ନୂଆଦିଲ୍ଲୀ: ଓଡ଼ିଶାର ମିଲେଟ୍ ମିଶନକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଶଂସା କରିଛନ୍ତି। ୯୭ତମ ମନ୍ କି ବାତ୍ କାର୍ଯ୍ଯକ୍ରମରେ ଉଠିଲା ଓଡ଼ିଶା ମିଲେଟ୍‌ର ସଫଳତାର କାହାଣୀ । ସୁନ୍ଦରଗଡ଼ର ଆଦିବାସୀ ଏସଏଚଜି ମହିଳାଙ୍କୁ ଭୂରି ଭୂରି ପ୍ରଶଂସା କଲେ ପ୍ରଧାନମନ୍ତ୍ରୀ । ଦେଶବାସୀଙ୍କୁ ରାଜ୍ୟର ମିଲେଟ ମିଶନ ବିଷୟରେ ଜଣାଇଲେ ମୋଦି ।

ଓଡ଼ିଶାର ମିଲେଟ୍ ମିଶନ ଏବେ ଜାତୀୟ ଗଣମାଧ୍ୟମର ହେଡଲାଇନ୍ ପାଲଟିଛି । ସୁନ୍ଦରଗଡ଼ର ଏକ ଆଦିବାସୀ ମହିଳା ସ୍ବୟଂ ସହାୟକ ଗୋଷ୍ଠୀ ଏହି ମିଶନରେ ସାମିଲ ହୋଇଛି । ମିଲେଟ ସଫଳତା ପଛରେ ଓଡ଼ିଶାର ବହୁ ଏସଏଚଜି ମହିଳାଙ୍କ ହାତ ଥିବା ବେଳେ ସୁନ୍ଦରଗଡ଼ର ୧୫ ଶହ ମହିଳା ମାଣ୍ଡିଆରେ ପୁଷ୍ଟିକର ଖାଦ୍ୟ ତିଆରି କରୁଛନ୍ତି । କୁକିଜ୍, ସରଗୋଲ, ଗୁଲାବ ଜାମୁନ, କେକ୍ ଆଦି ତିଆରି କରୁଛନ୍ତି । ଏ ସବୁ ମାଣ୍ଡିଆ ପ୍ରସ୍ତୁତ ସାମଗ୍ରୀର ଚାହିଦା ଖୁବ୍ ରହିଛି । ଏହାଦ୍ବାରା ମହିଳାମାନେ ଲାଭବାନ ହେଉଛନ୍ତି । ରୋଜଗାରକ୍ଷମ ହେବା ସହ ଆତ୍ମନିର୍ଭରଶୀଳ ହୋଇପାରିଛନ୍ତି ବୋଲି କହିଛନ୍ତି ପ୍ରଧାନମନ୍ତ୍ରୀ । ନିକଟରେ ଅନ୍ତର୍ଜାତୀୟ ଯୋଗ ଦିବସ ଓ ଅନ୍ତର୍ଜାତୀୟ ମିଲେଟ୍ ବର୍ଷକୁ ସ୍ବୀକୃତି ଦେଇଛି ଜାତିସଂଘ । ଉଭୟ ଯୋଗ ଓ ମିଲେଟ୍ ସ୍ବାସ୍ଥ୍ୟ କ୍ଷେତ୍ରରେ ଗୁରୁତ୍ବ ବହନ କରୁଛି । ସୂଚନାଯୋଗ୍ୟ ୨୦୧୭ରେ ମିଲେଟ୍ ମିଶନ ଲଞ୍ଚ କରିଥିଲା ରାଜ୍ୟ ।

ଭୁବନେଶ୍ବର: ଉତ୍କଳ ଦିବସର ବିଶେଷ ଅବସରରେ ଓଡ଼ିଶାର ଜନସାଧାରଣଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଦେଶର ପ୍ରଗତିରେ ଓଡ଼ିଆ ଲୋକମାନେ ଉଲ୍ଲେଖନୀୟ ଯୋଗଦାନ ଦେଉଛନ୍ତି ଏବଂ ଓଡ଼ିଆ ସଂସ୍କୃତି ସମଗ୍ର ବିଶ୍ୱରେ ପ୍ରଶଂସିତ ବୋଲି ଟ୍ବିଟ କରି ପ୍ରଧାନମନ୍ତ୍ରୀ କହିଛନ୍ତି। ଏଥିସହ ଓଡ଼ିଶା ଦିବସ ଅବସରରେ ଓଡ଼ିଶାର ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ।

ଉତ୍କଳ ଦିବସର ବିଶେଷ ଅବସରରେ ଓଡ଼ିଶାର ଜନସାଧାରଣଙ୍କୁ ହାର୍ଦ୍ଦିକ ଶୁଭେଚ୍ଛା । ଦେଶର ପ୍ରଗତିରେ ଓଡ଼ିଆ ଲୋକମାନେ ଉଲ୍ଲେଖନୀୟ ଯୋଗଦାନ ଦେଉଛନ୍ତି ଏବଂ ଓଡ଼ିଆ ସଂସ୍କୃତି ସମଗ୍ର ବିଶ୍ୱରେ ପ୍ରଶଂସିତ । ଓଡ଼ିଶାର ଉଜ୍ଜ୍ୱଳ ଭବିଷ୍ୟତ କାମନା କରୁଛି ।

— Narendra Modi (@narendramodi) April 1, 2022

ଭୁବନେଶ୍ବର: ୟୁକ୍ରେନ ଫେରନ୍ତା ଡାକ୍ତରୀ ଛାତ୍ରଛାତ୍ରୀଙ୍କ ପାଇଁ ମୁଖ୍ୟମନ୍ତ୍ରୀଙ୍କ ଚିଠି। ପ୍ରଧାନମନ୍ତ୍ରୀ ମୋଦିଙ୍କୁ ଚିଠି ଲେଖିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। କ୍ୟାରିଅର ଅଧାରୁ ଫେରିଥିବା ଛାତ୍ରଛାତ୍ରୀଙ୍କ ଅଧ୍ୟୟନ ବ୍ୟବସ୍ଥା ପ୍ରସ୍ତାବ, ନ୍ୟାସନାଲ ମେଡିକାଲ କମିଶନ ଓ ସ୍ୱାସ୍ଥ୍ୟ ମନ୍ତ୍ରାଳୟ ହସ୍ତକ୍ଷେପ କରନ୍ତୁ । ଫେରିଥିବା ଡାକ୍ତରୀ ଛାତ୍ରଙ୍କ ପାଇଁ ଭାରତରେ ପାଠପଢ଼ା ବ୍ୟବସ୍ଥା ହେଉ, ସମସ୍ତ ପ୍ରକାର ସହଯୋଗ ପାଇଁ ଓଡ଼ିଶା ସରକାର ପ୍ରସ୍ତୁତ ବୋଲି ମୁଖ୍ଯମନ୍ତ୍ରୀ ଚିଠି ଉଲ୍ଲେଖ କରିଛନ୍ତି।

ନୂଆଦିଲ୍ଲୀ: କରୋନା ସଂକ୍ରମଣ ଦୃତ ଗତିରେ ବୃଦ୍ଧି ପାଇବାରେ ଲାଗିଛି।  ବଢୁଥିବା କରୋନା ମାମଲାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଏକ ବଡ ବୈଠକ କରିପାରନ୍ତି। ଭିଡିଓ କନଫରେନ୍ସିଂ ମାଧ୍ୟମରେ ଆଜି ସନ୍ଧ୍ୟା ୪.୩୦ରେ ଏହି ବୈଠକ ଅନୁଷ୍ଠିତ ହେବାକୁ ଯାଉଛି। ଦେଶରେ ଦୈନିକ କରୋନା ମାମଲା ବୃଦ୍ଧି ପାଉଥିବା ବେଳେ ପିଏମ ମୋଦୀଙ୍କର ଏକ ସପ୍ତାହ ମଧ୍ୟରେ ଏହା ହେଉଛି ଦ୍ୱିତୀୟ ପ୍ରମୁଖ ବୈଠକ।

ସୂଚନା ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଦେଶରେ ୨, ୪୭,୪୧୭ ଟି ନୂଆ ମାମଲା ରିପୋର୍ଟ ହୋଇଛି। ଯାହା ଗତକାଲି ତୁଳନାରେ ୨୭% ଅଧିକ ରହିଛି।

ନୂଆଦିଲ୍ଲୀ: ପଞ୍ଜାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସୁରକ୍ଷାରେ ତ୍ରୁଟି ମାମଲାର ଶୁଣାଣି କରି ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି ସୁପ୍ରିମକୋର୍ଟ । ତଦନ୍ତ ପାଇଁ ଏକ ନୂଆ କମିଟି ଗଠନ କରିଛନ୍ତି ସୁପ୍ରିମକୋର୍ଟ । ଜଣେ ଅବସରପ୍ରାପ୍ତ ଜଜ୍‌ଙ୍କ ନେତୃତ୍ୱରେ ଘଟଣାର ତଦନ୍ତ କରିବାକୁ ନିର୍ଦ୍ଦେଶ ।

ସୁପ୍ରିମକୋର୍ଟର ପ୍ରଧାନ ବିଚାରପତି ମାମଲାର ଶୁଣାଣି କରି କହିଛନ୍ତି ଯେ, ଘଟଣାରେ ଏବେ ଯାଏଁ ଚାଲିଥିବା ସମସ୍ତ ତଦନ୍ତକୁ ବନ୍ଦ କରାଯାଉ। ଏହାସହିତ ପ୍ରଧାନମନ୍ତ୍ରୀ କାର୍‌କେଡ୍‌ ଫସିବା ଘଟଣାର ତଦନ୍ତ ପାଇଁ ଜଣେ ଅବସରପ୍ରାପ୍ତ ଜଜ୍‌ଙ୍କ ନେତୃତ୍ୱରେ ଏକ ଟିମ୍‌ ଗଠନ ହେବ । ଏହି କମିଟିରେ ହାଇକୋର୍ଟ ରେଜିଷ୍ଟ୍ରାର, ଏନ୍‌ଆଇଏ ଡିଜି ଓ ପଞ୍ଜାବ ପୁଲିସର ଅତିରିକ୍ତ ଡିଜି ରହିବେ ।

ସୂଚନା ଅନୁଯାୟୀ, କିଛି ଦିନ ତଳେ ପଞ୍ଜାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କାର୍‌କେଡ ଫସିଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁରକ୍ଷାରେ ଗୁରୁତର ତ୍ରୁଟି ଦେଖିବାକୁ ମିଳିଥିଲା । ପ୍ରଧାନମନ୍ତ୍ରୀ ମୋଦିଙ୍କୁ ପ୍ରାୟ ୧୫ ମିନିଟ୍‌ ଧରି ରାସ୍ତାରେ ଅଟକ ରଖିଥିଲେ ଚାଷୀ । ସୁରକ୍ଷା ବ୍ୟବସ୍ଥାରେ ତ୍ରୁଟିକୁ ଦୃଷ୍ଟି​‌ରେ ରଖି ଫିରୋଜପୁରରେ ହେବାକୁ ଥିବା ପ୍ରଧାନମନ୍ତ୍ରୀଙ୍କ ରାଲିକୁ ରଦ୍ଦ କରାଯାଇଥିଲା। ତେବେ ଘଟଣାରେ ତ୍ୱରିତ ପଦକ୍ଷେପ ନେଇ ଭାରତ ସରକାର ଓ ପଞ୍ଜାବ ସରକାର ଏକ ତଦନ୍ତ କମିଟି ଗଠନ କରିଥିଲେ ।

ଫିରୋଜପୁର: ପଞ୍ଜାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସୁରକ୍ଷାରେ ଗମ୍ଭୀର ତ୍ରୁଟି ଦେଖିବାକୁ ମିଳିଛି । ଭଟିଣ୍ଡା ବିମାନବନ୍ଦରରୁ ଫିରୋଜପୁର ସଡ଼କମାର୍ଗରେ ଯାଉଥିବା ବେଳେ ପ୍ରଧାନମନ୍ତ୍ରୀଙ୍କ କାରକେଡକୁ ରାସ୍ତାରେ ଅଟକାଇଥିଲେ ଆନ୍ଦୋଳନକାରୀ କୃଷକ । ସେମାନେ ପ୍ରଧାନମନ୍ତ୍ରୀ ମୋଦିଙ୍କୁ ଫିରୋଜପୁର ରାଲିକୁ ଯିବାକୁ ଦେଇନଥିଲେ । ୧୫ ମିନିଟ୍ ଧରି ଭଟିଣ୍ଡାର ଏକ ଫ୍ଲାଏଓଭର ଉପରେ ଅଟକି ରହିବା ପରେ ପ୍ରଧାନମନ୍ତ୍ରୀ ବିମାନବନ୍ଦରକୁ ଫେରିଥିଲେ । ବିମାନ ବନ୍ଦରରେ ପହଞ୍ଚିବା ପରେ ସେ ସେଠାରେ ଉପସ୍ଥିତ ଥିବା ଅଧିକାରୀଙ୍କୁ କହିଥିଲେ ଯେ, ‘ଆପଣଙ୍କ ମୁଖ୍ୟମନ୍ତ୍ରୀଙ୍କୁ କହିବେ ଯେ, ମୁଁ ଭଟିଣ୍ଡା ବିମାନବନ୍ଦର ପର୍ୟ୍ୟନ୍ତ ଜୀବିତ ପହଞ୍ଚି ପାରିଲି’ । ସୂଚନାଯୋଗ୍ୟ ଯେ, ଫିରୋଜପୁରରେ ଏକ କାର୍ଯ୍ଯକ୍ରମରେ ଯୋଗଦେବାକୁ ପ୍ରଧାନମନ୍ତ୍ରୀ ଯାଉଥିଲେ । ପ୍ରଧାନମନ୍ତ୍ରୀ ମୋଦି କାର୍ଯ୍ଯକ୍ରମରେ ପହଞ୍ଚି ନପାରିବାରୁ କାର୍ଯ୍ଯକ୍ରମକୁ ସ୍ଥଗିତ ରଖାଯାଇଛି ।

ଅନ୍ୟପକ୍ଷରେ ପ୍ରଧାନମନ୍ତ୍ରୀଙ୍କ କାରକେଡକୁ ଏଭଳି ରୋକାଯିବାକୁ ଗମ୍ଭୀରତାର ସହ ନେଇଛି କେନ୍ଦ୍ର ଗୃହ ମନ୍ତ୍ରଣାଳୟ । ଗୃହ ବିଭାଗ ଏହାକୁ ଗମ୍ଭୀର ଭୁଲ ଭାବେ ଗ୍ରହଣ କରି ପଞ୍ଜାବ ସରକାରଙ୍କୁ ରିପୋର୍ଟ ତଲବ କରିଛି । ଏହା ସହିତ ଏଥିପାଇଁ ଯେଉଁମମାନେ ଦାୟୀ ସେମାନଙ୍କୁ ଚିହ୍ନଟ କରିବାକୁ ମଧ୍ୟ ଗୃହ ବିଭାଗ କହିଛି । ଯେଉଁ ସମୟରେ ଏହି ଘଟଣା ଘଟିଥିଲା ସେତେବେଳେ ପ୍ରଧାନମନ୍ତ୍ରୀ ଭଟିଣ୍ଡାରୁ ହୁସୈନିବାଲାରେ ଜାତୀୟ ସହିଦ ସ୍ମାରକସ୍ଥଳକୁ ଯାତ୍ରା କରୁଥିଲେ ।

ଅନ୍ୟପକ୍ଷରେ ଫିରୋଜପୁରରେ ଉପସ୍ଥିତ ଥିବା କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ କହିଛନ୍ତି ଯେ, ପ୍ରଧାନମନ୍ତ୍ରୀ ଆପଣ ମାନଙ୍କୁ ସାକ୍ଷାତ କରିବାକୁ ଚାହୁଁଥିଲେ କିନ୍ତୁ କିଛି କାରଣ ପାଇଁ ସେ ଆସି ପାରିନାହାନ୍ତି । ତେବେ କାର୍ଯ୍ଯକ୍ରମ ରଦ୍ଦ କରାଯାଇ ନାହିଁ କେବଳ ସ୍ଥଗିତ ହୋଇଛି ବୋଲି ସେ କହିଛନ୍ତି ।

ଅନ୍ୟପଟେ ଏହାକୁ ନେଇ କଂଗ୍ରେସ ବିରୋଧରେ ବିଜେପି ଓ ଅକାଳୀ ଦଳ ପକ୍ଷରୁ ଆକ୍ରମଣ ଆରମ୍ଭ ହୋଇଛ । ବିଜେପି ନେତା ମଜିନ୍ଦର ସିଂହ ସିରଶା ଏହି ଘଟଣା କଂଗ୍ରେସ ପ୍ରାୟୋଜିତ ବୋଲି କହିଛନ୍ତି । ଆଇଏସଆଇ ଓ ପାକିସ୍ତାନ ସହିତ ମିଶି କଂଗ୍ରେସ ପଂଜାବରେ ଅଶାନ୍ତି ସୃଷ୍ଟି କରିବାକୁ ଚାହୁଁଛି ବୋଲି ସେ କହିଛନ୍ତି ।

ସେପଟେ ବିଜେପି ଅଧ୍ୟକ୍ଷ ଜେ ପି ନଡ୍ଡା ପଞ୍ଜାବର କଂଗ୍ରେସ ସରକାରକୁ ସମାଲୋଚନା କରିଛନ୍ତି। ପ୍ରଧାନମନ୍ତ୍ରୀଙ୍କ କାରକେଡ଼କୁ ସୁରକ୍ଷିତ ଓ ନିରାପଦ ଭାବେ ଯାତ୍ରା କରିବା ଲାଗି ବ୍ୟବସ୍ତା ନ କରାଇବା ନେଇ ସେ ପଞ୍ଜାବ ସରକାରକୁ ଦାୟୀ କରିଛନ୍ତି। ସେ ଏହି ଘଟଣାକୁ ଏକ ବଡ ସୁରକ୍ଷାଜନିତ ତ୍ରୁଟି ବୋଲି କହିଛନ୍ତି ଏବଂ ପ୍ରଧାନମନ୍ତ୍ରୀ ଯାଉଥିବା ରାସ୍ତାରେ ବିକ୍ଷୋଭକାରୀମାନଙ୍କୁ ରାଜ୍ୟ ସରକାର ବିରୋଧକାରୀଙ୍କୁ ପ୍ରବେଶ ପାଇଁ ଅନୁମତି ଦେଇଥିବା ଅଭିଯୋଗ କରିଛନ୍ତି। ବିଧାନସଭା ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀଙ୍କୁ ପ୍ରମୁଖ ବିକାଶମୂଳକ ପ୍ରକଳ୍ପ ଘୋଷଣା ନ କରାଇଦେବାକୁ ଏହା ପଞ୍ଜାବ ସରକାରଙ୍କ ଏକ ଷଡଯନ୍ତ୍ର ବୋଲି ନଡ୍ଡା ଅଭିଯୋଗ କରିଛନ୍ତି।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭୁଟାନର ସର୍ବୋଚ୍ଚ ନାଗରିକ ପୁରସ୍କାର ପ୍ରଦାନ କରାଯିବ। ମୋଦୀଙ୍କୁ ନାଗଦଗ ପେଲଜୀ ଖୋର୍ଲୋ ଦ୍ବାରା ସମ୍ମାନିତ କରାଯିବାକୁ ଭୁଟାନ ସରକାର ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି। ଭୁଟାନ ପ୍ରଧାନମନ୍ତ୍ରୀ ଲୋଟେ ଶେରିଙ୍ଗଙ୍କ ଦ୍ବାରା ଏହି ସୂଚନା ଦିଆଯାଇଛି।

Overjoyed to hear His Majesty pronounce Your Excellency Modiji’s @narendramodi name for the highest civilian decoration, Order of the Druk Gyalpo.https://t.co/hD3mihCtSv@PMOIndia @Indiainbhutan pic.twitter.com/ru69MpDWlq

— PM Bhutan (@PMBhutan) December 17, 2021

ଶେରିଙ୍ଗ କହିଛନ୍ତି ଯେ, ପିଏମ ମୋଦୀ ବର୍ଷ ବର୍ଷ ଧରି ବିନା ସର୍ତ୍ତରେ ବନ୍ଧୁତା ବଜାୟ ରଖିଛନ୍ତି। କରୋନା ମହାମାରୀ ସମୟରେ ସହାୟତାର ହାତ ମଧ୍ୟ ବଢାଇଛନ୍ତି। ଶେରିଙ୍ଗ କହିଛନ୍ତି ଯେ ସେ ପିଏମ ମୋଦୀଙ୍କୁ ଜଣେ ଆଧ୍ୟାତ୍ମିକ ବ୍ୟକ୍ତି ଭାବରେ ଦେଖିଛନ୍ତି। ନିକଟ ଅତୀତରେ ଭାରତ ଏବଂ ଭୁଟାନ ମଧ୍ୟରେ ସମ୍ପର୍କ କ୍ରମାଗତ ଭାବେ ମଜବୁତ ହୋଇଛି। ବିଶେଷଜ୍ଞଙ୍କ କହିବା ମୁତାବକ ଏହିସବୁ କାରଣରୁ, ପ୍ରଧାନମନ୍ତ୍ରୀ ମୋଦୀଙ୍କୁ ଭୁଟାନର ସର୍ବୋଚ୍ଚ ନାଗରିକ ସମ୍ମାନ ଦେବା ପାଇଁ ଘୋଷଣା କରାଯାଇଛି।

ନୂଆଦିଲ୍ଲୀ: ମନ୍ କି ବାତ୍ କାର୍ୟ୍ୟକ୍ରମର ୮୩ତମ ସଂସ୍କରଣରେ ଆଜି ଦେଶବାସୀଙ୍କୁ ସମ୍ୱୋଧିତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଗକୁ ନୌସେନା ଦିବସ ଥିବାରୁ ଏହି ଅବସରରେ ପ୍ରଧାନମନ୍ତ୍ରୀ ଦେଶର ଯବାନମାନଙ୍କୁ ସଲାମ୍ ଜଣାଇଛନ୍ତି ।

ଏଥିସହିତ ‘ଆୟୁଷ୍ମାନ ଭାରତ ଯୋଜନା’ ଉପରେ ଆଲୋକପାତ କରି ଏହା ଗରୀବ, ମଧ୍ୟବିତ୍ତ ଏବଂ ସାଧାରଣ ଲୋକଙ୍କ ପାଇଁ ବୋଲି କହିଛନ୍ତି । ଏବଂ ଆୟୁଷ୍ମାନ ଭାରତର ହିତାଧିକାରୀଙ୍କ ସହ କଥା ହୋଇଛନ୍ତି । ଏ ନେଇ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ସହ ଅଧିକ ଲୋକଙ୍କ ନିକଟରେ ଏହି ଯୋଜନା ପହଞ୍ଚାଇବା ପାଇଁ ଆହ୍ୱାନ ଦେଇଛନ୍ତି ।

ଷ୍ଟାର୍ଟ ଅପ୍ କ୍ଷେତ୍ରରେ ଭାରତ ସାରା ବିଶ୍ୱର ପ୍ରତିନିଧିତ୍ୱ କରିବା ଦିଗରେ ଆଗଉଛି । ଏହି ଅବସରେ ଦେଶର କିଛି ଅଗ୍ରଣୀ କମ୍ପାନୀ ବିଷୟରେ କହିଛନ୍ତି । ଆମ ଦେଶର ଯୁବପିଢ଼ି ନିଜ କୌଶଳ ସହାୟତାରେ ସାରା ବିଶ୍ୱର ସମସ୍ୟାର ସମାଧାନ ଦେଇପାରୁଛନ୍ତି ।

ସେ ଆହୁରି କହିଛନ୍ତି ଯେ, ଆମ ଦେଶର ଅନେକ ରାଜ୍ୟର ଏଭଳି ଅନେକ ଅଞ୍ଚଳ ରହିଛି, ଯେଉଁଠାରେ ସ୍ଥାନୀୟ ଲୋକେ ସେଠାକାର ପ୍ରାକୃତିକ ସୌନ୍ଦର୍ୟ୍ୟକୁ ସଜାଇ ରଖିଛନ୍ତି । ସେଠାକର ଲୋକଙ୍କ ଜୀବନ ଶୈଳୀ ପ୍ରକୃତି ସହିତ ଜଡ଼ିତ । ଯାହା ଆମ ସମସ୍ତଙ୍କ ପାଇଁ ପ୍ରେରଣା । ବୀରତ୍ୱ କେବଳ ଯୁଦ୍ଧ ଭୂମିରେ ଦେଖାଇପାରିବା ତାହା ନୁହେଁ, ଅନ୍ୟ କ୍ଷେତ୍ରରେ ମଧ୍ୟ ନିଜର ବୀରତ୍ୱ ପ୍ରତିପାଦିତ କରି ସଫଳତା ହାସଲ କରିହୁଏ ।

ସମ୍ପ୍ରତି ସାରା ଦେଶରେ ‘ଅମୃତ ମହୋତ୍ସବ’ ଗୁଞ୍ଜରିତ ହେଉଛି । ଆଉ ପଞ୍ଚାୟତ ଠାରୁ ଆରମ୍ଭ କରି ସଂସଦ ଯାଏଁ ଏହା ସହ ଜଡ଼ିତ କାର୍ୟ୍ୟକ୍ରମ ମଧ୍ୟ ଜାରି ରହିଛି । ମନ୍ କି ବାତ୍ କାର୍ୟ୍ୟକ୍ରମର ପ୍ରଥମ ଏପିସୋଡ ୩ ଅକ୍ଟୋବର ୨୦୧୪ରେ ପ୍ରସାରିତ ହୋଇଥିଲା । ଏହା ପୂର୍ବରୁ ୨୪ ଅକ୍ଟୋବରରେ ମନ୍ କି ବାତ୍ କାର୍ୟ୍ୟକ୍ରମରେ ପ୍ରଧାନମନ୍ତ୍ରୀ ସ୍ୱଚ୍ଛ ଭାରତ ସମ୍ପର୍କରେ କାର୍ଯ୍ଯ ଉପରେ ଗୁରୁତ୍ୱାରୋପ କରିଥିଲେ । ଏଥିସହିତ ପ୍ରଧାନମନ୍ତ୍ରୀ ଭାରତ ସାରା ବିଶ୍ୱରରେ ପ୍ରଥମ ଦେଶ ଯିଏ ଡ୍ରୋନ ସହାୟତାରେ ନିଜ ଗାଁରେ ଜମିର ଡିଜିଟାଲ ରେକର୍ଡ ପ୍ରସ୍ତୁତ କରିପାରିଛି ।

ନୂଆଦିଲ୍ଲୀ: ଦୀର୍ଘ ଦିନର ଛକା ପଞ୍ଝା ପରେ ୩ ନୂଆ କୃଷି ଆଇନ ପ୍ରତ୍ୟାହାର ହେବ। ଏ ନେଇ ଗୁରୁ ନାନକ ଦେବଙ୍କ ଜୟନ୍ତୀରେ ବଡ଼ ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି  । ପ୍ରଧାନମନ୍ତ୍ରୀ କହିଛନ୍ତି, ତାଙ୍କ ସରକାର ୩ଟି କୃଷି ଆଇନକୁ ପ୍ରତ୍ୟାହାର କରି ନେଉଛନ୍ତି । ସେ ଯାହା କରୁଛନ୍ତି ଦେଶବାସୀଙ୍କ କଲ୍ୟାଣ ପାଇଁ କରୁଛନ୍ତି । ଆସନ୍ତା ସଂସଦ ଅଧିବେଶନରେ ଏନେଇ ସାମ୍ବିଧାନିକ ପ୍ରକ୍ରିୟା ଆରମ୍ଭ ହେବ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ସୂଚନା ଅନୁଯାୟୀ, ଏନଡିଏ ସରକାର ୨୦୨୦ ମସିହାରେ ସଂସଦରେ ବିଲ ପାସ ହେବା ପରେ ମୋହର ମାରିଥିଲେ ରାଷ୍ଟ୍ରପତି ରାମନାଥ କୋବିନ୍ଦ  । ନୂତନ ଚାଷୀ ଆଇନକୁ ନେଇ ଦେଶରେ ଏକ ପ୍ରକାର ଆନ୍ଦୋଳନର ଅଗ୍ନି ଲାଗିଥିଲା  । ଆନ୍ଦୋଳନ, ହରକତ ଏପର୍ଯ୍ୟନ୍ତ ମଧ୍ୟ ଜାରି ରହିଛି  । ଯାହା ସରକାରଙ୍କୁ ଏକ ପ୍ରକାର ଅକଳରେ ପକାଇଥିଲା  । କୃଷି ଆଇନ ପ୍ରତ୍ୟାହାର ନେଇ କୌଣସି ମଧ୍ୟ ସୂଚନା ନଥିବାବେଳେ ଅଚାନକ ଏଭଳି ବଡ଼ ଘୋଷଣା କରିଥିଲେ ପ୍ରଧାନମନ୍ତ୍ରୀ ମୋଦି।

ଗୁରୁ ନାନକଙ୍କ ଜୟନ୍ତୀରେ ପ୍ରଧାନମନ୍ତ୍ରୀ ମୋଦି ଦେଶକୁ ସମ୍ବୋଧନ କରିବା ସହ ସମସ୍ତ ଆନ୍ଦୋଳନରତ କୃଷକଙ୍କ ପାଇଁ ଏହି ଘୋଷଣା କରିଥିଲେ  । ସେ କହିଥିଲେ, ମୋର ସମସ୍ତ ଚାଷୀ ବନ୍ଧୁଙ୍କୁ ମିନତି ଆଜିର ଏପରି ପବିତ୍ର ଦିନରେ ଦେଶରୁ ଚାଷୀ ଆଇନ ହଟାଇବା କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି  । ତେଣୁ ଆପଣ ମାନେ ନିଜ ନିଜ ଘରକୁ ଫେରି କ୍ଷେତକୁ ଯିବା ପାଇଁ ଅନୁରୋଧ କରିଛନ୍ତି  ।

କେନ୍ଦ୍ର ସରକାର ଆଣିଥିବା ୩ଟି କୃଷି ଆଇନକୁ ନେଇ ଦେଶରେ ତମ୍ବି ତଫାନ ଦେଖାଦେଇଥିଲା । ଏହାକୁ ନେଇ ରାଜରାସ୍ତାକୁ ଓହ୍ଲାଇଥିଲେ ଦେଶର ଅନ୍ନଦାତା । ମାସ ମାସ ଧରି ଆନ୍‌ଦୋଳନ ଚଳାଇ ଆସିଛନ୍ତି । ନୂଆ କୃଷି ଆଇନ ନେଇ କେନ୍ଦ୍ର ସରକାର ଓ କୃଷକ ସଂଗଠନର ପ୍ରତିନିଧିଙ୍କ ମଧ୍ୟରେ ବିଭିନ୍ନ ପର୍ଯ୍ଯାୟରେ ବହୁ ଆଲୋଚନା ହୋଇଥିଲା । କିନ୍ତୁ କୌଣସି ନିଷ୍କର୍ଷ ବାହାରି ନଥିଲା । କୃଷି ଆଇନକୁ ସମ୍ପୂର୍ଣ୍ଣ ପ୍ରତ୍ୟାହାର ଜିଦରେ ଅଡି ବସିଥିଲେ ଚାଷୀ । ଶେଷରେ ସେମାନଙ୍କ ଆନ୍‌ଦୋଳନ ଆଗରେ ସରକାର ମୁଣ୍ଡ ନୁଆଁଇଛନ୍ତି । ୩ଟି ଯାକ ଆଇନ୍‌ ପ୍ରତ୍ୟାହାର ପାଇଁ ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

ନୂଆଦିଲ୍ଲୀ: ଭାରତରେ କିଛି ଦିନ ଧରି କ୍ରିପ୍ଟୋ କରେନ୍ସିକୁ ନେଇ ଚର୍ଚ୍ଚା ଜାରି ରହିଛି । ତେବେ କ୍ରିପ୍ଟୋ କରେନ୍ସିକୁ ନେଇ ଆଲୋଚନା ପରେ ଆଜି କ୍ରିପ୍ଟୋ କରେନ୍ସିକୁ ନେଇ ଚିନ୍ତା ପ୍ରକଟ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ବିଶ୍ବ ଗଣତାନ୍ତ୍ରିକ ରାଷ୍ଟ୍ରଗୁଡିକ କ୍ରିପ୍ଟୋ କରେନ୍ସି ଉପରେ ମିଳିତ ଭାବରେ କାର୍ଯ୍ୟ କରିବାକୁ କହିଛନ୍ତି ମୋଦି । ମୋଦି କହିଛନ୍ତି କି ଏହା ଭୁଲ ହାତରେ ଯେପରିର ନ ପଡ଼େ ସେଥିପ୍ରତି ଧ୍ୟାନ ଦେବାକୁ କହିଛନ୍ତି ମୋଦି । ତେବେ ଭାରତରେ କ୍ରିପ୍ଟୋ କରେନ୍ସି ପାଇଁ ଏକ ନୂଆ ନିୟମ ଉପରେ ଭାରତ କାର୍ଯ୍ୟ କରୁଛି ବୋଲି ମଧ୍ୟ କହିଛନ୍ତି ପ୍ରଧାନମନ୍ତ୍ରୀ ମୋଦି । ଭାରତରେ କିପରି କ୍ରିପ୍ଟୋ କରେନ୍ସି କିପରି ଆଗକୁ ବଢ଼ିବ ସେନେଇ ଆଲୋଚନା ହେବାର କିଛି ଦିନ ପରେ ପ୍ରଧାନମନ୍ତ୍ରୀ ମୋଦି ଅବ୍ୟବହୃତ କ୍ରିପ୍ଟୋ କରେନ୍ସି ବଜାରରେ ଅର୍ଥ ହେରଫେର ତଥା ଆତଙ୍କବାଦୀଙ୍କ ପାଇଁ ଆର୍ଥିକ ସହାୟତା ପାଲଟିଛି ।

ବର୍ତ୍ତମାନ ଟେକ୍ନୋଲୋଜି ଓ ତଥ୍ୟ ନୂଆ ଅସ୍ତ୍ରରେ ପରିଣତ ହୋଇଛି । ଏବଂ ଏହି ତଥ୍ୟ ଶାସନ ପାଇଁ ଗଣତାନ୍ତ୍ରିକ ରାଷ୍ଟ୍ରଗୁଡିକୁ ନିଶ୍ଚିତ ଭାବରେ ସାହାର୍ଯ୍ୟ କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି । ଉଦାହରଣ ସ୍ବରୂପ ଆମେ କ୍ରିପ୍ଟୋ କରେନ୍ସି ଓ ବିଟ୍ କଏନକୁ ନେଇ ପାରିବା । ଏହା ଗୁରୁତ୍ବପୂର୍ଣ୍ଣ ଯେ ଏହି କ୍ରିପ୍ଟୋ କରେନ୍ସି ଉପରେ ସମସ୍ତ ଗଣତାନ୍ତ୍ରିକ ରାଷ୍ଟ୍ର ଗୁଡିକ ମିଳିତ ଭାବରେ କାମ କରିବା ଜରୁରୀ । କାହିଁକି ନା ଯଦି ଏହା ଭୁଲ ହାତରେ ପଡ଼ିଯାଏ ତେବେ ଏହା ଆମ ଯୁବକମାନଙ୍କୁ ବରବାଦ୍ କରିଦେଇପାରେ ବୋଲି ସଡିନୀ ଡାଏଲୋଗରେ କହିଛନ୍ତି ନରେନ୍ଦ୍ର ମୋଦି ।

କ୍ରିପ୍ଟୋ କରେନ୍ସି ଉପରେ ଭାରତ ସରକାର ଏକ ନିୟାମକ ଉପରେ କାର୍ଯ୍ୟ କରୁଛନ୍ତି । ଯାହା ଦ୍ବାରା ଭାରତରେ କ୍ରିପ୍ଟୋ କରେନ୍ସିକୁ ସମ୍ପୂର୍ଣ୍ଣ ଭାବରେ ବ୍ୟାନ କରାଯିବ ନାହିଁ । ସରକାର କାରବାର ଓ ପେମେଣ୍ଟ କରିବା ପାଇଁ କ୍ରିପ୍ଟୋ କରେନ୍ସିକୁ ବ୍ୟାନ କରିପାରେ । କିନ୍ତୁ ସାଧାରଣ ଲୋକମାନେ ଏହାକୁ ସୁନା, ଅଶଂଧନ କିମ୍ବା ବଣ୍ଡ ପରି ସମ୍ପତ୍ତି ଭାବରେ ରଖିପାରିବେ ।

ଗତ ଶନିବାର କ୍ରିପ୍ଟୋ କରେନ୍ସିକୁ ନେଇ ପ୍ରଧାନମନ୍ତ୍ରୀ ଏକ ବୈଠକ କରିଥିଲେ । ଯେଉଁଥିରେ ରିର୍ଜଭ ବ୍ୟାଙ୍କ ଅଫ ଇଣ୍ଡିଆ, ଅର୍ଥ ମନ୍ତ୍ରଣାଳୟ ଓ ଗୃହ ମନ୍ତ୍ରଣାଳୟର ବିଶେଷଜ୍ଞ ଯୋଗ ଦେଇଥିଲେ । ଅତ୍ୟଧିକ ବିଜ୍ଞାପନ ଯୁବକମାନଙ୍କୁ ବିଭ୍ରାନ୍ତ କରିବାକୁ ଚେଷ୍ଟା ବନ୍ଦ କରାଯିବ ଆବଶ୍ୟକ ବୋଲି ବୈଠକରେ ଆଲୋଚନା ହୋଇଥିଲା ।ତେବେ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାଶ କହିଛନ୍ତି କି କ୍ରିପ୍ଟୋ କରେନ୍ସି ବାବଦରେ ଭାରତକୁ ଆହୁରି ଅଧିକ ଆଲୋଚନା କରିବା ଜରୁରୀ । ଯେତେବେଳେ କି କେନ୍ଦ୍ରୀୟ ବ୍ୟାଙ୍କ କହିସାରିଛି କି ମାଇକ୍ରୋ ଅର୍ଥନୈତିକ ଏବଂ ଆର୍ଥିକ ସ୍ଥିରତାକୁ ଦୃଷ୍ଟିରେ ରଖି ଆମକୁ ଏହା ଉପରେ ଗମ୍ଭୀର ଭାବରେ ଆଲୋଚନା କରିବାକୁ ପଡ଼ିବ ।

ତେବେ ଆଜି ପ୍ରଧାନମନ୍ତ୍ରୀ ତାଙ୍କ ଅଭିଭାଷଣରେ କହିଛନ୍ତି କି ଡିଜିଟାଲ ଯୁଗ ଆମ ଚାରି ପାଖରେ ସବୁକିଛି ବଦଳାଇ ଦେଉଛି । ରାଜନିତୀ, ଅର୍ଥନୀତି ଓ ସମାଜକୁ ଡିଜିଟାଲ ପୁନଃବ୍ୟାଖ୍ୟା କରିଛି । ସେ ଆହୁରି କହିଛନ୍ତି କି ଏହା ସର୍ବଭୌମତା, ଶାସନ, ନୈତିକତା, ଆଇନ, ଅଧିକାର ଓ ସୁରକ୍ଷା ଉପରେ ନୂଆ ପ୍ରଶ୍ନ ଉଠାଇଛି ।

ନୂଆଦିଲ୍ଲୀ: ଜାତୀୟ ଶିକ୍ଷା ନୀତିକୁ ଏକ ବର୍ଷ ପୁରିଛି। ଏକ ବର୍ଷ ପୂର୍ତ୍ତି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମ୍ବୋଧନ କରି କହିଛନ୍ତି ଯେ ଗତ ବର୍ଷକ ମଧ୍ୟରେ ଜାତୀୟ ଶିକ୍ଷା ନୀତିକୁ ନେଇ ବହୁ ନିଷ୍ପତ୍ତି ନିଆଯାଇଛି। ଗାଁ ଗାଁରେ ପ୍ଲେ ସ୍କୁଲ ଠାରୁ ଆରମ୍ଭ କରି ବିଭିନ୍ନ ଭାଷାରେ ଇଞ୍ଜିନିୟରିଂ ଶିକ୍ଷାକୁ ସବୁଜ ସଂକେତ ଦେଇଛନ୍ତି ମୋଦି ସରକାର । ମାତୃଭାଷା ଏବଂ ଆଞ୍ଚଳିକ ଭାଷାରେ ଉଚ୍ଚଶିକ୍ଷା ପାଇଁ ନୂଆ ଜାତୀୟ ଶିକ୍ଷାନୀତିରେ ବ୍ୟବସ୍ଥା ରହିଛି । ପ୍ରାଥମିକ ପର୍ଯ୍ଯାୟରେ ୮ଟି ରାଜ୍ୟର ୧୪ଟି ଇଞ୍ଜିନୟରିଂ କଲେଜରେ ୫ଟି ଭାଷାରେ ପାଠ ପଢାଯିବ ।

ନୂତନ ଜାତୀୟ ଶିକ୍ଷାନୀତିରେ ଆଞ୍ଚଳିକ ଭାଷାକୁ ଗୁରୁତ୍ୱ ଦେବାର ପ୍ରାବଧାନ ରହିଛି। ଏହି କ୍ରମରେ ଏଣିକି ଓଡ଼ିଆ ଭାଷାରେ ରାଜ୍ୟର ଛାତ୍ରଛାତ୍ରୀ ଉଚ୍ଚଶିକ୍ଷା ଓ ଟେକ୍ନିକାଲ୍‍ ଶିକ୍ଷା ଅଧ୍ୟୟନ କରିବେ। ଓଡ଼ିଆକୁ ମିଶାଇ ମୋଟ୍‍ ୧୧ଟି ଆଞ୍ଚଳିକ ଭାଷାରେ ଇଞ୍ଜିନିୟରିଂ ପଢ଼଼ାଯିବ। ହିନ୍ଦୀ, ମରାଠୀ, ତାମିଲ, ତେଲୁଗୁ, କନ୍ନଡ଼, ଗୁଜରାଟୀ, ମାଲାୟଲମ, ବଙ୍ଗଳା, ଅହମିୟା, ପଞ୍ଜାବୀ ଓ ଓଡ଼ିଆ ଭାଷାରେ ଛାତ୍ରଛାତ୍ରୀ ବି.ଟେକ୍‍ ପଢ଼଼ିବେ।ମାତୃଭାଷାରେ ପାଠ ପଢିଲେ ପିଲାଙ୍କ ଆତ୍ମବିଶ୍ୱାସ ବଢିବ । କିଛି ଏଭଳି ଲକ୍ଷ୍ୟ ନୂଆ ଶିକ୍ଷାନୀତିରେ ମାତୃଭାଷାରେ ପାଠପଢା ଉପରେ ଗୁରୁତ୍ୱ ଦିଆଯାଇଛି ।

ସେହିଭଳି ଶିକ୍ଷାନୀତିରେ ଭାରତୀୟ ସାଂକେତିକ ଭାଷା ସାମିଲ । ସାଂକେତିକ ଭାଷାକୁ ଏକ ବିଷୟ ଭାବେ ପଢିବେ ପିଲା ।ଏହାଦ୍ୱାରା ଭାରତୀୟ ସାଂକେତିକ ଭାଷାର ଉନ୍ନତି ହେବ । ମାଧ୍ୟମିକ ସ୍ତରରେ ଏକ ବିଷୟ ଭାବେ ରହିବ ସାଂକେତିକ ଭାଷା । ଯୁବପିଢୀ ପରିବର୍ତ୍ତନ ପାଇଁ ପୂରା ପ୍ରସ୍ତୁତ। ଯୁବପୀଢିଙ୍କୁ ସୁଯୋଗ ଦରକାର, ବନ୍ଧନରୁ ମୁକ୍ତି ଦରକାର । ନୂଆ ଶିକ୍ଷା ନୀତିକୁ ବେଶ ସହଜରେ ଗ୍ରହଣ କରିଛନ୍ତି ଛାତ୍ରଛାତ୍ରୀ ।

ବିଭିନ୍ନ କ୍ଷେତ୍ରରେ ଆଜି ଭାରତୀୟ ଯୁବକ ଉନ୍ନତି କରି ଚାଲିଛନ୍ତି। ଡିଜିଟାଲ ଦୁନିଆକୁ ନୂଆ ଗତି ଦେଉଛନ୍ତି ଆଜିର ଯୁବପିଢ଼ି। ପୂରା ଦେଶ ଯୁବକଙ୍କ ସାଥୀରେ ଥିବା ନୂଆ ଶିକ୍ଷା ନୀତି ସୂଚନା ଦେଉଛି। ଛାତ୍ରଛାତ୍ରୀ କେତେ ସମୟ ପଢ଼ିବେ, ଏହା ସେମାନେ ହିଁ ନିଜେ ସ୍ଥିର କରିବେ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ ଏବେ ସମସ୍ତ ଯୁବପିଢ଼ି ନିଜ ରୁଚିରେ ଯେକୌଣସି ପାଠ ପଢ଼ିବେ ଏବଂ ଛାଡ଼ି ମଧ୍ୟ ପାରିବେ। ନୂଆ ଶିକ୍ଷା ନୀତି ଭାରତର ଭାଗ୍ୟ ବଦଳାଇବାର ସାମର୍ଥ୍ୟ ରଖିଛି। ଆଗକୁ ଭଲ ପଢ଼ିବାକୁ ଭାରତୀୟ ଛାତ୍ରଛାତ୍ରୀ ବିଦେଶ ଯାଉଥିଲେ। ଏବେ ଭଲ ପଢ଼ିବାକୁ ବିଦେଶରୁ ଛାତ୍ରଛାତ୍ରୀ ଏବଂ ସଂସ୍ଥା ଭାରତକୁ ଆସୁଛନ୍ତି। ଆମ ଯୁବପିଢ଼ିଙ୍କୁ ଦୁନିଆଠାରୁ ଗୋଟିଏ ପାଦ ଆଗକୁ ଭାବିବାକୁ ପଡ଼ିବ। ଆଞ୍ଚଳିକ ଭାଷାରେ ଉଚ୍ଚଶିକ୍ଷା ପାଇଁ ଜାତୀୟ ଶିକ୍ଷା ନୀତିରେ ବ୍ୟବସ୍ଥା ରହିଛି। ୮ ରାତିରେ ୧୪ ଇଞ୍ଜିନିୟରିଂ କଲେଜରେ ୫ ଭାଷାରେ ପାଠ ପଢ଼ାଯିବ। ମାତୃଭାଷାରେ ପଢ଼ିଲେ ଗରିବ ପିଲାର ଆତ୍ମବିଶ୍ବାସ ବଢ଼ିବ। ଭାରତୀୟ ସାଙ୍କେତିକ ଭାଷାକୁ ଭାଷା ମାନ୍ୟତା କରାଯାଇଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରକାଶ କରିଛନ୍ତି।

ଭୁବନେଶ୍ୱର : କରୋନା ମୁକାବିଲା ନେଇ ଓଡ଼ିଶା ସହ ୬ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ। ବୈଠକରେ ସାମିଲ ହୋଇଛନ୍ତି ଓଡ଼ିଶା, ତାମିଲନାଡୁ, ଆନ୍ଧ୍ରପ୍ରଦେଶ, କର୍ଣ୍ଣାଟକ, ମହାରାଷ୍ଟ୍ର ଓ କେରଳ ମୁଖ୍ୟମନ୍ତ୍ରୀ । କିଛି ରାଜ୍ୟରେ ସଂକ୍ରମଣ ହାର ଅଧିକ ଥିବାରୁ ଏହା ଚିନ୍ତା ବଢାଇଛି ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟିକା କରଣ ଉପରେ ନିଜର ମତ ରଖିଛନ୍ତି । ଓଡ଼ିଶାରେ ସଠିକ୍ ଭାବେ ଟିକା କରଣ ହେଉଥିବା କହିଛନ୍ତି । ଓଡ଼ିଶାରେ ଘରୋଇ ଡାକ୍ତରଖାନା କମ୍ ଥିବା ବେଳେ କେନ୍ଦ୍ର ସରକାରଙ୍କ ସହିତ ହୋଇଥିବା ଯୋଗଯୋଗକୁ ଦୋହରାଇଛନ୍ତି । ତେବେ ଆବଣ୍ଟନକୁ ୯୫ ପ୍ରତିଶତ ବୃଦ୍ଧି କରିବାକୁ ଚିଠି କରାଯାିଛି । ସେହିଭଳି ତୃତୀୟ ଲହରରୁ ପିଲା ମାନଙ୍କୁ ବଞ୍ଚାଇବା ସହ ୧୨ରୁ ୧୮ବର୍ଷ ପିଲାମାନଙ୍କ ପାଇଁ ଟିକାକୁ ପ୍ରାଥମିକତା ଦିଆଯାଉଛି ।

ତୃତୀୟ ଲହର ମୁକାବିଲା ପାଇଁ ୪ଟି ଫର୍ମୁଲା ଉପରେ ଜୋର ଦେଇଛନ୍ତି ପ୍ରଧାନମନ୍ତ୍ରୀ। ଟେଷ୍ଟ, ଟ୍ରାକ୍‌, ଟ୍ରିଟ୍‌ ଓ ଟିକା ଉପରେ ରଣନୀତି କରିବାକୁ ଫୋକସ କରିଛନ୍ତି। ସଂକ୍ରମଣ ଅଧିକ ଥିବା ଅଞ୍ଚଳରେ ଟିକାକରଣ ଅତ୍ୟନ୍ତ ଜରୁରୀ। ଏହାସହ ପ୍ରାଥମିକ ସଂକ୍ରମଣ ଚିହ୍ନଟ ପାଇଁ ଆରଟିପିସିଆର ଟେଷ୍ଟ ବଢାଇବାକୁ ମଧ୍ୟ ସେ ଗୁରୁତ୍ୱ ଦେଇଛନ୍ତି।

ଭିଡିଓ କନଫରେନ୍ସିଂ ମାଧ୍ୟମରେ ମୁଖ୍ୟମନ୍ତ୍ରୀଙ୍କ ସହ କଥାବାର୍ତ୍ତା ବେଳେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ପିଲାମାନଙ୍କୁ କରୋନାରୁ ବଞ୍ଚାଇବା ପାଇଁ ସମସ୍ତ ପ୍ରସ୍ତୁତି କରିବାକୁ ପଡିବ। ଗତ ଦୁଇ ସପ୍ତାହ ମଧ୍ୟରେ ୟୁରୋପର ଦେଶରେ କରୋନା ବୃଦ୍ଧି ପାଉଛି, ଆମେରିକାରେ ମଧ୍ୟ ମାମଲା ବୃଦ୍ଧି ପାଉଛି। ଏହା ଆମ ପାଇଁ ଏକ ଚେତାବନୀ। ସର୍ବସାଧାରଣ ସ୍ଥାନରେ ଭିଡ଼ ବଢ଼ିବାକୁ ନେଇ ମଧ୍ୟ ପ୍ରଧାନମନ୍ତ୍ରୀ ଉଦବେଗ ପ୍ରକାଶ କରିଥିଲେ ଏବଂ ଏହାକୁ ବନ୍ଦ କରିବାକୁ ନିବେଦନ କରିଥିଲେ।