ଅଯୋଧ୍ୟାର ପ୍ରସିଦ୍ଧ ରାମ ମନ୍ଦିର ଦାନ ପାଣ୍ଠିରେ ଚୋରି ଅଭିଯୋଗ ସାମ୍ନାକୁ ଆସିବା ପରେ ସାରା ଦେଶରେ ଚର୍ଚ୍ଚା ଜୋର ଧରିଛି। ଏହି ବିବାଦକୁ ଗମ୍ଭୀରତାର ସହ ନେଇ ଶ୍ରୀ ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ପକ୍ଷରୁ ଏକ ବଡ଼ ପଦକ୍ଷେପ ଗ୍ରହଣ କରାଯାଇଛି। ଟ୍ରଷ୍ଟ ଏବେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଏକ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଦ୍ୱାରା ତଦନ୍ତ କରାଇବା ପାଇଁ ଅନୁରୋଧ କରିଛି।

ରାମ ଜନ୍ମଭୂମି ଟ୍ରଷ୍ଟର ବଡ଼ ପଦକ୍ଷେପ

ମିଳିଥିବା ସୂଚନା ଅନୁଯାୟୀ, ରାମ ମନ୍ଦିର ଦାନ ବାକ୍ସରୁ ଅର୍ଥ ହେରଫେର ନେଇ କିଛି ଅଭିଯୋଗ ଆସିଥିଲା, ଯାହା ଭକ୍ତଙ୍କ ଭାବନା ସହ ଜଡ଼ିତ ଏକ ସମ୍ବେଦନଶୀଳ ପ୍ରସଙ୍ଗ। ଏହି ଘଟଣାରେ ପାରଦର୍ଶିତା ବଜାୟ ରଖିବା ଏବଂ ପ୍ରକୃତ ସତ୍ୟକୁ ସାମ୍ନାକୁ ଆଣିବା ଉଦ୍ଦେଶ୍ୟରେ ଟ୍ରଷ୍ଟ ନିଜ ଆଡ଼ୁ ତଦନ୍ତ ପାଇଁ ଦାବି କରିଛି। ଟ୍ରଷ୍ଟ ସଦସ୍ୟମାନେ ସ୍ପଷ୍ଟ କରିଛନ୍ତି ଯେ, ଶ୍ରଦ୍ଧାଳୁମାନଙ୍କ ଦ୍ୱାରା ଦିଆଯାଇଥିବା ଦାନର ଗୋଟିଏ ଗୋଟିଏ ପଇସାର ହିସାବ ରଖିବା ସେମାନଙ୍କର ପ୍ରାଥମିକ ଦାୟିତ୍ୱ।

ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ନିବେଦନ

ଏହି ଅଭିଯୋଗର ଏକ ନିରପେକ୍ଷ ଏବଂ ଉଚ୍ଚସ୍ତରୀୟ ତଦନ୍ତ ପାଇଁ ଟ୍ରଷ୍ଟ ପକ୍ଷରୁ ସିଧାସଳଖ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସହ ଯୋଗାଯୋଗ କରାଯାଇଛି। ଟ୍ରଷ୍ଟ ଆଶା ପ୍ରକଟ କରିଛି ଯେ, ମୁଖ୍ୟମନ୍ତ୍ରୀ ତୁରନ୍ତ ଏକ SIT ଗଠନ କରିବେ, ଯାହାଫଳରେ ଯଦି କୌଣସି ଅନିୟମିତତା ହୋଇଥାଏ, ତେବେ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ। ସରକାର ମଧ୍ୟ ଏହି ପ୍ରସଙ୍ଗକୁ ଗମ୍ଭୀରତାର ସହ ନେଉଥିବା ଜଣାପଡ଼ିଛି।

ଅଯୋଧ୍ୟାରେ ଆଲୋଡ଼ନ

ଏହି ଖବର ପ୍ରକାଶ ପାଇବା ପରେ ଅଯୋଧ୍ୟା ସମେତ ସାରା ଦେଶର ରାମ ଭକ୍ତଙ୍କ ମଧ୍ୟରେ ଉଦ୍‌ବେଗ ଦେଖାଦେଇଛି। ଟ୍ରଷ୍ଟର ଏହି ସ୍ୱଚ୍ଛ ପଦକ୍ଷେପକୁ ବିଭିନ୍ନ ମହଲରେ ସ୍ୱାଗତ କରାଯାଇଛି। ସାଧାରଣ ଲୋକଙ୍କ କହିବା କଥା ଯେ, ପ୍ରଭୁ ଶ୍ରୀରାମଙ୍କ କାର୍ଯ୍ୟରେ କୌଣସି ପ୍ରକାର ଦୁର୍ନୀତି ଗ୍ରହଣୀୟ ନୁହେଁ। ବର୍ତ୍ତମାନ ସମସ୍ତଙ୍କ ନଜର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ପରବର୍ତ୍ତୀ ନିଷ୍ପତ୍ତି ଉପରେ ରହିଛି, ଯେ କେବେ ଏବଂ କିପରି ଏହି ତଦନ୍ତ ଆରମ୍ଭ ହେବ।

ଭାପୁର: ନୂଆବର୍ଷରେ ସାରା ଭାରତର ତୀର୍ଥ ଓ ଧାର୍ମିକ ସ୍ଥଳିରେ ଭିଡ ପରିଲକ୍ଷିତ ହୋଇଛି। ବିଶେଷ କରି ଓଡ଼ିଶାର ଜଗନ୍ନାଥ ଧାମ ପୁରୀ ଓ ଦ୍ୱିତୀୟ ଅଯୋଧ୍ୟା କୁହାଯାଉଥିବା ଫତେଗଡ ଶ୍ରୀରାମ ମନ୍ଦିର ସାରା ଓଡ଼ିଶାର ଭକ୍ତଙ୍କ ଆକର୍ଷଣର କେନ୍ଦ୍ର ବିନ୍ଦୁ ସାଜିଛି। ନୟାଗଡ଼ ଜିଲ୍ଲା ଭାପୁର ବ୍ଳକ ଫତେଗଡ ଶ୍ରୀରାମ ମନ୍ଦିରରେ ନୂଆବର୍ଷରେ ନାହିଁ ନଥିବା ଭିଡ ପରିଲକ୍ଷିତ ହୋଇଛି। ବୁଧବାର ଦିନ ଦୁଇ ଲକ୍ଷରୁ ଉର୍ଦ୍ଧ ଭକ୍ତଙ୍କ ସମାଗମ ହୋଇଥିଲା।ନୂଆବର୍ଷ ଦିନ ଭୋର ସମୟରୁ ଶ୍ରୀରାମ ମନ୍ଦିରରେ ଭକ୍ତଙ୍କ ଭିଡ ଆରମ୍ଭ ହୋଇଥିଲା। ଭିଡ ଆସ୍ତେ ଆସ୍ତେ ବଢିବାରୁ ମନ୍ଦିର କର୍ତ୍ତୃପକ୍ଷ ଦିନ ୯ ଟା ସମୟରୁ ପାହାଡ ଉପରକୁ ସମସ୍ତ ଯାନବାହନ ଯିବା ବନ୍ଦ କରିଦେଇଥିଲେ। ଶ୍ରଦ୍ଧାଳୁ ମାନେ ପରିବାର ସହ ଚାଲି ଚାଲି ପାହାଡ ଚଢି ପ୍ରଭୁଙ୍କ ଦର୍ଶନ କରିଥିଲେ।

ମଧ୍ୟାହ୍ନ ସମୟରେ ଭିଡ ଏପରି ହୋଇଥିଲା ଯେ ଫତେଗଡ ମୁଖ୍ୟ ରାସ୍ତାରେ ଦୁଇ କିଲୋମିଟର ଧରି ଟ୍ରାଫିକ ଜାମ ହୋଇ ରହିଥିଲା। ଫତେଗଡ ପୋଲିସ ସ୍ୱତନ୍ତ୍ର ଫୋର୍ସ ସହ ଶାନ୍ତିଶୃଙ୍ଖଳା ରକ୍ଷା ପାଇଁ ଆପ୍ରାଣ ଉଦ୍ୟମ କରିବା ଯୋଗୁଁ ଭକ୍ତମାନେ ଶାନ୍ତିଶୃଙ୍ଖଳାର ସହ ମର୍ଜ୍ୟଦାପୁରୁଷଙ୍କ ଦର୍ଶନ କରି ଫେରିଥିଲେ। ଜିଲ୍ଲା ବାହାରୁ ଆସିଥିବା ହଜାର ହଜାର ଭକ୍ତମାନେ  ପାହାଡ ପାଦଦେଶରେ ବଣଭୋଜି କରୁଥିବାର ଦେଖିବାକୁ ମିଳିଛି। ମାତ୍ର ବଣଭୋଜି ପାଇଁ ପାନୀୟ ଜଳ ଠିକସେ ମିଳୁନଥିବାରୁ ଲୋକମାନେ ହଇରାଣ ହୋଇଥିଲେ।

ନୟାଗଡ଼: ୧୬୦୦ ଫୁଟ ପାହାଡ଼ ଶୀର୍ଷରେ ଆଖି ଲାଖିଗଲା ପରି ଭବ୍ୟ ରାମ ମନ୍ଦିର। ପ୍ରାକୃତିକ ପରିବେଶରେ ସ୍ଥାପିତ ହୋଇଛି ଭବ୍ୟ ରାମ ମନ୍ଦିର। ନୟାଗଡ଼ ଜିଲ୍ଲା ଭାପୁର ବ୍ଲକ ଫତେଗଡ ସ୍ଥିତ ରାମ ମନ୍ଦିର ହୋଇଛି ଲୋକାର୍ପିତ। ଅଯୋଧ୍ୟାର ଭ୍ରମ ସୃଷ୍ଟି କରୁଛି ଏହି ମନ୍ଦିର। ପାହାଡ କାଟି ଏଠାରେ ମନ୍ଦିର ତିଆରି କରିଛନ୍ତି ଗ୍ରାମବାସୀ । ମନ୍ଦିରରେ ନିଖୁଣ କାରିଗରୀ କରୁଛି ଆକର୍ଷିତ।

ସ୍ଥାନୀୟ ଗ୍ରାମବାସୀଙ୍କ ସହଯୋଗ ଏବଂ ଶ୍ରୀରାମ ସେବା ପରିଷଦର ସଭାପତି ବେଣୁଧର ପ୍ରଧାନଙ୍କ ଉଦ୍ୟମରେ ନିର୍ମାଣ ହୋଇଛି ମନ୍ଦିର। ଏହା ବଉଳମାଳା ପଥରରେ ନିର୍ମାଣ ହୋଇଥିବା ବେଳେ ଏହାର ଉଚ୍ଚତା ୬୫ଫୁଟ ରହିଛି। ୫ ବର୍ଷ ଧରି ଚାଲିଥିବା ଏହି ମନ୍ଦିରର ନିର୍ମାଣ କାର୍ଯ୍ୟରେ ଦେଢ଼ ଶହରୁ ଉର୍ଦ୍ଧ କାରିଗର ସାମିଲ ଥିଲେ। ରାଜ୍ୟ ତଥା ରାଜ୍ୟ ବାହାରର ୧୫୦ ଜଣ ବଛା ବଛା କାରିଗର ୫ ବର୍ଷ ଅକ୍ଲାନ୍ତ ପରିଶ୍ରମ କରି ଭବ୍ୟ ରାମ ମନ୍ଦିର ନିର୍ମାଣ କରିଛନ୍ତି। ଚତୁଃପାର୍ଶ୍ୱ ପାର୍ଶ୍ବ ଦେବାଦେବୀଙ୍କ ମୂର୍ତ୍ତି ସଭିଙ୍କୁ ଆକର୍ଷିତ କରୁଛି।