ଖଲ୍ଲିକୋଟ: ଶିଶୁ ଏବଂ ଗର୍ଭବତୀ ମହିଳାଙ୍କ ପାଇଁ ଆସୁଥିବା ସରକାରୀ ରାସନ ସାମଗ୍ରୀ ଉପରେ ଏବେ ଚୋରଙ୍କ ନଜର । ବାଣ୍ଟିବା ବଦଳରେ ବଜାରରେ ବିକ୍ରି ହେଉଛି ଶିଶୁଙ୍କ ଚାଉଳ ଓ ଛତୁଆ। ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକ ଶ୍ୟାମସୁନ୍ଦରପୁର ଗାଁରୁ ଆସିଛି ଏଭଳି ଏକ ସାଂଘାତିକ ଅଭିଯୋଗ। ଅଙ୍ଗନବାଡ଼ି କେନ୍ଦ୍ରରୁ ଚୋରା ଚାଲାଣ ବେଳେ ରେଡ ହେଣ୍ଡରେ ଧରିଲେ ଗାଁ ଲୋକେ । ୫ ବସ୍ତା ଚାଉଳ, ୧୧ ପ୍ୟାକେଟ୍ ଛତୁଆ, ୨ ପ୍ୟାକେଟ ଲେଖାଏଁ ମୁଢି ଏବଂ ବୁଟ ଏକ ଅଟୋରେ ଲୋଡ୍ ହୋଇ ବିକ୍ରି ପାଇଁ ଯାଉଥିବା ବେଳେ ମାଡ଼ି ବସିଲେ ଗ୍ରାମବାସୀ। ଅଟୋ ଡ୍ରାଇଭର ସହ ଅଙ୍ଗନବାଡ଼ି ଦିଦିଙ୍କ ଭାଇଙ୍କୁ ଅଟକ ରଖିଛନ୍ତି ଉତ୍ତ୍ୟକ୍ତ ଲୋକେ। 

ପୂର୍ବରୁ ଅନେକ ଥର ଅଙ୍ଗନବାଡ଼ି କେନ୍ଦ୍ରରୁ ସାମଗ୍ରୀ ଚୋରି ହେଉଥିବା ନେଇ ଗ୍ରାମବାସୀଙ୍କ ମନରେ ସନ୍ଦେହ ସୃଷ୍ଟି ହେଉଥିଲା। ଆଜି ସେହି ସନ୍ଦେହ ସତ ପ୍ରମାଣିତ ହୋଇଛି। ଆଜି ଅଟୋରେ ଲୋଡ୍ କରାଯାଇ ବାହାରକୁ ବିକ୍ରି ପାଇଁ ନିଆଯାଉଥିବା ସମୟରେ ଗାଁ ଲୋକେ ସତର୍କତାର ସହ ଚଢ଼ାଉ କରି ପୋଲିସକୁ ଖବର ଦେଇଥିଲେ। ପୋଲିସ ଗାଁରେ ପହଁଚି ଅଟୋ ଡ୍ରାଇଭର, ଅଙ୍ଗନବାଡି ଦିଦିଙ୍କ ଭାଇ ସମେତ ଅଙ୍ଗନବାଡି ଦିଦିକୁ ଅଧିକ ପଚରାଉଚରା ପାଇଁ ଥାନାକୁ ଡ଼ାକିଥିବା ଦେଖିବାକୁ ମିଳିଛି । ଅନ୍ୟପଟେ ଗାଁ ଲୋକଙ୍କ ଏହି ଅଭିଯୋଗକୁ ଅଙ୍ଗନବାଡି ଦିଦି ଖଣ୍ଡନ କରିବା ସହ ଏସବୁ ଚାଉଳ ନିଜର ଏବଂ ଛତୁଆ, ମୁଢି, ବୁଟ ବଳକା ଥିବାରୁ ଗାଁକୁ ପଠାଉଥିଲି ବୋଲି କହିଛନ୍ତି ଅଙ୍ଗନବାଡି ଦିଦି ।

ଖଲ୍ଲିକୋଟ: ପୂର୍ବ ଶତ୍ରୁତାକୁ କେନ୍ଦ୍ରକରି ବୋମାମାଡ଼ । ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ହରିପୁର ଗାଁରେ ହୋଇଛି ବୋମାମାଡ଼ । ଏହି ବୋମାମାଡ଼ରେ ଜଣେ ଗୁରୁତର ହୋଇଥିବା ବେଳେ ଆଉ ଦୁଇ ଜଣ ସାମାନ୍ୟ ଆହତ ହୋଇଛନ୍ତି । ଆହତମାନଙ୍କୁ ଉଦ୍ଧାର କରି ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇବାବେଳେ ଗୁରୁତରଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତରିତ କରାଯାଇଛି । ଘଟଣାସ୍ଥଳରେ ଖଲ୍ଲିକୋଟ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି ।

ସୂଚନା ଅନୁସାରେ, କିଛି ଦିନ ପୂର୍ବରୁ ହରିପୁର ଗାଁରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଥିଲା। ଆଜି ସକାଳେ ଗୋଟିଏ ଗୋଷ୍ଠୀର ଲୋକ ଆସି ଅନ୍ୟ ଗୋଷ୍ଠୀ ଉପରେ ବୋମା ମାଡ଼ କରିଥିଲେ। ପରେ ଘଟଣାସ୍ଥଳରୁ ଚମ୍ପଟ ମାରିଥିଲେ।