ସାନଖେମୁଣ୍ଡି: ରାଜ୍ୟରେ ଗଲା ପୁଣି ଏକ ହାତୀର ଜୀବନ । ସାନଖେମୁଣ୍ଡିରେ ଏକ ମାଈ ହାତୀ ମୃତ୍ୟୁବରଣ କରିଥିବା ଜଣାପଡିଛି । ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ ପାଟପୁର ବନ ବିଭାଗ ଅଧିନସ୍ଥ ରତନେଇ ଜଙ୍ଗଲରେ ବହୁ ବର୍ଷ ଧରି ୫ ଟିକିଆ ହାତୀ ପଲ ରହି ଆସିଥିବା ବେଳେ ଖାଦ୍ୟ ଅନ୍ୱେଷଣରେ ହାତୀପଲ ଜନବସତି ମୁହଁl ହୋଇ ଫସଲ ନଷ୍ଟ କରୁଥିବା ମଧ୍ୟ ଅଭିଯୋଗ ହେଉଛି । ୨୦୨୫ ଜାନୁୟାରୀ ୨ ତାରିଖରେ ଗଙ୍ଗାପୁର ପଞ୍ଚାୟତ ଢେପାଗୁଡା ଗ୍ରାମ ନିକଟରେ ବନବିଭାଗ ଏକ ମାଈହାତୀର ମୃତଦେହ ଠାବ କରି ୩ ତାରିଖରେ ବ୍ୟବଚ୍ଛେଦ କରିଥିବା ବେଳେ ଆଜି ପୁଣି ଭୀନଗର ପାହାଡ ପାଦଦେଶରେ ଏକ ମାଈ ହାତୀର ମୃତ ଦେହ ଠାବ କରିଛି ବନ ବିଭାଗ।

ସୂଚନା ମୁତାବକ, ଆଜିକୁ ପ୍ରାୟ ୬ ଦିନ ହେବ ଗୋଟାଏ ସ୍ଥାନରେ ହାତୀପଲ ରହି ଆସୁଥିବା ବେଳେ ଗୁରୁବାର ଅପରାହ୍ନରେ ପାହାଡ଼ ନିକଟରେ ଥିବା କିଛି ଚାଷୀ ବିଲକୁ କାମ କରିବା ପାଇଁ ଯାଇଥିବା ବେଳେ ହାତୀର ମୃତଦେହ ପଡ଼ିଥିବା ଦେଖିବାକୁ ପାଇ ବନ ବିଭାଗକୁ ଖବର ଦେଇଥିଲେ । ଖବରପାଇ ପାଟପୁର ବନ ଅଧିକାରୀ ପ୍ରମୋଦ କୁମାର ନାୟକ, ଦିଗପହଣ୍ଡି ରେଞ୍ଜର ଦିବ୍ୟ ରଂଜନ ସାହୁ, ଗଞ୍ଜାମ ଡି ଏଫ୍ ଓ ସୋନି ଖୋଖର, ଗଜପତି ଡି ଏଫ୍ ଓ ଏସ ଆନନ୍ଦ, ବିଦ୍ୟୁତ ବିଭାଗ କର୍ମଚାରୀ, ସାନଖେମୁଣ୍ଡି ପ୍ରାଣୀ ଚିକିତ୍ସାଅଧିକାରୀ ପ୍ରବୀଣ କୁମାର ସାହୁ, ଘଟଣା ସ୍ଥଳରେ ପହଞ୍ଚି ହାତୀର ଶବ ବ୍ୟବଚ୍ଛେଦ କରିଛନ୍ତି । ପ୍ରାଥମିକ ତଦନ୍ତ ପରେ ଏହାର ବୟସ ପାଖାପାଖି ୩୦ ବର୍ଷ ହୋଇଥିବା ଅନୁମାନ କରାଯାଉଛି । ହାତୀ ମୃତ୍ୟୁର କାରଣ ଅସ୍ପଷ୍ଟ ଥିବା ଜଣାପଡିଛି ।

ସାନଖେମୁଣ୍ଡି: ୩୨୬ନଂ ଜାତୀୟ ରାଜପଥର ଆସିକା-ଦିଗପହଣ୍ଡି ମୁଖ୍ୟରାସ୍ତା ପାଟପୁର ଥାନା ଶ୍ରୀଚନ୍ଦନପୁର ଗ୍ରାମ ଛକ ନିକଟରେ ଏକ ଅଜଣା ଗାଡ଼ି ଧକ୍କାରେ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ମୃତକ ଜଣଙ୍କ ହେଲେ ପାଟପୁର ଥାନା ପି.ଜଗନ୍ନାଥପୁର ଗ୍ରାମର ଡାକ୍ତର ସ୍ବାଇଁ (୬୫), ଆହତ ଜଣଙ୍କ ହେଲେ ଶ୍ରୀଚନ୍ଦନପୁର ଗ୍ରାମର ଦିବ୍ୟlଙ୍ଗ କୋରା ପାତ୍ର (୩୮) ।

ସୂଚନା ମୁତାବକ ଦିବ୍ୟlଙ୍ଗ କୋରା ପାତ୍ର ନିଜର ଟ୍ରାଇ ସାଇକେଲରୁ ଓହ୍ଲାଇ ନଳକୂପକୁ ଗାଧୋଇବା ପାଇଁ ଯାଉଥିବା ବେଳେ ଶେରଗଡ଼ରୁ ଦିଗପହଣ୍ଡି ଅଭିମୁଖେ ଆସୁଥିବା ଏକ ଗାଡ଼ି ଧକ୍କା ଦେଇଥିଲା । ଦୁର୍ଘଟଣାରେ କୋରା ପାତ୍ର ଗୁରୁତର ଆହତ ହୋଇଥିଲେ । ପରେ ଶ୍ରୀଚନ୍ଦନପୁର ଶିବ ମନ୍ଦିରରୁ ଦର୍ଶନ ସାରି ଘରକୁ ଫେରୁଥିବା ଡାକ୍ତରଙ୍କୁ ଧକ୍କା ଦେଇ ଚାଲିଯାଇଥିଲା, ଘଟଣା ସ୍ଥଳରେ ଡାକ୍ତରଙ୍କ ମୃତ୍ୟୁ ହୋଇଥିଲା । ଖବର ପାଇ ସ୍ଥାନୀୟ ଲୋକ ଘଟଣା ସ୍ଥଳରେ ପହଞ୍ଚି ଆହତକୁ ଉଦ୍ଧାର କରି ଶେରଗଡ଼ ଗୋଷ୍ଠି ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ ।

ମୃତକ ଡାକ୍ତରଙ୍କ ପରିବାର ଲୋକଙ୍କୁ କ୍ଷତି ପୂରଣ ଦାବିରେ ଆସିକା-ଦିଗପହଣ୍ଡି ମୂଖ୍ୟ ରାସ୍ତାରେ ନିଆଁ ଲଗାଇ ରାସ୍ତା ଅବରୋଧ କରିଥିଲେ । ଖବର ପାଇ ପାଟପୁର ଥାନା ଅଧିକାରୀ ସବ୍ୟସାଚୀ ମଲ୍ଲ, ସାନଖେମୁଣ୍ଡି ଅତିରିକ୍ତ ତହସିଲଦାର ଦିଲ୍ଲୀପ ଜେନା ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବୁଝା ସୂଝା କରିବା ପରେ ରାସ୍ତାରୋକ ହଟିଥିଲା । ପରେ ପାଟପୁର ପୋଲିସ ଏକ ମାମଲା ରୁଜ୍ଜୁ କରି ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ ଡାକ୍ତରଖାନାକୁ ପଠାଇଥିବା ଜଣାପଡିଛି ।