କଂଗ୍ରେସ ନେତା ତଥା ଷ୍ଟାର୍ ରେସଲର୍ ଭିନେଶ ଫୋଗାଟ ଭାରତୀୟ କୁସ୍ତି ମହାସଂଘ (WFI) ର ପୂର୍ବତନ ଅଧ୍ୟକ୍ଷ ବ୍ରିଜଭୂଷଣ ଶରଣ ସିଂହ ଏବଂ କ୍ଷମତାସୀନ ବିଜେପି ବିରୋଧରେ ପୁଣିଥରେ କଡ଼ା ଆକ୍ରମଣ କରିଛନ୍ତି। ହରିୟାଣାର ଜିନ୍ଦଠାରେ ଆୟୋଜିତ ଏକ ରାଜନୈତିକ କାର୍ଯ୍ୟକ୍ରମରେ ଯୋଗଦେଇ ସେ ବ୍ରିଜଭୂଷଣଙ୍କୁ ‘ଗୁଣ୍ଡା ଏବଂ ଅପରାଧୀ’ ବୋଲି ଅଭିହିତ କରିବା ସହ ତାଙ୍କୁ ସମର୍ଥନ କରୁଥିବାରୁ ବିଜେପି ସରକାରଙ୍କୁ ତୀବ୍ର ସମାଲୋଚନା କରିଛନ୍ତି।

ବ୍ରିଜଭୂଷଣ ଜଣେ ଗୁଣ୍ଡା ଓ ଅପରାଧୀ

ହରିୟାଣାର ଜୁଲାନା ବିଧାନସଭା ଆସନରୁ ବିଧାୟକ ଥିବା ୩୧ ବର୍ଷୀୟା ଭିନେଶ ଫୋଗାଟ ପ୍ରଶ୍ନ କରିଛନ୍ତି ଯେ, ଏଭଳି ଜଣେ ବ୍ୟକ୍ତିଙ୍କୁ ଏତେ ସମ୍ମାନ କାହିଁକି ଦିଆଯାଉଛି? ସେ କହିଛନ୍ତି ଯେ, "ବ୍ରିଜଭୂଷଣ ଜଣେ ଗୁଣ୍ଡା ଓ ଅପରାଧୀ।" ଏହା ସହିତ ସେ ଗୋଣ୍ଡାରେ ଜମି ଦଖଲ, ତାଙ୍କର ଆୟର ଉତ୍ସ ଏବଂ ମହିଳା କୁସ୍ତିଗିରମାନଙ୍କ ସହ ଜଡିତ ବିବାଦକୁ ନେଇ ଅନେକ ପ୍ରଶ୍ନ ଉଠାଇଛନ୍ତି।

ଟଙ୍କା ବଳରେ ଝିଅମାନଙ୍କ ଉପରେ ଅତ୍ୟାଚାର

ମହିଳା କୁସ୍ତିଗିରଙ୍କ ଯୌନ ନିର୍ଯାତନା ପ୍ରସଙ୍ଗରେ ଭିନେଶ ସିଧାସଳଖ ବ୍ରିଜଭୂଷଣଙ୍କୁ ଟାର୍ଗେଟ୍ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ଟଙ୍କା ଓ କ୍ଷମତା ବଳରେ ଝିଅମାନଙ୍କ ଉପରେ ଅତ୍ୟାଚାର କରାଯାଉଛି ଏବଂ ଏହା ହିଁ ବିଜେପିର ପ୍ରକୃତ ସତ୍ୟ। ସେ ୨୦୨୩ ମସିହାରେ ହୋଇଥିବା କୁସ୍ତିଗିର ଆନ୍ଦୋଳନ କଥା ମନେ ପକାଇ କହିଛନ୍ତି ଯେ, "ଆନ୍ଦୋଳନ ସମୟରେ ପୋଲିସ ଆମ ସହ ଯେପରି ବ୍ୟବହାର କରିଥିଲା, ସମାନ ଆଚରଣ ଜନ୍ତର-ମନ୍ତରରେ ବିରୋଧ ପ୍ରଦର୍ଶନ କରୁଥିବା ଆମର ଝିଅମାନଙ୍କ ସହିତ ମଧ୍ୟ କରାଯାଇଛି।" ଆଗକୁ ଏହି ନ୍ୟାୟିକ ଲଢ଼େଇ ସୁପ୍ରିମକୋର୍ଟରେ ଜାରି ରହିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।

ବିଜେପି ଉପରେ ଏକଚ୍ଛତ୍ରବାଦର ଆରୋପ

କେବଳ କୁସ୍ତିଗିରଙ୍କ ପ୍ରସଙ୍ଗ ନୁହେଁ, ବରଂ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାଡ଼ଗେଙ୍କ ଉତ୍ତରାଖଣ୍ଡ ଗସ୍ତ ସମୟରେ ହୋଇଥିବା କଥିତ 'ଶୁଦ୍ଧିକରଣ' ବିବାଦ ଉପରେ ମଧ୍ୟ ଭିନେଶ ପ୍ରତିକ୍ରିୟା ରଖିଛନ୍ତି। ଜଣେ ଦଳିତ ନେତାଙ୍କର କୌଣସି ସ୍ଥାନକୁ ଯିବାର ଅଧିକାର ନାହିଁ କି ବୋଲି ସେ ପ୍ରଶ୍ନ କରିଛନ୍ତି। ଯେଉଁ ବିଚାରଧାରାକୁ ଖତମ କରିବା ପାଇଁ କଂଗ୍ରେସ ସଂଘର୍ଷ କରୁଛି, ଆଜି ବିଜେପି ସେହି ଏକଚ୍ଛତ୍ରବାଦୀ ନୀତିକୁ ପ୍ରୋତ୍ସାହିତ କରୁଛି ବୋଲି ସେ ଗୁରୁତର ଆରୋପ ଲଗାଇଛନ୍ତି।

ଭାରତୀୟ କୁସ୍ତି ମହାସଂଘ (WFI) ର ପୂର୍ବତନ ଅଧ୍ୟକ୍ଷ ତଥା ପୂର୍ବତନ ସାଂସଦ ବ୍ରିଜଭୂଷଣ ଶରଣ ସିଂହଙ୍କୁ ଦିଲ୍ଲୀର ଏକ କୋର୍ଟ ଯୌନ ନିର୍ଯାତନା ମାମଲାରେ ଦୋଷମୁକ୍ତ କରିଛନ୍ତି। ଏହି ରାୟ ଆସିବା ପରେ ଭାରତୀୟ ମହିଳା କୁସ୍ତିଯୋଦ୍ଧା ବିନେଶ ଫୋଗାଟ ତୀବ୍ର ପ୍ରତିକ୍ରିୟା ପ୍ରକାଶ କରିବା ସହ ଖୁବ୍ ଭାବପ୍ରବଣ ହୋଇପଡ଼ିଛନ୍ତି। ଏହି ରାୟକୁ ଚ୍ୟାଲେଞ୍ଜ କରିବା ପାଇଁ ମହିଳା କୁସ୍ତିଯୋଦ୍ଧାମାନେ ଉପର କୋର୍ଟରେ ଆବେଦନ କରିବେ ବୋଲି ସେ ଘୋଷଣା କରିଛନ୍ତି।

ସିଷ୍ଟମ୍ ଉପରେ ବର୍ଷିଲେ ବିନେଶ

ଏକ ଲମ୍ବା ଆଇନଗତ ଲଢ଼େଇ ପରେ ଅଗଷ୍ଟ ୩ ତାରିଖ ଦିନ ରାଉଜ୍ ଏଭେନ୍ୟୁ କୋର୍ଟ ବ୍ରିଜଭୂଷଣ ଶରଣ ସିଂହ ଏବଂ ଡବ୍ଲ୍ୟୁଏଫଆଇର ପୂର୍ବତନ ସହକାରୀ ସମ୍ପାଦକ ବିନୋଦ ତୋମାରଙ୍କୁ ସମସ୍ତ ଅଭିଯୋଗରୁ ମୁକ୍ତ କରିଛନ୍ତି। ଏହାକୁ ନେଇ କ୍ଷୋଭ ପ୍ରକାଶ କରି ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ' (X) ରେ ବିନେଶ ଫୋଗାଟ ଲେଖିଛନ୍ତି, "ପ୍ରଥମ ଦିନରୁ ହିଁ ସରକାର, ପ୍ରଶାସନ ଏବଂ ସମ୍ପୂର୍ଣ୍ଣ ସିଷ୍ଟମ୍ ବ୍ରିଜଭୂଷଣଙ୍କୁ ସୁରକ୍ଷା ଦେବାରେ ଲାଗିଛନ୍ତି।" କ୍ଷମତାର ଅପବ୍ୟବହାର କରି ସେ ଅନେକ ଝିଅଙ୍କୁ ନିଜ ନାମ ପ୍ରତ୍ୟାହାର କରିବାକୁ ବାଧ୍ୟ କରିଥିଲେ ବୋଲି ସେ ଅଭିଯୋଗ କରିଛନ୍ତି।

ସେ ଆହୁରି ମଧ୍ୟ କହିଛନ୍ତି ଯେ କୋର୍ଟଙ୍କ ଏହି ନିଷ୍ପତ୍ତି ସେମାନଙ୍କୁ ଗଭୀର ଆଘାତ ଦେଇଛି, କାରଣ ଏତେ ବଡ଼ କ୍ଷମତାଶାଳୀ ନେତାଙ୍କ ବିରୋଧରେ ରାସ୍ତାକୁ ଓହ୍ଲାଇ ଏଫଆଇଆର୍ (FIR) ରୁଜୁ କରିବା ପାଇଁ ସେମାନଙ୍କୁ ଅନେକ ସାହସ ଜୁଟାଇବାକୁ ପଡ଼ିଥିଲା।

ଆଇନଗତ ଲଢ଼େଇ ଜାରି ରହିବ

ସୋସିଆଲ ମିଡିଆ ପୋଷ୍ଟ ମାଧ୍ୟମରେ ବିନେଶ ଫୋଗାଟ ଏବଂ ଅଲିମ୍ପିଆନ୍ ବଜରଙ୍ଗ ପୁନିଆ ସ୍ପଷ୍ଟ କରିଛନ୍ତି ଯେ ସେମାନେ ଏବେ ବି ଆଶା ଛାଡ଼ି ନାହାଁନ୍ତି। ବିନେଶ କହିଛନ୍ତି, "ମହିଳା କୁସ୍ତିଯୋଦ୍ଧାମାନେ ଏହି ନିଷ୍ପତ୍ତି ବିରୋଧରେ ଆବେଦନ କରିବା ପାଇଁ ସେମାନଙ୍କ ଓକିଲମାନଙ୍କୁ ନିର୍ଦ୍ଦେଶ ଦେଇଛନ୍ତି ଏବଂ ଖୁବ୍ ଶୀଘ୍ର ଉପର କୋର୍ଟରେ ଏକ ଅପିଲ୍ ଦାୟର କରାଯିବ। ଆମେ ଆମର ଲଢ଼େଇ ଜାରି ରଖିବୁ।"

ବ୍ରିଜଭୂଷଣଙ୍କ ପ୍ରତିକ୍ରିୟା

ଅନ୍ୟପଟେ କୋର୍ଟଙ୍କ ରାୟ ପରେ ବ୍ରିଜଭୂଷଣ ଶରଣ ସିଂହ ନିଜର ଖୁସି ବ୍ୟକ୍ତ କରିଛନ୍ତି। ସେ କହିଛନ୍ତି ଯେ ପ୍ରଥମ ଦିନରୁ ହିଁ ସେ ନିଜକୁ ନିର୍ଦ୍ଦୋଷ ବୋଲି ଦାବି କରି ଆସୁଥିଲେ। "ଯଦି ଅଭିଯୋଗ ସତ୍ୟ ପ୍ରମାଣିତ ହୋଇଥାନ୍ତା, ତେବେ ମୁଁ ନିଜେ ଫାଶୀରେ ଝୁଲିପଡ଼ିଥାନ୍ତି। ଆଜି କୋର୍ଟ ମୋତେ ସସମ୍ମାନେ ଦୋଷମୁକ୍ତ କରିଥିବାରୁ ମୁଁ ବହୁତ ଖୁସି," ବୋଲି ସେ ପ୍ରତିକ୍ରିୟା ଦେଇଛନ୍ତି।

ସୂଚନାଯୋଗ୍ୟ ଯେ, ୨୦୨୩ ମସିହାରେ ସାକ୍ଷୀ ମଲ୍ଲିକ, ବିନେଶ ଫୋଗାଟ ଏବଂ ବଜରଙ୍ଗ ପୁନିଆଙ୍କ ଭଳି ଦେଶର ତାରକା କୁସ୍ତିଯୋଦ୍ଧାମାନେ ବ୍ରିଜଭୂଷଣଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣି ଦିଲ୍ଲୀର ଯନ୍ତରମନ୍ତରଠାରେ ଧାରଣାରେ ବସିଥିଲେ।

ନୂଆଦିଲ୍ଲୀ: ଯୌନ ନିର୍ଯାତନା ମାମଲାରେ ବ୍ରିଜ୍ ଭୂଷଣଙ୍କୁ ବଡ଼ ଆଶ୍ବସ୍ତି । ବ୍ରିଜ୍ ଭୂଷଣ ଶରଣ ସିଂହଙ୍କୁ ଦୋଷମୁକ୍ତ କଲେ ଦିଲ୍ଲୀ କୋର୍ଟ । ମହିଳା କୁସ୍ତିଯୋଦ୍ଧାଙ୍କ ଦ୍ୱାରା ଦାଏର ହୋଇଥିବା ଯୌନ ନିର୍ଯାତନା ଏବଂ ଧମକଚମକ ମାମଲାରେ ଭାରତୀୟ କୁସ୍ତି ମହାସଂଘ (WFI) ର ପୂର୍ବତନ ସଭାପତି ବ୍ରିଜଭୂଷଣ ଶରଣ ସିଂହ ଏବଂ ପୂର୍ବତନ ସହକାରୀ ସମ୍ପାଦକ ବିନୋଦ ତୋମାରଙ୍କୁ ଦିଲ୍ଲୀ କୋର୍ଟ ଦୋଷମୁକ୍ତ କରିଛନ୍ତି। ଅଭିଯୋଗକାରୀ ପକ୍ଷ ଉପଯୁକ୍ତ ପ୍ରମାଣ ସହ ଅଭିଯୋଗ ସାବ୍ୟସ୍ତ କରିବାରେ ବିଫଳ ହୋଇଥିବାରୁ କୋର୍ଟ ଏହି ନିଷ୍ପତ୍ତି ଶୁଣାଇଛନ୍ତି।

ରାଉଜ୍ ଏଭେନ୍ୟୁ କୋର୍ଟର ଅତିରିକ୍ତ ମୁଖ୍ୟ ବିଚାରପତି (ACJM) ଅଶ୍ୱିନୀ ପନୱାର ଏହି ମାମଲାର ଶୁଣାଣି କରି ଉଭୟ ଅଭିଯୁକ୍ତଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ବିନୋଦ ତୋମାରଙ୍କ ବିରୋଧରେ ଭାରତୀୟ ପିଙ୍ଗଳ କୋର୍ଡ (IPC) ର ଧାରା ୫୦୬ ଭାଗ-୧ ଅଧୀନରେ ମାମଲା ରୁଜୁ ହୋଇଥିଲା। ବର୍ତ୍ତମାନ କୋର୍ଟଙ୍କ ବିସ୍ତୃତ ରାୟକୁ ଅପେକ୍ଷା କରାଯାଇଛି। ଆଇନଜୀବୀ ରାଜୀବ ମୋହନ, ଋଷଭ ଭାଟି ଏବଂ ରେହାନ ଖାନ କୋର୍ଟରେ ଅଭିଯୁକ୍ତମାନଙ୍କ ପକ୍ଷ ରଖିଥିଲେ।

ଏହି ମାମଲାଟି ୨୦୨୩ ମସିହା ଜାନୁଆରୀ ମାସର। ଦେଶର ଖ୍ୟାତନାମା ଅଲିମ୍ପିଆନ୍ ବିନେଶ ଫୋଗାଟ, ସାକ୍ଷୀ ମଲିକ ଏବଂ ବଜରଙ୍ଗ ପୁନିଆଙ୍କ ସମେତ ଅନେକ କୁସ୍ତିଯୋଦ୍ଧା ଜନ୍ତରମନ୍ତରଠାରେ ବ୍ରିଜଭୂଷଣଙ୍କ ବିରୋଧରେ ଆନ୍ଦୋଳନକୁ ଓହ୍ଲାଇଥିଲେ। ସେମାନେ ତାଙ୍କ ଉପରେ ଯୌନ ଶୋଷଣ ଏବଂ ଧମକ ଦେବାର ଗମ୍ଭୀର ଅଭିଯୋଗ ଆଣିବା ସହ ତାଙ୍କର ଇସ୍ତଫା ଏବଂ ମହାସଂଘକୁ ଭଙ୍ଗ କରିବାକୁ ଦାବି କରିଥିଲେ।

ପରେ ଭାରତୀୟ ଅଲିମ୍ପିକ୍ ଆସୋସିଏସନ୍ (IOA) ର ସଭାପତି ପି.ଟି. ଉଷାଙ୍କ ନିର୍ଦ୍ଦେଶକ୍ରମେ ମେରିକମ୍ ଏବଂ ଯୋଗେଶ୍ୱର ଦତ୍ତଙ୍କ ଭଳି ତାରକା ଖେଳାଳିଙ୍କୁ ନେଇ ଏକ ତଦନ୍ତ କମିଟି ଗଠନ କରାଯାଇଥିଲା। ତେବେ WFI ସମସ୍ତ ଅଭିଯୋଗକୁ ଖଣ୍ଡନ କରିଥିଲା। ବିବାଦ ବଢ଼ିବାରୁ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ମହାସଂଘର କାର୍ଯ୍ୟକଳାପକୁ ସ୍ଥଗିତ ରଖିବା ସହ ତତ୍କାଳୀନ ସହକାରୀ ସମ୍ପାଦକ ବିନୋଦ ତୋମାରଙ୍କୁ ଦାୟିତ୍ୱରୁ ଅବ୍ୟାହତି ଦେଇଥିଲା।

ମେ ୨୦୨୪ ରେ ରାଉଜ୍ ଏଭେନ୍ୟୁ କୋର୍ଟ ୫ ଜଣ ମହିଳା କୁସ୍ତିଯୋଦ୍ଧାଙ୍କ ଅଭିଯୋଗକୁ ଭିତ୍ତି କରି ବ୍ରିଜଭୂଷଣ ଏବଂ ବିନୋଦ ତୋମାରଙ୍କ ବିରୋଧରେ ଚାର୍ଜଫ୍ରେମ୍ କରିଥିଲେ। ତେବେ ବ୍ରିଜଭୂଷଣ ନିଜକୁ ନିର୍ଦ୍ଦୋଷ ବୋଲି ଦାବି କରି ଆସୁଥିଲେ ଏବଂ ଏହି ମାମଲାକୁ ଖାରଜ କରିବା ପାଇଁ ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ମଧ୍ୟ ହୋଇଥିଲେ।

ଭାରତୀୟ ମହିଳା କୁସ୍ତିବିତ୍ ଭିନେଶ ଫୋଗାଟ (Vinesh Phogat)ଙ୍କୁ ସୁପ୍ରିମକୋର୍ଟ (Supreme Court)ରୁ ଏକ ବଡ଼ ଆଶ୍ୱସ୍ତି ମିଳିଛି। ଆଗାମୀ ଏସିଆନ ଗେମ୍ସ ୨୦୨୬ (Asian Games 2026) ପାଇଁ ହେବାକୁ ଥିବା ଚୟନ ଟ୍ରାଏଲ୍ସରେ ଭାଗ ନେବାକୁ ସର୍ବୋଚ୍ଚ ନ୍ୟାୟାଳୟ ତାଙ୍କୁ ଅନୁମତି ପ୍ରଦାନ କରିଛନ୍ତି। ଏହି ନିଷ୍ପତ୍ତି ପରେ ଭିନେଶଙ୍କ ପାଇଁ ପୁଣିଥରେ ମ୍ୟାଟ୍‌କୁ ଫେରିବାର ବାଟ ଫିଟିଯାଇଛି।

ହାଇକୋର୍ଟଙ୍କ ରାୟ ଉପରେ ରୋକ୍ ଲଗାଇବାକୁ ମନା

ଏହା ପୂର୍ବରୁ ଦିଲ୍ଲୀ ହାଇକୋର୍ଟ ଭିନେଶଙ୍କ ସପକ୍ଷରେ ରାୟ ଶୁଣାଇ ତାଙ୍କୁ ଟ୍ରାଏଲ୍ସରେ ସାମିଲ ହେବାକୁ ଅନୁମତି ଦେଇଥିଲେ। ହାଇକୋର୍ଟଙ୍କ ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରି ଭାରତୀୟ କୁସ୍ତି ମହାସଂଘ (WFI) ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା। କିନ୍ତୁ ଜଷ୍ଟିସ୍ ପି.ଏସ୍. ନରସିଂହ ଏବଂ ଜଷ୍ଟିସ୍ ଆଲୋକ ଅରାଧେଙ୍କୁ ନେଇ ଗଠିତ ଖଣ୍ଡପୀଠ ହାଇକୋର୍ଟଙ୍କ ରାୟ ଉପରେ ରୋକ୍ ଲଗାଇବାକୁ ମନା କରିଦେଇଛନ୍ତି। ଫଳରେ ମେ' ୩୦ ଏବଂ ୩୧ ତାରିଖରେ ହେବାକୁ ଥିବା ଚୟନ ପ୍ରକ୍ରିୟାରେ ଭାଗ ନେବା ପାଇଁ ଭିନେଶଙ୍କ ରାସ୍ତା ସଫା ହୋଇଯାଇଛି। ଏହି ଅବସରରେ ସୁପ୍ରିମକୋର୍ଟ କହିଛନ୍ତି ଯେ, "ଆମେ ଆପଣଙ୍କୁ ଅଟକାଉ ନାହୁଁ, ଆପଣ ଯାଇ ଅଂଶଗ୍ରହଣ କରନ୍ତୁ"।

ଡୋପିଂ ଟେଷ୍ଟକୁ ନେଇ କୋର୍ଟଙ୍କ ଚିନ୍ତା

ଯଦିଓ ଟ୍ରାଏଲ୍ସରେ ଭାଗ ନେବାକୁ ତୁରନ୍ତ ଅନୁମତି ମିଳିଛି, ତଥାପି ଦିଲ୍ଲୀ ହାଇକୋର୍ଟଙ୍କ କାର୍ଯ୍ୟଶୈଳୀ ଏବଂ କିଛି ଆପତ୍ତିଜନକ ପ୍ରସଙ୍ଗରେ ସୁପ୍ରିମକୋର୍ଟ ନିଜର ଉଦ୍‌ବେଗ ପ୍ରକାଶ କରିଛନ୍ତି। ଖେଳାଳିଙ୍କ ଦ୍ୱାରା ଡୋପିଂ ଟେଷ୍ଟ ଏଡ଼ାଇବା ଘଟଣାକୁ କୋର୍ଟ ଏକ 'ଗମ୍ଭୀର ତ୍ରୁଟି' ବୋଲି ଦର୍ଶାଇଛନ୍ତି। ଖେଳର ସ୍ୱଚ୍ଛତା ଏବଂ ନିୟମାବଳୀ ସହିତ କୌଣସି ଆପୋଷ ବୁଝାମଣା କରାଯାଇପାରିବ ନାହିଁ ବୋଲି ଖଣ୍ଡପୀଠ ସ୍ପଷ୍ଟ କରିଛନ୍ତି। ଏହି ପ୍ରସଙ୍ଗରେ ନ୍ୟାୟାଳୟ ଡବ୍ଲ୍ୟୁଏଫ୍‌ଆଇର ଆବେଦନ ଉପରେ ନୋଟିସ୍ ଜାରି କରି ପରବର୍ତ୍ତୀ ସମୟରେ ବିସ୍ତୃତ ଶୁଣାଣି କରିବେ ବୋଲି ଜଣାଇଛନ୍ତି।

ମାତୃତ୍ୱ ଓ ଖେଳାଳିଙ୍କ ଅଧିକାର ବିବାଦ

ଏହି ଆଇନଗତ ଲଢ଼େଇଟି ମୁଖ୍ୟତଃ ଭିନେଶଙ୍କ ମାତୃତ୍ୱକାଳୀନ ଛୁଟି ଏବଂ ପରବର୍ତ୍ତୀ ସମୟରେ ତାଙ୍କର ଖେଳକୁ ପ୍ରତ୍ୟାବର୍ତ୍ତନ ସହ ଜଡ଼ିତ। ୨୦୨୫ ମସିହାରେ ମାଆ ହେବା ପରେ ଭିନେଶ କିଛି ସମୟ ପାଇଁ କୁସ୍ତି ମ୍ୟାଟ୍‌ରୁ ଦୂରେଇ ରହିଥିଲେ। ତେବେ ମ୍ୟାଚ୍ ଖେଳିନଥିବା କାରଣ ଦର୍ଶାଇ ଡବ୍ଲ୍ୟୁଏଫ୍‌ଆଇ ତାଙ୍କୁ ଟ୍ରାଏଲ୍ସରୁ ବାଦ୍ ଦେଇଥିଲା, ଯାହାକୁ ଦିଲ୍ଲୀ ହାଇକୋର୍ଟ ସମ୍ପୂର୍ଣ୍ଣ ଭେଦଭାବମୂଳକ ଏବଂ ଅଗ୍ରହଣୀୟ ବୋଲି ଦର୍ଶାଇଥିଲେ। ସୁପ୍ରିମକୋର୍ଟଙ୍କ ସଦ୍ୟତମ ଅନୁମତି ଭିନେଶଙ୍କ ପରି ଅନ୍ତର୍ଜାତୀୟସ୍ତରରେ ଦେଶ ପାଇଁ ଗୌରବ ଆଣିଥିବା ମହିଳା ଆଥଲେଟ୍‌ମାନଙ୍କ ପାଇଁ ଏକ ବଡ଼ ବିଜୟ ବୋଲି ବିବେଚନା କରାଯାଉଛି।

ଭାରତୀୟ କୁସ୍ତି ମହାସଂଘ (ଡବ୍ଲ୍ୟୁଏଫଆଇ) ଏବଂ ଷ୍ଟାର୍ ରେସଲର ବିନେଶ ଫୋଗାଟଙ୍କ ମଧ୍ୟରେ ଲାଗି ରହିଥିବା ବିବାଦରେ ଦିଲ୍ଲୀ ହାଇକୋର୍ଟ ହସ୍ତକ୍ଷେପ କରିଛନ୍ତି। ୨୦୨୬ ଏସୀୟ କ୍ରୀଡ଼ା ଟ୍ରାଏଲ୍‌ରୁ ବିନେଶଙ୍କୁ ବାଦ୍ ଦେବା ଏବଂ ତାଙ୍କୁ ଅଯୋଗ୍ୟ ଘୋଷଣା କରିବା ନିଷ୍ପତ୍ତିକୁ ନେଇ କୋର୍ଟ ଡବ୍ଲ୍ୟୁଏଫଆଇକୁ କଡ଼ା ଭାଷାରେ ସମାଲୋଚନା କରିଛନ୍ତି। ଖେଳାଳି ଏବଂ ପ୍ରଶାସନ ମଧ୍ୟରେ ଚାଲିଥିବା ବିବାଦ ଯୋଗୁଁ "କୁସ୍ତି କାହିଁକି କ୍ଷତି ସହିବ?" ବୋଲି କୋର୍ଟ ପ୍ରଶ୍ନ କରିଛନ୍ତି।

ମାତୃତ୍ୱ କୌଣସି ଖେଳାଳିଙ୍କ ପାଇଁ ବାଧକ ନୁହେଁ

ଗତ ଜୁଲାଇ ୨୦୨୫ରେ ବିନେଶ ଏକ ସନ୍ତାନର ମା' ହୋଇଥିଲେ। ମାତୃତ୍ୱ ଅବକାଶ ପରେ ସେ ପୁଣିଥରେ କୁସ୍ତିକୁ ଫେରିବା ପାଇଁ ପ୍ରସ୍ତୁତି କରୁଛନ୍ତି। ତେବେ ଡବ୍ଲ୍ୟୁଏଫଆଇ ତାଙ୍କୁ ଟ୍ରାଏଲ୍‌ରୁ ବାଦ୍ ଦେବା ଘଟଣାରେ ଅସନ୍ତୋଷ ବ୍ୟକ୍ତ କରି ଖଣ୍ଡପୀଠ କହିଛନ୍ତି ଯେ, "ଦେଶରେ ମାତୃତ୍ୱକୁ ସମ୍ମାନ ଦିଆଯାଏ, ଏହା କୌଣସି ବ୍ୟକ୍ତିଙ୍କ କ୍ୟାରିଅର୍ ପାଇଁ କ୍ଷତିକାରକ ହେବା ଉଚିତ ନୁହେଁ।" ସଂଘ ନିଜର ପୁରୁଣା ଚୟନ ନିୟମରେ ଆଣିଥିବା ପରିବର୍ତ୍ତନ ଉପରେ କୋର୍ଟ ପ୍ରଶ୍ନ ଉଠାଇବା ସହ ଏହା ପ୍ରତିଶୋଧ ମୂଳକ ନହେବା ଉଚିତ ବୋଲି ଚେତାବନୀ ଦେଇଛନ୍ତି।

କେନ୍ଦ୍ରକୁ ବିଶେଷଜ୍ଞ କମିଟି ଗଠନ ପାଇଁ ନିର୍ଦ୍ଦେଶ

ଦିଲ୍ଲୀ ହାଇକୋର୍ଟ କେନ୍ଦ୍ର ସରକାରଙ୍କୁ ଏକ ବିଶେଷଜ୍ଞ କମିଟି ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି କମିଟି ବିନେଶ ଫୋଗାଟଙ୍କ ଫିଟନେସ୍ ଏବଂ ଯୋଗ୍ୟତା ଯାଞ୍ଚ କରିବ। ଆସନ୍ତା ମେ ୩୦ ଏବଂ ୩୧ ତାରିଖରେ ହେବାକୁ ଥିବା ଏସୀୟ କ୍ରୀଡ଼ା ଟ୍ରାଏଲ୍‌ରେ ବିନେଶଙ୍କ ଅଂଶଗ୍ରହଣ ସୁନିଶ୍ଚିତ କରିବାକୁ କୋର୍ଟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ବିବାଦ ଯୋଗୁଁ କୌଣସି ପ୍ରତିଭାବାନ ଖେଳାଳିଙ୍କ ଭବିଷ୍ୟତ ନଷ୍ଟ ହେବା ଅନୁଚିତ ବୋଲି କୋର୍ଟ ସ୍ପଷ୍ଟ କରିଛନ୍ତି।

କ’ଣ ଥିଲା ସମ୍ପୂର୍ଣ୍ଣ ବିବାଦ?

ଗତ ମେ ୯ ତାରିଖରେ ଡବ୍ଲ୍ୟୁଏଫଆଇ ବିନେଶ ଫୋଗାଟଙ୍କୁ ଏକ ୧୫-ପୃଷ୍ଠାର କାରଣ ଦର୍ଶାଅ ନୋଟିସ୍ ଜାରି କରିଥିଲା। ଏଥିରେ ତାଙ୍କ ବିରୋଧରେ ବିଶୃଙ୍ଖଳା, ଆଣ୍ଟି-ଡୋପିଂ ପ୍ରକ୍ରିୟା ଉଲ୍ଲଂଘନ ଏବଂ ପ୍ୟାରିସ୍ ଅଲିମ୍ପିକ୍ସରେ ଭାରତୀୟ କୁସ୍ତିକୁ ବଦନାମ କରିଥିବା ଅଭିଯୋଗ ହୋଇଥିଲା। ଏହା ସହ ଆଣ୍ଟି-ଡୋପିଂ ନିୟମ ଅଧୀନରେ ଥିବା ୬ ମାସିଆ ନୋଟିସ୍ ଅବଧିକୁ ଦର୍ଶାଇ ଜୁନ୍ ୨୬, ୨୦୨୬ ପର୍ଯ୍ୟନ୍ତ ତାଙ୍କୁ ସମସ୍ତ ଘରୋଇ ପ୍ରତିଯୋଗିତାରୁ ବାସନ୍ଦ କରାଯାଇଥିଲା। ଏହା ବିରୋଧରେ ବିନେଶ ହାଇକୋର୍ଟଙ୍କ ଦ୍ୱାରସ୍ଥ ହୋଇ ଅଭିଯୋଗ କରିଥିଲେ ଯେ, କେବଳ ତାଙ୍କୁ ଟ୍ରାଏଲ୍‌ରୁ ବାହାର କରିବା ଉଦ୍ଦେଶ୍ୟରେ ଡବ୍ଲ୍ୟୁଏଫଆଇ ଘରୋଇ ପଦକ ବିଜେତାଙ୍କୁ ସୁଯୋଗ ଦେବା ନେଇ ଚୟନ ପ୍ରକ୍ରିୟାରେ ଅଚାନକ ପରିବର୍ତ୍ତନ କରିଛି।

ଭାରତୀୟ କୁସ୍ତି ମହାସଂଘ (WFI) ଏବଂ ଷ୍ଟାର୍ ରେସଲର୍ ଭିନେଶ ଫୋଗାଟଙ୍କ ମଧ୍ୟରେ ତିକ୍ତତା ବଢ଼ିବାରେ ଲାଗିଛି। ଏହି ବିବାଦ ମଧ୍ୟରେ ସୋମବାର ଦିନ ଭିନେଶ ଉତ୍ତରପ୍ରଦେଶର ଗୋଣ୍ଡାରେ ପହଞ୍ଚିଛନ୍ତି। ସେଠାରେ ଆୟୋଜିତ ହେଉଥିବା ଜାତୀୟ ଓପନ୍ ରାଙ୍କିଙ୍ଗ୍ ଟୁର୍ଣ୍ଣାମେଣ୍ଟରେ ଭାଗ ନେବା ପାଇଁ ସେ ପହଞ୍ଚିଥିବା ବେଳେ ଖେଳିବାକୁ ନେଇ ନିଜର ଯୋଗ୍ୟତା ସାବ୍ୟସ୍ତ କରିଛନ୍ତି। କିନ୍ତୁ WFI ତାଙ୍କ ଉପରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରୁଥିବାରୁ ତାଙ୍କ ଖେଳିବା ନେଇ ଆଶଙ୍କା ଦେଖାଦେଇଛି।

ଖେଳିବାକୁ ନେଇ ଭିନେଶଙ୍କ ଦାବି

ଗୋଣ୍ଡାରେ ପହଞ୍ଚିବା ପରେ ଭିନେଶ ଫୋଗାଟ WFI ପକ୍ଷରୁ ଦିଆଯାଇଥିବା କାରଣ ଦର୍ଶାଅ ନୋଟିସର ଜବାବ ରଖିଛନ୍ତି। ସେ ଦାବି କରିଛନ୍ତି ଯେ ନ୍ୟାସନାଲ୍ ଓପନ୍ ରାଙ୍କିଙ୍ଗ୍ ଟୁର୍ଣ୍ଣାମେଣ୍ଟ ଖେଳିବା ପାଇଁ ସେ ସମ୍ପୂର୍ଣ୍ଣ ଯୋଗ୍ୟ ଅଟନ୍ତି। ବିଶ୍ୱ ଆଣ୍ଟି-ଡୋପିଂ ଏଜେନ୍ସି (WADA) ର ନିୟମ ୫.୬.୧ ତାଙ୍କ ଉପରେ ଲାଗୁ ହେବ ନାହିଁ ବୋଲି ସେ କହିଛନ୍ତି। କାରଣ ସେ ନିଜର ସନ୍ନ୍ୟାସରୁ ଫେରିବା ନିଷ୍ପତ୍ତି ସମ୍ପର୍କରେ ୟୁନାଇଟେଡ୍ ୱାର୍ଲ୍ଡ ରେସଲିଂ (UWW) କୁ ପୂର୍ବରୁ ଅବଗତ କରାଇସାରିଛନ୍ତି। ମହାସଂଘ ତାଙ୍କୁ ଖେଳିବାକୁ ନଦେବା ପାଇଁ ଷଡ଼ଯନ୍ତ୍ର କରୁଥିବା ଏବଂ କୁସ୍ତି ଛାଡ଼ିବାକୁ ବାଧ୍ୟ କରୁଥିବା ସେ ଅଭିଯୋଗ କରିଛନ୍ତି।

WFI ର କାରଣ ଦର୍ଶାଅ ନୋଟିସ

ଅନ୍ୟପକ୍ଷରେ, WFI ସ୍ପଷ୍ଟ କରିଛି ଯେ ଯେପର୍ଯ୍ୟନ୍ତ ତାଙ୍କ ବିରୋଧରେ ଅନୁଶାସନମୂଳକ କାର୍ଯ୍ୟାନୁଷ୍ଠାନ ଶେଷ ନହୋଇଛି, ସେପର୍ଯ୍ୟନ୍ତ ତାଙ୍କୁ ଟୁର୍ଣ୍ଣାମେଣ୍ଟରେ ଭାଗ ନେବାକୁ ଅନୁମତି ଦିଆଯିବ ନାହିଁ। WFI ପକ୍ଷରୁ ଭିନେଶଙ୍କୁ ଏକ ୧୪ ପୃଷ୍ଠା ସମ୍ବଳିତ କାରଣ ଦର୍ଶାଅ ନୋଟିସ୍ ଜାରି କରାଯାଇଥିଲା। ଏଥିରେ ତାଙ୍କ ଉପରେ ଅନୁଶାସନହୀନତା ଏବଂ ଆଣ୍ଟି-ଡୋପିଂ ନିୟମ ଉଲ୍ଲଂଘନର ଅଭିଯୋଗ ଲାଗିଥିଲା। ନିୟମ ଅନୁଯାୟୀ, ସନ୍ନ୍ୟାସ ପରେ ପ୍ରତ୍ୟାବର୍ତ୍ତନ କରୁଥିବା ଖେଳାଳିଙ୍କ ପାଇଁ ୬ ମାସର ନୋଟିସ୍ ପିରିୟଡ୍ ରହିଥାଏ, ଯାହାକୁ ଭିନେଶ ପୂରଣ କରିନାହାନ୍ତି ବୋଲି WFI ଯୁକ୍ତି ବାଢ଼ିଛି ଏବଂ ଜୁନ୍ ୨୬, ୨୦୨୬ ପର୍ଯ୍ୟନ୍ତ ତାଙ୍କ ଖେଳିବା ଉପରେ ରୋକ୍ ଲଗାଇଛି।

ପ୍ୟାରିସ୍ ଅଲିମ୍ପିକ୍ସ ପରେ ନେଇଥିଲେ ସନ୍ନ୍ୟାସ

ସୂଚନାଯୋଗ୍ୟ ଯେ, ୨୦୨୪ ପ୍ୟାରିସ୍ ଅଲିମ୍ପିକ୍ସରେ ମହିଳା ୫୦ କିଲୋଗ୍ରାମ ବର୍ଗର ଫାଇନାଲ୍ ମ୍ୟାଚ୍ ପୂର୍ବରୁ ଓଜନ ଅଧିକ ଥିବା କାରଣରୁ ଭିନେଶଙ୍କୁ ଅଯୋଗ୍ୟ ଘୋଷଣା କରାଯାଇଥିଲା। ଏହି ଘଟଣା ପରେ ସେ ଭାଙ୍ଗି ପଡ଼ିଥିଲେ ଏବଂ କୁସ୍ତିରୁ ସନ୍ନ୍ୟାସ ନେବାକୁ ଘୋଷଣା କରିଥିଲେ। ପରବର୍ତ୍ତୀ ସମୟରେ ସେ ନିଜ ନିଷ୍ପତ୍ତି ବଦଳାଇ ପୁଣିଥରେ ମ୍ୟାଟକୁ ଫେରିବାକୁ ପ୍ରୟାସ କରୁଛନ୍ତି, କିନ୍ତୁ WFI ସହ ତାଙ୍କର ପୁରୁଣା ତିକ୍ତତା କାରଣରୁ ତାଙ୍କ ପ୍ରତ୍ୟାବର୍ତ୍ତନରେ ବାରମ୍ବାର ବାଧା ସୃଷ୍ଟି ହେଉଛି।

ହରିଆଣା: ହରିଆଣା ବିଧାନସଭା ନିର୍ବାଚନରେ ଜୁଲନା ନିର୍ବାଚନ ମଣ୍ଡଳୀରେ ବିଜୟୀ ହୋଇଛନ୍ତି କଂଗ୍ରେସର ଭିନେଶ ଫୋଗଟ୍‌। ସେ ୬ ହଜାର ୧୫ ଭୋଟରେ ଭାରତୀୟ ଜନତା ପାର୍ଟି (ବିଜେପି)ର ଯୋଗେଶ ବୈରାଗୀଙ୍କୁ ପରାସ୍ତ କରିଛନ୍ତି। ଭିନେଶ ଫୋଗଟଙ୍କୁ ମୋଟ ୬୫ ହଜାର ୦୮୦ ଭୋଟ ମିଳିଥିବା ବେଳେ ବିଜେପିର ଯୋଗେଶ ବୈରାଗୀଙ୍କୁ ୫୯ ହଜାର ୦୬୫ ଭୋଟ୍ ମିଳିଛି।ଏଥିସହ ଜୁଲନାରେ ବିଜୟ ହେଇଛନ୍ତି କୁସ୍ତି ଯୋଦ୍ଧା ତଥା ଅଲମ୍ପିକ୍‌ ‌ତାରକା ଭିନେଶ ଫୋଗଟ୍‌।

ହରିଆଣା ବିଧାନସଭା ନିର୍ବାଚନରେ ଜୁଲନା ନିର୍ବାଚନମଣ୍ଡଳୀ ଏକ ପ୍ରମୁଖ ଯୁଦ୍ଧକ୍ଷେତ୍ର ଭାବରେ ଉଭା ହୋଇଥିଲା। ଭିନେଶ ପ୍ରଥମ ଥର ପାଇଁ ଏହି ଆସନରୁ ତାଙ୍କର ନିର୍ବାଚନୀ ଡେବ୍ୟୁ କରିଛନ୍ତି। କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କୁ ଭେଟି ଗତ ସେପ୍ଟେମ୍ବରରେ କଂଗ୍ରେସରେ ଯୋଗ ଦେଇଥିଲେ ଭିନେଶ ଫୋଗଟ୍‌। ଭିନେଶ ଫୋଗାଟ ଏବଂ ବଜରଙ୍ଗ ପୁନିଆ ମଲ୍ଲିକାର୍ଜୁନ ଖଡ଼ଗେଙ୍କୁ ଭେଟିବା ପୂର୍ବରୁ ରେଳ ଚାକିରିରୁ ଇସ୍ତଫା ଦେଇଥିଲେ।

ଜିନ୍ଦ ଜିଲ୍ଲାରେ ଅବସ୍ଥିତ ଏହି ଆସନଟିରୁ ଅଲମ୍ପିକ ଖେଳାଳି ଓ କୁସ୍ତି ଯୋଦ୍ଧା ଭିନେଶ ଲଢ଼ିବା ପରଠାରୁ ଏହା ବିଶେଷ ଧ୍ୟାନକୁ ଆସିଥିଲା। ପୂର୍ବତନ ବାଣିଜ୍ୟିକ ପାଇଲଟ୍ ତଥା ବିଜେପିର କ୍ୟାପଟେନ ଯୋଗେଶ ବୈରାଗୀଙ୍କଠାରୁ ଫୋଗେଟ୍ କଡ଼ା ପ୍ରତିନ୍ଦ୍ବନ୍ଦ୍ବିତାର ସମ୍ମୁଖୀନ ହୋଇଥିଲେ।

ନୂଆଦିଲ୍ଲୀ: ହରିଆଣା ବିଧାନସଭା ନିର୍ବାଚନ ପୂର୍ବରୁ ହାତ ଧରିଲେ ଦୁଇ ରେସଲର। ହରିଆଣାରେ ଅଡୁଆରେ ବିଜେପି କଂଗ୍ରେସକୁ ମିଳିଲା ବଳ। ଶୁକ୍ରବାର ବିଧିବଦ୍ଧ ଭାବେ ଦଳରେ ସାମିଲ ହୋଇଛନ୍ତି ରେସଲର ଭିନେଶ ଫୋଗାଟ ଓ ବଜରଙ୍ଗ ପୁନିଆ। କଂଗ୍ରେସରେ ସାମିଲ ହେବା ପୂର୍ବରୁ ଭିନେଶ ଓ ବଜରଙ୍ଗ ଦିଲ୍ଲୀରେ ଦଳର ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କୁ ଭେଟିଥିଲେ। ଏହାପରେ ପାର୍ଟି କାର୍ଯ୍ୟାଳୟରେ ବିଧିବଦ୍ଧ ଭାବେ କଂଗ୍ରେସରେ ସାମିଲ ହୋଇଛନ୍ତି।

ଦଳରେ ସାମିଲ ହେବାପରେ ବଡ ବୟାନ ଦେଇଛନ୍ତି ଭିନେସ। ସେ କହିଛନ୍ତି ଖରା ସମୟରେ ହିଁ ଜଣାପଡିଥାଏ କିଏ ନିଜର, ଯେତେବେଳେ ଆମକୁ ବିଚ ରାସ୍ତାରେ ଘୋଷଡା ଯାଇଥିଲା ସେତେବେଳେ ବିଜେପିକୁ ଛାଡି ସମସ୍ତ ବିରୋଧୀ ଦଳ ଆମ ସହ ଛିଡା ହୋଇଥିଲେ। ଆଜି ଠାରୁ ନୂଆ ଇନିଂସ ଆରମ୍ଭ ହେବାକୁ ଯାଉଛି ଯାହାକୁ ନେଇ ସେ ଗର୍ବିତ ବୋଲି କହିଛନ୍ତି। ଏହାସହ ବିଜେପି ଉପରେ ବର୍ଷିଛନ୍ତି ଦୁଇ ରେସଲର।

ସେପଟେ କଂଗ୍ରେସରେ ସାମିଲ ହେବାପରେ ବିଜେପିକୁ କଡା ସମାଲୋଚନା କରିଛନ୍ତି ବଜରଙ୍ଗ ପୁନିଆ। ସେ କହିଛନ୍ତି ବିଜେପି ଆଇଟି ସେଲର ଉଦ୍ଦେଶ୍ୟ କେବଳ ରାଜନୀତି କରିବା। ଜନ୍ତରମନ୍ତରରେ ଯାହା କିଛି ହୋଇଥିଲା ସେଥିରେ ବିଜେପିର ବଡ ହାତ ଥିଲା। ଭିନେଶ ପ୍ୟାରିସ ଅଲିମ୍ପିକ୍ସ ଫାଇନାଲରେ ଅଯୋଗ୍ୟ ଘୋଷିତ ହେବାପରେ ଉତ୍ସବ ମନେଇଥିଲେ ବିଜେପି ଆଇଟି ସେଲର ସଦସ୍ୟ ବୋଲି ଅଭିଯୋଗ କରିଛନ୍ତି ପୁନିଆ।

କଂଗ୍ରେସରେ ଯୋଗଦେବା ପୂର୍ବରୁ ଭିନେଶ ବ୍ୟକ୍ତିଗତ କାରଣ ଦର୍ଶାଇ ଭାରତୀୟ ରେଲୱେର ଓଏସଡି ପଦରୁ ଇସ୍ତଫା ଦେଇଥିଲେ। ଏହାପରେ ସେ ରାଜନୀତିରେ ସାମିଲ ହେବା ନେଇ ଏକ ପ୍ରକାର ସ୍ପଷ୍ଟ ହୋଇ ଯାଇଥିଲା। ତେବେ ବଜରଙ୍ଗ ଓ ଭିନେଶ କଂଗ୍ରେସରେ ଯୋଗଦେବା ପରେ ଦଳ ତାଙ୍କୁ ବିଧାନସଭା ନିର୍ବାଚନରେ ପ୍ରାର୍ଥୀ କରିବା ନେଇ ଚର୍ଚ୍ଚା ଜୋର ଧରିଛି। ଅକ୍ଟୋବର ୫ରେ ହରିଆଣାରେ ୯୦ଟି ବିଧାନସଭା ଆସନ ପାଇଁ ଭୋଟ୍‌ ପଡ଼ିବାକୁ ଯାଉଛି। ଏହାରି ଭିତରେ କଂଗ୍ରେସରେ ଉଭୟଙ୍କ ଯୋଗଦାନ ବିଜେପି ଶାସିତ ରାଜ୍ୟ ଉପରେ ବଡ ପ୍ରଭାବ ପକାଇବ ବୋଲି ଚର୍ଚ୍ଚା ହେଉଛି।

ନୂଆଦିଲ୍ଲୀ: ଦିଲ୍ଲୀରେ ପହଞ୍ଚିଛନ୍ତି ପୂର୍ବତନ ଭାରତୀୟ ରେସଲର ବିନେଶ ଫୋଗଟ। ପ୍ଯାରିସ ଅଲିମ୍ପିକ୍ସରେ ପଦକରୁ ବଞ୍ଚିତ ହୋଇଥିବା ଭିନେଶଙ୍କୁ ଦିଲ୍ଲୀ ବିମାନ ବନ୍ଦରରେ ଭବ୍ଯ ସ୍ବାଗତ କରାଯାଇଥିଲା। ସେଠାରେ ହଜାର ହଜାର ଶୁଭେଚ୍ଛୁ ବିନେଶଙ୍କୁ ସ୍ବାଗତ କରିଥିଲେ।

ମହିଳା ୫୦ କେଜି ଇଭେଣ୍ଟରେ ୧୦୦ ଗ୍ରାମ ଓଜନ ବୃଦ୍ଧି କାରଣରୁ ତାଙ୍କୁ ଇଭେଣ୍ଟରୁ ବାଦ ଦିଆଯାଇଥିଲା। ଏହାକୁ ନେଇ ସାରା ଦେଶରେ ପ୍ରତିକ୍ରିୟା ପ୍ରକାଶ ପାଇଥିଲା। କମିଟିର ନିଷ୍ପତ୍ତି ବିରୋଧରେ ଭିନେଶ କୋର୍ଟ ଅଫ ଆର୍ବିଟ୍ରେସନ ଫର ସ୍ପୋର୍ଟ ବା ସିଏଏସଙ୍କ ଦ୍ବାରସ୍ଥ ହୋଇଥିଲେ। ମାତ୍ର ସେଠାରେ ବି ତାଙ୍କୁ ନିରାଶ ହେବାକୁ ପଡିଥିଲା। ଦିଲ୍ଲୀରେ ପହଞ୍ଚିବା ପରେ ସେ ଅଲିମ୍ପିକ ମେଡାଲରୁ ବଞ୍ଚିତ ହେବାକୁ ନେଇ ନିଜର ଅସନ୍ତୋଷ ବ୍ଯକ୍ତ କରିଥିଲେ। ଦେଶରେ ମହିଳାଙ୍କ ଅଧିକାରର ସୁରକ୍ଷା ନେଇ ଦିଲ୍ଲୀରେ ଦୀର୍ଘ ଦିନ ଧରି ଆନ୍ଦୋଳନ କରିଥିବା ଭିନେଶ ଦେଶବାସୀଙ୍କ ହୃଦୟରେ ସ୍ବତନ୍ତ୍ର ସ୍ଥାନ ଗ୍ରହଣ କରିଛନ୍ତି। ବିମାନ ବନ୍ଦରରେ ନାଚି ନାଚି ତଥା ବାଜା ବଜାଇ ଭିନେଶଙ୍କୁ ସ୍ବାଗତ କରିଥିଲେ ଶୁଭେଚ୍ଛୁ। ଭିନେଶଙ୍କ ଲାଗି ଇନ୍ଦିରା ଗାନ୍ଧି ଅନ୍ତର୍ଜାତୀୟ ବିମାନ ବନ୍ଦରରେ ସୁରକ୍ଷା ବ୍ଯବସ୍ଥା କଡାକଡି କରାଯାଇଥିଲା।

ନୂଆଦିଲ୍ଲୀ: ଅଭିଜ୍ଞ ଭାରତୀୟ ମହିଳା କୁସ୍ତିଯୋଦ୍ଧା ବିନେଶ ଫୋଗଟଙ୍କୁ ମିଳିବନି ପଦକ। ‘କାସ୍‌’ରେ ବିନେଶ ଫୋଗଟଙ୍କ ଆବେଦନ ଅଗ୍ରାହ୍ୟ ସୂଚନା । କୁସ୍ତିରେ ଯୁଗ୍ମ ରୌପ୍ୟ ପଦକ ପାଇଁ ଆବେଦନ ଖାରଜ ହୋଇଥିବା ଜଣାପଡ଼ିଛି। ଅଧିକ ଓଜନ ପାଇଁ ଫାଇନାଲ୍‌ ପୂର୍ବରୁ ସେ ଡିସ୍‌କ୍ବାଲିଫାଏ ହୋଇଥିଲେ। ବିନେଶ ଫୋଗଟଙ୍କୁ ଅଲିମ୍ପିକ୍ସ କୁସ୍ତି ଫାଇନାଲରେ ଅଯୋଗ୍ୟ ଘୋଷଣା କରାଯିବା ବିରୋଧରେ କାସ୍‌‌ (କୋର୍ଟ ଅଫ୍‌‌ ଆର୍ବିଟ୍ରେସନ ଫର ସ୍ପୋର୍ଟ୍ସ) ରେ ଅପିଲ କରିଥିଲେ।

ସୂଚନାଯୋଗ୍ୟ, ଅଗଷ୍ଟ ୬ରେ ହେବାକୁ ଥିବା ମହିଳା କୁସ୍ତିର ୫୦ କିଲୋଗ୍ରାମ ଫାଇନାଲ ପୂର୍ବରୁ ବିନେଶଙ୍କୁ ୧୦୦ ଗ୍ରାମ ଅଧିକ ଓଜନ କାରଣ ପାଇଁ ଅଯୋଗ୍ୟ ଘୋଷିତ କରାଯାଇଥିଲା। ଫଳରେ ନିଶ୍ଚିତ ରୌପ୍ୟ ଜିତିବାକୁ ଥିବା ବିନେଶଙ୍କ ପୂରା ଦେଶ ସ୍ତବ୍ଧ ହୋଇଥିଲା। ଅଲିମ୍ପିକ୍‌ ଆୟୋଜନ କମିଟି ସେମିରେ ବିନେଶଙ୍କଠାରୁ ହାରିଥିବା କ୍ୟୁବାର ୟୁସ୍ନେଲିସଙ୍କୁ ଆମେରିକାର ସାରାଙ୍କ ସହ ଫାଇନାଲ ଲଢ଼ିବାକୁ ସୁଯୋଗ ଦିଆଯାଇଥିଲା। ସାରା ଏଠାରେ ସ୍ୱର୍ଣ୍ଣପଦକ ବିଜୟୀ ହୋଇଥିଲେ। ବିଶ୍ୱକୁସ୍ତିର ସର୍ବୋଚ ସଂସ୍ଥା ୟୁନାଇଟେଡ ୱାର୍ଲ୍ଡ ରେସଲିଂ ଓ ପ୍ୟାରିସ୍‌ ଅଲିମ୍ପିକ୍‌ ଆୟୋଜନ କମିଟିକୁ ପକ୍ଷଭୁକ୍ତ କରି ଏହି ବିନେଶ ସେମାନଙ୍କ ବିରୋଧରେ ମକଦ୍ଦମା କରିଥିଲେ।

ପ୍ୟାରିସ୍‌‌: ରେସଲର୍ ବିନେଶ ଫୋଗଟଙ୍କୁ ମିଳିବ କି ନ୍ୟାୟ। ବିନେଶ ଫୋଗତଙ୍କୁ ଅଲିମ୍ପିକ୍ସ କୁସ୍ତି ଫାଇନାଲରେ ଅଯୋଗ୍ୟ ଘୋଷଣା କରାଯିବା ବିରୋଧରେ କାସ୍‌‌ (କୋର୍ଟ ଅଫ୍‌‌ ଆର୍ବିଟ୍ରେସନ ଫର ସ୍ପୋର୍ଟ୍ସ) ରେ ହୋଇଥିବା ମକଦ୍ଦମାର ରାୟ ଆଜି ପ୍ରକାଶ ପାଇବ। ପୂର୍ବରୁ ଏହି ମକଦ୍ଦମାର ବିଚାର କରୁଥିବା ଡଃ ଆନ୍ନାବେଲେ ବେନ୍ନେଟଙ୍କ ଡିଭିଜନ ବେଞ୍ଚ ଉଭୟ ପକ୍ଷଙ୍କ ଯୁକ୍ତି ଶୁଣିସାରିଛନ୍ତି। ସୋମବାର ବିନେଶ ପ୍ୟାରିସ ଅଲିମ୍ପିକ୍ସର କ୍ରୀଡ଼ାଗ୍ରାମ ଛାଡ଼ିଛନ୍ତି।

ମାତ୍ର ଶହେ ଗ୍ରାମ ଅଧିକ ଓଜନ ପାଇଁ ସ୍ବର୍ଣ୍ଣ ପଦକ ମୁକାବିଲାରୁ ବାଦ୍ ପଡ଼ିଥିଲେ ଭିନେଶ। ଫାଇନାଲରେ ପହଞ୍ଚିଥିଲେ ମଧ୍ୟ ଲଢ଼ିପାରି ନ ଥିଲେ। ଏହା ବିରୋଧରେ ସେ କୋର୍ଟ ଅଫ୍ ଆର୍ବିଟ୍ରେସନ ଅଫ୍ ସ୍ପୋର୍ଟସରେ ଅପିଲ କରିଥିଲେ। ନିଜ ଆବେଦନରେ ସେ ଦର୍ଶାଇଥିଲଲେ ଯେ, ଓଜନ ସମେତ ସବୁ ନିୟମ ଭିତରେ ରହି ସେ ଫାଇନାଲରେ ପହଞ୍ଚିଥିଲେ। ତେଣୁ ରୌପ୍ୟ ପଦକ ପାଇବାକୁ ସେ ଯୌଗ୍ୟ। ତାଙ୍କୁ ଯୁଗ୍ମ ଭାବେ ରୌପ୍ୟ ପଦକ ପ୍ରଦାନ କରାଯାଉ।

ନୂଆଦିଲ୍ଲୀ: ରେସଲର୍ ବିନେଶ ଫୋଗଟଙ୍କୁ ମିଳିବ କି ନ୍ୟାୟ। ତାଙ୍କୁ ରୌପ୍ଯ ପଦକ ପ୍ରଦାନ କରାଯିବ କି ନାହିଁ ଏ ନେଇ ଆଜି କୋର୍ଟ ଅଫ୍ ଆର୍ବିଟ୍ରେସନ ଅଫ୍ ସ୍ପୋର୍ଟସରେ ଶୁଣାଣି ହେବାର ଅଛି। ଅପରାହ୍ନ ସାଢ଼େ ଗୋଟାଏରେ ଏହି ଶୁଣାଣି ହେବ। ମାତ୍ର ଶହେ ଗ୍ରାମ ଅଧିକ ଓଜନ ପାଇଁ ସ୍ବର୍ଣ୍ଣ ପଦକ ମୁକାବିଲାରୁ ବାଦ୍ ପଡ଼ିଥିଲେ ଭିନେଶ। ଫାଇନାଲରେ ପହଞ୍ଚିଥିଲେ ମଧ୍ଯ ଲଢ଼ିପାରିନଥିଲେ। ଏହା ବିରୋଧରେ ସେ କୋର୍ଟ ଅଫ୍ ଆର୍ବିଟ୍ରେସନ ଅଫ୍ ସ୍ପୋର୍ଟସରେ ଅପିଲ କରିଛନ୍ତି। ନିଜ ଆବେଦନରେ ସେ ଦର୍ଶାଇଛନ୍ତି ଯେ, ଓଜନ ସମେତ ସବୁ ନିୟମ ଭିତରେ ରହି ସେ ଫାଇନାଲରେ ପହଞ୍ଚିଥିଲେ। ତେଣୁ ରୌପ୍ଯ ପଦକ ପାଇବାକୁ ସେ ଯୌଗ୍ୟ। ତାଙ୍କୁ ଯୁଗ୍ମ ଭାବେ ରୌପ୍ଯ ପଦକ ପ୍ରଦାନ କରାଯାଉ। ଏହା ଉପରେ ଆଜି ଅପରାହ୍ନ ଗୋଟାଏ ତିରିଶରେ କୋର୍ଟ ଅଫ୍ ଆର୍ବିଟ୍ରେସନ ଅଫ୍ ସ୍ପୋର୍ଟ୍ସରେ ଶୁଣାଣି ହେବ।

ବିନେଶଙ୍କ ପକ୍ଷରୁ ୩ ଜଣ ବଡ଼ ବଡ଼ ଓକିଲ ଲଢିବେ ବୋଲି ଜଣାପଡ଼ିଛି। ଭାରତର ବିଶିଷ୍ଟ ଓକିଲ ହରିଶ ସାଲଭେ ଏହି ଟିମର ନେତୃତ୍ଵ ନେବେ ବୋଲି ଜଣାପଡ଼ିଛି। ଯଦି ରାୟ ତାଙ୍କ ସପକ୍ଷରେ ଯାଏ, ତେବେ ଭିନେଶଙ୍କୁ ରୌପ୍ଯ ପଦକ ମିଳିବାର ସମ୍ଭାବନା ଅଛି। ଆଉ ଥରେ ଓଜନ କରାଇ ଫାଇନାଲ ଖେଳିବାକୁ ମଧ୍ଯ ସେ ଆବେଦନ କରିଥିଲେ। ଏହାକୁ କିନ୍ତୁ ଖାରଜ କରାଯାଇଛି।