ଭୁବନେଶ୍ୱର: ‘ୱାଲଟିୟର ୱାର’ରେ ପରାସ୍ତ ହୋଇଛି ଓଡ଼ିଶା । ଏହି ରେଳ ଡିଭିଜନକୁ ଖଣ୍ଡଖଣ୍ଡ କରାଯିବା ପ୍ରସ୍ତାବକୁ କେନ୍ଦ୍ର କ୍ୟାବିନେଟ୍‌ ଆଜି ଅନୁମୋଦନ ଦେଇଛି। ଏହାସହିତ ପୂର୍ବ କ୍ୟାବିନେଟ୍‌ ନେଇଥିବା ନିଷ୍ପତ୍ତିକୁ ମଧ୍ୟ କେନ୍ଦ୍ର କ୍ୟାବିନେଟ୍‌ ପରିବର୍ତ୍ତନ କରିଛି। ୱାଲଟିୟର ଡିଭିଜନ ବ୍ରିଟିଶ୍‌ ନାମକୁ ସୂଚାଉଥିବାରୁ ଏହାକୁ ପରିବର୍ତ୍ତନ କରିବାକୁ ମଧ୍ୟ ନିଷ୍ପତ୍ତି ହୋଇଛି। କେନ୍ଦ୍ର କ୍ୟାବିନେଟ୍‌ର ଏହି ନିଷ୍ପତ୍ତି ପରେ ଓଡ଼ିଶାର ଶେଷ ଚେଷ୍ଟା ଓ ସମସ୍ତ ଦାବି ନିଷ୍ଫଳ ହୋଇଛି। ଇଷ୍ଟକୋଷ୍ଟ ରେଳବାଇରୁ ୱାଲଟିୟର ନାମ ଲିଭାଇ ଦିଆଯିବା ସହ ଓଡ଼ିଶାକୁ ରାୟଗଡ଼ା ଡିଭିଜନ ଭାବରେ ଏକ ଲଲିପପ୍‌ ଧରାଇ ଦିଆଯାଇଛି ।

ଆଜି କେନ୍ଦ୍ର କ୍ୟାବିନେଟ ବୈଠକରେ ପୂର୍ବରୁ ନିଷ୍ପତ୍ତି ହୋଇଥିବା ବିଶାଖାପାଟଣା ଡିଭିଜନ୍‌ ଗଠନ ନିଷ୍ପତ୍ତିରେ ପରିବର୍ତ୍ତନ କରାଯାଇଛି। ଏହାସହ ୱାଲଟିୟର ଡିିଭିଜନକୁ ଦୁଇ ଭାଗରେ ବାଣ୍ଟିବାକୁ ରେଳ ବୋର୍ଡ ଦେଇଥିବା ପ୍ରସ୍ତାବ ଉପରେ କ୍ୟାବିନେଟ୍‌ ମୋହର ମାରିଛି। ୱାଲଟିୟର ଡିଭିଜନର ବିଭାଜନ କରାଯାଇ ଗୋଟିଏ ଭାଗରେ ପଲାସା-ବିଶାଖାପାଟଣା-ଦୁଭାଡ଼ା, କୁନେରୁ-ବିଜୟନଗରମ୍‌, ନୂଆପଡ଼ା ଜଂସନ୍‌-ପାରଳାଖେମୁଣ୍ଡି, ବୋବିଲି ଜଂସନ୍‌-ସାଲୁର, ସୀମାଞ୍ଚଳମ୍‌ ଉତ୍ତର-ଦୁଭାଡ଼ା ବାଇପାସ, ଭାଦାଲାପୁଡି-ଦୁଭାଡ଼ା ଓ ବିଶାଖାପାଟଣା ଷ୍ଟିଲ୍‌ ପ୍ଲାଣ୍ଟ-ଜଗାୟାପେଲେମ୍‌ (୪୧୦ କିମି) ସେକ୍ସନ୍‌କୁ ନବଗଠିତ ଦକ୍ଷିଣ ତଟ ରେଳପଥ ଅଧୀନରେ ରଖାଯାଇଛି। ଏହା ବିଶାଖାପାଟଣା ଡିଭିଜନ୍‌ ଭାବରେ ମାନ୍ୟତା ପାଇବ। ଅପରପକ୍ଷେ ପୂର୍ବତଟ ରେଳପଥ ଅଧୀନରେ କୋଟ୍ଟାଭାଲାସା-ବାଚେଲି, କୁନେରୁ-ଥେରୁବାଲି ଜଙ୍କସନ, ସିଗନାପୁର ରୋଡ଼-କୋରାପୁଟ ଜଙ୍କସନ୍‌, ପାରଳାଖେମୁଣ୍ଡି-ଗୁଣୁପୁର (୬୮୦ କିମି) ରହିବ। ୱାଲିଟିୟର୍‌ ଡିଭିଜନ୍‌ର ଏସବୁ ସେକ୍ସନ୍‌ ପୂର୍ବତଟ ରେଳପଥ ରାୟଗଡ଼ା ଡିଭିଜନ୍‌ ଅଧୀନରେ କାର୍ଯ୍ୟ କରିବ।

ରାୟଗଡ଼ା ଡିଭିଜନରେ ରେଳ ପଥର ଦୈର୍ଘ୍ୟ ଅଧିକ ରହିଥିଲେ ମଧ୍ୟ ତୁଳନାତ୍ମକ ଭାବରେ ଏହା କମ୍‌ ରାଜସ୍ୱ ଆୟକାରୀ ଅଞ୍ଚଳ ରୂପେ ପରିଗଣିତ ହେବ। ୱାଲଟିୟର ଡିଭିଜନକୁ ପୂର୍ବତଟ ରେଳପଥରୁ କାଢ଼ି ନିଆଯିବାକୁ ଓଡ଼ିଶାରେ ତୀବ୍ର ବିରୋଧ କରାଯାଉଥିଲେ ହେଁ ଏହାକୁ କେନ୍ଦ୍ର ସରକାର ଗୁରତ୍ୱ ଦେଇ ନାହାନ୍ତି। ବିରୋଧୀ ବିଜେଡି, କଂଗ୍ରେସ ଓ ଅନ୍ୟ ରାଜନୈତିକ ଦଳଗୁଡ଼ିକ ଏହି ପ୍ରସଙ୍ଗରେ କେନ୍ଦ୍ର ନିକଟରେ ଆପତ୍ତି କରିଥିଲେ ହେଁ ରେଳବାଇ ମଧ୍ୟ ଏ ପ୍ରସଙ୍ଗରେ ନିରବ ରହିଛି । ରାଜ୍ୟର ଡବଲ ଇଞ୍ଜିନ୍‌ ସରକାର ମଧ୍ୟ ଏହି ପ୍ରସଙ୍ଗରେ ରହସ୍ୟମୟ ନିରବତା ଅବଲମ୍ବନ କରିଛନ୍ତି । ଯାହା ଫଳରେ ଓଡ଼ିଶା ସବୁ ଦୃଷ୍ଟିରୁ କ୍ଷତିଗ୍ରସ୍ତ ହୋଇଛି ।

ଭୁବନେଶ୍ବର: ପୂର୍ବତଟ ରେଳବାଇରୁ ୱାଲଟିୟର ଡିଭିଜନକୁ ଅଲଗା କରିବାକୁ ନେଇ କେନ୍ଦ୍ର ଓ ରାଜ୍ୟର ବିଜେପି ସରକାରକୁ ଓଡ଼ିଆ ଅସ୍ମିତା ପରିଷଦ କଡା ସମାଲୋଚନା କରିଛି। ଖଣିଜ ପରିବହନରେ ଭାରତୀୟ ରେଳକୁ ସବୁଠୁ ଅଧିକ ରାଜସ୍ୱ ଦେଉଛି ପୂର୍ବତଟ ରେଳପଥ। ସମ୍ବଲପୁର, ଖୋର୍ଦ୍ଧା ଓ ୱାଲଟିୟର ଡିଭିଜନକୁ ନେଇ ଗଠିତ ପୂର୍ବତଟ ରେଳପଥ। କିନ୍ତୁ କେନ୍ଦ୍ର ସରକାରଙ୍କ ଆନ୍ଧ୍ର ପ୍ରୀତି ଯୋଗୁଁ ଏହା ବିଖଣ୍ଡିତ ହେବାକୁ ବସିଛି।

ଆସନ୍ତା ୨୯ ତାରିଖରେ ପ୍ରଧାନମନ୍ତ୍ରୀ ଦକ୍ଷିଣତଟ ରେଳବାଇର ବିଶାଖାପାଟଣାରେ ମୁଖ୍ୟାଳୟକୁ ଉଦଘାଟନ କରିବାର କାର୍ଯ୍ୟକ୍ରମ ରହିଛି। ଯେଉଁଠିକୁ ୱାଲଟିୟାର ଡିଭିଜନକୁ ନିଆଯିବ। ଓଡ଼ିଶାର ୨୫୪ କିଲୋମିଟର ରେଳପଥ ଦକ୍ଷିଣତଟକୁ ଚାଲିଯିବ। ଖଡ଼ଗପୁର ଜୋନରେ ଓଡ଼ିଶାର ବାଲେଶ୍ୱର ମୟୁରଭଞ୍ଜର ବହୁ ଖଣିଜ ବହୁଳ ଅଞ୍ଚଳ ପୂର୍ବରୁ ଚାଲିଯାଇଛି। ଚକ୍ରଧରପୁର ଡିଭିଜନରେ ଝାରସୁଗୁଡା, କେନ୍ଦୁଝର, ବଣାଇ ଅଞ୍ଚଳ ରହିଯାଇଛି। ତେଣୁ ଏବେ ପୂର୍ବତଟ ରେଳପଥରେ ରହିବ କ’ଣ ବୋଲି ପ୍ରଶ୍ନ କରିଛି ଅସ୍ମିତା ପରିଷଦ।

କେନ୍ଦ୍ର ସରକାର ଓଡିଶାକୁ ରେଳବାଇ କ୍ଷେତ୍ରରେ ଯେଉଁ ତିନି ଗୁଣ ଅନୁଦାନ ଦେଉଛନ୍ତି ବୋଲି ଦାବି କରୁଛନ୍ତି ତାର ମାନେ କଣ ବୋଲି ପ୍ରଶ୍ନ କଲା ଓଡିଆ ଅସ୍ମିତା ପରିଷଦ। ରେଳବାଇକୁ କେନ୍ଦ୍ର ଖଣ୍ଡବିଖଣ୍ଡିତ କରି ଓଡ଼ିଶାର ହକକୁ ଛଡାଇ ନେଉଛନ୍ତି। ମହାନଦୀ ପୋଲାଭରମ କ୍ଷତ ଲିଭିନାହିଁ। ରେଳବାଇର ଓଡିଶାକୁ ଖଣ୍ଡବିଖଣ୍ଡିତ କରିବାର ଷଡ଼ଯନ୍ତ୍ରର ଆଜି ମୁଣ୍ଡି ମରିବାକୁ ଯାଉଛି। ଓଡ଼ିଶାର ସ୍ୱାଭିମାନ ଓ ଆର୍ଥିକ ସ୍ଵଛଳତାକୁ ଆଖି ଆଗରେ ରଖି ଓଡ଼ିଶାର ସାଂସଦ ମାନେ ସଂସଦରେ କଥା ଉଠାଇବାକୁ ଦାବି କରିଛି ଓଡ଼ିଆ ଅସ୍ମିତା ପରିଷଦ।

ଓଡିଶାରୁ ପ୍ରତିନିଧିତ୍ୱ କରୁଥିବା ରେଳମନ୍ତ୍ରୀ ଏ ଦିଗରେ ଧ୍ୟାନ ଦେବାକୁ ଦାବି କରିଛି ପରିଷଦ। ବିଧାନସଭାରେ ଏ ସମ୍ପର୍କରେ ସର୍ବସମ୍ମତ ନିନ୍ଦା ପ୍ରସ୍ତାବ ଗୃହୀତ ହେଉ। ପରିବହନ କ୍ଷେତ୍ରରେ ପୂର୍ବତଟ ରେଳପଥ ୨୫ ହଜାର କୋଟିରୁ ଅଧିକ ଅର୍ଥ ଦେଉଥିଲା। ୱାଲଟିୟାର ଡିଭିଜନ ଦେଉଥିଲା ୮ ରୁ ୧୦ ହଜାର କୋଟି। ଏହି ରାଜସ୍ୱ ଓଡିଶା ହରାଇବ। କେବଳ ସମ୍ବଲପୁର ଓ ଖୋର୍ଦ୍ଧା ଡିଭିଜନକୁ ନେଇ ପୂର୍ବତଟ ରେଳପଥ ଚାଲିବ ଯାହାକି ସମ୍ପୂର୍ଣ୍ଣ ମୂଲ୍ୟହୀନ ହୋଇପଡିବ।

ଓଡିଶାକୁ ଖଣ୍ଡବିଖଣ୍ଡିତ କରିବାର ଚକ୍ରାନ୍ତ ଆରମ୍ଭ ହୋଇଥିବା ଅଭିଯୋଗ ଆଣିଛି ଓଡ଼ିଆ ଅସ୍ମିତା ପରିଷଦର ଆବାହକ ରବି ବେହେରା। ଓଡ଼ିଶାର ସମ୍ପଦ ଉପରେ ବହୁ ପୁଞ୍ଜିପତି ଓ ପଡୋଶୀ ରାଜ୍ୟର ଲୋଲୁପ ଦୃଷ୍ଟି ପଡିଛି। ଗୃହମନ୍ତ୍ରୀ ଓଡିଶା ଆସୁଛନ୍ତି ତେଣୁ ଓଡ଼ିଶାର ସୀମା ଓ ଖଣି ପାଣିକୁ ନେଇ ଯୋଉ ବିବାଦ ଲାଗିଛି ତାକୁ ସମାଧନ କରିବାକୁ ଦାବି ଉଠିଛି। ଓଡ଼ିଆ ଅସ୍ମିତାର କଥା ଯେଉଁମାନେ କହିଥିଲେ ଏହାକୁ କେତେଦୂର ଜଗିଛନ୍ତି ତାହା ଜଣା ପଡିଯାଉଛି ବୋଲି କହିଲା ପରିଷଦ। ତୁରନ୍ତ ଏସବୁ ପ୍ରସଙ୍ଗରେ ପ୍ରଧାନମନ୍ତ୍ରୀ ଓ କେନ୍ଦ୍ର ଗୃହମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିବାକୁ ଦାବି କରାଯିବା ସହ ଏହା କରା ନ ଗଲେ ଓଡିଶା ବନ୍ଦର ଡାକରା ଦିଆଯିବ ବୋଲି ଚେତାବନୀ ଦେଇଛି ଓଡ଼ିଆ ଅସ୍ମିତା ପରିଷଦ।