ୟେମେନ ଏବଂ ସୋମାଲିଆ ଉପକୂଳରେ ପୁଣିଥରେ ଜଳଦସ୍ୟୁମାନଙ୍କ ସକ୍ରିୟତା ଦେଖିବାକୁ ମିଳିଛି। ସଦ୍ୟପ୍ରାପ୍ତ ସୂଚନା ଅନୁଯାୟୀ, ଦୁଇଟି ପୃଥକ ପୃଥକ ଘଟଣାରେ ୨୨ ଜଣ ଭାରତୀୟଙ୍କୁ ନେଇ ଯାଉଥିବା ଦୁଇଟି ବାଣିଜ୍ୟିକ ଜାହାଜକୁ ଜଳଦସ୍ୟୁମାନେ ଅପହରଣ କରିଛନ୍ତି। ଆଫ୍ରିକା ମହାଦେଶ ନିକଟବର୍ତ୍ତୀ ସମୁଦ୍ରରେ ଏହି ଘଟଣା ସାମୁଦ୍ରିକ ସୁରକ୍ଷା ପ୍ରତି ଏକ ବଡ଼ ବିପଦ ସୃଷ୍ଟି କରିଛି।

ୟେମେନ ନିକଟରେ 'ଏମ୍.ଟି. ସିବୁ ୧' ଅପହରଣ

ପ୍ରଥମ ଘଟଣାଟି ଏଡେନ୍ ଉପସାଗରରେ ଘଟିଛି। ୟେମେନ ଉପକୂଳରୁ ପ୍ରାୟ ୩୦ ନଟିକାଲ ମାଇଲ ଦୂରରେ ଇରିଟ୍ରିଆ ପତାକା ଥିବା ତୈଳ ବାହୀ ଜାହାଜ 'ଏମ୍.ଟି. ସିବୁ ୧' (M.T. Sibu 1) କୁ ୬ ଜଣ ସଶସ୍ତ୍ର ଜଳଦସ୍ୟୁ ନିଜ କବ୍‌ଜାକୁ ନେଇଛନ୍ତି। ଏହି ଜାହାଜରେ ସମୁଦାୟ ୨୦ ଜଣ କ୍ରୁ ମେମ୍ବର ଥିବାବେଳେ ସେଥିମଧ୍ୟରୁ ୧୬ ଜଣ ହେଉଛନ୍ତି ଭାରତୀୟ ନାଗରିକ। ଅନ୍ୟମାନଙ୍କ ମଧ୍ୟରେ ସିରିଆ, ସୁଦାନ ଏବଂ ଇରାକର ନାଗରିକ ମଧ୍ୟ ସାମିଲ ଅଛନ୍ତି। ସାମୁଦ୍ରିକ ପ୍ରଶାସନ ନିର୍ଦ୍ଦେଶାଳୟ (Directorate of Maritime Administration) ପକ୍ଷରୁ ମିଳିଥିବା ରିପୋର୍ଟ ଅନୁଯାୟୀ ସମସ୍ତ କ୍ରୁ ସଦସ୍ୟ ସୁରକ୍ଷିତ ଥିବା ଜଣାପଡିଛି, ତେବେ ସେମାନଙ୍କର ବର୍ତ୍ତମାନର ସ୍ଥିତି ବିଷୟରେ ଅଧିକ ତଥ୍ୟ ଅପେକ୍ଷା କରାଯାଇଛି।

ସୋମାଲିଆ ଉପକୂଳରେ 'ଏମ୍/ଭି ଲୁତୁଫ୍' ଉପରେ କବ୍‌ଜା

ଦ୍ୱିତୀୟ ଘଟଣାଟି ସୋମାଲିଆର ପୁଣ୍ଟଲ୍ୟାଣ୍ଡ (Puntland) ଉପକୂଳରେ ସାମ୍ନାକୁ ଆସିଛି। ଜଳଦସ୍ୟୁମାନେ କ୍ୟାମେରୁନ ପତାକାବାହୀ କାର୍ଗୋ ଜାହାଜ 'ଏମ୍/ଭି ଲୁତୁଫ୍' (M/V LUTUF) କୁ ଅପହରଣ କରିଛନ୍ତି। ଏହି ଜାହାଜରେ ସମୁଦାୟ ୧୦ ଜଣ କ୍ରୁ ମେମ୍ବର ଥିବାବେଳେ ସେଥିରୁ ୬ ଜଣ ଭାରତୀୟ ଅଟନ୍ତି। ଏହି ଜାହାଜରେ ଜଣେ ତୁର୍କୀ, ଜଣେ ଜର୍ଜିଆ ନାଗରିକ ଏବଂ ଦୁଇ ଜଣ ସର୍ବିଆର ସୁରକ୍ଷା କର୍ମୀ ମଧ୍ୟ ଉପସ୍ଥିତ ଅଛନ୍ତି। ମାରାୟା ଉପକୂଳରୁ ୩.୫ ନଟିକାଲ ମାଇଲ ଦୂରରେ ଜାହାଜକୁ ଅପହରଣ କରାଯାଇ ନୁଗାଲ୍ ଉପକୂଳ ଆଡକୁ ନିଆଯାଇଥିବା ସୋମାଲିଆ ଅଧିକାରୀମାନେ ସୂଚନା ଦେଇଛନ୍ତି।

ସମୁଦ୍ରରେ ବଢୁଛି ସୁରକ୍ଷା ଚିନ୍ତା

ଏହି ଲଗାତାର ଦୁଇଟି ଅପହରଣ ଘଟଣା ଆନ୍ତର୍ଜାତୀୟ ଜଳପଥରେ, ବିଶେଷ କରି ଆଫ୍ରିକା ଶୃଙ୍ଗ (Horn of Africa) ଅଞ୍ଚଳରେ ଜଳଦସ୍ୟୁଙ୍କ ପୁନଃ ସକ୍ରିୟତାକୁ ସ୍ପଷ୍ଟ କରୁଛି। ଇ-ନାଭିକ (e-Navik) ଅନଲାଇନ ରିପୋର୍ଟିଂ ସିଷ୍ଟମ ମାଧ୍ୟମରେ ସମ୍ପୃକ୍ତ ଏଜେନ୍ସିଗୁଡିକୁ ନିୟମିତ ଅପଡେଟ୍ ଦେବା ପାଇଁ ନିର୍ଦ୍ଦେଶ ଦିଆଯାଇଛି। ନାବିକମାନଙ୍କର ନିଯୁକ୍ତି ଏଜେନ୍ସି ମଧ୍ୟ ସାମୁଦ୍ରିକ ପ୍ରଶାସନ ସହିତ ଲଗାତାର ସମ୍ପର୍କରେ ରହି ସମ୍ପୂର୍ଣ୍ଣ ଘଟଣା ଉପରେ ତୀକ୍ଷ୍ଣ ନଜର ରଖିଛନ୍ତି।

ନୂଆଦିଲ୍ଲୀ: ସୋମାଲିଆର ସାମୁଦ୍ରିକ ସୀମା ନିକଟରୁ ‘ଏମଭି ଲୀଲା ନର୍ଫାଲକ’ ନାମକ ଏକ ପଣ୍ୟବାହୀ ଜାହାଜକୁ ଅପହରଣ କରାଯାଇଛି। ଅପହୃତ ଜାହାଜରେ ୧୫ ଜଣ ଭାରତୀୟ ଥିଲେ। ସମସ୍ତ ୧୫ ଜଣ ଜାହାଜର କ୍ରୁ ମେମ୍ବର ବା ଜାହାଜ କର୍ମଚାରୀ । ସେମାନଙ୍କୁ ସୁରକ୍ଷିତ ଉଦ୍ଧାର ପାଇଁ ପଦକ୍ଷେପ ନେଇଛି ଭାରତୀୟ ନୌସେନା। ଅପହୃତ ଜାହାଜକୁ ଖୋଜିବା ପାଇଁ ଭାରତୀୟ ନୌସେନା ଏହାର ଯୁଦ୍ଧ ଜାହାଜ ଆଇଏନ୍ଏସ୍ ଚେନ୍ନାଇକୁ ନିୟୋଜିତ କରିଛି । ଏନେଇ ଜଣେ ନୌସେନା ଅଧିକାରୀ ସୂଚନା ଦେଇଛନ୍ତି।

ଭାରତୀୟ ନୌସେନା ଅଧିକାରୀଙ୍କ କହିବା ଅନୁଯାୟୀ ଅପହରଣ ହୋଇଥିବା ଜାହାଜର ତଲାସି ଅଭିଯାନକୁ ବ୍ୟାପକ କରାଯାଇଛି । ଗୁରୁବାର ସନ୍ଧ୍ୟାରେ ଏହି ଜାହାଜର ଅପହରଣ ସମ୍ପର୍କରେ ସୂଚନା ମିଳିଥିଲା। ସୋମାଲିଆ ଉପକୂଳରୁ ଅପହରଣ ହୋଇଥିବା ଏହି ଜାହାଜରେ ଲାଇବେରିଆର ପତାକା ଲାଗିଛି | ଭାରତୀୟ ନୌସେନା ବିମାନ ଲଗାତାର ଅପହୃତ ଜାହାଜର ଚାଳକ ଦଳ ସହ ଯୋଗାଯୋଗ ସ୍ଥାପନ କରିବାରେ ସକ୍ଷମ ସୋଇଛି | ଚାଳକ ଦଳର ସବୁ ସଦସ୍ୟ ଜାହାଜ ଭିତରେ ସୁରକ୍ଷିତ ଅଛନ୍ତି |

ସୋମାଲିଆ ନିକଟରେ ଜାହାଜ ଅପହରଣ ଘଟଣା ନୂଆ ନୁହେଁ। ନିକଟରେ ସୋମାଲିଆର ଜଳଦସ୍ୟୁ ଆରବ ସାଗରରେ ମାଲ୍ଟାର ଏକ ଜାହାଜ ଏମ.ଭି ରୁଏନକୁ ହାଇଜାକ୍ କରିଥିଲେ। ପରେ ଭାରତୀୟ ନୌସେନା ଉଦ୍ୟମରେ ଜାହାଜକୁ ଉଦ୍ଧାର କରାଯାଇଥିଲା ।