାର ଦାୟିତ୍ୱ ନ୍ୟସ୍ତ ହୋଇଥିବା ଜଣାପଡ଼ିଛି।

ହସନ: ଅଧା ରହିଗଲା ଆଇପିଏସ ଚାକରିରି କରି ଚୌକିରେ ବସିବାର ସ୍ବପ୍ନ । ଚାକିରିରେ ଯୋଗ ଦେବାକୁ ଯାଉଥିବା ବେଳେ ଚାଲିଗଲା ଜଣେ ଆଇପିଏସଙ୍କ ଜୀବନ । ଘଟଣା ଘଟିଛି କର୍ଣ୍ଣାଟକର ହସନରେ । ମୃତକ ହେଲେ ୨୬ ବର୍ଷୀୟ ଆଇପିଏସ୍ ହର୍ଷବର୍ଦ୍ଧନ । ତାଙ୍କ ଘର ମଧ୍ୟପ୍ରଦେଶ ଜବଲପୁରରେ ବୋଲି ଜଣାପଡିଛି ।

ସୂଚନାଯୋଗ୍ୟ, ପିଲାଟେ ଦିନରୁ ଆଇପିଏସ୍ ହୋଇ ଲୋକଙ୍କ ସେବେ କରିବାକୁ ସ୍ବପ୍ନ ଦେଖିଥିଲେ ହର୍ଷବର୍ଦ୍ଧନ। ଆଉ ବାପାମାଆଙ୍କ ସ୍ବପ୍ନ ବି ପୂରଣ କରିବେ। ପରିଶ୍ରମ କରି ଆଇପିଏସ୍ ପାଇ ବି ଥିଲେ । ହେଲେ ବିଧିର ବିଧାନ ଥିଲା ଭିନ୍ନ । ଚାକିରିରେ ଯୋଗ ଦେବା ପୂର୍ବରୁ ଚାଲିଗଲା ହର୍ଷବର୍ଦ୍ଧନଙ୍କ ଜୀବନ।

ବିଡ଼ମ୍ଵନା ଯେ, ଚାକିରିରେ ଯୋଗ ଦେବାକୁ ଯାଉଥିବା ବେଳେ ଦୁର୍ଘଟଣାରେ ହର୍ଷବର୍ଦ୍ଧନଙ୍କ ମୃତ୍ୟୁ ଘଟିଛି । ତାଙ୍କର ପ୍ରଥମ ପୋଷ୍ଟିଂ ଥିଲା କର୍ଣ୍ଣାଟକର ହସନ ଜିଲ୍ଲାରେ । ଚାକିରିରେ ଯୋଗ ଦେବାକୁ ସେ ଯିବା ବେଳେ ତାଙ୍କ ଜିପର ଟାୟାର ଫାଟି ଯାଇଥିଲା । ଡ୍ରାଇଭର ଗାଡ଼ି ସମ୍ଭାଳି ନପାରିବାରୁ ତାହା ଓଲଟି ପଡ଼ିଥିଲା । ଏଥିରେ ଡ୍ରାଇଭର ଓ ହର୍ଷବର୍ଦ୍ଧନ ଗୁରୁତର ଆହତ ହୋଇଥିଲେ । ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି ଡାକ୍ତରଖାନାକୁ ନେଇଥିଲେ ମଧ୍ୟ ଯୁବ ଆଇପିଏସଙ୍କ ମୃତ୍ୟୁ ଘଟିଥିଲା । ୨୦୨୩ ବ୍ୟାଚର ଆଇପିଏସ୍ ହର୍ଷବର୍ଦ୍ଧନ କିଛି ଦିନ ତଳେ ମହୀଶୂରରେ ଟ୍ରେନିଂ ସାରିଥିଲେ । ଡ୍ରାଇଭର ଏବେ ଚିକିତ୍ସାଧୀନ ଥିବା ଜଣାପଡ଼ିଛି ।