ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ-ମଧ୍ୟପ୍ରାଚ୍ୟ-ୟୁରୋପ ଅର୍ଥନୈତିକ କରିଡର (IMEC) କୁ ନିଜର ପୂର୍ଣ୍ଣ ସମର୍ଥନ ଜଣାଇଛନ୍ତି। ଇରାନ ନିୟନ୍ତ୍ରଣରେ ଥିବା ତୈଳ ପଥଗୁଡ଼ିକ ଉପରେ ନିର୍ଭରଶୀଳତା କମାଇବା ଏବଂ ବିଶ୍ୱ ଶକ୍ତି ବଜାରକୁ ସୁରକ୍ଷିତ ରଖିବା ପାଇଁ ଏହି କରିଡରର ଆବଶ୍ୟକତା ରହିଛି ବୋଲି ସେ ଦର୍ଶାଇଛନ୍ତି। ଏହି ପଦକ୍ଷେପ ମାଧ୍ୟମରେ ମଧ୍ୟପ୍ରାଚ୍ୟରୁ ଆସୁଥିବା ତେଲକୁ ନୂଆ ମାର୍ଗ ଦେଇ ସ୍ଥାନାନ୍ତର କରାଯାଇପାରିବ ବୋଲି ଟ୍ରମ୍ପ ମତବ୍ୟକ୍ତ କରିଛନ୍ତି।

ଇରାନକୁ କାଉଣ୍ଟର କରିବା ଏବଂ ତେଲ ଦର ନିୟନ୍ତ୍ରଣ

ଇରାନର ନିୟନ୍ତ୍ରଣରେ ଥିବା ପ୍ରମୁଖ ତୈଳ ମାର୍ଗଗୁଡ଼ିକରେ ବାରମ୍ବାର ଦେଖାଦେଉଥିବା ସମସ୍ୟା ଯୋଗୁଁ ବିଶ୍ୱ ବଜାରରେ ତେଲ ଦର ପ୍ରଭାବିତ ହେଉଛି। ଡୋନାଲ୍ଡ ଟ୍ରମ୍ପଙ୍କ ଅନୁଯାୟୀ, ଆଇଏମଇସି (IMEC) କାର୍ଯ୍ୟକାରୀ ହେଲେ ତୈଳ ସରବରାହ ପାଇଁ ଇରାନ ଉପରେ ବିଶ୍ୱର ନିର୍ଭରଶୀଳତା ହ୍ରାସ ପାଇବ। ଏହାଦ୍ୱାରା ବିଶ୍ୱ ଶକ୍ତି ସୁରକ୍ଷା ନିଶ୍ଚିତ ହେବା ସହ ତେଲ ଦରକୁ ନିୟନ୍ତ୍ରଣରେ ରଖିବା ସହଜ ହେବ। ଏହି କରିଡରକୁ କେବଳ ଏକ ବାଣିଜ୍ୟିକ ମାର୍ଗ ଭାବରେ ନୁହେଁ, ବରଂ ଏକ ରଣନୈତିକ ଅସ୍ତ୍ର ଭାବରେ ଦେଖାଯାଉଛି।

ଭାରତ ଏବଂ ଆମେରିକା ମଧ୍ୟରେ ସହଭାଗିତା

ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଆମେରିକାର ସହଭାଗିତାରେ ଆରମ୍ଭ ହୋଇଥିବା ଏହି ମେଗା ପ୍ରୋଜେକ୍ଟ ଦୁଇ ଦେଶର ସମ୍ପର୍କକୁ ଅଧିକ ସୁଦୃଢ଼ କରିଛି। ଭାରତକୁ ମଧ୍ୟପ୍ରାଚ୍ୟ ଏବଂ ୟୁରୋପ ସହ ଯୋଡ଼ିବା ପାଇଁ ଉଦ୍ଦିଷ୍ଟ ଏହି କରିଡର ଆଗାମୀ ଦିନରେ ବିଶ୍ୱ ଅର୍ଥନୀତି ପାଇଁ ଗେମ୍-ଚେଞ୍ଜର ସାବ୍ୟସ୍ତ ହେବ। ଆମେରିକାର ଏହି ସମର୍ଥନ ଭାରତର ବଢ଼ୁଥିବା ଭୂ-ରାଜନୈତିକ ପ୍ରଭାବକୁ ଦର୍ଶାଉଛି ଏବଂ ଭବିଷ୍ୟତରେ ଏହା ଏକ ବିକଳ୍ପ ଏବଂ ସୁରକ୍ଷିତ ବାଣିଜ୍ୟିକ ନେଟୱର୍କ ସୃଷ୍ଟି କରିବାରେ ସହାୟକ ହେବ।

ନୂଆଦିଲ୍ଲୀ: ଦିଲ୍ଲୀରେ ଜି-୨୦ ସମ୍ମିଳନୀ ସମୟରେ ଘୋଷଣା ହୋଇଥିବା ଐତିହାସିକ ମଧ୍ୟ ଭାରତ-ମଧ୍ୟ ପ୍ରାଚ୍ୟ-ୟୁରୋପ ଅର୍ଥନୈତିକ କରିଡର (ଆଇଏମଇସି)ଦ୍ରୁତ ଗତିରେ ଆଗେଇ ଚାଲିଛି। ଏହି ପ୍ରକଳ୍ପ ଶେଷ ହେଲେ ନାଭି ମୁମ୍ବାଇର ଜବାହାରଲାଲ ନେହେରୁ ବନ୍ଦର କିମ୍ବା ଗୁଜରାଟର ମୁନ୍ଦ୍ରା ବନ୍ଦରରୁ ଆଇଏମ୍‌ଇସି ମାର୍ଗ ଦେଇ ଗ୍ରୀସ୍‌ର ପିରାଇୟସ ବନ୍ଦରରେ ସାମଗ୍ରୀ ପହଞ୍ଚାଇବା ପାଇଁ ବହୁତ କମ୍‌ ସମୟ ଲାଗିବ। ବ୍ୟୟ ମଧ୍ୟ ହ୍ରାସ ପାଇବ।

ବିଶେଷଜ୍ଞଙ୍କ ସୂଚନା ଅନୁଯାୟୀ ସ୍ବେଜ କେନାଲ ତୁଳନାରେ ଆଇଏମଇସି ମାଧ୍ୟମରେ ୪୦ ପ୍ରତିଶତ କମ୍‌ ସମୟ ଲାଗିବ। ପରିବହନ ଖର୍ଚ୍ଚ ମଧ୍ୟ ୩୦ ପ୍ରତିଶତ ହ୍ରାସ ପାଇବ। ଭାରତରୁ ମାଲ୍‌ ଜାହାଜ କିମ୍ବା ରେଳ ମାଧ୍ୟମରେ ଗ୍ରୀସ୍‌ର ପିରାଇୟସ ବନ୍ଦରରେ ପହଞ୍ଚିବା ପାଇଁ ୭ ଦିନ ସମୟ ଲାଗିବ। ସ୍ବେଜ କେନାଲରେ ଏଥିପାଇଁ ୧୧ ଦିନ ଲାଗୁ ଥିଲା। ଏହି ମେଗା ପ୍ରକଳ୍ପରେ ଜଳପଥ ଦେଇ ୟୁଏଇରେ ମାଲ୍‌ ପହଞ୍ଚାଇବା ପାଇଁ ସାଉଦି ଆରବରେ ୧୨୦୦ କିମିର ରେଳ ଟ୍ରାକ୍‌ ପ୍ରସ୍ତୁତ ହୋଇସାରିଛି। ଏତିହାଦ ରେଳ ନେଟୱର୍କ ସାଉଦି ଆରବର ମରୁଭୂମି ଅତିକ୍ରମ କରିବ। ଏହା ସବୁଠାରୁ ବଡ଼ ରେଳ ନେଟୱର୍କ ହେବ। ୟୁଏଇର ଜିେବଲ ଅଲି ବନ୍ଦରରେ ମଧ୍ୟ ପ୍ରସ୍ତୁତି ଚାଲିଛି।

ଇଟାଲୀର ମେସିନା ବନ୍ଦରରେ ଭିତ୍ତିଭୂମି କାର୍ଯ୍ୟ ପାଇଁ ୭ ଲକ୍ଷ କୋଟି ଟଙ୍କାର ବ୍ୟୟ ଅଟକଳ ହୋଇଛି। ଖୁବଶୀଘ୍ର ଏହି କାର୍ଯ୍ୟ ଆରମ୍ଭ ହେବାର ସମ୍ଭାବନା ରହିଛି। ଏହି କରିଡରର ଅନେକ ଦୃଷ୍ଟିରୁ ଗୁରୁତ୍ବପୂର୍ଣ୍ଣ। ଏହା ସ୍ବେଜ କେନାଲଠାରୁ ଉତ୍ତମ ସାବ୍ୟସ୍ତ ହୋଇପାରେ। ଏହା ସଫଳ ହେଲେ ଭାରତ ପାଇଁ ଉପଯୋଗୀ ସାବ୍ୟସ୍ତ ହେବ। ପଶ୍ଚିମ ଦେଶ ଏବଂ ଭାରତ ଏହି କରିଡରକୁ ଆଗକୁ ବଢ଼ାଇବେ। ଏବେ ଭାରତ ପାଖରେ ସ୍ବେଜ କେନାଲ ମାର୍ଗ ରହିଛି। ମଧ୍ୟ-ଏସିଆରେ ଉତ୍ତ-ଦକ୍ଷିଣ କରିଡରର ବିକଳ୍ପ ଭାବେ ଆଇଏମ୍‌ଇସି ରହିଛି। ଉଭୟ ବିକଳ୍ପରେ ଭାରତର ଭୂମିକା ଗୁରୁତ୍ବପୂର୍ଣ୍ଣ ସାବ୍ୟସ୍ତ ହୋଇପାରେ। ଭାରତର ଆର୍ଥିକ ସ୍ଥିତି ଆହୁରି ସୁଦୃଢ଼ ହେବ। ୨୦୨୭ ସୁଦ୍ଧା ୟୁଏଇ ୮ ଲକ୍ଷ କୋଟି ଟଙ୍କାର କାରବାର ଲକ୍ଷ୍ୟ ରଖିଛି। ଏଥିରେ କରିଡର ଗୁରୁତ୍ବପୂର୍ଣ୍ଣ ସାବ୍ୟସ୍ତ ହେବ। ୟୁଏଇର ୧୦ରୁ ଅଧିକ ବନ୍ଦର ସାଉଦିର ରେଳ ନେଟୱର୍କ ସହ ସାମିଲ ହୋଇସାରିଛି। ୨୦୩୦ ସୁଦ୍ଧା ଏହାର ମାଲ୍‌ ପରିବହନ କ୍ଷମତା ୬ କୋଟି ଟନ୍‌ ହେବ ବୋଲି ଏତିହାଦ ପକ୍ଷରୁ କୁହାଯାଇଛି।