ବସ୍ତା/ରୂପସା- ଭତ୍ତାଟଙ୍କା ନେଇ ମାଆ-ପୁଅ ଖୁସିରେ ଘରକୁ ଫେରୁଥିବା ବେଳେ ଏକଟ୍ରକ ଧକ୍ମାରେ ମାଆର ମୃତ୍ୟୁ ହୋଇଥିବା ବେଳେ ପୁଅ ଗୁରୁତର ଭାବେ ଆହତ ହୋଇଛି। ସୁଚନା ଅନୁଯାୟୀ ବସ୍ତା ବ୍ଲକ ଗଡପଦା ପଞ୍ଚୟତ ପଶ୍ଚିମ ସିମୁଳିଆ ଗ୍ରାମର ଝାମ୍ପୁଡି ସିଂ ତାଙ୍କ ପୁଅ ସହିତ ସାଇକେଲ ଯୋଗେ ବ୍ୟାଙ୍କକୁ ଭତ୍ତା ଟଙ୍କା ନେବା ପାଇଁ ଆସିଥିଲେ। ଟଙ୍କା ନେଇ ଫେରୁଥିବା ବେଳେ ରୁପସା ଗେଟ ବଜାର ନିକଟରେ ଏକଟ୍ରକ ତାଙ୍କୁ ଧକ୍କା ଦେଇଥିଲା। ଫଳରେ ସାଇକେଲରେ ବସିଥିବା ଝାମ୍ପୁଡି ସିଂ ତଳେ ପଡ଼ିଯାଇଥିବା ବେଳେ ତାଙ୍କ ଉପରେ ଟ୍ରକ ମାଡ଼ି ଯାଇଥିଲା। ଘଟଣା ସ୍ଥଳରେ ଝାମ୍ପୁଡିର ମୃତ୍ୟୁ ହୋଇଥିବା ବେଳେ ପୁଅ କାଳିଚରଣ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଇଛନ୍ତି, ସ୍ଥାନୀୟ ଲୋକେ ଟ୍ରକ ଡ୍ରାଇଭରକୁ ଅଟକ ରଖିବା ସହିତ ଟ୍ରକ ଆଗରେ ଶବ ରଖି କ୍ଷତିପୂରଣ ଦାବିରେ ଧାରଣାରେ ବସିଛନ୍ତି, ଘଟଣାସ୍ଥଳରେ ରୁପସା ପୋଲିସ ପହଞ୍ଚି ବୁଝାସୁଝା କରୁଛି।

ଭୋଗରାଇ: ବ୍ୟାଙ୍କ କାରବାର ଚାଲିଥିବା ସମୟରେ ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ତାଳସାରି ମେରାଇନ ଥାନା ଅନ୍ତର୍ଗତ ୫୭ନଂ ରାଜ୍ୟ ରାଜପଥ ସଂଲଗ୍ନ ଚନ୍ଦନେଶ୍ୱର-ଦୀଘା ସୀମାନ୍ତ ରାସ୍ତାର ବାଡସରିଷାଠାରେ ଥିବା ୟୁନିୟନ ବ୍ୟାଙ୍କ ଅଫ ଇଣ୍ଡିଆ ଚନ୍ଦନେଶ୍ୱର ଶାଖାରେ ସଶସ୍ତ୍ର ଡକାୟତି ହୋଇଛି। ବୁଧବାର ମଧ୍ୟାହ୍ନ ୧ଟା ୫ ମିନିଟ ସମୟରେ ଏହି ଡକାୟତି ହୋଇଥିଲା ବେଳେ ଏଥିରେ ୪୯ ଲକ୍ଷ ଟଙ୍କାରୁ ଊର୍ଦ୍ଧ୍ବ ନଗଦ ଅର୍ଥ ଏବଂ ୨ କିଲୋଗ୍ରାମରୁ ଅଧିକ ଓଜନର ବନ୍ଧକ ସୁନା ଲୁଟ ହୋଇଥିବା ସୂଚନା ମିଳିଛି। ଅନ୍ୟପକ୍ଷରେ ବ୍ୟକ୍ତିଗତ ଭାବେ ଲକର ଭଡ଼ା ନେଇ ସୁନା ଅଳଙ୍କାର ରଖିଥିବା ୯୦ଟି ଲକର ସମ୍ପୂର୍ଣ୍ଣ ଅକ୍ଷତ ରହିଥିବା ଜଣାପଡ଼ିଛି। ତେବେ ଏହି ବ୍ୟାଙ୍କ ଶାଖାରେ ବିପୁଳ ପରିମାଣର ଆର୍ଥିକ କାରବାର ହେବା ସହ ବିପୁଳ ପରିମାଣର ସୁନା ବନ୍ଧକ ରହୁଥିଲା।

ହେଲେ ବ୍ୟାଙ୍କ ପକ୍ଷରୁ ଏଠାରେ କୌଣସି ସଶସ୍ତ୍ର ସୁରକ୍ଷା ବ୍ୟବସ୍ଥା ରଖାଯାଇ ନ ଥିଲା। ଏପରିକି ବ୍ୟାଙ୍କର ସୁରକ୍ଷା ଆଲାର୍ମ ଘଣ୍ଟା ମଧ୍ୟ କିଛି ଦିନ ହେଲା ଅଚଳ ହୋଇପଡ଼ିଥିଲା। ଏଭଳି ଏକ ଅସୁରକ୍ଷିତ ବ୍ୟବସ୍ଥା ମଧ୍ୟରେ ବ୍ୟାଙ୍କ ଶାଖା ଦୀର୍ଘ ଦିନ ହେଲା ଚାଲିଆସୁଥିଲା ବେଳେ ଏହା ଏକ ସୁପରିକଳ୍ପିତ ଏବଂ ଯୋଜନାବଦ୍ଧ ଡକାୟତି ବୋଲି ସାଧାରଣରେ ସନ୍ଦେହ ସୃଷ୍ଟି ହୋଇଛି। ସୂଚନା ମୁତାବକ ବୁଧବାର ମଧ୍ୟାହ୍ନ ୧ଟା ୫ ମିନିଟ ସମୟରେ ୬ ଜଣ ଡକାୟତ ସାଧାରଣ ପୋଷାକରେ ଗ୍ରାହକ ସାଜି ବ୍ୟାଙ୍କ ଶାଖାରେ ପ୍ରବେଶ କରିଥିଲେ। ସେମାନଙ୍କ ମଧ୍ୟରୁ ଜଣେ ମୁହଁରେ ରୁମାଲ ବାନ୍ଧି ଥିଲା ବେଳେ ଅନ୍ୟ ଦୁଇଜଣ ମୁହଁରେ ମାସ୍କ ଲଗାଇଥିଲେ। ଜଣେ ମୁଖ୍ୟଫାଟକ ଭିତର ପଟେ ଜଗି ରହିଥିଲା ବେଳେ ଅନ୍ୟ ୫ଜଣ ଭିତରକୁ ପଶିଥିଲେ।

କେହି କିଛି ବୁଝିବା ପୂର୍ବରୁ ସେହି ସମୟରେ ବ୍ୟାଙ୍କରେ ଉପସ୍ଥିତ ଥିବା ୧୧ ଜଣ ମହିଳା ଓ ପୁରୁଷ ଖାତାଧାରୀ ଏବଂ ୭ ଜଣ ବ୍ୟାଙ୍କ କର୍ମଚାରୀଙ୍କୁ ବନ୍ଧୁକ ଓ ଭୁଜାଲି ମୁନରେ ଭୟଭୀତ କରାଇବା ସହ ସେମାନଙ୍କ ମୋବାଇଲ ଛଡ଼ାଇ ନେଇ ଗୋଟିଏ ଧଳା କନା ବ୍ୟାଗରେ ଭର୍ତ୍ତି କରିଥିଲେ। ଏହାସହିତ ଖାତାଧାରୀ ଓ କର୍ମଚାରୀମାନଙ୍କୁ ପୃଥକ ଭାବେ ଜଣେ ଜଣେ ବନ୍ଧୁକଧାରୀ ଡକାୟତ ସେହି କାର୍ଯ୍ୟାଳୟ ମଧ୍ୟରେ ଅଟକ ରଖିଥିଲେ। ବ୍ରାଞ୍ଚ ମ୍ୟାନେଜର ନୈନିତ ଖାଲକୋ ଓ କ୍ୟାସିୟର ବିକ୍ରମ ପ୍ରଧାନଙ୍କୁ ଚାପୁଡ଼ା ମାରି ଏବଂ ମୁଣ୍ଡରେ ବନ୍ଧୁକ ଲଗାଇ ଭୟଭୀତ କରାଇବା ସହ କ୍ୟାସଡ୍ରୟର, ଷ୍ଟ୍ରଙ୍ଗ ରୁମ ଓ ଲକର ଚାବି ଛଡାଇ ନେଇଥିଲେ। ଜଣେ ଡକାୟତ ଷ୍ଟ୍ରଙ୍ଗ ରୁମ ଚାବି ଖୋଲି ଭିତରେ ପ୍ରବେଶ କରିବା ସହିତ ସେଥିରେ ଥିବା ୨ କିଗ୍ରାରୁ ଅଧିକ ଓଜନର ବନ୍ଧକ ସୁନାକୁ ଦୁଇଟି ବଡ ଧଳା ଜରି ବ୍ୟାଗରେ ପୁରାଇ ବାହାରକୁ ବାହାରିଥିଲେ।

ସେହି ସମୟରେ ଜଣେ ଡକାୟତ କ୍ୟାସ ଲକର ଖୋଲି ସେଥିରୁ ୪୧ ଲକ୍ଷ ଟଙ୍କା ଓ ଅନ୍ୟ ଜଣେ କ୍ୟାସ ଡ୍ରୟର ଖୋଲି ସେଥିରୁ ୮ ଲକ୍ଷରୁ ଅଧିକ ନଗଦ ଟଙ୍କା ପୃଥକ ଦୁଇଟି ବଡ ନାଇଲନ ବ୍ୟାଗରେ ପୁରାଇଥିଲେ। ପରେ ସମସ୍ତ ଖାତାଧାରୀ ଏବଂ କର୍ମଚାରୀଙ୍କୁ ଷ୍ଟ୍ରଙ୍ଗ ରୁମ ଭିତରେ ପୁରାଇ ବାହାରୁ ବନ୍ଦ କରିଦେଇଥିଲେ ବୋଲି ଖାତାଧାରୀ ଉଦୟପୁର ଗ୍ରାମର ଜୟନ୍ତ ପଟ୍ଟାୟତ, କୃଷ୍ଣନଗର ଗ୍ରାମର ମୌସୁମୀ ଜେନା, ଚକପଦ୍ମପୁର ଗ୍ରାମର ଗୋଲକ ପ୍ରଧାନ, ନାଫରାଇ ଗ୍ରାମର ପ୍ରିୟଗୋପାଳ ସାମଲ, ଫୁଲବଣୀ ଗ୍ରାମର ପ୍ରକାଶ ଚାନ୍ଦ, ବିଚିତ୍ରପୁର ଗ୍ରାମର ଅଜୟ ପ୍ରଧାନ, ବ୍ୟାଙ୍କର ସୁନାରୀ ବାଡସରିଷା ଗ୍ରାମର ଅସିତ ରଣା ଓ ଜଳେଶ୍ୱରରୁ କୋରିଅର ନେଇ ଆସିଥିବା ସପନ ଦାସ ପ୍ରକାଶ କରିଛନ୍ତି। ଡକାୟତମାନଙ୍କୁ ଏହି ସମସ୍ତ କାର୍ଯ୍ୟ କରିବା ପାଇଁ ମାତ୍ର ୧୫ ମିନିଟ ସମୟ ଲାଗିଥିବା ସେମାନେ କହିଛନ୍ତି।

ତେବେ ଡକାୟତମାନେ ଯିବା ସମୟରେ ବ୍ୟାଙ୍କରେ ଲାଗିଥିବା ସିସିଟିଭି ହାର୍ଡଡିସ୍କ ଖୋଲି ନେଇଯାଇଥିବା ଏବଂ ଗୋଟିଏ କୋଣରେ ମୋବାଇଲ ଭର୍ତ୍ତି ବ୍ୟାଗ ରଖିଯାଇଥିବା ଦେଖିବାକୁ ମିଳିଛି। ଏହାସହିତ ମୁଖ୍ୟଫାଟକରେ ତାଲା ବନ୍ଦ କରି ଦୁଇଟି ନମ୍ୱର ବିହୀନ କଳା ରଙ୍ଗର ଆପାଚି ବାଇକରେ ସମସ୍ତ ୬ ଜଣ ଡକାୟତ ପଶ୍ଚିମବଙ୍ଗ ରାସ୍ତାରେ ଚାଲି ଯାଇଥିବା ସ୍ଥାନୀୟ ଏକ ଦୋକାନରେ ଲାଗିଥିବା ସିସିଟିଭି ଫୁଟେଜରୁ ଦେଖିବାକୁ ମିଳିଛି। ତେବେ ଷ୍ଟ୍ରଙ୍ଗ ରୁମ ମଧ୍ୟରେ ବନ୍ଦ ହୋଇ ରହିଥିବା ଖାତାଧାରୀ ସ୍ଥାନୀୟ ଚକପଦ୍ମପୁର ଗ୍ରାମର ଗୋଲକ ପ୍ରଧାନ କୌଶଳ କରି ନିଜର ଗୋଟିଏ ମୋବାଇଲକୁ ପିନ୍ଧିଥିବା ପ୍ୟାଣ୍ଟ ଭିତରେ ଲୁଚାଇ ଦେଇଥିଲେ। ସେ ସେହି ଫୋନ ଯୋଗେ ସ୍ଥାନୀୟ କିଛି ଦୋକାନୀ ସମେତ ତାଳସାରି ମେରାଇନ ଥାନା ପୁଲିସକୁ ଖବର ଦେଇଥିଲେ।

ସୂଚନା ପାଇ ତାଳସାରି ମେରାଇନ ଥାନା ଆଇଆଇସି ଚମ୍ପାବତି ସୋରେନ ଏବଂ ଚନ୍ଦନେଶ୍ୱର ପୁଲିସ ଫାଣ୍ଡି ଅଧିକାରୀ ବିଶ୍ୱନାଥ କର ସଦଳବଳେ ଘଟଣାସ୍ଥଳରେ ପହଞ୍ଚି ବ୍ୟାଙ୍କ ମୁଖ୍ୟ ଫାଟକର ତାଲା ଭାଙ୍ଗି ଭିତରେ ପ୍ରବେଶ କରିବା ସହିତ ଷ୍ଟ୍ରଙ୍ଗ ରୁମ ଖୋଲି ଅଟକ ଥିବା ବ୍ୟାଙ୍କ କର୍ମଚାରୀ ଓ ଖାତାଧାରୀମାନଙ୍କୁ ଉଦ୍ଧାର କରିଥିଲେ। ଖବର ପାଇ ଜଳେଶ୍ୱର ଏସଡିପିଓ ଦିଲ୍ଲୀପ କୁମାର ସାହୁ, ଭୋଗରାଇ ଥାନା ଆଇଆଇସି ପ୍ରଭଞ୍ଜନ ବେହେରା ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା ବେଳେ ପୂର୍ବାଞ୍ଚଳ ଆଇଜି ହିମାଂଶୁ ଲାଲ ଓ ବାଲେଶ୍ୱର ଏସପି ସାଗରିକା ନାଥ ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିଛନ୍ତି। ପରେ ଏସପି ସାଗରିକା ନାଥଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ ଗଠନ କରାଯାଇ ତଦନ୍ତ ଆରମ୍ଭ ହୋଇଛି ଏବଂ ଅତିଶୀଘ୍ର ସମ୍ପୃକ୍ତ ଡକାୟତମାନଙ୍କୁ ଖୋଜି ବାହାର କରି ଗିରଫ କରାଯିବ ବୋଲି ଆଇଜି ହିମାଂଶୁ ଲାଲ ସୂଚନା ଦେଇଛନ୍ତି।

ଏହାସହିତ ବାଲେଶ୍ୱରରୁ ସାଇଣ୍ଟିଫିକ ଟିମ ଓ ପୁଲିସ ସନ୍ଧାନୀ କୁକୁର ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଅନ୍ୟପକ୍ଷରେ ୟୁନିୟନ ବ୍ୟାଙ୍କ ଅଫ ଇଣ୍ଡିଆ ବାଲେଶ୍ୱର ଜୋନାଲ ଅଫିସରୁ ଏକ ୩ ଜଣିଆ ଅଧିକାରୀ ଦଳ ଘଟଣାସ୍ଥଳରେ ପହଞ୍ଚି ଲୁଟ ଟଙ୍କା ଓ ସୁନାର ପ୍ରକୃତ ପରିମାଣ ଆକଳନ ଆରମ୍ଭ କରିଛନ୍ତି। ଏହି ଡକାୟତି ଘଟଣା ପ୍ରଚାରିତ ହେବା ମାତ୍ରେ ଏହି ବ୍ୟାଙ୍କରେ ସୁନା ବନ୍ଧକ ରଖି ଋଣ ନେଇଥିବା ଶତାଧିକ ଗ୍ରାହକ ବ୍ୟାଙ୍କ ଶାଖାରେ ପହଞ୍ଚି କିପରି ସେମାନଙ୍କ ସୁନା ଫେରି ପାଇବେ ସେ ନେଇ ଭିଡ଼ ଜମାଇଥିବା ଦେଖିବାକୁ ମିଳିଛି।

ଅନ୍ୟପକ୍ଷରେ ଗତ ୨୦୨୦ ସେପ୍ଟେମ୍ୱର ୧୩ ତାରିଖରେ ଜଳେଶ୍ୱର-ଚନ୍ଦନେଶ୍ୱର ୫୭ନଂ ରାଜ୍ୟ ରାଜପଥର ଭୋଗରାଇ ଥାନା ଅନ୍ତର୍ଗତ ଚୌକି ୟୁକୋ ବ୍ୟାଙ୍କ ଶାଖାରୁ ଠିକ ଏହି ଭଳି ସମାନ ଧରଣର ସଶସ୍ତ୍ର ଡକାୟତି ହୋଇଥିଲା ବେଳେ ଆଜି ପର୍ଯ୍ୟନ୍ତ ପୁଲିସ ଡକାୟତମାନଙ୍କୁ ଧରିବାରେ ବିଫଳ ହୋଇଛି। ତେବେ ଆଜିର ଏହି ୟୁନିୟନ ବ୍ୟାଙ୍କ ଅଫ ଇଣ୍ଡିଆ ଚନ୍ଦନେଶ୍ୱର ଶାଖା ଡକାୟତିରେ ଚୌକି ୟୁକୋ ବ୍ୟାଙ୍କ ଡକାୟତି ଗ୍ୟାଙ୍ଗ ସମ୍ପୃକ୍ତି ଥିବା ସାଧାରଣରେ ଆଲୋଚନା ହେଉଛି।

ବାଲେଶ୍ୱର: ବିବାହ କରିବାର ପ୍ରତିଶୃତି ଦେଇ ଆଦିବାସୀ ଯୁବତୀଙ୍କ ସହିତ ଦୁଷ୍କର୍ମ କଲାପରେ ଫାଙ୍କିଦେଇ ଖସିଗଲା ଯୁବକ।  ଉପାୟ ନ ପାଇଁ  ଯୁବକଙ୍କ ବିରୁଦ୍ଧରେ ସହଦେବଖୁଣ୍ଟା ଥାନାରେ ଦୁଷ୍କର୍ମ ଅଭିଯୋଗ କଲେ ପୀଡିତା ଯୁବତୀ। ଅଭିଯୁକ୍ତ ଯୁବକଙ୍କୁ ଗିରଫ କରି ଡାକ୍ତର ମାଇନା କଲାପରେ ପୀଡିତା ଯୁବତୀଙ୍କ କୋର୍ଟରେ ୧୬୪ ଜମାନବନ୍ଦୀ ନେଇ କୋର୍ଟ ଚାଲାଣ କଲେ ବାଲେଶ୍ୱର ସହଦେବଖୁଣ୍ଟା ଥାନା ପୋଲିସ।

ବାଲେଶ୍ୱର ସହଦେବଖୁଣ୍ଟା ଥାନା ଅନ୍ତର୍ଗତ ଭୀମପୁରା ଅଞ୍ଚଳର ଜଣେ ୨୦ ବର୍ଷୀୟା ଯୁବତୀଙ୍କ ସହିତ ସମ୍ପୃକ୍ତ ଅଞ୍ଚଳର ମାୟାଧର ମୁଦୁଲିଙ୍କ ପୁଅ ଖଗେନ୍ଦ୍ର ମୁଦୁଲି ଙ୍କ ସହିତ ପରିଚୟ ହେଇ ଥିଲା। ପରେ ଯୁବତୀଙ୍କୁ ବିବାହ କରିବାର ପ୍ରତିଶୃତି ଦେଇ ତା’ ସହିତ ବଳ ପୂର୍ବକ ଦୁଷ୍କର୍ମ କରିଥିଲା।ଏହାବାଦ ଯୁବତୀଙ୍କ ଅନିଚ୍ଛା ସତ୍ତ୍ୱେ ଖଗେନ୍ଦ୍ର ଯୁବତୀଙ୍କ ସହିତ ଶାରୀରିକ ସମ୍ପର୍କ ରଖୁଥିଲା। ତେବେ ଗତ୧୪/୦୩/୨୩ ତାରିଖ ରାତିରେ ଖଗେନ୍ଦ୍ର ତା ନିଜ ଘରକୁ ଡାକି ଯୁବତୀ ସହିତ ଶାରୀରିକ ସମ୍ପର୍କ ରଖିବା ପରେ ବିବାହ କରିବା ଲାଗି ଯୁବତୀ ଜିଦ ଧରିଥିଲେ। ସେଥିରେ ଉତକ୍ଷିପ୍ତ ହେଇ ଖଗେନ୍ଦ୍ର ଯୁବତୀଙ୍କୁ ନିସ୍ତୁକ ମାଡ ମାରିବା ସହିତ ଅଶ୍ଳୀଳ ଭାଷାରେ ଗାଳି ଗୁଳଜ କରିଥିଲା। ଯୁବକଙ୍କ ପରିବାର ଲୋକ ମଧ୍ୟ ପିଡିତା ଯୁବତୀଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରି ଘରୁ ବାହାର କରିଦେଇ ଥିଲେ। ପରେ ଏହି ଘଟଣାର ସମାଧାନ କରିବା ପାଇଁ ଗ୍ରାମରେ ବୈଠକ ହେଇଥିଲା।ବୈଠକରେ ଉପସ୍ଥିତ ଭଦ୍ରବ୍ୟକ୍ତି ମାନଙ୍କ ଆଗରେ ଖଗେନ୍ଦ୍ର ଯୁବତୀଙ୍କୁ ବିବାହ କରିବ ନାହିଁ ବୋଲି ମନାକରି ଦେଇଥିଲେ।ଶେଷରେ ଅନ୍ୟନୋପାୟ ହେଇ ପିଡିତା ଯୁବତୀଙ୍କ ତରଫରୁ ଖଗେନ୍ଦ୍ର ବିରୁଦ୍ଧରେ ସହଦେବଖୁଣ୍ଟା ଥାନାରେ ଏତାଲା ଦିଆଯାଇଥିଲା।ସମ୍ପୃକ୍ତ ଥାନା କେଶନଂ-୧୦୩,ଧାରା ୪୧୭,୩୭୬(୨)(ଏନ),୩୨୩,୨୯୪,୫୦୬,୩(୧)(ଆର)(ଏସ) ୩୪ ଆଇପିସି ମୂଳେ ତଦନ୍ତ ପୂର୍ବକ ମାମଲା ରୁଜୁକରି ଅଭିଯୁକ୍ତଙ୍କୁ ଗିରଫ କରି ପୁଲିସ ପକ୍ଷରୁ ଡାକ୍ତରମାଇନା କରିବା ସହିତ ପିଡିତା ଯୁବତୀଙ୍କ କୋର୍ଟରେ ୧୬୪ ଜମାନବନ୍ଦୀ ନିଆଯାଇ ଅଭିଯୁକ୍ତ ଖଗେନ୍ଦ୍ର  କୋର୍ଟ ଚାଲାଣ କରାଯାଇଛି। ହେଲେ ଅଭିଯୁକ୍ତଙ୍କ ତରଫରୁ ଜାମିନ ଆବେଦନ କରାଯାଇ ଥିଲା। ମାତ୍ର ଜାମିନ ଆବେଦନର ଶୁଣାଣି ପରବର୍ତ୍ତୀ ତାରିଖକୁ ମାନ୍ୟବର କୋର୍ଟ ଘୁଞ୍ଚାଇ ଦେଇଥିବା ଜଣାଯାଇଛି।

ଭୋଗରାଇ: ନିଶା କାରବାରର ହବ ପାଲଟିଛି ଭୋଗରାଇ। ଚୋରା ଓ ନକଲି ମଦ ସହିତ ଗଞ୍ଜେଇ ଓ ବ୍ରାଉନ‌ ସୁଗାର ବେପାର ଖୁଲମଖୁଲା ଚାଲିଛି। ଛକ ବଜାର ଓ ଗାଁ ଗହଳିରେ ଥିବା ଛୋଟ ଛୋଟ ପାନ ଓ ତେଜରାତି ଦୋକାନରେ ଏସବୁ ନିଶା ଦ୍ରବ୍ୟ ସହଜରେ ଏବଂ ୨୪ ଘଣ୍ଟିଆ ଉପଲବ୍ଧ ହେଉଛି। ସବୁ ଜାଣିଶୁଣି ପୁଲିସ ଓ ଅବକାରୀ ବିଭାଗ ଚୁପ୍ ବସିଛି। ଏଭଳି ସ୍ଥିତିରେ ନିଶା ସେବନ କରି ଘରର ପୁରୁଷ ମାନେ ମହିଳାଙ୍କ ଉପରେ ଅକଥନୀୟ ଅତ୍ୟାଚାର କରୁଛନ୍ତି। ସାମାଜିକ ବ୍ୟବସ୍ଥା ଓ ଚଳଣି ସମ୍ପୂର୍ଣ୍ଣ ବିଗିଡି ଯାଇଛି। ବିଭିନ୍ନ ସ୍ଥାନରେ ମଦ ବେପାରକୁ ବିରୋଧ କରିବା ଆରମ୍ଭ ହୋଇଥିଲା ବେଳେ କମର୍ଦ୍ଦା ଥାନା ମହାଗବ ପଞ୍ଚାୟତ ଅନ୍ତର୍ଗତ ଚାନ୍ଦକୁସୁମୀ ଗାଁରେ ଦୀର୍ଘଦିନ ଧରି ବେଆଇନ ଭାବେ ମଦ ବିକ୍ରି କରୁଥିବା ଜନୈକ ବ୍ୟକ୍ତିଙ୍କ ତେଜରାତି ଦୋକାନ ଉପରେ ରବିବାର ସନ୍ଧ୍ୟାରେ ଶତାଧିକ ମହିଳା ସଂଘବଦ୍ଧ ଭାବେ ଚଢ଼ାଉ କରି ଭଙ୍ଗାରୁଜା କରିବା ସହିତ ଲକ୍ଷାଧିକ ଟଙ୍କାର ଦେଶୀ ଓ ବିଦେଶୀ ମଦ ରାସ୍ତାରେ ଢାଳି ନିଆଁ ଲଗାଇ ଦେଇଥିବା ଦେଖିବାକୁ ମିଳିଛି।

ସୂଚନା ମୁତାବକ, ମହାଗବ ଛକ- ପ୍ରିୟବାଗ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ପାର୍ଶ୍ବ ଚାନ୍ଦକୁସୁମୀ ଗାଁର ଗୈାତମ ଦାସ (ଜ୍ଞାନ) ଦୀର୍ଘ ବର୍ଷ ହେଲା ନିଜ ଜମି ଉପରେ ଏକ ଆଜବେଷ୍ଟସ ଛାଉଣୀ ଘର କରି ତେଜରାତି ଓ ପାନ ଦୋକାନ କରିଛନ୍ତି। ତେବେ ବିଗତ ଦୁଇ ବର୍ଷ ହେଲା ସେଠାରେ ବେଆଇନ ଭାବେ ଦେଶୀ ଓ ବିଦେଶୀ ମଦ ବିକ୍ରି କରୁଛନ୍ତି। ବାରମ୍ବାର ଅଭିଯୋଗ ପରେ ମଧ୍ୟ ଅବକାରୀ ବିଭାଗ କୌଣସି କାର୍ଯ୍ଯାନୁଷ୍ଠାନ ଗ୍ରହଣ ନ କରିବାରୁ ଗତ ବର୍ଷ ସ୍ଥାନୀୟ ଲୋକେ ବାଧ୍ୟ ହୋଇ ତାଙ୍କ ଦୋକାନ ଭଙ୍ଗାରୁଜା କରିଥିଲେ। ଖବର ପାଇ କମର୍ଦ୍ଦା ପୁଲିସ ଘଟଣାସ୍ଥଳରେ ପହଞ୍ଚି ସଂପୃକ୍ତ ଚୋରା ମଦ ବେପାରୀ ଗୌତମ ଦାସଙ୍କୁ ଗିରଫ କରିଥିଲା ବେଳେ ସେ କୋର୍ଟରୁ ଜାମିନରେ ଆସିଥିଲା।

ତେବେ ପରବର୍ତ୍ତୀ ସମୟରେ ସେ ଲକ୍ଷାଧିକ ଟଙ୍କାର ଦେଶୀ ଓ ବିଦେଶୀ ମଦ ବେପାର ଆରମ୍ଭ କରିଥିଲା। ସ୍ଥାନୀୟ ଅଞ୍ଚଳରେ ମଦର ବନ୍ୟା ସୃଷ୍ଟି କରିବା ସହ ଭୋଗରାଇ ବ୍ଲକର ବିଭିନ୍ନ ସ୍ଥାନକୁ ମଦ ସପ୍ଲାଏ କରିଆସୁଛି। ଏଥିରେ ଉତକ୍ଷିପ୍ତ ହୋଇ ସ୍ଥାନୀୟ ଅଞ୍ଚଳର ମହିଳା ମାନେ ଏକତ୍ରିତ ହୋଇ ରବିବାର ସନ୍ଧ୍ୟାରେ ସଂପୃକ୍ତ ଦୋକାନ ଉପରେ ଚଢ଼ାଉ କରିବା ସହିତ ଭଙ୍ଗାରୁଜା କରିଥିଲେ। ଦୋକାନ ସମ୍ମୁଖ ରାସ୍ତାରେ ଟାୟାର ଜାଳି ରାସ୍ତା ଅବରୋଧ କରିବା ସହିତ ଦୋକାନରେ ଥିବା ଲକ୍ଷାଧିକ ଟଙ୍କାର ଦେଶୀ ଓ ବିଦେଶୀ ମଦ ବୋତଲକୁ ରାସ୍ତାରେ ଭାଙ୍ଗି ସେଥିରେ ନିଆଁ ଲଗାଇ ଦେଇଥିଲେ। ଦୀର୍ଘ ଦୁଇ ଘଣ୍ଟା ଧରି ଶତାଧିକ ମହିଳା ସଂଘବଦ୍ଧ ଭାବେ ଏଭଳି ଚଢ଼ାଉ ଜାରି ରଖିଥିବା ବେଳେ ଖବର ଲେଖା ପର୍ଯ୍ଯନ୍ତ ପୁଲିସ ଘଟଣାସ୍ଥଳରେ ପହଞ୍ଚି ନ ଥିବା ଜଣାପଡ଼ିଛି। ଅନ୍ୟପକ୍ଷରେ ଏହି ଚଢାଉ ପୂର୍ବରୁ ସଂପୃକ୍ତ ଚୋରା ମଦ ବେପାରୀ ଗୌତମ ଦାସ ସେଠାରୁ ଖସିଯିବାରେ ସଫଳ ହୋଇଥିଲା ବେଳେ ଘଟଣାସ୍ଥଳରେ ପ୍ରବଳ ଉତ୍ତେଜନା ଲାଗି ରହିଛି।

ବାଲେଶ୍ୱର: ପର୍ଯ୍ୟଟକଙ୍କ ସୁରକ୍ଷାକୁ ଦୃଷ୍ଟିରେ ରଖି ଲଗାଣ ବର୍ଷା ଯୋଗୁଁ ଦୁଇଦିନ ପାଇଁ ବାଲେଶ୍ବରର ବିଭିନ୍ନ ପର୍ଯ୍ଯଟନ ସ୍ଥଳକୁ ନଯିବା ପାଇଁ କୁହାଯାଇଛି। ଲଘୁଚାପ ପ୍ରଭାବରେ ଆସନ୍ତାକାଲି ଅର୍ଥାତ ଶନିବାର ବାଲେଶ୍ୱର ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ସେଥିପାଇଁ ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ରେଡ୍‌ ୱାର୍ଣ୍ଣାଂ ଜାରି କରାଯାଇଛି। ବର୍ଷାକୁ ଦୃଷ୍ଟିରେ ରଖି ଆଜି ଓ ଆସନ୍ତାକାଲି ଅର୍ଥାତ ଶନିବାର ଜିଲ୍ଲାର ବିଭିନ୍ନ ପର୍ଯ୍ଯଟନ କ୍ଷେତ୍ର ନଯିବା ପାଇଁ ଜିଲ୍ଲାପାଳ ଦତ୍ତାତ୍ରେୟ ଭାଓସାହେବ ସିନ୍ଧେ ନିର୍ଦ୍ଦେଶ ଦେଇଛନ୍ତି। ଚାନ୍ଦିପୁର, ତାଳସାରୀ, କଷାଫଳ, ଡଗରା ଓ ପଞ୍ଚଲିଙ୍ଗେଶ୍ୱରକୁ ନଯିବା ଲାଗି ନିର୍ଦ୍ଦେଶ ଦେଇଛନ୍ତି ବାଲେଶ୍ୱର ଜିଲ୍ଲାପାଳ।

ଜଳେଶ୍ୱର: ଭିଜିଲାନ୍ସ ଜାଲରେ ବାଲେଶ୍ବର ଜିଲ୍ଲାର ଖାଦ୍ୟ ଯୋଗାଣ ବିଭାଗର ଆଣ୍ଟି ସ୍ମଗ୍‌ଲିଂ ଗାର୍ଡ । ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଜଳେଶ୍ୱର ନୂଆବଜାର ସ୍ଥିତ ଜନାର୍ଦ୍ଦନ ପଲେଇଙ୍କ ଘରେ ଭିଜିଲାନ୍ସ ଚଢ଼ାଉ କରିଛି। ଜନାର୍ଦ୍ଦନ ପଳେଇଙ୍କ ଜଳେଶ୍ୱରସ୍ଥିତ ବାସଭବନ, ନୂଆବଜାରସ୍ଥିତ କାର୍ଯ୍ଯାଳୟ, ନୂଆବଜାରସ୍ଥିତ ଚନ୍ଦନ ଢାବା, ଗଞ୍ଜାମ ଜିଲ୍ଲା ଛତ୍ରପୁରସ୍ଥିତ ପୈତୃକ ବାସଭବନ, ସମ୍ପର୍କୀୟଙ୍କ ଘର ସମେତ ରାଜ୍ୟର ୫ଟି ସ୍ଥାନରେ ଚଢ଼ାଉ ଜାରି ରହିଛି । ଏହି ଚଢାଉରେ ଜଣେ ଏଡିସିନାଲ ଏସ୍ପି, ୪ ଜଣ ଡ଼ିଏସପି ଓ ୫ ଜଣ ଇନ୍ସପେକ୍ଟର ସାମିଲଥିବା ଜଣାପଡ଼ିଛି।

ଲଙ୍ଗଳେଶ୍ବର: ବାଲେଶ୍ବର ଜିଲ୍ଲା ବାଲିଆପାଳ ଥାନା ଅନ୍ତର୍ଗତ ରେମୁଂ ଗ୍ରାମରେ ଗୋଧୋଇବା ବେଳେ ପୋଖରୀରେ ବୁଡି ଜଣେ ନାବାଳିକାର ମୃତ୍ଯୁ ଘଟିିଥିବା ବେଳେ  ଦୁଇ ଜଣ ଗୁରୁତର ହୋଇଛନ୍ତି।

ସୂଚନା ଅନୁଯାୟୀ, ରେମୁଂ ଗ୍ରାମର ବିଦ୍ୟାଧର ଜେନାଙ୍କ ପୂଅ ବାହାଘରରେ ଆଜି ରିସେପସନ ଥିବା ବେଳେ ତାଙ୍କ ଘରକୁ ବନ୍ଧୁ ବାନ୍ଧବ ଆସିଥିଲେ। ଘରେ ସମସ୍ତେ ଅନ୍ୟ କାର୍ଯ୍ଯରେ ବ୍ୟସ୍ତ ଥିଲାବେଳେ ୩ ଜଣ ନାବାଳିକା ଘର ନିକଟରେ ଥିବା ପୋଖରୀକୁ ଗୋଧୋଇବାକୁ ଚାଲି ଯାଇଥିଲେ। ଗୋଧୋଇବା ସମୟରେ ଅସାବଧାନତା ବଶତଃ ୩ଜଣ ଯାକ ପୋଖରୀରେ ବୁଡି ଯାଇଥିଲେ। ଘର ଲୋକେ ସେମାନଙ୍କୁ ଖୋଜାଖୋଜି କରି ନ ପାଇବାରୁ ନିକଟରେ ଥିବା ପୋଖରୀରେ ଭାସୁଥିବାର ଦେଖି ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ନିକଟସ୍ଥ ବାଲିଆପାଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ରେ ଭର୍ତ୍ତି କରିଥିଲେ। ସେଠାରେ ଡାକ୍ତର ଜଣକୁ ମୃତ ଘୋଷଣା କରିଥିଲେ। ଅନ୍ୟ ୨ ଜଣ ଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବାଲେଶ୍ବର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରା ଯାଇଛି। ମୃତ ନାବାଳିକା ଜଣକ ବାଲିଆପାଳ ଥାନା ଅନ୍ତର୍ଗତ କାଠଶଗଡା ଗ୍ରାମର ଶ୍ରୀନିବାସ ପାତ୍ରଙ୍କ ଝିଅ ମନୋରମା ପାତ୍ର ( ୧୫)।

ବାଲେଶ୍ୱର: ଓଡ଼ିଶାର ଲକ୍ଷ ଲକ୍ଷ ମହିଳା ଆଜି ଆର୍ଥିକ ଓ ସାମାଜିକ ସ୍ତରରେ ସଶକ୍ତ ହୋଇଛନ୍ତି। ଗ୍ରାମାଞ୍ଚଳରେ ମହିଳାମାନେ ଆଉ ପରିବାରର ବୋଝ ହୋଇନାହାନ୍ତି। ନିଜେ ରୋଜଗାର କରି ନିଜ ପରିବାରର ଆର୍ଥିକ ମେରୁଦଣ୍ଡକୁ ଶକ୍ତ କରିବା ସହ ସମାଜର ମୁଖ୍ୟ ସ୍ରୋତରେ ସାମିଲ ହୋଇ ସାମାଜିକ ଆନ୍ଦୋଳନରେ କର୍ଣଧାର ହୋଇପାରିଛନ୍ତି। ଏହା କେବଳ ସମ୍ଭବ ହୋଇଛି ଓଡିଶା ସରକାରଙ୍କ “ମିଶନ ଶକ୍ତି” ଯୋଜନା ଯୋଗୁଁ। ସେହିଭଳି ଏକ ମହିଳା ସ୍ୱୟଂ ସହାୟିକା ଗୋଷ୍ଠୀ ହେଉଛି ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ଦାରୁହା ଗ୍ରାମର “ତାରିଣୀ ସ୍ୱୟଂ ସହାୟକ ଗୋଷ୍ଠୀ”। ଏହି ଗୋଷ୍ଠୀର ମହିଳା ମାନଙ୍କୁ “ମିଶନ ଶକ୍ତି” ବଞ୍ଚିବାର ରାହା ଦେଖାଇଛି। ଛେଳି ଚାଷ କରି ନିଜେ ସ୍ୱାବଲମ୍ବୀ ହେବା ସହିତ ନିଜ ପରିବାରକୁ ଆର୍ଥିକ ସ୍ୱଚ୍ଛଳ କରିପାରିଛନ୍ତି ଏବଂ ଅନ୍ୟ ମାନଙ୍କ ପାଇଁ ଉଦାହରଣ ସୃଷ୍ଟି କରିପାରିଛନ୍ତି।

ପ୍ରକାଶଯେ ରାଜ୍ୟ ସରକାରଙ୍କ ମିଶନ ଶକ୍ତି ଜରିଆରେ ଗତ ୨୦୦୭ ମସିହାରେ ଏହି ଗ୍ରାମର ଦାରିଦ୍ର୍ୟ ସୀମାରେଖା ତଳେ ଥିବା ୧୦ଟି ପରିବାର ମହିଳାମାନେ ଏକଜୁଟ ହୋଇ “ତାରିଣୀ ସ୍ୱୟଂ ସହାୟିକା ଗୋଷ୍ଠୀ ଗଢ଼ି ଥିଲେ। ପ୍ରତ୍ୟେକ ମହିଳା ମାସିକ ୧୦୦ଟଙ୍କା ମେମ୍ବର ଫି ଜମା କରି ନିକଟସ୍ଥ ବ୍ୟାଙ୍କରେ ଖାତା ଖୋଲି ଜମା କରୁଥିଲେ। ଯାହା ଏବେ ତାଙ୍କର ଜମା ଟଙ୍କା ବଢି ୧ଲକ୍ଷ ୬୦ହଜାର ଟଙ୍କାରେ ପହଁଚିଲାଣି। କିଛିଦିନ ପରେ ସେଥିରୁ ଟଙ୍କା ଉଠାଇ ପ୍ରତ୍ୟେକେ କୁକୁଡ଼ା ଚାଷ ସହିତ ଛୋଟ ବ୍ୟବସାୟ ଆରମ୍ଭ କରିଥିଲେ। ପରବର୍ତ୍ତୀ ସମୟରେ ବ୍ୟାଙ୍କରୁ ଋଣ ଏବଂ ଜି ପି ଏଲ ଏଫ ମାଧ୍ୟମରେ ଋଣ ଆଣି ନିଜ ବ୍ୟବସାୟକୁ ବୃଦ୍ଧି କରିଥିଲେ। ତେବେ ୨୦୨୧ ମସିହା ନଭେମ୍ବର ମାସରେ ମିଶନ ଶକ୍ତି ଓ ଜୀବିକା ମିଶନ ମିଳିତ ପ୍ରୟାସରେ ଏହି ଗୋଷ୍ଠୀ କୁ ଛେଳି ପାଳନ ନିମନ୍ତେ ଯେତେବେଳେ ପ୍ରସ୍ତାବ ଆସିଲା ଏହାକୁ ହାତଛଡ଼ା କରିନଥିଲେ ଗୋଷ୍ଠୀର ସଭାନେତ୍ରୀ ଜୟିତା ଭଞ୍ଜ ଓ ସମ୍ପାଦିକା କାଜଲ ଭଞ୍ଜ । ସଙ୍ଗେ ସଙ୍ଗେ ଗୋଷ୍ଠୀ ର ସଦସ୍ୟ ମାନେ ମିଟିଂ ଡକାଇ ଦରଖାସ୍ତ ଜରିଆରେ ଉକ୍ତ ପ୍ରକଳ୍ପକୁ ହାତକୁ ନେଇଥିଲେ।ପ୍ରଥମ ପର୍ଯ୍ୟାୟରେ ୪୬ହଜାର ଟଙ୍କା ସେମାନଙ୍କୁ ଋଣ ମିଳିଥିଲା ଏବଂ ସେହି ଟଙ୍କାରେ ସେମାନେ ୩୨ ଟି ଛେଳି କିଣି ତାର ପାଳନ କରିଥିଲେ।ମାତ୍ର ୭ମାସ ମଧ୍ୟରେ ସେମାନେ ସେଥିରୁ ଛେଳିକୁ ବିକ୍ରୀ କରି ୨୫ହଜାର ଟଙ୍କା ଲାଭ ପାଇଛନ୍ତି। ସେମାନଙ୍କ ନିକଟରେ ଆହୁରି ୨୮ଟି ଛେଳି ରହିଥିବା ବେଳେ ୪୫୦ ବର୍ଗ ଫୁଟର ଏକ ଗୁହାଳ ଘର ନିର୍ମାଣ କରିଛନ୍ତି। ଆଗକୁ ୧୦୦ଟି ଛେଳି ରଖାଯିବ ବୋଲି ଗୋଷ୍ଠୀର ସଭାନେତ୍ରୀ ଜୟିତା କହିଛନ୍ତି।

ଏହି ଛେଳି ଚାଷ ଗୋଷ୍ଠୀର ୧୦ଜଣ ମହିଳାଙ୍କ ଏକ ପ୍ରମୁଖ ରୋଜଗାରର ମାଧ୍ୟମ ହୋଇଥିବାବେଳେ ଏହା ଦ୍ୱାରା ସମସ୍ତ ମହିଳା ସ୍ୱାବଲମ୍ବୀ ହୋଇପାରିଥିବା ସଦସ୍ୟା ସରିତା ଭଞ୍ଜ, ଗୀତାଞ୍ଜଳୀ ଭଞ୍ଜ, ଛବିରାଣୀ ସେନାପତି, ମିନତୀ ଜେନା କହିଛନ୍ତି ଏବଂ ଏହାର ଶ୍ରେୟ ଓଡିଶା ସରକାରଙ୍କ ମିଶନ ଶକ୍ତି ଯୋଗୁଁ ହୋଇପାରିଛି ବୋଲି କହିଛନ୍ତି। ଉକ୍ତ ପଞ୍ଚାୟତରେ ଆହୁରି ଅନେକ ଗୋଷ୍ଠୀ ମାନଙ୍କୁ ମିଶନ ଶକ୍ତି ଓ ଓଡିଶା ଜୀବିକା ମିଶନ ଜରିଆରେ ପ୍ରୋତ୍ସାହନ ଦିଆଯାଉଛି।ସେମାନେ ମଧ୍ୟ ବିଭିନ୍ନ ପ୍ରକଳ୍ପ କୁ କାର୍ଯ୍ୟକରି ରୋଜଗାରକ୍ଷମ ହୋଇପାରିଛନ୍ତି ବୋଲି ଜି ପି ଏଲ ଏଫ ର ଏମ ବି କେ ସବିତା ରାଣୀ ସାହୁ ସୂଚନା ଦେଇଛନ୍ତି।

ନୀଳଗିରି:  ବାଲେଶ୍ୱର ଜିଲ୍ଲା ରସାଲପୁର ପଞ୍ଚାୟତର ଚଣ୍ଡିପୁର ଗ୍ରାମର ହରିଶଚନ୍ଦ୍ର ଜେନା ଓ ସସ୍ମିତା ଜେନାଙ୍କ ଅଢ଼େଇବର୍ଷର ପୁଅ ଆୟୁଷ ୨୦୨୨ ମସିହା ଏପ୍ରିଲ ମାସରେ ଏସିଆ ବୁକ୍‍ ଅଫ ରେକର୍ଡରେ ସ୍ଥାନ ପାଇଛନ୍ତି। ଏହା ପୂର୍ବରୁ କୁନିପୁଅ ଆୟୁଷ ଇଣ୍ଡିଆ ବୁକ୍‍ ଅଫ୍‍ ରେକର୍ଡରେ ମଧ୍ୟ ସ୍ଥାନ ପାଇ ଜିଲ୍ଲା ପାଇଁ ଗର୍ବ ଗୌରବ ଆଣିଥିଲେ। କୁନିପିଲା ଆୟୁଷର ମାମୁଁ ଘର ନୀଳଗିରି ବେଗୁନିଆ ତୋଟାପଡ଼ା ଗ୍ରାମର ହୋଇଥିବା ବେଳେ ମାଆ ଜଣେ ଗୃହିଣୀ , ବାପା ହରିଶ ଏକ ଘରୋଇ କମ୍ପାନୀରେ ଚାକିରି କରିଛନ୍ତି। ଅଢ଼େଇ ବର୍ଷର ଆୟୁଷ ୧୮ଟି ମହାମୃତ୍ୟୁଞ୍ଜୟ ମନ୍ତ୍ର, ଜାତୀୟ ସଂଗୀତ, ୧୮ଟି ପୌରାଣିକ ବହି, ୧୬ଟି ପ୍ରାଣୀଙ୍କ ନାମ, ଏ ରୁ ଜେଡ୍‍ ପର୍ଯ୍ରନ୍ତ ୨୬ଟି ୱାର୍ଡ କହିବା ଆଦି ପ୍ରତିଯୋଗିତାରେ ସୀମିତ ସମୟ ଭିତରେ ନିଜ ପ୍ରତିଭାର ରେକର୍ଡ କରିଛନ୍ତି।୨୧ ସେକେଣ୍ଡରେ ୨୮ଟି ରାଜ୍ୟର ରାଜଧାନୀ କହିଥିବା ବେଳେ ଏସିଆ ବୁକ୍‍ ଅଫ ରେକର୍ଡରେ ଗତ ଏପ୍ରିଲ ମାସରେ ସ୍ଥାନ ପାଇ ଅଚଂଳରଗୌରବ ଆଣିଥିବା ବେଳେ କୁନି ପୁଅ ଆୟୁଷର ଉତରତର କାମନା କରିଛନ୍ତି।

ବାଲେଶ୍ଵର:ବାଲେଶ୍ଵର ଜିଲାର ସେଣ୍ଟ୍ରାଲ ସ୍କୁଲ ଛକ ନିକଟରେ ଥିବା ଏକ ଘରୋଇ ଲେଡିଜ ମେସର ଜଣେ ଛାତ୍ରୀ ଆତ୍ମହତ୍ୟା କରିଥିବା କୁହାଯାଉଥିବା ବେଳେ ଛାତ୍ରୀଙ୍କ ବାପା ମା’ ଏହା ହତ୍ୟା ବୋଲି ଅଭିଯୋଗ ଆଣି ମେସ ସମ୍ମୁଖରେ ଧାରଣା ଦେଇଛନ୍ତି। ଛାତ୍ରୀଙ୍କ ଘର ମୟୁରଭଞ୍ଜ ଜିଲ୍ଲା ବିଶୋଇ ଅଞ୍ଚଳରେ ହୋଇଥିବା ବେଳେ ସେ ଏଠାରେ ରହି ପାଠ ପଢୁଥିଲେ। ଗତ ବିଳମ୍ବିତ ରାତିରେ ତାଙ୍କର ଦେହ ଖରାପ ହେବାରୁ ତାଙ୍କୁ ବାଲେଶ୍ଵର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ସେଠାରେ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଥିଲା। କଟକରେ ତାଙ୍କର ମୃତ୍ୟୁ ହୋଇଥିବା ଜଣାପଡିଛି।

କଟକରୁ ତାଙ୍କ ମୃତଦେହ ଆଜି ସନ୍ଧ୍ୟାରେ ବାଲେଶ୍ଵର ଆସୁଥିବା ବେଳେ ମେସ ସମ୍ମୁଖରେ ଉତ୍ତେଜନା ପରିସ୍ଥିତି ଉପୁଜିଛି। ଏହା ହତ୍ୟା କି ଆତ୍ମହତ୍ୟା ସ୍ପଷ୍ଟ ହୋଇ ନଥିବା ବେଳେ ଅପ୍ରୀତିକର ପରିସ୍ଥିତି ନିୟନ୍ତ୍ରଣ ପାଇଁ ପୋଲିସ କଲେଜ ସମ୍ମୁଖରେ ପହଞ୍ଚିଛି। ମୃତ ଛାତ୍ରୀଙ୍କ ପରିଚୟ ସାବିତ୍ରୀ ବେହେରା ଏବଂ ସେ +୨ ବିଜ୍ଞାନ ଦ୍ୱିତୀୟ ବର୍ଷର ଛାତ୍ରୀ ବୋଲି ଜଣା ପଡିଛି । ୧୮ ତାରିଖ ସନ୍ଧ୍ୟାରେ ଟଙ୍କା ଚୋରି ହୋଇଥିବା ଘଟଣାରେ ସାବିତ୍ରୀଙ୍କୁ ଦୋଷାରୋପ କରିବା ପରେ ଏହି ଘଟଣା ଘଟିଥିବା ମୃତ ଛାତ୍ରୀଙ୍କ ବାପା ସୂଚନା ଦେଇଛନ୍ତି । କଲେଜ ସମ୍ମୁଖରେ ଅନ୍ୟ ଛାତ୍ରଛାତ୍ରୀଙ୍କ ଅଭିଭାବକ ଓ ସାଧାରଣ ଜନତାଙ୍କ ଉତ୍ୟକ୍ତ ପରିସ୍ଥିତି ଦେଖିବାକୁ ମିଳିଛି । ବ୍ୟବଚ୍ଛେଦ ରିପୋର୍ଟ ଆସିବା ପରେ ଏବଂ ଘଟଣାର ତଦନ୍ତ ହେଲେ ସତ୍ୟାସତ୍ୟ ଜଣାପଡିବ ବୋଲି ପୋଲିସ ସୂଚନା ଦେଇଛନ୍ତି ।

ବାଲେଶ୍ଵର: ଅତ୍ୟାବଶ୍ୟକ ସାମଗ୍ରୀର ଅହେତୁକ ମୂଲ୍ୟ ବୃଦ୍ଧିକୁ ନେଇ ଜନସାଧାରଣଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି । କିଛି ଦିନ ପୂର୍ବରୁ ଲେମ୍ବୁ ଦର ହଠାତ୍ ବୃଦ୍ଧି ପାଇବା ପରେ ଏବେ ଟମାଟୋ ଦର ଶତକ ଛୁଇଁବା ସାଧାରଣ ପରିବାର ପାଇଁ ମହା ସମସ୍ୟା ଭାବେ ଉଭା ହୋଇଛି । ଓଡ଼ିଆ ପରିବାରଙ୍କ ସୁଖଦୁଃଖର ସାଥୀ ଭାବେ ଟାମାଟୋର ଗୁରୁତ୍ୱ ଅଧିକ । ପରିବା ଦର ବୃଦ୍ଧି ପାଇଲେ ବି ଟମାଟୋ ଓ ଆଳୁକୁ ନେଇ ସାଧାରଣ ଲୋକେ କୌଣସିମତେ ଚଳି ଯାଉଥିଲା ବେଳେ ଏବେ ଟମାଟୋର ଆଶାତୀତ ଦର ବୃଦ୍ଧି ବୋଝ ଉପରେ ନଳିତା ବିଡ଼ା ସଦୃଶ ହୋଇଥିବା ସାଧାରଣରେ ମତପ୍ରକାଶ କରିଛନ୍ତି । ଗୋଟିଏ ସପ୍ତାହ ପୂର୍ବରୁ ଟମାଟୋ କେଜି ପିଛା ୭୦ ରୁ ୮୦ ଟଙ୍କାରେ ଏବେ ଏହା ୧୦୦ ଟପିଥିବା ଜଣାପଡିଛି । ସାଧାରଣତଃ ଗ୍ରୀଷ୍ମ ଋତୁରେ ଓଡିଶାରେ ଟମାଟୋ ଚାଷ ହେଉନଥିବା ବେଳେ ପଡୋଶୀ ପଶ୍ଚିମବଙ୍ଗ ଏବଂ ବାଙ୍ଗାଲୁରୁ ବଜାର ଉପରେ ନିର୍ଭଶଶୀଳ ସ୍ଥାନୀୟ ବଜାରରେ ଏହାର ପ୍ରଭାବ ପଡିଥିବା ବାଲେଶ୍ୱରର ବ୍ୟବସାୟୀ କହିଛନ୍ତିି ।

ପ୍ରତିକୂଳ ପାଗ ଯୋଗୁଁ କର୍ଣ୍ଣାଟକ ରାଜ୍ୟରେ ଆଶାନୁରୁପ ଟମାଟୋ ଚାଷ ହୋଇନଥିବା ବେଳେ ବାଙ୍ଗାଲୁରୁ ବଜାରରେ ଟମାଟୋର ଦର ଚଢା ରହିଛି । ସେହିପରି ପଶ୍ଚିମବଙ୍ଗର ଜୟନଗର ଓ ବିହାରରରେ କେତେକ ସ୍ଥାନରୁ ବାଲେଶ୍ୱରକୁ ଟମାଟୋ ଆସୁଥିଲେ ବି କମ୍ ଉତ୍ପାଦନ ହେତୁ ଦିନକୁ ଦିନ ଦର ବୃଦ୍ଧି ହେଉଥିବା ବ୍ୟବସାୟୀମାନେ ଯୁକ୍ତି ଦର୍ଶାଇଛନ୍ତି । ବଜାରରେ ଅନ୍ୟ ପନିପରିବା ଦର କମି ଯାଇଥିଲେ ବି ଟମାଟୋ ଦର ବେଶ ବଢିଥିବା କାରଣରୁ ବିକ୍ର ମଧ୍ୟ କମିଥିବା ସେମାନେ କହିଛନ୍ତି । ଆସନ୍ତା ମାସେ ମଧ୍ୟରେ ଉତ୍ପାଦନ ବଢିବା କ୍ଷଣି ବଜାରକୁ କମ ଦାମରେ ଟମାଟୋ ପହଂଚିବ ବୋଲି ବ୍ୟବସାୟୀମାନେ ଆଶାପ୍ରକାଶ କରିଛନ୍ତି ।

ଅନ୍ୟପକ୍ଷରେ ଆମିଷ ଖାଦ୍ୟ ରୁଚି ରଖୁଥିବା ପରିବାରଙ୍କ ପାଇଁ ହଠାତ୍ ଚିକେନ ଦରବୃଦ୍ଦି ବେଶ ଚିନ୍ତାର କାରଣ ହୋଇଛି । ମାସେ ପୂର୍ବରୁ ଚିକେନ କେଜି ପ୍ରତି ୨୦୦ରୁ ୨୨୦ ଟଙ୍କା ଥିବା ବେଳେ ସମ୍ପ୍ରତି ଏହା ୩୦୦ରେ ପହଂଚିଛି । ତେବେ ଚିକେନ ଦରବୃଦ୍ଧି ବି ପ୍ରବଳ ଗ୍ରୀଷ୍ଣ ପ୍ରବାହକୁ ଦାୟୀ କରିଛିନ୍ତି କିଛି ବ୍ୟବସାୟୀ । ଗ୍ରୀଷ୍ଣ ଋତୁରେ କୁକୁଡାଙ୍କ ମୃତ୍ୟୁହାର ଯଥେଷ୍ଟ ଅଧିକ ଥିବାରୁ ସେହି ଅନୁସାରେ ଉତ୍ପାଦନ କମିଛି । ଏହା ସହିତ କୁକୁଡା ଦାନା ବ୍ୟାଗ୍ ପିଛା ପ୍ରାୟ ୬୫୦ଟଙ୍କା ବଢିଯାଇଛି । କୁକୁଡା ଚିଆଁ ପିଛା ଦର ମଧ୍ୟ ୨୨ଟଙ୍କାରେ ପହଂଚିଛି । ଫଳରେ ଚାଷୀ କୁକୁଡା ଚାଷ ଉପରୁ ମୁହଁ ଫେରାଉଛନ୍ତି । ଚାଷୀଙ୍କ ଠାରୁ ଉଚ୍ଚ ଦରରେ କୁକୁଡା କିଣିବା ସହିତ ତେଳ ଦର ବୃଦ୍ଧି ଅନୁସାରେ ବଢା ଗାଡି ଭଡା ଖର୍ଚ୍ଚ ପରେ ବଜାରକୁ ପହଂଚିବା ବେଳକୁ କୁକୁଡା ଦର ବୃଦ୍ଧି ହେଉଛି ବୋଲି ବାଲେଶ୍ୱର ସହରର ନୂଆବଜାର ସ୍ଥିତ ପପୁଲାର ଚିକେନ ସେଂଟରର ମାଲିକ ହରିଚନ୍ଦନ ତିୱାରୀ କହିଛନ୍ତି । ଆଗାମୀ ଦିନରେ ଏହି ଦରରେ ଆହୁରି ବୃଦ୍ଧି ଦେଖା ଯାଇପାରେ ବୋଲି ସେ ଆଶଙ୍କା ପ୍ରକାଶ କରିଛନ୍ତି ।

ଜଳେଶ୍ବର: ଦୁଃଖ ଆଉ ରୋଗ କେବେ ବୟସ ଦେଖେ ନାହିଁ। ଏ କି ବିଧିର ବିଧାନ। ଏହି ବୃଦ୍ଧା ମାଆ ବାସନ୍ତୀ ଜେନାର ସାହାରା ହୋଇ ଥିବା କୁନି ଝିଅ ଗଙ୍ଗାମଣି ଆଗରେ ଆଜି ଦୁଃଖର ପାହାଡ଼ ଛିଡ଼ା ହୋଇଛି। ତଥାପି ଧର୍ଯ୍ଯ ଓ ସାହସ ହରାଇ ନାହିଁ ଏହି କୁନି ଝିଅ ଗଙ୍ଗାମଣି। ବୟସ ମାତ୍ର ୧୭। ଆଖିରେ ଆଖିଏ ସ୍ଵପ୍ନ ଆଉ ମନରେ କିଛି କରି ଦେଖେଇବାର ଦୃଢ଼ ଇଚ୍ଛାଶକ୍ତି। କୁନି ଝିଅ ଗଙ୍ଗାମଣି ମୁହଁକୁ ଦେଖିଲେ ଦାରିଦ୍ର୍ୟ ତାର ପ୍ରତିବନ୍ଧକ ବାଧା ଦେଉଛି ବୋଲି ସ୍ପଷ୍ଟ ବାରି ହୁଏ। ଆଜି ପାଠ ପଢା ବୟସରେ ଗଙ୍ଗା ମଣି ଧରିଛି ନିକିତି। ଏହି ଛୋଟ ବୟସରୁ ପଡ଼ିଛି ନିଜ ଜନ୍ମଦାତ୍ରୀ ରୋଗୀଣା ମାଆ ଓ ନିଜ ପେଟକୁ ମୁଠାଏ ଦାନା ଦେବାର ଚିନ୍ତା। ଦଶ ମାସ ଦଶ ଦିନ ଗର୍ଭରେ ରଖି ଜନ୍ମ ଦେଇ ଥିବା ମାଆର ଦୁଃଖ କଷ୍ଟକୁ କେମିତି ସହିବ ବା ଝିଅ। ଏହି ଘଟଣାଟି ଦେଖିବାକୁ ମିଳିଛି ବାଲେଶ୍ଵର ଜିଲ୍ଲାର ବାଲିଆପାଳ ବ୍ଲକ ଅନ୍ତର୍ଗତ ବିରିପାଲିଆ ଗ୍ରାମରେ।

ପରିବାର କହିଲେ ବୃଦ୍ଧା ମାଆ ବାସନ୍ତୀ ଜେନା ଓ ଝିଅ ଗଙ୍ଗାମଣି। ମାଆ ଆଜି ଅଜଣା ରୋଗରେ ଆକ୍ରାନ୍ତ। ପରିବାରର ଆର୍ଥିକ ସ୍ଥିତି ଠିକ୍ ନଥିବାରୁ ଦଶମ ଶ୍ରେଣୀ ପରୀକ୍ଷା ଦେଇ ପାରି ନାହିଁ ଝିଅ ଗଙ୍ଗାମଣି। ପାଠ ପଢା ଛାଡ଼ି ମାଆର ଦୁଃଖକୁ ଦୂର କରିବା ପାଇଁ ସାଇ ପଡ଼ିଶା ପାଖରୁ ଖଣ୍ଡିଏ ସାଇକେଲ ମାଗି ବାହାରି ପଡେ ପାଖ ବାଲିଆପାଳ ବ୍ଲକର ସିମୁଳିଆ ବଜାରକୁ। କିଛି ପନିପରିବା ବ୍ୟବସାୟ ମାନଙ୍କ ଠାରୁ କିଣି ବଜାରରେ ଜାଗା ଟିଏ ଖୋଜି ବସିଯାଏ ନିକିତି ଧରି। କିଛି ଅର୍ଥ ରୋଜଗାର ପାଇଁ କାରଣ ଯେଉଁ ଅର୍ଥ ତାକୁ ମିଳିବ ସେଇ ଅର୍ଥରେ ସେ ତା ପେଟକୁ ମୁଠାଏ ଦାନା ଦେବ ଓ ରୋଗିଣା ମାଆର ସେବା କରିବ।

ଏହି ଖବର ବାଲେଶ୍ଵର ଜିଲ୍ଲାର ଜଳେଶ୍ବର ଠାରେ ଗଢ଼ି ଉଠିଥିବା ଅଗ୍ରଣୀ ସ୍ବେଚ୍ଛାସେବୀ ସଂଗଠନ ହେଲ୍ପ ଫର ୟୁ ଫାଉଣ୍ଡେସନକୁ ଜଣାଇବା ପରେ ସଙ୍ଗଠନ ନିଜ ସକ୍ଷମ ଅନୁସାରେ ତାକୁ ରୋଜଗାର କ୍ଷମ କରାଇଛନ୍ତି। କୁନି ଝିଅ ଗଙ୍ଗା ମଣି ଆଉ ବଜାରକୁ ଯାଇ ନିକିତି ଧରିବନି।ସଙ୍ଗଠନର ସମସ୍ତ ସଦସ୍ୟ, ସଦସ୍ୟା ମାନଙ୍କର କିଛି କିଛି ଆର୍ଥିକ ଅବଦାନ ବଳରେ ଗଙ୍ଗା ମଣିକୁ ଗୋଟିଏ ନୂତନ ସିଲେଇ ମେସିନ ଦେବା ସହିତ ଗୋଟିଏ ନୂତନ ସାଇକେଲ ମଧ୍ୟ ପ୍ରଦାନ କରିଛନ୍ତି ଏବଂ ସିଲେଇ କାମ ସିକିବା ବାବଦକୁ ଓ ମାଆର ଚିକିତ୍ସା ପାଇଁ ମଧ୍ୟ କିଛି ଆର୍ଥିକ ସହାୟତା କରିଛନ୍ତି। ଆଉ ପରିବାର ଚଳିବା ପାଇଁ କିଛି ରେସନ ସାମଗ୍ରୀ ମଧ୍ୟ ସଙ୍ଗଠନ ତରଫରୁ ପ୍ରଦାନ କରାଯାଇଛି। କୁନି ଝିଅ ଗଙ୍ଗା ମଣି ଓ ମାଆ ବାସନ୍ତୀ ଜେନାଙ୍କୁ ନୂତନ ବସ୍ତ୍ର ପ୍ରଦାନ ସଙ୍ଗଠନ ପକ୍ଷରୁ ପ୍ରଦାନ କରାଯାଇଛି। ଆଜି ଗଙ୍ଗା ମଣି ନିଜେ ରୋଜଗାର କରି ପାଠ ପଢି ତା ସ୍ଵପ୍ନକୁ ପୂରଣ କରିପାରିବ। ସଙ୍ଗଠନର ଏହି ମହାନ ଚିନ୍ତାଧାରାର କାର୍ଯ୍ଯକୁ ଆଜି ଅଞ୍ଚଳ ବାସି ଭୁରିଭୁରି ପ୍ରଶଂସା କରିଛନ୍ତି।