ସମ୍ବଲପୁର: ଭୀମସାରରେ ହୃଦ୍‌‌ରୋଗ ଚିକିତ୍ସା ପାଇଁ ଷ୍ଟେମି ପ୍ରକ୍ରିୟା ଆରମ୍ଭ ହୋଇଛି। ଏହାଦ୍ବାରା ହୃଦ୍‌‌ରୋଗୀଙ୍କୁ ଉତ୍ତମ ଚିକିତ୍ସା ମିଳିବା ସହ ହୃଦ୍‌‌ରୋଗରେ ମୃତ୍ୟୁହାର ସଂଖ୍ୟା ହ୍ରାସ ପାଇବ ବୋଲି ଭୀମସାର ଅଧୀକ୍ଷକ ଡାକ୍ତର ଲାଲମୋହନ ନାଏକ କହିଛନ୍ତି।

ହୃଦ୍‌‌ଘାତ ଆକ୍ରାନ୍ତଙ୍କୁ ତୁରନ୍ତ ଚିକିତ୍ସା ସୁବିଧା ଯୋଗାଇ ନ ଦେଲେ, ରୋଗୀ ମୃତ୍ୟୁମୁଖରେ ପଡ଼ିଥାଏ। ଗ୍ରାମାଞ୍ଚଳରେ ଏଭଳି ସୁବିଧା ସୁଯୋଗ ପାଇବାରୁ ରୋଗୀମାନଙ୍କୁ ବହୁ ସମସ୍ୟା ହୋଇଥାଏ। ସହରାଞ୍ଚଳରେ ଘରୋଇ ଡାକ୍ତରଖାନାରେ ତୁରନ୍ତ ସେବା ଯୋଗାଇ ଦେବାର ସୁବିଧା ଥିବା ବେଳେ ଗ୍ରାମାଞ୍ଚଳ ରୋଗୀ ତୁରନ୍ତ ଏ ସୁବିଧା ପାଇ ପାରିନଥାଏ। ପ୍ରାଥମିକ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର, ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରଗୁଡ଼ିରେ ଇସିଜି ପରୀକ୍ଷା କରି ହୃଦ୍‌‌ଘାତ ହୋଇ ଥିବା ଜାଣିବା ପରେ ରୋଗୀଙ୍କୁ ସହରର ବଡ଼ ଡାକ୍ତରଖାନା ନେବାରେ ବିଳମ୍ବ ହୋଇଥାଏ। ଏପରିକି, ଡାକ୍ତରଖାନାରେ ତୁରନ୍ତ ଚିକିତ୍ସା ସୁବିଧା ମଧ୍ୟ ମିଳିବା ସମ୍ଭବପର ହୋଇନଥାଏ। ତେଣୁ ରୋଗୀ ପାଇଁ ତାହା ସଂକଟାପନ୍ନ ସ୍ଥିତି ସୃଷ୍ଟି କରେ। ତେଣୁ ଏହି ସମସ୍ୟା ଦୂର କରିବାକୁ ଷ୍ଟେମି ପ୍ରକ୍ରିୟା ସହାୟ ହୋଇପାରିବ ବୋଲିଡା. ନାଏକ କହିଛନ୍ତି।

ବିଶେଷକରି ଦୁର୍ଗମ ଗ୍ରାମାଞ୍ଚଳ ତଥା କୁଚିଣ୍ଡା, ରେଢ଼ାଖୋଲ ଉପଖଣ୍ଡ ଅଞ୍ଚଳରୁ ବୁର୍ଲା ଭୀମସାର ଚିକିତ୍ସା ପାଇଁ ଆସିଲେ ପ୍ରାୟ ୫ରୁ ୭ଘଣ୍ଟା ସମୟ ଲାଗି ଯାଇଥାଏ। ଭୀମସାରରେ ରୋଗୀ ପହଞ୍ଚିବା ବେଳକୁ ସ୍ଥିତି ଗମ୍ଭୀର ହୋଇଥାଏ। ଏଭଳି ସ୍ଥିତିରେ ରୋଗୀଙ୍କୁ ଭଲ କରିବା କଷ୍ଟକର ହୋଇପଡ଼େ। ତେଣୁ ସେମାନଙ୍କୁ ଷ୍ଟେମି ପଦ୍ଧତିରେ ଚିକିତ୍ସା କଲେ, ରୋଗୀଙ୍କୁ ତୁରନ୍ତ ଚିକିତ୍ସା ସୁବିଧା ଉପଲବ୍ଧ ହୋଇପାରିବ। ଉପଖଣ୍ଡ ଡାକ୍ତରଖାନା ଗୁଡ଼ିକରେ କୌଣସି ଡାକ୍ତର ଇସିଜି ପରୀକ୍ଷା କରିବା ପରେ ଏହାର ରିପୋର୍ଟ ସଙ୍ଗେସଙ୍ଗେ ବେଙ୍ଗାଲୁରୁସ୍ଥିତ ଏକ ଘରୋଇ କମ୍ପାନୀ ପାଖକୁ ପହଞ୍ଚିଯିବ। ସେଠାରେ ୨୪ ଘଣ୍ଟିଆ ବିଶେଷଜ୍ଞ ଡାକ୍ତରୀ ଟିମ୍‌‌ କାର୍ଯ୍ୟ କରୁଛନ୍ତି। ରିପୋର୍ଟ ଦେଖିବା ମାତ୍ରେ ରୋଗୀ କେଉଁ ଷ୍ଟେଜ୍‌‌ରେ ଆଟାକ୍‌‌ ହୋଇଛି, କେଉଁ ଔଷଧ ଦିଆଯିବ, ତାହାକୁ ନେଇ ପରାମର୍ଶ କରିବେ। ସ୍ଥାନୀୟ ଡାକ୍ତର ସେହି ଔଷଧ ଦେବା ପରେ ଭୀମସାରକୁ ଅଧିକ ଚିକିତ୍ସା ପାଇଁ ରୋଗୀଙ୍କୁ ସ୍ଥାନାନ୍ତରିତ କରିବେ। ପୂର୍ବରୁ ସୂଚନା ପାଇ ଭୀମସାରରେ ମଧ୍ୟ ଡାକ୍ତରୀ ଟିମ୍‌‌ ଅପେକ୍ଷା କରିଥିବେ। ଫଳରେ ରୋଗୀଙ୍କୁ ଉତ୍ତମ ଚିକିତ୍ସା ମିଳିବା ସହ ମୃତ୍ୟୁମୁଖରୁ ବଞ୍ଚାଇ ହେବ ବୋଲି ଡା. ନାଏକ କହିଛନ୍ତି।

ଗତ ମାସରେ ରାଜ୍ୟ ସରକାରଙ୍କ ଏନ୍‌‌ଏଚ୍‌‌ଏମ୍‌‌ ବିଭାଗ ପକ୍ଷରୁ ଏହି ସେବା ଲାଗୁ କରିବାକୁ ଚିଠି ଆସିଥିଲା। ଚିଠି ପାଇବା ପରେ ଦାୟିତ୍ୱରେ ଥିବା ଉକ୍ତ ସଂସ୍ଥା ସହିତ ଯୋଗାଯୋଗ କରି ସୁବିଧା ଯୋଗାଇ ଦିଆଯାଇଛି। ଭୀମସାରରେ ଉକ୍ତ ସଂସ୍ଥା ପକ୍ଷରୁ ସୁବିଧା ମଧ୍ୟ କରାଯାଇଛି। ପ୍ରାଥମିକ ସ୍ତରରେ ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟ, କୁଚିଣ୍ଡା, ରେଢ଼ାଖୋଲ ସବ୍‌‌ଡିଭିଜନ ଡାକ୍ତରଖାନା, ଯୁଯୁମୁରା, ବାମରା ବ୍ଲକ ଗୋବିନ୍ଦପୁର, ରେଙ୍ଗାଲି ବ୍ଲକ ଲଇଡ଼ା ଡାକ୍ତରଖାନା ସହ ବରଗଡ଼ ଜିଲ୍ଲାର ମୁଖ୍ୟ ଚିକିତ୍ସାଳୟ, ପଦ୍ମପୁର, ଅତାବିରା, ବରପାଲି, ପାଇକମାଳ, ସୋହେଲା ଡାକ୍ତରଖାନାକୁ ଭିମସାର ସହ ଯୋଗଯୋଗ କରାଯାଇଛି।

ସୂଚନାଯୋଗ୍ୟ ଯେ, ସମ୍ବଲପୁର ଭୀମସାରରେ ପଶ୍ଚିମ ଓଡ଼ିଶା ସହିତ ପଡ଼ୋଶୀ ରାଜ୍ୟ ଚିକିତ୍ସା ଉପରେ ନିର୍ଭର କରନ୍ତି। ପ୍ରତିଦିନ ହଜାର ହଜାର ସଂଖ୍ୟାରେ ରୋଗୀ ଆସୁଥିବା ବେଳେ ହୃଦ୍‌‌ରୋଗୀ ସଂଖ୍ୟା ମଧ୍ୟ ଶତାଧିକ ରହିଛି। ଏହି ପ୍ରକ୍ରିୟାରେ ଚିକିତ୍ସା ସେବା ଯୋଗାଇ ଦିଆଗଲେ ସମ୍ବଲପୁର ଓ ବରଗଡ଼ବାସୀଙ୍କୁ ଅଧିକ ସୁବିଧା ମିଳିପାରିବ ବୋଲି ସୂଚନା ମିଳିଛି।