ଅନୁରାଗ କଶ୍ୟପଙ୍କ ନିର୍ଦ୍ଦେଶିତ ବହୁପ୍ରତୀକ୍ଷିତ ଚଳଚ୍ଚିତ୍ର 'କେନେଡି' (Kennedy) ର ଓଟିଟି (OTT) ରିଲିଜ୍ ତାରିଖ ଘୋଷଣା କରାଯାଇଛି। ଦର୍ଶକମାନେ ଦୀର୍ଘ ଦିନ ଧରି ଏହି ସସପେନ୍ସ ଥ୍ରୀଲର ଚଳଚ୍ଚିତ୍ରକୁ ଅପେକ୍ଷା କରିଥିଲେ, ଯାହାର ଅନ୍ତ ଘଟିବାକୁ ଯାଉଛି।

ZEE5ରେ ହେବ ଷ୍ଟ୍ରିମିଂ

ମିଳିଥିବା ସୂଚନା ଅନୁଯାୟୀ, ଆସନ୍ତା ଫେବୃଆରୀ ୨୦ ତାରିଖରୁ ଏହି ଚଳଚ୍ଚିତ୍ରଟି ଲୋକପ୍ରିୟ ଓଟିଟି ପ୍ଲାଟଫର୍ମ ZEE5 ରେ ପ୍ରିମିୟର ହେବ। ଏନେଇ ନିର୍ମାତାଙ୍କ ପକ୍ଷରୁ ଅଫିସିଆଲ୍ ଟ୍ରେଲର ଜାରି କରାଯିବା ସହ ରିଲିଜ୍ ତାରିଖ ସ୍ପଷ୍ଟ କରାଯାଇଛି।

ମୁଖ୍ୟ ଭୂମିକାରେ ରାହୁଲ ଏବଂ ସନି

ଏହି ଚଳଚ୍ଚିତ୍ରରେ ମୁଖ୍ୟ ଭୂମିକାରେ ଅଭିନୟ କରିଛନ୍ତି ରାହୁଲ ଭଟ୍ଟ ଏବଂ ବଲିଉଡ୍ ଅଭିନେତ୍ରୀ ସନି ଲିଓନି। 'କେନେଡି'ର କାହାଣୀ ଜଣେ ଅନିଦ୍ରା ରୋଗରେ ପୀଡ଼ିତ ପୂର୍ବତନ ପୋଲିସ୍ ଅଫିସରଙ୍କ ଉପରେ ଆଧାରିତ, ଯିଏ ଏକ ଦୁର୍ନୀତିଗ୍ରସ୍ତ ବ୍ୟବସ୍ଥା ଭିତରେ ନିଜର ମୁକ୍ତି ପାଇଁ ସଂଘର୍ଷ କରୁଛନ୍ତି।

କାନ୍ସରେ ହୋଇଥିଲା ପ୍ରଦର୍ଶିତ

ଉଲ୍ଲେଖଯୋଗ୍ୟ ଯେ, ଏହି ଚଳଚ୍ଚିତ୍ରଟି ୨୦୨୩ ମସିହାରେ କାନ୍ସ ଫିଲ୍ମ ଫେଷ୍ଟିଭାଲରେ (Cannes Film Festival) ପ୍ରଦର୍ଶିତ ହୋଇ ବେଶ୍ ପ୍ରଶଂସା ସାଉଁଟିଥିଲା। ଦୀର୍ଘ ଦିନର ବ୍ୟବଧାନ ପରେ ଏହା ଭାରତୀୟ ଦର୍ଶକଙ୍କ ପାଇଁ ଓଟିଟିରେ ମୁକ୍ତିଲାଭ କରୁଛି।

ଭୁବନେଶ୍ୱର: କାନ୍ସ ଫିଲ୍ମ ଫେଷ୍ଟିଭାଲ-୨୦୨୪ରେ ଓଡ଼ିଶାର ଚଳଚ୍ଚିତ୍ର ନିର୍ମାତା ବିଶ୍ୱନାଥ ରଥ କୋଟପାଡ଼ ହସ୍ତତନ୍ତର ପ୍ରଦର୍ଶନ ସହ ହାବାସପୁରୀ ହସ୍ତତନ୍ତ ଉପରେ ଫିଚର ଡକ୍ୟୁମେଣ୍ଟାରୀ ପୋଷ୍ଟର ଉନ୍ମୋଚନ କରି ଇତିହାସ ସୃଷ୍ଟି କରିଛନ୍ତି। ଏକ ଦଶନ୍ଧିରୁ ଅଧିକ ସମୟ ଧରି ଅନ୍ତର୍ଜାତୀୟ ସ୍ତରରେ ଖ୍ୟାତି ଅର୍ଜନ କରିଥିବା ଲେଖକ-ନିର୍ଦ୍ଦେଶକ ବିଶ୍ୱନାଥ ରଥ ଏବଂ ତାଙ୍କର କ୍ଷୁଦ୍ର ଚଳଚ୍ଚିତ୍ର, ଡକ୍ୟୁମେଣ୍ଟାରୀ, ମ୍ୟୁଜିକ୍‌‌ ଭିଡିଓ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ ତଥା ଓଟିଟି ପ୍ଲାଟଫର୍ମରେ ଓଡ଼ିଶା ସମତେ ଭାରତ ଏବଂ ଏପରିକି ଏସିଆର ପ୍ରତିନିଧିତ୍ୱ କରିବାରେ ପୂର୍ବରୁ ମଧ୍ୟ ବେଶ୍‌‌ ସୁନାମ ଅର୍ଜନ କରିଛନ୍ତି।

କାନ୍ସ ଫିଲ୍ମ ଫେଷ୍ଟିଭାଲର ୭୭ତମ ସଂସ୍କରଣରେ ପ୍ରଥମ ଥର ଗସ୍ତରେ ଯାଇ ବିଶ୍ୱନାଥ ତାଙ୍କ ଆଗାମୀ ଓଡ଼ିଆ-ଇଂରାଜୀ ଫିଚର-ଡକ୍ୟୁମେଣ୍ଟାରୀ ପୋଷ୍ଟର ‘ହାବାସପୁରୀ ୱେଭିଂ: ଦ ସେକେଣ୍ଡ ଏଣ୍ଡ୍‌‌ ଲାଷ୍ଟ ଡେଥ୍‌‌’ ଉନ୍ମୋଚନ କରିଛନ୍ତି। ଏହା ହାବାସପୁରୀ ହସ୍ତତନ୍ତ ବିଷୟ ଉପରେ ଆଧାରିତ। ଓଡ଼ିଶାର କଳାହାଣ୍ଡି ଜିଲ୍ଲାର ଏକ ଅନନ୍ୟ, ପୁରାତନ, ପ୍ରଶଂସିତ ହସ୍ତତନ୍ତ ହୋଇଥିବା ବେଳେ ବର୍ତ୍ତମାନ ଏହା ବିଲୁପ୍ତ ପ୍ରାୟ। ସେହିପରି ହସ୍ତତନ୍ତ ଡକ୍ୟୁମେଣ୍ଟାରୀ ‘କୋଟପାଡ଼ ୱେଭିଙ୍ଗ: ଦ ଷ୍ଟୋରି ଅଫ ଏ ରେସ୍‌‌ ଏଗନେଷ୍ଟ ଟାଇମ’ ର ପଦାଙ୍କ ଅନୁସରଣ କରି ଏହି ଉଲ୍ଲେଖନୀୟ ଫିଚର୍‌‌ ଡକ୍ୟୁମେଣ୍ଟାରୀ ଓଡ଼ିଶାର ସମୃଦ୍ଧ କାରିଗର ଐତିହ୍ୟକୁ ସଂରକ୍ଷଣ କରିବାରେ ସହାୟକ ହେବ। ବିଶ୍ୱନାଥ ରଥ ତାଙ୍କ ବ୍ୟାନର ‘ବିଏନ୍‌‌ଆର ଫିଲ୍ମସ୍‌‌’ ରେ ଏହି ଫିଚର ଡକ୍ୟୁମେଣ୍ଟାରୀର ପ୍ରଯୋଜନା କରିଥିବା ବେଳେ ନିର୍ଦ୍ଦେଶନା ଦେଇଛନ୍ତି ମୟୂର ମହାପାତ୍ର। ଓଡ଼ିଶା ତଥା ଭାରତର ସମୃଦ୍ଧ ହସ୍ତତନ୍ତ ପରମ୍ପରା କାନ୍ସ ଫିଲ୍ମ ଫେଷ୍ଟିଭାଲ ଇତିହାସରେ ପ୍ରଥମ ଥର ପାଇଁ କୋଟପାଡ଼ ହସ୍ତତନ୍ତ ପ୍ରଦର୍ଶନ କରାଯାଇଥିଲା। ଏନେଇ ବିଶ୍ୱନାଥ କହିଛନ୍ତି ଯେ, କାନ୍ସ ଫିଲ୍ମ ଫେଷ୍ଟିଭାଲ୍‌‌ରେ ଏହା ମୋର ପ୍ରଥମ ଅନୁଭୂତି। ଯଦିଓ ପୂର୍ବରୁ ସମ୍ୱଲପୁରୀ ହସ୍ତତନ୍ତ ଅନ୍ତର୍ଜାତୀୟ ସ୍ତରରେ ପ୍ରଦର୍ଶିତ ହୋଇଛି, ପ୍ରଥମ ଥର ପାଇଁ ଏହି ଚଳଚ୍ଚିତ୍ର ମହୋତ୍ସବରେ କୋଟପାଡ଼ ହସ୍ତତନ୍ତ ବିଶ୍ୱବ୍ୟାପି ପ୍ରଦର୍ଶିତ ହୋଇଥିଲା; ଯାହା ଓଡ଼ିଶା ପାଇଁ ଗର୍ବର ବିଷୟ।