ନୂଆଦିଲ୍ଲୀ: କିଛି ସମୟ ପୂର୍ବରୁ ଯଦି ଆପଣଙ୍କ ମୋବାଇଲ୍ ଫୋନରେ ହଠାତ୍ ଏକ ବିପଦ ସଙ୍କେତ ଭଳି ଶବ୍ଦ ହୋଇଛି ଏବଂ ଏକ ଫ୍ଲାସ୍ ମେସେଜ୍ ଆସିଛି, ତେବେ ଏଥିପାଇଁ ଆଦୌ ଭୟଭୀତ ହୁଅନ୍ତୁ ନାହିଁ। ଭାରତ ସରକାରଙ୍କ ଦୂରସଞ୍ଚାର ବିଭାଗ ଏବଂ ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (NDMA) ମିଳିତ ଭାବେ ଦେଶବ୍ୟାପୀ ଏକ ନୂତନ ଜରୁରୀକାଳୀନ ଆଲର୍ଟ ସିଷ୍ଟମର ପରୀକ୍ଷଣ କରୁଛନ୍ତି। ଜନସାଧାରଣଙ୍କ ସୁରକ୍ଷାକୁ ଦୃଷ୍ଟିରେ ରଖି ସରକାର ଆଜି ସେଲ୍ ବ୍ରୋଡକାଷ୍ଟ ଆଲର୍ଟ ସିଷ୍ଟମ୍(Cell Broadcast Alert System) ର ସଫଳ ଡ୍ରିଲ୍ ବା ପରୀକ୍ଷଣ ଆରମ୍ଭ କରିଛନ୍ତି।

କ'ଣ ପାଇଁ ବାଜୁଛି ମୋବାଇଲରେ ଆଲାର୍ମ?
ଶନିବାର ଦିନ ଦେଶର ବିଭିନ୍ନ ପ୍ରାନ୍ତରେ ଥିବା ଲକ୍ଷ ଲକ୍ଷ ମୋବାଇଲ୍ ଉପଭୋକ୍ତାଙ୍କ ଫୋନକୁ ସରକାରଙ୍କ ତରଫରୁ ଏକ ଟେଷ୍ଟିଂ ମେସେଜ୍ ପଠାଯାଇଛି। ମେସେଜ୍ ଆସିବା ମାତ୍ରେ ଫୋନରେ ଏକ ଜୋରଦାର ସାଇରନ୍ ବାଜିବା ସହିତ ଫୋନ୍ ଭାଇବ୍ରେଟ୍ (କମ୍ପନ) ମଧ୍ୟ ହୋଇଥିଲା। ଏହି ମେସେଜରେ ସ୍ପଷ୍ଟ ଭାବରେ ଉଲ୍ଲେଖ କରାଯାଇଛି ଯେ, ଏହା ହେଉଛି ଏକ ପରୀକ୍ଷାମୂଳକ ମେସେଜ୍ ଏବଂ ଉପଭୋକ୍ତାମାନଙ୍କୁ କୌଣସି ପଦକ୍ଷେପ ନେବାର ଆବଶ୍ୟକତା ନାହିଁ। ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ଏବଂ ସରକାର ପ୍ରାକୃତିକ ବିପର୍ଯ୍ୟୟ ସମୟରେ କିପରି ସୂଚନା ଶୀଘ୍ର ପ୍ରଦାନ କରାଯିବ, ତାହାର ଯାଞ୍ଚ ପାଇଁ ଏହି ବ୍ୟବସ୍ଥାର ପରୀକ୍ଷଣ କରୁଛନ୍ତି।

କ'ଣ ଏହି ସେଲ୍ ବ୍ରୋଡକାଷ୍ଟ ଆଲର୍ଟ ସିଷ୍ଟମ୍?
ଏହି ସିଷ୍ଟମ୍ ହେଉଛି ଏକ ସମ୍ପୂର୍ଣ୍ଣ ସ୍ୱଦେଶୀ ଜ୍ଞାନକୌଶଳ ଯାହାକୁ ସେଣ୍ଟର ଫର୍ ଡେଭଲପମେଣ୍ଟ ଅଫ୍ ଟେଲିମେଟିକ୍ସ ଦ୍ୱାରା ବିକଶିତ କରାଯାଇଛି। ସମଗ୍ର ଭାରତ ପାଇଁ ପ୍ରସ୍ତୁତ କରାଯାଇଥିବା ସମନ୍ୱିତ ଆଲର୍ଟ ସିଷ୍ଟମ୍ ବା ସଚେତ୍ ର ଏହା ହେଉଛି ଏକ ପ୍ରମୁଖ ଅଂଶ। ଏହାର ମୁଖ୍ୟ ଉଦ୍ଦେଶ୍ୟ ହେଉଛି ଭୂମିକମ୍ପ, ସୁନାମି, ବଜ୍ରପାତ କିମ୍ବା ବନ୍ୟା ପରି ଭୟଙ୍କର ପ୍ରାକୃତିକ ବିପର୍ଯ୍ୟୟ ସମୟରେ ଲୋକଙ୍କୁ ତୁରନ୍ତ ସତର୍କ ସୂଚନା ପ୍ରଦାନ କରିବା ଏବଂ ସେମାନଙ୍କ ଜୀବନ ରକ୍ଷା କରିବା। ଏହାବ୍ୟତୀତ ଗ୍ୟାସ୍ ଲିକ୍ କିମ୍ବା ଅନ୍ୟାନ୍ୟ ଜରୁରୀକାଳୀନ ପରିସ୍ଥିତିରେ ମଧ୍ୟ ଏହା ଅତ୍ୟନ୍ତ ଉପଯୋଗୀ ସାବ୍ୟସ୍ତ ହେବ।

ସାଇଲେଣ୍ଟ ମୋଡରେ ଥିଲେ ମଧ୍ୟ ବାଜିବ ଆଲାର୍ମ
ସାଧାରଣତଃ ଆମେ ଅନେକ ସମୟରେ ମେସେଜ୍ ଆଲର୍ଟକୁ ନଜରଅନ୍ଦାଜ କରିଦେଇଥାଉ। କିନ୍ତୁ ଏହି ଆଲର୍ଟ ବ୍ୟବସ୍ଥା ସମ୍ପୂର୍ଣ୍ଣ ଭିନ୍ନ। ଆପଣଙ୍କ ମୋବାଇଲ୍ ଫୋନ୍ ସାଇଲେଣ୍ଟ୍ ବା ଡୁ ନଟ୍ ଡିଷ୍ଟର୍ବ  ମୋଡରେ ଥିଲେ ମଧ୍ୟ ଏହି ମେସେଜ୍ ଆସିବା ମାତ୍ରେ ଫୋନରେ ଉଚ୍ଚ ଶବ୍ଦରେ ଆଲାର୍ମ ବାଜିବ ଏବଂ ତାହା ସ୍କ୍ରିନରେ ଫ୍ଲାସ୍ ହୋଇ ଦେଖାଯିବ। ସରକାର ଏହି ବ୍ୟବସ୍ଥାର କ୍ଷମତା ଏବଂ ଦକ୍ଷତା ମାପିବା ପାଇଁ ବିଭିନ୍ନ ନେଟୱର୍କ ଏବଂ ଅଞ୍ଚଳରେ ଏହି ଟେଷ୍ଟିଂ ଜାରି ରଖିଛନ୍ତି। ଏହି ପରୀକ୍ଷଣ ପର୍ଯ୍ୟାୟରେ ଉପଭୋକ୍ତାମାନେ ଏକାଧିକ ଥର ମଧ୍ୟ ଏଭଳି ମେସେଜ୍ ପାଇପାରନ୍ତି ବୋଲି ସୂଚନା ଦିଆଯାଇଛି। ସିଷ୍ଟମ୍ ସମ୍ପୂର୍ଣ୍ଣ ରୂପେ ପ୍ରସ୍ତୁତ ହୋଇଗଲା ପରେ, ଏହା ସମସ୍ତ ମୋବାଇଲରେ ବିନା ବାଧାରେ କାମ କରିବ ଏବଂ ଦେଶର ବିପର୍ଯ୍ୟୟ ମୁକାବିଲା ବ୍ୟବସ୍ଥାକୁ ଆହୁରି ମଜବୁତ କରିବ।

ଭୁବନେଶ୍ବର : ରାଜ୍ୟରେ କାଳବୈଶାଖୀ ବର୍ଷା ଲାଗି ରହିଛି। ପାଗ ଠିକ୍‌ ରହିବା ସହ ଖରା  ହେଉଥିବା ବେଳେ ଅଚାନକ କଳାହାଣ୍ଡିଆ ମେଘ ଘୋଟିଆସୁଛି। ଆଉ ଏହାପରେ ବିଜୁଳି ଘଡଘଡି ସହ ପ୍ରବଳ ବର୍ଷା-ପବନ ହେଉଛି। ରାଜ୍ୟରେ ଏପରି ସ୍ଥିତି ଆହୁରି ୪ ଦିନ ଲାଗି ରହିବ। ତେବେ ଏହାରି ମଧ୍ୟରେ ଆଗାମୀ ଦୁଇ ଘଣ୍ଟା ମଧ୍ୟରେ ମୟୂରଭଞ୍ଜ ଏବଂ ଭଦ୍ରକ ଜିଲ୍ଲାର କିଛି ସ୍ଥାନରେ ବିଜୁଳି ସହିତ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଯେଉଁଥି ପାଇଁ ଏହି ଦୁଇ ଜିଲ୍ଲାକୁ ପାଣିପାଗ ବିଭାଗ ପକ୍ଷରୁ ରେଡ୍ ୱାର୍ଣ୍ଣିଂ ଜାରି କରାଯାଇଛି। ଏହି ଦୁଇ ଜିଲ୍ଲାରେ ଭୀଷଣ ବଜ୍ରପାତ ସହ ୬୦ରୁ ୭୦ କିମି ବେଗରେ ପବନ ବହିବା ସମ୍ଭାବନା ରହିଛି।

ସେହିପରି ଏହି ସମୟ ମଧ୍ୟରେ ରାଜ୍ୟର ଆଉ କିଛି ଅଞ୍ଚଳ ବିଜୁଳି ସହିତ ମଧ୍ୟମ ଧରଣର ଝଡ଼ବର୍ଷା ନେଇ ଆଲର୍ଟ ଜାରି କରିଛି ପାଣିପାଗ ବିଭାଗ। ବାଲେଶ୍ଵର, କନ୍ଧମାଳ, ରାୟଗଡ଼ା, ଗଞ୍ଜାମ, ଗଜପତି, ନବରଙ୍ଗପୁର, କଳାହାଣ୍ଡି, କେନ୍ଦୁଝର ଏବଂ କୋରାପୁଟ ଜିଲ୍ଲାର କିଛି ଅଂଶ ପ୍ରଭାବିତ ହେବାର ସମ୍ଭାବନା ରହିଛି। ପ୍ରବଳ ବର୍ଷା ସହ ଏହି ସବୁ ଅଞ୍ଚଳରେ ୪୦ ରୁ ୫୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି। ଯାହାକୁ ନେଇ ଏହି ସବୁ ଜିଲା ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି।

ଏଥି ସହିତ ସୁନ୍ଦରଗଡ଼, ଝାରସୁଗୁଡା, ଅନୁଗୁଳ, ନୂଆପଡା, ଯାଜପୁର, କେନ୍ଦ୍ରପଡା, ପୁରୀ ଏବଂ ଖୋର୍ଦ୍ଧା ଜିଲ୍ଲାର କିଛି ଅଂଶକୁ ପ୍ରଭାବିତ କରିବାର ସମ୍ଭାବନା ରହିଛି। ବିଜୁଳି ଘଡ଼ଘଡ଼ି ସହିତ ହାଲୁକାରୁ ମଧ୍ଯମ ଧରଣ ବର୍ଷା ହେବା ସହିତ ଘଣ୍ଟାପ୍ରତି ୩୦ ରୁ ୪୦ କିଲୋମିଟର ବେଗରେ ପବନ ବହିବାର ସମ୍ଭାବନା ଅଛି। ଯାହାକୁ ନେଇ ଏହି ଜିଲ୍ଲା ଗୁଡିକୁ ପାଣିପାଗ ବିଭାଗ ପକ୍ଷରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି।

ଭୁବନେଶ୍ବର : ଆପଣଙ୍କ ମୋବାଇଲ ଫୋନ୍‌ରେ ଆଜି ସକାଳୁ ହଠାତ ଏମରଜେନ୍ସି ସାଇରନ୍‌ ବାଜିବା ସହ ଏକ ମେସେଜ୍‌ ଆସୁଛି କି?  ଏମରଜେନ୍ସି ଆଲାର୍ମ ଆସିବା ସହ ଫୋନ୍‌ ଭାଇବ୍ରେସନ୍‌ ହେବା ପରେ ଆପଣ ନିଶ୍ଚୟ ଡରିଯାଉଥିବେ। ତେବେ ଏଥି ପାଇଁ କୌଣସି ଚିନ୍ତା କରିବାର ଆବଶ୍ୟକ ନାହିଁ କି ଡରିବାର ନାହିଁ। କାରଣ ଏହା ହେଉଛି ସରକାରଙ୍କ ଦ୍ବାରା କରାଯାଉଥିବା ଏକ ଟେଷ୍ଟ। ଅନେକ ମୋବାଇଲ୍ ବ୍ୟବହାରକାରୀଙ୍କୁ ସରକାରଙ୍କ ତରଫରୁ ଜରୁରୀକାଳୀନ ସତର୍କ ସୂଚନା ଦିଆଯାଇ ଏକ ଟେଷ୍ଟ କରାଯାଉଛି। ଆଣ୍ଡ୍ରଏଡ୍ ଏବଂ ଆଇଫୋନ୍ ଡିଭାଇସ୍ ଗୁଡିକରେ ଫ୍ଲାସ୍ ମେସେଜ୍ ଏବଂ ଜରୁରୀକାଳୀନ ଆଲର୍ଟ ସାଇରନ୍‌ ପଠାଯାଇଥିଲା।  ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (NDMA) ଦ୍ୱାରା ଦେଶର ନୂତନ ଜରୁରୀକାଳୀନ ଆଲର୍ଟ ସିଷ୍ଟମର ଏକ ପରୀକ୍ଷଣର ଏକ ଅଂଶ ଏହି ସତର୍କ ସୂଚନା।

କେନ୍ଦ୍ର ଟେଲିକମ୍ ବିଭାଗ ଓ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ ବିଭାଗ ମିଳିତ ଭାବେ ଏହି ଟେଷ୍ଟ କରୁଛି। ଏହି ବ୍ୟବସ୍ଥାରେ ଆଗକୁ ଲୋକଙ୍କୁ ସୁରକ୍ଷା ଓ ଜରୁରୀକାଳିନ ସୂଚନା ଦେବେ ସରକାର । ଟେଲିକମ୍ ଅପରେଟରଙ୍କ ଜରିଆରେ ଏହି ସତର୍କ ସୂଚନା ଦିଆଯାଉଛି । ଅଗଷ୍ଟରେ ପ୍ରଥମ ଥର ପାଇଁ ଏଭଳି ପରୀକ୍ଷା କରାଯାଇଥିଲା । ଏବେ ସୁଦ୍ଧା ୬ଥର ଏମିତି ପରୀକ୍ଷା କରାଯାଇଛି । ଟ୍ରାଏଲ ଭିତ୍ତିରେ ମୋବାଇଲକୁ ଆସୁଛି ଏପରି ମେସେଜ । ସମ୍ଭାବ୍ୟ ବିପତ୍ତି ବେଳେ ଲୋକଙ୍କୁ ଆଲର୍ଟ କରିବା ଲାଗି ଏହି ମେସେଜ ପଠାଯିବ, ଯେଉଁଥି ପାଇଁ ଟେଷ୍ଟିଙ୍ଗ କରାଯାଉଛି।

ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (NDMA) ଅନୁଯାୟୀ, ଆଲର୍ଟ ସିଷ୍ଟମର କାର୍ଯ୍ୟକାରିତାକୁ ଆକଳନ କରିବା ଏବଂ କୌଣସି ସମ୍ଭାବ୍ୟ ସମସ୍ୟା ଚିହ୍ନଟ କରିବା ପାଇଁ ଏକ ପରୀକ୍ଷଣର ଏହା ଏକ ଅଂଶ ଥିଲା। ସେଲ୍ ବ୍ରୋଡକାଷ୍ଟିଂ ସିଷ୍ଟମ୍ (CBS) ମାଧ୍ୟମରେ ମେସେଜ୍‌ ପଠାଯାଉଛି।  “ଏହା ହେଉଛି ଏକ ପରୀକ୍ଷଣ, ଟେଲି ଯୋଗାଯୋଗ ବିଭାଗ, ଭାରତ ସରକାରଙ୍କ ଦ୍ବାରା ଏମରଜେନ୍ସି ଆଲର୍ଟ ପଠାଯାଇ ପରୀକ୍ଷଣ କରାଯାଉଛି।

ଉଲ୍ଲେଖଯୋଗ୍ୟ, ସିବିଏସ୍ (CBS) ହେଉଛି ଏକ ପ୍ରଯୁକ୍ତିବିଦ୍ୟା ଯାହା ମୋବାଇଲ୍ ଅପରେଟରମାନଙ୍କୁ ଏକ ନିର୍ଦ୍ଦିଷ୍ଟ ଅଞ୍ଚଳରେ ସମସ୍ତ ଫୋନକୁ ମୋବାଇଲ୍ ନେଟୱାର୍କକୁ ଖାତିର ନକରି ବାର୍ତ୍ତା ପଠାଇବାକୁ ଅନୁମତି ଦେଇଥାଏ। ଜରୁରୀକାଳୀନ ଆଲର୍ଟ ପଠାଇବା ପାଇଁ ଏହା ଏକ ଆଦର୍ଶ ପ୍ରଯୁକ୍ତିବିଦ୍ୟା । ଆଲର୍ଟ ସିଷ୍ଟମ ସଠିକ୍ ଭାବରେ କାମ କରୁଛି ଏବଂ ପ୍ରକୃତ ଜରୁରୀକାଳୀନ ପରିସ୍ଥିତିରେ ଏହା ଲୋକଙ୍କ ନିକଟରେ ପହଞ୍ଚିବା ପାଇଁ NDMA ଏହି ପରୀକ୍ଷା କରୁଛି ।