ହାଇଦରାବାଦ: ବୃଦ୍ଧ ମାତାପିତାଙ୍କୁ ବୋଝ ଭାବୁଥିବା ପିଲାଙ୍କୁ କଠୋର ଶାସ୍ତି ମିଳିବ। ବାପାମା’ଙ୍କ ଯତ୍ନ ନ ନେଇ ଅସହାୟ ଅବସ୍ଥାରେ ଛାଡୁଥିବା ସନ୍ତାନସନ୍ତତିଙ୍କୁ ଆର୍ଥିକ ଛାଟ ଲାଗିବ। ଏଭଳି କରୁଥିବା କର୍ମଚାରୀଙ୍କ ମୋଟ ଦରମାରୁ ୧୫ ପ୍ରତିଶତ କିମ୍ବା ୧୦ ହଜାର ଟଙ୍କା କାଟି ଦିଆଯିବ। ତେଲଙ୍ଗାନା ବିଧାନସଭାରେ ଏଭଳି କଠୋର ଆଇନ ସର୍ବସମ୍ମତି କ୍ରମେ ପାରିତ ହୋଇଯାଇଛି। ଏହାର ନାମ ‘ପ୍ୟାରେଣ୍ଟାଲ ସପୋର୍ଟ ବିଲ୍‌-୨୦୨୬’ ରହିଛି। ଏହାକୁ ଏ ପର୍ଯ୍ୟନ୍ତ ଦେଶରେ ଥିବା ସବୁଠାରୁ କଠୋର ଆଇନ ବୋଲି କୁହାଯାଉଛି। କାରଣ ଉଭୟ ସରକାରୀ ଏବଂ ବେସରକାରୀ କର୍ମଚାରୀଙ୍କୁ ଏହି ଆଇନ ପରିସରଭୂକ୍ତ କରାଯାଇଛି। ପ୍ରଥମ ଥର ପାଇଁ ବିଧାୟକ ଏବଂ ସାଂସଦଙ୍କୁ ମଧ୍ୟ ଏହି ଆଇନରେ ସାମିଲ କରାଯାଇଛି। ଘରୋଇ କ୍ଷେତ୍ରର କର୍ମଚାରୀ, ବିଧାୟକ, ସାଂସଦ, ସରପଞ୍ଚ ଆଦିଙ୍କୁ ମଧ୍ୟ ଉତ୍ତରଦାୟୀ କରାଯାଇଛି। ସବୁଠାରୁ ବଡ଼ କଥା ହେଉଛି ଯେ ଏହି ଅଭିଯୋଗ ପାଇଁ ମାତାପିତାଙ୍କୁ କୋର୍ଟକୁ ଯିବାକୁ ପଡ଼ିବ ନାହିଁ। ସେମାନେ ସିଧା ଜିଲ୍ଲାପାଳଙ୍କ ପାଖରେ ଆବେଦନ କରିପାରିବେ। ଯାଞ୍ଚରେ ଅଭିଯୋଗ ସତ୍ୟ ସାବ୍ୟସ୍ତ ହେଲେ ଜିଲ୍ଲାପାଳ ସିଧା କମ୍ପାନୀ କିମ୍ବା ବିଭାଗୀୟ କର୍ମଚାରୀଙ୍କ ଦରମା କାଟି ମାତାପିତାଙ୍କ ଖାତାରେ ଜମା କରିବାକୁ ନିର୍ଦ୍ଦେଶ ଦେଇପାରିବେ। 

ଏହି ବିଲ୍‌ ଉପସ୍ଥାପନ କରି ମୁଖ୍ୟମନ୍ତ୍ରୀ ରେଭନ୍ତ ରେଡ୍ଡୀ ଭାବପ୍ରବଣ ହୋଇଯାଇଥିଲେ। ସେ କହିଥିଲେ ଯେ ମୁଁ ଜଣେ ଏପରି ଜନପ୍ରତିନିଧିଙ୍କୁ ଜାଣିଛି ଯାହାଙ୍କ ପିତା କର୍କଟ ପ୍ରାଣ ହରାଇ ଥିଲେ। ମାତ୍ର ପୁଅ ତାଙ୍କର ଖବର ସୁଦ୍ଧା ରଖି ନ ଥିଲା। ପିତାମାତାଙ୍କ ଆଖିରେ ଲୁହ ଆସିବା ସମାଜ ପତନର ସଙ୍କେତ ଦିଏ। ସକ୍ଷମ ହୋଇ ମଧ୍ୟ ନିଜର ପ୍ରିୟଜନମାନଙ୍କୁ ପରିତ୍ୟାଗ କରୁଥିବା ବ୍ୟକ୍ତିଙ୍କୁ ସମାଜ ବାସନ୍ଦ କରିବା ଉଚିତ ବୋଲି ରେଭନ୍ତ କହିଥିଲେ।

ହାଇଦରାବାଦ: ସରକାରୀ ଚାକିରିକୁ ନେଇ ଯୁବ ପିଢିଙ୍କ ମଧ୍ୟରେ ଆଗ୍ରହ ବଢିବାରେ ଲାଗିଛି। ସବୁଠାରୁ କମ ଶିକ୍ଷା ଯୋଗ୍ୟତା ଥିବା ଚତୁର୍ଥ ଶ୍ରେଣୀ କର୍ମଚାରୀ ପଦବୀ ବାହାରିଲେ ବି ପିଜି, ଡିଗ୍ରୀ, ଇଞ୍ଜିନିୟର, ବିଟେକ ପିଲା ଆବେଦନ କରୁଛନ୍ତି। ଏପରି ସମୟରେ ତେଲଙ୍ଗାନାରୁ ଆଶ୍ଚର୍ଯ୍ୟଜନକ ତଥ୍ୟ ଆସିଛି। ରାଜ୍ୟର ବରିଷ୍ଠ ସରକାରୀ ସଫେଇ କର୍ମଚାରୀ ଆଇଏଏସ ଅଧିକାରୀଙ୍କଠାରୁ ଅଧିକ ଦରମା ପାଉଛନ୍ତି। ଖାଲି ସେତିକି ନୁହେଁ, ରାଜ୍ୟପାଳଙ୍କଠାରୁ ମୁଖ୍ୟ ଇଞ୍ଜିନିୟରଙ୍କ ଦରମା ଅଧିକ ରହିଛି। ସଫେଇ କର୍ମୀ ମାସକୁ ୨ ଲକ୍ଷ ଟଙ୍କା ଲେଖାଏଁ ପାଉଥିବାବେଳେ ଇଞ୍ଜିନିୟରମାନେ ୭ ଲକ୍ଷ ଟଙ୍କା ନେଉଛନ୍ତି। ତେଲଙ୍ଗାନା ମୁଖ୍ୟ ସଚିବ କେ ରାମକୃଷ୍ଣ ରାଓ ଏହି ସୂଚନା ଦେଇଛନ୍ତି। ସେଣ୍ଟର ଫର ଇକୋନୋମିକ ଆଣ୍ଡ ସୋସିଆଲ ଷ୍ଟଡିଜ୍ (ସେସ) ପକ୍ଷରୁ ୧୬ତମ ଅର୍ଥ କମିଶନଙ୍କ ସୁପାରିସ ଉପରେ ବୁଧବାର ଆୟୋଜିତ ଏକ ସମ୍ମିଳନୀରେ ସେ ଏହି ତଥ୍ୟ ଉପସ୍ଥପାନ କରିଥିଲେ। 

ରିପୋର୍ଟ ଅନୁଯାୟୀ, ରାଜ୍ୟ ସରକାରଙ୍କ ବଢୁଥିବା ବ୍ୟୟ, ବିଶେଷ କରି ଦରମା ଏବଂ ପ୍ରଶାସନିକ ଖର୍ଚ୍ଚ ଉପରେ ଆଲୋକପାତ କରିବାକୁ ଯାଇ ରାଓ ଏହି ଦରମା ସମ୍ବନ୍ଧୀୟ ବିବରଣୀ ପ୍ରଦାନ କରିଛନ୍ତି। ୨୦୧୪ ମସିହାରେ ତେଲଙ୍ଗାନା ଗଠନ ପରଠାରୁ ସରକାରୀ ବ୍ୟୟରେ ହୋଇଥିବା ଉଲ୍ଲେଖନୀୟ ବୃଦ୍ଧି ଏହାକୁ ଦର୍ଶାଉଛି। ରାଓ କହିଥିଲେ, ତେଲଙ୍ଗାନା ଗଠନ ହେବାବେଳେ ରାଜ୍ୟର ମାସିକ ଦରମା ଦେବା ପାଇଁ ୧,୫୦୦ କୋଟି ଟଙ୍କା ଖର୍ଚ୍ଚ ହେଉଥିଲା। ଦରମା ସଂଶୋଧନ,ସିନିଅରିଟି ବେନିଫିଟ୍ ଏବଂ ସରକାରୀ ବିଭାଗଗୁଡ଼ିକର ସମ୍ପ୍ରସାରଣ ଯୋଗୁଁ ବିଗତ ବର୍ଷଗୁଡ଼ିକରେ ଏହି ସଂଖ୍ୟା ଯଥେଷ୍ଟ ବୃଦ୍ଧି ପାଇ ୬ ହଜାର କୋଟିରେ ପହଞ୍ଚି ଯାଇଛି। ଏହା ରାଜ୍ୟ ଉପରେ ବଢୁଥିବା ଆର୍ଥିକ ଚାପକୁ ଦର୍ଶାଉଛି। ପ୍ରଥମ ଦେଖାରେ ଏହି ପରିସଂଖ୍ୟାନ ଆଶ୍ଚର୍ଯ୍ୟଜନକ ମନେ ହେଉଥିଲେ ମଧ୍ୟ, ଏହା ମୁଖ୍ୟତଃ ଦୀର୍ଘ ବର୍ଷର ସେବା, ପଦୋନ୍ନତି ଏବଂ ସରକାରଙ୍କ ଦ୍ୱାରା ସମୟ ସମୟରେ କାର୍ଯ୍ୟକାରୀ କରାଯାଉଥିବା ବେତନ ସଂଶୋଧନର ପ୍ରଭାବକୁ ଦର୍ଶାଏ।

ରାଓ କହିଥିଲେ ଯେ ପୌରପାଳିକାରେ ନୂତନ ଭାବେ ଯୋଗ ଦେଇଥିବା କର୍ମଚାରୀମାନେ ମାସକୁ ପ୍ରାୟ ୨୮,୦୦୦ ଟଙ୍କା ଦରମା ପାଆନ୍ତି । ପ୍ରାୟ ୩୦ ବର୍ଷ ହେଲା ସେବା ଦେଉଥିବା ଡ୍ରାଇଭର କିମ୍ବା ସଫେଇ କର୍ମଚାରୀ ଆଦି ମାସକୁ ୧ ଲକ୍ଷ ଟଙ୍କାରୁ ଅଧିକ ଦରମା ପାଉଛନ୍ତି। ବରିଷ୍ଠ ପଦବୀରେ ଥିବା, ବିଶେଷ କରି ଦୀର୍ଘ ଦିନ ଧରି କାର୍ଯ୍ୟ କରୁଥିବା ଝାଡ଼ୁଦାର ପଦୋନ୍ନତି ଏବଂ ଅନ୍ୟ ଆନୁସଙ୍ଗିକ ଭତ୍ତା ସହ ୨ ଲକ୍ଷ ଟଙ୍କା ପର୍ଯ୍ୟନ୍ତ ଦରମା ନେଉଛନ୍ତି। ସେହିପରି ଶୀର୍ଷ ସ୍ତରର ବୈଷୟିକ ଅଧିକାରୀ ୭ ଲକ୍ଷ ଟଙ୍କା ପର୍ଯ୍ୟନ୍ତ ପାଇଥାନ୍ତି ବୋଲି ମୁଖ୍ୟ ସଚିବ କହିଛନ୍ତି।

ତେଲେଙ୍ଗାନା: ତେଲେଙ୍ଗାନାର କାମାରେଡ୍ଡୀ ଏବଂ ହନମକୋଣ୍ଡା ଜିଲ୍ଲାରେ ଏକ ଅଭାବନୀୟ ତଥା ହୃଦୟବିଦାରକ ଘଟଣା ସାମ୍ନାକୁ ଆସିଛି। ଗତ ଏକ ସପ୍ତାହ ମଧ୍ୟରେ ପ୍ରାୟ ୫୦୦ ବୁଲା କୁକୁରଙ୍କୁ ବିଷାକ୍ତ ଇଞ୍ଜେକ୍ସନ ଦେଇ ହତ୍ୟା କରାଯାଇଥିବା ଅଭିଯୋଗ ହୋଇଛି। ଏହି କୁକୁର ହତ୍ୟା ଘଟଣା ଏବେ ସମଗ୍ର ଦେଶରେ ଚର୍ଚ୍ଚାର ବିଷୟ ପାଲଟିଛି ଏବଂ ପଶୁପ୍ରେମୀମାନଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି।

ରିପୋର୍ଟ ଅନୁଯାୟୀ, ଗତ ଡିସେମ୍ବର ମାସରେ ଅନୁଷ୍ଠିତ ଗ୍ରାମ ପଞ୍ଚାୟତ ନିର୍ବାଚନ ସମୟରେ କିଛି ପ୍ରାର୍ଥୀ ଗ୍ରାମବାସୀଙ୍କୁ ବୁଲା କୁକୁର ଓ ମାଙ୍କଡ଼ଙ୍କ ଉପଦ୍ରବରୁ ମୁକ୍ତି ଦେବା ପାଇଁ ପ୍ରତିଶ୍ରୁତି ଦେଇଥିଲେ। ବର୍ତ୍ତମାନ ସେହି ପ୍ରତିଶ୍ରୁତି ପୂରଣ କରିବାକୁ ଯାଇ କିଛି ନବନିର୍ବାଚିତ ପ୍ରତିନିଧି, ବିଶେଷ କରି ସରପଞ୍ଚମାନେ ଏଭଳି ନିଷ୍ଠୁର ପଦକ୍ଷେପ ନେଇଥିବା କୁହାଯାଉଛି। ଅଭିଯୋଗ ହୋଇଛି ଯେ, କୁକୁରମାନଙ୍କୁ ମାରିବା ପାଇଁ ବାହାର ଲୋକଙ୍କୁ ନିୟୋଜିତ କରାଯାଇଥିଲା ଏବଂ ଘାତକ ଇଞ୍ଜେକ୍ସନ ବ୍ୟବହାର କରାଯାଇଥିଲା।

ଏହି ଘଟଣାରେ ପୋଲିସ କଠୋର ଆଭିମୁଖ୍ୟ ଗ୍ରହଣ କରିଛି। କାମାରେଡ୍ଡୀ ଜିଲ୍ଲାରେ ୫ ଜଣ ସରପଞ୍ଚଙ୍କ ସମେତ ମୋଟ ୬ ଜଣଙ୍କ ବିରୋଧରେ ମାମଲା ରୁଜୁ କରାଯାଇଛି। ପୂର୍ବରୁ ହନମକୋଣ୍ଡା ଜିଲ୍ଲାରେ ମଧ୍ୟ ପ୍ରାୟ ୩୦୦ କୁକୁର ହତ୍ୟା ମାମଲାରେ ୯ ଜଣଙ୍କ ବିରୋଧରେ ମାମଲା ହୋଇଥିଲା। ପୋଲିସ ସୂଚନା ଅନୁଯାୟୀ, ହତ୍ୟା ପରେ କୁକୁରମାନଙ୍କ ମୃତଦେହକୁ ଗାଁ ବାହାରେ ପୋତି ଦିଆଯାଇଥିଲା। ପ୍ରାଣୀ ଚିକିତ୍ସକ ଦଳ ମାଟି ତଳୁ ମୃତଦେହ ବାହାର କରି ବ୍ୟବଚ୍ଛେଦ କରିଛନ୍ତି ଏବଂ ମୃତ୍ୟୁର ସଠିକ କାରଣ ଜାଣିବା ପାଇଁ ନମୁନା ଏଫଏସଏଲ (FSL) କୁ ପଠାଯାଇଛି।

ପଶୁ କଲ୍ୟାଣ କର୍ମୀ ଅଦୁଲାପୁରମ ଗୌତମ ମାଚାରେଡ୍ଡୀ ପୋଲିସ ଷ୍ଟେସନରେ ଅଭିଯୋଗ କରିବା ପରେ ଏହି ଘଟଣା ଲୋକଲୋଚନକୁ ଆସିଥିଲା। ସେ ଅଭିଯୋଗ କରିଛନ୍ତି ଯେ, କାମାରେଡ୍ଡୀର ପାଲୱାଞ୍ଚା ମଣ୍ଡଳର ୫ଟି ଗାଁରେ ଗତ ୨-୩ ଦିନ ମଧ୍ୟରେ ୨୦୦ରୁ ଊର୍ଦ୍ଧ୍ୱ କୁକୁରଙ୍କୁ ହତ୍ୟା କରାଯାଇଛି। ସେ ଭବାନୀପେଟ ଗ୍ରାମ ପରିଦର୍ଶନ ବେଳେ କୁକୁରମାନଙ୍କ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ। ଭାରତୀୟ ନ୍ୟାୟ ସଂହିତା (BNS) ଏବଂ ପଶୁ କ୍ରୁରତା ନିବାରଣ ଆଇନ ଅନୁଯାୟୀ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ ହୋଇଛି।

ହାଇଦ୍ରାବାଦ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍‌ ଯେବେଠାରୁ ଦ୍ୱିତୀୟ ଥର ପାଇଁ ଆମେରିକା ରାଷ୍ଟ୍ରପତି ହୋଇଛନ୍ତି ସେବେଠାରୁ ଭାରତ ଉପରେ ଚାପ ପକାଇ ଆସୁଛନ୍ତି। ରାଗ ସୁଝାଇବାକୁ ଯାଇ ଅନ୍ୟ ଦେଶ ଅପେକ୍ଷା ଭାରତ ଉପରେ ଲଗାଇଛନ୍ତି ଅଧିକ ଟାରିଫ୍‌ ବା ବାଣିଜ୍ୟ ଶୁଳ୍କ। ତଥାପି ଭାରତ ସରକାର ଆମେରିକା ବିରୁଦ୍ଧରେ ନା କୌଣସି କଡ଼ା ମନ୍ତବ୍ୟ ଦେଉଛନ୍ତି ନା ଟାରିଫ୍‌ରେ ପ୍ରତି ଜବାବ ଦେଉଛନ୍ତି। ତେଲେଙ୍ଗାନା ସରକାର ରାଜ୍ୟରେ ଥିବା ଆମେରିକୀୟ କନସୁଲେଟ୍ ଜେନେରାଲର ରାସ୍ତାକୁ ଡୋନାଲ୍ଡ ଟ୍ରମ୍ପ୍‌ଙ୍କ ନାମରେ ନାମିତ କରିବାକୁ ନିଷ୍ପତ୍ତି ନେଇଛନ୍ତି। ହାଇଦ୍ରାବାଦରେ ଥିବା ୟୁନାଇଟେଡ୍ ଷ୍ଟେଟ୍ସ କନସୁଲେଟ୍ ଜେନେରାଲ୍ ନିକଟରେ ଥିବା ହାଇ-ପ୍ରୋଫାଇଲ୍ ରାସ୍ତାକୁ ଏବେ ଡୋନାଲ୍ଡ ଟ୍ରମ୍ପ୍ ଆଭେନ୍ୟୁ ବୋଲି କୁହାଯିବ।

ଏ ନେଇ ତେଲେଙ୍ଗାନା ସରକାର ପ୍ରଥମେ କେନ୍ଦ୍ର ବୈଦେଶିକ ମନ୍ତ୍ରଣାଳୟ ଏବଂ ଆମେରିକୀୟ ଦୂତାବାସକୁ ଚିଠି ଲେଖି ଯୋଜନା ବିଷୟରେ ଅବଗତ କରିବେ। ତା ପରେ ପ୍ରକ୍ରିୟା ଅନୁସାରେ ଏସବୁ କାମ ହେବ। ଚଳିତ ବର୍ଷ ପ୍ରାରମ୍ଭରେ, ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ଦିଲ୍ଲୀରେ ବାର୍ଷିକ ଆମେରିକା-ଭାରତ ରଣନୈତିକ ସହଭାଗୀତା ମଞ୍ଚ ସମ୍ମିଳନୀକୁ ସମ୍ବୋଧିତ କରିବା ସମୟର, ପ୍ରମୁଖ ବିଶ୍ୱସ୍ତରୀୟ କର୍ପୋରେସନମାନଙ୍କ ନାମରେ ହାଇଦ୍ରାବାଦର ଗୁରୁତ୍ୱପୂର୍ଣ୍ଣ ରାସ୍ତାଗୁଡ଼ିକର ନାମକରଣ କରିବାକୁ ପ୍ରସ୍ତାବ ଦେଇଥିଲେ। ପ୍ରକୃତରେ ତେଲେଙ୍ଗାନା ସରକାର ରାଜ୍ୟର ଅନେକ ରାସ୍ତାର ନାମକରଣ ଏବଂ ପୁନଃନାମକରଣ ଅନେକ ପ୍ରସିଦ୍ଧ ବ୍ୟକ୍ତିତ୍ୱ ଓ ସଂସ୍ଥାଙ୍କ ନାଁରେ କରିବାକୁ ଯୋଜନା ରଖିଛନ୍ତି। ରାଜ୍ୟ ସରକାର ଏହି ପ୍ରସ୍ତାବ ସେଇ ଯୋଜନାରେ ଏକ ଅଂଶ।  

ଭୁବନେଶ୍ବର: ବିହାର ବିଧାନସଭା ନିର୍ବାଚନ ପାଇଁ ଭୋଟ ଗଣତି ଚାଲିଛି। ବହୁ ଆଗରେ ଏନଡିଏ ରହିଥିବା ବେଳେ ମହାଗଠବନ୍ଧନ ନୈରାଶ୍ୟ ଜନକ ପ୍ରଦର୍ଶନ କରିଛି। ଏହାରି ମଧ୍ଯରେ ଦେଶର ୮ଟି ସ୍ଥାନରେ ହୋଇଥିବା ଉପନିର୍ବାଚନର ଭଟ ଗଣତି ମଧ୍ଯ ଚାଲିଛି। ଏହି ଭୋଟ ଗଣତିରେ ବିଜେପି ଓଡ଼ିଶାର ନୂଆପଡ଼ା ଓ  ଜାମ୍ମୁ-କାଶ୍ମୀରର ନାଗ୍ରୋତାରେ ଆଗରେ ରହିଥିବା ବେଳେ କଂଗ୍ରେସ ତେଲେଙ୍ଗାନାର ଯୁବେଲଲି ହିଲ୍ସ ଓ ରାଜସ୍ଥାନର ଅନନ୍ତା ଆସନରେ ଆଗରେ ରହିଛି। ଝାଡଖଣ୍ଡରେ ଝାଡଖଣ୍ଡ ମୁକ୍ତି ମୋର୍ଚ୍ଚା, ଜାମ୍ମୁ-କାଶ୍ମୀରର ଆଉ ଗୋଟିଏ ଆସନରେ ପିପୁଲ ଡେମୋକ୍ରାଟିକ ପାର୍ଟି , ମିଜୋରାମରେ ମିିଜୋ ନ୍ୟାସନାଲ ଫ୍ରଣ୍ଟ ଆଗରେ ରହିଥିବା ବେଳେ ପଞ୍ଜାବରେ ଆମ ଆଦମି ପାର୍ଟି ଆଗରେ ରହିଛି।

ତେଲେଙ୍ଗାନା: ତେଲେଙ୍ଗାନାର ରଙ୍ଗରେଡ୍ଡୀ ଜିଲ୍ଲାରେ ମର୍ମନ୍ତୁଦ ସଡ଼କ ଦୁର୍ଘଟଣା । ସରକାରୀ ଯାତ୍ରୀବାହୀ ବସ ସହ ଟ୍ରିପର ଟ୍ରକ ମୁହାଁମୁହିଁ ଧକ୍କା । ଦୁର୍ଘଟଣାରେ ୧୯ ଜଣଙ୍କର ମୃତ୍ୟୁ ହୋଇଥିବାବେଳେ ଏକାଧିକ ଆହତ ହୋଇଛନ୍ତି । ଆହତଙ୍କୁ ନିକଟସ୍ଥ ହସପିଟାଲରେ ଭର୍ତ୍ତି କରାଯାଇଛି । ସୂଚନା ଅନୁସାରେ, ରଙ୍ଗାରେଡ୍ଡି ଜିଲ୍ଲାର ଚେଭେଲା ମଣ୍ଡଳ ଅଞ୍ଚଳର ମିର୍ଜାଗୁଡ଼ା ନିକଟରେ ଏହି ଦୁର୍ଘଟଣା ଘଟିଛି। ହାଇଦ୍ରାବାଦ-ବିଜାପୁର ରାଜପଥରେ ଏକ ଦ୍ରୁତଗାମୀ ଟ୍ରକ ଏକ ଯାତ୍ରୀବାହୀ ବସ୍ ସହିତ ଧକ୍କା ଦେଇଥିଲା। ଧକ୍କା ଏତେ ଜୋରରେ ଥିଲା ଯେ ଟ୍ରକଟି ଓଲଟି ପଡ଼ି ବସ୍ ଉପରେ ପଡ଼ିଗଲା, ଟ୍ରକରେ ବୋଝେଇ ପଥର ତଳେ ଅନେକ ଯାତ୍ରୀ ଫସି ଯାଇଥିଲେ। ବସରେ ୪୦ ଜଣ ଯାତ୍ରୀ ଥିବା ବେଳେ ୧୯ ଜଣଙ୍କର ମୃତ୍ୟୁ ହୋଇଛି । ଏକାଧିକ ଗୁରୁତର ଥିବାରୁ ମୃତ୍ୟୁ ସଂଖ୍ୟା ବଢିବାର ଆଶଙ୍କା କରାଯାଉଛି । ଟ୍ରକଟି ଓଭରଟେକ କରିବାରୁ ଦୁର୍ଘଟଣା ଘଟିଥିବା ଆଶଙ୍କା କରାଯାଉଛି । 

ଦୁର୍ଘଟଣା ଯୋଗୁଁ ଚେଭେଲା ଏବଂ ଭିକାରାବାଦ ମଧ୍ୟରେ ଯାତାୟାତ ବାଧାପ୍ରାପ୍ତ ହୋଇଥିଲା। ଆହତମାନଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ରହିଛି। ମୃତକଙ୍କ ସଂଖ୍ୟା ବୃଦ୍ଧି ପାଇପାରେ ବୋଲି ଅଧିକାରୀମାନେ ଆଶଙ୍କା କରୁଛନ୍ତି।

ନୂଆଦିଲ୍ଲୀ: ସଂରକ୍ଷଣ ସୁବିଧା ପାଉଥିବା ବିଭିନ୍ନ ଜାତିରେ ଉପ ବର୍ଗୀକରଣ କରି ଅପେକ୍ଷାକୃତ ତଳ ଶ୍ରେଣୀର ଲୋକଙ୍କୁ ସଂରକ୍ଷଣ ସୁବିଧା ଦେବାକୁ ପୂର୍ବରୁ ସୁପ୍ରିମକୋର୍ଟ ସବୁଜ ସଙ୍କେତ ଦେଇସାରିଛନ୍ତି। ଏହିକ୍ରମରେ ପ୍ରଥମ ରାଜ୍ୟ ଭାବେ ତେଲଙ୍ଗାନା ସରକାର ଗତ ସୋମବାର ଅନୁସୂଚିତ ଜାତି ଉପବର୍ଗୀକରଣକୁ ଆଇନ ପ୍ରଣୟନ କରିବା ଲାଗି ବିଜ୍ଞପ୍ତି ଜାରି କରିଛନ୍ତି। ଅନୁସୂଚିତ ଜାତିର ୫୯ ଉପ ବର୍ଗର ଲୋକଙ୍କୁ ନେଇ ତିନୋଟି ଗୋଷ୍ଠୀରେ ବିଭକ୍ତ କରି ରାଜ୍ୟ ସରକାର ସେମାନଙ୍କ ଲାଗି ସଂରକ୍ଷଣ ବ୍ୟବସ୍ଥା କରିଛନ୍ତି। ପ୍ରଥମ ଗୋଷ୍ଠୀରେ ପ୍ରାୟ ୧୫ଟି ଉପ ବର୍ଗ ଶ୍ରେଣୀର ଲୋକ ରହିଥÒଲା ବେଳେ ସେମାନଙ୍କୁ ଶିକ୍ଷା ଏବଂ ନିଯୁକ୍ତି କ୍ଷେତ୍ରରେ ୧ ପ୍ରତିଶତ ସଂରକ୍ଷଣ ସହିତ ଦ୍ବିତୀୟ ଗୋଷ୍ଠୀକୁ ୯ ପ୍ରତିଶତ ଏବଂ ତୃତୀୟ ଗୋଷ୍ଠୀକୁ ୫ ପ୍ରତିଶତ ହାରରେ ସଂରକ୍ଷଣ ମିଳିବ ବୋଲି ରାଜ୍ୟ ସରକାର ଘୋଷଣା କରିଛନ୍ତି। ଏହାପରେ ଏହି ଢାଞ୍ଚାରେ ଆନ୍ଧ୍ର ପ୍ରଦେଶ ସରକାର ମଧ୍ୟ ଅନୁସୁଚିତ ଜାତିରେ ଉପବର୍ଗୀକରଣ ବ୍ୟବସ୍ଥା କରିବା ଲାଗି ଏକ ଅଧ୍ୟାଦେଶ ଆଣିଛନ୍ତି। ଏହାକୁ ଗୁରୁବାର ରାଜ୍ୟ କ୍ୟାବିନେଟ୍‌ ଦ୍ବାରା ଅନୁମୋଦନ ଦିଆଯାଇଛି।

ହାଇଦରାବାଦ: ତେଲେଙ୍ଗାନାର ନଗରକୁର୍ଣ୍ଣୁଲ ଜିଲ୍ଲାରେ ଏକ ନିର୍ମାଣାଧୀନ ଟନେଲ ଭୁଶୁଡ଼ି ପଡ଼ିବାରୁ ଏହା ମଧ୍ୟରେ ୮ ଶ୍ରମିକ ଫସି ରହିଥିବା ଜଣାପଡ଼ିଛି। ଏହି ଜିଲ୍ଲାର ଡୋମାଲପେଣ୍ଟା ନିକଟରେ ଶ୍ରୀଶୈଲମ ଲେଫ୍ଟ ବ୍ୟାଙ୍କ କେନାଲ ସୁଡ଼ଙ୍ଗର ଏକ ଅଂଶ ଭୁଶୁଡ଼ି ପଡ଼ିବାରୁ ବଡ଼ ଦୁର୍ଘଟଣା ଘଟିଛି। ସେମାନଙ୍କୁ ଉଦ୍ଧାର କରାଯିବା ଲାଗି ସବୁ ସ୍ତରରେ ଉଦ୍ୟମ ଜାରି ରହିଛି। ଟନେଲ୍ ଭିତରେ କାଦୁଅ ଭର୍ତ୍ତି ହୋଇଥିବାରୁ ଅନ୍ୟ ବାଟ ଦେଇ ଯିବା ପାଇଁ ଉଦ୍ୟମ କରାଯାଉଛି। ଭାରତୀୟ ସେନା ଓ ଏନ୍‌ଡିଆରଏଫ୍‌ର ମଧ୍ୟ ସହାୟତା ନିଆଯାଉଛି। ସୁଡଙ୍ଗ କାମ ଦୀର୍ଘ ଦିନ ଧରି ଅଟକି ରହିଥିଲା ।

ନଗରକୁର୍ଣ୍ଣୁଲ ପୁଲିସ ଅଧୀକ୍ଷକ ବୈଭବ ଗାୟକୱାଡ କହିଛନ୍ତି ଯେ, ଶ୍ରୀଶୈଳମ ଜଳଭଣ୍ଡାର ନିକଟରେ ଥିବା ସୁଡଙ୍ଗ ଛାତର ପ୍ରାୟ ତିନି ମିଟର ଭୁଶୁଡ଼ି ପଡ଼ିଛି। ଏହି ସୁଡ଼ଙ୍ଗ ନିର୍ମାଣ କାର୍ଯ୍ୟ ମାତ୍ର ଚାରି ଦିନ ପୂର୍ବରୁ ଆରମ୍ଭ ହୋଇଥିଲା। କିନ୍ତୁ ଶନିବାର ଶ୍ରମିକମାନେ ନିୟମିତ କାର୍ଯ୍ୟ କରୁଥି ବେଳେ ଉପର ମାଟି ଧସି ଯାଇଥିଲା। ଫଳରେ ସେଠାରେ ଉପସ୍ଥିତ ଥିବା ୫୦ ଶ୍ରମିକଙ୍କ ମଧ୍ୟରୁ ୮ ଶ୍ରମିକ ମାଟି ତଳେ ଫସିଯାଇଥିଲେ। ଏହି ପ୍ରକଳ୍ପର ନିର୍ମାଣ କାର୍ଯ୍ୟ କରୁଥିବା କମ୍ପାନୀର ଦୁଇଟି ଉଦ୍ଧାରକାରୀ ଦଳ ପରିସ୍ଥିତିର ଆକଳନ କରିବା ପାଇଁ ସୁଡଙ୍ଗ ଭିତରକୁ ଯାଇଛନ୍ତି। ଦୁର୍ଘଟଣା ସମୟରେ ଘଟଣାସ୍ଥଳରେ ୫୦ ଜଣ ଶ୍ରମିକ କାମ କରୁଥିଲେ ଏବଂ ସେମାନଙ୍କ ମଧ୍ୟରୁ ୪୩ ଜଣ ସୁରକ୍ଷିତ ଭାବରେ ବାହାରକୁ ଆସିଛନ୍ତି ବୋଲି ସଂପୃକ୍ତ କମ୍ପାନୀ ପକ୍ଷରୁ କୁହାଯାଇଛି। ତେଲେଙ୍ଗାନା ମୁଖ୍ୟମନ୍ତ୍ରୀ ରେଭନ୍ତ ରେଡ୍ଡୀ ଏହି ଘଟଣାରେ ଦୁଃଖ ପ୍ରକାଶ କରିବା ସହିତ ଜଳସେଚନ ମନ୍ତ୍ରୀ ଉତ୍ତମ କୁମାର ରେଡ୍ଡିଙ୍କ ନେତୃତ୍ବରେ ଏକ ଉଚ୍ଚସ୍ତରୀୟ ପ୍ରତିନିଧି ଦଳକୁ ଘଟଣାସ୍ଥଳକୁ ପଠାଇଛନ୍ତି।

ହାଇଦ୍ରାବାଦ: ଯେଉଁ ପାଣି ଟାଙ୍କିରୁ ପାଣି ପିଉଥିଲେ ଗ୍ରାମବାସୀ ସେହି ଟାଙ୍କିରୁ ଉଦ୍ଧାର ହେଲା ୩୦ଟି ମାଙ୍କଡ଼ର ମୃତଦେହ। ତେଲେଙ୍ଗାନାର ନାଲାଗୋଣ୍ଡା ଜିଲ୍ଲାର ଏକ ପାଣି ଟାଙ୍କିରୁ ୩୦ଟି ମାଙ୍କଡଙ୍କ ମୃତଦେହ ଉଦ୍ଧାର କରାଯାଇଛି । ଉକ୍ତ ଟାଙ୍କିରୁ ୨୦୦ରୁ ଅଧିକ ପରିବାର ପାଣି ବ୍ୟବହାର କରୁଥିଲେ। ସମସ୍ତଙ୍କ ସ୍ଵାସ୍ଥ୍ୟବସ୍ଥା ଯାଞ୍ଚ ପାଇଁ ତାଙ୍କୁ ତୁରନ୍ତ ମେଡିକାଲରେ ଭର୍ତ୍ତି କରାଯାଇଛି।

ସୂଚନା ଅନୁଯାୟୀ, ମୁନସିପାଲିଟି କର୍ପୋରେସନ୍ କର୍ମଚାରୀମାନେ ନନ୍ଦିକୋଣ୍ଡା ପୌରପାଳିକା ଅନ୍ତର୍ଗତ ନାଗାର୍ଜୁନ ସାଗର ନିକଟରେ ଥିବା ପାଣି ଟାଙ୍କିରୁ ୩୦ଟି ମାଙ୍କଡଙ୍କ ମୃତଦେହ ବାହାର କରିଥିଲେ। ଏହି ପାଣି ଟାଙ୍କିଟି ହିଲ କଲୋନୀର ପ୍ରାୟ ୨୦୦ ପରିବାରକୁ ପାନୀୟ ଜଳ ଯୋଗାଇବା ପାଇଁ ଏହି ସ୍ଥାପନ କରାଯାଇଥିଲା । ମୁନସିପାଲିଟି କର୍ପୋରେସନ୍ କର୍ମଚାରୀମାନେ ଏହା ଉପରେ ଏକ ଢାଙ୍କୁଣି ଦେଇଥିଲେ । ତେବେ ଅଧିକାରୀମାନଙ୍କ କହିବା ଅନୁସାରେ, ଅସହ୍ୟ ଉତ୍ତାପ ହେତୁ ମାଙ୍କଡମାନେ ପାଣି ପିଇବା ପାଇଁ ଢାଙ୍କୁଣି ବାହାର କରି ଟାଙ୍କି ଭିତରକୁ ପ୍ରବେଶ କରିଥାଇ ପାରନ୍ତି । କିନ୍ତୁ ବାହାରକୁ ନବାହାରି ପାରି ସେଠାରେ ବୁଡ଼ି ମୃତ୍ୟୁ ବରଣ କରିଛନ୍ତି ।ଏତେ ସଂଖ୍ୟକ ମାଙ୍କଡ଼ଙ୍କ ମୃତଦେହ ପାଣି ଟାଙ୍କି ଭିତରୁ ଉଦ୍ଧାର କରାଯିବା ପରେ ସେହି ଅଞ୍ଚଳର ବାସିନ୍ଦା ଯେଉଁମାନେ ସେହି ଟାଙ୍କି ପାଣିକୁ ବ୍ୟବହାର କରୁଥିଲେ ସେମାନଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଛି । ତେବେ ମାଙ୍କଡମାନେ ୧୦ ଦିନ ପୂର୍ବରୁ ମରିଥିବା ନେଇ ସନ୍ଦେହ କରାଯାଉଛି।

ହାଇଦ୍ରାବାଦ: ତେଲେଙ୍ଗାନା ବିଧାନସଭା ନିର୍ବାଚନ ପାଇଁ ମତଦାନ ଆରମ୍ଭ । ସମସ୍ତ ୧୧୯ଟି ଆସନରେ ସକାଳ ୭ଟାରୁ ଭୋଟିଂ ଆରମ୍ଭ ହୋଇଛି । ୨୨୯୦ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ ୩କୋଟି ୨୬ ଲକ୍ଷ ଭୋଟର । ତେବେ ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ବିଆରଏସର ମୁଖ୍ୟ ତଥା ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ତାଙ୍କ ପୁଅ କେଟିଆର ଅଛନ୍ତି ।

ସେହିପରି ବିଜେପିର ଲୋକସଭା ସାଂସଦ ବାନ୍ଦି ସଞ୍ଜର କୁମାର, ଡି ଅରବିନ୍ଦ ସୋୟମ ବାପୁରାଓ ଏବଂ କଂଗ୍ରେସର ଏ. ରେବନ୍ତ ରେଡି, ଉତର କୁମାର ରେଡି, ଏଆଇଏମଆଇଏମ ନେତା ଅସଦୁଦ୍ଦିନ ୱୱେସୀଙ୍କ ପରି ହେବିୱେଟ୍ ନେତା ଅଛନ୍ତି । ବିଆରଏସ୍ , କଂଗ୍ରେସ ଓ ବିଜେପି ମଧ୍ୟରେ ତ୍ରିମୁଖୀ ଲଢେଇ ଦେଖିବାକୁ ମିଳିବ। ଚଳିତଥର ୧୦୩ଜଣ ବିଧାୟକ ପୁଣି ଥରେ ନିର୍ବାଚନୀ ମୈଦାନରେ ନିଜ ଭାଗ୍ୟ ପରୀକ୍ଷା କରୁଛନ୍ତି । ନିର୍ବାଚନକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ସମ୍ବେଦନଶିଳ ବୁଥ୍ ଗୁଡ଼ିକରେ ୧୪୪ ଧାରା ଜାରି କରାଯାଇଛି। ଆସନ୍ତା ୩ ତାରିଖରେ ଫଳାଫଳ ଘୋଷଣା ହେବ ।