ମହାରାଷ୍ଟ୍ରର ରାଜଧାନୀ ମୁମ୍ବାଇ ସ୍ଥିତ ଛତ୍ରପତି ଶିବାଜୀ ମହାରାଜ ଆନ୍ତର୍ଜାତୀୟ ବିମାନବନ୍ଦରରେ (ଟି-୨) ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଜଣେ ଯାତ୍ରୀଙ୍କର ଏକ ଛୋଟିଆ ମଜାଳିଆ କଥା ସୁରକ୍ଷା କର୍ମୀଙ୍କ ହୋସ୍ ଉଡ଼ାଇ ଦେଇଥିଲା। ସୁରକ୍ଷା ଯାଞ୍ଚ ସମୟରେ ଯାତ୍ରୀ ଜଣକ ନିଜ ବ୍ୟାଗରେ ବୋମା ଥିବା କହିବା ପରେ ବିମାନବନ୍ଦରରେ ଆତଙ୍କ ଖେଳିଯାଇଥିଲା। ଏହି କାରଣରୁ ଉଡ଼ାଣ ଭରିବା ପାଇଁ ପ୍ରସ୍ତୁତ ଥିବା ଏକ ଇଣ୍ଡିଗୋ ବିମାନକୁ ତୁରନ୍ତ ରୋକିବାକୁ ପଡ଼ିଥିଲା।

କିପରି ଘଟିଲା ଘଟଣା?

ସୂଚନା ଅନୁଯାୟୀ, ଗତ ଅଗଷ୍ଟ ୯ ତାରିଖ ଦିନ ମୁମ୍ବାଇରୁ ଦିଲ୍ଲୀ ଯିବାକୁ ଥିବା ଏକ ଇଣ୍ଡିଗୋ ଏୟାରଲାଇନ୍ସ ଫ୍ଲାଇଟ୍ ଉଡ଼ାଣ ଭରିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଥିଲା। ଟର୍ମିନାଲ୍-୨ ର ବୋର୍ଡିଂ ଗେଟ୍ ନିକଟରେ ସୁରକ୍ଷା ଯାଞ୍ଚ ଚାଲିଥିବା ବେଳେ ଜଣେ ଯାତ୍ରୀ ହଠାତ୍ କହିଥିଲେ ଯେ ତାଙ୍କ ବ୍ୟାଗରେ ଏକ ବୋମା ଅଛି। ଯାତ୍ରୀଙ୍କ ମୁହଁରୁ ଏହି ପଦକ କଥା ଶୁଣିବା ମାତ୍ରେ ସେଠାରେ ଉପସ୍ଥିତ ଥିବା ସୁରକ୍ଷା କର୍ମୀ ଏବଂ ଏୟାରଲାଇନ୍ସ କର୍ମଚାରୀଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ବିମାନବନ୍ଦରରେ ତୁରନ୍ତ ଆଫ୍ରାତଫ୍ରି ସ୍ଥିତି ଉପୁଜିବା ସହ ଉକ୍ତ ଦିଲ୍ଲୀଗାମୀ ବିମାନକୁ ଅଟକା ଯାଇଥିଲା।

ସିଆଇଏସଏଫ୍ ଦ୍ୱାରା ଅଟକ ଓ ଯାଞ୍ଚ

ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ସୁରକ୍ଷା ଏଜେନ୍ସିଗୁଡ଼ିକୁ ତୁରନ୍ତ ଆଲର୍ଟ କରାଯାଇଥିଲା। କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (ସିଆଇଏସଏଫ୍) ଯବାନମାନେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଉକ୍ତ ଅଭିଯୁକ୍ତ ଯାତ୍ରୀଙ୍କୁ ହେପାଜତକୁ ନେଇଥିଲେ। ଏହାପରେ ବିମାନ ଏବଂ ଉକ୍ତ ଯାତ୍ରୀଙ୍କ ବ୍ୟାଗକୁ ବ୍ୟାପକ ଭାବେ ଯାଞ୍ଚ କରାଯାଇଥିଲା। ତେବେ ଟିକିନିଖି ଯାଞ୍ଚ ପରେ ସେଥିରୁ କୌଣସି ସନ୍ଦିଗ୍ଧ ବସ୍ତୁ କିମ୍ବା ବୋମା ମିଳିନଥିଲା। ଏହା କେବଳ ଏକ ଦାୟିତ୍ୱହୀନ ମଜା ଥିଲା ବୋଲି ପରେ ସ୍ପଷ୍ଟ ହୋଇଥିଲା।

ଦାୟିତ୍ୱହୀନ ଆଚରଣ ଯୋଗୁଁ ହଇରାଣ

ବିମାନବନ୍ଦର କର୍ତ୍ତୃପକ୍ଷ ଏବଂ ସୁରକ୍ଷା ବଳଙ୍କ କହିବା ଅନୁଯାୟୀ, ସୁରକ୍ଷା ପ୍ରସଙ୍ଗରେ ଏଭଳି ଦାୟିତ୍ୱହୀନ ମଜା କରିବା ଆଦୌ ଗ୍ରହଣୀୟ ନୁହେଁ। ଏହାଦ୍ୱାରା କେବଳ ସୁରକ୍ଷା ବ୍ୟବସ୍ଥାରେ ବାଧା ଉପୁଜେ ନାହିଁ, ବରଂ ଅନ୍ୟ ଶହ ଶହ ଯାତ୍ରୀଙ୍କୁ ମଧ୍ୟ ହଇରାଣ ହେବାକୁ ପଡ଼ିଥାଏ। ସୁରକ୍ଷା ଯାଞ୍ଚ ପ୍ରକ୍ରିୟା ଶେଷ ହେବା ପରେ ଏବେ ଉକ୍ତ ଯାତ୍ରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ସୂଚନା ମିଳିଛି। ଏହି ଘଟଣା ପ୍ରମାଣିତ କରୁଛି ଯେ ବିମାନବନ୍ଦର ଭଳି ସମ୍ବେଦନଶୀଳ ସ୍ଥାନରେ କୌଣସି ପ୍ରକାର ମଜାଳିଆ ମନ୍ତବ୍ୟ ମହଙ୍ଗା ପଡ଼ିପାରେ।

ଚେନ୍ନାଇ ଅନ୍ତର୍ଜାତୀୟ ବିମାନବନ୍ଦରରେ ରବିବାର ଏକ ବଡ଼ ଧରଣର ସୁରକ୍ଷା ତ୍ରୁଟି ଏବଂ ଆତଙ୍କ ଦେଖିବାକୁ ମିଳିଛି। ସାରଜାରୁ ଆସିଥିବା ଏକ ଏୟାର ଆରବିଆ (Air Arabia) ବିମାନ ଅବତରଣ କରିବା ପରେ ଟ୍ୟାକ୍ସିୱେରେ ଯାଉଥିବା ସମୟରେ ଜଣେ ଯାତ୍ରୀ ହଠାତ୍ ଜରୁରୀକାଳୀନ ଦ୍ୱାର ଖୋଲି ବାହାରକୁ ଡେଇଁପଡ଼ିଥିଲେ।

ଘଟଣାର ବିବରଣୀ

ରବିବାର ଭୋର ପ୍ରାୟ ୩.୨୩ ମିନିଟ୍‌ରେ ସାରଜାରୁ ଆସିଥିବା ଏୟାର ଆରବିଆର ଏୟାରବସ୍ ଏ୩୨୦ (Airbus A320) ଫ୍ଲାଇଟ୍ ନମ୍ବର ଜି୯ ୪୭୧ (G9 471) ଚେନ୍ନାଇରେ ଅବତରଣ କରିଥିଲା। ଅବତରଣର ମାତ୍ର ଗୋଟିଏ ମିନିଟ୍ ପରେ ଅର୍ଥାତ୍ ୩.୨୫ ମିନିଟ୍‌ରେ ଟ୍ୟାକ୍ସିୱେ 'ଭି' (Taxiway V) ଉପରେ ବିମାନଟି ଧୀର ଗତିରେ ଯାଉଥିବା ବେଳେ ଜଣେ ୨୯ ବର୍ଷୀୟ ଯାତ୍ରୀ ମହମ୍ମଦ ସରିଫ ମହମ୍ମଦ ନଜମୁଦ୍ଦିନ ଜରୁରୀକାଳୀନ ଦ୍ୱାର ଖୋଲି ତଳକୁ ଡେଇଁପଡ଼ିଥିଲେ। ଏହା ଦେଖି ବିମାନରେ ଥିବା ଅନ୍ୟ ଯାତ୍ରୀମାନଙ୍କ ମଧ୍ୟରେ ଭୟର ବାତାବରଣ ଖେଳିଯାଇଥିଲା।

ସ୍ୱାସ୍ଥ୍ୟଗତ ସମସ୍ୟା ସାଜିଲା କାରଣ

ପ୍ରାଥମିକ ରିପୋର୍ଟ ଅନୁଯାୟୀ, ଉକ୍ତ ଯାତ୍ରୀ ଜଣକ ବିମାନ ଯାତ୍ରା ସମୟରେ ଅସୁସ୍ଥ ଅନୁଭବ କରୁଥିଲେ। ସେ ବାନ୍ତି ଲାଗୁଥିବା ନେଇ ଅଭିଯୋଗ କରିଥିଲେ ଏବଂ ବିମାନ ଭିତରେ ଦୁଇ ଥର ବାନ୍ତି ମଧ୍ୟ କରିଥିଲେ। ଅସୁସ୍ଥତା ଏବଂ ଗଭୀର ମାନସିକ ଚାପ କାରଣରୁ ସେ ଏଭଳି ଚରମ ପଦକ୍ଷେପ ନେଇଥିବା ବିମାନବନ୍ଦର କର୍ତ୍ତୃପକ୍ଷ ଅନୁମାନ କରୁଛନ୍ତି। ଖବର ପାଇବା ମାତ୍ରେ ବିମାନବନ୍ଦରର ସୁରକ୍ଷାକର୍ମୀ (CISF) ତୁରନ୍ତ ଘଟଣାସ୍ଥଳରେ ପହଞ୍ଚି ତାଙ୍କୁ ହେପାଜତକୁ ନେଇଥିଲେ ଏବଂ ଅଧିକ ତଦନ୍ତ ପାଇଁ ସ୍ଥାନୀୟ ପୋଲିସକୁ ହସ୍ତାନ୍ତର କରିଥିଲେ। ସୌଭାଗ୍ୟବଶତଃ ଏହି ଘଟଣାରେ ଯାତ୍ରୀ କିମ୍ବା ବିମାନର କୌଣସି କ୍ଷତି ଘଟିନାହିଁ।

ବିମାନ ଚଳାଚଳ ବାଧାପ୍ରାପ୍ତ

ଏହି ଘଟଣା ପରେ ସୁରକ୍ଷା ଦୃଷ୍ଟିରୁ ବିମାନବନ୍ଦରର ମୁଖ୍ୟ ରନୱେ (୦୭/୨୫) କୁ ପ୍ରାୟ ଏକ ଘଣ୍ଟା ପାଇଁ ବନ୍ଦ ରଖାଯାଇଥିଲା। ଫଳରେ ଏକାଧିକ ବିମାନ ସେବା ପ୍ରଭାବିତ ହୋଇଥିଲା। ଲଣ୍ଡନରୁ ଆସୁଥିବା ବ୍ରିଟିଶ୍ ଏୟାରୱେଜ୍ ଫ୍ଲାଇଟ୍ ବିଏ୦୦୩୫ (BA0035) କୁ ବେଙ୍ଗାଲୁରୁ ଆଡ଼କୁ ଘୁଞ୍ଚାଇ ଦିଆଯାଇଥିଲା। ଏଥିସହ ଦୋହା, ଅହମ୍ମଦାବାଦ ଏବଂ ଦୁବାଇ ଯାଉଥିବା ଅତିକମ୍‌ରେ ୫ଟି ବିମାନ ୩୫ ରୁ ୪୦ ମିନିଟ୍ ବିଳମ୍ବରେ ଉଡ଼ାଣ ଭରିଥିଲା। ତେବେ ଭୋର ୪.୩୫ ମିନିଟ୍ ସୁଦ୍ଧା ରନୱେ ପୁଣିଥରେ ସ୍ୱାଭାବିକ କାର୍ଯ୍ୟକ୍ଷମ ହୋଇଥିବା ଅଧିକାରୀମାନେ ସୂଚନା ଦେଇଛନ୍ତି।

ନୂଆଦିଲ୍ଲୀ: ସଂସଦର ସୁରକ୍ଷା ତ୍ରୁଟି ପରେ ସରକାର ବର୍ତ୍ତମାନ ସମଗ୍ର କମ୍ପ୍ଲେକ୍ସର ସୁରକ୍ଷା ଦାୟିତ୍ବ କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (ସିଆଇଏସଏଫ୍) କୁ ହସ୍ତାନ୍ତର କରିବାକୁ ନିଷ୍ପତ୍ତି ନେଇଛନ୍ତି । କେନ୍ଦ୍ର ଗୃହ ମନ୍ତ୍ରଣାଳୟ ବୁଧବାର ସଂସଦ ଗୃହ କମ୍ପ୍ଲେକ୍ସର ଏକ ସର୍ଭେ କରିବାକୁ ନିର୍ଦ୍ଦେଶ ଦେଇଛି ଯାହା ଦ୍ବାରା ବ୍ୟାପକ ଭିତ୍ତିରେ ସିଆଇଏସଏଫ୍ ସୁରକ୍ଷା ଏବଂ ଅଗ୍ନିଶମ ବିଭାଗକୁ ନିୟମିତ ନିୟୋଜନ କରାଯାଇପାରିବ ।

କେନ୍ଦ୍ର ସରକାରଙ୍କ ମନ୍ତ୍ରଣାଳୟର ସୁରକ୍ଷା କରୁଥିବା ସିଆଇଏସଏଫର ସରକାରୀ ବିଲଡିଂ ସିକ୍ୟୁରିଟି (ଜିବିଏସ୍) ୟୁନିଟ ର ବିଶେଷଜ୍ଞ ତଥା ବର୍ତ୍ତମାନର ସଂସଦ ସୁରକ୍ଷା ଦଳର ଅଧିକାରୀମାନେ ଏହି ସପ୍ତାହ ଶେଷରେ ସର୍ଭେ ଆରମ୍ଭ କରିବେ ।

ସୂଚନା ଅନୁସାରେ, ଉଭୟ ନୂତନ ଏବଂ ପୁରାତନ ସଂସଦ କମ୍ପ୍ଲେକ୍ସ ଏବଂ ସେମାନଙ୍କ ସହ ଜଡିତ ଅଟ୍ଟାଳିକାକୁ ସିଆଇଏସ୍ଏଫ୍ ର ବ୍ୟାପକ ସୁରକ୍ଷା କବଳରେ ରଖାଯିବ । ଯେଉଁଥିରେ ସଂସଦ ସୁରକ୍ଷା ସେବା (ପିଏସ୍ଏସ୍), ଦିଲ୍ଲୀ ପୁଲିସ ଏବଂ ସେଣ୍ଟ୍ରାଲ ରିଜର୍ଭ ପୁଲିସ (ସିଆରପିଏଫ)ର ସଂସଦ ଡ୍ୟୁଟି ଗ୍ରୁପ୍ (ପିଡିଜି) ମଧ୍ୟ ସାମିଲ ହେବ ।