ପୂର୍ବ କଙ୍ଗୋରେ ପୁଣିଥରେ ମାରାତ୍ମକ ଇବୋଲା ଭୂତାଣୁ (Ebola virus) ର ଆତଙ୍କ ଦେଖିବାକୁ ମିଳିଛି। ସ୍ଥାନୀୟ ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁଯାୟୀ, ଦେଶରେ ବର୍ତ୍ତମାନ ସୁଦ୍ଧା ଅତିକମ୍‌ରେ ୧୩୧ ଜଣଙ୍କର ମୃତ୍ୟୁ ଘଟିଥିବା ବେଳେ ୫୧୩ ରୁ ଅଧିକ ସନ୍ଦିଗ୍ଧ ମାମଲା ସାମ୍ନାକୁ ଆସିଛି। ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଏହି ସଂକ୍ରମଣର ମାତ୍ରା ଏବଂ ବ୍ୟାପିବା ହାରକୁ ନେଇ ଗଭୀର ଉଦ୍ବେଗ ପ୍ରକାଶ କରିଛି।

ଦ୍ରୁତ ଗତିରେ ବ୍ୟାପୁଛି ସଂକ୍ରମଣ

କଙ୍ଗୋର ଜନସ୍ୱାସ୍ଥ୍ୟ ମନ୍ତ୍ରୀ ସାମୁଏଲ୍ ରୋଜର କାମ୍ବା (Samuel Roger Kamba) ମଙ୍ଗଳବାର ଦିନ ସ୍ପଷ୍ଟ କରିଛନ୍ତି ଯେ, ପ୍ରଭାବିତ ଅଞ୍ଚଳରେ ୫୧୩ଟି ସନ୍ଦିଗ୍ଧ ମାମଲା ଏବଂ ୧୩୧ଟି ସନ୍ଦିଗ୍ଧ ମୃତ୍ୟୁ ରେକର୍ଡ କରାଯାଇଛି। ତେବେ ଏହି ମୃତ୍ୟୁଗୁଡ଼ିକ ପ୍ରକୃତରେ ଇବୋଲା କାରଣରୁ ହୋଇଛି କି ନାହିଁ, ତାହା ନିଶ୍ଚିତ କରିବାକୁ ତଦନ୍ତ ଜାରି ରହିଛି। ସ୍ଥିତିର ଗମ୍ଭୀରତାକୁ ଦୃଷ୍ଟିରେ ରଖି ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ରବିବାର ଦିନ ଏହି ଇବୋଲା ପ୍ରକୋପକୁ ଏକ ଆନ୍ତର୍ଜାତୀୟ ଜନସ୍ୱାସ୍ଥ୍ୟ ଜରୁରୀକାଳୀନ ପରିସ୍ଥିତି ଭାବରେ ଘୋଷଣା କରିଛି। ଡବ୍ଲୁଏଚଓ ମୁଖ୍ୟ ଟେଡ୍ରୋସ୍ ଆଡାନୋମ୍ ଗେବ୍ରେୟେସସ୍ (Tedros Adhanom Ghebreyesus) ଏହି ସ୍ଥିତିକୁ ନେଇ ଚିନ୍ତା ବ୍ୟକ୍ତ କରିଛନ୍ତି।

ବିପଦ ସାଜିଛି ବୁଣ୍ଡିବୁଗ୍ୟୋ ଭାରିଆଣ୍ଟ

ସ୍ୱାସ୍ଥ୍ୟ ଅଧିକାରୀଙ୍କ କହିବା ଅନୁଯାୟୀ, ବର୍ତ୍ତମାନର ଏହି ସଂକ୍ରମଣ ପଛରେ ଇବୋଲା ରୋଗର ଏକ ବିରଳ ପ୍ରଜାତି ବୁଣ୍ଡିବୁଗ୍ୟୋ ଭୂତାଣୁ (Bundibugyo virus) ଦାୟୀ ରହିଛି। ଚିନ୍ତାର ବିଷୟ ହେଉଛି, ବର୍ତ୍ତମାନ ସୁଦ୍ଧା ଏହି ଭାରିଆଣ୍ଟ ପାଇଁ କୌଣସି ଅନୁମୋଦିତ ଚିକିତ୍ସା କିମ୍ବା ଟିକା ଉପଲବ୍ଧ ନାହିଁ। କଙ୍ଗୋ ଏବଂ ଉଗାଣ୍ଡାରେ ଏହା ପୂର୍ବରୁ ୨୦ ରୁ ଅଧିକ ଇବୋଲା ପ୍ରକୋପ ଦେଖାଦେଇଥିଲେ ମଧ୍ୟ ଏହି ବିରଳ ଭାରିଆଣ୍ଟ କେବଳ ତୃତୀୟ ଥର ପାଇଁ ଚିହ୍ନଟ ହୋଇଛି।

ବର୍ତ୍ତମାନ ସୁଦ୍ଧା ବୁନିଆ (Bunia), ଗୋମା (Goma), ମୋଙ୍ଗବ୍ୱାଲୁ, ବୁଟେମ୍ବୋ ଏବଂ ନ୍ୟାକୁଣ୍ଡେ ଆଦି ସହରରେ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି। ଏହା ସହିତ କଙ୍ଗୋରେ ସହାୟତା କାର୍ଯ୍ୟରେ ନିୟୋଜିତ ଥିବା ଜଣେ ଆମେରିକୀୟ ଡାକ୍ତର ମଧ୍ୟ ଇବୋଲାରେ ସଂକ୍ରମିତ ହୋଇଥିବା ଜଣାପଡିଛି, ଯାହାକି ସ୍ଥାନୀୟ ପ୍ରଶାସନ ସହିତ ଅନ୍ତର୍ଜାତୀୟ ସ୍ତରରେ ମଧ୍ୟ ଭୟ ସୃଷ୍ଟି କରିଛି।

ମଣିଷ ଶରୀରରେ ଆଣ୍ଡିଜ୍ ହଣ୍ଟାଭାଇରସ୍ (Andes Hantavirus) କେତେ ଦିନ ପର୍ଯ୍ୟନ୍ତ ଜୀବିତ ରହିଥାଏ ଏବଂ ଜଣେ ସଂକ୍ରମିତ ବ୍ୟକ୍ତି କେତେ ଦିନ ଯାଏଁ ଅନ୍ୟମାନଙ୍କୁ ସଂକ୍ରମିତ କରିପାରିବେ, ସେନେଇ ବର୍ତ୍ତମାନ ସୁଦ୍ଧା ବୈଜ୍ଞାନିକମାନଙ୍କ ପାଖରେ ସ୍ପଷ୍ଟ ସୂଚନା ନାହିଁ। ବର୍ତ୍ତମାନ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ପକ୍ଷରୁ ଏହି ଭାଇରସର ଗଭୀର ଅନୁଧ୍ୟାନ କରାଯାଉଛି। ନିକଟରେ ଏମଭି ହୋଣ୍ଡିୟସ୍ (MV Hondius) ନାମକ କ୍ରୁଜ୍ ଜାହାଜରେ ଏହି ଭାଇରସ୍ ବ୍ୟାପିବା କାରଣରୁ ୧୧ ଜଣ ବ୍ୟକ୍ତି ସଂକ୍ରମିତ ହୋଇଥିବା ବେଳେ ୩ ଜଣଙ୍କର ମୃତ୍ୟୁ ଘଟିଛି।

ଏକାଧିକ ମାଧ୍ୟମରେ ବ୍ୟାପିପାରେ ସଂକ୍ରମଣ

ପୂର୍ବରୁ କେବଳ ମୂଷା ଏବଂ ବାୟୁ ମାଧ୍ୟମରେ ହଣ୍ଟାଭାଇରସ୍ ବ୍ୟାପୁଥିବା କୁହାଯାଉଥିଲା, କିନ୍ତୁ ବର୍ତ୍ତମାନ ମଣିଷ ଶରୀରର ବିଭିନ୍ନ ତରଳ ପଦାର୍ଥରୁ ମଧ୍ୟ ଏହା ବ୍ୟାପିପାରେ ବୋଲି ଜଣାପଡିଛି। ଏହି ତାଲିକାରେ ଲାଳ, ମାଆ କ୍ଷୀର ଏବଂ ଶୁକ୍ରାଣୁ (Sperm) ସାମିଲ ରହିଛି। କ୍ରୁଜ୍ ଜାହାଜରେ ଘଟିଥିବା ଘଟଣା ପରେ ବୈଜ୍ଞାନିକମାନେ ଅଧିକ ଚିନ୍ତିତ ହୋଇପଡିଛନ୍ତି, କାରଣ ଯୌନ ସମ୍ପର୍କ ଏବଂ ନିକଟତର ସମ୍ପର୍କ ମାଧ୍ୟମରେ ମଧ୍ୟ ଏହା ବ୍ୟାପିବାର ଆଶଙ୍କା ରହିଛି। ଗୋଟିଏ ଅଧ୍ୟୟନ ଅନୁଯାୟୀ, ସୁସ୍ଥ ହେବା ପରେ ମଧ୍ୟ ପୁରୁଷମାନଙ୍କ ଶୁକ୍ରାଣୁରେ ହଣ୍ଟାଭାଇରସ୍ ୬ ବର୍ଷ ପର୍ଯ୍ୟନ୍ତ ରହିପାରେ। ତେବେ ଜଣେ ବ୍ୟକ୍ତି ସଂକ୍ରମିତ ହେବାର କେତେ ସମୟ ପର୍ଯ୍ୟନ୍ତ ଅନ୍ୟମାନଙ୍କ ପାଇଁ ବିପଦ ସୃଷ୍ଟି କରିବ, ତାହାର କୌଣସି ସଠିକ୍ ପ୍ରମାଣ ଏପର୍ଯ୍ୟନ୍ତ ମିଳିପାରିନାହିଁ।

'WHO' ପକ୍ଷରୁ ସ୍ୱତନ୍ତ୍ର 'ନେଚୁରାଲ୍ ହିଷ୍ଟ୍ରି ଷ୍ଟଡି' ଆରମ୍ଭ

ଏହି ଭୟାନକ ଭାଇରସ୍ ବିଷୟରେ ଅଧିକ ତଥ୍ୟ ସଂଗ୍ରହ କରିବା ପାଇଁ WHO ପକ୍ଷରୁ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରାଯାଇଛି। ବିଶ୍ୱ ସ୍ୱାସ୍ଥ୍ୟ ସଂଗଠନର ଏମର୍ଜିଂ ଡିଜିଜ୍ ଏବଂ ଜୁନୋସିସ୍ ୟୁନିଟ୍ ମୁଖ୍ୟ ମାରିଆ ଭାନ୍ କେରଖୋଭ୍ (Maria Van Kerkhove) ସୂଚନା ଦେଇଛନ୍ତି ଯେ, ଆଣ୍ଡିଜ୍ ହଣ୍ଟାଭାଇରସ୍ ଉପରେ ଏବେ ଏକାଧିକ ଗବେଷଣା ଚାଲିଛି। ଏହା ମଧ୍ୟରେ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି 'ନେଚୁରାଲ୍ ହିଷ୍ଟ୍ରି ଷ୍ଟଡି (Natural History Study)'। ଏହି ଅଧ୍ୟୟନ ମାଧ୍ୟମରେ ଭାଇରସର ଜୀବନଚକ୍ରକୁ ବୁଝିବା ପାଇଁ ପ୍ରୟାସ କରାଯାଉଛି। କ୍ୱାରେଣ୍ଟାଇନରେ ଥିବା ସନ୍ଦିଗ୍ଧ ବ୍ୟକ୍ତିମାନଙ୍କର ନିୟମିତ ନମୁନା ସଂଗ୍ରହ କରି ସେମାନେ ଅନ୍ୟମାନଙ୍କୁ ସଂକ୍ରମିତ କରିବାର କ୍ଷମତା ରଖିଛନ୍ତି କି ନାହିଁ ତାହାର ଯାଞ୍ଚ କରାଯାଉଛି।

ବର୍ତ୍ତମାନ ସୁଦ୍ଧା ହଣ୍ଟାଭାଇରସ୍ ପାଇଁ କୌଣସି ସ୍ୱତନ୍ତ୍ର ଚିକିତ୍ସା କିମ୍ବା ଟିକା ଉପଲବ୍ଧ ନାହିଁ, ତେଣୁ ଏହି ଅଧ୍ୟୟନର ଫଳାଫଳ ଆଗାମୀ ଦିନରେ ସଂକ୍ରମଣକୁ ରୋକିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ଆଶା କରାଯାଉଛି । 

ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ର ସୂଚନା ଅନୁଯାୟୀ, ଆଟଲାଣ୍ଟିକ ମହାସାଗରରେ ଯାତ୍ରା କରୁଥିବା ଏକ କ୍ରୁଜ୍ ଜାହାଜରେ ଏକାଧିକ ଯାତ୍ରୀ ମାରାତ୍ମକ ହାଣ୍ଟାଭାଇରସ୍ (Hantavirus) ରେ ଆକ୍ରାନ୍ତ ହୋଇଛନ୍ତି। ଏହି ଅଭାବନୀୟ ଘଟଣାରେ ବର୍ତ୍ତମାନ ସୁଦ୍ଧା ୩ ଜଣଙ୍କର ମୃତ୍ୟୁ ଘଟିଥିବା ବେଳେ, ଅନ୍ୟ ଜଣେ ଯାତ୍ରୀ ଦକ୍ଷିଣ ଆଫ୍ରିକାରେ ଗୁରୁତର ଅବସ୍ଥାରେ ଆଇସିୟୁ (ICU) ରେ ଜୀବନ ମରଣ ସହ ସଂଗ୍ରାମ କରୁଛନ୍ତି।

କେମିତି ହେଲା ସଂକ୍ରମଣ?

ମିଳିଥିବା ସୂଚନା ମୁତାବକ, ନେଦରଲ୍ୟାଣ୍ଡ୍‌ସ୍‌ର ଓସେନୱାଇଡ୍ ଏକ୍ସପିଡିସନ୍ସ ଦ୍ୱାରା ପରିଚାଳିତ ଏମଭି ହୋଣ୍ଡିୟସ୍ (MV Hondius) ନାମକ ଏକ କ୍ରୁଜ୍ ଜାହାଜ ଆର୍ଜେଣ୍ଟିନାର ଉଶୁଆଇଆ ରୁ କେପ୍ ଭର୍ଡେ (Cape Verde) ଅଭିମୁଖେ ଯାତ୍ରା କରୁଥିଲା। ଏହି ସମୟରେ ଜାହାଜରେ ଏକ ଅଜଣା ଶ୍ୱାସକ୍ରିୟା ଜନିତ ରୋଗ ବ୍ୟାପିଥିଲା। ସ୍ୱାସ୍ଥ୍ୟ ଅଧିକାରୀମାନେ ସ୍ପଷ୍ଟ କରିଛନ୍ତି ଯେ, ଏପର୍ଯ୍ୟନ୍ତ ଗୋଟିଏ ହାଣ୍ଟାଭାଇରସ୍ ମାମଲା ଲାବୋରେଟୋରୀରୁ ପ୍ରମାଣିତ ହୋଇଛି ଏବଂ ଅନ୍ୟ ୫ଟି ସନ୍ଦିଗ୍ଧ ମାମଲା ରହିଛି। ଆକ୍ରାନ୍ତ ୬ ଜଣଙ୍କ ମଧ୍ୟରୁ ୩ ଜଣ ପ୍ରାଣ ହରାଇଛନ୍ତି। ବର୍ତ୍ତମାନ ଏହି ଜାହାଜଟି କେପ୍ ଭର୍ଡେର ଉପକୂଳରେ ଛିଡ଼ା ହୋଇଛି, ମାତ୍ର ସ୍ଥାନୀୟ ପ୍ରଶାସନ ପକ୍ଷରୁ ରୋଗୀଙ୍କୁ ଜାହାଜରୁ ଓହ୍ଲାଇବା ପାଇଁ ଏଯାଏଁ ଅନୁମତି ପ୍ରଦାନ କରାଯାଇନାହିଁ। ଅନ୍ୟ ୨ ଜଣ କର୍ମଚାରୀ ମଧ୍ୟ ଜରୁରୀ ଚିକିତ୍ସା ଆବଶ୍ୟକ କରୁଥିବା ଜଣାପଡ଼ିଛି।

କ'ଣ ଏହି ହାଣ୍ଟାଭାଇରସ୍?

ହାଣ୍ଟାଭାଇରସ୍ ହେଉଛି ଏକ ବିପଜ୍ଜନକ ଭୂତାଣୁ, ଯାହାକି ମୁଖ୍ୟତଃ ମୂଷାମାନଙ୍କ ଠାରୁ ମଣିଷ ଶରୀରକୁ ବ୍ୟାପିଥାଏ। ସଂକ୍ରମିତ ମୂଷାର ମଳ, ମୂତ୍ର କିମ୍ବା ଲାଳ ସଂସ୍ପର୍ଶରେ ଆସିଲେ କିମ୍ବା ଏହା ଦ୍ୱାରା ଦୂଷିତ ପବନ ପ୍ରଶ୍ୱାସରେ ନେଲେ ମଣିଷ ଏହି ରୋଗରେ ଆକ୍ରାନ୍ତ ହେବାର ଆଶଙ୍କା ଥାଏ। ଏହି ଭାଇରସ୍‌ରେ ଆକ୍ରାନ୍ତ ହେଲେ ପ୍ରଥମେ ପ୍ରବଳ ଜ୍ୱର, ମାଂସପେଶୀରେ ଯନ୍ତ୍ରଣା ଏବଂ କ୍ଳାନ୍ତି ଭଳି ସାଧାରଣ ଫ୍ଲୁ ଲକ୍ଷଣ ଦେଖାଯାଏ। ତେବେ ପରବର୍ତ୍ତୀ ସମୟରେ ଏହା ଗୁରୁତର ଶ୍ୱାସରୋଗ ବା ହାଣ୍ଟାଭାଇରସ୍ ପଲମୋନାରୀ ସିଣ୍ଡ୍ରୋମ୍ ରେ ପରିଣତ ହୋଇପାରେ, ଯେଉଁଥିରେ ଫୁସଫୁସରେ ପାଣି ଜମିଯିବା କାରଣରୁ ନିଶ୍ୱାସ ନେବାରେ କଷ୍ଟ ହୋଇଥାଏ। ଏହି ରୋଗ ମଣିଷରୁ ମଣିଷକୁ ବ୍ୟାପିବା ବିରଳ ହୋଇଥିଲେ ସୁଦ୍ଧା ଅତ୍ୟନ୍ତ ମାରାତ୍ମକ ଅଟେ।

ବିଶ୍ୱ ସ୍ୱାସ୍ଥ୍ୟ ସଂଗଠନର ପଦକ୍ଷେପ

ଏହି ସମ୍ବେଦନଶୀଳ ଘଟଣାକୁ ନେଇ WHO ବିଭିନ୍ନ ଦେଶର ଜାତୀୟ କର୍ତ୍ତୃପକ୍ଷ ଏବଂ ଜାହାଜ ପରିଚାଳକମାନଙ୍କ ସହିତ ନିରନ୍ତର ସମ୍ପର୍କରେ ରହିଛି। ଜାହାଜରେ ଥିବା ରୋଗୀଙ୍କ ଜେନେଟିକ୍ ସିକ୍ୱେନ୍ସିଂ (Genetic sequencing) ଏବଂ ଅଧିକ ଲାବୋରେଟୋରୀ ଟେଷ୍ଟିଂ ଜାରି ରହିଛି। ରୋଗୀମାନଙ୍କର ସୁରକ୍ଷିତ ସ୍ଥାନାନ୍ତରଣ ପାଇଁ ଉଦ୍ୟମ କରାଯାଉଛି ବୋଲି ସଂସ୍ଥା ପକ୍ଷରୁ କୁହାଯାଇଛି |

ଭୁବନେଶ୍ୱର: ବର୍ତ୍ତମାନ ସମୟରେ ଛୋଟ ପିଲାଙ୍କ ହାତରେ ସ୍ମାର୍ଟଫୋନ୍ ଦେଖିବା ଏକ ସାଧାରଣ ଘଟଣା ପାଲଟିଛି। ଅନେକ ସମୟରେ ବାପା-ମା’ମାନେ ପିଲାଙ୍କୁ ଖୁଆଇବା ପାଇଁ କିମ୍ବା କାନ୍ଦ ବନ୍ଦ କରାଇବା ପାଇଁ ହାତରେ ମୋବାଇଲ୍ ଧରାଇ ଦେଉଛନ୍ତି। କିନ୍ତୁ ଏହା ଶିଶୁର ଭବିଷ୍ୟତ ପାଇଁ କେତେ ବିପଜ୍ଜନକ ହୋଇପାରେ, ସେ ନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଏବଂ ଇଣ୍ଡିଆନ୍ ଏକାଡେମୀ ଅଫ୍ ପେଡିଆଟ୍ରିକ୍ସ (IAP) ଚେତାବନୀ ଜାରି କରିଛନ୍ତି।

କେଉଁ ବୟସରେ କେତେ ସ୍କ୍ରିନ୍ ଟାଇମ୍?

ବିଶେଷଜ୍ଞଙ୍କ ପରାମର୍ଶ ଅନୁଯାୟୀ, ଶିଶୁର ବୟସ ଅନୁସାରେ ମୋବାଇଲ୍ ବ୍ୟବହାରର ସୀମା ନିର୍ଦ୍ଧାରଣ କରାଯାଇଛି। ଡାକ୍ତରଙ୍କ ମତରେ ୨ ବର୍ଷରୁ କମ୍ ବୟସର ଶିଶୁଙ୍କୁ ମୋବାଇଲ୍, ଟିଭି କିମ୍ବା ଟ୍ୟାବଲେଟ୍ ଆଦୌ ଦେଖାଇବା ଉଚିତ୍ ନୁହେଁ। ଏହି ସମୟରେ ଶିଶୁର ମସ୍ତିଷ୍କ ବିକାଶ ହେଉଥିବାରୁ ସ୍କ୍ରିନ୍ ଲାଇଟ୍ ସେମାନଙ୍କ ଉପରେ ଗଭୀର କୁପ୍ରଭାବ ପକାଇଥାଏ। କେବଳ ପରିବାର ସହ ଭିଡିଓ କଲ୍ ବ୍ୟତୀତ ସେମାନଙ୍କ ପାଇଁ 'ନୋ ସ୍କ୍ରିନ୍ ଟାଇମ୍' ନିୟମ ପାଳନ କରିବା ଜରୁରୀ। ସେହିପରି ୨ ରୁ ୫ ବର୍ଷର ପିଲାମାନଙ୍କ ପାଇଁ ଦିନକୁ ସର୍ବାଧିକ ୧ ଘଣ୍ଟା ସ୍କ୍ରିନ୍ ଟାଇମ୍ ଅନୁମତି ଦିଆଯାଇପାରେ, ତାହା ପୁଣି କେବଳ ଶିକ୍ଷଣୀୟ କାର୍ଯ୍ୟକ୍ରମ ପାଇଁ ସୀମିତ ରହିବା ଆବଶ୍ୟକ।

ପିଲାଙ୍କ ଉପରେ ପଡୁଛି ମାରାତ୍ମକ ପ୍ରଭାବ

ଅତ୍ୟଧିକ ମୋବାଇଲ୍ ବ୍ୟବହାର ଦ୍ୱାରା ପିଲାମାନଙ୍କ ଶାରୀରିକ ଓ ମାନସିକ ବିକାଶ ବାଧାପ୍ରାପ୍ତ ହେଉଛି। ଛୋଟ ବୟସରୁ ପିଲାଙ୍କ ଆଖି ଖରାପ ହେବା ସହ ଚଷମା ଲାଗିବାର ଆଶଙ୍କା ବୃଦ୍ଧି ପାଉଛି। ବାହାରେ ଖେଳକୁଦ ବନ୍ଦ କରି ଏକାଠି ବସି ରହିବା ଫଳରେ ପିଲାମାନେ ମୋଟାପଣ ବା ଓବେସିଟିର ଶିକାର ହେଉଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ମୋବାଇଲ୍ ନିଶା ଯୋଗୁଁ ପିଲାଙ୍କର କଥା କହିବାରେ ବିଳମ୍ବ (Language Delay) ଘଟୁଛି ଏବଂ ସେମାନଙ୍କର ସାମାଜିକ ବିକାଶରେ ବାଧା ସୃଷ୍ଟି ହେଉଛି। ଏହା ସହିତ ନିଦ ନ ହେବା ଏବଂ ଚିଡିଚିଡା ସ୍ୱଭାବ ଭଳି ସମସ୍ୟା ମଧ୍ୟ ଦେଖାଯାଉଛି।

ଅଭିଭାବକଙ୍କ ପାଇଁ ପରାମର୍ଶ

ଏହି ସମସ୍ୟାର ସମାଧାନ ପାଇଁ ଅଭିଭାବକମାନଙ୍କୁ ସଚେତନ ହେବାକୁ ପଡିବ। ପ୍ରଥମେ ବାପା-ମା’ ନିଜେ ପିଲାଙ୍କ ସାମନାରେ ମୋବାଇଲ୍ ବ୍ୟବହାର କମାଇବା ଉଚିତ୍, କାରଣ ପିଲାମାନେ ସେମାନଙ୍କୁ ଅନୁକରଣ କରନ୍ତି। ଶୋଇବାର ୧ ଘଣ୍ଟା ପୂର୍ବରୁ ଘରର ସମସ୍ତ ସ୍କ୍ରିନ୍ ବନ୍ଦ କରିବା ସହ ପିଲାଙ୍କ ଶୋଇବା ଘରେ ଟିଭି ନ ରଖିବାକୁ ପରାମର୍ଶ ଦିଆଯାଇଛି। ମୋବାଇଲ୍ ବଦଳରେ ପିଲାଙ୍କୁ ବହି ପଢିବା, ଚିତ୍ରାଙ୍କନ କରିବା କିମ୍ବା ବାହାରେ ଖେଳିବା ପାଇଁ ଉତ୍ସାହିତ କରିବା ଜରୁରୀ।

ନୂଆଦିଲ୍ଲୀ: ଆମେରିକା ଶେଷରେ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO)ରୁ ଆନୁଷ୍ଠାନିକ ଭାବେ ଓହରିଯାଇଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସଂଗଠନରୁ ଓହରିବା ପାଇଁ ନିର୍ଦ୍ଦେଶ ଦେବାର ଠିକ୍ ଏକ ବର୍ଷ ପରେ ଏହି ପ୍ରକ୍ରିୟା ସମାପ୍ତ ହୋଇଛି। ତେବେ ସଂଗଠନ ଛାଡ଼ିବା ପରେ ଆମେରିକା ଉପରେ ପ୍ରାୟ ୨୬୦ ମିଲିୟନ ଡଲାରର ଋଣ ବାକି ରହିଥିବା ନେଇ ବ୍ଲୁମବର୍ଗ ଏବଂ ରଏଟର୍ସ ରିପୋର୍ଟ କରିଛନ୍ତି।

ଆମେରିକାର ସ୍ୱାସ୍ଥ୍ୟ ଏବଂ ମାନବ ସେବା ବିଭାଗ ସ୍ପଷ୍ଟ କରିଛି ଯେ WHOକୁ ଦିଆଯାଉଥିବା ସମସ୍ତ ପାଣ୍ଠି ବନ୍ଦ କରାଯାଇଛି। ଏହା ସହିତ ସମଗ୍ର ବିଶ୍ୱରେ ଥିବା WHO ମୁଖ୍ୟାଳୟ ଓ କାର୍ଯ୍ୟାଳୟରୁ ଆମେରିକୀୟ କର୍ମଚାରୀମାନଙ୍କୁ ଫେରାଇ ଅଣାଯାଇଛି। ଟ୍ରମ୍ପ ତାଙ୍କ ଦ୍ୱିତୀୟ କାର୍ଯ୍ୟକାଳର ପ୍ରଥମ ଦିନରେ ଏହି ନିଷ୍ପତ୍ତି ନେଇଥିଲେ। ସେ WHOର କୋଭିଡ ମହାମାରୀ ପରିଚାଳନାରେ ବିଫଳତା, ସଂସ୍କାର ଅଭାବ ଏବଂ ଅନୁଚିତ ରାଜନୈତିକ ପ୍ରଭାବ ବିଷୟରେ ଅଭିଯୋଗ କରି ଏହି ପଦକ୍ଷେପ ନେଇଛନ୍ତି।

ସଂଗଠନରୁ ଓହରିବା ପୂର୍ବରୁ ବାକି ଥିବା ଅର୍ଥ ପୈଠ କରିବାକୁ ଆମେରିକା ପ୍ରଶାସନ ମନା କରିଦେଇଛି। ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଏହି ଋଣ ପରିଶୋଧ କରିବା ପାଇଁ କୌଣସି ଆଇନଗତ ବାଧ୍ୟବାଧକତା ନାହିଁ। ଯଦିଓ ୧୯୪୮ର ଏକ କଂଗ୍ରେସ ପ୍ରସ୍ତାବ ଅନୁଯାୟୀ, ସଂଗଠନ ଛାଡ଼ିବା ପୂର୍ବରୁ ଏକ ବର୍ଷର ନୋଟିସ୍ ଏବଂ ବାକି ଦେୟ ପ୍ରଦାନ କରିବା ଆବଶ୍ୟକ, ତଥାପି ଆମେରିକା ୨୦୨୪ ଏବଂ ୨୦୨୫ ବର୍ଷ ପାଇଁ ଦେୟ ପ୍ରଦାନ କରିନାହିଁ।

ଆମେରିକା ଓହରିବା ଯୋଗୁଁ WHO ନିଜର ସବୁଠାରୁ ବଡ଼ ଆର୍ଥିକ ସହଯୋଗୀ ହରାଇଛି। ୨୦୨୨-୨୩ ମଧ୍ୟରେ ଆମେରିକା ପ୍ରାୟ ୧.୩ ବିଲିୟନ ଡଲାରର ସହାୟତା ପ୍ରଦାନ କରିଥିଲା। ସ୍ୱାସ୍ଥ୍ୟ ବିଶେଷଜ୍ଞମାନେ ଏହି ନିଷ୍ପତ୍ତିକୁ "ବିଜ୍ଞାନଗତ ଭାବେ ଦାୟିତ୍ୱହୀନ" ବୋଲି ଅଭିହିତ କରିଛନ୍ତି। ଆମେରିକାର ଇନଫେକ୍ସିଅସ୍ ଡିଜିଜ୍ ସୋସାଇଟିର ସଭାପତି ଡକ୍ଟର ରୋନାଲ୍ଡ ନାହାସ୍ ଏହାକୁ ଏକ ଅଦୂରଦର୍ଶୀ ପଦକ୍ଷେପ ବୋଲି କହିଛନ୍ତି। ଏହାଦ୍ୱାରା ପୋଲିଓ ନିରାକରଣ ଏବଂ ନୂତନ ଭୂତାଣୁ ଗବେଷଣା ଭଳି ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ ବାଧାପ୍ରାପ୍ତ ହେବାର ଆଶଙ୍କା ରହିଛି।

ନୂଆଦିଲ୍ଲୀ: ବାର୍ଡ ଫ୍ଲୁରେ ଗଲା ପ୍ରଥମ ଜୀବନ। ମେକ୍ସିକୋର ଜଣେ ବ୍ୟକ୍ତିଙ୍କର ବାର୍ଡ ଫ୍ଲୁ ସଂକ୍ରମଣରେ ମୃତ୍ୟୁ ହୋଇଥିବା ନେଇ ସୂଚନା ଦେଲା ବିଶ୍ୱ ସ୍ୱାସ୍ଥ୍ୟ ସଂଗଠନ ବା ଡବ୍ଲୁଏଚଓ ।

ମିଳିଥିବା ସୂଚନା ଅନୁଯାୟୀ, ମୃତ ବ୍ୟକ୍ତିଙ୍କର ପୂର୍ବରୁ ଏକାଧିକ ସ୍ୱାସ୍ଥ୍ୟଗତ ସମସ୍ୟା ରହିଥିଲା। ସେ ହସ୍ପିଟାଲରେ ଭର୍ତ୍ତି ହେବା ପୂର୍ବରୁ ଏକାଧିକ ସ୍ୱାସ୍ଥ୍ୟ ସମସ୍ୟା ଦେଇ ଗତି କରୁଥିଲେ। ଗତ ଏପ୍ରିଲରେ ମେକ୍ସିକୋ ସିଟିର ଏକ ଡାକ୍ତରଖାନାରେ ଭର୍ତ୍ତି ହୋଇଥିଲେ ଉକ୍ତ ବ୍ୟକ୍ତି। ଜ୍ୱର, ନିଶ୍ୱାସ ପ୍ରଶ୍ୱାସ ନେବାରେ ଅସୁବିଧା ସହିତ ଝାଡ଼ା, ବାନ୍ତି ଏବଂ ସାଧାରଣ ଅସୁସ୍ଥତା ମଧ୍ୟ ଦେଖାଦେିଥିଲା। ଯାହାପରେ ପରିବାର ଲୋକେ ତାଙ୍କୁ ଡାକ୍ତଖାନାରେ ଭର୍ତ୍ତି କରିଥିଲେ। ଡାକ୍ତରଖାନାରେ ଚିକିତ୍ସିତ ସମୟରେ ପରୀକ୍ଷଣ ଦ୍ବାରା ତାଙ୍କ ଶରୀରରେ ଅଭିଆନ ଇନଫ୍ଳୁଏଞ୍ଜା A(H5N2) ଭୂତାଣୁ ଚିହ୍ନଟ ହୋଇଥିଲା। ପୂର୍ବରୁ ଏପରି କୌଣସି ବ୍ୟକ୍ତିଙ୍କଠାରେ ଏହି ଭୂତାଣୁ ଚିହ୍ନଟ ହୋଇ ନ ଥିବା ବେଳେ ଏହା ପ୍ରଥମ ମାମଲା ବୋଲି କହିଛି ସ୍ବାସ୍ଥ୍ୟ ସଂଗଠନ। ତେବେ ପୂର୍ବରୁ ମେକ୍ସିକୋର ଜଣେ ବ୍ୟକ୍ତିଙ୍କଠାରେ ପ୍ରଥମ H5 ଭୂତାଣୁ ରିପୋର୍ଟ ହୋଇଥିବା କହିଛି ସ୍ବାସ୍ଥ୍ୟ ସଂଗଠନ।

ନୂଆଦିଲ୍ଲୀ: ଭାଇରାଲ ହେପାଟାଇଟିସ୍‌ ରୋଗ ଦିନକୁ ଦିନ ଘାତକ ହେବାରେ ଲାଗିଛି। ଏହି ରୋଗୀସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ତଦନୁସାରେ ମୃତ୍ୟୁସଂଖ୍ୟା ମଧ୍ୟ ବଢ଼ିବାରେ ଲାଗିଛି। ଏବେ ଏହାକୁ ନେଇ ବିଶ୍ବ ସ୍ବାସ୍ଥ୍ୟ ସଂଗଠନ (ହୁ) ଚେତାବନୀ ଜାରି କରିଛି। ଏହି ସଂକ୍ରାମକ ରୋଗ ବିଶ୍ବରେ ଦିନକୁ ୩, ୫୦୦ ଲୋକଙ୍କ ଜୀବନ ନେଉଛି। ବର୍ଷକୁ ପ୍ରାୟ ୧୩ ଲକ୍ଷ ଲୋକଙ୍କ ମୃତ୍ୟୁ ହେଉଛି। ‘ଡବ୍ଲ୍ୟୁଏଚ୍‌ଓ ୨୦୨୪ ଗ୍ଲୋବାଲ ହେପାଟାଇଟିସ ରିପୋର୍ଟ’ରେ କୁହାଯାଇଛି ଯେ ୨୦୧୯ରେ ଏହି ରୋଗରେ ୧୧ ଲକ୍ଷ ଲୋକଙ୍କ ମୃତ୍ୟୁ ହୋଇଥିଲା। ଏହି ସଂଖ୍ୟା ୨୦୨୨ରେ ୧୩ ଲକ୍ଷରେ ପହଞ୍ଚି ଯାଇଛି। ୧୮୭ ଦେଶକୁ ନେଇ ହୋଇଥିବା ସର୍ଭେରୁ ଏହି ସୂଚନା ମିଳିଛି। ରିପୋର୍ଟ ଅନୁଯାୟୀ ୮୩ ପ୍ରତିଶତଙ୍କ ମୃତ୍ୟୁ ‘ହେପାଟାଇଟିସ୍‌ ବି’ ଏବଂ ୧୭ ପ୍ରତିଶତ ‘ହେପାଟାଇଟିସ ସି’ ଯୋଗୁଁ ହୋଇଛି।

ବିଶ୍ବ ହେପାଟାଇଟିସ ଶିଖର ସମ୍ମିଳନୀରେ ଜାରି ରିପୋର୍ଟରେ କୁହାଯାଇଛି ଯେ ହେପାଟାଇଟିସ ବି ଏବଂ ସି ସଂକ୍ରମଣ ଯୋଗୁଁ ବିଶ୍ବରେ ଦିନକୁ ୩,୫୦୦ ଲୋକଙ୍କ ମୃତ୍ୟୁ ହେଉଛି। ଏହି ସଂକ୍ରମଣର ଦୁଇ ତୃତୀୟାଂଶ ମାମଲା ବାଂଲାଦେଶ, ଚୀନ୍‌, ଇଥିଓପିଆ, ଭାରତ, ଇଣ୍ଡୋନେସିଆ, ନାଇଜେରିଆ, ପାକିସ୍ତାନ, ଫିଲିପିନ୍ସ, ରୁଷ୍‌ ଏବଂ ଭିଏତନାମରୁ ଆସୁଛି।

ଚିନ୍ତା ପ୍ରକଟ କଲା ‘ହୁ’ ମୁଖ୍ୟ 

ବିଶ୍ବ ସ୍ବାସ୍ଥ୍ୟ ସଂଗଠନ (ହୁ) ପକ୍ଷରୁ କୁହାଯାଇଛି ଯେ, ୨୦୨୫ ସୁଦ୍ଧା ଉପରୋକ୍ତ ୧୦ ଦେଶରୁ ସଂକ୍ରମଣକୁ ନିୟନ୍ତ୍ରଣ, ନିଦାନ ଏବଂ ଉପଚାର ଲାଗି ସାର୍ବଜନୀନ ବ୍ୟବସ୍ଥା ସୁନିଶ୍ଚିତ କରିବାକୁ ପଡିବ। ଏହି ଲକ୍ଷ୍ୟ ହାସଲ କରିବାକୁ ହେଲେ ମୁକାବିଲା ବ୍ୟବସ୍ଥାକୁ ସାକାର ଭାବେ କାର୍ଯ୍ୟକାରୀ କରିବାକୁ ହେବ। ‘ହୁ’ର ମହାନିର୍ଦ୍ଦେଶ ଡ.ଟେଡ୍ରୋସ ଅଧନୋମ ଘେବ୍ରିୟସସ ମଧ୍ୟ ହେପାଟଇଟିସ ମାମଲା ବୃଦ୍ଧିକୁ ନେଇ ଚିନ୍ତା ପ୍ରକଟ କରିଛନ୍ତି। ଏହାର ମୁକାବିଲା କରିବାକୁ ନେଇ ସେ ଦେଶମାନଙ୍କୁ ଆଶ୍ବାସନା ଦେଇଛନ୍ତି। ଏଥିପାଇଁ ‘ହୁ’ ପ୍ରତିବଦ୍ଧ ବୋଲି କହିଛନ୍ତି।

ଭାଇରାଲ ହେପାଟାଇଟିସ୍‌ କ’ଣ

ଆମେରିକାର ସେଣ୍ଟର ଫର୍‌ ଡିଜିଜ କଣ୍ଟ୍ରୋଲ ଆଣ୍ଡ ପ୍ରିଭେନସନ (ସିଡିସି) ଅନୁଯାୟୀ ଯକୃତରେ ପ୍ରଦାହକୁ ହେପାଟାଇଟିସ କୁହାଯାଇଥାଏ। ଯକୃତରେ ପ୍ରଦାହ କିମ୍ବା କ୍ଷତି ହେଲେ ଏହାର କାର୍ଯ୍ୟ ପ୍ରଭାବିତ ହୋଇପାରେ। ମଦ, ବିଷାକ୍ତ ଖାଦ୍ୟ କିମ୍ବା କିଛି ଔଷଧ କାରଣରୁ ହେପାଟାଇଟିସ ହୋଇପାରେ। ତେବେ ସାଧାରଣତଃ ଭୂତାଣୁ ଯୋଗୁଁ ଏହି ରୋଗ ହୋଇଥାଏ। ହେପାଟାଇଟିସରେ ସଂକ୍ରମିତ ଅନେକ ଲୋକଙ୍କଠାରେ ଏହାର ଲକ୍ଷଣ ଦେଖାଯାଇ ନ ଥାଏ। ଏଥିଯୋଗୁଁ ଏହି ରୋଗକୁ ଚିହ୍ନଟ କରିବାରେ ସମସ୍ୟା ସୃଷ୍ଟି ହୋଇଥାଏ। କିନ୍ତୁ ଲକ୍ଷଣ ଦେଖା ଦେଉଥିବା ରୋଗୀଙ୍କଠାରେ ଜ୍ବର, ଥକାପଣ, ଭୋକ ନ ଲାଗିବା, ବାନ୍ତି, ପେଟ ଦରଜ, ଗାଢ଼ ରଙ୍ଗର ପରିସ୍ରା, ବୃକକରେ ଦରଜ ଏବଂ ଜଣ୍ଡିସ ଆଦି ହୋଇଥାଏ।

ନୂଆଦିଲ୍ଲୀ : ମାଡିଆସୁଛି ଆଉ ଏକ ମହାମାରୀ। କରୋନାଠାରୁ ବି ଭୟଙ୍କର ବିପତ୍ତିର ସାମ୍ନା କରିବ ବିଶ୍ବ । ଏନେଇ ବିଶ୍ବବାସୀଙ୍କୁ ସତର୍କ କରାଇଛନ୍ତି ସ୍ୱାସ୍ଥ୍ୟ ବିଶେଷଜ୍ଞ। କରୋନାଭାଇରସ୍ ସାରା ବିଶ୍ୱରେ ବିପର୍ଯ୍ୟୟ ଘଟାଇଛି ଏବଂ ଅନେକ ଦେଶର ଲୋକମାନେ କ୍ରମାଗତ ଭାବରେ ଏହି ମହାମାରୀରେ ଏବେ ବି ଶିକାର ହେଉଛନ୍ତି। କରୋନା ମହାମାରୀରେ ବିଶ୍ବରେ ପ୍ରାୟ ୭୦ ଲକ୍ଷରୁ ଊର୍ଦ୍ଧ୍ବ ଲୋକଙ୍କର ମୃତ୍ୟୁ ହୋଇଥିବା ବେଳେ ଏବେ ଆସୁଥିବା ମାହାମାରୀ ଅତି କମରେ ୫ କୋଟି ଲୋକ ପ୍ରାଣ ହରାଇପାରନ୍ତି ବୋଲି ସ୍ୱାସ୍ଥ୍ୟ ବିଶେଷଜ୍ଞ କହିଛନ୍ତି।

ବିଶେଷଜ୍ଞମାନେ ଯେଉଁ ନୂଆ ମହାମାରୀ ନେଇ ସତର୍କ କରୁଛନ୍ତି ତାହା କୋଭିଡ-୧୯ ଠାରୁ ୭ ଗୁଣା ଅଧିକ ବିପଜ୍ଜନକ ହୋଇପାରେ। ଏହି ଅଜଣା ରୋଗକୁ ସ୍ୱାସ୍ଥ୍ୟ ବିଶେଷଜ୍ଞ ଏକ୍ସ ନାମରେ ନାମିତ କରିଛନ୍ତି। ଡେଲି ମେଲ ଏନେଇ ଏକ ରିପୋର୍ଟ ପ୍ରକାଶ କରିଛି। ବିଶ୍ବ ସ୍ୱାସ୍ଥ୍ୟ ସଙ୍ଗଠନ ମଧ୍ୟ ଏହି ରୋଗକୁ ନେଇ ସତର୍କ କରିଛି। ଏଥି ସହିତ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ମଧ୍ୟ ଏହାକୁ ରୋଗ X ନାମରେ ନାମିତ କରିବା ସହ ଏହା ମହାମାରୀ ସ୍ଥିତିରେ ଥିବା କହିଛି। କରୋନାକୁ ଗ୍ଲୋବାଲ ଏମର୍ଜେନ୍ସିରୁ ହଟାଇ ଦିଆଯାଇଥିଲେ ମଧ୍ୟ ଆଗାମି ଦିନ ପାଇଁ ସତର୍କ ରହିବାକୁ ହେବ । ଆଗାମୀ ଦିନରେ X ଭୟଙ୍କର ମହାମାରୀ ବିଶ୍ବକୁ କବଳିତ କରିବାର ଆଶଙ୍କା ରହିଛି ବୋଲି ବିଶ୍ୱ ସ୍ୱାସ୍ଥ୍ୟ ସଂଗଠନ କହିଛି।

ନୂତନ ମହାମାରୀ ବିଷୟରେ ବିଶେଷଜ୍ଞମାନେ ଚେତାବନୀ ଦେଇଛନ୍ତି

ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଭୟ କରୁଛି ଯେ ଏହି ନୂଆ ମହାମାରୀ ଏବେ ଆସିବାକୁ ଯାଉଛି, ଆଉ ଏହା COVID-19 ଅପେକ୍ଷା ଅଧିକ ମାରାତ୍ମକ ହୋଇପାରେ। ଡେଲି ମେଲର ରିପୋର୍ଟ ଅନୁଯାୟୀ ବିଶେଷଜ୍ଞମାନେ X ବିଷୟରେ ଚେତାବନୀ ଦେଇଛନ୍ତି ଏବଂ କହିଛନ୍ତି ଯେ କୋଭିଡ -୧୯ ମହାମାରୀର ଆରମ୍ଭ କରିଛି। ଆଗକୁ ଏପରି ଅନେକ ମହାମାରୀ ଆସିବ। ବ୍ରିଟେନର ଭ୍ୟାକ୍ସିନ୍ ଟାସ୍କ ଫୋର୍ସର ମୁଖ୍ୟ ଡେମ କେଟ୍ ବିଙ୍ଗହମ୍ ଲୋକଙ୍କୁ ଚେତାବନୀ ଦେଇଛନ୍ତି ଯେ ଯଦି ଏହି ରୋଗ ମହାମାରୀ ରୂପେ ଗ୍ରହଣ କରେ ତେବେ ଅତି କମରେ ୫ କୋଟି ଲୋକ ଏହି କାରଣରୁ ମରିପାରନ୍ତି। ଏହା ସହିତ ସେ ଏହା ମଧ୍ୟ କହିଛନ୍ତି ଯେ ଏହାର ମୁକାବିଲା କରିବା ଏକ ବଡ ଆହ୍ବାନ ହୋଇପାରେ, କାରଣ ଏହା କୋଭିଡ -୧୯ ଅପେକ୍ଷା ଅଧିକ ମାରାତ୍ମକ ଅଟେ।

ରୋଗ କେତେ ବିପଜ୍ଜନକ 

ଡେମ କେଟ୍ ବିଙ୍ଗହମ୍ କହିଛନ୍ତି ଯେ କରୋନା ଜୀବାଣୁ ଅପେକ୍ଷା ନୂଆ ରୋଗ X, ୭ ଗୁଣା ଅଧିକ ବିପଜ୍ଜନକ ହୋଇପାରେ। ଏହା ସହିତ ସେ କହିଛନ୍ତି ଯେ ପରବର୍ତ୍ତୀ ମହାମାରୀ କେବଳ ପୃଥିବୀରେ ଉପସ୍ଥିତ ଥିବା କୌଣସି ଭାଇରସରୁ ଆସିପାରେ । ସେ ୧୯୧୮-୧୯ ମସିହାରେ ଆସିଥିବା ମହାମାରୀକୁ ମନେ ପକାଇ ସେ କହିଛନ୍ତି, ସେତେବେଳେ ଯେପରି ୫ କୋଟି ଲୋକଙ୍କ ଜୀବନ ଯାଇଥିଲା ଆଗକୁ ଆସୁଥିବା ମହାମାରୀରେ ସମାନ ପରିସ୍ଥିତି ଉପୁଜିପାରେ। ସମାନ ପ୍ରକାର ଭୂତାଣୁ ଏବେ ବି ଆମ ବାୟୁମଣ୍ଡଳରେ ଅଛନ୍ତି। ଏସବୁ ଭୂତାଣୁ ଆହୁରି ଘାତକ ହୋଇପାରନ୍ତି ବୋଲି ସେ କହିଛନ୍ତି।

ନୂଆଦିଲ୍ଲୀ: ଏବେ ଚୀନ୍‌ରେ କରୋନା ସଂକ୍ରମଣ ଏବଂ କରୋନାଜନିତ ମୃତ୍ୟୁ ଉଦବେଗଜନକ ସ୍ଥିତିରେ ପହଞ୍ଚିଛି। ଗତ ମାସ ପ୍ରାରମ୍ଭରୁ ବଢିଥିବା ସଂକ୍ରମଣ ଲଗାତର ଭାବେ କାୟା ବିସ୍ତାର କରି ଚାଲଇଥିବା ବେଳେ ଦୈନିକ ମୃତ୍ୟୁସଂଖ୍ୟା ମଧ୍ୟ ବଢିବାରେ ଲାଗିଛି। କିନ୍ତୁ ଚୀନ୍‌ ଏ ସମ୍ପର୍କରେ ବିଶ୍ବ ସ୍ବାସ୍ଥ୍ୟ ସଂଗଠନ(ହୁ)କୁ ପ୍ରକୃତ ତଥ୍ୟ ଦେଉ ନାହିଁ ବୋଲି ହୁ ପକ୍ଷରୁ କୁହାଯାଇଛି। ଯାହାକି ସଂକ୍ରମଣ ରୋକିବା ଏବଂ ବିଶ୍ବ ସ୍ତରରେ ଅନ୍ୟାନ୍ୟ ପଦକ୍ଷେପ ଗ୍ରହଣ କରିବା କ୍ଷେତ୍ରରେ ସମସ୍ୟା ସୃଷ୍ଟି କରିପାରେ ବୋଲି ହୁ କହିଛି। ହୁ’ର ଆପାଦକାଳୀନ ନିର୍ଦ୍ଦେଶକ ମାଇକେଲ ରିଆନ କହିଛନ୍ତି ଯେ, ଯଦିଓ ଚୀନ୍‌ ପୂର୍ବ ତୁଳନାରେ ତଥ୍ୟ ଲୁଚାଉ ନାହିଁ କିନ୍ତୁ ସମ୍ପୂର୍ଣ୍ଣ ତଥ୍ୟ ମଧ୍ୟ ଦେଉ ନାହିଁ। ବର୍ତ୍ତମାନ ଚୀନରେ ଦିନକୁ ହଜାର ହଜାର ସଂଖ୍ୟାରେ ମୃତ୍ୟୁ ଘଟୁଥିଲେ ମଧ୍ୟ ଚୀନ୍ ସରକାର ଏହାକୁ ଅଳ୍ପ ସଂଖ୍ୟା ମଧ୍ୟରେ ସୀମିତ ରଖୁଛନ୍ତି। ତେଣୁ ସେଠାକାର ପ୍ରକୃତ ସ୍ଥିତି ସମ୍ପର୍କରେ ଆକଳନ କରିବା ଏବଂ ଆବଶ୍ୟକ ପଦକ୍ଷେପ ଗ୍ରହଣ କରିବା ନେଇ ସମସ୍ୟା ସୃଷ୍ଟି ହେଉଛି। ସଂକ୍ରମଣ ଏବଂ ମୃତ୍ୟୁକୁ ଦୃଷ୍ଟିରେ ରଖି ଚୀନ୍‌ର ସାଧାରଣ ସ୍ବାସ୍ଥ୍ୟ ବ୍ୟବସ୍ଥା କ୍ଷେତ୍ରରେ ଅଧÒକରୁ ଅଧିକ ଡାକ୍ତରଙ୍କୁ ନିୟୋଜିତ କରିବାର ଆବଶ୍ୟକତା ଦେଖାଯାଇଛି। କିନ୍ତୁ ଚୀନ୍‌ ପ୍ରକୃତ ତଥ୍ୟ ଦେଉ ନଥିବାରୁ କରୋନାଜନିତ ବିପଦକୁ ଆକଳନ କରିବା ଏବଂ ଆନୁଷଙ୍ଗିକ ପଦକ୍ଷେପ ଗ୍ରହଣ କରିବା ସମ୍ଭବ ହେଉ ନାହିଁ ବୋଲି ରିଆନ କହିଛନ୍ତି। ବିଶେଷଜ୍ଞମାନଙ୍କ ଆକଳନ ଅନୁସାରେ ଚୀନ୍‌ରେ ଚଳିତ ବର୍ଷ କରୋନାଜନିତ ମୃତ୍ୟୁସଂଖ୍ୟା ୧୦ ଲକ୍ଷ ଟପିବ। ବର୍ତ୍ତମାନ ଦୈନିକ ୫ ହଜାରରୁ ଅଧିକ ମୃତ୍ୟୁ ହେଉ ଥିବା ବେଳେ ଆଗକୁ ଏହି ସଂଖ୍ୟା ବହୁ ଗୁଣିତ ହେବ। ହେଲେ ସଂକ୍ରମଣ ଆରମ୍ଭ ହେବା ପରେ ବର୍ତ୍ତମାନ ସୁଦ୍ଧା ୫ ହଜାର ଲୋକଙ୍କ ମୃତ୍ୟୁ ଘଟିଥିବା ଚୀନ୍‌ କହୁଛି। ଯାହାକି ଚୀନ୍‌ ସମେତ ଅନ୍ୟାନ୍ୟ ରାଷ୍ଟ୍ର ପାଇଁ ବିପଦ ଆଣିପାରେ ବୋଲି ରିଆନ କହିଛନ୍ତି।

ନୂଆଦିଲ୍ଲୀ: ଥଣ୍ତା, ଜ୍ୱର ଓ କଫ ପାଇଁ ହରିୟାଣାରେ ମେଡେନ ଫାର୍ମାସ୍ୟୁଟିକାଲ ତରଫରୁ ପ୍ରସ୍ତୁତ ୪ଟି କଫ୍ ସିରପ ବ୍ୟବହାର ନ କରିବାକୁ ସତର୍କ କରାଇଲା ହୁ’। ଏହି ସିରପ ପିଇ ଗାମ୍ୱିଆରେ ୬୬ ଶିଶୁଙ୍କ ମୃତ୍ୟୁ ପରେ ଭାରତ ସମେତ ସବୁ ଦେଶକୁ ସତର୍କତା ଜାରି କରିଛି ହୁ’ । ଲ୍ୟାବରାଟୋରୀରେ ଏହି ସିରପ ପରୀକ୍ଷା ପରେ ଆବଶ୍ୟକତାଠାରୁ ଅଧିକ ପରିମାଣର ଆଲକୋହଲ ମାତ୍ରା ଥିବା ସ୍ପଷ୍ଟ ହୋଇଛି । ଏହା କିଡନୀକୁ ପ୍ରଭାବିତ କରୁଛି ଓ ବ୍ୟବହାର ନ କରିବାକୁ ଆଡଭାଇଜରି ଜାରି କରିଛି ହୁ’ । ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷରୁ ଭାରତୀୟ ଓଷଧ ନିର୍ମାତା ଓ ଡ୍ରଗ୍ସ ନିୟାମକ ସହ ମିଶି ମିଳିତ ଭାବେ  ତଦନ୍ତ କରାଯାଉଛି ।

ଅନ୍ୟପଟେ ପ୍ରାଥମିକ ତଦନ୍ତ ଅନୁସାରେ, ସଂପୃକ୍ତ କମ୍ପାନୀ ଷ୍ଟେଟ ଡ୍ରଗ୍ସ କଣ୍ଟ୍ରୋଲରଙ୍କ ଠାରୁ ଅନୁମତି ନେଇ ଔଷଧ ନିର୍ମାଣ କରିଛି । ତେବେ ସେହି କଫ୍‌ ସିରପ୍‌ କେବଳ ଗାମ୍ବିଆକୁ ରପ୍ତାନୀ କରାଯାଇଛି ।

ନୂଆଦିଲ୍ଲୀ : ବିଶ୍ବରେ ମଙ୍କିପକ୍ସ ମାମଲା ବଢିବାରେ ଲାଗିଛି। ମଙ୍କିପକ୍ସ ମାମଲା ବିଶ୍ୱରେ ଚିନ୍ତାଜନକ ସ୍ଥିତି ସୃଷ୍ଟି କରିବା ପରେ ଏହାକୁ ଗୁରୁତର ସହ ନେଇଛି ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲୁଏଚଓ) । ସଂକ୍ରମଣକୁ ଦୃଷ୍ଟିରେ ରଖି ମଙ୍କିପକ୍ସକୁ ଅନ୍ତର୍ଜାତୀୟ ଜରୁରୀକାଳୀନ ସ୍ୱାସ୍ଥ୍ୟ ସଙ୍କଟ ଘୋଷଣା କରିଛି ଡବ୍ଲୁଏଚଓ । ସଂକ୍ରମଣ ବୃଦ୍ଧିକୁ ରୋକିବା ପାଇଁ ଡବ୍ଲୁଏଚଓର ନିର୍ଦ୍ଦେଶକ ଡା. ଟେଡ୍ରସ ଏହି ଘୋଷଣା କରିଛନ୍ତି ।

ବିଶ୍ବ ସ୍ବାସ୍ଥ୍ୟ ସଂଗଠନର ମୁଖ୍ୟ ଟ୍ରେଡୋସ ଆଧାନମ ଘେବ୍ରୟସ କହିଛନ୍ତି ମଙ୍କିପକ୍ସ ସଂକ୍ରମଣ ବିଶ୍ବରେ ଚିନ୍ତାଜନକ ଭାବେ ଏକ ଜନସ୍ବାସ୍ଥ୍ୟ ବିପଦ ସୃଷ୍ଟି କରିଛି । ସେ କହିଛନ୍ତି, ପ୍ରାୟ ମାସକ ତଳେ ବିଶ୍ବ ସ୍ବାସ୍ଥ୍ୟ ସଂଗଠନର ଅନ୍ତର୍ଜାତୀୟ ସ୍ବାସ୍ଥ୍ୟ ନିୟମ ସଂପର୍କିତ ଜରୁରୀକାଳୀନ କମିଟି ମଙ୍କିପକ୍ସ ସଂକ୍ରମଣ ସଂପର୍କରେ ସମୀକ୍ଷା କରିଥିଲା । ମାସକ ପରେ ଏବେ ବିଶ୍ବରେ ମଙ୍କିପକ୍ସ ୭୫ଟି ଦେଶକୁ ବ୍ୟାପିଯାଇଛି ଓ ମୋଟ ୧୬ ହଜାରରୁ ଅଧିକ ଲୋକ ଆକ୍ରାନ୍ତ ହୋଇଛନ୍ତି ଓ ୬ ଜଣ ମୃତ୍ୟୁବରଣ କରିଛନ୍ତି । ଏଣୁ ଏହାକୁ ନେଇ ଚିନ୍ତା ବଢିଯାଇଛି ।

ଭାରତରେ ମଧ୍ୟ ମଙ୍କିପକ୍ସ ନିଜର କାୟା ମେଲାଇ ସାରିଛି । ଭାରତରେ ଏପର୍ଯ୍ୟନ୍ତ ମୋଟ ୩ଟି ମାମଲା ଦେଖାଦେଇଛି ଓ ସମସ୍ତ ମାମଲା କେରଳରେ ଦେଖାଦେଇଛି ।ବିଶ୍ବ ସ୍ବାସ୍ଥ୍ୟ ସଂଗଠନ ପୂର୍ବରୁ କହିଥିଲା ଯେ ମଙ୍କିପକ୍ସ ହେଉଛି ପଶୁଙ୍କ ଶରୀରରୁ ମଣିଷ ଶରୀରକୁ ସଂକ୍ରମିତ ହୋଇଥିବା ଏକ ଭୁତାଣୁ । ଏହା ସାଧାରଣତଃ ମିଳିମିଳା ପରି ଦେଖାଯାଇଥାଏ । ତେବେ ଏହା ସେତେଟା ମାରାତ୍ମକ ନୁହେଁ । କିନ୍ତୁ ଏବେ ଏହି ସଂକ୍ରମଣକୁ ନେଇ ସଂଗଠନ ଚିନ୍ତା ପ୍ରକାଶ କରିଛି ।

ଗୁରୁବାର ମଙ୍କିପକ୍ସ ବିଶେଷଜ୍ଞ ଏକ ଜରୁରୀ ବୈଠକରେ ମଙ୍କିପକ୍ସ ସଂକ୍ରମଣକୁ ଏକ କ୍ୟାଟେଗୋରୀ କରିବା ପାଇଁ ଡବ୍ଲୁଏଚଓକୁ ପରାମର୍ଶ ଦେଇଥିଲେ । ସୂଚନାଥାଉକି ବର୍ତ୍ତମାନ ୮୦ ଦେଶରେ ମଙ୍କିପକ୍ସ ସଂକ୍ରମଣ ବ୍ୟାପିଯାଇଛି । ଭାରତରେ ମଧ୍ୟ ଦୁଇଟି କେସ୍ ସାମ୍ନାକୁ ଆସିସାରିଛି । କରୋନା ଭଳି ଏହା ମହାମାରୀର ରୂପ ନେବା ପୂର୍ବରୁ ଏହା ଉପରେ ଅଙ୍କୁଶ ଲଗାଇବା ପାଇଁ ଏହି ଘୋଷଣା କରିଛି ବିଶ୍ୱସ୍ୱାସ୍ଥ୍ୟ ସଂଗଠନ ।ପୂର୍ବରୁ ଦୁଇଟି ମାମଲା ଭାରତରେ ଚିହ୍ନଟ ପରେ କେନ୍ଦ୍ର ସରକାର ଅନ୍ତର୍ଜତୀୟ ବିମାନବନ୍ଦରରେ ସବୁ ବିଦେଶ ଫେରନ୍ତାଙ୍କ ସ୍କ୍ରିନିଂ କରିବାର କଡା ନିର୍ଦ୍ଦେଶ ଦେଇଥିଲେ । ଏବେ ବିଦେଶ ଫେରନ୍ତାଙ୍କ ସ୍କ୍ରିନିଂ ପରେ ଘରକୁ ଛଡାଯାଉଛି । ଯାହାଙ୍କଠାରେ ସଂକ୍ରମଣ ଦେଖାଯାଉଛି ସେମାନଙ୍କୁ ମେଡିକାଲ ସ୍ଥାନାନ୍ତର କରାଯିବାର ବ୍ୟବସ୍ଥା କରାଯାଇଛି ।

ନୂଆଦିଲ୍ଲୀ:କରୋନା ଭାଇରସ୍‌ର ନୂଆ ଭାରିଆଣ୍ଟ ଓମିକ୍ରନ ସମଗ୍ର ବିଶ୍ୱକୁ ଆତଙ୍କିତ କରିଛି । ଭାରତ ମଧ୍ୟ ଏଥିରୁ ବାଦ ପଡ଼ିନାହିଁ । କୋଭିଡର ତୃତୀୟ ଲହରି ବର୍ତ୍ତମାନ ଭାରତର ଦ୍ୱାରଦେଶରେ ପହଞ୍ଚି ସାରିଲାଣି । ତେଣୁ ଗତ ଦୁଇବର୍ଷ ଧରି ଜନଜୀବନକୁ ଅସ୍ତବ୍ୟସ୍ତ କରିଦେଇଥିବା ଏହି କୋଭିଡ ମହାମାରୀର ଅନ୍ତ କେବେ ଘଟିବ ତାହା ହିଁ ବିଶ୍ୱ ସମୁଦାୟ ନିକଟରେ ସବୁଠାରୁ ବଡ଼ ପ୍ରଶ୍ନ ଭାବେ ଉଭା ହୋଇଛି । ସମଗ୍ର ବିଶ୍ୱରେ ଏହି ମହାମାରୀର ନିୟନ୍ତ୍ରଣ ପାଇଁ ଯେଉଁ ଉପାୟ ଖୋଜା ଯାଇଛି ତାହା ହେଉଛି ଟିକା । ଏହି କାରଣରୁ ଗତ ୧ ବର୍ଷ ହେଲା ଅଧିକାଂଶ ଦେଶ ଟିକାକରଣକୁ ଜୋର୍‌ ଦେଇଆସିଛନ୍ତି । ଭାରତରେ ମଧ୍ୟ ଏପର୍ଯ୍ୟନ୍ତ ୧୪୫ କୋଟିରୁ ଅଧିକ ଡୋଜ୍‌ ଟିକା ପ୍ରଦାନ କରାଗଲାଣି ।

କିନ୍ତୁ କରୋନା ଭାଇରସ୍‌ର ନୂଆ ଭାରିଆଣ୍ଟ ଓମିକ୍ରନ ଏବେ ନୂଆ ଆତଙ୍କ ସୃଷ୍ଟି କରିଛି । ତାର କାରଣ ହେଉଛି ଉଭୟ ଡୋଜ ଟିକା ନେଇଥିବା ବ୍ୟକ୍ତିମାନେ ମଧ୍ୟ ଏଥିରୁ ବର୍ତ୍ତି ପାରୁନାହାନ୍ତି । କିନ୍ତୁ ସବୁଠାରୁ ଆଶ୍ୱସ୍ତିର ବିଷୟ ଏହି କି ଟିକା ନେଇଥିବା ଲୋକମାନେ ସଂକ୍ରମିତ ହେଲେ ମଧ୍ୟ ଗମ୍ଭୀର ହେଉନାହାନ୍ତି । ଉପଲବ୍ଧ ହେଉଥିବା ଔଷଧ ଓ ଚିକିତ୍ସା ବ୍ୟବସ୍ଥାରେ ସେମାନେ ଠିକ୍‌ ହୋଇଯାଉଛନ୍ତି । ତଥାପି ମହାମାରୀର ଅନ୍ତ କେବେ ଘଟିବ ତାକୁ ସମସ୍ତଙ୍କ ମନକୁ ଆନ୍ଦୋଳିତ କରୁଛି ।

ଶୁକ୍ରବାର ଏଭଳି ସ୍ଥିତିରେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍‌ଓ) ଏକ ଆଶ୍ୱସ୍ତିକର ଖବର ଆଣିଛି । ୨୦୨୨ରେ କରୋନା ମହାମାରୀର ଅନ୍ତ ଘଟିବ ବୋଲି ଡବ୍ଲ୍ୟୁଏଚ୍‌ଓ ଆଶା ପ୍ରକାଶ କରିଛି । ଡବ୍ଲ୍ୟୁଏଚ୍‌ଓ ମହାନିର୍ଦ୍ଦେଶକ ଟେଡ୍ରୋସ ଅଧନୋମ ଘେବ୍ରେୟେସସ୍‌ ନୂଆବର୍ଷ ଅବ୍ୟବହିତ ପୂର୍ବରୁ ବାର୍ତ୍ତା ଦେଇ କହିଛନ୍ତି କି କରୋନା ବିରୋଧୀ ଲଢ଼େଇରେ ଟିକା ହେଉଛି ପ୍ରମୁଖ ଅସ୍ତ୍ର । ଟିକା ଉତ୍ପାଦନ ବିଶ୍ୱରେ ବୃଦ୍ଧି ପାଇଛି । ଆମେରିକା ଓ ୟୁରୋପର ଅନେକ ଦେଶରେ ଲୋକେ ତୃତୀୟ ଡୋଜ୍‌ ବା ବୁଷ୍ଟର ଡୋଜ ନେଲେଣି । ଇସ୍ରାଏଲରେ ଚତୁର୍ଥ ଡୋଜ୍‌ ଟିକା ପ୍ରଦାନ କରାଗଲାଣି ।

କିନ୍ତୁ ଅନେକ ଆଫ୍ରିକୀୟ ଦେଶରେ ସ୍ୱାସ୍ଥ୍ୟକର୍ମୀମାନେ ସମସ୍ତେ ଟିକା ନେଇପାରି ନାହାନ୍ତି । ସେଠାରେ ପ୍ରତି ୪ ସ୍ୱାସ୍ଥ୍ୟକର୍ମୀଙ୍କ ମଧ୍ୟରୁ ୩ ଜଣ ଟିକା ନେଇପାରିନାହାନ୍ତି । ଟିକାକୁ ନେଇ ଅସମତା ସୃଷ୍ଟି ହୋଇଛି । ଟିକାର ଏହି ବ୍ୟବଧାନ ଯୋଗୁ ନୂଆ ଭାରିଆଣ୍ଟ ଜନ୍ମ ନେଉଛି । ଆମକୁ ମଧ୍ୟ ବିପୁଳ କ୍ଷତି, କଷ୍ଟ ଓ କଟକଣା ମଧ୍ୟକୁ ଠେଲି ଦେଉଛି । ଏହି ଅସମତା ଯେତେଦିନ ଜାରି ରହିଥିବା ସେତେଦିନ ପର୍ୟ୍ୟନ୍ତ ମହାମାରୀର ପ୍ରଭାବ ରହିଥିବ । ତେଣୁ ଆମକୁ ଏହି ଅସମତା ଏବେ ଦୂର କରିବାର ସମୟ ଆସିଛି । ଯେତେ ଶୀଘ୍ର ଏହି ଅସମତା ଦୂର ହେବ ସେତେଶୀଘ୍ର ମହାମାରୀର ଅନ୍ତ ଘଟିବ ।

ସେପଟେ ଡବ୍ଲ୍ୟୁଏଚ୍‌ଓର କୋଭିଡ-୧୯ ଟେକ୍ନିକାଲ ଟିମ୍‌ର ମୁଖ୍ୟ ଡକ୍ଟର ମାରିଆ ଭନ କରଖୋଭ୍‌ କହିଛନ୍ତି ଯେ ଓମାଇକ୍ରନ ଯେଭଳି ଭାବେ ସଂକ୍ରମିତ କରିଚାଲିଛି ତାକୁ ନେଇ ଚିନ୍ତା ପ୍ରକଟ କରିବା ସ୍ୱାଭାବିକ କଥା । କିନ୍ତୁ ୨୦୨୨ ନୂଆ ଆଶା ନେଇ ଆସୁଛି । ଯଦି ଆମେ ଭୁଲ କରିବା ତେବେ ଆହୁରି ଘାତକ ନୂଆ ଭାରିଆଣ୍ଟର ସାମ୍‌ନା କରିବାକୁ ପଡ଼ିପାରେ ।

କିନ୍ତୁ ଆମେ ଯଦି ସତର୍କତା ଅବଲମ୍ବନ କରିବା ଏବଂ ଏହି ନୂଆ ଭାରିଆଣ୍ଟର ସଂକ୍ରମଣକୁ ବ୍ୟାପୀବାକୁ ନ ଦେବା ତେବେ ଶୀଘ୍ର ଏହି ମହାମାରୀର ଅନ୍ତ ଘଟିପାରିବ । ଆମେ ସମସ୍ତେ ନିଜର ଓ ନିଜ ପରିବାରର ସୁରକ୍ଷା ବିଷୟରେ ତ ଚିନ୍ତା କରିଆସୁଛୁ । କିନ୍ତୁ ଆମକୁ ଅନ୍ୟମାନଙ୍କର ସୁରକ୍ଷା କଥା ଧ୍ୟାନରେ ରଖିବାକୁ ହେବ । ଏହି ମହାମାରୀ ରୋକିବାକୁ ଏହା ହିଁ ଏକ ତରିକା ବୋଲି ସେ କହିଛନ୍ତି ।