ଭୁବନେଶ୍ୱର: ଖୋର୍ଦ୍ଧା ଜିଲ୍ଲାରେ କାଲିଠୁ ସାଢ଼େ ୬ରୁ ସାଢ଼େ ୯ଟା ପର୍ଯ୍ୟନ୍ତ ସ୍କୁଲ୍‌ । ସମସ୍ତ ସରକାରୀ/ବେସରକାରୀ ସ୍କୁଲ, ଅଙ୍ଗନବାଡି କେନ୍ଦ୍ର ପାଇଁ ନିର୍ଦ୍ଦେଶ ଜାରି ହୋଇଛି । ହିଟ୍‌ ୱେଭ୍‌କୁ ଦେଖି ସ୍କୁଲ୍‌ ସମୟ ବଦଳାଇଛନ୍ତି ଜିଲ୍ଲାପାଳ । ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଏହି ନିୟମ ବଳବତ୍ତର ରହିବ ବୋଲି ଜଣାପଡିଛି । 

ଅସହ୍ୟ ଖରାରେ ଅସ୍ତବ୍ୟସ୍ତ ହେଲାଣି ଜନଜୀବନ । ଅଧିକାଂଶ ଜିଲ୍ଲାରେ ତାପମାତ୍ରା 40 ଡିଗ୍ରୀ ଟପିଲାଣି । ଏହି ସମୟରେ ପିଲେ ସ୍କୁଲ ଆସିବା କଷ୍ଟକର ହୋଇପଡିଛି । ଆଜି ଭୁବନେଶ୍ୱରରେ ତାପମାତ୍ରା 42 ଡିଗ୍ରୀ ଛୁଇଁଛି । ଏହାକୁ ଦୃଷ୍ଟିରେ ରଖି ସରକାର ବିଭିନ୍ନ ଜିଲ୍ଲାରେ ସ୍କୁଲ ବନ୍ଦ ଘୋଷଣା କରିଛନ୍ତି । 

ନୟାଗଡ: ମାଆ କୋଳକୁ ଫେରିଲା ନିଖୋଜ ୪ ମାସର ଶିଶୁପୁତ୍ର । ବାପା ରଚିଥିଲା ପୁଅ ଅପହରଣ ନାଟକ । ପିଲା ଚୋରି ନାଟକର ମୁଖ୍ୟ ଅଭିଯୁକ୍ତ ଥିଲା ଶିଶୁର ନିଜ ପିତା ପ୍ରଶାନ୍ତ ପ୍ରଧାନ। ଅଭିଯୋଗକାରୀ ତଥା ଶିଶୁ ପୁତ୍ରର ବାପା ପ୍ରଶାନ୍ତ ପ୍ରଧାନଙ୍କ ନିଜ ପୈତୃକ ଘର ନୟାଗଡ଼ ଜିଲ୍ଲା ରଣପୁର ଥାନା କଳାମାଟିଆରୁ ଶିଶୁପୁତ୍ରକୁ ଉଦ୍ଧାର କରିଛି ପୋଲିସ । ପ୍ରଶାନ୍ତ ପ୍ରଧାନକୁ GRP ପୋଲିସ ଅଟକ ରଖି ଅଧିକ ତଦନ୍ତ ଆରମ୍ଭ କରିଛି । ଗତକାଲି ଖୋର୍ଦ୍ଧା ରେଳ ମଣ୍ଡଳ ନିରାକାରପୁର ରେଳ ଷ୍ଟେସନରେ ସୋଇଥିବାବେଳେ ମା' କୋଳରୁ ୪ମାସର ଶିଶୁ ପୁତ୍ର ଚୋରୀ ହୋଇଥିବା ନେଇ ଅଭିଯୋଗ ହୋଇଥିଲା । 

ମିଳିଥିବା ସୂଚନା ଅନୁସାରେ, ପ୍ରଶାନ୍ତ କୁମାର ପ୍ରଧାନ ଜଣେ ବିବାହିତ ଯୁବକ ଓ ତାଙ୍କର ପୈତୃକ ଘରେ ପତ୍ନୀ ଥିଲେ ହେଁ ସେ ନିଜର ଶାଳୀଙ୍କୁ ଦ୍ୱିତୀୟ ବିବାହ କରି ପତ୍ନୀ ଭାବେ ଗ୍ରହଣ କରିଛନ୍ତି । ଦ୍ୱିତୀୟ ପତ୍ନୀ ଏହି ଶିଶୁ ପୁତ୍ରକୁ ଜନ୍ମ ଦେଇଥିଲେ । ଶିଶୁ ପୁତ୍ରର ବାପା ତଥା ଅଭିଯୋଗକାରୀ ହିଁ ଶିଶୁ ପୁତ୍ର ଚୋରି ତଥା ଅପହରଣ କରିବା ପରେ ବିଳମ୍ବିତ ରାତିରେ ନିଜ ପ୍ରଥମ ପତ୍ନୀକୁ ହସ୍ତାନ୍ତର କରିଥିଲା । ତେବେ ଏହି ଅପହରଣ ନାଟକ ପଛରେ କ'ଣ ରହିଛି ରହସ୍ୟ ତାହାର ଖୋଳତାଡ଼ ଆରମ୍ଭ କରିଛି ରେଳବାଇ ପୋଲିସ । 

ଖୋର୍ଦ୍ଧା: ମା' କୋଳରୁ ୪ ମାସର ଶିଶୁକୁ ଅପହରଣ କରିନେଲେ ଦୁର୍ବୃତ୍ତ । ଖୋର୍ଦ୍ଧାର ନିରାକାରପୁର ଷ୍ଟେସନ ୩ ନଂ ପ୍ଲାଟ୍‌ଫର୍ମରେ ଘଟିଛି ଏପରି ଅଘଟଣ । ରେଲୱେ ଷ୍ଟେସନରେ ଦମ୍ପତ୍ତି ଶୋଇଥିବାବେଳେ ମା' କୋଳରୁ ୪ ମାସର ଶିଶୁକୁ କେହି ଦୁର୍ବୃତ୍ତ ଅପହରଣ କରିନେଇଥିବା ଅଭିଯୋଗ ହୋଇଛି । ଅଭିଯୋଗକୁ ଭିତ୍ତିକରି GRP ପୋଲି ତଦନ୍ତ ଜାରି ରଖିଛି । 

ଖୋର୍ଦ୍ଧା: ଖୋର୍ଦ୍ଧା ଆଦର୍ଶ ଥାନା ଅନ୍ତର୍ଗତ ବିକାଶ ନଗରରେ ସେକ୍ସ ରାକେଟ ଠାବ । ରାଣୀ ମହୁମାଛି ସମେତ ୪ଦେହଜୀବୀ ଓ ୩ ପୁରୁଷ ଗ୍ରାହକ ଗିରଫ । ଏକ ଭଡ଼ା ଘରେ ଚାଲିଥିଲା ସେକ୍ସ ସ୍କାଣ୍ଡାଲ । ବିଶେଷ ସୂତ୍ରରୁ ଖବରପାଇ ଖୋର୍ଦ୍ଧା ଆଦର୍ଶ ଥାନା ପୋଲିସ ଓ ସ୍ପେସାଲ ସ୍କ୍ୱାର୍ଡ ଟିମ୍ ଚଢ଼ଉ କରିଥିଲା । ଚଢ଼ଉ ବେଳେ କିଙ୍ଗପିନ୍ ସମେତ ୪ ଦେହଜୀବୀ, ୩ ଜଣ ଗ୍ରାହକଙ୍କୁ ଗିରଫ କରିଛି ପୋଲିସ । ଗତ କିଛିଦିନ ଧରି ଏହି ଅଞ୍ଚଳରେ ଥିବା ଏକ ଭଡ଼ାଘରେ ସେକ୍ସ ସ୍କାଣ୍ଡାଲ ଚାଲିଥିଲା ବୋଲି ପୋଲିସ ଖବର ପାଇଥିଲା । 

ଭୁବନେଶ୍ବର : ୨୦୨୬ ଫେବୃୟାରୀ ୧୨ ସର୍ବଭାରତୀୟ ଧର୍ମଘଟକୁ ବିଜୁ ଶ୍ରମିକ ସାମୁଖ୍ୟର ସମର୍ଥନ । ଓଡିଶା ବିଜୁ ଶ୍ରମିକ ସାମୂଖ୍ୟର ଏକ ବୈଠକରେ ଖୋର୍ଦ୍ଧା ଜିଲ୍ଲା ସଭାପତି ନବକିଶୋର ମହାନ୍ତିଙ୍କ ସଭାପତିତ୍ବରେ ଅନୁଷ୍ଠିତ ହୋଇଥିଲା । କଟକ ମେୟର ତଥା ବିଜୁ ଶ୍ରମିକ ସାମୂଖ୍ୟ ମହାସଚିବ ସୁବାଷ ସିଂ, ଉପ-ସଭାପତି ପ୍ରଦ୍ୟୁମ୍ନ କୁମାର ସାମଲ, ସଂପାଦକ ଯୋଗେନ୍ଦ୍ର କୁମାର ସାଇଁ, ଶ୍ରୀ ବିକ୍ରମ ନାୟକ ପ୍ରମୂଖ ଉପସ୍ଥିତ ରହି ବିଭିନ୍ନ ସର୍ବଭାରତୀୟ ଟ୍ରେଡ୍ ୟୁନିୟନ ତରଫରୁ ୧୨ ଫେବୃୟାରୀ ସାଧାରଣ ଧର୍ମଘଟକୁ ସମ୍ପୂର୍ଣ ସହଯୋଗ ଓ ସମର୍ଥନ କରିବାକୁ ସ୍ଥିର କରିଛନ୍ତି ।

କେନ୍ଦ୍ର ସରକାର କର୍ପୋରେଟ୍ ସଂସ୍ଥା ମାନଙ୍କ ସ୍ବାର୍ଥରେ ଟ୍ରେଡ୍‌ୟୁନିୟନ ମାନଙ୍କର ଅଧିକାରକୁ ଛଡାଇନେବା ପାଇଁ ଚେଷ୍ଟା କରିଛନ୍ତି । ୪୨ଟି ଶ୍ରମ ଆଇନକୁ ରଦ୍ଦକରି ୪ଟି ଶ୍ରମ କୋର୍ଡରେ ବିଭକ୍ତକୁ ବିରୋଧ କରାଯାଇଛି । ଚାଷୀ ଫସଲର ଉପଯୁକ୍ତ ମୂଲସ୍ଥିର କରିବା, ଓଡିଶାରେ କଟନି ଛଟନି ଜରିଆରେ ମିଲ ମାଲିକ ମାନଙ୍କ ସାର୍ଥରେ ସରକାର କାମ କରିବା,ମୂଲ୍ୟବୃଦ୍ଧି ରୋକିବା ପଭୂତି ଦାବୀଗୁଡିକ ବି.ଏସ୍.ଏସ୍ ତରଫରୁ ବିରୋଧ କରାଯାଇଛି । ଯେ ପର୍ଯ୍ୟନ୍ତ ଦାବୀ ଗୁଡିକ ପୂରଣ ନହୋଇଛି, ଶ୍ରମ କୋର୍ଡ ବାତିଲ ନ ହୋଇଛି, ବିଜୁ ଶ୍ରମିକ ସାମୂଖ୍ୟ ତାର ଲଢେଇ ଜାରି ରଖିବ ବୋଲି ଖୋର୍ଦ୍ଧା ଜିଲ୍ଲା ସଭାପତି ଶ୍ରୀ ନବକିଶୋର ମହାନ୍ତି ଏକ ପ୍ରେସ୍ ବିବୃତିରେ ଜଣାଇଛନ୍ତି ।

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅନ୍ତର୍ଗତ ସାହାସପୁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ୯୯ ତମ ପ୍ରତିଷ୍ଠା ଦିବସ ଓ ବାର୍ଷିକ ପୁରଷ୍କାର ବିତରଣ ଉତ୍ସବ ପାଳିତ ହୋଇଯାଇଛି। ଏହି ଅବସରରେ ଭୁବନେଶ୍ଵରସ୍ଥିତ ପଟିଆ ରାଜା ମଧୁସୂଦନ ଦେବ ଡିଗ୍ରୀ କଲେଜର ଅଧ୍ୟାପକ ପ୍ରବୀଣ କୁମାର ସାହୁଙ୍କ ଅଧ୍ୟକ୍ଷତାରେ ଏକ ସଭା କାର୍ଯ୍ୟ ଅନୁଷ୍ଠିତ ହୋଇଯାଇଛି।

ଏଥିରେ ମୁଖ୍ୟ ଅତିଥି ଭାବେ ଅବସରପ୍ରାପ୍ତ ପ୍ରଧାନଶିକ୍ଷକ ଗୋଲାକ ବିହାରୀ ଦଳବେହେରା, ମୁଖ୍ୟ ବକ୍ତା ଭାବେ ବାଣପୁର ବ୍ଲକ ସିଆରସିସି ପ୍ରମୋଦ କୁମାର ପାତ୍ର, ସମ୍ମାନିତ ଅତିଥି ଭାବେ ବିଭୁତି ଭୂଷଣ ଦାସ, ଅନନ୍ତ ଚରଣ ଖଟେଇ, ବିଶ୍ଵନାଥ ନାୟକ, କଲ୍ୟାଣୀ ସାହୁ, ରଘୁନାଥ ମହାରଣା ଯୋଗଦେଇଥିଲେ।

ପ୍ରାରମ୍ଭରେ ବିଦ୍ୟାଳୟର ଶିକ୍ଷକ ମାନସ ରଞ୍ଜନ ହୋତାଙ୍କ ସଂଯୋଜନା ପରେ ପ୍ରଧାନଶିକ୍ଷକ ସୋମନାଥ ପ୍ରଧାନ ଅତିଥିମାନଙ୍କର ପରିଚୟ ପ୍ରଦାନ ଓ ବାର୍ଷିକ ବିବରଣୀ ପଠନ କରିଥିଲେ। ଏହା ସହିତ ପ୍ରଧାନ ଶିକ୍ଷକଙ୍କ ଦ୍ଵାରା ସ୍ଵାଗତ ଅଭିଭାଷଣରେ ଆସନ୍ତା ବର୍ଷ ବିଦ୍ୟାଳୟର ଶତ ବାର୍ଷିକୀ ଉତ୍ସବ ପାଳନ ସମ୍ପର୍କରେ ନିଜର ମତ ରଖିଥିଲେ।ସମ୍ମାନିତ ଅତିଥିମାନେ ନିଜ ନିଜର ବକ୍ତବ୍ୟରେ ଛାତ୍ରଛାତ୍ରୀମାନେ କିପରି ଏକ ସୁନ୍ଦର ଭବିଷ୍ୟତ ଗଠନ କରିପାରିବେ ଏବଂ ସମାଜରେ ନିଜକୁ ପ୍ରତିଷ୍ଠା କରିପାରିବେ, ତାହା ଉପରେ ଆଲୋକପାତ କରିଥିଲେ।

ଛାତ୍ରଛାତ୍ରୀମାନେ ବିଭିନ୍ନ ସରକାରୀ ଯୋଜନା ଦ୍ଵାରା କିପରି ଉପକୃତ ହୋଇପାରିବେ, ତାହା ଉପରେ ମୁଖ୍ୟ ବକ୍ତା ନିଜର ବକ୍ତବ୍ୟ ରଖିଥିଲେ।

ସେହିଭଳି ମୁଖ୍ୟ ଅତିଥି ନିଜ ଅଭିଭାଷଣରେ ଛାତ୍ରଛାତ୍ରୀମାନେ କିଭଳି ସର୍ବାଙ୍ଗୀନ ଉନ୍ନତି କରିପାରିବେ, ତାହା ଉପରେ ପରାମର୍ଶ ଦେଇଥିଲେ। ପରେ ସଭାପତି ଆସନ୍ତା ବର୍ଷ ଶତ ବାର୍ଷିକୀ ଉତ୍ସବ କିଭଳି ଧୁମଧାମରେ ପାଳନ କରାଯାଇପାରିବ ଏବଂ ଗ୍ରାମବାସୀଙ୍କ ସହଯୋଗରେ ଏହାକୁ ଓଡିଶାର ଏକ ସ୍ମରଣୀୟ ଉତ୍ସବ କରିପାରିବା ବୋଲି ନିଜର ବକ୍ତବ୍ୟ ରଖିଥିଲେ।ଏହି ଅବସରରେ ପ୍ରାୟ ୩୩ ବିଭାଗର ୧୦୦ ପ୍ରତିଯୋଗୀଙ୍କୁ ମାନପତ୍ର ସହ ଟ୍ରଫି ପ୍ରଦାନ କରଯାଇଥିଲା।

ଏହି କାର୍ଯ୍ୟକ୍ରମକୁ ବିଦ୍ୟାଳୟର ପ୍ରଧାନଶିକ୍ଷକ ସୋମନାଥ ପ୍ରଧାନ, ସତ୍ୟ ନାରାୟଣ ପ୍ରଧାନ, ମାନସ ରଞ୍ଜନ ହୋତା, ପୂର୍ଣ୍ଣ ଚନ୍ଦ୍ର ପଣ୍ଡା, ଶୁଭଲକ୍ଷ୍ମୀ କାଣ୍ଡି, ପ୍ରଜ୍ଞାପରମିତା ନାୟକ, ସୁରଞ୍ଜିକା ବେହେରାଙ୍କ ସମେତ ସମସ୍ତ ଶିକ୍ଷକ ଓ ଶିକ୍ଷୟତ୍ରୀମାନେ ପରିଚାଳନା କରିଥିଲେ। ଶିକ୍ଷକ ମାନସ ରଞ୍ଜନ ହୋତା ଧନ୍ୟବାଦ ଅର୍ପଣ କରିଥିବା ବେଳେ ସଭାର ସଭାପତିଙ୍କ ଦ୍ଵାରା ସଭା ସାଙ୍ଗ କରାଯାଇ ଛାତ୍ରଛାତ୍ରୀମାନଙ୍କ ଦ୍ଵାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା।

ଖୋର୍ଦ୍ଧା: ଗୁଳିମାଡରେ ବ୍ୟବସାୟୀଙ୍କ ମୃତ୍ୟୁ। ବେଗୁନିଆ ଥାନା ଅନ୍ତର୍ଗତ ପରିଛଳ ଜାମୁସହିରେ ଘଟିଛି ଗୁଳିକାଣ୍ଡ । ମୃତ ବ୍ୟକ୍ତିଙ୍କ ନାମ ବାସୁଦେବ ପରିଡ଼ା ଓରଫ ଟୁଟୁ। ଗତକାଲି ରାତିରେ ବାସୁଦେବ ପରିଡ଼ାଙ୍କୁ ଗୁଳି କରି ହତ୍ୟା କରିଥିଲେ ଦୁର୍ବୃତ୍ତ । ତାଙ୍କର ଛାତି ଓ ମୁଣ୍ଡରେ ଦୁଇ ରାଉଣ୍ଡ ଗୁଳି ବାଜିଛି। ଖୋର୍ଦ୍ଧା ମେଡିକାଲରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ଘଟଣାସ୍ଥଳରେ ଖୋକା ପଡ଼ିଛି । ଦୁର୍ବୃତ୍ତ ମାନେ ଏକ ବାଇକରେ ଆସି ଫାୟରିଂ କରି ଫେରାର ହୋଇଯାଇଛନ୍ତି । ପୋଲିସର ତଦନ୍ତ ଜାରି ରହିଛି । ବେଆଇନ ଖଣି କାରବାର ଘଟଣାକୁ ନେଇ ଏହି ଗୁଳିକାଣ୍ଡ ହୋଇଛି ବୋଲି ସ୍ଥାନୀୟ ଲୋକେ ଅନୁମାନ କରିଛନ୍ତି ।

ସୂଚନା ଅନୁସାରେ, ସୋମବାର ରାତି ପ୍ରାୟ ୮ଟାରେ ଦଲକ ଗାଁ ନିକଟ ଏକ ସ୍ଥାନରେ କେହି ଦୁର୍ବୃତ୍ତ ବାସୁଦେବଙ୍କୁ ଦୁଇ ରାଉଣ୍ଡ ଗୁଳି ଚାଳନା କରି ଫେରାର୍ ହୋଇଯାଇଥିଲା । ତାଙ୍କ ଛାତିରେ ଗୋଟିଏ ଏବଂ ମୁଣ୍ଡରେ ଗୁଳି ବାଜିଥିଲା । ସ୍ଥାନୀୟ ଲୋକେ ତାଙ୍କୁ ରାତି ପ୍ରାୟ ୯ଟାରେ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ। ଡାକ୍ତର ମୃତ ଘୋଷଣା କରିଥିଲେ । ଖବରପାଇ ବେଗୁନିଆ ପୁଲିସ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛି। ତଦନ୍ତ ସମୟରେ ଘଟଣାସ୍ଥଳରେ ଗୋଟିଏ ଖୋକା ଏବଂ ଏକ ବୁଲେଟ୍ ଗାଡ଼ି ଥୁଆ ହୋଇଥିବା ପୁଲିସ ଦେଖିବାକୁ ପାଇଛି। ତେଣୁ ୨ ଦୁର୍ବୃତ୍ତ ବୁଲେଟ୍ ଆସି ଗୁଳିମାଡ଼ ପରେ ଧରାପଡ଼ିବା ଭୟରେ ବୁଲେଟ୍ ଛାଡ଼ି ଫେରାର ହୋଇଯାଇଥିବା ସ୍ଥାନୀୟ ଲୋକେ ଅନୁମାନ କରିଛନ୍ତି ।

ଖୋର୍ଦ୍ଧା: ଶେଷରେ ଗିରଫ ହେଲେ ରସିକିଆ କଲେଜ ଅଧ୍ୟକ୍ଷ । ବୋଲଗଡ଼ ପରମାନନ୍ଦ ମହାବିଦ୍ୟାଳୟ ଅଧ୍ୟକ୍ଷ ପ୍ରଦୀପ୍ତ ଦାସଙ୍କୁ ଗିରଫ କଲା ପୋଲିସ । ଜଣେ ଅଧ୍ୟାପିକାଙ୍କୁ ଅଶ୍ଳୀଳ ମେସେଜ ପଠାଇ ପ୍ରେମ ନିବେଦନ କରିଥିଲେ ମହାବିଦ୍ୟାଳୟ ସମ୍ପୃକ୍ତ ଅଧ୍ୟକ୍ଷ ଜଣକ । ଏ ନେଇ ଅଧ୍ୟାପିକାଙ୍କ ବାପା ବୋଲଗଡ଼ ଥାନାରେ ମଙ୍ଗଳବାର ଏତଲା କରିଥିଲେ । ତଦନ୍ତ ଆଧାରରେ କଲେଜର ଅଧ୍ୟକ୍ଷଙ୍କୁ ଗିରଫ କରିବା ପରେ କୋର୍ଟ ଚାଲାଣ କରିଛି ବୋଲଗଡ଼ ପୋଲିସ ।

ସୂଚନା ଅନୁସାରେ, କିଛି ମାସ ତଳେ ରସାୟନ ବିଭାଗରେ ନିଯୁକ୍ତି ପାଇଥିବା ଜଣେ ଅଧ୍ୟାପିକାଙ୍କ ଫୋନକୁ ଅଧ୍ୟକ୍ଷ ଭଏସ ମେସେଜ ଜରିଆରେ ପ୍ରେମ ନିବେଦନ କରିବା ସହିତ ଅଶ୍ଳୀଳ ବାର୍ତ୍ତା ଦେଇଥିଲେ । ଏଥିରେ ଅଧ୍ୟାପିକା ଜଣକ ମାନସିକ ଆଘାତ ପାଇ ବାପାଙ୍କୁ ଜଣାଇଥିଲେ । ଏହାପରେ ଅଧ୍ୟାପିକାଙ୍କ ବାପା ବୋଲଗଡ଼ ଥାନାରେ ଏତଲା ଦେଇଥିଲେ । ଆଜି ସମ୍ପୃକ୍ତ ଅଧ୍ୟକ୍ଷଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି ।

ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ବୋଲଗଡ଼ ସ୍ଥିତ ପରମାନନ୍ଦ ମହାବିଦ୍ୟାଳୟରେ ଦେଖିବାକୁ ମିଳିଛି ଅଭାବନୀୟ ଘଟଣା। ଅଧ୍ୟାପିକାଙ୍କୁ କଲେଜ ଅଧ୍ୟକ୍ଷ ପ୍ରେମ ନିବେଦନ କରିବା ମହଙ୍ଗା ପଡ଼ିଛି। ରସିକିଆ ଅଧ୍ୟକ୍ଷଙ୍କ ଅଧ୍ୟାପିକାଙ୍କୁ ପ୍ରେମ ନିବେଦନ କରି ମୋବାଇଲ ବିଭିନ୍ନ ପ୍ରକାର ଅଶ୍ଳୀଳ ବାର୍ତ୍ତା ପଠାଉଥିଲେ। କେବଳ ଭଏସ ମେସେଜ ନୁହେଁ କଲେଜରେ କ୍ଲାସ କଲାବେଳେ ଫୋନ କରି ଭିଡିଓ କଲ କରିବାକୁ ନିବେଦନ ମଧ୍ଯ କରୁଥିଲେ। କିଛି ମାସ ତଳେ ରସାୟନ ବିଭାଗରେ ନିଯୁକ୍ତି ପାଇଥିବା ଜଣେ ଯୁବତୀଙ୍କ ଫୋନକୁ ଉକ୍ତ କଲେଜର ଅଧ୍ୟକ୍ଷଙ୍କ ମେସେଜ ବର୍ତ୍ତମାନ ଏକ ଚର୍ଚ୍ଚାର ବିଷୟ ପାଲଟିଛି। ଯୁବତୀ ଜଣଙ୍କ ମାନସିକ ସ୍ତରରେ ଆଘାତ ପାଇ ନିଜ ବାପାମାଆଙ୍କୁ ଜଣାଇବା ପରେ ବାପା ବୋଲଗଡ଼ ଥାନାରେ ଏତଲା ଦେଇଛନ୍ତି।

ଯୁବତୀର ବାପାଙ୍କ ଅଭିଯୋଗ ଆଧାରରେ ରହିଛି ଯେ, ତାଙ୍କ ଝିଅକୁ ଉକ୍ତ କଲେଜର ଅଧ୍ୟକ୍ଷ ବିଭିନ୍ନ ପ୍ରକାରର ଅଶ୍ଳୀଳ ମେସେଜ ଦେଇ ପ୍ରେମ ନିବେଦନ କରିଛନ୍ତି। ଭଏସ ମେସେଜରେ ମଧ୍ୟ ବିଭିନ୍ନ ପ୍ରକାରର ଅଶ୍ଳୀଳ କଥା କହିଛନ୍ତି। ଶିକ୍ଷା ଅନୁଷ୍ଠାନ ଭଳି ପବିତ୍ର ଅନୁଷ୍ଠାନରେ ଏ ପ୍ରକାର ଘଟଣାକୁ ନେଇ କଲେଜରେ ଝିଅ, ମହିଳାଙ୍କ ସୁରକ୍ଷାକୁ ନେଇ ଦାବି କରିଛନ୍ତି ଅଧ୍ୟାପିକାଙ୍କ ବାପା ସୁଧୀର କୁମାର ନିଶଙ୍କ।

ଭୁବନେଶ୍ୱର: ରାଜଧାନୀ ଉପକଣ୍ଠରୁ ଲୁଟ୍‌‌ ହେଉଛି ଲଘୁ ଖଣିଜ ଦ୍ରବ୍ୟ। ସଞ୍ଜ ନଇଁଲେ ସକ୍ରିୟ ହେଉଛନ୍ତି ଖଣି ମାଫିଆ। ରାତି ସାରା ଲୁଟ୍‌‌ ହେଉଛି ଲଘୁ ଖଣିଜ ଦ୍ରବ୍ୟ। ଭୁବନେଶ୍ୱର, ଖୋର୍ଦ୍ଧା ଓ ଜଟଣୀ ତହସିଲ ଅଧୀନସ୍ଥ ବିଭିନ୍ନ ମୌଜାରୁ ମୋରମ୍‌‌ ଓ ମାଙ୍କଡ଼ା ପଥର ବୋହି ନେଉଛନ୍ତି। ଅନାବାଦି ଠାରୁ ଆରମ୍ଭ କରି ଜଙ୍ଗଲ କିସମର ଜମି ପର୍ଯ୍ୟନ୍ତ କିଛି ବି ମାଫିଆଙ୍କ ଲୋଲୁପ ଦୃଷ୍ଟିରୁ ବାଦ୍‌‌ ପଡୁନାହିଁ। ଯେଉଁଠି ପାରୁଛନ୍ତି ସେଇଠୁ ଖୋଳୁଛନ୍ତି। ମୋରମ ଓ ମାଙ୍କଡ଼ା ପଥର ପାଇଁ ଶହ ଶହ ଗଛ କାଟି ସଫା କରି ଦେଉଛନ୍ତି। ମନଇଛା ଖନନ ହେଉଥିବାର ଖାଲ ସୃଷ୍ଟି ହେବା ସହ କୋଟିକୋଟି ଟଙ୍କାର ରାଜସ୍ୱ ହରାଉଛନ୍ତି ସରକାର। ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି, ଏହି ମୋରମ୍‌‌ ସାମ୍ରାଜ୍ୟ ଏବେ ଜେଲରୁ ଅପରେଟ ହେଉଛି। ଖୋର୍ଦ୍ଧା ସବ୍‌‌ ଜେଲରେ ରହିଥିବା ଜଣେ କୁଖ୍ୟାତ ଅପରାଧୀ ଏହି ବେପାରର ମଙ୍ଗ ଧରିଥିବା ଜଣାପଡ଼ିଛି। ଏସବୁ ସତ୍‌‌ୱେ ଖଣି ବିଭାଗ ପକ୍ଷରୁ ଧରପଗଡ଼ ହେଉ ନ ଥିବା ଅଭିଯୋଗ ହେଉଛି। ପୁଲିସର ନୀରବତା ପାଇଁ ଏଭଳି କାର୍ଯ୍ୟକଳାପ କ୍ରମେ ବଢ଼଼ିବାରେ ଲାଗିଛି। 

 ସୂଚନା ଅନୁସାରେ, ରାଜଧାନୀରୁ ଆରମ୍ଭ କରି ଜଟଣୀ ଓ ଖୋର୍ଦ୍ଧା ମଧ୍ୟରେ ଏକାଧିକ ସରକାରୀ ଓ ବେସରକାରୀ ପ୍ରକଳ୍ପ କାମ ଜାରି ରହିଛି। ଉକ୍ତ ପ୍ରକଳ୍ପ ଗୁଡ଼ିକରେ ପୋତା ପୋତି ଓ ଅନ୍ୟାନ୍ୟ କାମ ଲାଗି ପ୍ରଚୁର ମାଟି ଓ ମୋରମର ଆବଶ୍ୟକତା ରହିଛି। ଏହାର ସୁଯୋଗ ନେଇ ସକ୍ରିୟ ହୋଇ ଉଠିଛନ୍ତି ମୋରମ୍‌‌ ମାଫିଆ। ଦୁଇ ବର୍ଷ ପୂର୍ବେ ଏକ ହତ୍ୟାକାଣ୍ଡ ଘଟଣାରେ ଗିରଫ ହୋଇ ଜେଲରେ ଥିବା ଏହି ବ୍ରାଉନସୁଗର ବେପାରୀ ଏହି ସାମ୍ରାଜ୍ୟର ନେତୃତ୍ୱ ନେଉଛି। ତା’ର ସହଯୋଗୀମାନେ ଏବେ ରାଜଧାନୀ ଉପକଣ୍ଠରେ ସକ୍ରିୟ ରହିଛନ୍ତି। ଏକାଧିକ ଜେସିବିରେ ଖଣି ଖନନ କରି ହାଇୱାରେ ମୋରମ୍‌‌ ଚାଲାଣ କରୁଛନ୍ତି। ବିଶେଷକରି ଇନଫୋଭ୍ୟାଲି, ଚନ୍ଦକା, ମଦନପୁର ପଞ୍ଚାୟତରେ ମାତିଛନ୍ତି ମୋରମ୍‌‌ ମାଫିଆ। ବିଶେଷକରି ଇନଫୋଭ୍ୟାଲି ଓ ଚନ୍ଦକା ଥାନା ଅଞ୍ଚଳକୁ ଏବେ ସେମାନେ ଟାର୍ଗେଟ କରିଛନ୍ତି। ସଞ୍ଜ ନଇଁବା ମାତ୍ରେ ଆରମ୍ଭ ହୋଇଯାଉଛି ଖଣି ଖନନ। ଆଉ ରାତି ୧୧ ପରେ ପୁଲିସ ପ୍ରଶାସନର ଆଖିରେ ଆଙ୍ଗୁଠି ଖେଞ୍ଚି ଶହ ଶହ ଟ୍ରିପ୍‌‌ ମୋରମ୍‌‌ ବୋହି ନେଉଛନ୍ତି। ସରକାର ରାଜସ୍ୱ ହରାଉଥିବା ବେଳେ ଜେଲରେ ବସି ମଧ୍ୟ ଲକ୍ଷ ଲକ୍ଷ ଟଙ୍କା କମାଉଛି ହତ୍ୟା ଅଭିଯୁକ୍ତ।

 ଏହା ବାଦ୍‌‌ ଜଟଣୀ, ଖୋର୍ଦ୍ଧା ଓ ଶିଳ୍ପାଞ୍ଚଳ ଥାନା ଅଞ୍ଚଳରେ ଥିବା ଖଣିଗୁଡ଼ିକ ମଧ୍ୟ ମାଫିଆଙ୍କ ଲୋଲୁପ ଦୃଷ୍ଟିରୁ ବାଦ୍‌‌ ପଡ଼ିନାହିଁ। ଅଳକର, ମଧୁପୁର, ଚନ୍ଦକା ଅଭୟାରଣ୍ୟ, ପାଇକରାପୁର, ଦେଉଳିଆ ପାଟଣା, ଛତାବର, ଗଙ୍ଗପଡ଼ା, ପଳାସପୁର, ପିତାପଲ୍ଲୀ, ଅରାଙ୍ଗ, ନିଆଳ, କୁମାରବସ୍ତ, ଷଣ୍‌‌ଢପୁର, ରାମଚନ୍ଦ୍ରପୁର, ଖୁଦୁପୁର, କୁସୁମାଟି, ଛଣଘର, ରଥିପୁର, କନ୍ତିଆ, ନିରଞ୍ଜନପୁର, ଜାମୁକୋଳି, ପାଣ୍ଡିଆବିଲି, ବୁଢାଙ୍ଗରା, ପୁବୁସାହି ଓ ବରସାହି ଆଦି ମୌଜାରେ ମାଫିଆମାନେ ଏବେ ବେଶ୍‌‌ ସକ୍ରିୟ। ପ୍ରତିଦିନ ଏହି ଅଞ୍ଚଳରୁ ମୋରମ୍‌‌ ଓ ମାଙ୍କଡ଼ା ପଥର ଚାଲାଣ ହେଉଛି। ପୂର୍ବାପେକ୍ଷା ସ୍ଥାନୀୟ ଅଞ୍ଚଳରେ ବେଆଇନ ମୋରମ ଖଣି ସଂଖ୍ୟା ପୂର୍ବାପେକ୍ଷା ଯଥେଷ୍ଟ ବୃଦ୍ଧି ପାଇଛି। ମୋରମ ଲାଗି ଶହ ଶହ ସଂଖ୍ୟାରେ ଗଛ କାଟି ଦେଉଛନ୍ତି। ଜମି ଗୁଡ଼ିକୁ ସଫା କରି ସେଠାରୁ ଶହ ଶହ ଟ୍ରିପ ମୋରମ ଖନନ ହେଉଛି। ଏକାଧିକ ହାଇୱା ଗାଡ଼ି ମାଧ୍ୟମରେ ମୋରମ ଚୋରା ଚାଲାଣ ହେଉଛି। ଅନାବାଦି ଠାରୁ ଆରମ୍ଭ କରି ଜଙ୍ଗଲ କିସମର ଜମି ପର୍ଯ୍ୟନ୍ତ, କିଛି ବି ସେମାନଙ୍କ କବଳରୁ ବାଦ୍‌‌ ପଡ଼ୁନାହିଁ। ମନଇଛା ଖନନ ହେଉଥିବାର ଖାଲ ସୃଷ୍ଟି ହେବା ସହିତ ସରକାର କୋଟିକୋଟି ଟଙ୍କାର ରାଜସ୍ୱ ହରାଉଛନ୍ତି। ସବୁ ଜାଣି ମଧ୍ୟ ପୁଲିସ ହାତ ଟେକି ଦେଇଥିବା ବେଳେ ଖଣି ବିଭାଗର ନୀରବତା ମାଫିଆମାନଙ୍କୁ ପରୋକ୍ଷରେ ବେଆଇନ କାମ କରିବାକୁ ପ୍ରୋତ୍ସାହନ ଦେଉଥିବା ଅଭିଯୋଗ ହେଉଛି।

ଭୁବନେଶ୍ବର: ଖୋର୍ଦ୍ଧା ଜିଲ୍ଲା ବାଘମାରୀରେ ନାବାଳିକାକୁ ଗଣଦୁଷ୍କର୍ମ ଘଟଣା। ଉକ୍ତ ନାବାଳିକାଙ୍କୁ ଆଜି ଭେଟିଛନ୍ତି ବିଜେଡି ପ୍ରତିନିଧି ଟିମ୍। ସେମାନେ ନାବାଳିକାଙ୍କୁ କ୍ୟାପିଟାଲ ହସ୍ପିଟାଲର ସଖୀ ୱାର୍ଡରେ ଭେଟି ସ୍ୱାସ୍ଥ୍ୟ ଅବସ୍ଥା ବୁଝି ଥିଲେ। ପୀଡିତାଙ୍କୁ ଦୁଷ୍କର୍ମ ପରେ ଅତ୍ୟାଚାର କରାଯାଇଥିବାରୁ ଦେହସାରା ମାଡ଼ର ଦାଗ ଦେଖିବାକୁ ପାଇଥିଲେ ବିଜେଡି ଟିମ। ଅଭିଯୁକ୍ତଙ୍କ ମଧ୍ୟରୁ ଜଣାଙ୍କୁ ପୀଡିତା ଚହ୍ନି ଥିବା ନେଇ ପୁଲିସକୁ ଜଣାଇଥିଲେ। ହେଲେ ସେହି ବ୍ୟକ୍ତି ଭଲ ଲୋକ କହି ପୀଡିତାଙ୍କ ଅଭିଯୋଗକୁ ପୁଲିସ ଗ୍ରହଣ କରି ନ ଥିବା ଅଭିଯୋଗ ହୋଇଛି। ପୋଲିସ ତଦନ୍ତ ବଦଳରେ ଅଭିଯୁକ୍ତଙ୍କୁ କିପରି ସାର୍ଟିଫିକେଟ ଦେଲେ ବୋଲି ବିଜେଡି ପ୍ରଶ୍ନ କରିଛି। ବିଜେପି ସରକାରରେ ମହିଳା, ଶିଶୁ, ଦଳିତ ଅସୁରକ୍ଷିତ ହୋଇ ପଡିଲେଣି। ପୀଡିତାଙ୍କୁ ଉତ୍ତମ ସ୍ୱାସ୍ଥ୍ୟ ସେବା ପାଇଁ କ୍ୟାପିଟାଲ ହସ୍ପିଟାଲ ଅଧିକ୍ଷିକଙ୍କ ସହ ବିଜେଡି ଆଲୋଚନା କରିଛି। ସେପଟେ ପୀଡିତାଙ୍କୁ ନ୍ୟାୟ ଓ ଅଭିଯୁକ୍ତ ଧରା ନ ପଡିଲେ ରାଜରାସ୍ତାକୁ ଆସିବାର ଚେତାବନୀ ଦେଇଛି ବିଜୁ ଜନତା ଦଳ।

ଭୁବନେଶ୍ୱର: ପାଠ ପଢ଼଼ା ବସୟରେ ଜୀବନ ବିତୁଛି ରୋଷେଇ ଘରେ ତ ଆଉ ହାକାର ବିଭିନ୍ନ ହୋଟେଲର ପାକଶାଳାରେ। ସେହିପରି କେତେକ ଇଟ୍ଟା ଭାଟି ଭିତରେ ନିଜର ଭିବଷ୍ୟତକୁ ଜାଳି ଦେଉଛନ୍ତି ତ କେହି ରେଳ ଷ୍ଟେସନରେ ଭିକ୍ଷାବୃତ୍ତି କରିବାକୁ ବାଧ୍ୟ ହେଉଛନ୍ତି। ସଚେତନତାର ଘୋର ଅଭାବ ଓ ସରକାର ଉଦାସିନତା ଅଭାବରୁ ଆସନ୍ତା କାଲିର ଭବିଷ୍ୟତ କୁହାଯାଉଥିବା ଶିଶୁମାନେ ଶ୍ରମିକ ପାଲଟିଛନ୍ତି। ସେହିପରି ପରିବାର ଆର୍ଥିକ ଚାପ ଯୋଗୁଁଁ ମଧ୍ୟ ଏଭଳି ପଥକୁ ଆପଣାଉଛନ୍ତି କୁନି କୁନି ପିଲାମାନେ। ଫଳସ୍ୱରୂପ, ଦିନକୁ ଦିନ ଉତ୍କଟ ରୂପ ନେଉଛି ଶିଶୁ ଶ୍ରମିକଙ୍କ ସ୍ଥିତି। ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଉପାନ୍ତ ଅଞ୍ଚଳରୁ ଅଭିଭାବକଙ୍କୁ ଅର୍ଥ ପ୍ରଲୋଭନ ଦେଖାଇ ଗରିବ ଶିଶୁମାନଙ୍କୁ ଆଣି ଦଲାଲ୍‌‌ ମାନେ ରାଜଧାନୀରେ ବିଭିନ୍ନ କାମରେ ନିୟୋଜିତ କରୁଛନ୍ତି। ତେବେ ଚାଇଲ୍ଡ ଲେବର ପ୍ରୋହିବିସନ୍‌‌ ଆକ୍ଟ-୨୦୧୬ ନିୟମକୁ ଉଲ୍ଲଙ୍ଘନ କରାଯାଉଥିଲେ ମଧ୍ୟ ସରକାରୀ ସ୍ତରରେ କୌଣସି ଆଖିଦୃଶିଆ ପଦକ୍ଷେପ ନିଆଯାଉ ନଥିବା ସହ ଏହା ପଛରେ ରହିଥିବା ମାଷ୍ଟରମାଇଣ୍ଡ୍‌‌କୁ ଧରିବାରେ ପ୍ରଶାସନ ବିଫଳ ହୋଇଥିବା କୁହାଯାଉଛି।

ସୂଚନା ଅନୁସାରେ, ରାଜଧାନୀର କିଛି ଦଲାଲ୍‌‌ ମାନେ ରାଜ୍ୟର ବିଭିନ୍ନ ସ୍ଥାନରୁ ଶିଶୁମାନଙ୍କୁ ଆଣି ରାଜଧାନୀରେ ହୋଟେଲ, ଗ୍ୟାରେଜ୍‌‌ରେ ନିଯୁକ୍ତି କରାଇବା ସହ ଭିକ୍ଷାବୃତ୍ତିରେ ମଧ୍ୟ ବ୍ୟବହାର କରୁଛନ୍ତି। ପ୍ରତିଦିନ ଗରିବ ଅସହାୟ ପିଲାମାନଙ୍କୁ ଇଟାଭାଟି, ଖଣିଖାଦନ, ହୋଟେଲ କିମ୍ବା ବଡ଼ବଡ଼ିଆଙ୍କ ଘରେ ଖଟାଉଛନ୍ତି। ଏପଟେ ପିଲାମାନଙ୍କୁ ପାଠପଢ଼଼ା ପ୍ରତି ଆକୃଷ୍ଟ କରିବାକୁ ସରକାରୀ ବିଦ୍ୟାଳୟ ଗୁଡ଼ିକରେ ମାଗଣାରେ ୟୁନିଫର୍ମ, ପାଠ୍ୟ ଉପକରଣ ସାଙ୍ଗକୁ ସ୍ୱାସ୍ଥ୍ୟର ଉନ୍ନତି ପାଇଁ ପୁଷ୍ଟିକର ଖାଦ୍ୟ ମଧ୍ୟ ଯୋଗାଇ ଦିଆଯାଉଛି। ଏସବୁ ପରେ ମଧ୍ୟ ପାଠ ପଢ଼଼ିବା ବଦଳରେ ବିଭିନ୍ନ କ୍ଷେତ୍ରରେ ଶ୍ରମିକ ପାଲଟୁଛନ୍ତି ହଜାର ହଜାର ଶିଶୁ। ଉଦାହରଣ ସ୍ୱରୂପ ନିୟମିତ ଭାବେ ରାଜଧାନୀରୁ ଉଦ୍ଧାର ହେଉଛନ୍ତି ଶିଶୁ ଶ୍ରମିକ। ତେବେ ୨୦୨୪(ମାର୍ଚ୍ଚ)-୨୫(ମାର୍ଚ୍ଚ)ବର୍ଷରେ କେବଳ ଖୋର୍ଦ୍ଧା ଜିଲ୍ଲାରୁ ୯୫ଜଣ ଶିଶୁ ଶ୍ରମିକ ଉଦ୍ଧାର ହୋଇଥିବା ସୂଚନା ରହିଛି। ସେମାନଙ୍କ ମଧ୍ୟରେ ୭୦ଜଣ ନାବାଳକ ରହିଥିବା ବେଳେ ୨୫ଜଣ ନାବାଳିକା ରହିଛନ୍ତି। ଏଥିମଧ୍ୟରୁ ୬୦ଟି କେସ୍‌‌ ର ଏଫଆଇଆର ହୋଇଥିବା ବେଳେ ୨୮ଟି ଜିଡି(ଜେନେରାଲ ଡାଏରୀ) ରହିଛି। ସେହିପରି ୨୦୨୫ ମସିହା ଏପ୍ରିଲ ମାସରୁ ଏପର୍ଯ୍ୟନ୍ତ ୬୩ଜଣ ଶିଶୁ ଶ୍ରମିକ ଉଦ୍ଧାର ହୋଇଥିବା ସୂଚନା ରହିଛି। ୨୦୨୩-୨୪ ବର୍ଷରେ ୫୩ ଜଣ ଶିଶୁ ଶ୍ରମିକ ଉଦ୍ଧାର କରାଯାଇଛି। ସେମାନଙ୍କ ମଧ୍ୟରୁ ୩୧ଜଣ ମାଲିକଙ୍କ ନାଁରେ ଏଫଆଇଆର୍‌‌ ହୋଇଥିବା ବେଳେ ୪ଟି ଜିଡି ହୋଇଛି। ତେବେ ଏହି ଶିଶୁ ଶ୍ରମିକ ମାନେ ବିଭିନ୍ନ ହୋଟେଲ, ବାବୁ ଘରେ କାମ କରୁଥିବା ସମୟରେ ଉଦ୍ଧାର ହୋଇଥିବା ଜଣାପଡ଼ିଛି। ଦାରିଦ୍ର୍ୟର କଷାଘାତରେ ସନ୍ତୁଳିତ ହୋଇ ବାପା ମା ଗାଁ ଛାଡିଥିବା ବେଳେ ପିଲାମାନେ ବିଦ୍ୟାଳୟ ଛାଡ଼ି ଶିଶୁ ଶ୍ରମିକ ଭାବରେ ନିୟୋଜିତ ହୋଇଥିବାର ସୂଚନା ମିଳିଛି। ଏହି ସମସ୍ତ ପିଲାଙ୍କୁ ଶିଶୁ କଲ୍ୟାଣ ସମିତିରେ ଉପସ୍ଥିତ କରାଯାଇ ଓପନ ସେଲଟର ମାନଙ୍କରେ ରଖାଯାଇ କାଉନସେଲିଂ କରାଯାଇଛି। ୨୦୨୩-୨୪ ବର୍ଷରେ ଖୋର୍ଦ୍ଧା, ପୁରୀ ଏବଂ ନୟାଗଡ଼ ଜିଲ୍ଲାରୁ ନିୟମିତ ଏଭଳି ଶିଶୁ ଶ୍ରମିକଙ୍କୁ ଉଦ୍ଧାର କଯାଇଛି। ଏନେଇ ଚାଇଲ୍‌‌ଡଲାଇନ୍‌‌ର ନିର୍ଦ୍ଦେଶକ ବେଣୁଧର ସେନାପତି କହିଛନ୍ତି ଯେ, ଚାଇଲ୍ଡ ଲେବର ପ୍ରୋହିବିସନ୍‌‌ ଆକ୍ଟ-୨୦୧୬ କଡ଼ାକଡ଼ି ଭାବେ ଲାଗୁ କରାଯାଉନାହିଁ। ଏହାସହ ଶିଶୁ ଚାଲାଣ କ୍ଷେତ୍ରରେ ମଧ୍ୟ ୩୭୦ ଧାରାରେ କେସ୍‌‌ କରାଯାଇପାରିବ। ଉକ୍ତ କେସ୍‌‌ ଗୁଡ଼ିକ ତଦାରଖ କରିବା ପାଇଁ ସରକାରଙ୍କ ପକ୍ଷରୁ ପ୍ରତି ଜିଲ୍ଲାରେ ଆଣ୍ଟି ହ୍ୟୁମାନ୍‌‌ ଟ୍ରାଫିକିଂ ସେଲ୍‌ଫ ଗଠନ ହୋଇଛି। ସରକାରଙ୍କ ବିଦ୍ଧିବଦ୍ଧ ଭାବେ ସମସ୍ତ କାଯ୍ୟ କରିଥିଲେ ମଧ୍ୟ ଏହା ସଠିକ୍‌‌ ଭାବେ କାର୍ଯ୍ୟକାରୀ ହୋଇପାରୁ ନାହିଁ। ପଞ୍ଚାୟତ, ବ୍ଲକ ଏବଂ ଜିଲ୍ଲା ସ୍ତରରୁ ପ୍ରତି ଶିଶୁଙ୍କ ସଂଖ୍ୟା ଗଣନା କରାଗଲେ ସଠିକ୍‌‌ ତଥ୍ୟ ରହିବ। ଏହାସହ ଯେଉଁମାନେ ବିଭିନ୍ନ ଅଞ୍ଚଳରୁ ଶିଶୁ ଚାଲାଣ କରୁଛନ୍ତି ଉକ୍ତ ରାକଟେ୍‌‌କୁ ଧରିବା ସହ କଡାଦଣ୍ଡ ବିଧାନରେ ଦଣ୍ଡିତ ଏବଂ ଯେଉଁମାନେ ନିଜ ଘରେ କିମ୍ବା ହୋଟେଲରେ ପିଲାମାନଙ୍କୁ କାମ କରାଉଛନ୍ତି ସେମାନଙ୍କୁ ପାଇଁ ମଧ୍ୟ ଦଣ୍ଡବିଧାନ ମଧ୍ୟ କଠୋର କରାଯିବା ଆବଶ୍ୟକତା ରହିଛି ବୋଲି ଶ୍ରୀ ସେନାପତି କହିଛନ୍ତି।