ମୁମ୍ବଇ: ୨୦୦୬ ମସିହାରେ ମୁକ୍ତିଲାଭ କରିଥିଲା ସୁପରହିଟ୍ କମେଡି ଫିଲ୍ମ ‘ଭାଗମ୍ ଭାଗ୍’। ପ୍ରିୟଦର୍ଶନ ଏହାର ନିର୍ଦ୍ଦେଶନା ଦେଇଥିଲେ। ଏହା ଦର୍ଶକଙ୍କୁ ଭରପୂର ମନୋରଞ୍ଜନ ଦେବା ସହ ବକ୍ସ ଅଫିସ୍‌ରେ ବି ଭଲ ଆୟ କରିଥିଲା। ସିନେମାର ମୁଖ୍ୟ ଚରିତ୍ରରେ ନଜର ଆସିଥିଲେ ଅକ୍ଷୟ କୁମାର, ପରେଶ ରାୱଲ ଓ ଗୋବିନ୍ଦା। ଦୀର୍ଘ ୧୮ ବର୍ଷ ପରେ ଏବେ ଏହାର ସିକ୍ବେଲ ଆସିବାକୁ ଯାଉଛି। ଏନେଇ ବିଧିବଦ୍ଧ ଭାବେ ଘୋଷଣା କରାଯାଇଛି। ଏହା ସହ ଏହି ଫିଲ୍ମ ମାଧ୍ୟମରେ ପୁଣି ଥରେ ଅକ୍ଷୟ କୁମାର, ଗୋବିନ୍ଦା ଏବଂ ପରେଶ ରାୱଲଙ୍କୁ ଏକାଠି ଦେଖିବାକୁ ମିଳିବ। ସରିତା ଅଶ୍ବିନ ବର୍ଦେ, ଶେମାରୁ ଏଣ୍ଟରଟେନମେଣ୍ଟ ସହ ମିଶି ଏହି ଫିଲ୍ମର ନିର୍ମାଣ କରିବେ। କେବଳ ସେତିକି ନୁହେଁ, ସରିତା ଏହାର କାହାଣୀ ମଧ୍ୟ ଲେଖୁଛନ୍ତି। ୨୦୨୫ ମଧ୍ୟଭାଗରେ ଏହି ଚଳଚ୍ଚିତ୍ରର ସୁଟିଂ ଆରମ୍ଭ ହୋଇପାରେ ବୋଲି କୁହାଯାଉଛି। ଫିଲ୍ମଟି ଯେଭଳି ଅଧିକ ମଜାଦାର ହେବ ସେଥିପ୍ରତି ନିର୍ମାତା ଗୁରୁତ୍ବ ଦେଉଛନ୍ତି। ବହୁତ ଜଲ୍‌ଦି ଫିଲ୍ମ ନିର୍ମାତା ଏହାର ଟାଇଟଲ୍‌ ଓ ଷ୍ଟାରକାଷ୍ଟ ଘୋଷଣା କରିପାରନ୍ତି ବୋଲି ଚର୍ଚ୍ଚା ହେଉଛି।