ସୋର: ମହଙ୍ଗା ପଡ଼ିଲା ପ୍ରେମ ନିବେଦନ । ଏକ ତରଫା ପ୍ରେମ ବ୍ୟାପାରକୁ ନେଇ ଯୁବକକୁ ପିଟି ପିଟି ମାରିଦେଲେ ଝିଅର ପରିବାର ଲୋକେ l ମୃତ ଯୁବକ ହେଲେ ବାଲେଶ୍ୱର ଜିଲ୍ଲା ସିମୁଳିଆ ଥାନା ପୁରୁଷୋତ୍ତମ ଗାଁର ସୁଦର୍ଶନ ସୁତାରଙ୍କ ପୁଅ ସୁବାସ ସୁତାର । ସୂଚନା ଅନୁସାରେ, ସୁବାସ ଜଣେ ଯୁବତୀଙ୍କୁ ମୋବାଇଲରେ ପ୍ରେମ ନିବେଦନ କରିଥିଲେ । ପରବର୍ତ୍ତୀ ସମୟରେ ଝିଅର ପରିବାର ଲୋକେ ଏହା ଜାଣି ସୁବାଷଙ୍କୁ ଟେକି ନେଇ ବିରବ୍ରହ୍ମପୁର ସ୍କୁଲ ପରିସରରେ ଥିବା ଅଙ୍ଗନବାଡ଼ିର ଏକ ଖୁଣ୍ଟରେ ବାନ୍ଧି ନିର୍ଧୁମ ପିଟିଥିଲେ । ପରେ ସୁବାଷଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସିମୁଳିଆ ମେଡିକାଲରେ ଭର୍ତ୍ତି କରାଯାଇଥିଲା । ଅବସ୍ଥା ଗୁରୁତର ଥିବାରୁ ଭଦ୍ରକ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଅଭିଯୋଗ ପରେ ସିମୁଳିଆ ପୋଲିସ ଝିଅର ଭଣଜାକୁ ଅଟକ ରଖି ଅଧିକ ତଦନ୍ତ ଚଳାଇଛି ।

ବାଲେଶ୍ୱର: ଗତ କିଛି ଦିନ ତଳେ ଫକୀରମୋହନ ସ୍ୱୟଂଶାସିତ ମହାବିଦ୍ୟାଳୟର ଓଡ଼ିଆ ବିଭାଗୀୟ ମୁଖ୍ୟ ସନ୍ତୋଷ କୁମାର ନାୟକଙ୍କ ବିରୋଧରେ ଏକ ଚିଠି ଶିକ୍ଷା ବିଭାଗରେ ପହଞ୍ଚିବା ପରେ ତାଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ସଦୃଶ ତାଙ୍କୁ ଏଚ୍‌ଓଡି ପଦରୁ ହଟାଯାଇଥିଲା। ଏହାର ତଦନ୍ତଭାର ଆଇସିସିକୁ ପ୍ରଦାନ କରାଯାଇଥିଲା। ଏବେ ସେଇ ପୂର୍ବତନ ଏଚଓଡିଙ୍କ ବିରୋଧରେ ସ୍ୱର ତେଜିଛି। ସେ ପାଠ ପଢ଼ାଇବା ବଦଳରେ ଛାତ୍ରୀଙ୍କୁ ପ୍ରେମ ନିବେଦନ କରୁଥିବାର ଅଭିଯୋଗ ହୋଇଛି। ଏକାଧିକ ଛାତ୍ରୀଙ୍କୁ ଅଶ୍ଲୀଳ ମେସେଜ୍‌ କରିବା ସହ ପ୍ରେମ ନିବେଦନ କରୁଥିବା ନେଇ ଅଭିଯୋଗ ଆସିଛି। ଭାଇରାଲ୍ ହେଉଛି ସାରଙ୍କ ହ୍ଵାଟସଆପ୍ ଡାର୍ଟି ମେସେଜ୍। ଏନେଇ ଆଇସିସି କମିଟି ନିକଟରେ ଲିଖିତ ଅଭିଯୋଗ କରିଛନ୍ତି ଛାତ୍ରୀ।

ଏହାଛଡ଼ା ସେ ନିଜ ଲେଖାବହି କିଣିବାକୁ ବାଧ୍ୟ କରିବା ସହ ପାଠ ବଦଳରେ ଶ୍ରେଣୀରେ ଖରାପ ଗପ କହିବା ଏବଂ ପ୍ରତିବାଦ କଲେ ପରୀକ୍ଷାରେ ବ୍ୟାକ୍‌ ଲଗାଇଦେବାର ଧମକ ମଧ୍ୟ ଦେଉଛନ୍ତି। ଏଭଳି ମାନସିକ ନିର୍ଯାତନାରେ ଅତିଷ୍ଠ ହୋଇ ୯ଜଣ ଛାତ୍ରଛାତ୍ରୀ ଆଇସିସି କମିଟି ନିକଟରେ ଦ୍ୱାରସ୍ଥ ହୋଇଛନ୍ତି। ଏପରିକି, ଏହି ଘଟଣାରେ ତଦନ୍ତ ଚାଲୁ ରହିଥିବା ବେଳେ ପୂର୍ବତନ ଏଚଓଡି ଶ୍ରୀ ନାୟକ ଏକାଧିକ ଛାତ୍ରଛାତ୍ରୀମାନଙ୍କ ଫୋନରୁ ହ୍ୱାଟସ୍‌-ଆପ୍‌ ଚାଟ୍‌ ମଧ୍ୟ ଡିଲିଟ୍‌ କରୁଥିବା ଅଭିଯୋଗ ହୋଇଛି। ଏପରିକି, ସେମାନଙ୍କୁ ଧମକାଇ ଡିଲିଟ କରାଯାଉଥିବା ନେଇ ଛାତ୍ରଛାତ୍ରୀ ଅଭିଯୋଗ କରିଛନ୍ତି। ଅନ୍ୟପଟେ, ଏହି ଘଟଣାକୁ ନେଇ କଲେଜ କର୍ତ୍ତୃପକ୍ଷ ଚୁପ୍‌ ରହିଥିବା ବେଳେ ମହାବିଦ୍ୟାଳୟର ଅଧ୍ୟକ୍ଷ ଦିଲ୍ଲୀପ କୁମାର ଦାସ କୌଣସି ପ୍ରତିକ୍ରିୟା ଦେଉନାହାନ୍ତି।

ବାଲେଶ୍ୱର: ବାଲେଶ୍ୱର ଜିଲ୍ଲା ବସ୍ତା ନିର୍ବାଚନମଣ୍ଡଳୀରେ ବିଜେଡିର ଗଡ଼ ମଜଭୁତ ହେବାରେ ଲାଗିଛି। ଚାରି ଦଶନ୍ଧି ଧରି, ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କଠାରୁ ଆରମ୍ଭ କରି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନାମରେ ଏଠାରେ ପ୍ରାର୍ଥୀଙ୍କୁ ଭୋଟ୍‌ ମିଳି ଆସିଛି। ତେବେ, ପୂର୍ବତନ ସାଂସଦ ରବୀନ୍ଦ୍ର କୁମାର ଜେନା ବିଜେଡି ଛାଡ଼ି ବିଜେପି ଶିବିରକୁ ଯିବା ପରେ ବସ୍ତାରେ ବିଜେଡି ଦୁର୍ବଳ ହେବା ନେଇ ଚର୍ଚ୍ଚା ଆରମ୍ଭ ହୋଇଥିଲା। ତାଙ୍କ ପରେ ପରେ ବିଧାୟିକା ସୁବାସିନୀ ଜେନା ରାଜ୍ୟସଭା ନିର୍ବାଚନରେ କ୍ରସ୍‌ ଭୋଟିଂ କରି ଦଳରୁ ନିଲମ୍ୱିତ ହେବା ପରେ ଏ ଚର୍ଚ୍ଚାକୁ ଆହୁରି ବଳ ମିଳିଥିଲା। କିନ୍ତୁ, ଶୁକ୍ରବାର ପ୍ରବାଦପୁରୁଷ ବିଜୁ ପଟ୍ଟନାୟକଙ୍କ ପୁଣ୍ୟତିଥିରେ ବିଜେଡିର ଶକ୍ତି ପ୍ରଦର୍ଶନ ଏସବୁ ଚର୍ଚ୍ଚା‌ରେ ପୂର୍ଣ୍ଣ‌ଚ୍ଛେଦ ଟାଣିଦେଇଛି। 

ବିଜେଡିର ଆଗଧାଡ଼ିର ନେତାଙ୍କ ଉପସ୍ଥିତିରେ ପାଳିତ ଏହି କାର୍ଯ୍ୟକ୍ରମ‌ରେ ତୃଣମୂଳସ୍ତରର ହଜାର ହଜାର କର୍ମୀ ଯୋଗଦେଇ ପଞ୍ଚାୟତ ନିର୍ବାଚନ ପୂର୍ବରୁ ପ୍ରତିଦ୍ବନ୍ଦ୍ବୀ ଶିବିରକୁ ଛାନିଆ କରିଥିବା ଆଲୋଚନା ହେଉଛି। ରବୀନ୍ଦ୍ର ବିଜେଡିରୁ ଯିବା ପରେ ଜିଲ୍ଲାର ସମସ୍ତ ଦଳୀୟ ବିଧାୟକ, ପୂର୍ବତନ ବିଧାୟକ ଓ ବରିଷ୍ଠ ନେତାମାନେ ଗୋଟିଏ ମଞ୍ଚରେ ଏକଜୁଟ୍‌ ହେବା ଏବଂ ପୂର୍ବତନ ମନ୍ତ୍ରୀ ରଘୁନାଥ ମହାନ୍ତିଙ୍କ ଘରବାହୁଡ଼ା (ବିଜେଡିକୁ ପ୍ରତ୍ୟାବର୍ତ୍ତନ) କର୍ମୀଙ୍କ ମଧ୍ୟରେ ନୂଆ ଉତ୍ସାହ ସୃଷ୍ଟି କରିଛି।

ଅନ୍ୟପଟେ, ରବୀନ୍ଦ୍ର ବିଜେଡିରେ ସମାନ୍ତରାଳ ସଂଗଠନ କରି ବସ୍ତାରେ ରାଜନୀତି ଚଳାଇଥିବାରୁ ପୁରୁଖା କର୍ମୀ ଅବଦମିତ ଅବସ୍ଥାରେ ଥିଲେ। ଏବେ ରବୀନ୍ଦ୍ର ବିଜେଡିରୁ ଯିବା ପରେ ପୁରୁଖା ନେତା ଓ କର୍ମୀ ଖୁଲମଖୁଲା ରାଜନୀତି କରିବାକୁ ବିଜେଡି ଶିବିରକୁ ଫେରୁଛନ୍ତି। ତେବେ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନାଁରେ ବସ୍ତାରୁ ଜିତିଥିବା ବିଧାୟିକା ସୁବାସିନୀ ଜେନାଙ୍କ ଆଗାମୀ କାର୍ଯ୍ୟ ପନ୍ଥା କ’ଣ ରହିବ, କେଉଁ ମୁଦ୍ଦା ନେଇ ସେ ଆଗାମୀ ରାଜନୀତି କରିବେ, ସେନେଇ ତୃଣମୂଳ ସ୍ତରରେ କର୍ମୀମାନଙ୍କ ମଧ୍ୟରେ ଅନିଶ୍ଚିତତା ଲାଗି ରହିଛି। ଏମିତି ବି ବସ୍ତାରେ ବିଜେପି ସଂଗଠନ ଦୁର୍ବଳ ଥିବା ବେଳେ କଂଗ୍ରେସ ଅପେକ୍ଷାକୃତ ସୁଦୃଢ଼ ରହିଛି। ଆଗକୁ ପଞ୍ଚାୟତ ନିର୍ବାଚନରେ ରାଜନୈତିକ ଲଢ଼େଇ ଜୋରଦାର୍‌ ହେବାକୁ ଥିବା ବେଳେ ବିଜେଡି ତାର ପୁରୁଣା ଦୁର୍ଗ ଦଖଲରେ ରଖିବ ବୋଲି ନେତା ଓ କର୍ମୀ ମହଲରେ ଚର୍ଚ୍ଚା ହେଉଛି। ଏଠା‌ରେ ଉଲ୍ଲେଖଯୋଗ୍ୟ, ଗତକାଲି ପ୍ରବାଦପୁରୁ‌ଷ ବିଜୁ ପଟ୍ଟନାୟକଙ୍କ ପୁଣ୍ୟତିଥି ଉପଲକ୍ଷେ ବସ୍ତାରେ ଆୟୋଜିତ କାର୍ଯ୍ୟକ୍ରମରେ ଜଳେଶ୍ବର ବିଧାୟକ ଅଶ୍ବନୀ କୁମାର ପାତ୍ର, ପୂର୍ବତନ ମନ୍ତ୍ରୀ ପ୍ରତାପ ଦେବ, ପୂର୍ବତନ ମନ୍ତ୍ରୀ ରଘୁନାଥ ମହାନ୍ତି, ଭୋଗରାଇ ବିଧାୟକ ଗୌତମବୁଦ୍ଧ ଦାସ, ସୋର ବିଧାୟକ ମାଧବ ଧଡ଼ା, ସାଂସଦ ପ୍ରାର୍ଥିନୀ ଲେଖାଶ୍ରୀ ସାମନ୍ତସିଂହାର, ପୂର୍ବତନ ବିଧାୟକ ସୁକାନ୍ତ ନାୟକ, ପୂର୍ବତନ ବିଧାୟକ ଜୀବନପ୍ରଦୀପ ଦାସ, ପୂର୍ବତନ ରେମୁଣା ବିଧାୟକ ସୁଧାଂଶୁ ପରିଡ଼ା, ପୂର୍ବତନ ସଦର ବିଧାୟକ ସ୍ବରୂପ ଦାସ, ଜିଲ୍ଲା ପରିଷଦ ସଭାପତି ନାରାୟଣ ପ୍ରଧାନ, ବରିଷ୍ଠ ନେତା ଗିରିଶ ଦାସ, ବରଦା ପ୍ରସନ୍ନ ପଟ୍ଟନାୟକ, ଭଗବାନ ଗିରି, ଯୁବ ବିଜେଡି ରାଜ୍ୟ କାର୍ଯ୍ୟକାରୀ ସଭାପତି ଶୁଭେନ୍ଦୁ ମଙ୍ଗରାଜ, ରେମୁଣା ବିଧାୟକ ପ୍ରାର୍ଥୀନୀ ବିଦ୍ୟାସ୍ମିତା ମହାଳିକ, ଜିଲ୍ଲା ପରିଷଦ ସଭ୍ୟା ବିଷ୍ଣୁପ୍ରିୟା ବୁଗୁଡ଼ି ଓ ଦେବିକା ସୋରେନ ପ୍ରମୁଖ ଉପସ୍ଥିତ ଥିଲେ। ବସ୍ତାର ବରିଷ୍ଠ ବିଜେଡି ନେତା ମହାଦେବ ଦାସ ସ୍ବାଗତ ଭାଷଣ ଦେବା ସହ ଶେଷରେ ଧନ୍ୟବାଦ ଅର୍ପଣ କରିଥିଲେ।

ବାଲେଶ୍ଵର: ବିବାହରୁ ଫେରିବା ବେଳେ ଘଟିଲା ଭୟଙ୍କର ସଡକ ଦୁର୍ଘଟଣା । ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବାବେଳେ ୧୫ ଜଣ ଆହତ ହୋଇଛନ୍ତି । ବାଲେଶ୍ଵର ଜିଲ୍ଲା ସିମୁଳିଆ ଥାନା ୧୬ନମ୍ବର ଜାତୀୟ ରାଜପଥ ମାଟିଆପଡ଼ା ନିକଟରେ ଘଟିଛି ଏହି ମର୍ମନ୍ତୁଦ ଦୁର୍ଘଟଣା । 

ସୂଚନା ଅନୁଯାୟୀ, ଭୁବନେଶ୍ୱର ଡୁଡୁମ୍ବା ଅଞ୍ଚଳରୁ କିଛି ଲୋକ କଲିକତାକୁ ଏକ ବିବାହ କାର୍ଯ୍ୟରେ ଯୋଗ ଦେବା ପାଇଁ ଯାଇଥିଲେ । ସେଠାରୁ ଡୁଡୁମ୍ବାକୁ ଏକ ଟ୍ରାଭେଲର ଯୋଗେ ଫେରୁଥିବା ସମୟରେ ମାଟିଆପଡ଼ା ନିକଟରେ ହଠାତ୍ ଭାରସାମ୍ୟ ହରାଇ ରାସ୍ତା ପାଖରେ ଥିବା ଗଛକୁ ଜୋରଦାର ଧକ୍କା ଦେଇଥିଲା। ଦୁର୍ଘଟଣାରେ ଜଣେ ମୃତ୍ୟୁବରଣ କରିଥିବା ବେଳେ ଛୋଟ ପିଲାଙ୍କ ସମେତ ୧୫ଜଣ ଗୁରୁତର ଆହତ ହୋଇଥିବା ଜଣାପଡିଛି। ସମସ୍ତଙ୍କୁ ସିମୁଳିଆ ମେଡିକାଲରୁ ଭଦ୍ରକ ମେଡ଼ିକାଲକୁ ସ୍ଥାନାନ୍ତରିତ କରାଯାଇଛି। ଘଟଣା ସ୍ଥଳରେ ସିମୁଳିଆ ପୋଲିସ ପହଞ୍ଚି ତଦନ୍ତ ଜାରି ରଖିଛନ୍ତି। ଡ୍ରାଇଭରକୁ ନିଦ ଆସିଯାଇଥିବାରୁ ଭାରସାମ୍ୟ ହରାଇ ରାସ୍ତାରୁ ତଳକୁ ଖସି ପଡ଼ିଥିଲା ବୋଲି ଯାତ୍ରୀ ମାନେ ସୂଚନା ଦେଇଛନ୍ତି । 

ବାଲେଶ୍ୱର: ଫକୀର ମୋହନ କଲେଜରେ ପୁଣି ଜଣେ ଅଧ୍ୟାପକଙ୍କ ନାମରେ ସାଂଘାତିକ ଅଭିଯୋଗ। ଓଡ଼ିଆ ବିଭାଗର ଆସିଷ୍ଟାଣ୍ଡ ପ୍ରଫେସର ତଥା ବିଭାଗୀୟ ମୁଖ୍ୟଙ୍କ ନାମରେ ଆସିଛି ଅଭିଯୋଗ। ଏନେଇ ଶିକ୍ଷା ବିଭାଗର ଆଞ୍ଚଳିକ ନିର୍ଦ୍ଦେଶକଙ୍କ ନିକଟକୁ ଅଭିଯୋଗ ଯାଇଛି। ଜଣେ ଛାତ୍ରୀଙ୍କୁ ନିର୍ଯାତନା ଦେଉଥିବା ଅଭିଯୋଗ ହୋଇଛି । ତେବେ ଅଭିଯୋଗ ପାଇବା ପରେ ସମ୍ପୃକ୍ତ ଅଧ୍ୟାପକଙ୍କୁ ତୁରନ୍ତ ଏଚ୍ଓଡି ପଦରୁ ହଟାଇବା ସହିତ କଲେଜ ଆନ୍ତରିଣ କମିଟିକୁ ତଦନ୍ତ ଭାର ଦିଆଯାଇଥିବା ସୂଚନା ମିଳିଛି। ତେବେ ଆସନ୍ତା ୧୫ ତାରିଖ ଦିନ ଅଭିଯୋଗ କରିଥିବା ଛାତ୍ରୀ କଲେଜ କତ୍ତୃପକ୍ଷଙ୍କ ନିକଟରେ ବୟାନ ଦେବାକୁ କୁହାଯାଇଛି। 

ବାଲେଶ୍ଵର: ରାଜ୍ୟରେ ଗ୍ରୀଷ୍ମ ପ୍ରବାହ ଜାରି ରହିଥିବା ବେଳେ ବାଲେଶ୍ଵର ଜିଲ୍ଲାରେ କାଳବୈଶାଖୀ ନିଜର କରାଳ ରୂପ ଦେଖାଇଛି। ଆଜି ଅପରାହ୍ନରେ ହଠାତ୍ ପାଗ ପରିବର୍ତ୍ତନ ହେବା ସହ ପ୍ରବଳ ବେଗରେ ପବନ, ଘଡ଼ଘଡ଼ି ଓ ବିଜୁଳି ସହ ବର୍ଷା ହୋଇଛି। ଜିଲ୍ଲାର ବିଭିନ୍ନ ସ୍ଥାନରେ କୁଆପଥର ବର୍ଷା ହୋଇଥିବା ସୂଚନା ମିଳିଛି। ଅପରାହ୍ନ ପ୍ରାୟ ୨ଟା ୩୦ମିନିଟ ସମୟ ବେଳକୁ ଆକାଶ ହଠାତ୍ କଳାହାଣ୍ଡିଆ ମେଘରେ ଢାଙ୍କି ହୋଇଯାଇଥିଲା। ଦିନ ବେଳେ ରାତିର ଭ୍ରମ ସୃଷ୍ଟି ହୋଇଥିବା ବେଳେ ପ୍ରବଳ ଗର୍ଜନ ସହ ବର୍ଷା ଆରମ୍ଭ ହୋଇଥିଲା। କୁଆପଥର ବର୍ଷାରେ ପନିପରିବା ଚାଷ ଓ ଆମ୍ବ ଫଳ ବ୍ୟାପକ ଭାବେ ନଷ୍ଟ ହୋଇଛି, ପାଣିପାଗ ବିଭାଗ ପକ୍ଷରୁ ଆଗାମୀ ୨୪ ଘଣ୍ଟା ପାଇଁ ସତର୍କ ସୂଚନା ଜାରି କରାଯାଇଛି। ବଜ୍ରପାତରୁ ରକ୍ଷା ପାଇବା ପାଇଁ ଲୋକମାନଙ୍କୁ ପକ୍କା ଘର ଭିତରେ ରହିବାକୁ ଏବଂ ଗଛ ମୂଳେ ଆଶ୍ରୟ ନନେବାକୁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି। 

ବାରିପଦା: ଗୋରୁ ମାଫିଆଙ୍କ ବିରୋଧରେ ପୋଲିସର ବଡ ଧରଣର କାର୍ଯ୍ୟାନୁଷ୍ଠାନ । ଗୋରୁ ଚୋରି ଓ ଅବୈଧ ପରିବହନରେ ଲିପ୍ତ ‘ଗୋ-ମାଫିଆ’ ବିରୋଧରେ ପୂର୍ବାଞ୍ଚଳ ରେଞ୍ଜ ପୁଲିସ୍ ପକ୍ଷରୁ ମୟୂରଭଞ୍ଜ, ବାଲେଶ୍ୱର ଓ ଭଦ୍ରକ ଜିଲ୍ଲାରେ ଏକ ଯୋଗାଯୋଗିତା ଅନୁସନ୍ଧାନ ଅଭିଯାନ ଆରମ୍ଭ ହୋଇଛି। ଭଦ୍ରକରେ ୮ଟି ଏବଂ ମୟୁରଭଞ୍ଜରେ ୧୫ ସ୍ଥାନରେ ଏକକାଳୀନ ଚଢ଼ାଉ ଚାଲିଛି। ୩୦ ଲକ୍ଷରୁ୍ ଅଧିକ ନଗଦ ଟଙ୍କା ଜବତ । ପୂର୍ବାଞ୍ଚଳ ରେଞ୍ଜର ଡିଆଇଜିଙ୍କ ନିର୍ଦେଶନାରେ ଏହି ଅଭିଯାନ ଚାଲିଛି । ଜଣେ ଡ଼ିଏସପି ତିନି ଜଣ ଇନିଷ୍ପେକ୍ଟର, ୬ ପ୍ଲାଟୁନ ପୁଲିସ୍ ଫୋର୍ସ ଏହି ଚଢ଼ାଉରେ ସାମିଲ ହୋଇଛନ୍ତି । ଭଦ୍ରକରେ ଗୁଜି ଦରଡ଼ା, ଅଲାରପୁର, ସନ୍ତିଆ ଆଦି ଗାଁରେ ପୁଲିସ ଚଢ଼ାଉ କରିଛି । ଗୋରୁ ମାଫିଆ ଘରୁ ୨୦ ଲକ୍ଷ ଟଙ୍କାରୁ ଉର୍ଦ୍ଧ ଟଙ୍କା ସହ ସହ ଲକ୍ଷାଧିକ ମୂଲ୍ୟର ସୁନା ଗହଣା, ସହ ସହ ଦୁଇଟା ଖଣ୍ଡା ଗୋଟେ ବନ୍ଧୁକ ଜବତ କରାଯାଇଛି ।

ମୟୂରଭଞ୍ଜ ଜିଲ୍ଲାରେ ଏହି ଅଭିଯାନ ଅଧିନରେ ୭ଟି ଥାନା ଅଞ୍ଚଳର ୧୫ଟି ସ୍ଥାନରେ ଏକକାଳୀନ ଚଢ଼ାଉ କରାଯାଇଛି। ଏହି ଥାନାଗୁଡ଼ିକ ହେଉଛି – ବାରିପଦା ଟାଉନ୍, ଭଞ୍ଜପୁର, ଝାରପୋଖରିଆ, ଶୁଳିଆପଦା, ବାଙ୍ଗିରିପୋଷି, ବୈଶିଙ୍ଗା ଏବଂ ବାଦାମପାହାଡ।

ଅଭିଯାନରେ ପୁଲିସ୍ ବିପୁଳ ପରିମାଣର ନଗଦ ଟଙ୍କା, ସୁନା ଓ ରୂପା ଅଳଙ୍କାର, ବ୍ୟାଙ୍କ୍ ପାସବୁକ୍, ସମ୍ପତ୍ତି ଦସ୍ତାବିଜ ଏବଂ ଗୋରୁ ଅବୈଧ ପରିବହନ ପାଇଁ ବ୍ୟବହୃତ ଯାନବାହନ ଜବତ କରିଛି। ଏପର୍ଯ୍ୟନ୍ତ ୨ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି। ଅନୁସନ୍ଧାନ ଏବେ ବି ଜାରି ରହିଛି। ପୁଲିସ୍ ପକ୍ଷରୁ କୁହାଯାଇଛି ଯେ, ଅନ୍ୟ ଦୁଇ ଜିଲ୍ଲାରେ ମଧ୍ୟ ଏକଯୋଗରେ ଅଭିଯାନ ଚାଲୁ ରହିଛି ଏବଂ ଆହୁରି ଅଧିକ ସୂଚନା ପରେ ବିସ୍ତୃତ ବିବରଣୀ ପ୍ରକାଶ ପାଇବ। ଏହି ଅଭିଯାନକୁ ସ୍ଥାନୀୟ ଲୋକେ ସ୍ୱାଗତ କରିଛନ୍ତି। 

ନୀଳଗିରି: ଘରେ ପଶିଲେ, ମୁଣ୍ଡରେ ବନ୍ଧୁକ ଲଗାଇ ଡକାୟତି କଲେ । ବନ୍ଧୁକ ମୁନରେ ଘରୁ ୨୦ ଲକ୍ଷ ଟଙ୍କା ସହ ୩୦ ଲକ୍ଷ ଟଙ୍କାର ସୁନାଗହଣା ଲୁଟିନେଲେ ୬ ଦୁର୍ବୃତ୍ତ । ବାଲେଶ୍ଵର ଜିଲ୍ଲା ନୀଳଗିରି ଥାନା ଅଧୀନ ୯ନମ୍ୱର ୱାର୍ଡ କହାଳିଆ ଗ୍ରାମରେ ଘଟିଛି ଏପରି ଅଘଟଣ । ଗାଁର ଗୋବିନ୍ଦା ସିଂହ ଘରେ ସପରିବାର ଖାଉଥିବା ସମୟରେ ୬ଜଣ ଦୁର୍ବୃତ୍ତ ତେଲେଙ୍ଗା କଟୁରୀ ଦେଖାଇ ପରିବାର ଲୋକଙ୍କ ହାତ ଗୋଡ ବାନ୍ଧି ମୁଣ୍ଡରେ ବନ୍ଧୁକ ଲଗାଇ ଲୁଟି ନେଲେ ୨୦ ଲକ୍ଷ ଟଙ୍କା ସହିତ ୩୦ ଲକ୍ଷ ଟଙ୍କାର ସୁନା ଅଳଙ୍କାର । ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଡକାୟତଙ୍କ ମଧ୍ୟରେ ଦୁଇ ଜଣ ଓଡ଼ିଆ ଯୁବକ ଏବଂ ୪ ଜଣ ଅଣଓଡ଼ିଆ ଥିବା ଗୋବିନ୍ଦା କହିଛନ୍ତି। 

ବାଲେଶ୍ଵର: ହାତରେ ତେଲେଙ୍ଗା କଟୁରୀ ଧରି ମାର୍କେଟ ରାସ୍ତାରେ ବୁଲିଲେ ଯୁବକ। ବାଲେଶ୍ଵର ସହରର ଜନଗହଳି ପୂର୍ଣ୍ଣ ଇଲାକାରେ ହାତରେ ତେଲେଙ୍ଗା କଟୁରୀ ଧରି ଚାଲି ଚାଲି ଯାଉଥିବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଯୁବକ ଜଣକ କିଏ ଓ କାହିଁକି ଏଭଳି ମାରଣାସ୍ତ୍ର ଧରି ସହରର ଚିଡିଆପୋଲ ଅଞ୍ଚଳରେ ବୁଲୁଥିଲେ ତାହା ସ୍ପଷ୍ଟ ହୋଇନାହିଁ। ତେବେ ଗତକାଲି ସନ୍ଧ୍ୟା ପରେ ଯୁବକ ଜଣକ ବାଲେଶ୍ଵର କଚେରୀ ଆଡୁ ଆସି ଗୋପାଳଗାଁ ରାସ୍ତାରେ ଯାଉଥିବା ଦେଖଣାହାରୀ ମାନେ କହିଥିଲେ। ବାଲେଶ୍ଵର ସହରରେ ସହଦେବଖୁଣ୍ଟା ଥାନା ଅଞ୍ଚଳରେ ଗତକାଲି ଦୁଇ ଦୁଇଟି ଅପରାଧିକ କାର୍ଯ୍ୟ ଘଟିଥିବା ବେଳେ ପୁଣି ଜଣେ ଯୁବକ ହାତରେ ଏଭଳି ତେଲେଙ୍ଗା କଟୁରୀ ଧରି ବୁଲିବା ଚର୍ଚ୍ଚା ହେଉଛି।

ବାଲେଶ୍ଵର: ବାଲେଶ୍ୱର ଜିଲ୍ଲା ସହଦେବଖୁଣ୍ଟା ଥାନା ଅଞ୍ଚଳରେ ଚାଞ୍ଚଲ୍ୟ । ମନ୍ଦିର ନିକଟରୁ ଯୁବକଙ୍କ କ୍ଷତାକ୍ତ ମୃତଦେହ ଉଦ୍ଧାର । ସହଦେବଖୁଣ୍ଟା ଥାନା ଅନ୍ତର୍ଗତ ରେଲୱେ ଷ୍ଟେସନ ସାଇ ମନ୍ଦିର ଗଳି ନିକଟରେ ଜଣଙ୍କୁ ବେକ କାଟି ନିର୍ମମ ହତ୍ୟା କରାଯାଇଥିବା ସୂଚନା । ମୃତକଙ୍କ ପରିଚୟ ଅସ୍ପଷ୍ଟ ରହିଥିବା ବେଳେ ଲୋକେ ଦେଖିବା ପରେ ୧୦୮ ଯୋଗେ ଜିଲ୍ଲା ମୁଖ୍ୟ ଚିକିତ୍ସାଳୟରେ ସ୍ଥାନାନ୍ତର। ମୃତଦେହଟି ଖୋଲା ଦେହରେ ଥିବା ବେଳେ ବୟସ ପାଖାପାଖି ୪୦ ବର୍ଷ ପାଖାପାଖି ବୋଲି ଅନୁମାନ କରାଯାଉଛି। ମୃତକର ବେକ, ଛାତି ଓ ପେଟରେ ଧାରୁଆ ଅସ୍ତ୍ରରେ ହାଣି ଦିଆଯାଇଥିବା ସ୍ଥାନୀୟ ଲୋକ ସୂଚନା ଦେଇଛନ୍ତି। ଘଟଣା ସ୍ଥଳରେ ସହଦେବଖୁଣ୍ଟା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।  

ଜଳେଶ୍ଵର: ବାଲେଶ୍ବର ଜିଲ୍ଲା ରାଇବଣିଆ ଥାନା କେନ୍ଦୁଖୁଣ୍ଟା ଗ୍ରାମରେ ଗୋଠ ଛଡା ହାତୀର ଉପଦ୍ରଵ । ଭାଙ୍ଗିଲା ଘରର କାନ୍ଥ । କାନ୍ଥ ପଡି ମାଆ କୋଳରେ ଶୋଇଥିବା ଦୁଇ ବର୍ଷ ଶିଶୁ ପୁତ୍ର ମୃତ । ପରିବାରର ଅନ୍ୟ ସଦସ୍ୟମାନେ ଆହତ ହୋଇଥିବାବେଳେ ରାଇବଣିଆ ଵନ୍ୟ ବିଭାଗ ଦ୍ୱାରା ଉଦ୍ଧାର ହୋଇ ହାତୀଗଡ଼ ହସ୍ପିଟାଲରେ ଭର୍ତ୍ତି ହୋଇଛନ୍ତି । ମୃତ ଶିଶୁ ହେଲେ ଉଦ୍ଧବ ବେଶ୍ରାଙ୍କର ପୁଅ ରାମ । ବନବିଭାଗ ଦ୍ୱାରା ହାତି ଘୋଡାଇବା ପାଇଁ ଉଦ୍ୟମ ଜାରି ରହିଛି । ରାଇବଣିଆ ଅଞ୍ଚଳର ଆଖପାଖ ଜଙ୍ଗଲରେ ୩୦ ଟିକିଆ ହାତୀପଲ ଦିର୍ଘ ଦିନ ଧରି ଘୁରି ବୁଲୁଛନ୍ତି । ଦିନ ସମୟରେ ଜଙ୍ଗଲରେ ରହୁଛନ୍ତି। ରାତି ହେଲେ ଗାଁରେ ପଶି ଉପଦ୍ରବ କରୁଛନ୍ତି ।

ସୂଚନା ଅନୁସାରେ, ଗତକାଲି ରାତିରେ କେନ୍ଦୁଖୁଣ୍ଟା ଗ୍ରାମର ଉଦ୍ଧବ ମାରାଣ୍ଡିଙ୍କ ଘର ଭାଙ୍ଗି ଦେଇଛି ଗୋଠ ଛଡା ହାତୀ । ରାତିରେ ଶୋଇଥିବା ବେଳେ ପରିବାର ଲୋକଙ୍କ ଉପରେ କାନ୍ଥ ପଡିଯିବାରୁ ଉଦ୍ଧବଙ୍କ ୨ବର୍ଷର ପୁଅ ଗୁରୁତର ଆହତ ହୋଇଥିଲେ । ପରିବାର ଲୋକ ତୁରନ୍ତ ମେଡିକାଲ ନେଇଥିଲେ । ହେଲେ ସେଠାରେ ଡାକ୍ତର ଶିଶୁକୁ ମୃତ ଘୋଷଣା କରିଛନ୍ତି । ବନବିଭାଗ କର୍ମଚାରୀ ପହଞ୍ଚି ହାତୀଙ୍କୁ ଘଉଡ଼ାଇଥିଲେ । ଉଦ୍ଧବ ଜଣେ ଗରିବ ପରିବାରର ହୋଇଥିବାରୁ ସରକାରୀ ସହାୟତା ପାଇଁ ନିବେଦନ କରିଛନ୍ତି ପରିବାର ଲୋକ। 

ବାଲେଶ୍ୱର: ଅନ୍ତିମ ସଂସ୍କାର ପାଇଁ ମଶାଣିରେ ସବୁ ବନ୍ଦୋବସ୍ତ ସରିଥିଲା। ଘର ଦୁଆର ମୁହଁରେ ବି କୋକୋଇ ବନ୍ଧା ସରିଥିଲା। ଖାଲି ଅପେକ୍ଷା ଥିଲା ଆମ୍ବୁଲାନ୍ସକୁ। ଭୁବନେଶ୍ବରରୁ ଶବ ଫେରିବା ପରେ ମଶାଣିକୁ ନେବା ପାଇଁ ଘରଲୋକ ତରତର ହେଉଥିବା ବେଳେ ହଠାତ୍‌ ଚେଇଁ ଉଠିଲେ ମହିଳା। ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକ୍‌ ଓଲମରା ପଞ୍ଚାୟତର ରାଜନଗର ଗାଁରେ ଏଭଳି ଏକ ଘଟଣା ଚର୍ଚ୍ଚାର ବିଷୟ ହୋଇଛି। ମହିଳାଜଣଙ୍କ ହେଲେ, ଗାଁର ତାପସ କୁମାର ଅଠାଙ୍କ ସ୍ତ୍ରୀ ଅମିତା ଅଠା (୩୪)। ତାଙ୍କୁ ଗୁରୁତର ଅବସ୍ଥାରେ ରେମୁଣାସ୍ଥିତ ଫକୀର ମୋହନ ମେଡିକାଲ କଲେଜ ଓ ହସ୍ପିଟାଲର ଆଇସିୟୁରେ ଭର୍ତ୍ତି କରାଯାଇଛି। 

ସୂଚନାନୁଯାୟୀ, ଅମିତା ଗର୍ଭବତୀ ଥିଲେ। ଗତ ୧୩ ତାରିଖରେ ତାଙ୍କର ଗର୍ଭଯନ୍ତ୍ରଣା ହେବାରୁ ପରିବାରଲୋକେ ପ୍ରଥମେ ତାଙ୍କୁ ହାତୀଗଡ଼ସ୍ଥିତ ଏକ ମେଡିକାଲରେ ଭର୍ତ୍ତି କରାଇଥିଲେ। ଅବସ୍ଥା ଗୁରୁତର ହେବାରୁ ତାଙ୍କୁ ବାଲେଶ୍ୱର ଫକୀରମୋହନ ମେଡିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ମଧ୍ୟ ଅବସ୍ଥାରେ ସୁଧାର ନ ଆସିବାରୁ ଭୁବନେଶ୍ୱରସ୍ଥିତ ଏକ ଘରୋଇ ହସ୍ପିଟାଲର ଭେଣ୍ଟିଲେଟରରେ ରଖି ଚିକିତ୍ସା କରାଯାଉଥିଲା। ୧୦ବର୍ଷ ପରେ ଘରକୁ ଏକ ନବଜାତ ଶିଶୁ ଆସିବ ବୋଲି ପରିବାରଲୋକେ ବହୁତ ଆଶା କରିଥିଲେ। କିନ୍ତୁ ଦୁର୍ଭାଗ୍ୟବଶତଃ ଗର୍ଭସ୍ଥ ଶିଶୁର ମୃତ୍ୟୁ ଘଟିଥିବା ବେଳେ ଅମିତାଙ୍କ ସ୍ୱାସ୍ଥ୍ୟାବସ୍ଥାରେ ଅବନତି ହୋଇଥିଲା। ପରେ ତାଙ୍କୁ ମୃତ ବୋଲି ଧାରଣା କରି ପରିବାରଲୋକେ ଭୁବନେଶ୍ୱରରୁ ଆମ୍ବୁଲାନ୍ସରେ ଗାଁକୁ ନେଇ ଆସିଥିଲେ। ଗାଁରେ ତାଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ଶେଷ ଦର୍ଶନ ପାଇଁ ଗ୍ରାମବାସୀ ଓ ଆତ୍ମୀୟସଜନ ଘରେ ଭିଡ଼ ଜମାଇଥିଲେ। ଏପର୍ଯ୍ୟନ୍ତ ଅନ୍ତିମ ସତ୍କାର ପାଇଁ ନଦୀ ପଠାରେ କାଠ ସହ ସମସ୍ତ ବ୍ୟବସ୍ଥା ସରିଥିଲା ଓ କୋକେଇ ମଧ୍ୟ ବନ୍ଧାଯାଇଥିଲା। ଅମିତାଙ୍କୁ ଆମ୍ବୁଲାନ୍ସରୁ ଘରକୁ ଆଣିବା ପରେ ହଠାତ୍‌ ସେ ଆଖି ଖୋଲି ଦେବାରୁ ସେଠାରେ ଥିବା ସମସ୍ତେ ଆଶ୍ଚର୍ଯ୍ୟ ହୋଇପଡ଼ିଥିଲେ। ସ୍ଥାନୀୟ ଡାକ୍ତର ଯାଞ୍ଚ କରି ସେ ଜୀବିତ ଥିବା କହିଥିଲେ। 

ତେବେ ଭୁବନେଶ୍ୱରର ଘରୋଇ ହସ୍‌ପିଟାଲରେ ସେ ମୃତ ବୋଲି କୌଣସି ଡାକ୍ତର ନିଶ୍ଚିତ କରିଥିଲେ କି ନାହିଁ କିମ୍ୱା କିପରି ପରିବାରଲୋକେ ତାଙ୍କୁ ମୃତ ବୋଲି ଭାବି ଘରକୁ ନେଇ ଆସିଥିଲେ, ତାହା ଜଣାପଡ଼ିନାହିଁ।