ଆଇପିଏଲ୍ ୨୦୨୬ (IPL 2026) ର ୪ର୍ଥ ମ୍ୟାଚରେ ଆଜି ଗୁଜରାଟ ଟାଇଟନ୍ସ (GT) ଏବଂ ପଞ୍ଜାବ କିଙ୍ଗସ୍ (PBKS) ପରସ୍ପରକୁ ଭେଟିବାକୁ ଯାଉଛନ୍ତି। ଏହି ରୋମାଞ୍ଚକର ମ୍ୟାଚ୍ ମାର୍ଚ୍ଚ ୩୧ ତାରିଖରେ ମୁଲ୍ଲାନ୍‌ପୁର ସ୍ଥିତ ମହାରାଜା ଯାଦବୀନ୍ଦ୍ର ସିଂହ ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମରେ ଖେଳାଯିବ। ଉଭୟ ଦଳର ଅଧିନାୟକ ଶୁବମାନ ଗିଲ୍ ଏବଂ ଶ୍ରେୟସ ଆୟର ନିଜ ନିଜର ଦଳକୁ ବିଜୟ ଦେଇ ଟୁର୍ଣ୍ଣାମେଣ୍ଟରେ ଏକ ଦୃଢ଼ ଆରମ୍ଭ କରିବାକୁ ଲକ୍ଷ୍ୟ ରଖିଛନ୍ତି।

ଶୁବମାନ ଓ ଶ୍ରେୟସଙ୍କ ପାଇଁ ଅଗ୍ନିପରୀକ୍ଷା

ଜାତୀୟ ଟି-୨୦ ଦଳରୁ ବାଦ୍ ପଡ଼ିବା ପରେ ଉଭୟ ଶୁବମାନ ଗିଲ୍ ଏବଂ ଶ୍ରେୟସ ଆୟରଙ୍କ ପାଇଁ ଏହି ସିଜିନ୍ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବାକୁ ଯାଉଛି। ଗତବର୍ଷ ଆଇପିଏଲରେ ଭଲ ପ୍ରଦର୍ଶନ କରିଥିଲେ ମଧ୍ୟ ସେମାନଙ୍କୁ ଭାରତୀୟ ଟି-୨୦ ସେଟଅପ୍‌ରେ ସ୍ଥାନ ମିଳିନଥିଲା। ତେଣୁ ନିଜର ବ୍ୟାଟିଂ ଷ୍ଟ୍ରାଇକ୍ ରେଟ୍ ଏବଂ ଅଧିନାୟକତ୍ୱର ଦକ୍ଷତା ପ୍ରମାଣିତ କରିବା ପାଇଁ ଉଭୟ ଏହି ମ୍ୟାଚ୍ ମାଧ୍ୟମରେ ଚୟନକର୍ତ୍ତାମାନଙ୍କୁ ଏକ ବଡ଼ ବାର୍ତ୍ତା ଦେବାକୁ ଚେଷ୍ଟା କରିବେ।

ଦଳର ସ୍ଥିତି ଓ ପ୍ରଦର୍ଶନ

ଗତ ସିଜିନରେ ଶ୍ରେୟସ ଆୟରଙ୍କ ନେତୃତ୍ୱାଧୀନ ପଞ୍ଜାବ କିଙ୍ଗସ୍ ଫାଇନାଲରେ ପ୍ରବେଶ କରି ରନର୍ସ-ଅପ୍ ହୋଇଥିଲା। ଦଳରେ ପ୍ରଭସିମରନ୍ ସିଂହ, ପ୍ରିୟାଂଶ ଆର୍ଯ୍ୟ, ମାର୍କସ୍ ଷ୍ଟୋଇନିସ୍ ଏବଂ ଶଶାଙ୍କ ସିଂହଙ୍କ ଭଳି ଦକ୍ଷ ଖେଳାଳି ଥିବାରୁ ସେମାନଙ୍କ ବ୍ୟାଟିଂ ବିଭାଗ ବେଶ୍ ମଜବୁତ୍ ରହିଛି। ଅନ୍ୟପଟେ ଗୁଜରାଟ ଟାଇଟନ୍ସ ନିଜର ସନ୍ତୁଳିତ ଦଳ ପାଇଁ ଜଣାଶୁଣା। ଗତବର୍ଷ ଟେବୁଲର ତୃତୀୟ ସ୍ଥାନରେ ଥିବା ଏହି ଦଳ ପାଖରେ ସାଇ ସୁଦର୍ଶନ (୨୦୨୫ ଅରେଞ୍ଜ୍ କ୍ୟାପ୍ ବିଜେତା), ଜସ୍ ବଟଲର୍ ଏବଂ ମହମ୍ମଦ ସିରାଜ ଓ ରାଶିଦ୍ ଖାନଙ୍କ ଭଳି ଷ୍ଟାର୍ ମ୍ୟାଚ୍ ବିଜେତା ରହିଛନ୍ତି।

ହେଡ୍-ଟୁ-ହେଡ୍ ରେକର୍ଡ ଏବଂ ପିଚ୍ ରିପୋର୍ଟ

ଆଇପିଏଲ୍ ଇତିହାସରେ ଏହି ଦୁଇ ଦଳ ମଧ୍ୟରେ ଏପର୍ଯ୍ୟନ୍ତ ୬ ଟି ମ୍ୟାଚ୍ ଖେଳାଯାଇଛି ଏବଂ ଉଭୟ ଦଳ ୩-୩ ଟି ମ୍ୟାଚ୍ ଜିତି ବରାବର ସ୍ଥିତିରେ ଅଛନ୍ତି। ମୁଲ୍ଲାନ୍‌ପୁରର ପିଚ୍ ସାଧାରଣତଃ ବ୍ୟାଟ୍ସମ୍ୟାନ୍‌ମାନଙ୍କୁ ସୁହାଇଥାଏ। ଏଠାରେ ପାର୍ ସ୍କୋର୍ ୧୮୦ ରୁ ୨୦୦ ରନ୍ ମଧ୍ୟରେ ରହିବାର ଆକଳନ କରାଯାଇଛି। ତେବେ ଖେଳର ପରବର୍ତ୍ତୀ ସମୟରେ କାକର (Dew) ପଡ଼ିବାର ସମ୍ଭାବନା ଥିବାରୁ, ଟସ୍ ଜିତିବା ଦଳ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇପାରେ।

ପ୍ରମୁଖ ରେକର୍ଡ ଉପରେ ନଜର

ଏହି ମ୍ୟାଚ୍‌ରେ କିଛି ଖାସ୍ ରେକର୍ଡ ଉପରେ କ୍ରିକେଟ୍ ପ୍ରେମୀଙ୍କ ନଜର ରହିବ। ଟି-୨୦ କ୍ରିକେଟ୍‌ରେ ୫୫୦୦ ରନ୍ ପୂରଣ କରିବା ପାଇଁ ଶୁବମାନ ଗିଲ୍ଙ୍କୁ ମାତ୍ର ୮୮ ରନ୍‌ର ଆବଶ୍ୟକତା ରହିଛି। ସେହିପରି ରାହୁଲ୍ ତେୱାଟିଆ ଆଉ ୭ ଟି ଛକା ମାରିଲେ ଟି-୨୦ରେ ନିଜର ୧୦୦ ଛକା ପୂରଣ କରିବେ। ବୋଲିଂ ବିଭାଗରେ ସାଇ କିଶୋର ଆଉ ମାତ୍ର ୫ ଟି ୱିକେଟ୍ ନେଲେ ଟି-୨୦ରେ ୧୦୦ ୱିକେଟ୍ କ୍ଲବ୍‌ରେ ସାମିଲ ହେବେ।

ବାର୍ବାଡୋସ: ଟିମ୍ ଇଣ୍ଡିଆ ବିଶ୍ୱକପ୍‌ ଜିତିବା ପରେ ବିରାଟ କୋହଲି ଓ ରୋହିତ ଶର୍ମା ଟି-୨୦ କ୍ରିକେଟ୍‌ରୁ ଅବସର ଘୋଷଣା କରିଛନ୍ତି । ଦକ୍ଷିଣ ଆଫ୍ରିକା ବିପକ୍ଷରେ ଟି-୨୦ ବିଶ୍ୱକପ୍‌ ଫାଇନାଲ ମ୍ୟାଚ ଜିତିବା ପରେ ଉଭୟ ଖେଳାଳି ଏହି ଫର୍ମାଟରୁ ଅବସର ଘୋଷଣା କରିଛନ୍ତି ।

ବ୍ୟାଟିଂ ଗ୍ଲୋବାଲ ସୁପରଷ୍ଟାର ବିରାଟ କୋହଲିଙ୍କୁ ଆଉ ଅନ୍ତର୍ଜାତୀୟ ଟି-୨୦ ଖେଳିବାର ଦେଖାଯିବେ ନାହିଁ। ଐତିହାସିକ ଟି-୨୦ ବିଶ୍ୱକପ୍‌ ବିଜୟର ମାତ୍ର କେତୋଟି ମୁହୂର୍ତ୍ତ ପରେ ସେ ଟି-୨୦ ଫର୍ମାଟରୁ ଅବସର ଘୋଷଣା କରିଛନ୍ତି। ଅବଶ୍ୟ ପୂର୍ବରୁ ଏହା ତାଙ୍କ କ୍ୟାରିୟରର ଅନ୍ତିମ ଟି-୨୦ ବିଶ୍ୱକପ୍‌ ବୋଲି କୁହାଯାଉଥିଲା। ବିଶ୍ୱ କ୍ରିକେଟର ଅନ୍ୟତମ ଶ୍ରେଷ୍ଠ କ୍ରିକେଟ ବିବେଚିତ ହେଉଥିବା କୋହଲି ବିଶ୍ୱକପ୍‌ରେ ପ୍ରଥମ ୭ଟି ମ୍ୟାଚ୍‌ରେ ସାଂଘାତିକ ଭାବେ ବିଫଳ ହୋଇଥିଲେ। ତେବେ ଫାଇନାଲ ମୁକାବିଲାରେ ନିର୍ଣ୍ଣାୟକ ଅର୍ଦ୍ଧଶତକୀୟ ପାଳି ଖେଳି ଭାରତକୁ ବିପଦ ମୁକ୍ତ କରିଥିଲୋ। ଫାଇନାଲ ପୂର୍ବରୁ ପ୍ରଥମ ୭ଟି ପାଳିରେ ୩୫ ବର୍ଷୀୟ କୋହଲି ମୋଟ୍‌ ଉପରେ ୭୫ ରନ କରି ବେଶ୍‌ ସମାଲୋଚିତ ହୋଇଥିଲେ। ତେବେ ଫାଇନାଲ ମ୍ୟାଚ୍‌ରେ ୭୬ ରନ (୫୯ ବଲ, ୬ ଚୌକା, ୨ ଛକା)ର ଅର୍ଦ୍ଧଶତକୀୟ ପାଳି ଖେଳି ସମାଲୋଚକଙ୍କୁ ଚୁପ୍‌ କରିଛନ୍ତି। କୋହଲିଙ୍କୁ ମଧ୍ୟ ଫାଇନାଲ ମୁକାବିଲାର ଶ୍ରେଷ୍ଠ ଖେଳାଳି ଭାବେ ପୁରସ୍କୃତ କରାଯାଇଥିଲା। ଏବେ ପରବର୍ତ୍ତୀ ପିଢିକୁ ସୁଯୋଗ ଦେବାର ସମୟ ଉପନୀତ ହୋଇଛି ବୋଲି ବିଜୟ ପରେ ସେ କହିଛନ୍ତି। ଏହି ଅବସରରେ ସେ ବେଶ୍‌ ଭାବପ୍ରବଣ ହୋଇ ପଡିଥିଲେ।

ଜୁନ୍‌ରେ ଆରମ୍ଭ ଜୁନ୍‌ରେ ଶେଷ
ଦିଲ୍ଲୀର ଏକ ସାଧାରଣ ଗଳିରୁ ଆସି ବିଶ୍ୱ କ୍ରିକେଟରେ ରାଜ କରିଥିବା କୋହଲିଙ୍କ ଟି-୨୦ କ୍ୟାରିୟର ଜୁନ୍‌ରେ ଆରମ୍ଭ ହୋଇ ଏହି ମାସରେ ଶେଷ ହୋଇଛି। ୨୦୧୦ ଜୁନ୍‌ ୧୨ରେ ସେ ଭାରତ ପାଇଁ ଅନ୍ତର୍ଜାତୀୟ ଟି-୨୦ରେ ପଦାର୍ପଣ କରିଥିଲେ ଓ ଦୀର୍ଘ ୧୪ ବର୍ଷ ପରେ ଚଳିତ ଜୁନ୍‌ରେ ହିଁ ସନ୍ୟାସ ନେଇଛନ୍ତି। ଭାରତ ପାଇଁ ସେ ୧୨୫ଟି ଟି-୨୦ ମ୍ୟାଚ୍‌ ଖେଳି ୪୮.୬୯ ହାରରେ ଓ ୧୩୭. ୦୪ ଷ୍ଟ୍ରାଇକ୍‌ରେଟ୍‌ରେ ୪୧୮୮ ରନ ସଂଗ୍ରହ କରିଛନ୍ତି। ଏଥିରେ ତାଙ୍କର ଗୋଟିଏ ଶତକ ଓ ୩୮ଟି ଅର୍ଦ୍ଧଶତକ ସାମିଲ ରହିଛି। ୧୨୨ ହେଉଛି ତାଙ୍କର ବ୍ୟକ୍ତିଗତ ସର୍ବାଧିକ ସ୍କୋର। ବୋଲିଂ କରି ସେ ୪ ୱିକେଟ ମଧ୍ୟ ଅକ୍ତିଆର କରିଛନ୍ତି। କେବଳ ସେତିକି ନୁହଁ ଟି-୨୦ ବିଶ୍ୱକପ୍‌ ଇତିହାସରେ ସର୍ବାଧିକ ୧୨୯୨ ରନ ସଂଗ୍ରହ କରି ରେକର୍ଡ କରିଛନ୍ତି। ସେ ବିଶ୍ୱକପ୍‌ରେ ସର୍ବାଧିକ ୧୫ଟି ଅର୍ଦ୍ଧଶତକ ମଧ୍ୟ ହାସଲ କରିଛନ୍ତି। ଇଣ୍ଡିଆନ ପ୍ରିମୟର ଲିଗ୍‌ (ଆଇପିଏଲ୍‌)ରେ ରୟାଲ ଚ୍ୟାଲେଞ୍ଜର ବେଙ୍ଗାଲୁରୁ ପ୍ରତିନିଧିତ୍ୱ କରିଥିଲେ ମଧ୍ୟ ଟାଇଟଲ ହାସଲ କରି ନପାରି ସେ ବେଶ ସମାଲୋଚିତ ହୋଇଥିଲେ। ଏପରିକି ତାଙ୍କୁ ନେତୃତ୍ୱ ମଧ୍ୟ ଛାଡିବାକୁ ପଡିଥିଲ। ତେବେ ବର୍ତ୍ତମାନ ଏ ସବୁ କଥା ଇତିହାସ ହୋଇଛି।

ବିରାଟ କୋହଲିଙ୍କ ପରେ ଅଧିନାୟକ ରୋହିତ୍‌ ଶର୍ମା ଏହି ସ୍ମରଣୀୟ ମୁହୂର୍ତ୍ତରେ ଅନ୍ତର୍ଜାତୀୟ ଟି-୨୦ କ୍ରିକେଟକୁ ଅଲ୍‌ବିଦା କରିଛନ୍ତି। ଗତକାଲି ଟି-୨୦ ବିଶ୍ୱକପ୍‌ ଜିତିବା ପରେ ରୋହିତ ଟି-୨୦ କ୍ରିକେଟ୍‌ରୁ ଅବସର ନିଷ୍ପତ୍ତି ନେଇଥିଲେ। ଟି-୨୦ରୁ ଅବସର ନେଇଥିଲେ ମଧ୍ୟ ୩୭ ବର୍ଷୀୟ ରୋହିତ୍‌ ଭାରତ ପାଇଁ ଟେଷ୍ଟ ଓ ଏକଦିବସୀୟ ଫର୍ମାଟ୍‌ରେ ଖେଳ ଜାରି ରଖିବେ। ‘ଏହା ମୋର ଶେଷ ମ୍ୟାଚ୍‌। ଅଲ୍‌ବିଦା କରିବା ଲାଗି ଏହାଠାରୁ ଶ୍ରେଷ୍ଠ ମୁହୂର୍ତ୍ତ ଆଉ କିଛି ନାହିଁ। ମୁଁ ଏହି ଟ୍ରଫି ଚାହୁଁଥିଲି’ ବୋଲି ରୋହିତ୍‌ ଫାଇନାଲ ଶେଷ ପରେ କହିଛନ୍ତି।

ଉଲ୍ଲେଖନୀୟ ଘଟଣାକ୍ରମେ ରୋହିତ୍‌ ତାଙ୍କ ଅନ୍ତର୍ଜାତୀୟ ଟି-୨୦ କ୍ୟାରିୟର ୨୦୦୭ ଟି-୨୦ ବିଶ୍ୱକପ୍‌ରେ ଆରମ୍ଭ କରିଥିଲେ। ୨୦୦୭ ବିଶ୍ୱକପ୍‌ରେ ଇଂଲଣ୍ଡ ବିପକ୍ଷ ମ୍ୟାଚ୍‌ ତାଙ୍କର ପ୍ରଥମ ଟି-୨୦ କ୍ୟାରିୟରର ପ୍ରଥମ ମ୍ୟାଚ୍‌ ଥିଲା। ଏବେ ୨୦୨୪ ବିଶ୍ୱକପ୍‌ ଜିତିବା ପରେ ସେ ଟି-୨୦ ବିଶ୍ୱକପ୍‌ରୁ ଅବସର ନେଇଛନ୍ତି। ଫଳରେ ଯେଉଁ ଟି-୨୦ ବିଶ୍ୱକପ୍‌ରୁ ରୋହିତ ତାଙ୍କ କ୍ୟାରିୟର ଆରମ୍ଭ କରିଥିଲେ ସେହି ଟି-୨୦ ବିଶ୍ୱକପ୍‌ରେ ଏହି ଫର୍ମାଟ୍‌କୁ ଅଲ୍‌ବିଦା ଜଣାଇଛନ୍ତି। ରୋହିତ୍‌ ୧୫୯ ଟି-୨୦ ମ୍ୟାଚ୍‌ ଖେଳି ୩୨ରୁ ଊଦ୍ଧ୍ୱର୍ ଆଭରେଜରେ ୪୨୩୧ ରନ ସଂଗ୍ରହ କରିଛନ୍ତି। ଯେଉଁଥିରେ ୫ ଶତକ ଓ ୩୨ ଅର୍ଦ୍ଧଶତକ ସାମିଲ ରହିଛି। ସେ ୨୦୫ ଛକା ଓ ୩୮୩ ଚୌକା ମାରିଛନ୍ତି।

ଇନ୍ଦୋର: ଆଜି ମୋହାଲିରେ ଭାରତ ଓ ଆଫଗାନିସ୍ତାନ ମଧ୍ୟରେ ଦ୍ବିତୀୟ ଟି-୨୦ ଅନ୍ତର୍ଜାତୀୟ ମ୍ୟାଚ୍‌ ଖେଳାଯିବ। ଏଠାରେ ଦଳ ଦ୍ବିତୀୟ ମ୍ୟାଚ୍‌ ଓ ସିରିଜ୍‌ ଜିତିବା ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇବ। କେବଳ ସିରିଜ୍‌ ବିଜୟ ନୁହେଁ, ବରଂ ଆମେରିକା ଓ ୱେଷ୍ଟଇଣ୍ଡିଜ୍‌ରେ ଖେଳାଯିବାକୁ ଥିବା ଟି-୨୦ ବିଶ୍ବକପ୍‌ ଲାଗି ଭାରତୀୟ ଦଳ ଚୟନକୁ ମଧ୍ୟ ଗୁରୁତ୍ବ ଦିଆଯିବ। ପ୍ରଥମ ଟି-୨୦ ମ୍ୟାଚକୁ ଭାରତ ସହଜରେ ଜିତିନେଇଥିଲା।

ଅନ୍ୟପକ୍ଷରେ ପ୍ରତିଦ୍ବନ୍ଦ୍ବୀ ଦଳ ନିକଟରେ ପ୍ରମୁଖ ସ୍ପିନର ରଶିଦ୍‌ ଖାନ୍‌ଙ୍କ ଅନୁପସ୍ଥିତି ରହିଛି। ଏହା ସତ୍ତ୍ବେ ଦଳ ନିକଟରେ ଟି-୨୦ ଫ୍ରାଞ୍ଚାଇଜ୍‌ ଓ ଆଇପିଏଲ୍‌ ଖେଳିବାର ପର୍ଯ୍ୟାପ୍ତ ଅଭିଜ୍ଞତା ରହିଛି। ଦଳ ନିକଟରେ ଥିବା ଶ୍ରେଷ୍ଠ ସ୍ପିନରଙ୍କୁ ନେଇ ଆଫଗାନିସ୍ତାନ ଏହି ମ୍ୟାଚ୍‌ରେ ବିପର୍ଯ୍ୟୟ ସୃଷ୍ଟି କରିବାକୁ ନିଶ୍ଚିତ ଚେଷ୍ଟା କରିବ।

ଆଜିର ମ୍ୟାଚ୍‌ ଲାଗି ବିରାଟ କୋହଲି ଦଳକୁ ଫେରିବା ପରେ ନିଶ୍ଚିତଭାବେ ଶକ୍ତି ବୃଦ୍ଧି ପାଇଛି। କିନ୍ତୁ ସେ ଟି-୨୦ରେ କ୍ବାଲିଟି ସ୍ପିନରଙ୍କ ବିପକ୍ଷରେ ଭଲ ଖେଳିପାରୁନାହାନ୍ତି। ଏହି ମ୍ୟାଚ୍‌ରେ ଆଫାଗାନିସ୍ତାନ ସ୍ପିନରଙ୍କ ବିପକ୍ଷରେ ତାଙ୍କ ବ୍ୟାଟିଂ ଟେଷ୍ଟ ହେବ। ଜୟସ୍ବାଲ ଯଦି ଫିଟ୍‌ ହୁଅନ୍ତି ତେବେ ଗିଲ୍‌ଙ୍କ ସ୍ଥାନରେ ସେ ଖେଳିବେ। ଏବେ ଦଳରେ ଶିବମ ଦୁବେ ଓ ୱାଶିଟନ ସୁନ୍ଦରଙ୍କୁ ସାମିଲ କରାଯିବା ଫଳରେ ଭାରତ ନଂ-୮ ଯାଏ ଭଲ ବ୍ୟାଟିଂ କରିପାରିବ। କିନ୍ତୁ ଦୁବେଙ୍କ ପ୍ରଦର୍ଶନ ଦଳକୁ ନୂଆ ଆଶା ଦେଇଛି। ସେ ଗତ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ବିପକ୍ଷ ସିରିଜ୍‌ରେ ବେଞ୍ଚରେ ବସି ସମୟ କଟାଇଥିଲେ। ଏଥର ପ୍ରଥମ ସୁଯୋଗକୁ ଦୁଇ ହାତରେ ବ୍ୟବହାର କରି ଭାରତକୁ ମ୍ୟାଚ୍‌ ଜିତାଇଲେ। ସେ ଯେତେ ଅଧିକ ଖେଳିବେ ଭାରତ ସେତିକି ହାର୍ଦ୍ଦିକ ପାଣ୍ଡ୍ୟାଙ୍କ ବ୍ୟାକ୍‌ ଅପ୍‌ ଖେଳାଳି ପାଇବ। ଵିକେଟରକ୍ଷକ ଜିତେଶ ଶର୍ମାଙ୍କ ବିସ୍ଫୋରକ ବ୍ୟାଟିଂ ତାଙ୍କୁ ପ୍ରଥମ ପସନ୍ଦର ଖେଳାଳିଭାବେ ସ୍ଥାନ ଦେଇଛି। ଏଥିରୁ ସେ ଫାଇଦା ନେବା ଉଚିତ୍। ବୋଲିଂରେ ବିଶେଷ କିଛି ପରିବର୍ତ୍ତନ ହେବାର ସମ୍ଭାବନା କମ୍‌। ତେବେ କୁଲଦୀପ ଯାଦବଙ୍କୁ ଦଳରେ ସାମିଲ କରାଯିବାର ସମ୍ଭାବନାକୁ ଏଡାଇଦେଇ ହେବ ନାହିଁ।

ଅନ୍ୟ ପକ୍ଷରେ ଆଫଗାନିସ୍ତାନର ସମସ୍ୟା ହେଉଛି ବ୍ୟାଟିଂ। ଦଳ ନିକଟରେ ଢ଼େର ବ୍ୟାଟର ରହିଛନ୍ତି। କିନ୍ତୁ ଟପ୍‌ ଅର୍ଡରରେ ଦ୍ରୁତ ରନ୍‌ ସଂଗୃହୀତ ହୋଇପାରୁନି। ପ୍ରଥମ ମ୍ୟାଚ୍‌ରେ ଦଳ ପ୍ରଥମ ୧୦ ଓଭରରେ ମାତ୍ର ୫୭ ରନ୍‌ ଉଠାଇଥିଲା। ଏହାକୁ ଦଳ ସୁଧାରିବାକୁ ନିଶ୍ଚିତ ଚେଷ୍ଟା କରିବ। ତେବେ ଦଳର ସ୍ପିନର ମୁଜୀବ ଉର ରହମନ, ମହମ୍ମଦ୍‌ ନବି ଓ ଅଲରାଉଣ୍ଡର ଆଜମତୁଲ୍ଲା ଓମରଜାଇ ଭାରତ ଲାଗି ସମସ୍ୟା ସୃଷ୍ଟି କରିପାରନ୍ତି।

ପିଚ୍‌: ଇନ୍ଦୋର ପିଚ୍‌ ବ୍ୟାଟରଙ୍କୁ ସୁହାଇବ। ଏଠାରେ ଏଯାଏ କୌଣସି ପ୍ରଥମଶ୍ରେଣୀ ମ୍ୟାଚ୍‌ ଖେଳାଯାଇନି। କିନ୍ତୁ ଶେଷଥର ଏଠାରେ ଅନୁଷ୍ଠିତ ଭାରତ- ଦକ୍ଷିଣ ଆଫ୍ରିକା ଟି-୨୦ ମ୍ୟାଚ୍‌ରେ ୪୦୫ ରନ ମିଳିଥିଲା। ଦକ୍ଷିଣ ଆଫ୍ରିକାର ରିଲି ରୁଷୋ ୪୮ ବଲ୍‌ରେ ଶତକ ହାସଲ କରିଥିଲେ। ଏଠାରେ ଜୟବାୟୁ ସାଧାରଣ ରହିଛି। କ୍ରିକେଟ ଖେଳ ଲାଗି ଏହା ଉପଯୁକ୍ତ ହେବ।

ଖେଳାଳି ଦଳ:
ଭାରତ: ରୋହିତ ଶର୍ମା (ଅଧିନାୟକ), ଶୁବମାନ ଗିଲ, ଯଶସ୍ବୀ ଜୟସ୍ବାଲ, ବିରାଟ କୋହଲି, ତିଳକ ବର୍ମା, ରିଙ୍କୁ ସିଂ, ଜିତେଶ ଶର୍ମା ଓ ସଞ୍ଜୁ ସାମସନ (ଉଭୟ ଵିକେଟରକ୍ଷକ), ଶିବମ ଦୁବେ, ୱାଶିଂଟନ ସୁନ୍ଦର, ଅକ୍ଷର ପଟେଲ, ରବି ବିଷ୍ଣୋଇ, କୁଲଦୀପ ଯାଦବ, ଅର୍ଶଦୀପ ସିଂ, ଆଭେଷ ଖାନ୍‌ ଓ ମୁକେଶ କୁମାର।

ଆଫଗାନିସ୍ତାନ: ଇବ୍ରାହିମ ଜଡ୍ରାନ, (ଅଧିନାୟକ), ରହମନୁଲ୍ଲା ଗୁରବାଜ ଓ ଇକ୍ରାମ ଅଲ୍ଲୀଖୀଲ (ଉଭୟ ୱିକେଟରକ୍ଷକ), ହଜରତଉଲ୍ଲା ଜାଜାଇ, ରହମତ ଶାହ, ନଜିବୁଲ୍ଲା ଜଡ୍ରାନ, ମହମ୍ମଦ୍‌ ନବି, କରିମ ଜାନତ, ଆଜମଉଲା ଓମରଜାଇ, ସରାଫୁଦ୍ଦିନ ଅଶ୍ରଫ, ମୁଜୀବ-ଉର-ରହମନ, ଫଜଲ ହକ୍‌ ଫାରୁକି, ଫରୀଦ ଅହମ୍ମଦ୍‌, ନବୀନ-ଉଲ-ହକ୍‌, ନୁର ଅହମ୍ମଦ୍‌, ମହମ୍ମଦ୍‌ ସଲୀମ୍‌, କାଏସ ଅହମ୍ମଦ୍‌, ଗୁଲବଦିନ ନାଏବ ।