ଆଇପିଏଲ୍ (IPL) ଫ୍ରାଞ୍ଚାଇଜ୍ ପଞ୍ଜାବ କିଙ୍ଗସ୍ ପାଇଁ ଖେଳୁଥିବା ଷ୍ଟାର୍ କ୍ରିକେଟର ଶଶାଙ୍କ ସିଂହ ଏବଂ ତାଙ୍କ ବାପା ତଥା ଅବସରପ୍ରାପ୍ତ ଆଇପିଏସ୍ ଅଧିକାରୀ ଶୈଳେଶ ସିଂହ ଏବେ ବିବାଦ ଘେରରେ। ନିଜ ଘରର ରୋଷେୟାଙ୍କୁ ବନ୍ଦୀ କରି ରଖିବା, ଗାଳିଗୁଲଜ କରିବା ଏବଂ ମାଡ଼ ମାରିବା ଅଭିଯୋଗରେ ଉଭୟଙ୍କ ବିରୋଧରେ ମଧ୍ୟପ୍ରଦେଶର ଭୋପାଳ ସ୍ଥିତ ରାତିବଡ଼ ପୋଲିସ ଷ୍ଟେସନରେ ଏକ ଏଫ୍‌ଆଇଆର୍ (FIR) ରୁଜୁ ହୋଇଛି। ଏହି ମାମଲାରେ ତାଙ୍କ ଡ୍ରାଇଭର ମିଶ୍ରଙ୍କୁ ମଧ୍ୟ ସହ-ଅଭିଯୁକ୍ତ ଦର୍ଶାଯାଇଛି।

କ'ଣ ଥିଲା ପୂରା ଘଟଣା?

ପୋଲିସରେ ଦିଆଯାଇଥିବା ଅଭିଯୋଗ ଅନୁଯାୟୀ, ମଧ୍ୟପ୍ରଦେଶ ରେୱା ଜିଲ୍ଲାର ବାସିନ୍ଦା ୩୧ ବର୍ଷୀୟ ବିପେନ୍ଦ୍ର ସିଂହ ତୋମାରଙ୍କୁ ନିଲବଡ଼-ମେଣ୍ଡୋରୀ ରୋଡ୍ ସ୍ଥିତ ବଙ୍ଗଳାରେ ରୋଷେୟା ଭାବେ ନିଯୁକ୍ତି ଦିଆଯାଇଥିଲା। ଗତ ଜୁନ୍ ୨୫ ତାରିଖରେ ସେ ମାସିକ ୧୫,୦୦୦ ଟଙ୍କା ଦରମା, ମାଗଣା ଖାଦ୍ୟ ଓ ରହିବା ସୁବିଧା ଏବଂ ଭବିଷ୍ୟତରେ ସରକାରୀ ଚାକିରି କରାଇଦେବାର ପ୍ରତିଶ୍ରୁତି ପାଇ କାମରେ ଯୋଗ ଦେଇଥିଲେ।

ମାତ୍ର କାମରେ ଯୋଗଦେବାର କିଛି ଘଣ୍ଟା ପରେ, ତାଙ୍କ ଦ୍ୱାରା ପ୍ରସ୍ତୁତ ଖାଦ୍ୟର ମାନକୁ ନେଇ ଅଭିଯୁକ୍ତମାନେ ଅସନ୍ତୋଷ ପ୍ରକାଶ କରିଥିଲେ। ବିପେନ୍ଦ୍ରଙ୍କ ଅଭିଯୋଗ ଅନୁଯାୟୀ, ତାଙ୍କୁ ଲଗାତାର ଗାଳିଗୁଲଜ ଓ ମାନସିକ ନିର୍ଯାତନା ଦିଆଯାଇଥିଲା। ପରିସ୍ଥିତି ଅସମ୍ଭାଳ ହେବାରୁ ସେ ଚାକିରି ଛାଡ଼ି ଘରକୁ ଫେରିଯିବାକୁ ଚାହିଁଥିଲେ।

ମୋବାଇଲ୍ ଛଡ଼ାଇ ନେଇ ମାଡ଼ ମାରିଥିବା ଅଭିଯୋଗ

ବିପେନ୍ଦ୍ର ଅଭିଯୋଗ କରିଛନ୍ତି ଯେ, ସେ କାମ ଛାଡ଼ିବା କଥା କହିବାରୁ ଶୈଳେଶ ସିଂହ ତାଙ୍କ ମୋବାଇଲ୍ ଫୋନ୍ ଛଡ଼ାଇ ନେଇଥିଲେ ଯେପରି ସେ କାହାରି ସହ ଯୋଗାଯୋଗ କରିପାରିବେ ନାହିଁ। ଗତ ଜୁନ୍ ୨୮ ତାରିଖ ସକାଳେ ଜଳଖିଆ ପ୍ରସ୍ତୁତ କରିସାରିବା ପରେ ବିପେନ୍ଦ୍ର ନିଜ ଫୋନ୍ ମାଗିଥିଲେ। ଏଥିରେ ଉତ୍‌କ୍ଷିପ୍ତ ହୋଇ କ୍ରିକେଟର ଶଶାଙ୍କ ସିଂହ, ତାଙ୍କ ବାପା ଓ ଡ୍ରାଇଭର ମିଶି ତାଙ୍କୁ ଏକ ବନ୍ଦ କୋଠରୀ ଭିତରେ ନିସ୍ତୁକ ମାଡ଼ ମାରିଥିଲେ। ଏପରିକି ଜୁନ୍ ୨୫ରୁ ଖାଇବା ଓ ରହିବା ଖର୍ଚ୍ଚ ବାବଦକୁ ତାଙ୍କୁ ବାଧ୍ୟ କରି ତାଙ୍କ ଫୋନ୍‌ରୁ ୧,୦୦୦ ଟଙ୍କା ଟ୍ରାନ୍ସଫର ମଧ୍ୟ କରାଇଥିଲେ।

ପୋଲିସର କାର୍ଯ୍ୟାନୁଷ୍ଠାନ

ପୀଡ଼ିତ ବିପେନ୍ଦ୍ର ଥାନାରେ ପହଞ୍ଚିବା ପରେ ପୋଲିସ ତାଙ୍କର ଡାକ୍ତରୀ ମାଇନା କରାଇଥିଲା, ଯେଉଁଥିରେ ତାଙ୍କ ଶରୀରରେ ଆଘାତ ଲାଗିଥିବା ସ୍ପଷ୍ଟ ହୋଇଥିଲା। ଏହାପରେ ନୂତନ ଅପରାଧିକ ଆଇନ, ଭାରତୀୟ ନ୍ୟାୟ ସଂହିତା (BNS) ର ଧାରା ୨୯୬(ବି), ୧୧୫(୨) ଏବଂ ୩(୫) ଅନୁଯାୟୀ ରାତିବଡ଼ ପୋଲିସ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରିଛି। ଏହି ହାଇ-ପ୍ରୋଫାଇଲ୍ ଘଟଣାକୁ ନେଇ ବର୍ତ୍ତମାନ ପୋଲିସ ତଦନ୍ତ ଜାରି ରଖିଛି।

ଆଇପିଏଲ୍ (IPL 2026) ର ୭ମ ମ୍ୟାଚରେ ଆଜି ମୁହାଁମୁହିଁ ହେବାକୁ ଯାଉଛନ୍ତି ଚେନ୍ନାଇ ସୁପର କିଙ୍ଗସ୍ (CSK) ଏବଂ ପଞ୍ଜାବ କିଙ୍ଗସ୍ (PBKS)। ଚେନ୍ନାଇର ଏମ୍.ଏ. ଚିଦାମ୍ବରମ୍ ଷ୍ଟାଡିୟମ୍ ଠାରେ ଭାରତୀୟ ସମୟ ସନ୍ଧ୍ୟା ୭:୩୦ ମିନିଟରେ ଏହି ରୋମାଞ୍ଚକର ମୁକାବିଲା ଆରମ୍ଭ ହେବ। କ୍ରିକେଟ୍ ପ୍ରେମୀମାନେ ଏହି ମ୍ୟାଚର ସିଧାପ୍ରସାରଣ ଜିଓ ହଟଷ୍ଟାର୍ (JioHotstar) ମାଧ୍ୟମରେ ଦେଖିପାରିବେ।

କାହାର ପଲା ଭାରି?

ରୁତୁରାଜ ଗାଏକୱାଡ୍ଙ୍କ ନେତୃତ୍ୱାଧୀନ ଚେନ୍ନାଇ ସୁପର କିଙ୍ଗସ୍ ନିଜର ଦୃଢ଼ ବ୍ୟାଟିଂ ଏବଂ ବୋଲିଂ ବିଭାଗ ପାଇଁ ପରିଚିତ। ନିଜ ଘରୋଇ ପଡ଼ିଆରେ ଖେଳୁଥିବାରୁ ଚେନ୍ନାଇ ଏହାର ଫାଇଦା ନେଇ ବିଜୟୀ ହେବାକୁ ଚେଷ୍ଟା କରିବ। ଅନ୍ୟପକ୍ଷରେ, ଶ୍ରେୟସ ଆୟରଙ୍କ ନେତୃତ୍ୱରେ ପଞ୍ଜାବ କିଙ୍ଗସ୍ ମଧ୍ୟ ଏହି ସିଜିନ୍‌ରେ ଉନ୍ନତ ପ୍ରଦର୍ଶନ କରିବାକୁ ପ୍ରସ୍ତୁତ ରହିଛି। ଆଗାମୀ ମ୍ୟାଚ୍‌ରେ ଉଭୟ ଦଳ ନିଜ ସ୍ଥିତି ମଜବୁତ କରିବା ଲକ୍ଷ୍ୟରେ ପଡ଼ିଆକୁ ଓହ୍ଲାଇବେ।

ପିଚ୍ ରିପୋର୍ଟ

ଏମ୍.ଏ. ଚିଦାମ୍ବରମ୍ ଷ୍ଟାଡିୟମ୍‌ର ପିଚ୍ ସାଧାରଣତଃ ଉଭୟ ବ୍ୟାଟର ଏବଂ ବୋଲରଙ୍କ ପାଇଁ ସନ୍ତୁଳିତ ରହିଥାଏ। ତେବେ ଖେଳ ଆଗେଇବା ସହିତ ସ୍ପିନରମାନଙ୍କୁ ପିଚ୍‌ରୁ ଅଧିକ ସହାୟତା ମିଳିବାର ସମ୍ଭାବନା ରହିଛି। ତେଣୁ ଉଭୟ ଦଳର ସ୍ପିନରଙ୍କ ଭୂମିକା ମ୍ୟାଚ୍‌ରେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବ।

ନଜରରେ ରହିବେ ଏହି ଖେଳାଳି

ଚେନ୍ନାଇ ଦଳରେ ଭେଟେରାନ୍ ଖେଳାଳି ମହେନ୍ଦ୍ର ସିଂହ ଧୋନି, ଷ୍ଟାର୍ ଅଲରାଉଣ୍ଡର ଶିବମ୍ ଦୁବେ ଓ ଅଧିନାୟକ ରୁତୁରାଜ ଗାଏକୱାଡ୍ଙ୍କ ଭଳି ତାରକା ରହିଛନ୍ତି। ସେହିପରି ପଞ୍ଜାବ କିଙ୍ଗସ୍‌ ପକ୍ଷରୁ ସ୍ପିନର୍ ୟୁଜବେନ୍ଦ୍ର ଚହଲ୍, ପେସ୍ ବୋଲର୍ ଅର୍ଶଦୀପ ସିଂହ ଏବଂ ଅଷ୍ଟ୍ରେଲିଆର ବିସ୍ଫୋରକ ଅଲରାଉଣ୍ଡର୍ ମାର୍କସ୍ ଷ୍ଟୋଇନିସ୍ଙ୍କ ଭଳି ଖେଳାଳିଙ୍କ ଉପରେ ସମସ୍ତଙ୍କ ନଜର ରହିବ। ଦୁଇ ଦଳ ମଧ୍ୟରେ ଏକ କଡ଼ା ଟକ୍କର ଦେଖିବାକୁ ମିଳିବ ବୋଲି କ୍ରିକେଟ୍ ପ୍ରଶଂସକମାନେ ଆଶା ରଖିଛନ୍ତି।

ଆଇପିଏଲ୍ ୨୦୨୬ (IPL 2026) ର ୪ର୍ଥ ମ୍ୟାଚରେ ଆଜି ଗୁଜରାଟ ଟାଇଟନ୍ସ (GT) ଏବଂ ପଞ୍ଜାବ କିଙ୍ଗସ୍ (PBKS) ପରସ୍ପରକୁ ଭେଟିବାକୁ ଯାଉଛନ୍ତି। ଏହି ରୋମାଞ୍ଚକର ମ୍ୟାଚ୍ ମାର୍ଚ୍ଚ ୩୧ ତାରିଖରେ ମୁଲ୍ଲାନ୍‌ପୁର ସ୍ଥିତ ମହାରାଜା ଯାଦବୀନ୍ଦ୍ର ସିଂହ ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମରେ ଖେଳାଯିବ। ଉଭୟ ଦଳର ଅଧିନାୟକ ଶୁବମାନ ଗିଲ୍ ଏବଂ ଶ୍ରେୟସ ଆୟର ନିଜ ନିଜର ଦଳକୁ ବିଜୟ ଦେଇ ଟୁର୍ଣ୍ଣାମେଣ୍ଟରେ ଏକ ଦୃଢ଼ ଆରମ୍ଭ କରିବାକୁ ଲକ୍ଷ୍ୟ ରଖିଛନ୍ତି।

ଶୁବମାନ ଓ ଶ୍ରେୟସଙ୍କ ପାଇଁ ଅଗ୍ନିପରୀକ୍ଷା

ଜାତୀୟ ଟି-୨୦ ଦଳରୁ ବାଦ୍ ପଡ଼ିବା ପରେ ଉଭୟ ଶୁବମାନ ଗିଲ୍ ଏବଂ ଶ୍ରେୟସ ଆୟରଙ୍କ ପାଇଁ ଏହି ସିଜିନ୍ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବାକୁ ଯାଉଛି। ଗତବର୍ଷ ଆଇପିଏଲରେ ଭଲ ପ୍ରଦର୍ଶନ କରିଥିଲେ ମଧ୍ୟ ସେମାନଙ୍କୁ ଭାରତୀୟ ଟି-୨୦ ସେଟଅପ୍‌ରେ ସ୍ଥାନ ମିଳିନଥିଲା। ତେଣୁ ନିଜର ବ୍ୟାଟିଂ ଷ୍ଟ୍ରାଇକ୍ ରେଟ୍ ଏବଂ ଅଧିନାୟକତ୍ୱର ଦକ୍ଷତା ପ୍ରମାଣିତ କରିବା ପାଇଁ ଉଭୟ ଏହି ମ୍ୟାଚ୍ ମାଧ୍ୟମରେ ଚୟନକର୍ତ୍ତାମାନଙ୍କୁ ଏକ ବଡ଼ ବାର୍ତ୍ତା ଦେବାକୁ ଚେଷ୍ଟା କରିବେ।

ଦଳର ସ୍ଥିତି ଓ ପ୍ରଦର୍ଶନ

ଗତ ସିଜିନରେ ଶ୍ରେୟସ ଆୟରଙ୍କ ନେତୃତ୍ୱାଧୀନ ପଞ୍ଜାବ କିଙ୍ଗସ୍ ଫାଇନାଲରେ ପ୍ରବେଶ କରି ରନର୍ସ-ଅପ୍ ହୋଇଥିଲା। ଦଳରେ ପ୍ରଭସିମରନ୍ ସିଂହ, ପ୍ରିୟାଂଶ ଆର୍ଯ୍ୟ, ମାର୍କସ୍ ଷ୍ଟୋଇନିସ୍ ଏବଂ ଶଶାଙ୍କ ସିଂହଙ୍କ ଭଳି ଦକ୍ଷ ଖେଳାଳି ଥିବାରୁ ସେମାନଙ୍କ ବ୍ୟାଟିଂ ବିଭାଗ ବେଶ୍ ମଜବୁତ୍ ରହିଛି। ଅନ୍ୟପଟେ ଗୁଜରାଟ ଟାଇଟନ୍ସ ନିଜର ସନ୍ତୁଳିତ ଦଳ ପାଇଁ ଜଣାଶୁଣା। ଗତବର୍ଷ ଟେବୁଲର ତୃତୀୟ ସ୍ଥାନରେ ଥିବା ଏହି ଦଳ ପାଖରେ ସାଇ ସୁଦର୍ଶନ (୨୦୨୫ ଅରେଞ୍ଜ୍ କ୍ୟାପ୍ ବିଜେତା), ଜସ୍ ବଟଲର୍ ଏବଂ ମହମ୍ମଦ ସିରାଜ ଓ ରାଶିଦ୍ ଖାନଙ୍କ ଭଳି ଷ୍ଟାର୍ ମ୍ୟାଚ୍ ବିଜେତା ରହିଛନ୍ତି।

ହେଡ୍-ଟୁ-ହେଡ୍ ରେକର୍ଡ ଏବଂ ପିଚ୍ ରିପୋର୍ଟ

ଆଇପିଏଲ୍ ଇତିହାସରେ ଏହି ଦୁଇ ଦଳ ମଧ୍ୟରେ ଏପର୍ଯ୍ୟନ୍ତ ୬ ଟି ମ୍ୟାଚ୍ ଖେଳାଯାଇଛି ଏବଂ ଉଭୟ ଦଳ ୩-୩ ଟି ମ୍ୟାଚ୍ ଜିତି ବରାବର ସ୍ଥିତିରେ ଅଛନ୍ତି। ମୁଲ୍ଲାନ୍‌ପୁରର ପିଚ୍ ସାଧାରଣତଃ ବ୍ୟାଟ୍ସମ୍ୟାନ୍‌ମାନଙ୍କୁ ସୁହାଇଥାଏ। ଏଠାରେ ପାର୍ ସ୍କୋର୍ ୧୮୦ ରୁ ୨୦୦ ରନ୍ ମଧ୍ୟରେ ରହିବାର ଆକଳନ କରାଯାଇଛି। ତେବେ ଖେଳର ପରବର୍ତ୍ତୀ ସମୟରେ କାକର (Dew) ପଡ଼ିବାର ସମ୍ଭାବନା ଥିବାରୁ, ଟସ୍ ଜିତିବା ଦଳ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇପାରେ।

ପ୍ରମୁଖ ରେକର୍ଡ ଉପରେ ନଜର

ଏହି ମ୍ୟାଚ୍‌ରେ କିଛି ଖାସ୍ ରେକର୍ଡ ଉପରେ କ୍ରିକେଟ୍ ପ୍ରେମୀଙ୍କ ନଜର ରହିବ। ଟି-୨୦ କ୍ରିକେଟ୍‌ରେ ୫୫୦୦ ରନ୍ ପୂରଣ କରିବା ପାଇଁ ଶୁବମାନ ଗିଲ୍ଙ୍କୁ ମାତ୍ର ୮୮ ରନ୍‌ର ଆବଶ୍ୟକତା ରହିଛି। ସେହିପରି ରାହୁଲ୍ ତେୱାଟିଆ ଆଉ ୭ ଟି ଛକା ମାରିଲେ ଟି-୨୦ରେ ନିଜର ୧୦୦ ଛକା ପୂରଣ କରିବେ। ବୋଲିଂ ବିଭାଗରେ ସାଇ କିଶୋର ଆଉ ମାତ୍ର ୫ ଟି ୱିକେଟ୍ ନେଲେ ଟି-୨୦ରେ ୧୦୦ ୱିକେଟ୍ କ୍ଲବ୍‌ରେ ସାମିଲ ହେବେ।

ନୂଆଦିଲ୍ଲୀ: ଆଜିର ଆଇପିଏଲ  ମ୍ୟାଚରେ ଚେନ୍ନାଇ ସୁପର କିଙ୍ଗସ ଓ ପଞ୍ଜାବ କିଙ୍ଗସ ମୁହାଁମୁହିଁ ହେବେ। ଏହି ମ୍ୟାଚରେ ଚେନ୍ନାଇ ଟସ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଛି । ତେଣୁ ପ୍ରଥମେ ବ୍ୟାଟିଂ କରିବାକୁ ମୈଦାନକୁ ଓହ୍ଲାଇବ ପଞ୍ଜାବ ଦଳ । ଚେନ୍ନାଇ ନିଜ ପ୍ରଥମ ବିଜୟ ଲକ୍ଷ୍ୟରେ ରହିଥିବା ବେଳେ ପଞ୍ଜାବ ବିଜୟ ଧାରା ଜାରି ରଖିବାକୁ ପ୍ରୟାସ କରିବ ।