ନୂଆଦିଲ୍ଲୀ: ଆର୍ଜେଣ୍ଟିନାର କିମ୍ବଦନ୍ତୀ ଫୁଟବଲର ଲିଓନେଲ୍ ମେସି ଆନ୍ତର୍ଜାତୀୟ ଫୁଟବଲରୁ ଅବସର ଘୋଷଣା କରିଛନ୍ତି। ଏହା ସହିତ ତାଙ୍କର ୨୦ ବର୍ଷର ସୁଦୀର୍ଘ ତଥା ସଫଳ ଆନ୍ତର୍ଜାତୀୟ କ୍ୟାରିୟରର ଅନ୍ତ ଘଟିଛି। ନିଜର ଏହି ଐତିହାସିକ କ୍ୟାରିୟରରେ ସେ ଦେଶ ପାଇଁ ଏକ ବିଶ୍ୱକପ୍ ଏବଂ ଦୁଇଟି କୋପା ଆମେରିକା ଟାଇଟଲ୍ ଜିତିବା ସହ ରେକର୍ଡ ୨୦୭ଟି ମ୍ୟାଚ୍ ଖେଳିଛନ୍ତି। ନିକଟରେ ସ୍ପେନ୍ ବିପକ୍ଷ ବିଶ୍ୱକପ୍ ଫାଇନାଲରେ ପରାଜୟ ଏବଂ ପିତାଙ୍କ ଦେହାନ୍ତ ପରେ ସେ ଏହି କଠିନ ନିଷ୍ପତ୍ତି ନେଇଥିବା ପ୍ରକାଶ କରିଛନ୍ତି।

୩୯ ବର୍ଷୀୟ ଏହି ତାରକା ଖେଳାଳି ନିଜର ଅଫିସିଆଲ୍ ଇନଷ୍ଟାଗ୍ରାମ ଆକାଉଣ୍ଟରେ ଏକ ଭାବପ୍ରବଣ ପୋଷ୍ଟ ଶେୟାର କରି ନିଜର ଅବସର ସମ୍ପର୍କରେ ସ୍ପଷ୍ଟ କରିଛନ୍ତି। ସେ ଲେଖିଛନ୍ତି ଯେ, "ଫାଇନାଲ୍ ପରଠାରୁ ବହୁତ ସମୟ ବିତିଯାଇଛି ଏବଂ ଅନେକ ଚିନ୍ତା କରିବା ପରେ ମୁଁ ସମସ୍ତଙ୍କୁ ଜଣାଇବାକୁ ଚାହୁଁଛି ଯେ ମୁଁ ଜାତୀୟ ଦଳରୁ ଅବସର ନେଉଛି।" ମେସି କହିଛନ୍ତି ଯେ ଏହି ନିଷ୍ପତ୍ତି ତାଙ୍କ ପାଇଁ ଅତ୍ୟନ୍ତ କଷ୍ଟଦାୟକ ଥିଲା। ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ଜୁଲାଇ ମାସରେ ସ୍ପେନ୍ ଠାରୁ ପରାଜୟର ଦୁଇ ଦିନ ପରେ ସେ ଏହି ବାର୍ତ୍ତା ଲେଖିଥିଲେ, କିନ୍ତୁ ପିତା ଜର୍ଜଙ୍କ ମୃତ୍ୟୁ ତାଙ୍କୁ ଆନ୍ତର୍ଜାତୀୟ କ୍ୟାରିୟର ଶେଷ କରିବାକୁ ଅଧିକ ଦୃଢ଼ କରିଥିଲା।

୨୦୦୫ ମସିହାରେ ଆର୍ଜେଣ୍ଟିନାର ସିନିୟର ଦଳ ପାଇଁ ପଦାର୍ପଣ କରିଥିବା ମେସି ଆନ୍ତର୍ଜାତୀୟ ଫୁଟବଲରେ ଅନେକ ଉତ୍ଥାନ-ପତନ ଦେଖିଛନ୍ତି। ବର୍ଷ ବର୍ଷ ଧରି ଟ୍ରଫି ନିକଟତର ହୋଇ ନିରାଶ ହେବା ପରେ, ସେ ଶେଷରେ ତାଙ୍କ ଦେଶକୁ ୨୦୨୨ ମସିହାରେ ବହୁ ପ୍ରତୀକ୍ଷିତ ବିଶ୍ୱକପ୍ ଟାଇଟଲ୍ ଜିତାଇଥିଲେ। ଏହାବ୍ୟତୀତ ସେ ଆର୍ଜେଣ୍ଟିନାକୁ ଦୁଇଟି କୋପା ଆମେରିକା ମୁକୁଟ ଜିତିବାରେ ମଧ୍ୟ ସାହାଯ୍ୟ କରିଥିଲେ। ସେ ନିଜର ପରିବାର, କୋଚ୍ ଏବଂ ସାଥୀ ଖେଳାଳିମାନଙ୍କୁ ଧନ୍ୟବାଦ ଜଣାଇବା ସହ ଆର୍ଜେଣ୍ଟିନାର ପ୍ରଶଂସକଙ୍କ ଭଲପାଇବା ପାଇଁ କୃତଜ୍ଞତା ଜ୍ଞାପନ କରିଛନ୍ତି।

ଜାତୀୟ ଦଳ ଛାଡିବା ନିଷ୍ପତ୍ତିରେ ସମୟର ପରିବର୍ତ୍ତନ ଏବଂ ନୂଆ ଖେଳାଳିଙ୍କ ଆଗମନ ମଧ୍ୟ ଏକ ପ୍ରମୁଖ ଭୂମିକା ଗ୍ରହଣ କରିଥିବା ମେସି ପ୍ରକାଶ କରିଛନ୍ତି। ସେ କହିଛନ୍ତି, "ନୂଆ ଯୁବ ଖେଳାଳିମାନେ ଆଗକୁ ଆସୁଛନ୍ତି, ଯେଉଁମାନେ ଏହି ସୁଯୋଗ ପାଇବାକୁ ଯୋଗ୍ୟ ଅଟନ୍ତି।" ନିଜ ବିଦାୟକାଳୀନ ବାର୍ତ୍ତା ଶେଷରେ ସେ ଈଶ୍ୱରଙ୍କୁ ତାଙ୍କୁ ଆର୍ଜେଣ୍ଟିନୀୟ କରିଥିବାରୁ ଧନ୍ୟବାଦ ଜଣାଇଥିଲେ। ଆନ୍ତର୍ଜାତୀୟ କ୍ୟାରିୟର ଶେଷ ହୋଇଥିଲେ ମଧ୍ୟ ମେସି ଇଣ୍ଟର୍ ମିଆମି କ୍ଲବ୍ ପାଇଁ ଖେଳିବା ଜାରି ରଖିବେ, ଯେଉଁଠାରେ ସେ ୨୦୨୮ ମସିହା ପର୍ଯ୍ୟନ୍ତ ଚୁକ୍ତିବଦ୍ଧ ଅଛନ୍ତି।

ଭାରତୀୟ କ୍ରିକେଟ୍ ଦଳର ଦୁଇ ମହାନ ଖେଳାଳି ବିରାଟ କୋହଲି ଏବଂ ରୋହିତ ଶର୍ମା କ୍ରିକେଟରୁ ଅବସର ନେବା ପରେ କ’ଣ କରିବେ? କ’ଣ ସେମାନେ ଭାରତୀୟ ଦଳ କିମ୍ବା ଆଇପିଏଲରେ କୋଚ୍ ଭୂମିକାରେ ନଜର ଆସିବେ? ଏହି ପ୍ରସଙ୍ଗରେ ଭାରତର ଭେଟେରାନ୍ ଅଫ୍-ସ୍ପିନର ରବିଚନ୍ଦ୍ରନ୍ ଅଶ୍ୱିନ ଏକ ବଡ଼ ପ୍ରତିକ୍ରିୟା ଦେଇଛନ୍ତି।

ଅବସର ପରେ କୋଚିଂ ଦୁନିଆରେ ପାଦ ଦେବେ କି ରୋହିତ-ବିରାଟ?

ବର୍ତ୍ତମାନ ବିରାଟ ଓ ରୋହିତ କେବଳ ଦିନିକିଆ କ୍ରିକେଟ୍ ଖେଳୁଛନ୍ତି। ଆସନ୍ତା ବର୍ଷ ହେବାକୁ ଥିବା ୨୦୨୭ ଦିନିକିଆ ବିଶ୍ୱକପ୍ ତାଙ୍କ କ୍ୟାରିୟରର ଶେଷ ଟୁର୍ଣ୍ଣାମେଣ୍ଟ ହୋଇପାରେ ବୋଲି ଆକଳନ କରାଯାଉଛି। ଟେଷ୍ଟ ଏବଂ ଟି-୨୦ ଫର୍ମାଟରୁ ଉଭୟ ଇତିମଧ୍ୟରେ ଅବସର ନେଇସାରିଛନ୍ତି। ଏଭଳି ସ୍ଥିତିରେ ସେମାନଙ୍କ ଅବସର ପରେ ଭାରତୀୟ କ୍ରିକେଟରେ ଏକ ବଡ଼ ଶୂନ୍ୟସ୍ଥାନ ସୃଷ୍ଟି ହେବ। ଅନେକ କ୍ରିକେଟ୍ ପ୍ରେମୀ ଆଶା କରୁଛନ୍ତି ଯେ ନିଜର ଦୀର୍ଘ ଅଭିଜ୍ଞତାକୁ ବ୍ୟବହାର କରି ଉଭୟ ଖେଳାଳି କୋଚିଂ ଦୁନିଆରେ ପାଦ ଦେଇପାରନ୍ତି। ତେବେ ଉଭୟଙ୍କ ସହ ବହୁ ବର୍ଷ ଧରି ଡ୍ରେସିଂ ରୁମ୍ ସେୟାର କରିଥିବା ଅଶ୍ୱିନ ଏହି ପ୍ରସଙ୍ଗରେ ନିଜର ଭିନ୍ନ ମତ ରଖିଛନ୍ତି।

ମୁମ୍ବାଇ ଇଣ୍ଡିଆନ୍ସ ସହ ଯୋଡ଼ି ହୋଇପାରନ୍ତି ରୋହିତ

ନିଜର ୟୁଟ୍ୟୁବ୍ ଚ୍ୟାନେଲରେ ଆଲୋଚନା କରିବା ବେଳେ ଅଶ୍ୱିନ କହିଛନ୍ତି ଯେ, କୌଣସି ଖେଳାଳି ଅବସର ନେବା ମାତ୍ରେ ସିଧାସଳଖ କୋଚିଂ ଆଡ଼କୁ ମୁହାଁଇବା ସମ୍ଭବ ନୁହେଁ। ତାଙ୍କ ମତରେ, ଉଭୟ ଖେଳାଳି କ୍ରିକେଟ୍ ପାଇଁ ବହୁତ ପରିଶ୍ରମ କରିଛନ୍ତି ଏବଂ ଖେଳରୁ ବିଦାୟ ନେବା ପରେ କିଛି ଦିନ ବିଶ୍ରାମ ନେବାକୁ ପସନ୍ଦ କରିବେ। ତେବେ ପରବର୍ତ୍ତୀ ସମୟରେ ହିଟମ୍ୟାନ୍ ରୋହିତ ଶର୍ମା ଆଇପିଏଲ୍ ଫ୍ରାଞ୍ଚାଇଜ୍ ମୁମ୍ବାଇ ଇଣ୍ଡିଆନ୍ସ ସହ କୌଣସି ନା କୌଣସି ଭୂମିକାରେ ଯୋଡ଼ି ହୋଇପାରନ୍ତି ବୋଲି ସେ ଆକଳନ କରିଛନ୍ତି।

ବିରାଟଙ୍କ ଭବିଷ୍ୟତକୁ ନେଇ ଅଶ୍ୱିନଙ୍କ ଆକଳନ

ଅନ୍ୟପକ୍ଷରେ ବିରାଟ କୋହଲିଙ୍କ କ୍ଷେତ୍ରରେ ଅଶ୍ୱିନ ଏକ ସମ୍ପୂର୍ଣ୍ଣ ଭିନ୍ନ ଚିତ୍ର ଉପସ୍ଥାପନ କରିଛନ୍ତି। ସେ କହିଛନ୍ତି ଯେ ମୋତେ ଲାଗୁନାହିଁ କି ବିରାଟ ତୁରନ୍ତ କୋଚ୍ ହେବାକୁ ପ୍ରସ୍ତୁତ ଥିବେ, ବୋଧହୁଏ ସେ ଖେଳରୁ ଏକ ଲମ୍ବା ବିରାମ ନେବାକୁ ଚାହିଁବେ। ସୂଚନାଯୋଗ୍ୟ ଯେ, କୋହଲି ନିଜର ଭବିଷ୍ୟତ ଯୋଜନା ବିଷୟରେ ପୂର୍ବରୁ କିଛି ସୂଚନା ଦେଇସାରିଛନ୍ତି। ବର୍ତ୍ତମାନ ସେ ଗଣମାଧ୍ୟମଠାରୁ ଦୂରରେ ରହୁଛନ୍ତି ଏବଂ ନିଜ ପରିବାର ସହ ଲଣ୍ଡନରେ ରହୁଥିବା ଦେଖିବାକୁ ମିଳୁଛି। ସେ କେବଳ ଦିନିକିଆ ସିରିଜ୍ ଖେଳିବା ପାଇଁ ଭାରତ ଆସୁଛନ୍ତି। ତେଣୁ ଅବସର ପରେ ସେ କ୍ରିକେଟ୍ କୋଚିଂ ଠାରୁ ଦୂରରେ ରହି ନିଜ ବ୍ୟକ୍ତିଗତ ଜୀବନ ଉପରେ ଅଧିକ ଧ୍ୟାନ ଦେଇପାରନ୍ତି ବୋଲି ଆଶା କରାଯାଉଛି।

ଭୁବନେଶ୍ୱର: ଓଡ଼ିଶାର ପୋଲିସ ମହାନିର୍ଦ୍ଦେଶକ ବା ଡିଜିପି ୱାଇ.ବି ଖୁରାନିଆ ଆସନ୍ତା ଅଗଷ୍ଟ ୧୬ରେ ଅବସର ନେବେ। ଏ ନେଇ ରାଜ୍ୟ ସରକାରଙ୍କ ଗୃହ ବିଭାଗ ପକ୍ଷରୁ ସବୁଜ ସଙ୍କେତ ପ୍ରଦାନ କରାଯାଇଛି । ଗୃହ ବିଭାଗ ପକ୍ଷରୁ ପ୍ରକାଶିତ ବିଜ୍ଞପ୍ତି ଅନୁଯାୟୀ, ନିଜ ଚାକିରି କାଳ ପୂରଣ କରିବା ପରେ ଅଗଷ୍ଟ ୧୬ ତାରିଖରୁ ଶ୍ରୀ ଖୁରାନିଆଙ୍କୁ ଅବସର ଗ୍ରହଣ କରିବା ପାଇଁ ଅନୁମତି ପ୍ରଦାନ କରାଯାଇଛି। 

ୱାଇ.ବି ଖୁରାନିଆ ଜଣେ ବରିଷ୍ଠ ୧୯୯୦-ବ୍ୟାଚ୍ ଆଇପିଏସ୍ ଅଧିକାରୀ ଅଟନ୍ତି। ସେ ୨୦୨୪ ମସିହାରେ ଓଡ଼ିଶାର ଡିଜିପି ଭାବେ ଦାୟିତ୍ୱ ଗ୍ରହଣ କରିଥିଲେ। ଆସନ୍ତା ମାସରେ ଶ୍ରୀ ଖୁରାନିଆ ପଦବୀରୁ ଅବସର ନେବାକୁ ଯାଉଥିବା ବେଳେ ରାଜ୍ୟର ପରବର୍ତ୍ତୀ ନୂଆ ଡିଜିପି ନିଯୁକ୍ତି ପାଇଁ ପ୍ରକ୍ରିୟା ଆରମ୍ଭ ହୋଇଯାଇଛି। ସୂତ୍ରରୁ ପ୍ରକାଶ ଯେ, ନୂତନ ପୋଲିସ ମହାନିର୍ଦ୍ଦେଶକ ଚୟନ ପାଇଁ ଆସନ୍ତା ଅଗଷ୍ଟ ୭ ତାରିଖରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି। ପୂର୍ବରୁ ଗତ ମେ' ମାସରେ ରାଜ୍ୟ ସରକାର ୧୧ ଜଣ ବରିଷ୍ଠ ଆଇପିଏସ୍ ଅଧିକାରୀଙ୍କ ଏକ ପ୍ୟାନେଲ୍ ୟୁପିଏସସି (UPSC) ନିକଟକୁ ପଠାଇଥିଲେ। ପ୍ରଚଳିତ ନିୟମ ଅନୁଯାୟୀ, ୟୁପିଏସସି ଚୟନ କମିଟି ବରିଷ୍ଠତା ଭିତ୍ତିରେ ଏହି ପ୍ୟାନେଲରୁ ୩ ଜଣ ଅଧିକାରୀଙ୍କ ନାମ ବାଛିବେ ଏବଂ ଚୂଡ଼ାନ୍ତ ନିଯୁକ୍ତି ପାଇଁ ସେମାନଙ୍କ ନାମ ରାଜ୍ୟ ସରକାରଙ୍କ ନିକଟକୁ ସୁପାରିସ କରିବେ। ଏହି ତାଲିକାରୁ ରାଜ୍ୟ ସରକାର ପରବର୍ତ୍ତୀ ଡିଜିପିଙ୍କୁ ନିଯୁକ୍ତି ଦେବେ।

ଆନ୍ତର୍ଜାତୀୟ ଫୁଟବଲ୍ ଜଗତରୁ ଏକ ବଡ଼ ଖବର ସାମ୍ନାକୁ ଆସିଛି। ପର୍ତ୍ତୁଗାଲର କିମ୍ବଦନ୍ତୀ ଫୁଟବଲ୍ ଖେଳାଳି କ୍ରିଷ୍ଟିଆନୋ ରୋନାଲ୍ଡୋ ଖୁବଶୀଘ୍ର ଆନ୍ତର୍ଜାତୀୟ ଫୁଟବଲରୁ ଅବସର ନେବାକୁ ଯାଉଛନ୍ତି। ଏକ ରିପୋର୍ଟ ଅନୁଯାୟୀ, ଆସନ୍ତା ସେପ୍ଟେମ୍ବର ୨୪ ତାରିଖ ଦିନ ପର୍ତ୍ତୁଗାଲ୍ ଏବଂ ୱେଲ୍ସ ମଧ୍ୟରେ ଖେଳାଯିବାକୁ ଥିବା ୟୁଏଫଏ (UEFA) ନେସନ୍ସ ଲିଗ୍ ମ୍ୟାଚ୍ ତାଙ୍କର ଶେଷ ଆନ୍ତର୍ଜାତୀୟ ମ୍ୟାଚ୍ ହେବାର ସମ୍ଭାବନା ରହିଛି।

ଶେଷ ମ୍ୟାଚ୍ ପାଇଁ ଲିସବନର ଷ୍ଟାଡିୟମ୍

ରିପୋର୍ଟ ମୁତାବକ, ୪୧ ବର୍ଷୀୟ ରୋନାଲ୍ଡୋ ନିଜର ଶେଷ ମ୍ୟାଚ୍ ଲିସବନର ଜୋସ୍ ଆଲଭାଲେଡ୍ ଷ୍ଟାଡିୟମ୍ (Jose Alvalade Stadium) ଠାରେ ଖେଳିବେ। ଏହି ଷ୍ଟାଡିୟମ୍ ରୋନାଲ୍ଡୋଙ୍କ ପାଇଁ ବେଶ୍ ଗୁରୁତ୍ୱପୂର୍ଣ୍ଣ କାରଣ ୨୦୦୩ ମସିହାରେ ସେହିଠାରୁ ହିଁ ସେ ନିଜର ଆନ୍ତର୍ଜାତୀୟ ଫୁଟବଲ୍ କ୍ୟାରିୟର୍ ଆରମ୍ଭ କରିଥିଲେ। ଖେଳାଳିଙ୍କୁ ବିଦାୟ ଦେବା ପାଇଁ ଏହିଠାରେ ଏକ ବଡ଼ ଆୟୋଜନ ହେବ ବୋଲି ଜଣେ ପର୍ତ୍ତୁଗୀଜ୍ ଏଜେଣ୍ଟ ଏକ ସାକ୍ଷାତକାରରେ ସୂଚନା ଦେଇଛନ୍ତି।

ଫିଫା ବିଶ୍ୱକପରେ ଥିଲା ଶେଷ ଝଲକ

ନିକଟରେ ଶେଷ ହୋଇଥିବା ୨୦୨୬ ଫିଫା ବିଶ୍ୱକପ୍ ରୋନାଲ୍ଡୋଙ୍କ କ୍ୟାରିୟରର ଶେଷ ବିଶ୍ୱକପ୍ ଥିଲା। ଏହି ଟୁର୍ଣ୍ଣାମେଣ୍ଟର ରାଉଣ୍ଡ-୧୬ ମ୍ୟାଚରେ ପର୍ତ୍ତୁଗାଲ୍ ବିଶ୍ୱକପ୍ ବିଜେତା ସ୍ପେନ୍ ଠାରୁ ୧-୦ ଗୋଲରେ ପରାସ୍ତ ହୋଇ ବିଦାୟ ନେଇଥିଲା। ସେହି ମ୍ୟାଚ୍ ପୂର୍ବରୁ ରୋନାଲ୍ଡୋ ସ୍ପଷ୍ଟ କରିଥିଲେ ଯେ, ବିଶ୍ୱକପ୍ ମଞ୍ଚରେ ତାଙ୍କର ଏହା ଶେଷ ଅବଦାନ।

ରୋନାଲ୍ଡୋଙ୍କ ଐତିହାସିକ ରେକର୍ଡ

୨୩ ବର୍ଷର ସୁଦୀର୍ଘ ଆନ୍ତର୍ଜାତୀୟ କ୍ୟାରିୟରରେ ରୋନାଲ୍ଡୋ ଅନେକ ଐତିହାସିକ ରେକର୍ଡ ନିଜ ନାମରେ କରିଛନ୍ତି। ସେ ମୋଟ ୨୩୩ଟି ମ୍ୟାଚ୍ ଖେଳି ବିଶ୍ୱର ସର୍ବାଧିକ କ୍ୟାପ୍ ହାସଲକାରୀ ଖେଳାଳି ହୋଇଥିବା ବେଳେ ୧୪୬ ଗୋଲ୍ ସହ ପୁରୁଷ ଆନ୍ତର୍ଜାତୀୟ ଫୁଟବଲରେ ସର୍ବାଧିକ ଗୋଲ୍ ସ୍କୋରର ଭାବେ ଇତିହାସ ରଚିଛନ୍ତି। ଏହାସହ ସେ ୪୬ଟି ଆସିଷ୍ଟ୍ ମଧ୍ୟ କରିଛନ୍ତି। ତାଙ୍କ ନେତୃତ୍ୱରେ ପର୍ତ୍ତୁଗାଲ୍ ୨୦୧୬ ମସିହାରେ ୟୁରୋ କପ୍ ଏବଂ ୨୦୧୯ ତଥା ୨୦୨୫ ରେ ନେସନ୍ସ ଲିଗ୍ ଟାଇଟଲ୍ ଜିତିବାରେ ସଫଳ ହୋଇଥିଲା। ଯଦି ଏହି ଖବର ସତ୍ୟ ହୁଏ, ତେବେ ଫୁଟବଲ୍ ଇତିହାସର ଜଣେ ମହାନ ଖେଳାଳିଙ୍କ ଏକ ସୁବର୍ଣ୍ଣ ଯୁଗର ଅନ୍ତ ଘଟିବ।

ଇଂଲଣ୍ଡର ତାରକା ଅଲରାଉଣ୍ଡର ତଥା ଟେଷ୍ଟ ଅଧିନାୟକ ବେନ୍ ଷ୍ଟୋକ୍ସ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିବା ପରେ କ୍ରିକେଟ୍ ଜଗତରେ ଆଲୋଡ଼ନ ସୃଷ୍ଟି ହୋଇଛି। ନ୍ୟୁଜିଲ୍ୟାଣ୍ଡ ବିପକ୍ଷ ତୃତୀୟ ଟେଷ୍ଟ ମ୍ୟାଚ୍ ଚାଲିଥିବା ବେଳେ ସେ ଏହି ଆଶ୍ଚର୍ଯ୍ୟଜନକ ନିଷ୍ପତ୍ତି ନେଇଥିଲେ। ତାଙ୍କର ଏହି ନିଷ୍ପତ୍ତି ପରେ ଭାରତୀୟ କ୍ରିକେଟ୍ କିମ୍ବଦନ୍ତୀ ସଚିନ ତେନ୍ଦୁଲକର ତାଙ୍କୁ ସାମାଜିକ ଗଣମାଧ୍ୟମ 'ଏକ୍ସ' (X) ରେ ଏକ ଭାବପୂର୍ଣ୍ଣ ବାର୍ତ୍ତା ଦେଇ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।

ସଚିନଙ୍କ ଭାବପୂର୍ଣ୍ଣ ବାର୍ତ୍ତା

ସଚିନ ନିଜ ପୋଷ୍ଟରେ ଷ୍ଟୋକ୍ସଙ୍କ ଖେଳ ପ୍ରତି ଥିବା ଉତ୍ସାହ ଏବଂ ନିର୍ଭୀକ ମନୋଭାବକୁ ପ୍ରଶଂସା କରିଛନ୍ତି। ସେ ଲେଖିଛନ୍ତି, "@benstokes38, ଆପଣ ଯେଉଁଭଳି ଭାବରେ ଖେଳରେ ଶକ୍ତି ଭରିଦିଅନ୍ତି, ତାହାକୁ ମୁଁ ସବୁବେଳେ ପ୍ରଶଂସା କରିଆସିଛି। ଆପଣଙ୍କର ସକାରାତ୍ମକ ଚିନ୍ତାଧାରା, ନିର୍ଭୀକ ମନୋଭାବ ଏବଂ ଚାପ ପରିସ୍ଥିତିରେ ମ୍ୟାଚର ମୋଡ଼ ବଦଳାଇବାର କ୍ଷମତା ସବୁବେଳେ ସ୍ୱତନ୍ତ୍ର ଥିଲା। ଜଣେ ଅଲରାଉଣ୍ଡର ଭାବରେ ଆପଣ ଇଂଲଣ୍ଡର ଶ୍ରେଷ୍ଠ ଖେଳାଳିମାନଙ୍କ ମଧ୍ୟରୁ ଜଣେ। ଅଧିନାୟକ ଭାବରେ ଆପଣଙ୍କର ଦୃଢ଼ ରଣନୀତି ଏବଂ ଖେଳକୁ ପଢ଼ିବାର କ୍ଷମତା ଦଳକୁ ଏକ ନୂଆ ଦିଗ ଦେଇଛି"। ସଚିନ ଆହୁରି ମଧ୍ୟ ମଜାଳିଆ ଢଙ୍ଗରେ ଲେଖିଛନ୍ତି ଯେ, ଷ୍ଟୋକ୍ସଙ୍କ ପାଇଁ କ୍ରିକେଟ୍ ପଡ଼ିଆର ମଧ୍ୟଭାଗରୁ ଦୂରେଇ ରହିବା ସବୁଠାରୁ କଠିନ କାର୍ଯ୍ୟ ହେବ ଏବଂ ତାଙ୍କୁ ଆଗାମୀ ଇନିଂସ୍ ପାଇଁ ଶୁଭକାମନା ଜଣାଇଛନ୍ତି।

ଇଂଲଣ୍ଡ ପାଇଁ ଷ୍ଟୋକ୍ସଙ୍କ ଅବଦାନ

ବେନ୍ ଷ୍ଟୋକ୍ସ ନିଜର ୧୫ ବର୍ଷର କ୍ୟାରିୟରରେ ଇଂଲଣ୍ଡକୁ ଅନେକ ସ୍ମରଣୀୟ ବିଜୟ ଭେଟି ଦେଇଛନ୍ତି। ବିଶେଷ କରି ଟେଷ୍ଟ ଦଳର ନେତୃତ୍ୱ ନେବା ପରେ ସେ ଇଂଲଣ୍ଡ କ୍ରିକେଟରେ ଏକ ନୂଆ ଯୁଗର ଆରମ୍ଭ କରିଥିଲେ। ତାଙ୍କ ନେତୃତ୍ୱରେ ଇଂଲଣ୍ଡ ୪୪ଟି ଟେଷ୍ଟ ମ୍ୟାଚ୍ ଖେଳି ୨୪ଟି ରେ ବିଜୟୀ ହୋଇଥିବା ବେଳେ ୧୭ଟି ରେ ପରାସ୍ତ ହୋଇଛି ଏବଂ ଦୁଇଟି ମ୍ୟାଚ୍ ଡ୍ର ରହିଛି। ଆକ୍ରମଣାତ୍ମକ ଖେଳ ପ୍ରଦର୍ଶନ ମାଧ୍ୟମରେ ସେ ଟେଷ୍ଟ କ୍ରିକେଟ୍ ଖେଳିବାର ଶୈଳୀକୁ ସମ୍ପୂର୍ଣ୍ଣ ରୂପେ ବଦଳାଇ ଦେଇଥିଲେ।

ବିବାଦ ଏବଂ ଅବସର ନିଷ୍ପତ୍ତି

ନିକଟରେ ଇଂଲଣ୍ଡ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଖେଳାଯାଇଥିବା ତିନି ଟିକିଆ ଟେଷ୍ଟ ସିରିଜରେ ନ୍ୟୁଜିଲ୍ୟାଣ୍ଡ ୨-୧ ରେ ସିରିଜ୍ ବିଜୟୀ ହୋଇଛି। ନଟିଂହାମଠାରେ ଖେଳାଯାଇଥିବା ତୃତୀୟ ଟେଷ୍ଟରେ ଇଂଲଣ୍ଡ ୧୬୦ ରନ୍ ରେ ପରାସ୍ତ ହୋଇଥିଲା। ତେବେ ଷ୍ଟୋକ୍ସଙ୍କ ଅନ୍ତିମ ସିରିଜ୍ ବିବାଦମୁକ୍ତ ନଥିଲା। ଦଳର ନିୟମ ଉଲ୍ଲଂଘନ କରିଥିବା କାରଣରୁ ତାଙ୍କୁ ଦ୍ୱିତୀୟ ଟେଷ୍ଟରୁ ବାଦ୍ ଦିଆଯାଇଥିଲା। ଏହି ସବୁ ସତ୍ତ୍ୱେ ଷ୍ଟୋକ୍ସଙ୍କ ଅବସର ଇଂଲଣ୍ଡ କ୍ରିକେଟ୍ ପାଇଁ ଏକ ଅପୂରଣୀୟ କ୍ଷତି ବୋଲି ବିବେଚନା କରାଯାଉଛି।

ଭାରତୀୟ ମହିଳା କ୍ରିକେଟ୍ ଦଳର ଅଧିନାୟିକା ହରମନପ୍ରୀତ କୌର ଖୁବ୍‌ଶୀଘ୍ର ଖେଳରୁ ଅବସର ନେବାର କୌଣସି ସମ୍ଭାବନା ନାହିଁ। ଆଗାମୀ ମହିଳା ଟି-୨୦ ବିଶ୍ୱକପ୍ ତାଙ୍କର ଶେଷ ବିଶ୍ୱକପ୍ ହେବ କି ବୋଲି ଜଣେ ସାମ୍ବାଦିକଙ୍କ ପ୍ରଶ୍ନର କଡ଼ା ଜବାବ ଦେଇଛନ୍ତି ହରମନପ୍ରୀତ। ଆସନ୍ତା ଜୁନ୍ ୧୨ ତାରିଖରୁ ଆରମ୍ଭ ହେବାକୁ ଯାଉଥିବା ଏହି ମେଗା ଟୁର୍ଣ୍ଣାମେଣ୍ଟ ପୂର୍ବରୁ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ପକ୍ଷରୁ ରବିବାର ଦିନ 'କ୍ୟାପ୍ଟେନ୍ସ ଡେ' ବା ଅଧିନାୟକ ଦିବସ ଆୟୋଜନ କରାଯାଇଥିଲା। ଏହି ଅବସରରେ ଗଣମାଧ୍ୟମ ପ୍ରତିନିଧିମାନେ ସମସ୍ତ ଅଂଶଗ୍ରହଣକାରୀ ଦଳର ଅଧିନାୟିକାମାନଙ୍କୁ ବିଭିନ୍ନ ପ୍ରଶ୍ନ ପଚାରିଥିଲେ।

ସାମ୍ବାଦିକଙ୍କ ପ୍ରଶ୍ନ ଏବଂ ହରମନପ୍ରୀତଙ୍କ ଜବାବ

ଅଧିବେଶନ ମଝିରେ ଜଣେ ସାମ୍ବାଦିକ ୩୭ ବର୍ଷୀୟା ଭାରତୀୟ ଅଧିନାୟିକାଙ୍କୁ ପଚାରିଥିଲେ ଯେ ସେ ବିଶ୍ୱକପ୍ ପରେ ଅବସର ନେବାକୁ କୌଣସି ଯୋଜନା କରିଛନ୍ତି କି? ଏହାର ଉତ୍ତରରେ ହରମନପ୍ରୀତ ଓଲଟା ସାମ୍ବାଦିକଙ୍କୁ ପ୍ରଶ୍ନ କରିଥିଲେ ଯେ, "ଆପଣଙ୍କୁ କ'ଣ ଲାଗୁଛି ମୁଁ ଖେଳିବା ବନ୍ଦ କରିଦେବା ଉଚିତ୍?" ସାମ୍ବାଦିକ ଜଣକ ଯେତେବେଳେ କହିଥିଲେ ଯେ ସେ କେବଳ ଏହି ପ୍ରଶ୍ନ ପଚାରୁଛନ୍ତି, ସେତେବେଳେ ହରମନପ୍ରୀତ ଏକ ସ୍ମିତହାସ୍ୟ ଦେଇ କହିଥିଲେ, "ଯଦି ନୁହେଁ, ତେବେ ଆପଣ କାହିଁକି ପଚାରୁଛନ୍ତି?" ଉଭୟଙ୍କ ମଧ୍ୟରେ ଏହି କଥାବାର୍ତ୍ତା ଏବେ ବେଶ୍ ଚର୍ଚ୍ଚାର ବିଷୟ ପାଲଟିଛି।

ଜୁନ୍ ୧୪ରେ ପାକିସ୍ତାନ ବିପକ୍ଷରେ ଅଭିଯାନ ଆରମ୍ଭ କରିବ ଭାରତ

ଆସନ୍ତା ଜୁନ୍ ୧୪ ତାରିଖରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନ ବିପକ୍ଷ ମ୍ୟାଚ୍ ସହ ଭାରତୀୟ ଦଳ ଏହି ମହିଳା ଟି-୨୦ ବିଶ୍ୱକପ୍‌ରେ ନିଜର ଅଭିଯାନ ଆରମ୍ଭ କରିବ। ଅନ୍ୟପକ୍ଷରେ, ଜୁନ୍ ୧୨ ତାରିଖରେ ଆୟୋଜକ ଇଂଲଣ୍ଡ ଏବଂ ଶ୍ରୀଲଙ୍କା ମଧ୍ୟରେ ଉଦ୍‌ଘାଟନୀ ମ୍ୟାଚ୍ ଖେଳାଯିବ। ସୂଚନାଯୋଗ୍ୟ ଯେ, ସମ୍ପ୍ରତି ଇଂଲଣ୍ଡ ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍‌ରେ ପରାଜୟର ସମ୍ମୁଖୀନ ହେବା ପରେ ଭାରତ ବିଶ୍ୱକପ୍ ଖେଳିବାକୁ ଯାଉଛି।

ଦଳର ପ୍ରସ୍ତୁତି ଉପରେ କ'ଣ କହିଲେ ଅଧିନାୟିକା?

ଇଂଲଣ୍ଡ ବିପକ୍ଷ ସିରିଜ୍ ପରାଜୟ ସମ୍ପର୍କରେ ମତ ରଖି ହରମନପ୍ରୀତ କହିଛନ୍ତି ଯେ, "ଆମେ ଆମର ଲକ୍ଷ୍ୟ ପ୍ରତି ସ୍ପଷ୍ଟ ଅଛୁ। ବିଶ୍ୱକପ୍ ପୂର୍ବରୁ ଆମ ହାତରେ ଆହୁରି ଦୁଇଟି ଅଭ୍ୟାସ ମ୍ୟାଚ୍ ବାକି ଅଛି, ଯେଉଁଥିରେ ଆମେ ଦଳର ବିଭିନ୍ନ ସଂଯୋଜନା (କମ୍ବିନେସନ୍) ଉପରେ ବିଚାର କରିପାରିବୁ।" ସେ ମହିଳା ପ୍ରିମିୟର ଲିଗ୍ (ଡବ୍ଲୁପିଏଲ୍)ରେ ଶ୍ରେଷ୍ଠ ପ୍ରଦର୍ଶନ କରିଥିବା ଷ୍ଟାର୍ ଖେଳାଳି ରାଧା ଯାଦବଙ୍କ ଉଦାହରଣ ଦେବା ସହ ମଧ୍ୟକ୍ରମ ବ୍ୟାଟର ଭାରତୀ ଫୁଲମାଲୀଙ୍କ ଉପରେ ମଧ୍ୟ ବିଶେଷ ଭରସା ପ୍ରକଟ କରିଛନ୍ତି।

ନୂଆଦିଲ୍ଲୀ: ଅବସର ନେଲେ ଭାରତୀୟ ଟେନିସ୍ କିମ୍ବଦନ୍ତୀ ରୋହନ ବୋପନ୍ନା। ଆଜି ଷ୍ଟାର ଟେନିସ୍ ଖେଳାଳି ନିଜର  ଅବସର ଘୋଷଣା କରିଛନ୍ତି। ୨୦୨୪ ପ୍ୟାରିସ୍ ଅଲିମ୍ପିକ୍ସରେ, ବୋପନ୍ନା ଏବଂ ଏନ. ଶ୍ରୀରାମ ବାଲାଜୀଙ୍କ ଦଳ, ପୁରୁଷ ଡବଲ୍ସ ପ୍ରତିଯୋଗିତାର ପ୍ରଥମ ରାଉଣ୍ଡରେ ୭-୫, ୬-୨ରେ ପରାସ୍ତ ହୋଇଥିଲା। ରୋହନ ବୋପନ୍ନା ଏବେ ନିଶ୍ଚିତ କରିଛନ୍ତି ଯେ, ତାହା ତାଙ୍କ କ୍ୟାରିଅରର ଶେଷ ମ୍ୟାଚ୍ ଥିଲା। ୨୨ବର୍ଷ ଧରି ବୋପନ୍ନା ଅନ୍ତର୍ଜାତୀୟ ଟେନିସରେ ଭାରତକୁ ପ୍ରତିନିଧିତ୍ୱ କରିଥିଲେ। କିନ୍ତୁ ଏବେ ସେ ତାଙ୍କ ଐତିହାସକ କ୍ୟାରିଅରରୁ ଅବସର ନେବାକୁ ନିଷ୍ପତ୍ତି ନେଇଛନ୍ତି।

ନୂଆଦିଲ୍ଲୀ: ଗୋଟିଏ ଦିନରେ ୨ ଅଭିଜ୍ଞ କ୍ରିକେଟର ଅବସର ଘୋଷଣା କରିଛନ୍ତି। ପ୍ରଥମେ ଅଷ୍ଟ୍ରେଲିଆର ଷ୍ଟାର ଅଲରାଉଣ୍ଡର ଗ୍ଲେନ୍ ମ୍ୟାକ୍ସୱେଲ୍ ଆଜି ଦିନିକିଆରୁ ଅବସର ଘୋଷଣା କରିଥିବା ବେଳେ ଦକ୍ଷିଣ ଆଫ୍ରିକାର ଖେଳାଳି ହେନରିଚ୍ କ୍ଲାସେନ୍ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି।

ଦକ୍ଷିଣ ଆଫ୍ରିକାର ଅଭିଜ୍ଞ ଖେଳାଳି ହେନରିଚ୍ କ୍ଲାସେନ୍ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। କ୍ଲାସେନ୍ ଦକ୍ଷିଣ ଆଫ୍ରିକା ପାଇଁ ତାଙ୍କ ସମଗ୍ର ଅନ୍ତର୍ଜାତୀୟ କ୍ୟାରିୟରରେ ୩୨୪୫ ରନ୍ କରିଥିଲେ।

ହେନରିଚ୍ କ୍ଲାସେନ୍ ଇନଷ୍ଟାଗ୍ରାମରେ ତାଙ୍କ ପରିବାର ସହିତ ଏକ ଫଟୋ ସେୟାର କରିଛନ୍ତି, ଯାହା ମାଧ୍ୟମରେ ସେ କ୍ରିକେଟ ଛାଡିବା ଘୋଷଣା କରିଛନ୍ତି। ସେ କହିଛନ୍ତି, “ଦେଶକୁ ପ୍ରତିନିଧିତ୍ୱ କରିବା ମୋ ପାଇଁ ଗର୍ବର ବିଷୟ, ମୁଁ ପିଲାଦିନରୁ ଏହି ସ୍ୱପ୍ନ ଦେଖୁଥିଲି। କ୍ଲାସେନ୍ ଏହା ମଧ୍ୟ କହିଛନ୍ତି ଯେ ଏହି ଚମତ୍କାର କ୍ରିକେଟ କ୍ୟାରିୟରରେ, ସେ ଏପରି ଲୋକଙ୍କୁ ମଧ୍ୟ ଭେଟିଥିଲେ, ଯାହାଙ୍କ ସହିତ ତାଙ୍କ ଜୀବନ ବଦଳି ଯାଇଥିଲା।

ହେନରିଚ୍ କ୍ଲାସେନ୍ ଅବସରର କାରଣ ଜଣାଇ କହିଛନ୍ତି, ମୁଁ ଏବେ ଆଶା କରୁଛି ଯେ ମୁଁ ପରିବାର ସହିତ ଅଧିକ ସମୟ ବିତାଇ ପାରିବି କାରଣ ମୁଁ ଅବସର ପରେ ଏହା କରିପାରିବି।” କ୍ଲାସେନ୍ ସେହି ସମସ୍ତ ଲୋକଙ୍କୁ ଧନ୍ୟବାଦ ଜଣାଇଛନ୍ତି ଯେଉଁମାନେ ତାଙ୍କୁ କ୍ରିକେଟରେ ଏହି ସ୍ଥାନରେ ପହଞ୍ଚିବାରେ ସାହାଯ୍ୟ କରିଛନ୍ତି। ଗତ ବର୍ଷ ଜାନୁଆରୀରେ ହେନରିଚ୍ କ୍ଲାସେନ୍ ଟେଷ୍ଟ କ୍ରିକେଟରୁ ଅବସର ନେଇଥିଲେ।

ସେ ତାଙ୍କ ରେଡ୍-ବଲ୍ କ୍ୟାରିୟରରେ କେବଳ ୪ଟି ମ୍ୟାଚ୍ ଖେଳିଥିଲେ ଯେଉଁଥିରେ ସେ କେବଳ ୧୦୪ ରନ୍ କରିପାରିଥିଲେ। ଏବେ ସେ ଦିନିକିଆ ଏବଂ ଟି୨୦ ଫର୍ମାଟକୁ ମଧ୍ୟ ଅଲବିଦା କହିସାରିଛନ୍ତି। ତାଙ୍କର ୬୦ଟି ଦିନିକିଆ କ୍ୟାରିୟରରେ, ସେ ୪ଟି ଶତକ ଏବଂ ୧୧ଟି ଅର୍ଦ୍ଧଶତକ ସହିତ ୨୧୪୧ ରନ୍ କରିଥିଲେ। ଟି୨୦ରେ ତାଙ୍କର ବିସ୍ଫୋରକ ବ୍ୟାଟିଂ ପାଇଁ ସେ ପରିଚୟ ପାଇଥିଲେ, ଯେଉଁଠାରେ ସେ ଦକ୍ଷିଣ ଆଫ୍ରିକା ପାଇଁ ୫୮ଟି ମ୍ୟାଚ୍ ରେ ୧୦୦୦ ରନ୍ କରିଥିଲେ।

ସେହିପରି, ଅଷ୍ଟ୍ରେଲିଆର ଷ୍ଟାର ଅଲରାଉଣ୍ଡର ଗ୍ଲେନ୍ ମ୍ୟାକ୍ସୱେଲ୍ ଆଜି ଦିନିକିଆରୁ ଅବସର ଘୋଷଣା କରିଛନ୍ତି। ଦୁଇଟି ODI ବିଶ୍ୱକପ(୨୦୧୫-୨୦୨୩)ରେ ଅଷ୍ଟ୍ରେଲିଆର ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ଗ୍ଲେନ୍ ମ୍ୟାକ୍ସୱେଲ୍ ସୋମବାର ODI ଫର୍ମାଟରୁ ଅବସର ନେଇଛନ୍ତି।

ମ୍ୟାକ୍ସୱେଲଙ୍କ ODI କ୍ୟାରିଅର୍ ୨୦୧୨ରେ ଆରମ୍ଭ ହୋଇଥିଲା। ୧୪୯ଟି ODI ରେ ଅଷ୍ଟ୍ରେଲିଆର ପ୍ରତିନିଧିତ୍ୱ କରି, ଏହି ଷ୍ଟାର ଅଲରାଉଣ୍ଡର ମୋଟ ୩୯୯୦ ରନ କରିଥିଲେ ଏବଂ ୭୭ ୱିକେଟ ନେଇଥିଲେ। ସେ ୨୦୧୫ ଏବଂ ୨୦୨୩ ବିଶ୍ୱକପ୍ ବିଜୟୀ ଦଳର ମଧ୍ୟ ଅଂଶ ଥିଲେ। ଏହି ଫର୍ମାଟରେ ମ୍ୟାକ୍ସୱେଲଙ୍କ ନାମରେ ଚାରୋଟି ଶତକ ଏବଂ ୨୩ ଅର୍ଦ୍ଧଶତକ ଅଛି। ୩୬ ବର୍ଷୀୟ ଖେଳାଳି ୨୦୨୩ ବିଶ୍ୱକପ୍ ସମୟରେ ଆଫଗାନିସ୍ତାନ ବିପକ୍ଷରେ ୨୦୧ ରନର ଅପରାଜିତ ଇନିଂସ ଖେଳିଥିଲେ। ଏହି ଫର୍ମାଟରେ ଏହା ତାଙ୍କ କ୍ୟାରିୟରର ସର୍ବୋତ୍ତମ ଇନିଂସ ମଧ୍ୟରୁ ଗୋଟିଏ ଥିଲା। ସେ ବୋଲିଂରେ ମଧ୍ୟ ବିପକ୍ଷ ବ୍ୟାଟସମ୍ୟାନଙ୍କ ପାଇଁ ସମସ୍ୟାର କାରଣ ସାଜିଛନ୍ତି। ସେ ଚାରିଥର ଏକ ଇନିଂସରେ ଚାରି ୱିକେଟ ନେଇଥିଲେ। ଫିଲ୍ଡିଂରେ ମଧ୍ୟ ସେ ଅତୁଳନୀୟ ଥିଲେ। ଏହି ଫର୍ମାଟରେ ତାଙ୍କ ନାମରେ ୯୧ କ୍ୟାଚ୍ ଅଛି।

ଲଣ୍ଡନ:  ଇଂଲଣ୍ଡର ମହାନ ବୋଲର ଜେମ୍ସ ଆଣ୍ଡରସନଙ୍କ ସ୍ୱର୍ଣ୍ଣିମ କ୍ୟାରିୟର ଶେଷ ହୋଇଛି । କ୍ୟାରିୟରର ଅନ୍ତିମ ଟେଷ୍ଟରେ ଏହି ମହାନ ବୋଲର ୪ଟି ୱିକେଟ ହାସଲ କରିଥିଲେ। ଓଭରାଲ ୭୦୪ ୱିକେଟ ସହ ସେ ତାଙ୍କ କ୍ୟାରିୟର ଶେଷ କରିଛନ୍ତି। ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କଠାରୁ ଆରମ୍ଭ କରି ଅନ୍ୟ ପ୍ରତିଷ୍ଠିତ ଖେଳାଳିମାନେ ତାଙ୍କ କ୍ରିକେଟ କ୍ୟାରିୟରକୁ ପ୍ରଶଂସା କରିଛନ୍ତି।

Hey Jimmy!

You've bowled the fans over with that incredible 22-year spell. Here's a little wish as you bid goodbye.

It has been a joy to watch you bowl – with that action, speed, accuracy, swing and fitness. You've inspired generations with your game.

Wish you a wonderful life… pic.twitter.com/ETp2e6qIQ1

— Sachin Tendulkar (@sachin_rt) July 12, 2024

ସଚିନ ଲେଖିଛନ୍ତି, ଜିମ୍ମି ୨୨ ବର୍ଷର କ୍ୟାରିୟରରେ ତୁମେ ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛ । ଆକ୍ସନ, ଗତି, ସ୍ୱିଙ୍ଗ ଓ ଫିଟନେସ ସହ ତୁମକୁ ବୋଲିଂ କରୁଥିବା ଦେଖିବା ବେଳେ ଆତ୍ମ ସନ୍ତୁଷ୍ଟି ମିଳୁଥିଲା । ଆଣ୍ଡରସନ ମଧ୍ୟ ପୂର୍ବରୁ ସଚିନଙ୍କ ସର୍ବଶ୍ରେଷ୍ଠ ବ୍ୟାଟ୍ସମ୍ୟାନ ବୋଲି କହିଥିଲେ। ଆଣ୍ଡରସନ ୧୮୮ ଟେଷ୍ଟରେ ୭୦୪ ୱିକେଟ ଅକ୍ତିଆର କରିଛନ୍ତି । ୪୨ ରନରେ ୭ୱିକେଟ ତାଙ୍କର ଶ୍ରେଷ୍ଠ ପ୍ରଦର୍ଶନ । ସେ ୩୨ ଥର ୪ଟି ଏବଂ ୩୨ ଥର ୫ଟି ୱିକେଟ ହାସଲ କରିବା ଗୌରବ ଅର୍ଜନ କରିଛନ୍ତି ।

ସେହିପରି ଦିନିକିଆରେ ୧୯୪ ମ୍ୟାଚ ଖେଳି ୨୬୯ ୱିକେଟ ନେଇଛନ୍ତି । ଆନ୍ତର୍ଜାତୀୟ ଟି୨୦ରେ ୧୯ ମ୍ୟାଚରୁ ୧୮ ଏବଂ ପ୍ରଥମ ଶ୍ରେଣୀ କ୍ରିଟେରେ ୨୯୭ ମ୍ୟାଚରୁ ୧୧୨୨ ୱିକେଟ ନେଇଛନ୍ତି । ଲିଷ୍ଟ ଏରେ ୨୬୧ ମ୍ୟାଚରୁ ୩୫୮ ଓ ଟି୨୦ରେ ୪୪ ମ୍ୟାଚରୁ ୪୧ ୱିକେଟ ହାସଲ କରିଛନ୍ତି ।

ନୂଆଦିଲ୍ଲୀ: ଭାରତୀୟ ୱିକେଟରକ୍ଷକ ବ୍ୟାଟର ଦୀନେଶ କାର୍ତ୍ତିକ ଶନିବାର କ୍ରିକେଟରୁ ଅବସର ନେଇଛନ୍ତି। ଜୁନ୍‌ ୧ ଅର୍ଥାତ ତାଙ୍କ ୩୯ତମ ଜନ୍ମଦିବସରେ ସେ ଅବସର ଘୋଷଣା କରିଛନ୍ତି। ସାମାଜିକ ଗଣମାଧ୍ୟମରେ ପୋଷ୍ଟ କରି ସେ ଏ ନେଇ ସୂଚନା ଦେଇଛନ୍ତି। ସେ ଅବସର ରିଟାୟାରମେଣ୍ଟ ନୋଟ୍‌ ସହ ଏକ ଭିଡିଓ ମଧ୍ୟ ପୋଷ୍ଟ କରିଛନ୍ତି। ଏହି ଭିଡିଓରେ ସେ ନିଜ କ୍ୟାରିୟରର ଗୁରୁତ୍ୱପୂର୍ଣ୍ଣ ମୂହୂର୍ତ୍ତର ଫଟୋ ସେୟାର କରିଛନ୍ତି। ଗତ କିଛିଦିନ ମଧ୍ୟରେ ମୋତେ ଯେଉଁ ସ୍ନେହ, ଶ୍ରଦ୍ଧା, ସମର୍ଥନ ଓ ଭଲପାଇବା ମିଳିଛି, ତାହା ମୋତେ ଅଭିଭୂତ କରିଛି। ମୋତେ ଭଲପାଉଥିବା ସମସ୍ତ ବ୍ୟକ୍ତି ଓ ପ୍ରଶଂସକଙ୍କୁ କୃତଜ୍ଞତା ଜଣାଉଛି। ବହୁତ ଚିନ୍ତା କରିବା ପରେ ଏହି ନିଷ୍ପତ୍ତି ନେଇଛି ବୋଲି ସେ ନିଜ ପୋଷ୍ଟରେ ଉଲ୍ଲେଖ କରିଛନ୍ତି। ଉଲ୍ଲେଖଥାଉ କି, ଆଇପିଏଲ ଶେଷ ହେବାପରେ ହିଁ ସେ ଏହି ହାଇପ୍ରୋଫାଇଲ ଲିଗ୍‌ରୁ ଅବସର ନେବାକୁ ଘୋଷଣା କରିଥିଲେ।

୨ଟି ଆଇସିସି ଟ୍ରଫି ଜିତିଛନ୍ତି
କାର୍ତ୍ତିକ ଦୀର୍ଘ ୧୮ ବର୍ଷର କ୍ୟାରିୟରରେ ୨ଟି ଗୁରୁତ୍ୱପୂର୍ଣ୍ଣ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଟ୍ରଫି ଜିତିଛନ୍ତି। ଏଥିରେ ୨୦୦୭ ଟି-୨୦ ବିଶ୍ୱକପ୍‌ ଓ ୨୦୧୩ ଚାମ୍ପିଅନ୍ସ ଟ୍ରଫି ସାମିଲ ରହିଛି। କାର୍ତ୍ତିକ ଭାରତ ପାଇଁ ୨୬ ଟେଷ୍ଟ, ୯୪ ଦିନିକିଆ ଓ ୬୦ଟି ଅନ୍ତର୍ଜାତୀୟ ଟି-୨୦ ମ୍ୟାଚ୍‌ ଖେଳିଛନ୍ତି। ସେ ମଧ୍ୟ ୨୦୧୦ ଓ ୨୦୧୮ ଏସିଆ ଟ୍ରଫି ହାସଲ କରିଛନ୍ତି। କାର୍ତ୍ତିକ ମଧ୍ୟ ଗୋଟିଏଥର ୨୦୧୩ରେ ମୁମ୍ବାଇ ଇଣ୍ଡିଆନ୍ସ ତରଫରୁ ପ୍ରତିନିଧିତ୍ୱ କରି ଆଇପିଏଲ ଟ୍ରଫି ହାସଲ କରିଥିଲେ। ୨୦୨୨ରେ ସେ ବାଂଲାଦେଶ ବିପକ୍ଷରେ କ୍ୟାରିୟରର ଅନ୍ତିମ ଅନ୍ତର୍ଜାତୀୟ ମ୍ୟାଚ୍‌ ଖେଳିଥିଲେ।

ନୂଆଦିଲ୍ଲୀ: ଅନ୍ତର୍ଜାତୀୟ ଫୁଟବଲରୁ ଅବସର ଘୋଷଣା କରିଛନ୍ତି କିମ୍ବଦନ୍ତୀ ଫୁଟବଲ ତାରକା ସୁନୀଲ ଛେତ୍ରୀ। ଜୁନ ୬ରେ କୁଏତ ବିପକ୍ଷ ଫିଫା ବିଶ୍ୱକପ୍ ଯୋଗ୍ୟତା ମ୍ୟାଚ୍ ପରେ ଅବସର ନେବେ ଛେତ୍ରୀ। ଏନେଇ ସେ ଆଜି ଏକ ଭିଡିଓ ବାର୍ତ୍ତା ଯୋଗେ ସୂଚନା ଦେଇଛନ୍ତି। ସୁନୀଲ ଛେତ୍ରୀ ବର୍ତ୍ତମାନ ଭାରତୀୟ ଫୁଟବଲ ଟିମର ଅଧିନାୟକ ଅଛନ୍ତି। ସେ ଭାରତ ପାଇଁ ୧୫୦ଟି ମ୍ୟାଚ୍ ଖେଳିଛନ୍ତି। ଦୀର୍ଘ ୨୦ ବର୍ଷର କ୍ୟାରିୟର ମଧ୍ୟରେ ୯୪ ଗୋଲ ସ୍କୋର ସହ ଅନେକ କୀର୍ତ୍ତି ହାସଲ କରିଛନ୍ତି ଛେତ୍ରୀ।

ଛେତ୍ରୀ ୨୦୧୯ରେ ଭାରତର ଚତୁର୍ଥ ସର୍ବୋଚ୍ଚ ନାଗରିକ ସମ୍ମାନ ପଦ୍ମଶ୍ରୀ ଏବଂ ୨୦୨୧ରେ ଖେଳ ରତ୍ନ ସମ୍ମାନରେ ସମ୍ମାନିତ ହୋଇଥିଲେ। ଛେତ୍ରୀ ୨୦୦୫ରେ ଡେବ୍ୟୁ କରିଥିଲେ।