ମହାକାଶରୁ ଆମ ଦେଶ ଭାରତ କିପରି ଦେଖାଯାଏ, ତାହାର ଏକ ଚମତ୍କାର ଚିତ୍ର ସାମ୍ନାକୁ ଆସିଛି। ଆନ୍ତର୍ଜାତୀୟ ସ୍ପେସ୍ ଷ୍ଟେସନ୍ (ISS) ଦ୍ୱାରା ଏକ ସୁନ୍ଦର ରାତ୍ରିକାଳୀନ ଫଟୋ ସୋସିଆଲ ମିଡିଆରେ ସେୟାର କରାଯାଇଛି, ଯାହା ବର୍ତ୍ତମାନ ଇଣ୍ଟରନେଟରେ ବେଶ୍ ଭାଇରାଲ୍ ହେବାରେ ଲାଗିଛି।

ମହାକାଶରୁ ଦେଖାଗଲା ଭାରତର ଚମକ

ଆରବ ସାଗର ଏବଂ ହିମାଳୟ ଅଞ୍ଚଳ ଉପର ଦେଇ ଗତି କରିବା ସମୟରେ ଆଇଏସଏସ ଭାରତର ଏହି ଫଟୋ ଉଠାଇଛି। ଫଟୋରେ ହଜାର ହଜାର ସହରର ଆଲୋକରେ ଝଲସୁଥିବା ଭାରତୀୟ ଉପମହାଦେଶ ବେଶ୍ ଆକର୍ଷଣୀୟ ଦେଖାଯାଉଛି। ସୋସିଆଲ ମିଡିଆ ପ୍ଲାଟଫର୍ମ ଏକ୍ସ (X) ରେ ଏହି ଫଟୋକୁ ପୋଷ୍ଟ କରି ଆଇଏସଏସ ଲେଖିଛି ଯେ, "ଆରବ ସାଗର ଓ ହିମାଳୟ ଉପର ଦେଇ ଉଡ଼ାଣ ଭରିବା ସମୟରେ ଆନ୍ତର୍ଜାତୀୟ ସ୍ପେସ୍ ଷ୍ଟେସନରୁ ଉଠାଯାଇଥିବା ଭାରତର ଆଲୋକିତ ରାତ୍ରି ଦୃଶ୍ୟ।"

The well-lit nighttime cityscape of India pictured from the International Space Station as it soared over the Arabian Sea and across the Himalayas. pic.twitter.com/h7Gnlev539

— International Space Station (@Space_Station) March 11, 2026

ମହାକାଶଚାରୀଙ୍କ ଦୈନନ୍ଦିନ ଫଟୋଗ୍ରାଫି

ପୃଥିବୀ ପୃଷ୍ଠରୁ ପ୍ରାୟ ୪୦୦ କିଲୋମିଟର ଉପରେ ରହି ଆଇଏସଏସ ଦିନକୁ ୧୬ ଥର ପୃଥିବୀକୁ ପ୍ରଦକ୍ଷିଣ କରିଥାଏ। ଏହି ସମୟରେ ଏଥିରେ ଥିବା ମହାକାଶଚାରୀମାନେ ନିୟମିତ ଭାବେ ବିଭିନ୍ନ ସହର, ଉପକୂଳ ଏବଂ ପାଣିପାଗର ଫଟୋ କ୍ୟାପଚର କରିଥାନ୍ତି। ବିଶେଷ କରି ରାତି ସମୟରେ ଘନ ଜନବସତି ଓ ସହରାଞ୍ଚଳର ଆଲୋକରେ ଝଲସୁଥିବା ଭାରତର ଚିତ୍ର ସବୁବେଳେ ମହାକାଶଚାରୀ ଏବଂ ସାଧାରଣ ଲୋକଙ୍କ ଦୃଷ୍ଟି ଆକର୍ଷଣ କରିଥାଏ।

ପୂର୍ବରୁ ମଧ୍ୟ ସାମ୍ନାକୁ ଆସିଛି ଏଭଳି ଦୃଶ୍ୟ

ଏହା ପ୍ରଥମ ଥର ନୁହେଁ, ପୂର୍ବରୁ ୨୦୨୫ ମସିହାରେ ମଧ୍ୟ ନାସା (NASA) ପକ୍ଷରୁ ଆଇଏସଏସରୁ ଉଠାଯାଇଥିବା ଭାରତର ଏକ ରାତ୍ରିକାଳୀନ ଫଟୋ ଜାରି କରାଯାଇଥିଲା, ଯେଉଁଥିରେ ତାରାଭରା ଆକାଶ ତଳେ ଭାରତ ଉଜ୍ଜ୍ୱଳମୟ ଦିଶୁଥିଲା। ଏକାଧିକ ମିଶନରେ ଆଇଏସଏସରେ ୩୦୦ ରୁ ଅଧିକ ଦିନ ବିତାଇଥିବା ଭାରତୀୟ ବଂଶୋଦ୍ଭବ ମହାକାଶଚାରୀ ସୁନୀତା ୱିଲିୟମ୍ସ ମଧ୍ୟ ପୂର୍ବରୁ ମହାକାଶରୁ ଭାରତର ରାତ୍ରିକାଳୀନ ଦୃଶ୍ୟ ଦେଖିବାର ଅନୁଭୂତି ବର୍ଣ୍ଣନା କରିସାରିଛନ୍ତି। ସେହିପରି ନିକଟରେ ଆଇଏସଏସ ଯାଇଥିବା ମହାକାଶଚାରୀ ଶୁଭାଂଶୁ ଶୁକ୍ଳା ମଧ୍ୟ ରାତିରେ ଆଲୋକିତ ଭାରତର ଏକ ଆକର୍ଷଣୀୟ ଟାଇମଲାପ୍ସ ଭିଡିଓ ସେୟାର କରିଥିଲେ, ଯାହା ମହାକାଶରୁ ଦେଖାଯାଉଥିବା ଭାରତର ଅନ୍ୟ ଏକ ରୂପକୁ ଦର୍ଶାଇଥିଲା।

ୱାଶିଂଟନ୍‌ : ଦୀର୍ଘ ପ୍ରତୀକ୍ଷାର ଅନ୍ତ ହୋଇଛି। ମହାକାଶକୁ ୮ଦିନ ପାଇଁ ଯାଇ ୯ ମାସ ଧରି ଫସିରହିଥିବା ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନୀତା ୱିଲିୟମ୍ସ ଏବଂ ତାଙ୍କ ସହଯୋଗୀ ବୁଚ୍‌ ୱିଲମୋର ପୃଥିବୀ ପୃଷ୍ଠକୁ ଫେରିଛନ୍ତି। ସୁନୀତା ଏବଂ ବୁଚ୍‌ଙ୍କ ସହ ଅନ୍ୟ ନିକ୍‌ ହଗ୍‌ ଏବଂ ରୁଷୀୟ ମହାକାଶଚାରୀ ଆଲେକଜାଣ୍ଡର ଗୋର୍ବୁନୋଭ ଆନ୍ତର୍ଜାତିକ ମହାକାଶ କେନ୍ଦ୍ର (ଆଇଏସଏସ)ରୁ ଯାତ୍ରା ଆରମ୍ଭ କରିସାରିଥିଲା ବେଳେ ଭୂପୃଷ୍ଠରେ ସେମାନଙ୍କ ଅବତରଣ କରିଛନ୍ତି। ଆମେରିକାର ଫ୍ଲୋରିଡା ନିକଟ ସମୁଦ୍ରତଟରେ ସ୍ପେସ୍-ଏକ୍ସ କ୍ରୁ ଡ୍ରାଗନ୍ କ୍ୟାପସୁଲ୍ ସଫଳ ଅବତରଣ ହୋଇଛି । ଆମେରିକା ସମୟ ମଙ୍ଗଳବାର ସନ୍ଧ୍ୟା ୫.୫୭ ମିନିଟ୍‌ (ଭାରତୀୟ ସମୟ ବୁଧବାର ପ୍ରତ୍ୟୁଷ ୩.୨୭ ମିନିଟ୍‌)ରେ ସଫଳ ଲାଣ୍ଡିଂ କରିଛି ଡ୍ରାଗନ୍ କ୍ୟାପସୁଲ୍।

ଦୀର୍ଘ ୧୭ ଘଣ୍ଟାର ଯାତ୍ରା ପରେ ସ୍ପେସ୍ ଷ୍ଟେସନରୁ ପୃଥିବୀ ପୃଷ୍ଠରେ ପହଞ୍ଚିଛନ୍ତି ମହାକାଶଚାରୀ । ଭାରତୀୟ ସମୟ ଭୋର ୩ଟା ୨୭ ମିନିଟରେ ସମୁଦ୍ରରେ ନାସାର ସ୍ବତନ୍ତ୍ର ସ୍ପେସକ୍ରାଫ୍ଟ ଡ୍ରାଗନ୍ ଲାଣ୍ଡିଂ କରିବା ପରେ ପରେ ୪ ମହାକାଶଚାରୀ ବାହାରକୁ ଆସିଥିବାର ଭିଡ଼ିଓ ସାମ୍ନାକୁ ଆସିଛି । ପୃଥିବୀର ବାୟୁମଣ୍ଡଳରେ ପ୍ରବେଶ କରିବା ସମୟରେ ସ୍ପେସ୍ଏକ୍ସ କ୍ରୁ ଡ୍ରାଗନର ବେଗ ଘଣ୍ଟା ପ୍ରତି ୨୭ ହଜାର କିଲୋମିଟର ଥିଲା । ଶବ୍ଦର ବେଗଠୁ ୨୨ ଗୁଣା ଅଧିକ ବେଗରେ କ୍ୟାପସୁଲ ପୃଥିବୀର ବାୟୁ ମଣ୍ଡଳରେ ପ୍ରବେଶ କରିବା ପରେ ବାହ୍ୟ ତାପାମତ୍ରା ୧୯୨୬ ଡୀଗ୍ରୀ ସେଲସିୟସକୁ ବଢିଯାଇଥିଲା।

Splashdown confirmed! #Crew9 is now back on Earth in their @SpaceX Dragon spacecraft. pic.twitter.com/G5tVyqFbAu

— NASA (@NASA) March 18, 2025

ଅବତରଣର କିଛି ମିନିଟ ପୂର୍ବରୁ ଡ୍ରାଗନ କ୍ୟାପସୁଲରେ ଲାଗିଥିବା ୪ ଟି ପାରାସୁଟ୍ ଖୋଲାଯାଇଥିଲା। ପ୍ରଥମେ ଦୁଇଟି ପାରାସୁଟ ଖୋଲାଯାଇଥିଲା । ପରେ ଯାନର ବେଗ କମ ହେବା ପରେ ଅନ୍ୟ ୨ଟି ପାରାସୁଟ ଖୋଲିଥିଲା । ପାରାସୁଟ ଯୋଗୁଁ ଯାନର ବେଗ କମ୍ ହେବା ସହ ଧିରେ ଧିରେ ତଳକୁ ଖସି ସମୁଦ୍ରରେ ପଡିଥିଲା । ସ୍ପେସଏକ୍ସ କ୍ରୁ ଡ୍ରାଗନ ସମୁଦ୍ରରେ ପଡିବା ପୂର୍ବରୁ ସେଠାରୁ ସ୍ବତନ୍ତ୍ର ବୋଟ ମୁତୟନ ରହିଥିଲା । ମହାକାଶ ଯାନରୁ ମହାକାଶଚାରୀଙ୍କୁ ସୁରକ୍ଷିତ ବାହାର କରାଯାଇଛି । ସେମାନଙ୍କ ସ୍ବାସ୍ଥ୍ୟ ପରୀକ୍ଷା ପାଇଁ ପଠାଯାଇଛି । ୪ ମହାକାଶଚାରୀ ଫେରିବା ପରେ କେବଳ ଆମେରିକା ନୁହେଁ ସାରା ବିଶ୍ବରେ ଖୁସିର ଲହରୀ ଖେଳଯାଇଛି ।

ୱାସିଂଟନ: ବହୁ ପ୍ରତୀକ୍ଷାର ଅନ୍ତ ହେବାକୁ ଯାଉଛି। ମାତ୍ର ୮ ଦିନର ଅଭିଯାନ ଦୀର୍ଘ ୯ ମାସ ପରେ ଶେଷ ହେବାକୁ ବସିଛି। ଶେଷରେ ଭାରତୀୟ ବଂଶୋଦ୍ଭବ ମହାକାଶଚାରୀ ସୁନିତା ୱିଲିୟମ୍ସ ଏବଂ ତାଙ୍କ ସହଯୋଗୀ ବୁଚ୍‌ ୱିଲମୋର୍‌ ଆଉ ଦୁଇ ଜଣ ମହାକାଶଚାରୀଙ୍କ ସହ ମଙ୍ଗଳବାର ଅନ୍ତର୍ଜାତୀୟ ମହାକାଶ ଷ୍ଟେସନ (ଆଇଏସଏସ) ଛାଡ଼ିବାକୁ ଯାଉଛନ୍ତି। ସ୍ପେସ୍‌ଏକ୍ସର ଡ୍ରାଗନ କ୍ୟାପ୍‌ସୁଲ ଏହି ମହାକାଶଚାରୀଙ୍କୁ ପୃଥିବୀରେ ପହଞ୍ଚାଇବା ପାଇଁ ୪୦୦ କିମିର ଯାତ୍ରାକୁ ୧୭ ଘଣ୍ଟା ସମୟ ନେବ। ପରେ ଆଟଲାଣ୍ଟିକ ମହାସାଗର କିମ୍ବା ମେକ୍ସିକୋ ଉପକୂଳରେ ଅବତରଣ କରିବ।

ଡ୍ରାଗନ କ୍ୟାପ୍‌ସୁଲରେ ସୁନିତାଙ୍କ ସମେତ କ୍ରୁ-୯ର ଚାରି ମହାକାଶଚାରୀ ପୃଥିବୀକୁ ଫେରିବେ। ଏହା ପରେ ଯାନ ଆଇଏସଏସରୁ ଅନ-ଡକିଂ ହେବ। ଏହା ୫ଟି ପର୍ଯ୍ୟାୟରେ ଶେଷ ହେବ। ଆଇଏସଏସ ଛାଡ଼ିବା ପରେ ଏହା ପୃଥିବୀ ବାୟୁମଣ୍ଡଳରେ ପ୍ରବେଶ କରିବ। ଏହି ପ୍ରକ୍ରିୟାକୁ ‘ରିଏଣ୍ଟ୍ରି’କୁହାଯାଏ। ମହାକାଶରେ ଡ୍ରାଗନ କ୍ୟାପସୁଲ୍‌ ସର୍ବନିମ୍ନ ଘଣ୍ଟା ପ୍ରତି ୧୮ ହଜାର କିମି ବେଗରେ ଗତି କରିବ। ମାତ୍ର ରିଏଣ୍ଟ୍ରି ସମୟରେ ବେଗ ହ୍ରାସ ପାଇବ। ଏହି ସମୟରେ ଡ୍ରାଗନ କ୍ୟାପ୍‌ସୁଲର କୋଣ ଯଦି ଟିକିଏ ବି ଏପାଖସେପାଖ ହୁଏ ତେବେ ତାହା ବିପଜ୍ଜନକ ସାବ୍ୟସ୍ତ ହୋଇପାରେ। ଯଦି ଯାନ ସିଧାସଳଖ ଭାବେ ବାୟୁମଣ୍ଡଳରେ ପ୍ରବେଶ କରେ ତେବେ ତାପମାତ୍ରା ୧୫୦୦ ଡିଗ୍ରୀ ସେଲ୍‌ସିୟରରୁ ଅଧିକ ହୋଇଯିବ। ଏହା ଦ୍ବାରା ନିଆଁ ଲାଗିଯିବାର ସମ୍ଭାବନା ରହିଛି। ସେହିପରି ଯଦି କଣେଇକି ଗୋଟିଏ ପାର୍ଶ୍ବରୁ ପ୍ରବେଶ କରେ ତେବେ ଯାନ ପୁଣିଥରେ ମହାକାଶକୁ ପଳାଇବାର ଆଶଙ୍କା ରହିଛି। ଏହା ବ୍ୟତୀତ ଯଦି ଫେରିବା ସମୟରେ ଥ୍ରଷ୍ଟର୍ସ କାମ କରିବନି ତେବେ ମହାକାଶଚାରୀଙ୍କ ପାଖରେ କିଛି ସମୟ ପାଇଁ ଅମ୍ଳଜାନ ଏବଂ ବିଦ୍ୟୁତ ଶକ୍ତି ରହିବ। ଏହାର କିଛି ଘଣ୍ଟା ମଧ୍ୟରେ ମହାକାଶଚାରୀଙ୍କୁ ଉଦ୍ଧାର କରିବାକୁ ହେବ। କିନ୍ତୁ ଏଭଳି ହେବାର ସମ୍ଭାବନା ବହୁତ କମ୍‌ ରହିଛି।

ଅବତରଣର ୫୫୦୦ ମିଟର ଦୂରରୁ ପାରାଚୁଟ୍‌ ଖୋଲିବା ମଧ୍ୟ ଜରୁରୀ। ଡ୍ରାଗନ କ୍ୟାପସୁଲର ରିଏଣ୍ଟ୍ରି ପରେ ପ୍ରଥମେ ୨ଟି ଡ୍ରାଗ୍‌ ପାରାଚୁଟ ଖୋଲିଥାଏ। ଏହି ସମୟରେ ଯାନର ଗତି ଘଣ୍ଟାପ୍ରତି ୫୬୦ କିମି ରହିଥାଏ। ପାରାଚୁଟ ଏହି ଗତିକୁ ଅଧିକ ହ୍ରାସ କରି ଯାନକୁ ସ୍ଥିର ରଖିଥାଏ। ପରେ ଭୂପୃଷ୍ଠରୁ ୧୮୦୦ ମିଟର ଦୂରରେ ଥିବାବେଳେ କ୍ୟାପ୍‌ସୁଲର ଆଉ ଚାରୋଟି ମୁଖ୍ୟ ପାରାଚୁଟ ଖୋଲିଥାଏ। ଯଦି ସଠିକ ସମୟରେ ପାରାଚୁଟ୍‌ ନ ଖୋଲେ ତେବେ ଯାନ ଧାର୍ଯ୍ୟ ସୀମାଠାରୁ ଅଧିକ ବେଗରେ ମାଡ଼ହେବାର ସମ୍ଭାବନା ଥାଏ। ଏହା ଦ୍ବାରା ମହାକାଶଚାରୀଙ୍କ ପ୍ରତି ବିପଦ ସୃଷ୍ଟି ହୋଇପାରେ। ମାତ୍ର ଏହି ଡ୍ରାଗନ୍‌ କ୍ୟାପସୁଲ ଏ ପର୍ଯ୍ୟନ୍ତ ୪୯ଟି ଅଭିଯାନ ଶେଷ କଲାଣି। ୪୪ ଥର ମହାକାଶକୁ ଯାତ୍ରା କଲାଣି। ସୁରକ୍ଷା ଦୃଷ୍ଟି କୋଣରୁ ଏହା ଅଧିକ ସୁରକ୍ଷିତ ବୋଲି କୁହାଯାଉଛି।

ନୂଆଦିଲ୍ଲୀ : ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନିତା ୱିଲିୟମ୍ସଙ୍କ ପୃଥିବୀକୁ ସୁରକ୍ଷିତ ପ୍ରତ୍ୟାବର୍ତ୍ତନ ପାଇଁ କାଉଣ୍ଟଡାଉନ୍ ଆରମ୍ଭ ହୋଇଯାଇଛି। ତାଙ୍କ ସହିତ ବୁଚ୍ ୱିଲମୋର ମଧ୍ୟ ନଅ ମାସ ପରେ ପୃଥିବୀକୁ ଫେରିବେ। ଆଜି ସକାଳେ (ଭାରତୀୟ ସମୟ) ୭:୦୩ରେ ଆମେରିକୀୟ ମହାକାଶଯାନ ଉଭୟଙ୍କୁ ଆଣିବା ପାଇଁ ଉଡ଼ାଣ ଭରିଛି।

ନାସା ଏବଂ ସ୍ପେସଏକ୍ସ ମିଳିତ ଭାବରେ କ୍ରୁ-୧୦ ମିଶନ ଆରମ୍ଭ କରିଛନ୍ତି ଯାହା ସୁନିତା ୱିଲିୟମ୍ସ ଏବଂ ୱିଲମୋରଙ୍କୁ ଅନ୍ତର୍ଜାତୀୟ ମହାକାଶ ଷ୍ଟେସନରୁ ପୃଥିବୀକୁ ଫେରାଇ ଆଣିବା ଦିଗରେ ଏକ ବଡ଼ ପଦକ୍ଷେପ। ଶୁକ୍ରବାର ସକାଳ ୭:୦୩ରେ ଡ୍ରାଗନ୍ ଅନ୍ତରୀକ୍ଷଯାନ ବହନ କରୁଥିବା ଫାଲକନ୍ ୯ ରକେଟ୍ ବ୍ୟବହାର କରି ମିଶନ୍ ଆରମ୍ଭ କରାଯାଇଥିଲା। ଏହି ମିଶନ ଅଧୀନରେ, ଚାରି ଜଣ ନୂତନ ମହାକାଶଚାରୀଙ୍କୁ ISS ପଠାଯାଇଛି ଯେଉଁମାନେ ସେଠାରେ ପୂର୍ବରୁ ଉପସ୍ଥିତ ଥିବା କ୍ରୁ-୯ ର ସଦସ୍ୟମାନଙ୍କୁ ସହାୟତା କରିବେ।

ଯାନ୍ତ୍ରିକ ତ୍ରୁଟି ଯୋଗୁଁ ଗୁରୁବାର ଏହି ମିଶନକୁ ସ୍ଥଗିତ ରଖାଯାଇଥିଲା

ଉଲ୍ଲେଖନୀୟ ଯେ ଗୁରୁବାର ଦିନ ଅନ୍ତର୍ଜାତୀୟ ମହାକାଶ କେନ୍ଦ୍ର (ISS)ରୁ ମହାକାଶଚାରୀ ସୁନୀତା ୱିଲିୟମ୍ସଙ୍କ ପ୍ରତ୍ୟାବର୍ତ୍ତନକୁ ସ୍ଥଗିତ ରଖାଯାଇଥିଲା। ନାସାର କେନେଡି ସ୍ପେସ୍ ସେଣ୍ଟରରୁ ଉତ୍ କ୍ଷେପଣ ହେବାର ପ୍ରାୟ ଗୋଟିଏ ଘଣ୍ଟା ପୂର୍ବରୁ କ୍ରୁ-୧୦ ମିଶନକୁ ପୁଣି ଥରେ ସ୍ଥଗିତ ରଖାଯାଇଥିଲା। ସ୍ପେସଏକ୍ସର ଫାଲକନ୍ ୯ ରକେଟ୍‌ରେ ଗ୍ରାଉଣ୍ଡ ସପୋର୍ଟ କ୍ଲାମ୍ପ ଆର୍ମ ସହିତ ହାଇଡ୍ରୋଲିକ୍ ସିଷ୍ଟମ୍ ସମସ୍ୟା ଯୋଗୁଁ ଉତକ୍ଷେପଣ ବାତିଲ ହୋଇଥିଲା।

ସୁନିତା ୱିଲିୟମ୍ସ ଏବଂ ବୁଚ୍ ୱିଲମୋର ଆଇଏସଏସରେ ଫସି ରହିଛନ୍ତି

ପ୍ରକୃତରେ, ସୁନିତା ୱିଲିୟମ୍ସ ଏବଂ ବୁଚ୍ ୱିଲମୋର ଗତ ବର୍ଷ ୫ ଜୁନ୍ ୨୦୨୪ରେ ବୋଇଂ ଷ୍ଟାରଲାଇନର୍ ମାଧ୍ୟମରେ ISS ରେ ପହଞ୍ଚିଥିଲେ। ଏହା ନାସା ଏବଂ ବୋଇଂର ଏକ ମିଳିତ କ୍ରୁ ଉଡ଼ାଣ ପରୀକ୍ଷଣ ମିଶନ ଥିଲା ଯେଉଁଥିରେ ସେମାନଙ୍କୁ ଗୋଟିଏ ସପ୍ତାହ ମଧ୍ୟରେ ଫେରିବାର ଥିଲା । କିନ୍ତୁ ଯାନ୍ତ୍ରିକ ତ୍ରୁଟି ଯୋଗୁଁ ତାଙ୍କର ମହାକାଶରେ ରହିବା ଅନିର୍ଦ୍ଦିଷ୍ଟ ହୋଇଗଲା। ଏହି ସମୟ ମଧ୍ୟରେ, ସେମାନଙ୍କୁ ଅନେକ ଚ୍ୟାଲେଞ୍ଜର ସମ୍ମୁଖୀନ ହେବାକୁ ପଡିଥିଲା ​​କିନ୍ତୁ ଏବେ SpaceXର Crew-10 ମିଶନର ସଫଳ ଉତ୍କ୍ଷେପଣ ସେମାନଙ୍କ ସୁରକ୍ଷିତ ପ୍ରତ୍ୟାବର୍ତ୍ତନର ଆଶା ସୃଷ୍ଟି କରିଛି।

ୱାଶିଂଟନ: ମହାକାଶଚାରୀ ସୁନିତା ୱିଲିୟମ୍ସ ଏବଂ ବୁଚ୍‌ ୱିଲମୋର୍‌ ଦୀର୍ଘ ଦିନ ହେଲା ମହାକାଶରେ ଫସି ରହିଛନ୍ତି। ଆମେରିକା ମହାକାଶ ଏଜେନ୍ସି ନାସାର ତ୍ରୁଟି ଯୋଗୁଁ ୮ ଦିନିଆ ମିଶନରେ ଯାଇ ଉଭୟେ ୮ ମାସ ହେଲା ଅନ୍ତର୍ଜାତୀୟ ମହାକାଶ ଷ୍ଟେସନ (ଆଇଏସଏସ)ରେ ରହିବାକୁ ବାଧ୍ୟ ହୋଇଛନ୍ତି। ଉଭୟଙ୍କ ଫେରିବା ସମୟ ଦିନକୁ ଦିନ ଘୁଞ୍ଚିବାରେ ଲାଗିଛି। ଏଥିଯୋଗୁଁ ଉଭୟଙ୍କ ସ୍ବାସ୍ଥ୍ୟାବସ୍ଥା ବିଗିଡିବାରେ ଲାଗିଛି। ଏହା ମଧ୍ୟରେ ସୁନିତା ଏକ ସାକ୍ଷାତକାରରରେ ଦେଇଥିବା ମନ୍ତବ୍ୟ ଚିନ୍ତାକୁ ଦ୍ବିଗୁଣିତ କରିଦେଇଛି। ସେ ଚାଲିବା, ଶୋଇବା ଏବଂ ବସିବା ଭୁଲି ଯାଇଛନ୍ତି ବୋଲି କହିଛନ୍ତି। ଏବେ ସେ କେମିତି ଚାଲନ୍ତି ତାହା ମନେ ପକାଉଛନ୍ତି। ପୃଥିବୀକୁ ଫେରିବା ପାଇଁ ସେ ଚାତକ ପରି ଚାହିଁ ରହିଛନ୍ତି।

ଅନ୍ୟପକ୍ଷରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ  ଦୁଇ ମହାକାଶ ଯାତ୍ରୀଙ୍କୁ ଫେରାଇ ଆଣିବାର ଦାୟିତ୍ବ ଶିଳ୍ପପତି ତଥା ସ୍ପେସ୍‌ଏକ୍ସର ମାଲିକ ଏଲନ ମସ୍କଙ୍କୁ ଦେଇଛନ୍ତି। ସେ ସୋସିଆଲ ମିଡିଆରେ ଏହି ସୂଚନା ଦେଇଛନ୍ତି। ଏହାକୁ ନେଇ ପୂର୍ବତନ ବାଇଡେନ ପ୍ରଶାସନକୁ ଦାୟୀ କରିଛନ୍ତି। ସୁନିତା ଏବଂ ବୁଚ୍‌ଙ୍କୁ ପୂର୍ବତନ ରାଷ୍ଟ୍ରପତି ଜୋ ବାଇଡେନଙ୍କ ସରକାର ମହାକାଶରେ ଛାଡ଼ି ଦେଇଛନ୍ତି। ଟ୍ରମ୍ପ ଏହାକୁ ଭୟାନକ ଘଟଣା କହିଛନ୍ତି। ଉଭୟଙ୍କୁ ଶୀଘ୍ର ଆଣିବା ଲାଗି ବ୍ୟବସ୍ଥା କରିବାକୁ ସେ ମସ୍କଙ୍କୁ କହିଛନ୍ତି। ଏହାର ଉତ୍ତରରେ ଯେତେଶୀଘ୍ର ସମ୍ଭବ ପ୍ରୟାସ କରିବୁ ବୋଲି ସ୍ପେସ୍‌ଏକ୍ସର ସିଇଓ ମସ୍କ କହିଛନ୍ତି।

ଏହା ପୂର୍ବରୁ ଗତ ବର୍ଷ ଅଗଷ୍ଟରେ ନାସା ପକ୍ଷରୁ କୁହାଯାଇଥିଲା ଯେ, ଚଳିତ ବର୍ଷ ଫେବ୍ରୁଆରୀ ସୁଦ୍ଧା ସ୍ପେସ୍‌ ଏକ୍ସର କ୍ର୍ୟୁ ଡ୍ରାଗନ ଫ୍ଲାଇଟରେ ସୁନିତା ଏବଂ ବୁଚମୋରଙ୍କୁ ଫେରାଇ ଅଣାଯିବ। ମାତ୍ର ଗତ ଡିସେମ୍ବରରେ ନାସା ପୁଣି ତାରିଖ ବଦଳାଇ ଥିଲା। ମାର୍ଚ୍ଚ କିମ୍ବା ଏପ୍ରିଲ ସୁଦ୍ଧା ଉଭୟେ ଫେରିବାର ସମ୍ଭାବନା ନାହିଁ ବୋଲି କୁହାଯାଇଥିଲା।

ୱାଶିଂଟ: ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନିତା ୱିଲିୟମ୍ସ ଏବଂ ତାଙ୍କ ସହଯୋଗୀ ବୁଚ୍‌ ୱିଲମୋର ଦୀର୍ଘଦିନ ହେଲା ଅନ୍ତର୍ଜାତୀୟ ମହାକାଶ ଷ୍ଟେସନ (ଆଇଏସ୍‌ଏସ୍‌)ରେ ଫସି ରହିଛନ୍ତି। ମାତ୍ର ସାତ ଦିନ ପାଇଁ ଆଇଏସ୍‌ଏସକୁ ଯାଇଥିବା ୨ ବୈଜ୍ଞାନିକ ୮୬ ଦିନ ହେଲା ସେଠାରେ ରହିବାକୁ ବାଧ୍ୟ ହେଉଛନ୍ତି। ଆମେରିକା ମହାକାଶ ଏଜେନ୍ସି ନାସାର ଭୁଲ୍‌ ନିଷ୍ପତ୍ତି ପାଇଁ ଉଭୟଙ୍କ ଜୀବନ ବିପଦରେ ପଡ଼ିଛି। ଏହାକୁ ନେଇ ସମଗ୍ର ବିଶ୍ବରେ ଚିନ୍ତା ପ୍ରକାଶ ପାଇଛି। ସୁନିତା ଏବଂ ୱିଲମୋର ଯେଉଁ ଷ୍ଟାରଲାଇନର ମହାକାଶଯାନରେ ଆଇଏସଏସକୁ ଯାଇଥିଲେ ସେଥିରେ ଅନେକ ସମସ୍ୟା ଥିଲା। ଏଥିପାଇଁ ଏହାର ଉତ୍‌କ୍ଷେପଣକୁ ଅନେକ ଥର ସ୍ଥଗିତ ରଖା ଯାଇଥିଲା। ଏହା ସତ୍ତ୍ବେ ତାର ମରାମତି କରାଯାଇ ଜୁନ୍‌ ୫ରେ ଉତ୍‌କ୍ଷେପଣ କରାଯାଇଥିଲା। ଏହା ପରେ ମହାକାଶଯାନରେ ପୁଣି ସମସ୍ୟା ଥିବା ଖବର ଆସିଥିଲା। ଏହାର ସର୍ଭିସ ମଡ୍ୟୁଲୋର ଥ୍ରେଷ୍ଟରୁ ହିଲିୟମ ଲିକ୍‌ (ପ୍ରଘଟ) ହେଉଥିଲା।

ସୂଚନା ଅନୁଯାୟୀ, ଗୋଟିଏ ମହାକାଶାଯାନରେ ଅନେକ ଥ୍ରେଷ୍ଟର ଥାଏ। ଏହାର ସହାୟତାରେ ଯାନ ନିଜ ମାର୍ଗ ଏବଂ ବେଗ ବଦଳାଇ ଥାଏ। ହିଲିୟମ ଗ୍ୟାସ ଯୋଗୁଁ ରକେଟ୍‌ରେ ଚାପ ବଢ଼ିଥାଏ। ଏହାକୁ ମଜବୁତ ରଖିଥାଏ। ଉତ୍‌କ୍ଷେପଣର ୨୫ ଦିନ ପରେ କ୍ୟାପସୁଲ୍‌ରୁ ୫ଟି ସ୍ଥାନରେ ହିଲିୟମ ଲିକ୍‌ ହେଉଥିଲା। ୫ଟି ଥ୍ରେଷ୍ଟର କାମ କରିବା ବନ୍ଦ କରିଦେଇଥିଲା। ଏହା ବ୍ୟତୀତ ପ୍ରପଲେଣ୍ଟ ଭାଲ୍‌ଭକୁ ସମ୍ପୂର୍ଣ୍ଣ ଭାବେ ବନ୍ଦ କରାଯାଇ ନ ଥିଲା। ମହାକାଶରେ ଥିବା କ୍ର୍ୟୁ ସଦସ୍ୟ ଏବଂ ଆମେରିକାର ହ୍ୟୁଷ୍ଟନ ସ୍ଥିତ ଅଭିଯାନର ମ୍ୟାନେଜର ମଧ୍ୟ ଏହାକୁ ସଜାଡ଼ି ପାରୁନାହାନ୍ତି। ଏଥିପାଇଁ ଉଭୟେ ଜୁନ୍‌ ୧୩ରେ ମହାକାଶକୁ ଫେରିପାରିଲେ ନାହିଁ। ଏହା ପରେ ଉତ୍‌କ୍ଷେପଣ ଭଳି ବାରମ୍ବାର ତାଙ୍କ ପ୍ରତ୍ୟାବର୍ତ୍ତନ ତାରିଖ ମଧ୍ୟ ବଦଳା ଯାଇଥିଲା। ଶେଷରେ ଆସନ୍ତା ବର୍ଷ ଫେବୃଆରୀ ୨୪ରେ ଦୁଇ ମହାକାଶଯାତ୍ରୀ ଫେରିବେ ବୋଲି ନାସା ପକ୍ଷରୁ କୁହାଯାଇଛି। ସମସ୍ତ ପ୍ରତିକୂଳ ପରିସ୍ଥିତି ସତ୍ତ୍ବେ ଆଇଏସଏସରେ ଉଭୟ ମହାକାଶଚାରୀ ରହିବାକୁ ବାଧ୍ୟ ହେଉଛନ୍ତି।

ନାସାର ନିୟମିତ ଅଭିଯାନରେ ସେପ୍ଟେମ୍ବରରେ ମସ୍କଙ୍କ ଡ୍ରାଗନ କ୍ର୍ୟୁ ୭ ଜଣ ମହାକାଶଚାରୀଙ୍କୁ ନେଇ ଆଇଏସଆଇଏସକୁ ଯିବାର ଥିଲା। ମାତ୍ର ଏହି ଅଭିଯାନରେ ସୁନିତା ଏବଂ ୱିଲମୋରଙ୍କୁ ଫେରାଇ ଆଣିବା ଲାଗି ନିଷ୍ପତ୍ତି ନିଆଯାଇଛି। ସେଥିପାଁ ଏହି ଗସ୍ତରୁ ୨ ଜଣ ମହାକାଶଚାରୀଙ୍କୁ ବାଦ ଦିଆଯାଇଛି। ସମସ୍ତେ ଆଇଏସ୍‌ଏସ୍‌ରେ ପହଞ୍ଚି ନିଜ ଅଭିଯାନ ଶେଷ କରିବେ। ଫେରିବା ସମୟରେ ସୁନିତା ଏବଂ ୱିଲମୋରଙ୍କୁ ଧରି ଫେରିବେ। ଏହା ସହିତ ପୁରୁଣା ଷ୍ଟାରଲାଇନର କ୍ୟାପ୍‌ସୁଲକୁ ଆଇଏସଏସରୁ ଅଲଗା କରିଦିଆଯିବ। ଏହା ୭ ତାରିଖରେ କୌଣସି ମହାକାଶଚାରୀଙ୍କୁ ନ ନେଇ ଫେରିବ। ଏହା ରାତି ୧୨ଟା ୦୩ରେ ଭୃପୃଷ୍ଠରେ ଅବତରଣ କରିବ। ଏହାକୁ ସୁରକ୍ଷିତ ଭାବେ ଅବତରଣ କରାଇବା ଲାଗି ନାସା ପକ୍ଷରୁ ସମସ୍ତ ପ୍ରସ୍ତୁତି କରାଯାଉଛି।

ନୂଆଦିଲ୍ଲୀ: ଆନ୍ତର୍ଜାତିକ ମହାକାଶ କେନ୍ଦ୍ର (ଆଇଏସଏସ୍‌)ରେ ଦୀର୍ଘ ୮୦ ଦିନ ଧରି ଫସି ରହିଥିବା ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନିତା ୱିଲିୟମ୍ସ ଏବଂ ତାଙ୍କ ସହଯୋଗୀ ବୁଚ୍ ୱିଲମୋରଙ୍କ ଅପେକ୍ଷାର ଅନ୍ତ ହୋଇନାହିଁ। ମହାକାଶରୁ ଏହି ଦୁଇ ମହାକାଶଚାରୀଙ୍କ ପ୍ରତ୍ୟାବର୍ତ୍ତନ ନେଇ ସାରା ବିଶ୍ବ ଉତ୍ସୁକତାର ସହ ଚାହିଁ ରହିଥିଲା ବେଳେ ନାସା ପକ୍ଷରୁ ଯେଉଁ ସୂଚନା ଦିଆଯାଇଛି ତାହା ଅନେକଙ୍କ ମନରେ ଉଦବେଗ ସୃଷ୍ଟି କରିଛି। ସୁନିତା ଏବଂ ୱିଲମୋର୍‌ ପୃଥିବୀ ପୃଷ୍ଠକୁ ଫେରିବା ଲାଗି ଆହୁରି ୬ ମାସ ଅପେକ୍ଷା କରିବାକୁ ହେବ। ୨୦୨୫ ଫେବୃଆରୀରେ ସେମାନଙ୍କୁ ଏଲନ ମସ୍କଙ୍କ ସ୍ପେଶ୍‌ ଏକ୍ସ ମହାକାଶ ଯାନ ଯୋଗେ ପୃଥିବୀ ପୃଷ୍ଠକୁ ଅଣାଯିବ ବୋଲି ଶନିବାର ନାସା ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି।

ଗତ ଜୁନ ୫ ତାରିଖରେ ଏହି ଦୁଇ ମହାକାଶଚାରୀ ଆମେରିକାର ଫ୍ଲୋରିଡା ଉତ୍‌କ୍ଷେପଣ କେନ୍ଦ୍ରରୁ ବୋଇଙ୍ଗ ଷ୍ଟାରଲାଇନ ମହାକାଶଯାନ ଯୋଗେ ମହାକାଶକୁ ଉଡ଼ାଣ ଭରିଥିଲେ। ଏହାର ୮ ଦିନ ପରେ ସେମାନେ ପୃଥିବୀ ପଷ୍ଠକୁ ଫେରି ଆସିବା କଥା। କିନ୍ତୁ ଷ୍ଟାରଲାଇନ ମହାକାଶ ଯାନରେ ବୈଷୟିକ ତ୍ରୁଟି ଯୋଗୁ ସେମାନେ ପ୍ରାୟ ୮୦ ଦିନ ହେଲା ଫସି ରହିଛନ୍ତି। ତେବେ ଏହି ମହାକାଶଯାନରେ ଆଉ ମାତ୍ର ୯୬ ଘଣ୍ଟା ପର୍ଯ୍ୟନ୍ତ ଅମ୍ଳଜାନ ରହିଥିବା ଆମେରିକା ସ୍ପେଶ୍‌ ସିଷ୍ଟମ ପକ୍ଷରୁ କୁହାଯିବା ପରେ ଉଭୟ ମହାକାଶଚାରୀଙ୍କ ଜୀବନ ଧାରଣକୁ ନେଇ ପ୍ରଶ୍ନ ଉଠିଛି। ଏହାକୁ ଦୃଷ୍ଟିରେ ରଖି ସେମାନଙ୍କୁ ତୁରନ୍ତ ଫେରାଇ ଆଣିବା ଲାଗି ନାସା ଉଦ୍ୟମ ଆରମ୍ଭ ହୋଇଥିବା କୁହାଯାଇଥିଲେ ହେଁ ସେମାନଙ୍କୁ ଆଗାମୀ ଫେବୃଆରୀରେ ସ୍ପେଶ ଏକ୍ସରେ ଅଣାଯିବ ବୋଲି ନାସା କହିଛି। ଆଇଏସଏସ୍‌ରେ ରହିଥିବା ରୁଷ କିମ୍ବା ଚାଇନାର ମହାକାଶ ଯାନ ଯୋଗେ ସେମାନଙ୍କୁ ଫେରାଇ ଆଣିବା ସମ୍ଭବ ବୋଲି କୁହାଯାଉଥିଲା। କିନ୍ତୁ ଏ ସମ୍ପର୍କରେ ନାସା କିଛି ସ୍ପଷ୍ଟ କରିନାହିଁ।

ନୂଆଦିଲ୍ଲୀ: ଭାରତୀୟ ବଂଶୋଦ୍ଭବ ସୁନିତା ୱିଲିୟମ୍ସ ପୁଣିଥରେ ମହାକାଶକୁ ଯାତ୍ରା କରି ଇତିହାସ ସୃଷ୍ଟି କରିଛନ୍ତି। ଆମେରିକୀୟ ମହାକାଶ ସଂସ୍ଥା ନାସା ପକ୍ଷରୁ ଅନ୍ତରୀକ୍ଷ ଅଭିମୁଖେ ଉଡ଼ାଣ ଭରିଛନ୍ତି ସୁନୀତା। କୌଣସି ମହାକାଶ ଯାନର ପ୍ରଥମ ଅଭିଯାନରେ ମହାକାଶକୁ ଯାଇଥିବା ସେ ପ୍ରଥମ ମହିଳା ହୋଇଛନ୍ତି। ସେ ବୁଧବାର ୮ଟା ୨୨ରେ ଫ୍ଲୋରିଡାର କେପ୍‌ କାନଭେରଲା ସ୍ପେସ୍‌ ଫୋର୍ସ ଷ୍ଟେସନର ୪୧ ନଂ ଲଞ୍ଚପ୍ୟାଡ୍‌ରୁ ବୋଇଂ ଷ୍ଟାରଲାଇନର ମହାକାଶଯାନରେ ମହାକାଶ ଅଭିମୁଖେ ଉଡ଼ାଣ ଆରମ୍ଭ କରିଥିଲେ। ଏହା ସୁନିତାଙ୍କ ତୃତୀୟ ମହାକାଶ ଯାତ୍ରା। ତୃତୀୟ ପ୍ରୟାସରେ ଏହି ଯାନ ସଫଳ ହୋଇଛି। ପୂର୍ବରୁ ଯାନ୍ତ୍ରିକ ତ୍ରୁଟି ଯୋଗୁଂ ଅଭିଯାନକୁ ୨ ଥର ସ୍ଥଗିତ ରଖାଯାଇଥିଲା। ଏହା ସଠିକ୍‌ କକ୍ଷରେ ପହଞ୍ଚି ଯାଇଛି। ଦିନକ ପରେ ଏହା ଅନ୍ତର୍ଜାତୀୟ ମହାକାଶ ଷ୍ଟେସନ (ଆଇଏସଏସ) ସହ ଯୋଡ଼ି ହୋଇଯିବ। ଏବେ ଆମେରିକାର ୩ଟି ମହାକାଶ ଯାନ ବୋଇଂ ଷ୍ଟାରଲାଇନର, ସ୍ପେସ୍‌ ଏକ୍ସର କ୍ର୍ୟୁ ଡ୍ରାଗନ ଏବଂ ଆଇଏସଏସ ରହିଛି।

୫୯ ବର୍ଷୀୟା ସୁନୀତାଙ୍କର ଏହା ତୃତୀୟ ମହାକାଶ ଯାତ୍ରା। ଏହା ପୂର୍ବରୁ ସେ ଦୁଇ ଥର ମହାକାଶକୁ ଯାତ୍ରା କରି ସାରିଛନ୍ତି। ସେ ୨୦୦୬ ଡିସେମ୍ବର ୯ରେ ‘ଡିସକଭରୀ’ ମହାକାଶ ଯାନରେ ପ୍ରଥମ ଥର ପାଇଁ ମହାକାଶ ଯାତ୍ରା କରିଥିଲେ। ଇଣ୍ଟରନ୍ୟାସନାଲ ସ୍ପେସ୍ ସେଣ୍ଟର ଅନେକ ଦିନ ଧରି ରହିଥିଲେ। ଏହି ସମୟରେ ସେ ଚାରିଥର ଆଇଏସଏସରୁ ବାହାରି ମହାକାଶରେ ପଦଯାତ୍ରା କରିଥିଲେ। ପୁଣି ୨୦୧୨ ଜୁଲାଇ ୧୫ରେ କାଜାଖସ୍ତାନର ବୈକାନୁର କସ୍ ମୋଡ୍ରମରୁ ସୋୟୁଜ-୦୫ଏମ ରକେଟ ଜରିଆରେ ଦ୍ୱିତୀୟ ଥର ମହାକାଶ ଯାତ୍ରା କରିଥିଲେ।