କଲମ୍ବୋ: କଲମ୍ବୋସ୍ଥିତ ଆର ପ୍ରେମାଦାସା ଷ୍ଟାଡିୟମରେ ଆୟୋଜକ ଶ୍ରୀଲଙ୍କା ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜର ଶେଷ ତଥା ଅନ୍ତିମ ମ୍ୟାଚରେ ପରାଜୟ ସହିତ ଟିମ୍ ଇଣ୍ଡିଆ ଏକଦିବସୀୟ ସିରିଜ ହାରିଛି। ଶ୍ରୀଲଙ୍କା ଟସ୍ ଜିତି ପ୍ରଥମେ ବ୍ୟାଟିଂ କରି ୨୪୮ ରନ୍ ସଂଗ୍ରହ କରିଥିଲା। ଧାର୍ଯ୍ୟ ୨୪୯ ରନ୍‌ର ପିଛା କରି ଟିମ୍ ଇଣ୍ଡିଆ ୨୬.୧ ଓଭରରେ ୧୦ ୱିକେଟ ହରାଇ ୧୩୮ ରନ୍ ସଂଗ୍ରହ କରିଥିଲା। ଫଳରେ  ଶ୍ରୀଲଙ୍କା ଦୁଇଟି ମ୍ୟାଚ୍ ଜିତି ସିରିଜକୁ ୨-୦ରେ ଜିତି ନେଇଛି। ୩ ଟିକିଆ ସିରିଜ୍ ମଧ୍ୟରେ ଶ୍ରୀଲଙ୍କା ୨ଟି ଜିତିଥିବାବେଳେ ଗୋଟିଏ ମ୍ୟାଚ୍ ଡ୍ର ରହିଥିଲା। ଏଥିସହ ଦୀର୍ଘ ୨୭ ବର୍ଷ ପରେ ଭାରତ ବିପକ୍ଷରେ କୌଣସି ଦ୍ୱିପାକ୍ଷିକ ସିରିଜ ଜିତିବାକୁ ସକ୍ଷମ ହୋଇଛି ଶ୍ରୀଲଙ୍କା।

ଭରତ ପକ୍ଷରୁ ରୋହିତ ଶର୍ମା ୩୫ ରନ୍ କରିଥିବାବେଳେ ବିରାଟ କୋହଲି ୨୦ ରନ୍ କରିଥିଲେ। ସେହିପରି ରିୟାନ ପରାଗ ୧୫ ଏବଂ ୱାଶିଂଟନ ସୁନ୍ଦର ୩୦ ରନ୍ କରିଥିଲେ। ଅନ୍ୟ ୭ ଜଣ ବ୍ୟାଟ୍ସମ୍ୟାନ ଏକ ଅଙ୍କରେ ରହିଥିଲେ।

ଶ୍ରୀଲଙ୍କା ପକ୍ଷରୁ ଦୁନିତ ୱେଲାଲଗେ ସର୍ବାଧିକ ୫ ୱିକେଟ ନେଇଥିଲେ । ସେହିପରି ଜେ‌ଫ୍ରେ ଭଣ୍ଡାରସେ ଓ ମହିଶ ଥିକସାନା ୨ଟି ଲେଖାଏଁ ୱିକେଟ ନେଇଥିବା ବେଳେ  ଅସିଥା ଫର୍ଣ୍ଣାଣ୍ଡୋ ଗୋଟିଏ ୱିକେଟ ନେଇଥିଲେ।

କଲମ୍ବୋ: ଭାରତ ଓ ଶ୍ରୀଲଙ୍କା ମଧ୍ୟରେ ୩ ମ୍ୟାଚ୍‌ ବିଶିଷ୍ଟ ଦିନିକିଆ କ୍ରିକେଟ ସିରିଜ୍‌ ଆସନ୍ତାକାଲିଠାରୁ ବା ଶୁକ୍ରବାରଠାରୁ ଆରମ୍ଭ ହେବ। ଏହି ସିରିଜ୍‌ର ସମସ୍ତ ମ୍ୟାଚ୍‌ ସ୍ଥାନୀୟ ରଣସିଂଘେ ପ୍ରେମଦାସା ଷ୍ଟାଡିୟମ୍‌ରେ ଖେଳାଯିବ। ଏହି ମ୍ୟାଚ୍‌ ଗୁଡ଼ିକ ଭାରତୀୟ ସମୟ ଅପରାହ୍ଣ ୨ଟା ୩୦ ମିନିଟ୍‌ରୁ ଆରମ୍ଭ ହେବ ଓ ସୋନି ସ୍ପୋର୍ଟ୍ସ ଟେନ ଚ୍ୟାନେଲରେ ସିଧାସଳଖ ପ୍ରସାରଣ କରାଯିବ। ଏହା ପୂର୍ବରୁ କାଣ୍ଡିରେ ଦୁଇ ଦେଶ ୩ ମ୍ୟାଚ୍‌ ବିଶିଷ୍ଟ ଟି-୨୦ ସିରିଜ୍‌ ଖେଳିଥିଲେ। ଯୁବ ଖେଳାଳିମାନଙ୍କୁ ନେଇ ଗଠିତ ଭାରତୀୟ ଦଳ ଏକତରଫା ଭାବେ ୩-୦ ବ୍ୟବଧାନରେ ସିରିଜ୍‌ ଜିତିନେଇଥିଲା। ଏବେ ଦିନିକିଆ ସିରିଜ୍‌କୁ ବିଶ୍ୱର ଶ୍ରେଷ୍ଠ ଖେଳାଳି ଯଥା ରୋହିତ ଶର୍ମା, ବିରାଟ କୋହଲିଙ୍କ ପ୍ରତ୍ୟାବର୍ତ୍ତନ ହୋଇଛି। ଅନ୍ୟପକ୍ଷରେ ଶ୍ରୀଲଙ୍କାର ପ୍ରଥମ ପସନ୍ଦ ୫ଜଣ ମିଡିୟମ୍‌ ପେସ୍‌ ବୋଲର ଏହି ସିରିଜ୍‌ରେ ଆହତ ସମସ୍ୟା ହେଉ କିମ୍ବା ଅସୁସ୍ଥତା ଯୋଗୁ ଖେଳୁନାହିଁ। ଏଭଳି ସ୍ଥିତିରେ ସିରିଜ୍‌ଟି ଏକତରଫା ହେବ କିମ୍ବା ପ୍ରତିଦ୍ୱନ୍ଦ୍ୱିତାମୂକ ତାହା ସମର୍ଥକଙ୍କ ମନରେ ପ୍ରଶ୍ନ ଉଠାଇଛି। କିନ୍ତୁ ଭାରତୀୟ ପ୍ରଶଂସକ ଏହି ସିରିଜ୍‌କୁ ୩-୦ରେ ଜିତି କ୍ଲିନ୍‌ ସୁଇପ କରିବ ବୋଲି ଆଶା କରୁଛନ୍ତି।

ନିକଟରେ ଭାରତ ଟି-୨୦ ବିଶ୍ୱକପ୍‌ରେ ଚାମ୍ପିଅନ ହୋଇଛି। ଏହା ପରେ ଶ୍ରୀଲଙ୍କା ସହ ୩ଟି ଟି-୨୦ ମ୍ୟାଚ୍‌ ଖେଳିଛି। ଦିନିକିଆ ଦଳରେ ସ୍ଥାନ ପାଇଥିବା ୧୫ଜଣଙ୍କ ମଧ୍ୟରୁ ୯ଜଣ ଏବେ ଟି-୨୦ ମୋଡ୍‌ରେ ଅଛନ୍ତି। ଯେଉଁ ୬ଜଣ ଟି-୨୦ ଦଳରେ ସ୍ଥାନ ପାଇ ନ ଥିଲେ ସେମାନଙ୍କ ମଧ୍ୟରୁ ୩ଜଣ ବିଶ୍ୱକପ୍‌ ପରେ ଆଉ କୌଣସି ଟୁର୍ଣ୍ଣାମେଣ୍ଟ ଖେଳି ନାହାନ୍ତି। ଏଣୁ ଦିନିକିଆ ଫର୍ମାଟରେ ଖେଳିଲାବେଳେ ଖେଳାଳିଙ୍କୁ ଅନେକ କିଛି ଆଡଜଷ୍ଟ କରିବାକୁ ହେବ। ଯେଉଁ ଖେଳାଳି ଯେତେଶୀଘ୍ର ନିଜକୁ ସଜାଡ଼ିନେବ, ସେହି ଖେଳାଳି ସଫଳତା ପାଇବେ। ଅଧିନାୟକ ରୋହିତ ଶର୍ମାଙ୍କ ମତରେ ଆମକୁ ଟି-୨୦ ବିଶ୍ୱକପ୍‌ ଚାମ୍ପିଅନ ହେବା କଥା ଏବେ ଛାଡିବାକୁ ହେବ। ଏବେ ଅନ୍ୟ ଖେଳ ଉପରେ ଫୋକସ କରିବାକୁ ପଡ଼ିବ ଓ ଚାମ୍ପିଅନ୍ସ ଟ୍ରଫି ଓ ବିଶ୍ୱ ଟେଷ୍ଟ ଚାମ୍ପିଅନସିପର ସଫଳତା ଉପରେ ନଜର ରଖିବାକୁ ହେବ। ଯେତେ ଶୀଘ୍ର ସମ୍ଭବ ଆମକୁ ଏହି ଫର୍ମାଟ ସହ ଆଡଜଷ୍ଟ କରିନେବାକୁ ହେବ। ଏବେ ନୂଆ ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କ ଦିଗ୍‌ଦର୍ଶନରେ ଖେଳିବାକୁ ହେବ। ତାଙ୍କର ଲକ୍ଷ୍ୟ ସ୍ପଷ୍ଟ ଓ ଏହା ଦଳକୁ ଅଧିକ ସଫଳତା ଦେବ। କିନ୍ତୁ ଆମକୁ ପ୍ରଥମେ ବିଜୟ ଧାରା ବଜାୟ ରଖିବାକୁ ହେବ। ଦିନିକିଆ ଦଳରେ ରୋହିତ ଓ କୋହଲିଙ୍କ ସହ ଲୋକେଶ ରାହୁଲ, ଶ୍ରେୟସ ଆୟର, କୁଲଦୀପ ଯାଦବ ଓ ହର୍ଷିତ ରାଣା ସାମିଲ ହୋଇଛନ୍ତି। ଅନ୍ୟମାନେ ଟି-୨୦ ଖେଳିଥିବା ଦଳରୁ ଆସିବେ। ଦଳ ଏହିଠାରୁ ଚାମ୍ପିଅନ୍ସ ଟ୍ରଫି ଲାଗି ପ୍ରସ୍ତୁତି ଆରମ୍ଭ କରିବ।

ଅନ୍ୟପକ୍ଷରେ ଟି-୨୦ ସିରିଜ୍‌ରେ ଦୟନୀୟ ପ୍ରଦର୍ଶନ କରିଥିବା ଶ୍ରୀଲଙ୍କା ଦଳ ତାହାର ୫ଜଣ ପ୍ରମୁଖ ପେସ୍‌ ବୋଲରଙ୍କୁ ହରାଇଛି। ଆହତ ଓ ଅସୁସ୍ଥ ଯୋଗୁ ଏମାନେ ଦିନିକିଆ ଦଳରେ ସ୍ଥାନ ପାଇ ନାହାନ୍ତି। ମନୋନୀତ ହୋଇଥିବା ମାଥୀଶା ପତିରାଣା ଓ ଦିଲସାନ ମଦୁଶଙ୍କା ଶେଷ ମୁହୂର୍ତ୍ତରେ ବାଦ୍‌ ପଡ଼ିଛନ୍ତି। ସେମାନଙ୍କ ସ୍ଥାନରେ ଦୁଇ ନବାଗତ ଖେଳାଳି ମହମ୍ମଦ୍‌ ଶିରାଜ ଓ ଏହସାନ ମାଲିଙ୍ଗାଙ୍କୁ ସାମିଲ କରାଯାଇଛି। କେବଳ ଅସିଥା ଫର୍ଣ୍ଣାଣ୍ଡୋ ଦଳରେ ଜଣେ ମାତ୍ର ଅଭିଜ୍ଞ ପେସ ବୋଲର ରହିଛନ୍ତି। ସେହିପରି ଏହି ସିରିଜ୍‌ ଲାଗି କୁଶାଲ ମେଣ୍ଡିସ୍‌ଙ୍କୁ ପ୍ରଥମେ ଅଧିନାୟକ ମନୋନୀତ କରାଯାଇଥିଲା। କିନ୍ତୁ ଏବେ ତାଙ୍କ ସ୍ଥାନରେ ଟି-୨୦ ଦଳର ନେତୃତ୍ୱ ନେଇଥିବା ଚାରିତ ଆଶାଲଙ୍କାଙ୍କୁ ଦାୟିତ୍ୱ ଦିଆଯାଇଛି। ଶ୍ରୀଲଙ୍କା ଦଳ ଖେଳାଳି ଚୟନ ଓ ଖେଳ ପ୍ରଦର୍ଶନରେ ସ୍ଥିରତା ରଖିପାରି ନାହିଁ। ଏଭଳି ସ୍ଥଳେ ଦଳ ଲଢ଼ୁଆ ଖେଳିଲେ ସବୁଠାରୁ ଭଲ କଥା ହେବ।

ଖେଳାଳି ଦଳ
ଭାରତ: ରୋହିତ ଶର୍ମା (ଅଧିନାୟକ), ଶୁବମାନ ଗିଲ (ଉପଅଧିନାୟକ), ବିରାଟ କୋହଲି, ଲୋକେଶ ରାହୁଲ (ୱିକେଟରକ୍ଷକ), ଋଷଭ ପନ୍ତ୍‌ (ୱିକେଟ ରକ୍ଷକ), ଶ୍ରେୟାସ ଆୟର, ଶିବମ ଦୁବେ, ରିୟାନ ପରାଗ, ଅକ୍ଷର ପଟେଲ, କୁଲଦୀପ ଯାଦବ, ୱାଶିଂଟନ ସୁନ୍ଦର, ମହମ୍ମଦ୍‌ ସିରାଜ, ଅର୍ଶଦୀପ ସିଂ, ଖଲୀଲ ଅହମ୍ମଦ୍‌ ଓ ହର୍ଷିତ ରାଣା।

ଶ୍ରୀଲଙ୍କା: ଚାରିଥ ଆଶାଲଙ୍କା (ଅଧିନାୟକ), କୁଶାଲ ମେଣ୍ଡିସ, ପାଥୁମ ନିଶାଙ୍କା, ଅଭିଷ୍କା ଫର୍ଣ୍ଣାଣ୍ଡୋ, ନିଶାନ ମଦୁସ୍କା, ଜାନିଥ ଲିୟାନାଗେ, କାମିନ୍ଦୁ ମେଣ୍ଡିସ, ସଦୀରା ସମରବିକ୍ରମା, ଚାମିକା କରୁଣାରତ୍ନେ, ମାହୀଶ ଥିକଶାନା, ଅସିଥା ଫର୍ଣ୍ଣାଣ୍ଡୋ, ମହମ୍ମଦ୍‌ ଶିରାଜ, ଏହସାନ ମାଲିଙ୍ଗା, ୱାନିନ୍ଦୁ ହାସରଙ୍ଗା, ଆକିଲା ଧନଞ୍ଜୟ ଓ ଦୁନିଥ ୱେଲାଲାଗେ।

ଦାମ୍ବୁଲା: ଶ୍ରୀଲଙ୍କାକୁ ପ୍ରଥମ ଦୁଇଟି ମ୍ୟାଚ୍‌ରେ ହରାଇ ଭାରତ ସ୍ଥାନୀୟ ପାଲିକଲ ଅନ୍ତର୍ଜାତୀୟ ଷ୍ଟାଡିୟମ୍‌ରେ ଚାଲିଥିବା ୩ ମ୍ୟାଚ୍‌ ବିଶିଷ୍ଟ ଟି-୨୦ ସିରିଜ୍‌ରେ ଆଗୁଆ ବିଜୟୀ ହୋଇଛି। ଏହି ସିରିଜ୍‌ର ତୃତୀୟ ତଥା ଶେଷ ମ୍ୟାଚ୍‌ ଆସନ୍ତାକାଲି ଏଠାରେ ଖେଳାଯିବ। ଏହି ମ୍ୟାଚ୍‌ରେ ବିଜୟୀ ହୋଇ ଭାରତ ୩-୦ରେ ସିରିଜ୍‌ ଜିତିବା ସହ କ୍ଲିନ୍‌ ସୁଇପ୍‌ ଲକ୍ଷ୍ୟରେ ରହିଛି। ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ ଗଠିତ ଭାରତୀୟ ଦଳ ନିଶ୍ଚିତ ଭାବେ ପ୍ରତିଦ୍ୱନ୍ଦ୍ୱୀ ଶ୍ରୀଲଙ୍କା ଅପେକ୍ଷା ଭଲ ଖେଳ ପ୍ରଦର୍ଶନ କରିଛି। ଏଣୁ ଦଳ ଶେଷ ମ୍ୟାଚ୍‌ରେ ବିଜୟୀ ହେବ ବୋଲି ଆଶା କରିବା ସ୍ୱାଭାବିକ୍‌।

ବ୍ୟାଟିଂ ହେଉ ଅବା ବୋଲିଂ ଭାରତର ପ୍ରଦର୍ଶନ ଠିକ୍‌ଠାକ୍‌ ରହିଛି। କିନ୍ତୁ ଶ୍ରୀଲଙ୍କା ଟପ୍‌ ଅର୍ଡର ବ୍ୟାଟରଙ୍କ ବିପକ୍ଷରେ ଭାରତୀୟ ବୋଲର ସଂଘର୍ଷ କରିବା। ଏହି ୩ ଜଣ ଟପ୍‌ ଅର୍ଡର ବ୍ୟାଟରଙ୍କୁ ପାଭିଲିୟନ ପଠାଇଦେଲେ ଶ୍ରୀଲଙ୍କାର ପ୍ରତିରୋଧ ଶେଷ ହୋଇଯାଉଥିବା ପ୍ରଥମ ଦୁଇଟି ମ୍ୟାଚ୍‌ରୁ ଜଣାପଡ଼ିଛି। ଭାରତ ବିପକ୍ଷରେ ଲଢେ଼ଇ କରିବାକୁ ହେଲେ ଦଳର ମିଡଲ ଅର୍ଡର ବ୍ୟାଟିଂକୁ ସଜାଡିବାକୁ ହେବ। ନଚେତ ଭାରତକୁ ମୁକାବିଲା କରିବା ସମ୍ଭବ ହେବ ନାହିଁ। ଭାରତୀୟ ଦଳର ବ୍ୟାଟିଂ ବେଶ ଦୃଢ଼ ରହିଛି ଓ ପ୍ରଥମ ଦୁଇଟି ମ୍ୟାଚ୍‌ରେ ଦୃଢ଼ ପ୍ରଦର୍ଶନ କରିଛନ୍ତି। ଏଣୁ ବ୍ୟାଟିଂକୁ ନେଇ ଭାରତ ଚିନ୍ତିତ ନୁହେଁ। ଶୁବମାନ ଗିଲ ଫିଟ୍‌ ହେଲେ ତୃତୀୟ ମ୍ୟାଚ୍‌ ଖେଳିବେ, ନଚେତ ସଞ୍ଜୁ ସାମସନଙ୍କୁ ଶେଷଥର ସୁଯୋଗ ମିଳିବ।

ବୋଲିଂରେ ଭାରତ ପ୍ରଥମେ ପ୍ରଭାବ ପକାଇପାରି ନାହିଁ। କିନ୍ତୁ ସ୍ପିନର ଟପ୍‌ ଅର୍ଡରକୁ ଆଉଟ କରିଦେଲେ ଭାରତୀୟ ପେସ୍‌ର ପ୍ରଭାବୀ ହୋଇପଡ଼ୁଛନ୍ତି। କିନ୍ତୁ ଦଳର ନଂ-୧ ବୋଲର ମହମ୍ମଦ୍‌ ସିରାଜ ୱିକେଟ ନ ପାଇବା ଚିନ୍ତାର କାରଣ ହୋଇଛି। ଅନ୍ୟ ସବୁ ବୋଲର ଭଲ ଫର୍ମରେ ଅଛନ୍ତି ଓ ଶ୍ରୀଲଙ୍କାର ମୁଣ୍ଡବିନ୍ଧାର କାରଣ ପାଲଟିଛନ୍ତି। ଶ୍ରୀଲଙ୍କାର ପେସ୍‌ ବୋଲରଙ୍କ ମଧ୍ୟରେ ମାଥୀଶା ପତିରାଣା ବେଶ ପ୍ରଭାବଶାଳୀ ସାବ୍ୟସ୍ତ ହୋଇଛନ୍ତି। ତାଙ୍କୁ ବାଦ୍‌ ଦେଲେ ଅନ୍ୟ କୌଣସି ପେସ୍‌ କିମ୍ବା ସ୍ପିନର ବୋଲର ଭାରତୀୟ ବ୍ୟାଟରଙ୍କ ପ୍ରତି ବିପଦ ସୃଷ୍ଟି କରିନାହାନ୍ତି। ଭାରତକୁ ଅଡ଼ୁଆରେ ପକାଇବାକୁ ହେଲେ ବୋଲିଂରେ ଉନ୍ନତି ଆଣିବା ନିହାତି ଆବଶ୍ୟକ। ନଚେତ ଭାରତର ପ୍ରଭାବକୁ ପ୍ରତିହତ କରିବା ଏତେଟା ସହଜ ହେବ ନାହିଁ।

୨ରୁ ଦିନିକିଆ ସିରିଜ; ରୋହିତ, କୋହଲି ପହଞ୍ଚିଲେ

ଶ୍ରୀଲଙ୍କା ବିପକ୍ଷ ଦିନିକିଆ ସିରିଜ୍‌ ଅଗଷ୍ଟ ୨ରୁ ଆରମ୍ଭ ହେବ। ଏହି ସିରିଜ୍‌ରେ ଖେଳିବା ଲାଗି ଅଧିନାୟକ ରୋହିତ ଶର୍ମା ଆମେରିକାରୁ ଓ ବରିଷ୍ଠ ଖେଳାଳି ବିରାଟ କୋହଲି ଲଣ୍ଡନରୁ ଆସି ଗତକାଲି ଏଠାରେ ପହଞ୍ଚିଛନ୍ତି। ଏମାନଙ୍କ ବ୍ୟତୀତ କେବଳ ଦିନିକିଆ ସିରିଜ୍‌ ଲାଗି ମନୋନୀତ ହୋଇଥିବା ଖେଳାଳିମାନେ ଯଥା ଲୋକେଶ ରାହୁଲ, ଶ୍ରେୟାସ ଆୟର, କୁଲଦୀପ ଯାଦବ ଓ ହର୍ଷିତ ରାଣା ମଧ୍ୟ ଏଠାରେ ଆସି ପହଞ୍ଚିଛନ୍ତି। ଏମାନେ ସୋମବାର କଲମ୍ବୋରେ ରଣସିଂହେ ପ୍ରେମଦାସା ଷ୍ଟାଡିୟମ୍‌ରେ ଅଭ୍ୟାସ କରିଛନ୍ତି। ଭାରତୀୟ ଦଳ ଶ୍ରୀଲଙ୍କା ସହ ଟି-୨୦ ସିରିଜ୍‌ର ଶେଷ ମ୍ୟାଚ୍‌ ଆସନ୍ତାକାଲି ଖେଳିବା ପରେ ଏଠାରେ ଆସି ଅଭ୍ୟାସ କରିବେ। କଲମ୍ବୋରେ ଖେଳାଳିଙ୍କ ସହ ଅଭ୍ୟାସ କରିବା ଲାଗି ସହକାରୀ ପ୍ରଶିକ୍ଷକ ଅଭିଷେକ ନାୟାରଙ୍କୁ ପଠାଯାଇଛି। ବୋଲିଂ ପ୍ରଶିକ୍ଷକ ମୋର୍ଣ୍ଣି ମୋର୍କେଲ ମଧ୍ୟ ଦଳ ସହ ଯୋଗଦେବେ ବୋଲି ଆଶା କରାଯାଉଛି। ଦିନିକିଆ ସିରିଜ୍‌ର ସମସ୍ତ ମ୍ୟାଚ୍‌ କଲମ୍ବୋରେ ଖେଳାଯିବ। ଦିନିକିଆ ମ୍ୟାଚ୍‌ ଗୁଡିକ ଅଗଷ୍ଟ ୨, ୪ ଓ ୭ରେ ଖେଳାଯିବ। ଏହା ପରେ ଘରୋଇ ମାଟିରେ ବାଂଲାଦେଶ ସହ ଭାରତ ଟେଷ୍ଟ ଓ ଟି-୨୦ ସିରିଜ୍‌ ଖେଳିବ। ଏହା ମଧ୍ୟରେ ଚେନ୍ନଇରେ ସେପ୍ଟେମ୍ବର ୬ରୁ ୨ଟିକିଆ ଟେଷ୍ଟ ସିରିଜ୍‌ ସେପ୍ଟେମ୍ବର ୧୯ରୁ ଓ ୩ ମ୍ୟାଚ୍‌ ବିଶିଷ୍ଟ ଟି-୨୦ ସିରିଜ୍‌ ଧର୍ମଶାଳରେ ଅକ୍ଟୋବର ୬ରୁ ଆରମ୍ଭ ହେବ।

ଦିନିକିଆ ଦଳ: ରୋହିତ ଶର୍ମା (ଅଧିନାୟକ), ଶୁବମାନ ଗିଲ (ଉପଅଧିନାୟକ), ବିରାଟ କୋହଲି, ଲୋକେଶ ରାହୁଲ (ୱିକେଟରକ୍ଷକ), ଋଷଭ ପନ୍ତ୍‌ (ୱିକେଟ ରକ୍ଷକ), ଶ୍ରେୟାସ ଆୟର, ଶିବମ ଦୁବେ, ରିୟାନ ପରାଗ, ଅକ୍ଷର ପଟେଲ, କୁଲଦୀପ ଯାଦବ, ୱାଶିଂଟନ ସୁନ୍ଦର, ମହମ୍ମଦ୍‌ ସିରାଜ, ଅର୍ଶଦୀପ ସିଂ, ଖଲୀଲ ଅହମ୍ମଦ୍‌ ଓ ହର୍ଷିତ ରାଣା।

କଲମ୍ବୋ: ଆଜି ଶ୍ରୀଲଙ୍କା ଓ ଟିମଇଣ୍ଡିଆ ପ୍ରଥମ ଟି-୨୦ରେ ମୁହାଁମୁହିଁ ହୋଇଛନ୍ତି। ପାଲ୍ଲେକେଲେ ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଖେଳାଯାଉଥିବା ଏହି ମ୍ୟାଚ୍‌ରେ ଘରୋଇ ଶ୍ରୀଲଙ୍କା ଦଳର ଅଧିନାୟକ ଚାରିଥ୍ ଆଶାଲଙ୍କା ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ଟିମ୍ ଇଣ୍ଡିଆ ଅଧିନାୟକ ସୂର୍ଯ୍ୟକୁମାର ଯାଦବଙ୍କ ନେତୃତ୍ବରେ ବ୍ୟାଟିଂ ଆରମ୍ଭ କରିଥିଲା। ଭାରତ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ଓଭରରେ ୭ ୱିକେଟ ହରାଇ ୨୧୩ ରନ କରିଥିଲା। ଏହି ମ୍ୟାଚ ଜିତିବାକୁ ହେଲେ ଶ୍ରୀଲଙ୍କାକୁ ୨୧୪ ରନର ଆବଶ୍ୟକତା ରହିଛି।

ଭାରତୀୟ ଦଳ ପକ୍ଷରୁ ୟଶସ୍ୱୀ ଜୟସ୍ୱାଲ ୨୧ ବଲରେ ୪୦ ରନ କରି ଆଉଟ ହୋଇଥିଲେ। ଶୁବମାନ ଗିଲ୍‌ ୧୬ ବଲରେ ୩୪ ରନ କରି ଆଉଟ ହୋଇଥିଲେ। ଋଷଭ ପନ୍ତ ୨୭ ବଲରେ ୩୬ ରନ କରି ଆଉଟ ହୋଇଥିଲେ। ହାର୍ଦ୍ଦିକ ପାଣ୍ଡ୍ୟା ୧୦ ବଲରେ ୯ ରନ କରି ଆଉଟ ହୋଇଥିଲେ। ପାରିକୁ ସମ୍ଭାଳିଥିବା ସୂର୍ଯ୍ୟକୁମାର ଯାଦବ  ୨୬ ବଲରେ ୫୮ ରନ କରି ଆଉଟ ହୋଇଥିଲେ। ରିୟାନ ପରାଗ ୬ ବଲରେ ୭ରନ କରି ଆଉଟ ହୋଇଥିବା ବେଳେ ଋଷଭ ପନ୍ତ ୩୩ ବଲରେ ୪୯ ରନ କରି ଆଉଟ ହୋଇଥିଲେ। ପରେ ପାରିକୁ ରିଙ୍କୁ ସିଂ ଓ ଅକ୍ଷର ପଟେଲ ସମ୍ଭାଳିଥିଲେ। ଅକ୍ଷର ପଟେଲ ୫ ବଲରେ ୧୦ ରନ କରି ଅପରାଜିତ ରହିଥିବା ବେଳ ରିଙ୍କୁ ସିଂ ୨ ବଲରେ ୧ ରନ କରି ଆଉଟ ହୋଇଥିଲେ।

ଶ୍ରୀଲଙ୍କା ପକ୍ଷରୁ ମାଥିସା ପଥିରାନା ୪ ଟି ୱିକେଟ ନେଇଥିବାବେଳେ ଦିଲସାନ ମଦୁଶଙ୍କା, ଅସିଥ ଫର୍ଣ୍ଣାଣ୍ଡୋ ଓ ୱାନିନ୍ଦୁ ହସରଙ୍ଗା ଗୋଟିଏ ଲେଖାଏ ୱିକେଟ ନେଇଥିଲେ।