କର୍ମଚାରୀ ଭବିଷ୍ୟ ନିଧି ସଂଗଠନ ବା EPFO ର କୋଟି କୋଟି ସଦସ୍ୟ ନିଜ ପିଏଫ୍ (PF) ଖାତାରେ ସୁଧ ଟଙ୍କା ଜମା ହେବା ନେଇ ଅପେକ୍ଷା କରିଛନ୍ତି। ଆର୍ଥିକ ବର୍ଷ ୨୦୨୫-୨୬ ପାଇଁ ପିଏଫ୍ ଉପରେ ସୁଧ ହାରକୁ ୮.୨୫% ସ୍ଥିର ରଖାଯାଇଛି। ସୁଧ ହାର ସ୍ଥିର କରାଯିବାର ଦୁଇ ମାସ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ ହିତାଧିକାରୀଙ୍କ ଖାତାକୁ ଟଙ୍କା ଆସିନାହିଁ। ଏହି ପ୍ରସଙ୍ଗରେ ଏବେ ଏକ ବଡ଼ ଅପଡେଟ୍ ସାମ୍ନାକୁ ଆସିଛି।

କେବେ ଆସିବ ସୁଧ ଟଙ୍କା?

ଗତ ମାର୍ଚ୍ଚ ୨୦୨୬ ରେ ଇପିଏଫଓର କେନ୍ଦ୍ରୀୟ ଟ୍ରଷ୍ଟି ବୋର୍ଡ (CBT) ଆର୍ଥିକ ବର୍ଷ ୨୦୨୫-୨୬ ପାଇଁ ଇପିଏଫ୍ ଜମା ଉପରେ ବାର୍ଷିକ ୮.୨୫% ସୁଧ ହାର ପ୍ରଦାନ କରିବାକୁ ସୁପାରିଶ କରିଥିଲା। ଶ୍ରମ ଏବଂ ରୋଜଗାର ମନ୍ତ୍ରଣାଳୟ ଦ୍ୱାରା ଏନେଇ ପ୍ରେସ୍ ବିଜ୍ଞପ୍ତି ମଧ୍ୟ ଜାରି କରାଯାଇଥିଲା। ତେବେ ସୁଧ ଟଙ୍କା କେବେ ଖାତାକୁ ଆସିବ ସେନେଇ EPFO ପକ୍ଷରୁ ଏପର୍ଯ୍ୟନ୍ତ କୌଣସି ଅଫିସିଆଲ୍ ତାରିଖ ଘୋଷଣା କରାଯାଇନାହିଁ। ଯଦି ପୂର୍ବ ବର୍ଷଗୁଡ଼ିକର ଧାରାକୁ ଦେଖାଯାଏ, ତେବେ ଅନୁମାନ କରାଯାଉଛି ଯେ ଜୁନ୍ ରୁ ସେପ୍ଟେମ୍ବର ମାସ ମଧ୍ୟରେ ଯେକୌଣସି ସମୟରେ ଆକାଉଣ୍ଟରେ ଟଙ୍କା ଜମା ହୋଇପାରେ। କେନ୍ଦ୍ର ସରକାରଙ୍କ ଔପଚାରିକ ମଞ୍ଜୁରୀ ଏବଂ ବିଧିବଦ୍ଧ ବିଜ୍ଞପ୍ତି ଜାରି ହେବା ପରେ ହିଁ ସଦସ୍ୟଙ୍କ ଖାତାରେ ରାଶି କ୍ରେଡିଟ୍ ହେବ।

କିପରି ଚେକ୍ କରିବେ ଆପଣଙ୍କ ପିଏଫ୍ ବାଲାନ୍ସ?

ସୁଧ ଟଙ୍କା କ୍ରେଡିଟ୍ ହେବା ପରେ ଆପଣ ଘରେ ବସି ସହଜରେ ନିଜ ବାଲାନ୍ସ ଚେକ୍ କରିପାରିବେ। ଏଥିପାଇଁ ବିଭିନ୍ନ ବିକଳ୍ପ ରହିଛି:

* ମିସ୍ଡ କଲ୍ ମାଧ୍ୟମରେ: ଆପଣଙ୍କ ରେଜିଷ୍ଟର୍ଡ ମୋବାଇଲ୍ ନମ୍ବରରୁ 9966044425 ନମ୍ବରକୁ ମିସ୍ଡ କଲ୍ ଦେଇ ଆପଣ ନିଜ ଆକାଉଣ୍ଟର ବାଲାନ୍ସ ଜାଣିପାରିବେ।

* SMS ଜରିଆରେ: ମୋବାଇଲରୁ 'EPFOHO UAN ENG' ଲେଖି 7738299899 ନମ୍ବରକୁ ଏସଏମଏସ କରନ୍ତୁ ଏବଂ କିଛି ସେକେଣ୍ଡ ମଧ୍ୟରେ ବାଲାନ୍ସ ସମ୍ପର୍କରେ ତଥ୍ୟ ପାଆନ୍ତୁ।

* ଉମଙ୍ଗ (UMANG) ଆପ୍: ସ୍ମାର୍ଟଫୋନରେ ଉମଙ୍ଗ ଆପ୍ ଡାଉନଲୋଡ୍ କରି ସେଥିରେ EPFO ଅପ୍ସନକୁ ଯାଇ UAN ଏବଂ OTP ମାଧ୍ୟମରେ ଲଗଇନ୍ କରି ନିଜ ପାସବୁକ୍ ଦେଖିପାରିବେ।

* ଇପିଏଫଓ ପୋର୍ଟାଲ୍: EPFO ର ଅଫିସିଆଲ୍ ୱେବସାଇଟକୁ ଯାଇ ଇ-ପାସବୁକ୍ ପୋର୍ଟାଲରେ UAN ଏବଂ ପାସୱାର୍ଡ ଦେଇ ମଧ୍ୟ ନିଜ ଖାତାର ବିବରଣୀ ଚେକ୍ କରିପାରିବେ।

ନୂଆଦିଲ୍ଲୀ : କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (ଇପିଏଫଓ) ଖୁବଶୀଘ୍ର ନୂଆ ନିୟମ ଲାଗୁ କରିବାକୁ ଯାଉଛି। ଏଥିରେ ଘରୋଇ କ୍ଷେତ୍ରରେ କାର୍ଯ୍ୟରତ କର୍ମଚାରୀଙ୍କ ସର୍ବନିମ୍ନ ବେତନ ସୀମା ବୃଦ୍ଧି ପାଇଁ ସଂଗଠନ ବିଚାର କରୁଛି। ବର୍ତ୍ତମାନ କର୍ମଚାରୀଙ୍କ ବେତନ ସୀମା ମାସିକ ୧୫ ହଜାର ଟଙ୍କା ରହିଥିବାବେଳେ ତାହାକୁ ୨୧ ହଜାର ଟଙ୍କା କରିବାକୁ ବିଚାର ଚାଲିଛି। ଏଥିସହିତ ଇପିଏଫଓ ଆଉ ଏକ ନୂଆ ନିୟମ ବଦଳାଇବାକୁ ଯାଉଛି।

ଏହି ଅନୁଯାୟୀ, କୌଣସି ସଂସ୍ଥାର କର୍ମଚାରୀ ସଂଖ୍ୟା କମ୍ ଥିଲେ ବି ସେମାନେ ଇପିଏଫ୍‌ରେ ସାମିଲ ହୋଇପାରିବେ। ପ୍ରଚଳିତ ବ୍ୟବସ୍ଥାରେ କୌଣସି ସଂସ୍ଥାରେ ସର୍ବନିମ୍ନ କର୍ମଚାରୀ ସଂଖ୍ୟା ୨୦ ରହିଥିଲେ ତାହାକୁ ଇପିଏଫଓରେ ସାମିଲ କରାଯାଉଛି। ବର୍ତ୍ତମାନ ସର୍ବନିମ୍ନ କର୍ମଚାରୀ ସଂଖ୍ୟାକୁ ସଂଗଠନ ୧୦-୧୫କୁ ହ୍ରାସ କରିବା ନେଇ ବିଚାର ଚାଲିଛି। ଅର୍ଥାତ୍‌ ଗୋଟିଏ ସଂସ୍ଥାରେ ୧୦ ଜଣ କର୍ମଚାରୀ ଥିଲେ ବି ସେଠାରେ ଇପିଏଫ୍‌ ସୁବିଧା ଉପଲବ୍‌ଧ ରହିବ। ଏହି ନୂଆ ନିୟମ କାର୍ଯ୍ୟକାରୀ ହେଲେ କମ୍ କର୍ମଚାରୀଙ୍କୁ ନିୟୋଜିତ କରିଥିବା ସଂସ୍ଥାମାନେ ଇପିଏଫଓରେ ସାମିଲ ହୋଇପାରିବେ। ଯାହାଫଳରେ ଶ୍ରମିକମାନଙ୍କ ସାମାଜିକ ସୁରକ୍ଷା କଭରେଜକୁ ବୃଦ୍ଧି ତଥା ବ୍ୟାପକ କରାଯାଇପାରିବ।

କେନ୍ଦ୍ର ଶ୍ରମ ଓ ରୋଜଗାର ମନ୍ତ୍ରଣାଳୟ ବର୍ତ୍ତମାନ ହିତାଧିକାରୀଙ୍କ ସହ ଏହି ବିଷୟରେ ଆଲୋଚନା ଚଳାଇଥିବା ଜଣାପଯାଇଛି। ଏଥିପାଇଁ ଏକ ପରିଚାଳନା କମିଟି ଗଠନ କରିବା ପାଇଁ ସୁପାରିଶ କରାଯାଇଛି। ଇପିଏଫ୍ଓ ​​ଅଧୀନରେ, ଉଭୟ କର୍ମଚାରୀ ଏବଂ ନିଯୁକ୍ତିଦାତା ପ୍ରତ୍ୟେକ ଇପିଏଫ୍ ଆକାଉଣ୍ଟରେ ୧୨ ପ୍ରତିଶତ ଅର୍ଥ ଯୋଗଦାନ ଦେଇଥାନ୍ତି। କର୍ମଚାରୀଙ୍କ ଯୋଗଦାନର ସମୁଦାୟ ୧୨% ଇପିଏଫ୍‌ଆକାଉଣ୍ଟକୁ ଯାଇଥିବାବେଳେ ନିଯୁକ୍ତିଦାତାଙ୍କ ୮.୩୩% କର୍ମଚାରୀଙ୍କ ପେନ୍‌ସନ୍ ସ୍କିମ୍ (ଇପିଏସ୍) ଆକାଉଣ୍ଟକୁ ଯାଇଥାଏ। ଅବଶିଷ୍ଟ ୩.୬୭% ପ୍ରୋଭିଡେଣ୍ଟ ଫଣ୍ଡ ଆକାଉଣ୍ଟକୁ ଯାଉଛି।

ସୂଚନାଯୋଗ୍ୟ ଯେ, ଶେଷ ଥର ପାଇଁ ଗତ ୨୦୧୪ରେ କର୍ମଚାରୀଙ୍କ ସର୍ବନିମ୍ନ ବେତନ ସୀମାରେ ସଂଶୋଧନ କରାଯାଇଥିଲା। ସେହି ସମୟରେ ମାସିକ ବେତନ ସୀମା ୬୫୦୦ ଟଙ୍କାରୁ ବୃଦ୍ଧି କରାଯାଇ ୧୫ ହଜାର ଟଙ୍କା କରାଯାଇଥିଲା। ତେବେ ଏଥର ତାହା ୬ ହଜାର ବୃଦ୍ଧି କରାଯାଇ ୨୧ ହଜାର ଟଙ୍କା କରାଯାଇପାରେ। ଏହା ଲାଗୁ ହେଲେ କର୍ମଚାରୀମାନେ ନିଜ ନିଜର ଭବିଷ୍ୟନିଧି ପାଣ୍ଠିରେ ଅଧିକ ଅର୍ଥ ଜମା କରିପାରିବେ। ଆସନ୍ତା ୨୩ ତାରିଖରେ ବସିବାକୁ ଯାଉଥିବା କେନ୍ଦ୍ରୀୟ ଟ୍ରଷ୍ଟ ବୋର୍ଡ ବୈଠକରେ ଏହା ଉପରେ ନିଷ୍ପତ୍ତି ହୋଇପାରେ। ବର୍ତ୍ତମାନ ଇପିଏଫଓ ସ୍କିମରେ ପ୍ରତି ମାସରେ କର୍ମଚାରୀଙ୍କ ମୂଳ ବେତନର ୧୨ ପ୍ରତିଶତ ରାଶିକୁ ଉଭୟ କର୍ମଚାରୀ ଓ ନିଯୁକ୍ତିଦାତ୍ତା ଭବିଷ୍ୟନିଧି ଆକାଉଣ୍ଟରେ ଜମା କରୁଛନ୍ତି। ଭବିଷ୍ୟନିଧି ପାଣ୍ଠିରେ ଉନ୍ନତି ଆଣିବା ପାଇଁ ଅଂଶୀଦାରମାନଙ୍କ ପକ୍ଷରୁ ଦିଆଯାଇଥିବା ପ୍ରସ୍ତାବ ଉପରେ କେନ୍ଦ୍ର ଶ୍ରମ ଓ ନିୟୋଜନ ମନ୍ତ୍ରଣାଳୟ ବିଚାର କରୁଛି।