ଭୁବନେଶ୍ୱର: ମହିଳା ସଂରକ୍ଷଣକୁ ଆଳ କରି ଓଡ଼ିଶାର କ୍ଷତି ହେଉଥିବା ସୀମା ପୁନଃନିର୍ଦ୍ଧାରଣ ବିଲ୍‌ ସପକ୍ଷରେ ଓଡ଼ିଶାରୁ ନିର୍ବାଚିତ ହୋଇଥିବା ୨୦ ଜଣ ବିଜେପି ସାଂସଦ ଭୋଟ ଦେବା ଦୁର୍ଭାଗ୍ୟଜନକ ବୋଲି କହି ଏହାର ଦୃଢ଼ ନିନ୍ଦା କରିଛି ବିଜେଡି। ଓଡ଼ିଶାର ରାଜନୈତିକ ଓ ଆର୍ଥିକ ସ୍ୱାର୍ଥ ପ୍ରତି ବିଜେପି ଆଖି ବୁଜିଦେଇଛି ବୋଲି ଦଳ ପକ୍ଷରୁ ଅଭିଯୋଗ କରାଯାଇଛି। 

ଶନିବାର ଶଙ୍ଖ ଭବନରେ ଆୟୋଜିତ ସାମ୍ୱାଦିକ ସମ୍ମିଳନୀରେ ବିରୋଧୀ ଦଳ ମୁଖ୍ୟ ସଚେତକ ତଥା ଦଳର ଉପସଭାପତି ପ୍ରମିଳା ମଲ୍ଲିକ ଓ ବରିଷ୍ଠ ସାଧାରଣ ସମ୍ପାଦକ ଭୃଗୁ ବକ୍ସିପାତ୍ର କେନ୍ଦ୍ର ସରକାରଙ୍କ ଆଭିମୁଖ୍ୟକୁ କଡ଼ା ସମାଲୋଚନା କରିଥିଲେ।୨୦୨୩ରେ ମହିଳା ସଂରକ୍ଷଣ ବିଲ୍‌ ପାରିତ ହୋଇସାରିଥିବା ବେଳେ ତାକୁ କାର୍ଯ୍ୟକାରୀ କରିବା ପରିବର୍ତ୍ତେ ସୀମା ପୁନଃନିର୍ଦ୍ଧାରଣ ବିଲ୍‌ ସହିତ ଏହାକୁ ଯୋଡ଼ି ପୁନର୍ବାର ସଂସଦରେ ବିଲକୁ ପାରିତ କରିବା ପାଇଁ ବିଜେପି ଷଡ଼ଯନ୍ତ୍ର କରିଥିଲା ବୋଲି ସେମାନେ କହିଥିଲେ। ପ୍ରମିଳା ମଲ୍ଲିକ କହିଥିଲେ ଯେ ୨୦୨୩ରେ ମହିଳା ସଂରକ୍ଷଣ ବିଲ୍‌ ପାରିତ ସମୟରେ ବିଜେଡିର ୧୨ ଜଣ ଲୋକସଭା ଓ ୯ ଜଣ ରାଜ୍ୟସଭା ସାଂସଦ ଏହାକୁ ସମର୍ଥନ କରିଥିଲେ। ଏହା ପୂର୍ବରୁ ୨୦୧୮ ମସିହାରେ ଓଡ଼ିଶା ବିଧାନସଭାରେ ୩୩ ପ୍ରତିଶତ ମହିଳା ସଂରକ୍ଷଣ ପାଇଁ ସର୍ବସମ୍ମତ ପ୍ରସ୍ତାବ ପାରିତ କରି ଦେଶର ୨୨ଟି ଜାତୀୟ ଓ ଆଞ୍ଚଳିକ ଦଳ ନିକଟକୁ ବିଜେଡିର ପ୍ରତିନିଧି ମଣ୍ଡଳୀ ପଠାଇଥିଲେ ଶ୍ରୀ ନବୀନ ପଟ୍ଟନାୟକ । ସମଗ୍ର ଦେଶରେ ମହିଳା ମାନଙ୍କୁ ସଂସଦ ଓ ବିଧାନସଭାରେ ଅଧିକ ସଂଖ୍ୟାରେ ପ୍ରତିନିଧିତ୍ୱ କରିବାକୁ ସୁଯୋଗ ଦେବା ପାଇଁ କେବଳ କଥାରେ ନୁହେଁ, କାମରେ କରି ଦେଖାଇଥିଲେ ଶ୍ରୀ ପଟ୍ଟନାୟକ। ୨୦୧୯ ଓ ୨୦୨୪ ସାଧାରଣ ନିର୍ବାଚନରେ ୩୩ ପ୍ରତିଶତ ମହିଳାଙ୍କୁ ଦଳୀୟ ଟିକେଟ୍‌ ଦେଇ ଉଦାହରଣ ସୃଷ୍ଟି କରିଥିଲା ବିଜୁ ଜନତା ଦଳ । ମହିଳା ସଶକ୍ତିକରଣକୁ ନେଇ ବିଜେଡି ଉପରେ ହାସ୍ୟାସ୍ପଦ ଟିପ୍ପଣୀ ଦେଉଥିବା ରାଜ୍ୟ ବିଜେପି ନେତା ମାନେ ଇତିହାସ ପଢ଼ନ୍ତୁ ବୋଲି ଶ୍ରୀମତୀ ମଲ୍ଲିକ କହିଥିଲେ। 

ଭୃଗୁ ବକ୍ସିପାତ୍ର କହିଥିଲେ ଯେ ସୀମା ପୁନଃନିର୍ଦ୍ଧାରଣ ବିଲ୍‌ ପାରିତ ହୋଇଥିଲେ ସଂସଦରେ ଓଡ଼ିଶାର ପ୍ରତିନିଧିତ୍ୱ ୩.୯ ପ୍ରତିଶତରୁ କମି ୩.୪ ପ୍ରତିଶତ ହୋଇଥାନ୍ତା । ଏହାଦ୍ୱାରା କେବଳ ଓଡ଼ିଶାର ସ୍ୱର ଦୁର୍ବଳ ହୋଇନଥାନ୍ତା, ତତ୍ସହିତ ଆର୍ଥିକ ଅନୁଦାନ କ୍ଷେତ୍ରରେ ଓଡ଼ିଶା ଯଥେଷ୍ଟ କ୍ଷତି ସହିଥାନ୍ତା । ବର୍ତ୍ତମାନର ରାଜ୍ୟ ବିଜେପି ସରକାର କେନ୍ଦ୍ର ନିକଟରୁ ଓଡ଼ିଶା ପାଇଁ ଅଧିକ ଅନୁଦାନ ଆଣିବା ପାଇଁ ଉଦ୍ୟମ କରିବା ପରିବର୍ତ୍ତେ ଓଡ଼ିଶାର ସ୍ୱାର୍ଥ ବିରୋଧରେ ଯାଇ ଏଭଳି ଏକ ବିଲ୍‌ ସପକ୍ଷରେ ୨୦ ଜଣ ସାଂସଦ ଭୋଟ ଦେବା ନିନ୍ଦନୀୟ। ବିରୋଧୀ ଦଳ ନେତା ରାଜ୍ୟର ସମସ୍ତ ସାଂସଦଙ୍କୁ ଏ ବାବଦରେ ଚିଠି ଲେଖିବା ସହ ବିଧାନସଭାର ଏକ ସ୍ୱତନ୍ତ୍ର ଅଧିବେଶନ ଡାକି ଆଲୋଚନା କରିବା ପାଇଁ ମୁଖ୍ୟମନ୍ତ୍ରୀଙ୍କୁ ପ୍ରସ୍ତାବ ଦେଇଥିଲେ। ଓଡ଼ିଶାର ସ୍ୱାର୍ଥ ବିରୋଧୀ ଏହି ବିଲକୁ ସମର୍ଥନ କରି ଓଡ଼ିଆ ଅସ୍ମିତାର ନାରା ଦେଇ କ୍ଷମତାକୁ ଆସିଥିବା ବିଜେପି ଦଳର ଅସଲ ମୁଖା ଖୋଲିଯାଇଛି। ମହିଳା ସଶକ୍ତିକରଣ ପାଇଁ ବିଜେଡିର ପ୍ରତିବଦ୍ଧତା ଉପରେ ରାଜ୍ୟ ବିଜେପି ନେତା ମାନେ ପ୍ରଶ୍ନ କରିବା ହାସ୍ୟାସ୍ପଦ ବୋଲି ଶ୍ରୀ ବକ୍ସିପାତ୍ର କହିଥିଲେ।

ଭୁବନେଶ୍ବର: ଗତ କିଛି ଦିନ ଧରି ଓଡ଼ିଶାରେ ହେଉଥିବା ସମ୍ପୂର୍ଣ୍ଣ ଆଇନ ଶୃଙ୍ଖଳା ବିଫଳତା, ଓ ସମ୍ବେଦନଶୀଳ ଘଟଣା ସବୁ ଅଞ୍ଚଳରେ ଘଟୁଛି। ଗତକାଲି ରାତିରେ ବ୍ରହ୍ମପୁର ସହରରେ ଜଣେ ବରିଷ୍ଠ ଆଇନଜୀବୀ ତଥା ବାର କାଉଁସିଲ ସଦସ୍ୟ ବିଜେପି ନେତା ପୀତବାସ ପଣ୍ଡାଙ୍କୁ ଗୁଳି ମାଡ଼ କରି ହତ୍ୟା କରାଯାଇଛି। ଗତକାଲି ଗଞ୍ଜାମର ବଡ଼ ପର୍ବ କୁମାର ପୁର୍ଣ୍ଣିମା ଥିଲା। ପ୍ରତିବର୍ଷ ଏହି ସମୟରେ ଗଞ୍ଜାମ ଜିଲ୍ଲାରେ ପୁଲିସର ସକ୍ରିୟ ପାଟ୍ରୋଲିଙ୍ଗ ହୁଏ। ହେଲେ ଗତକାଲି ନ ଥିଲା। ଦୁର୍ବୃତ୍ତ ମାରି ପଳାଇଲେ। ୧୫ ଘଣ୍ଟା ହେବ ସେମାନଙ୍କ ଟେର ମିଳୁନି। ଯେଉଁ ସ୍ଥାନରେ ତାଙ୍କ ହତ୍ୟା ହେଲା, ସେଠି ଥିବା ସିସିଟିଭି ବି ବାହାର କରାଯାଇଥିଲା। ଅର୍ଥାତ ଯୋଜନାବଦ୍ଧ ଭାବେ ଏହି ହତ୍ୟା କରାଯାଇଛି।

ସ୍ଥାନୀୟ IIC ଛୁଟିରେ ଥିଲେ। ବ୍ରହ୍ମପୁର ପୁଲିସ ଜିଲ୍ଲା SP ବି ଛୁଟିରେ ଅଛନ୍ତି। ଏହା ସମ୍ପୂର୍ଣ୍ଣ ସରକାରଙ୍କ ଗୁଇନ୍ଦା ଓ ଆଇନ ଶୃଙ୍ଖଳାର ବିଫଳତା। ୧୬ ମାସର ମୋହନ ମାଝୀ ସରକାର ଶାସନ ଭାର ନେବା ପରେ ଗଞ୍ଜାମରେ ରେକର୍ଡ ୧୨୮ ହତ୍ୟା ହୋଇଛି। ଧରାକୋଟ ଓ ଭଞ୍ଜନଗରରେ ବି ହତ୍ୟା ହୋଇଛି।

ନବୀନ ପଟ୍ଟନାୟକ ଗଞ୍ଜାମରେ ଶାନ୍ତି ଫେରାଇ ଆଣିଥିଲେ। ହେଲେ ଆଜି ସରକାରରେ ପୁଲିସ ନାଚାର। ମୁଖ୍ୟମନ୍ତ୍ରୀ ନିଜେ ଗୃହ ମନ୍ତ୍ରୀ, ଗଞ୍ଜାମ ଜିଲ୍ଲାରେ ୧୧ ବିଜେପି ବିଧାୟକ, ଜଣେ ସାସଂଦ, ଦୁଇ ଜଣ ମନ୍ତ୍ରୀ ନିଜ ଦଳର ଆଇନଜୀବିଙ୍କୁ ସୁରକ୍ଷା ଦେଇ ପାରୁ ନାହାନ୍ତି। ବ୍ରହ୍ମପୁର ଓଡ଼ିଶା ଦକ୍ଷିଣ ଓଡ଼ିଶାର ପ୍ରାଣକେନ୍ଦ୍ର. ବିଜେପି ନିଜ ନେତାଙ୍କୁ ସୁରକ୍ଷା ଦେଇ ପାରୁ ନାହାନ୍ତି। ଆଇନଜୀବି ନିଜ ସୁରକ୍ଷା ପାଇଁ ନୂଆ ଆଇନ ପାଇଁ ଦାବି କରୁଛନ୍ତି। ହେଲେ ସରକାର ଭୃକ୍ଷେପ କରୁନି। ବିଜେଡି ପୀତବାସ ପଣ୍ଡାଙ୍କ ହତ୍ୟାରେ ଗଭୀର ଦୁଃଖ ପ୍ରକାଶ କରିବା ସହ ସରକାରଙ୍କ ବେପରୁଆ ଆଇନ ବ୍ୟବସ୍ଥାକୁ ନିନ୍ଦା କରିଛି।

ବିଜେପି ସରକାରର ବିପର୍ଯ୍ୟସ୍ତ ଆଇନ ଶୃଙ୍ଖଳା ବିରୋଧରେ ବିଜେଡି ଆନ୍ଦୋଳନ କରି ଆସୁଛି। ଗତ ଏକ ସପ୍ତାହରେ ଯାହା ଘଟିଛି, ତାହା ଆଜି ଯାଏ କେବେ ହୋଇ ନ ଥିଲା। କିଛି ସମୟ ତଳେ କଣାସରେ ଲକ୍ଷ୍ମୀ ବସରେ ପଶି ଜଣେ ଦୁର୍ବୃତ୍ତ ହାଣି ଚାଲିଲେ। ପରିବହନ ମନ୍ତ୍ରୀ ଗଞ୍ଜାମର। ତାଙ୍କ ସହଯୋଗୀ ପୀତବାସ ପଣ୍ଡା। ଲକ୍ଷ୍ମୀ ବସରେ ହତ୍ୟା ହେଉଛି। ବାଲି, ଖାଦାନ ବି ଲୁଟ ହେଉଛିୟ ଏହି ଦୁଇ ବିଭାଗ ବିଭୂତି ଜେନାଙ୍କ ପାଖରେ. ଆଶ୍ଚର୍ଯ୍ୟ ଲାଗୁଛି। ସେ କହୁଛନ୍ତି କାହାକୁ ଛଡା ଯିବନି। ହେଲେ କେଉଁଠି ବି ଦୋଷୀ ଧରା ପଡୁନି।

ଦୋଷୀର ଆଇନ ଓ ପୁଲିସ ପ୍ରତି ଭୟ ନାହିଁ। ଆଇନ ଶୃଙ୍ଖଳା ନିୟନ୍ତ୍ରଣରେ ସରକାର ବିଫଳ। SI ପରୀକ୍ଷା ବିଭ୍ରାଟ ବି ଗଞ୍ଜାମରେ ହେଲା । ଚୌଦ୍ୱାର ଜେଲରୁ ଦୁଇ କଏଦୀ ଚମ୍ପଟ ମାରୁଛନ୍ତି। ଭାଇଚାରାର ସହର କଟକରେ କଣ କଲେ ସରକାର। ବିଶ୍ରାରେ ହତ୍ୟାକାଣ୍ଡ, ବାଲେଶ୍ୱରରେ କର୍ଫ୍ୟୁ, କେତେ ହତ୍ୟା ଏକ ବର୍ଷରେ, ତାହାର ହିସାବ ନାହିଁ। ବିଜେଡି ସରକାରଙ୍କ ବିପର୍ଯ୍ୟସ୍ତ ଆଇନ ଶୃଙ୍ଖଳାକୁ ନିନ୍ଦା କରୁଛି। ସରକାରଙ୍କ ନିର୍ଦ୍ଧିଷ୍ଟ ପଦକ୍ଷେପ ନାହିଁ ଆଇନ ଶୃଙ୍ଖଳା ନିୟନ୍ତ୍ରଣ କରିବାରେ।

ମୁଖ୍ୟମନ୍ତ୍ରୀ, ଡିଜି, ଗୃହ ସଚିବ, ମୁଖ୍ୟ ଶାସନ ସଚିବ, SP, IG, DG ଆଇନ ଶୃଙ୍ଖଳା ପାଇଁ ଦିନେ ବି ବୈଠକ ନେଲେନି। ପ୍ରତିଦିନ ଖବରକାଗଜ ପଢିଲେ, ହତ୍ୟା, ଲୁଟ. ଦିନରେ ସରକାରୀ ବସରେ ପଶି ହତ୍ୟା କରାଯାଉଛି। ପୀତବାସ ପଣ୍ଡାଙ୍କ ହତ୍ୟାର ତଦନ୍ତ ସକ୍ରିୟ ଭାବେ କରନ୍ତୁ ସରକାର।ବିଜେପି କେବଳ ବାକ୍ୟବାଣ ନ କରି ଆଇନ ଶୃଙ୍ଖଳା ନିୟନ୍ତ୍ରଣ କରନ୍ତୁ। ନ ହେଲେ ଆଇନ ଶୃଙ୍ଖଳା ନିୟନ୍ତ୍ରଣ ବାହାରକୁ ପଳାଇବ ବୋଲି ବିଜେଡ଼ିର ବରିଷ୍ଠ ସାଧାରଣ ସମ୍ପାଦକ ଭୃଗୁ ବକ୍ସିପାତ୍ର କହିଛନ୍ତି।