ଟାଇମ୍ ମାଗାଜିନ୍ (TIME Magazine) ପକ୍ଷରୁ ପ୍ରକାଶିତ ବିଶ୍ୱର ୧୦୦ ଜଣ ସର୍ବାଧିକ ପ୍ରଭାବଶାଳୀ ବ୍ୟକ୍ତିଙ୍କ ତାଲିକା (TIME 100 List 2026)ରେ ସ୍ଥାନ ପାଇଛନ୍ତି ପ୍ରସିଦ୍ଧ ଭାରତୀୟ ସେଫ୍ ତଥା ଲେଖକ ବିକାଶ ଖାନ୍ନା (Vikas Khanna)। ଏହି ସମ୍ମାନ ପାଇବା ପରେ ସେ ଖୁସିବ୍ୟକ୍ତ କରିଛନ୍ତି ଏବଂ ପାଶ୍ଚାତ୍ୟ ଦେଶରେ ଦକ୍ଷିଣ ଏସୀୟମାନଙ୍କୁ ତାଚ୍ଛଲ୍ୟ କରିବା ପାଇଁ ବ୍ୟବହୃତ ହେଉଥିବା 'କରି ବୟ' (Curry Boy) ଶବ୍ଦକୁ ଏକ ସମ୍ମାନର ପ୍ରତୀକ ଭାବେ ଗ୍ରହଣ କରିଛନ୍ତି।

ଭାରତ ପାଇଁ ଏହା ଏକ ବଡ଼ ମୁହୂର୍ତ୍ତ

ନ୍ୟୁୟର୍କରୁ ପିଟିଆଇ (PTI) ସହ ଆଲୋଚନା ବେଳେ ୫୪ ବର୍ଷୀୟ ସେଫ୍ ବିକାଶ ଖାନ୍ନା କହିଛନ୍ତି ଯେ ଏହା ଭାରତ ପାଇଁ ଏକ ଅତ୍ୟନ୍ତ ଗର୍ବର ମୁହୂର୍ତ୍ତ। ଯେଉଁ 'କରି ବୟ' ଶବ୍ଦକୁ ପାଶ୍ଚାତ୍ୟ ଲୋକେ ଉପହାସ କରିବା ପାଇଁ ବ୍ୟବହାର କରୁଥିଲେ, ଆଜି ସେହି 'କରି ବୟ' ବିଶ୍ୱର ସର୍ବୋଚ୍ଚ ସମ୍ମାନଜନକ ତାଲିକାରେ ସ୍ଥାନ ପାଇଛି, ଯାହାକି ଏକ ବଡ଼ କଥା। ସେ କହିଛନ୍ତି ଯେ ମାର୍ଚ୍ଚ ୨୩ ତାରିଖରେ ନିଜ ସ୍ୱର୍ଗତ ଭଉଣୀ ରାଧିକା ଖାନ୍ନାଙ୍କ ଜନ୍ମଦିନ ଅବସରରେ ସେ ଏହି ଖୁସି ଖବର ପାଇଥିଲେ ଏବଂ ଅନୁଭବ କରିଥିଲେ ଯେ ତାଙ୍କ ଭଉଣୀ ଆଜି ବି ଉପରୁ ଥାଇ ତାଙ୍କ ପାଇଁ ଲଢ଼ୁଛନ୍ତି।

'ମୁଁ ଗର୍ବର ସହ ନିଜକୁ କରି ବୟ କହେ'

ସେଫ୍ ବିକାଶ ଖାନ୍ନା କହିଛନ୍ତି ଯେ "ସେମାନେ (ବିଦେଶୀମାନେ) ଅପମାନଜନକ ଭାବେ 'କରି' (Curry) ଶବ୍ଦ ବ୍ୟବହାର କରନ୍ତି, କିନ୍ତୁ ମୁଁ ଏହାକୁ ଗର୍ବର ସହ ଗ୍ରହଣ କରେ। ଏହା ଏମିତି ଏକ ଜିନିଷ ଯାହା ଆମ ଜେଜେମା ଓ ଆଈମାନେ ଆମକୁ ଖୁଆଉଥିଲେ ଏବଂ ଆମ ଶରୀର ଓ ମସ୍ତିଷ୍କ ସେହି ଆଧାରରେ କାମ କରୁଛି।" ଆଜି ଭାରତୀୟମାନେ ସାରା ବିଶ୍ୱ ଚଳାଉଛନ୍ତି ବୋଲି ସେ ଗର୍ବର ସହ ପ୍ରକାଶ କରିଛନ୍ତି। ପିଲାଦିନେ ବିଦେଶରେ ଭାରତୀୟମାନଙ୍କୁ ଦେଖି ଅନ୍ୟମାନେ 'କରି' ଗନ୍ଧ ଆସୁଛି ବୋଲି ଥଟ୍ଟା କରୁଥିଲେ, କିନ୍ତୁ ଆଜି ସେହି 'କରି ବୟ' ଏପରି ଏକ ମଞ୍ଚରେ ପହଞ୍ଚିଛି ଯେଉଁଠାରେ ପୃଥିବୀର ଅଳ୍ପ କିଛି ମନୋନୀତ ଲୋକ ପହଞ୍ଚିପାରିଛନ୍ତି ବୋଲି ସେ କହିଛନ୍ତି।

ନ୍ୟୁୟର୍କରେ ଖୋଲିଛନ୍ତି 'ବଙ୍ଗଲୋ' ରେଷ୍ଟୁରାଣ୍ଟ

ନ୍ୟୁୟର୍କରେ ନିଜର ପ୍ରସିଦ୍ଧ ରେଷ୍ଟୁରାଣ୍ଟ ବଙ୍ଗଲୋ (Bungalow) ପରିଚାଳନା କରୁଛନ୍ତି ବିକାଶ ଖାନ୍ନା, ଯାହା ଭାରତୀୟ ଖାଦ୍ୟପେୟର ସମୃଦ୍ଧ ପରମ୍ପରାକୁ ପରିପ୍ରକାଶ କରୁଛି। ଟାଇମ୍ ମାଗାଜିନ୍ ପ୍ରୋଫାଇଲ୍ ପାଇଁ ଆମେରିକୀୟ ସେଫ୍ ଏରିକ୍ ରିପର୍ଟ (Eric Ripert) ଏହି ରେଷ୍ଟୁରାଣ୍ଟକୁ 'କାହାଣୀ କହିବାର ଏକ ଜୀବନ୍ତ ଉଦାହରଣ' ବୋଲି ବର୍ଣ୍ଣନା କରିଛନ୍ତି। ସୂଚନାଯୋଗ୍ୟ ଯେ ଚଳିତ ବର୍ଷର ଟାଇମ୍ ୧୦୦ (TIME 100) ତାଲିକାରେ ଗୁଗଲ୍ ସିଇଓ ସୁନ୍ଦର ପିଚାଇ (Sundar Pichai), ବଲିଉଡ୍ ଅଭିନେତା ରଣବୀର କପୁର (Ranbir Kapoor), ୟୁଟ୍ୟୁବ୍ ମୁଖ୍ୟ ନୀଲ୍ ମୋହନ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଟେସ୍ଲା ସିଇଓ ଏଲନ୍ ମସ୍କଙ୍କ ପରି ବିଶ୍ୱର ବହୁ ପ୍ରଭାବଶାଳୀ ବ୍ୟକ୍ତି ସ୍ଥାନ ପାଇଛନ୍ତି।

ବଲିଉଡର ଅନ୍ୟତମ ବହୁ ପ୍ରତୀକ୍ଷିତ ଫିଲ୍ମ ତଥା ନୀତେଶ ତିୱାରୀଙ୍କ ନିର୍ଦ୍ଦେଶିତ ମେଗା ବଜେଟ୍ ଫିଲ୍ମ 'ରାମାୟଣ' ର ଟିଜର ପବିତ୍ର ହନୁମାନ ଜୟନ୍ତୀ ଅବସରରେ ଗୁରୁବାର ଦିନ ରିଲିଜ୍ ହୋଇଛି। ଏହି ଟିଜରରେ ବଲିଉଡ ସୁପରଷ୍ଟାର ରଣବୀର କପୁରଙ୍କୁ ପ୍ରଭୁ ଶ୍ରୀରାମଙ୍କ ଅବତାରରେ ଦେଖିବାକୁ ମିଳିଛି। ନମିତ ମାଲହୋତ୍ରା ଏବଂ କେଜିଏଫ୍ ଫେମ୍ ୟଶଙ୍କ ଦ୍ୱାରା ମିଳିତ ଭାବେ ପ୍ରଯୋଜିତ ଏହି ଫିଲ୍ମର ପ୍ରଥମ ଝଲକକୁ ନେଇ ଦର୍ଶକଙ୍କ ମଧ୍ୟରେ ଉତ୍ସାହ ଦ୍ୱିଗୁଣିତ ହୋଇଛି।

ଦମଦାର ଭିଏଫଏକ୍ସ (VFX) ଏବଂ ସଙ୍ଗୀତ

ଦୁଇ ମିନିଟରୁ ଅଧିକ ସମୟର ଏହି ଟିଜରରେ ଦମଦାର ଭିଏଫଏକ୍ସ (VFX) ଦେଖିବାକୁ ମିଳିଛି। ଓସ୍କାର ବିଜେତା କମ୍ପାନୀ ଡିଏନଇଜି (DNEG) ଏହାର ଭିଜୁଆଲ୍ ଉପରେ କାମ କରିଥିବା ବେଳେ ଏହାକୁ ଭାରତର ସବୁଠାରୁ ବଡ଼ ତଥା ମହଙ୍ଗା ଫିଲ୍ମ ବୋଲି କୁହାଯାଉଛି। କେବଳ ସେତିକି ନୁହେଁ, ଏହାର ସଙ୍ଗୀତ ନିର୍ଦ୍ଦେଶନା ଦାୟିତ୍ୱ ବିଶ୍ୱସ୍ତରୀୟ ସଙ୍ଗୀତକାର ହାନସ୍ ଜିମର (Hans Zimmer) ଏବଂ ଭାରତର ଗର୍ବ ଏଆର୍ ରହମାନ (AR Rahman) ମିଳିତ ଭାବେ ତୁଲାଉଛନ୍ତି। ଲସ୍ ଆଞ୍ଜେଲସ୍ ଏବଂ ମୁମ୍ବାଇରେ ଏକ ସ୍ୱତନ୍ତ୍ର ଇଭେଣ୍ଟ ମାଧ୍ୟମରେ ଏହି ଟିଜରକୁ ପ୍ରଦର୍ଶିତ କରାଯାଇଥିଲା।

ଚରିତ୍ର ଏବଂ ଷ୍ଟାର କାଷ୍ଟ

ଫିଲ୍ମରେ ରଣବୀର କପୁର ପ୍ରଭୁ ଶ୍ରୀରାମଙ୍କ ଭୂମିକାରେ ଅଭିନୟ କରୁଥିବା ବେଳେ ମାତା ସୀତାଙ୍କ ଭୂମିକାରେ ଦକ୍ଷିଣ ଭାରତୀୟ ଅଭିନେତ୍ରୀ ସାଇ ପଲ୍ଲବୀ ଏବଂ ରାବଣ ଭୂମିକାରେ ସୁପରଷ୍ଟାର ୟଶ ନଜର ଆସିବେ। ସେହିପରି ପ୍ରଭୁ ହନୁମାନଙ୍କ ଭୂମିକାରେ ସନ୍ନି ଦେଓଲ ଏବଂ ଲକ୍ଷ୍ମଣ ଭୂମିକାରେ ରବି ଦୁବେ ଅଭିନୟ କରୁଛନ୍ତି। ନିଜ ଚରିତ୍ର ସମ୍ପର୍କରେ ରଣବୀର କହିଛନ୍ତି ଯେ, "ମୁଁ ପ୍ରଭୁ ରାମଙ୍କୁ ଉପସ୍ଥାପନ କରିବାକୁ ନୁହେଁ, ବରଂ ତାଙ୍କଠାରୁ ଶିଖିବାକୁ ଆସିଛି। ସେ ହେଉଛନ୍ତି ମର୍ଯ୍ୟାଦା ପୁରୁଷୋତ୍ତମ"।

କେବେ ଆସିବ ଫିଲ୍ମ?

ନୀତେଶ ତିୱାରୀ ଏହି ମେଗା ପ୍ରୋଜେକ୍ଟକୁ ଦୁଇଟି ଭାଗରେ ନିର୍ମାଣ କରୁଛନ୍ତି। ମିଳିଥିବା ସୂଚନା ଅନୁଯାୟୀ, ଫିଲ୍ମର ପ୍ରଥମ ଭାଗ (Part One) ଦୀପାବଳି ୨୦୨୬ ରେ ଏବଂ ଦ୍ୱିତୀୟ ଭାଗ (Part Two) ଦୀପାବଳି ୨୦୨୭ ରେ ସିନେମାଘରକୁ ଆସିବ। ଦର୍ଶକ ଏବଂ ସମାଲୋଚକମାନେ ଟିଜରର ଦୃଶ୍ୟପଟ୍ଟ ଏବଂ ରଣବୀରଙ୍କ ଲୁକକୁ ଭୂୟସୀ ପ୍ରଶଂସା କରୁଛନ୍ତି |

ନିତେଶ ତିୱାରୀଙ୍କ ବହୁପ୍ରତୀକ୍ଷିତ ଚଳଚ୍ଚିତ୍ର 'ରାମାୟଣ'କୁ ନେଇ ଚର୍ଚ୍ଚା ଜୋର ଧରିଛି। ନିକଟରେ ଖବର ଆସିଥିଲା ଯେ ଏହି ଫିଲ୍ମରେ ଅଭିନେତା ବିକ୍ରାନ୍ତ ମେସିଙ୍କ ସ୍ଥାନରେ ରାଘବ ଜୁୟାଲଙ୍କୁ ନିଆଯାଇଛି। ତେବେ ଏହି ଖବର ଉପରେ ବିକ୍ରାନ୍ତ ମେସି ନିଜର ପ୍ରତିକ୍ରିୟା ରଖିଛନ୍ତି କିନ୍ତୁ କିଛି ସମୟ ପରେ ସେ ନିଜ ପୋଷ୍ଟକୁ ଡିଲିଟ୍ କରିଦେଇଥିଲେ।

ଦାୟିତ୍ୱହୀନ ସାମ୍ବାଦିକତା କହି ବର୍ଷିଲେ ବିକ୍ରାନ୍ତ

ମିଡିଆ ରିପୋର୍ଟ ଅନୁଯାୟୀ, 'ରାମାୟଣ'ରେ ରାବଣର ପୁତ୍ର ମେଘନାଦ ଭୂମିକାରେ ବିକ୍ରାନ୍ତ ମେସି ଅଭିନୟ କରିବାର ଥିଲା, କିନ୍ତୁ ପରେ ତାଙ୍କ ସ୍ଥାନରେ ରାଘବ ଜୁୟାଲଙ୍କୁ ଚୟନ କରାଯାଇଥିବା ଚର୍ଚ୍ଚା ହୋଇଥିଲା। ଏହି ଖବରକୁ ଖଣ୍ଡନ କରି ବିକ୍ରାନ୍ତ ଇନଷ୍ଟାଗ୍ରାମରେ ଏକ ପୋଷ୍ଟ ସେୟାର କରିଥିଲେ। ସେ ଲେଖିଥିଲେ, "ମୁଁ ଏହି ଚଳଚ୍ଚିତ୍ରର କେବେବି ଅଂଶ ନଥିଲି। ପ୍ରତିଷ୍ଠିତ ଗଣମାଧ୍ୟମ ଦ୍ୱାରା ଏଭଳି ଦାୟିତ୍ୱହୀନ ଖବର ପ୍ରକାଶ ପାଇବା ଆଶ୍ଚର୍ଯ୍ୟଜନକ। ତଥାପି ମୁଁ ରାମାୟଣର ପୁରା ଟିମକୁ ଶୁଭେଚ୍ଛା ଜଣାଉଛି ଏବଂ ନିଶ୍ଚିତ ଭାବରେ ଟିକେଟ କିଣି ସିନେମା ହଲରେ ଏହି ଫିଲ୍ମ ଦେଖିବି।"

ପୋଷ୍ଟ ଡିଲିଟ୍ କରିବା ନେଇ ବଢିଲା ଦ୍ୱନ୍ଦ୍ୱ

ଆଶ୍ଚର୍ଯ୍ୟର କଥା ହେଉଛି, ନିଜର ସ୍ପଷ୍ଟୀକରଣ ଦେବାର କିଛି ସମୟ ପରେ ବିକ୍ରାନ୍ତ ସେହି ପୋଷ୍ଟଟିକୁ ଡିଲିଟ୍ କରିଦେଇଥିଲେ। ସେ କାହିଁକି ପୋଷ୍ଟଟିକୁ ହଟାଇଲେ, ସେ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ। ତେବେ ତାଙ୍କର ଏହି କାର୍ଯ୍ୟ ଫ୍ୟାନ୍ସଙ୍କ ମଧ୍ୟରେ ଅଧିକ କୌତୁହଳ ସୃଷ୍ଟି କରିଛି।

ରାମାୟଣରେ କିଏ କେଉଁ ଭୂମିକାରେ?

ସୂଚନାଯୋଗ୍ୟ ଯେ, ନିତେଶ ତିୱାରୀଙ୍କ ଏହି ବିଗ୍ ବଜେଟ୍ ଫିଲ୍ମରେ ରଣବୀର କପୁର ଭଗବାନ ରାମଙ୍କ ଭୂମିକାରେ ନଜର ଆସିବେ। ସେହିପରି ସାଇ ପଲ୍ଲବୀ ମାତା ସୀତା ଏବଂ କନ୍ନଡ ସୁପରଷ୍ଟାର ୟଶ୍ ରାବଣ ଭୂମିକାରେ ଅଭିନୟ କରୁଛନ୍ତି। ଖବର ଅନୁଯାୟୀ, ରାଘବ ଜୁୟାଲ ଫିଲ୍ମର ଦ୍ୱିତୀୟ ଭାଗରେ ମେଘନାଦ ଚରିତ୍ରରେ ନଜର ଆସିପାରନ୍ତି, ଯାହା ୨୦୨୭ ଦୀପାବଳିରେ ମୁକ୍ତିଲାଭ କରିବାର ସମ୍ଭାବନା ରହିଛି।

ଭାରତୀୟ ସେଲିବ୍ରିଟିମାନେ କେବଳ ନିଜର ଅଭିନୟ ପାଇଁ ନୁହେଁ, ବରଂ ନିଜର ବିଳାସପୂର୍ଣ୍ଣ ଜୀବନଶୈଳୀ ପାଇଁ ମଧ୍ୟ ବେଶ୍ ଜଣାଶୁଣା। ଦାମୀ ଗାଡ଼ି ଓ ବଙ୍ଗଳା ସହିତ ହାତଘଣ୍ଟା (Luxury Watches) ପିନ୍ଧିବା ଏହି ଷ୍ଟାରମାନଙ୍କର ଏକ ବଡ଼ ସଉକ। ବଲିଉଡରୁ ନେଇ ଟଲିଉଡ ପର୍ଯ୍ୟନ୍ତ ଏମିତି ଅନେକ ତାରକା ଅଛନ୍ତି, ଯେଉଁମାନଙ୍କ ଘଣ୍ଟାର ଦାମ୍ ଶୁଣିଲେ ଆପଣଙ୍କ ହୋସ୍ ଉଡ଼ିଯିବ। ଆସନ୍ତୁ ଜାଣିବା ସେହି ୬ ଜଣ ଲୋକପ୍ରିୟ ସେଲିବ୍ରିଟିଙ୍କ ବିଷୟରେ, ଯେଉଁମାନେ ପିନ୍ଧନ୍ତି କୋଟି କୋଟି ଟଙ୍କାର ଘଣ୍ଟା।

1. ବଲିଉଡର ଭାଇଜାନ୍ ସଲମାନ ଖାନ ଦାମୀ ଘଣ୍ଟା ପିନ୍ଧିବାରେ ସବୁଠାରୁ ଆଗରେ ରହିଛନ୍ତି। ରିପୋର୍ଟ ଅନୁଯାୟୀ, ସଲମାନଙ୍କ ପାଖରେ Patek Philippe Aquanaut Luce Haute Joaillerie ନାମକ ଏକ ଘଣ୍ଟା ରହିଛି, ଯାହାର ମୂଲ୍ୟ ପ୍ରାୟ ୬୪.୪୩ କୋଟି ଟଙ୍କା। ଏହି ଘଣ୍ଟାଟି ହୀରା ଏବଂ ମୂଲ୍ୟବାନ ପଥରରେ ସଜ୍ଜିତ ହୋଇଛି।
   
2. ଭାରତୀୟ କ୍ରିକେଟର ହାର୍ଦ୍ଦିକ ପାଣ୍ଡ୍ୟା ନିଜର ଷ୍ଟାଇଲିସ୍ ଅନ୍ଦାଜ ପାଇଁ ପରିଚିତ। ସେ Patek Philippe Nautilus Platinum 5711 ପିନ୍ଧନ୍ତି, ଯାହାର ମୂଲ୍ୟ ପ୍ରାୟ ୫ କୋଟି ଟଙ୍କାରୁ ଅଧିକ ବୋଲି କୁହାଯାଏ। ଏହାବ୍ୟତୀତ ତାଙ୍କ ପାଖରେ ଅନ୍ୟ ଏକ ଘଣ୍ଟା ରହିଛି, ଯାହାର ଦାମ୍ ୮ କୋଟିରୁ ଉର୍ଦ୍ଧ୍ୱ ହେବ ବୋଲି ଚର୍ଚ୍ଚା ହୁଏ।
   
3. ବଲିଉଡ ବାଦଶାହ ଶାହରୁଖ ଖାନଙ୍କ ପାଖରେ ମଧ୍ୟ ଏକ ବିଶାଳ ଘଣ୍ଟା କଲେକ୍ସନ ରହିଛି। ସେ ଏକ Patek Philippe ଘଣ୍ଟା ପିନ୍ଧନ୍ତି, ଯାହାର ମୂଲ୍ୟ ପ୍ରାୟ ୪.୯ କୋଟି ଟଙ୍କା। କିନ୍ତୁ ତାଙ୍କର କିଛି କଷ୍ଟମାଇଜଡ୍ ଘଣ୍ଟାର ମୂଲ୍ୟ ଏହାଠାରୁ ଢେର ଅଧିକ ହୋଇପାରେ।
   
4. ସାଉଥ୍ ସୁପରଷ୍ଟାର ଜୁନିଅର ଏନଟିଆର ଦାମୀ ଘଣ୍ଟା ପିନ୍ଧିବାରେ ବେଶ୍ ସୌକିନ୍। ତାଙ୍କ ପାଖରେ Richard Mille RM 40-01 McLaren Speedtail ନାମକ ଏକ ଘଣ୍ଟା ଅଛି। ଏହାର ମୂଲ୍ୟ ପ୍ରାୟ ୮.୯୩ କୋଟି ଟଙ୍କା। ଏହି ଘଣ୍ଟାର ଡିଜାଇନ୍ ଖୁବ୍ ଆକର୍ଷଣୀୟ ଏବଂ ଏହା ବିଶ୍ୱର ଦାମୀ ଘଣ୍ଟାମାନଙ୍କ ମଧ୍ୟରେ ଅନ୍ୟତମ।
   
5. ରଣବୀର କପୁର ସବୁବେଳେ କ୍ଲାସିକ୍ ଜିନିଷ ପସନ୍ଦ କରନ୍ତି। ତାଙ୍କ ପାଖରେ Patek Philippe Grand Complications ଘଣ୍ଟା ରହିଛି, ଯାହାର ମୂଲ୍ୟ ପ୍ରାୟ ୬.୪୮ କୋଟି ଟଙ୍କା। ଏହା ତାଙ୍କ କଲେକ୍ସନର ସବୁଠାରୁ ମୂଲ୍ୟବାନ ଜିନିଷ ମଧ୍ୟରୁ ଗୋଟିଏ।
   
6. ନିଜର ଅଜବ ଫ୍ୟାଶନ୍ ପାଇଁ ଚର୍ଚ୍ଚାରେ ରହୁଥିବା ରଣବୀର ସିଂହ ମଧ୍ୟ ଦାମୀ ଘଣ୍ଟାର ସୌକିନ୍। ତାଙ୍କ ପାଖରେ Franck Muller Vanguard Yachting କଲେକ୍ସନର ଏକ ଘଣ୍ଟା ଅଛି, ଯାହାର ଦାମ୍ ପ୍ରାୟ ୨.୧ କୋଟି ଟଙ୍କା। ଏହା ହିରା ଖଚିତ ଏବଂ ଦେଖିବାକୁ ବେଶ୍ ଚମକଦାର।
   

ନୂଆଦିଲ୍ଲୀ: ବଲିଉଡର ସବୁଠାରୁ ଧନୀ ଛୁଆ ହେଉଛନ୍ତି ବଲିଉଡ ଷ୍ଟାର ରଣବୀର କପୁର ଏବଂ ଆଲିଆ ଭଟ୍ଟଙ୍କ ଝିଅ । ସେ ୨୫୦ କୋଟି ଟଙ୍କା ସମ୍ପତ୍ତିର ମାଲିକ । କିଛିଦିନ ପୂର୍ବେ ଇନଫୋସିଟି ମାଲିକ ନାରାୟଣ ମୂର୍ତ୍ତି ତାଙ୍କ ନାତିକୁ ୨୪୦ କୋଟି ଟଙ୍କାର ଉପହାର ଦେଇଥିଲେ । ଯାହାକି ଏହି କମ୍ପାନୀର ୧୫ ପ୍ରତିଶତ ବୋଲି କୁହାଯାଇପାରେ । ତେବେ ସେ ଦୁନିଆର ସବୁଠାରୁ ଧନୀ ଛୁଆ ରହିଥିଲେ । ମାତ୍ର ରଣବୀର ଏବେ ଏହି ରେକର୍ଡକୁ ଭାଙ୍ଗିଛନ୍ତି । ସେ ତାଙ୍କ ଝିଅ ନାମରେ ୨୫୦ କୋଟି ଟଙ୍କାର ଏକ ବଙ୍ଗଳା କରି ଦେଇଛନ୍ତି । କୃଷ୍ଣରାଜ ବଙ୍ଗଳା ରଣବୀରଙ୍କ ଝିଅ ରାହାରେ ନାମରେ କରାଯାଇଛି । ଏହା ପୂର୍ବରୁ ତାଙ୍କ ଜେଜେବାପା ରାଜ କପୁରଙ୍କ ନାମରେ ଥିଲା । ପରେ ଏହା ରଣବୀର କପୁରଙ୍କ ନାମରେ ରହିଥିଲା । ମାତ୍ର ଏବେ ରଣବୀର ଏହି ବଙ୍ଗଳାକୁ ତାଙ୍କ ଝିଅଙ୍କ ନାମରେ କରି ଦେଇଛନ୍ତି । ରଣବୀରଙ୍କ ଝିଅ ଏବେ ଏକ ବର୍ଷ ୪ ମାସର ହୋଇଛନ୍ତି । ବଲିଉଡର ସବୁଠାରୁ ଧନୀ ଛୁଆ ଭାବେ ରାହାଙ୍କୁ କୁହାଯାଇପାରେ ।

ବଲିଉଡ୍‌ ରକ୍‌ଷ୍ଟାର୍‌ ରଣବୀର କପୁର୍‌ ତାଙ୍କ ଆଗାମୀ ନୂଆ ସିନେମା ‘ଆନିମଲ୍‌’ କୁ ନେଇ ଚର୍ଚ୍ଚାରେ ଅଛନ୍ତି। ତେବେ ଏହି ସିନେମାରେ ମୁଖ୍ୟ ଆକର୍ଷଣ ସାଜିବ ରଣବୀରଙ୍କ ଲୁକ୍। ତାଙ୍କ ପ୍ରଶଂସକମାନେ ମଧ୍ୟ ତାଙ୍କର ଏହି ନୂଆ ଭୟାନକ ରୂପକୁ ଦେଖୀବା ପାଇଁ ଚାହିଁ ବସିଛନ୍ତି। ନିକଟରେ ଏହି ସିନେମାର ଟ୍ରେଲର ମଧ୍ୟ ସାମ୍ନାକୁ ଆସିଥିଲା। ଯାହାକୁ ଦର୍ଶକେ ଖୁବ୍‌ ପସନ୍ଦ ମଧ୍ୟ କରିଛନ୍ତି। ତେବେ ସିନେମାର ଟ୍ରେଲର ଲଞ୍ଚ୍‌ ସମୟରେ ରଣବୀର ସିନେମାକୁ ନେଇ ଅନେକ କିଛି କଥାର ଖୁଲାସା କରିଛନ୍ତି। ତା’ସହ ଅଭିନେତ୍ରୀ ପତ୍ନୀ ଆଲିଆଙ୍କୁ ନେଇ ମଧ୍ୟ କିଛି କଥା କହିଛନ୍ତି, ଯାହା ଏବେ ଚର୍ଚ୍ଚାର ପ୍ରସଙ୍ଗ ହୋଇଛି। ସିନେମା ସୁଟିଂ ଶେଷ କରି ଯେତେବେଳେ ସେ ଘରକୁ ଫେରୁଥିଲେ, ତାଙ୍କୁ ଖୁବ୍ ଶାନ୍ତି ମିଳୁଥିଲା।

ସେହିପରି ଘରେ ସେ ସମ୍ପୂର୍ଣ୍ଣ ଅଲଗା ମଣିଷ ବୋଲି ରଣବୀର କହିଛନ୍ତି। କାରଣ ସେ ନିଜ କାମକୁ କେବେ ବି ଘରକୁ ନେଇ ଯାଆନ୍ତି ନାହିଁ। ଯଦି ସିନେମାର ଚରିତ୍ର ସହ ଘରକୁ ଫେରିଥାନ୍ତେ, ତାଙ୍କ ଅଭିନେତ୍ରୀ ପତ୍ନୀ ଆଲିଆ ତାଙ୍କୁ ଖୁବ୍ ମାରିଥାନ୍ତେ। ଏପରି ସ୍ଥଳରେ ଘରକୁ ଯାଇ ସେ ଯଦି ତାଙ୍କ ଚରିତ୍ର ଭଳି ପ୍ରତିକ୍ରିୟା ଦେବେ, ତାହେଲେ ତାଙ୍କ ସ୍ତ୍ରୀ ତାଙ୍କୁ ମାରିବା ଖୁବ୍ ସ୍ବାଭାବିକ। ଅବଶ୍ୟ ଏହି କଥାରୁ ଅନୂମାନ କରାଯାଉଛି ରଣବୀର ତାଙ୍କ ପତ୍ନୀ ଆଲିଆଙ୍କୁ ଖୁବ୍ ଭୟ କରନ୍ତି। ଏହି ସିନେମାକୁ ପୂରା କରିବା ପାଇଁ ତାଙ୍କୁ ୧୦୦ ଦିନ ପର୍ପ୍ୟନ୍ତ ସୁଟିଂ କରିବାକୁ ପଡ଼ିଥିଲା। ସିନେମାରେ ରଣବୀରଙ୍କ ବ୍ୟତୀତ ରଶ୍ମିକା ମନ୍ଦାନା, ବବି ଦେଓଲ ମଧ୍ୟ ମୁଖ୍ୟ ଚରିତ୍ରରେ ନଜର ଆସିବେ। ଅନ୍ୟପଟେ ‘ଆନିମଲ’ ଡିସେମ୍ବର ୧ରେ ପ୍ରେକ୍ଷାଳୟକୁ ଆସିବ।