ପୁରୀ: ଘରୋଇ କଳହକୁ ନେଇ ନିଶାଖୋର ସ୍ବାମୀର ଜଘନ୍ୟକାଣ୍ଡ । ସ୍ତ୍ରୀକୁ ପେଟ୍ରୋଲ ଢାଳି ନିଆଁ ଲଗାଇଦେଲା ନୃଶଂସ ସ୍ୱାମୀ । ପୁରୀ ଜିଲ୍ଲା କୁମ୍ଭାରପଡ଼ା ଥାନା ଅଞ୍ଚଳରୁ ସାମ୍ନାକୁ ଆସିଛି ଏପରି ଏକ ଅଭାବନୀୟ ଘଟଣା । ପାରିବାରିକ କଳହକୁ କେନ୍ଦ୍ର କରି ଜଣେ ମହିଳାଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇଦେବା ଭଳି ସାଂଘାତିକ ଅଭିଯୋଗ ହୋଇଛି। ଏହି ଘଟଣାରେ ପୋଲିସ ଅଭିଯୁକ୍ତ ସ୍ୱାମୀକୁ ଅଟକ ରଖି ପଚରାଉଚରା କରୁଛି।

ବୁଧବାର ରାତି ପ୍ରାୟ ୮ଟା ସମୟରେ ପୁରୀ ଜିଲ୍ଲା କୁମ୍ଭାରପଡ଼ା ଥାନା ଅନ୍ତର୍ଗତ ଡମ୍ ସାହିରେ ଏହି ଘଟଣା ଘଟିଛି। ପୀଡ଼ିତା ମହିଳାଙ୍କ ନାମ ସରୋଜିନୀ ମଲ୍ଲିକ (୩୦ ବର୍ଷ) ବୋଲି ଜଣାପଡିଛି। ଆଗ୍ନିକାଣ୍ଡରେ ସରୋଜିନୀଙ୍କ ଶରୀରର ପ୍ରାୟ ୮୦ ପ୍ରତିଶତ ଅଂଶ ପୋଡ଼ି ଯାଇଛି। ସରୋଜିନୀଙ୍କ ଚିତ୍କାର ଶୁଣି ପଡ଼ୋଶୀମାନେ ଘଟଣାସ୍ଥଳକୁ ଦୌଡ଼ି ଆସିଥିଲେ। ସେତେବେଳକୁ ସେ ସମ୍ପୂର୍ଣ୍ଣ ରୂପେ ନିଆଁରେ ଜଳୁଥିଲେ। ସ୍ଥାନୀୟ ଲୋକେ ତାଙ୍କୁ ତୁରନ୍ତ ଉଦ୍ଧାର କରି ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ତେବେ ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ ଡାକ୍ତରଙ୍କ ପରାମର୍ଶ କ୍ରମେ ଅଧିକ ଚିକିତ୍ସା ପାଇଁ ତାଙ୍କୁ ଆମ୍ବୁଲାନ୍ସ ଯୋଗେ ଭୁବନେଶ୍ୱର ସ୍ଥାନାନ୍ତର କରାଯାଇଛି।

ସ୍ଥାନୀୟ ଲୋକଙ୍କ କହିବା ଅନୁଯାୟୀ, ରକ୍ଷାବନ୍ଧନ ଅବସରରେ ମିଳିଥିବା ସୁଭଦ୍ରା ଯୋଜନା ଟଙ୍କାକୁ ନେଇ ସ୍ୱାମୀ ମଣ୍ଟି ମଲ୍ଲିକ ଏବଂ ସ୍ତ୍ରୀ ସରୋଜିନୀଙ୍କ ମଧ୍ୟରେ ଝଗଡ଼ା ହୋଇଥିଲା। ଏହି କଳହ ଉଗ୍ର ରୂପ ନେବାରୁ ମଣ୍ଟି ତାଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ତେବେ ପୋଲିସ ଏହି ଆରୋପକୁ ଏପର୍ଯ୍ୟନ୍ତ ସରକାରୀ ଭାବେ ସ୍ପଷ୍ଟ କରିନାହିଁ।

ଢେଙ୍କାନାଳ: ସୁଭଦ୍ରା ଟଙ୍କା ନଦେବାରୁ ସ୍ତ୍ରୀକୁ ହତ୍ୟା । ରାଜ୍ୟ ସରକାରଙ୍କ 'ସୁଭଦ୍ରା ଯୋଜନା'ରୁ ମିଳିଥିବା ଟଙ୍କା ନଦେବାରୁ ଜଣେ ମଦ୍ୟପ ସ୍ୱାମୀ ନିଜ ସ୍ତ୍ରୀକୁ ନିର୍ମମ ଭାବେ ହତ୍ୟା କରିଛି। କେବଳ ସେତିକି ନୁହେଁ, ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ଅଭିଯୁକ୍ତ ଜଣକ ପତ୍ନୀଙ୍କ ମୃତଦେହକୁ ଶୌଚାଳୟ ଟାଙ୍କିରେ ପୋତି ଦେଇଥିବା ଅଭିଯୋଗ ହୋଇଛି। ଏହି ଅଭାବନୀୟ ଘଟଣା ଢେଙ୍କାନାଳ ସଦର ଥାନା ଅନ୍ତର୍ଗତ ଐଣ୍ଡିପୁର ଜୁଆଙ୍ଗ ସାହିରେ ଘଟିଛି।

ପୋଲିସ ସୂତ୍ରରୁ ପ୍ରକାଶ ଯେ, ଅଭିଯୁକ୍ତ ସ୍ୱାମୀ ଜଣକ ନିୟମିତ ମଦ୍ୟପାନ କରୁଥିଲା। ସେ ନିଜ ସ୍ତ୍ରୀଙ୍କୁ ସୁଭଦ୍ରା ଯୋଜନା ବାବଦକୁ ପାଇଥିବା ଟଙ୍କା ମାଗିଥିଲା। ମାତ୍ର ସ୍ତ୍ରୀ ଟଙ୍କା ଦେବାକୁ ମନା କରିଦେବାରୁ ଉଭୟଙ୍କ ମଧ୍ୟରେ ପ୍ରବଳ ଯୁକ୍ତିତର୍କ ହୋଇଥିଲା। ଏଥିରେ ଉତକ୍ଷିପ୍ତ ହୋଇ ସ୍ୱାମୀ ଏକ ଠେଙ୍ଗା ଓ କୋଦାଳ ସାହାଯ୍ୟରେ ସ୍ତ୍ରୀକୁ ନିର୍ଧୁମ ପିଟିଥିଲା, ଯାହା ଫଳରେ ତାଙ୍କର ମୃତ୍ୟୁ ଘଟିଥିଲା। ହତ୍ୟା ପରେ ପାପ ଲୁଚାଇବାକୁ ଯାଇ ଅଭିଯୁକ୍ତ ମୃତଦେହକୁ ଘର ପାଖରେ ଥିବା ଏକ ଶୌଚାଳୟ ଟାଙ୍କି ଭିତରେ ପୋତି ଦେଇଥିଲା।

ଘଟଣା ସମ୍ପର୍କରେ ଖବର ପାଇ ଢେଙ୍କାନାଳ ସଦର ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଏକ ସାଇଣ୍ଟିଫିକ୍ ଟିମ୍ ମଧ୍ୟ ଘଟଣାସ୍ଥଳକୁ ଯାଇ ଆବଶ୍ୟକ ପ୍ରମାଣ ସଂଗ୍ରହ କରିଛି। ପୋଲିସ ଅଭିଯୁକ୍ତ ସ୍ୱାମୀକୁ ଗିରଫ କରିବା ସହ ପୂରା ଘଟଣାକ୍ରମକୁ ବୁଝିବା ପାଇଁ ଘଟଣାସ୍ଥଳରେ କ୍ରାଇମ୍ ସିନ୍ ରିକ୍ରିଏସନ୍ (ଅପରାଧ ଦୃଶ୍ୟର ପୁନଃନିର୍ମାଣ) କରିଛି। ଅନ୍ୟପକ୍ଷରେ, ଏହି ବିଭତ୍ସ ହତ୍ୟାକାଣ୍ଡକୁ ନେଇ ସ୍ଥାନୀୟ ଅଞ୍ଚଳରେ ଶୋକ ଓ ଭୟର ବାତାବରଣ ଖେଳିଯାଇଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ମଦ୍ୟପାନ ଏବଂ ପାରିବାରିକ କଳହ ଯୋଗୁଁ ଏଭଳି ଦୁଃଖଦ ଘଟଣା ଘଟିଛି। ପୋଲିସ ପକ୍ଷରୁ ଏହି ଘଟଣାର ଟିକିନିଖି ତଦନ୍ତ ଜାରି ରହିଥିବା ବେଳେ ଅଭିଯୁକ୍ତ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦିଆଯାଇଛି।

କେନ୍ଦୁଝର: ପାରିବାରିକ କଳହର କରୁଣ ପରିଣତି । କାଠଫାଳିଆରେ ପିଟି ସ୍ୱାମୀକୁ ହତ୍ୟା କଲା ସ୍ତ୍ରୀ । କେନ୍ଦୁଝର ଜିଲ୍ଲା ଘଟଗାଁ ଥାନା ବାଙ୍କପାଟୁଳି ଗ୍ରାମରେ ଘଟିଛି ଏଭଳି ଅଭାବନୀୟ ଘଟଣା । ସାମାନ୍ୟ ବଚସାକୁ କେନ୍ଦ୍ର କରି ଜଣେ ମହିଳା ନିଜ ସ୍ୱାମୀଙ୍କୁ କାଠ ଫାଳିଆରେ ପିଟିପିଟି ହତ୍ୟା କରିଥିବା ଅଭିଯୋଗ ହୋଇଛି। ଏହି ଘଟଣାରେ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତ ପତ୍ନୀ ଯାତ୍ରୀ ମୁଣ୍ଡାଙ୍କୁ ଗିରଫ କରିଛି। ମୃତକ ହେଲେ ଆନନ୍ଦ ମୁଣ୍ଡା । 

ସୂଚନା ଅନୁଯାୟୀ, ଗତ ୧୦ ତାରିଖ ରାତିରେ ଆନନ୍ଦ ମୁଣ୍ଡା ମଦ୍ୟପାନ କରି ଘରକୁ ଫେରିଥିଲେ। ଏହାକୁ ନେଇ ସ୍ୱାମୀ ଏବଂ ସ୍ତ୍ରୀଙ୍କ ମଧ୍ୟରେ ପ୍ରବଳ ଝଗଡ଼ା ଆରମ୍ଭ ହୋଇଥିଲା। ରାଗର ବଶବର୍ତ୍ତୀ ହୋଇ ଯାତ୍ରୀ ମୁଣ୍ଡା ଏକ କାଠ ଫାଳିଆରେ ସ୍ୱାମୀ ଆନନ୍ଦଙ୍କ ମୁଣ୍ଡକୁ ଶକ୍ତ ଆକ୍ରମଣ କରିଥିଲେ। ସ୍ୱାମୀଙ୍କ ଆର୍ତ୍ତ ଚିତ୍କାର ଶୁଣି ପଡ଼ୋଶୀମାନେ ତୁରନ୍ତ ଘଟଣାସ୍ଥଳରେ ଦୌଡ଼ି ଆସିଥିଲେ।

ସ୍ଥାନୀୟ ଲୋକେ ଗୁରୁତର ଅବସ୍ଥାରେ ଆନନ୍ଦଙ୍କୁ ଉଦ୍ଧାର କରି କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ଘଟଗାଁ ପୋଲିସ ଘଟଣାସ୍ଥଳରେ ଓ ହସ୍ପିଟାଲରେ ପହଞ୍ଚି ମୃତଦେହ ଜବତ କରିବା ସହ ଶବ ବ୍ୟବଚ୍ଛେଦ ପାଇଁ ପଠାଇଛି। ପୋଲିସ ଏହି ଘଟଣାରେ ହତ୍ୟାକାରୀ ପତ୍ନୀ ଯାତ୍ରୀ ମୁଣ୍ଡାଙ୍କୁ ଗିରଫ କରିଛି। ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତ ମହିଳା ଜଣକ ମୃତକଙ୍କ ଦ୍ୱିତୀୟ ପତ୍ନୀ ଥିଲେ। ପୋଲିସ ଏବେ ଘଟଣାର ଅଧିକ ତଦନ୍ତ ଜାରି ରଖିବା ସହ ପାରିପାର୍ଶ୍ୱିକ ସ୍ଥିତିର ଅନୁଧ୍ୟାନ କରୁଛି।

ଭୁବନେଶ୍ୱର: ଘରୋଇ କଳହର କରୁଣ ପରିଣତି । ପାରିବାରିକ କଳହ ସଂସାରକୁ ସମ୍ପୂର୍ଣ୍ଣ ଭାବେ ଉଜାଡି ଦେଇଛି। ସ୍ତ୍ରୀକୁ ବୀଭତ୍ସ ଭାବେ ହତ୍ୟା କରିବା ସହ ନିଜେ ବିଷ ପାନ କରି ହସ୍ପିଟାଲରେ ମରଣ ସହ ଲଢ଼େଇ କରୁଛି ସ୍ୱାମୀ । ଗୋଟିଏ ମାତ୍ର ପିଲା ନିଜ ମା’ ବାପାକୁ ନପାଇ ବାହୁନି କାନ୍ଦୁଛି। ସ୍ତ୍ରୀ ଉପରେ ପ୍ରତିଶୋଧ ଏତେ ଭୟଙ୍କର ଥିଲା ଯେ ସେ ଗାମୁଛାରେ ଗଳା ଦବାଇଲା, ବ୍ଲେଡ୍‌‌ରେ ହାତ କାଟିଲେ, ଶେଷରେ ବିଷ ଦେଇ ସ୍ତ୍ରୀକୁ ହତ୍ୟା କରିଛି। ରକ୍ତ ଜୁଡୁବୁଡୁ ଅବସ୍ଥାରେ ସ୍ତ୍ରୀ ଘର ଭିତରେ ପଡ଼ି ରହିଥିଲା ବେଳେ ସ୍ୱାମୀ ଘର ତାଲା ପକାଇ ବାହାରକୁ ଚାଲିଯାଇଥିଲା। ପୁଲିସ ଘଟଣାସ୍ଥଳରେ ପହଞ୍ଚି ପ୍ରଥମେ ମୃତଦେହକୁ ଜବତ କରିବା ସହ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ପୁଲିସ ସୂଚନା ମୁତାବକ ହତ୍ୟାକାଣ୍ଡର ଶିକାର ହୋଇଥିବା ମହିଳା ଜଣଙ୍କ ହେଲେ ମୋନିକା ଜେନା। ସେ ପ୍ରଦୀପ ଜେନାଙ୍କୁ ୭ ବର୍ଷ ତଳେ ବିବାହ କରିଥିଲେ। ଉଭୟଙ୍କ ଘର ନୟାଗଡ଼ ଜିଲ୍ଲା ଶରଣକୁଳ ଅଞ୍ଚଳରେ। ତାଙ୍କର ଗୋଟିଏ ଛୋଟ ପୁଅ ରହିଛି। ଉଭୟ ସ୍ୱାମୀ ଏବଂ ସ୍ତ୍ରୀଙ୍କ ମଧ୍ୟରେ ବିବାଦ ବହୁ ପୁରୁଣା। ବିବାଦ ଏତେ ତୀବ୍ର ହୋଇଯାଇଥିଲା ଯେ ମାମଲା ନୟାଗଡ଼ ଜିଲ୍ଲାର ଶରଣକୂଳ ଥାନାରେ ପହଞ୍ଚିଥିଲା। ଶରଣକୁଳ ଥାନା ପୁଲିସ ଏକ ପାରିବାରକ କଳହ ମାମଲା ରୁଜୁ କରିଥିଲା। ସ୍ତ୍ରୀ ମୋନିକା ଯେଉଁଠି ବି ରହୁଥିଲେ ସେଠାରେ ସେ ପହଞ୍ଚି ଗଣ୍ଡଗୋଳ କରୁଥିଲା। ଏପରିକି କିଛିଦିନ ତଳେ ପୁଅକୁ ବି ଜବରଦସ୍ତି ମୋନିକାଙ୍କ ଠାରୁ ନେଇ ଯାଇଥିଲା। ସ୍ୱାମୀଙ୍କ ଆକ୍ରୋଶର ଶିକାର ହେବା ଯୋଗୁଁ ଭୟରେ ବାରମ୍ବାର ଘର ବଦଳାଉଥିଲା। ରାଜଧାନୀରେ ଲୁଚି ବୁଲୁଥିଲେ।

ପ୍ରଦୀପ ଗୁଜୁରାଟରେ କାଚ ଫିଟିଂ କାମ କରନ୍ତି। ସେ କିଛିଦିନ ହେବ ଭୁବନେଶ୍ୱର ଫେରିଛନ୍ତି। ଏହା ଜାଣି ପାରି ମୋନିକା ଘର ବଦଳାଇ ଦେଇଥିଲେ। ୧୫ ଦିନ ତଳେ ମଞ୍ଚେଶ୍ୱର ଥାନା ଚକେଇସିଆଣି ଡିଏନ୍‌‌ କ୍ଲବ୍‌‌ ନିକଟସ୍ଥ ପ୍ରଶାନ୍ତୀ ଲେନ୍‌‌, ମାଳତୀ ଭବନ ପ୍ଲଟ୍‌‌ ନଂ. ୧୯୬/୫୯୪୪ରେ ମୋନିକା ତାଙ୍କ ମା’ଙ୍କ ସହ ଆସି ଭଡାରେ ରହୁଥିଲେ। ହେଲେ ପ୍ରଦୀପ ତାଙ୍କୁ ଖୋଜୁଥିଲେ। ସୋମବାର ସେ ମୋନିକାଙ୍କ ଚକେଇସିଆଣି ଠିକଣା ପାଇ ଯାଇଥିଲେ। ମୋନିକାଙ୍କ ମା’ ଲେବର କାମ କରିବାକୁ ବାହାରକୁ ଯାଇଥିଲା ବେଳେ ସେ ଆସି ପହଞ୍ଚି ଥିଲେ।
ପରେ ଉଭୟ କିଛି ସମୟ ପାଇଁ କଥାବାର୍ତ୍ତା ହୋଇଥିଲେ। ଏହାପରେ ପରେ ସ୍ୱାମୀ ପ୍ରଦୀପ ହତ୍ୟାକାଣ୍ଡର ଷଡ଼ଯନ୍ତ୍ର ରଚିଥିଲା। ଗାମୁଛାରେ ଗଳା ଦବାଇଲା, ବ୍ଲେଡ୍‌‌ରେ ହାତ କାଟିଲେ, ଶେଷରେ ସ୍ତ୍ରୀକୁ ବିଷ ଦେଇ ହତ୍ୟା କଲା। ଏହାପରେ ମାର୍କେଟରୁ ଏକ ନୂଆ ତାଲା ଆଣି ଘରେ ପକାଇ ଚାଲିଗଲା। ସନ୍ଦେହ ଜନକ ଅବସ୍ଥାରେ ନୂଆ ତାଲା ଦେଖି ଘର ମାଲିକ ପ୍ରଥମେ ତାଙ୍କ ମା’ଙ୍କୁ ଖବର ଦେଇଥିଲେ। ପରେ ତାଲା ଭଙ୍ଗି ଘରେ ପ୍ରବେଶ କରିବା ପରେ ମହିଳାଙ୍କ ରକ୍ତ ଯୁଡୁବୁଡୁ ମୃତ ଦେହ ମିଳିଥିଲା। ପୁଲିସ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି।

ଏନେଇ ସ୍ୱାମୀ ପ୍ରଦୀପକୁ ପୁଲିସ ଖୋଜାଖୋଜି କରିବା ଆରମ୍ଭ କରିଥିଲା। ଏହାପରେ ଜଣାପଡ଼ିଥିଲା ଯେ ପ୍ରଦୀପ ହତ୍ୟା କରିବା ପରେ ନିଜେ ବିଷ ପାନ କରି ହତ୍ୟା ଉଦ୍ୟମ କରିଥିଲା। ଗୁରୁତର ଅବସ୍ଥାରେ ପ୍ରଦୀପକୁ ମଞ୍ଚେଶ୍ୱର ଶିଳ୍ପାଞ୍ଚଳସ୍ଥିତ ଏକ ଅଟୋରୁ ଉଦ୍ଧାର କରାଯାଇଥିଲା। ପ୍ରଦୀପକୁ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ତେବେ ତଦନ୍ତ ପରେ ସ୍ପଷ୍ଟ ହେବ ସେ କେଉଁ କାରଣରୁ ହତ୍ୟା କରିଛନ୍ତି। 

ଭୁବନେଶ୍ୱର: ଦୀର୍ଘ ଦିନର ସଂଘର୍ଷ ପରେ ଶେଷରେ ଆଖି ବୁଜିଲେ ଓଡ଼ିଶା ମୋଟର ଯାନ ବିଭାଗ କନଷ୍ଟେବଳ ଆଶୁତୋଷ ମୃଦୁଙ୍ଗିଆ (୩୧)। ଗୁରୁତର ପୋଡ଼ାଜଳା ଆଘାତ ସହ ଭୁବନେଶ୍ୱର ସ୍ଥିତ ଏମ୍ସ (AIIMS) ରେ ଚିକିତ୍ସାଧୀନ ଥିବା ଅବସ୍ଥାରେ ଶୁକ୍ରବାର ସକାଳେ ତାଙ୍କର ଦେହାନ୍ତ ହୋଇଛି। ଗତ ଜୁନ ୫ ତାରିଖରେ ଏକ ଘରୋଇ କଳହକୁ କେନ୍ଦ୍ର କରି ତାଙ୍କ ପତ୍ନୀ ଓ ଶାଳକ ତାଙ୍କ ଦେହରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିବା ଅଭିଯୋଗ ହୋଇଥିଲା। ଗତ ଦୁଇ ଦିନ ଧରି ଅବସ୍ଥା ସଙ୍କଟାପନ୍ନ ହେବାରୁ ଡାକ୍ତରମାନେ ତାଙ୍କୁ ଭେଣ୍ଟିଲେଟର ସପୋର୍ଟରେ ରଖିଥିଲେ, କିନ୍ତୁ ଶେଷରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି।

ଛତ୍ରପୁରରେ କାର୍ଯ୍ୟରତ ଥିବା ଶ୍ରୀ ମୃଦୁଙ୍ଗିଆ ବ୍ରହ୍ମପୁର ପୋଲିସ କଲୋନୀ ସ୍ଥିତ ନିଜ ପତ୍ନୀଙ୍କ ସରକାରୀ ବାସଭବନକୁ ଯାଇଥିବା ବେଳେ ଏହି ଅଭାବନୀୟ ଘଟଣା ଘଟିଥିଲା। ପୋଲିସ ଓ ମାଜିଷ୍ଟ୍ରେଟଙ୍କୁ ଦେଇଥିବା ବୟାନ ଅନୁଯାୟୀ, ପତ୍ନୀ ସନ୍ଧ୍ୟା ନାୟକ ଏବଂ ଶାଳକ ଦିବସ ନାୟକ ମିଶି ତାଙ୍କ ଉପରେ ପେଟ୍ରୋଲ ଢାଳି ଦେଇଥିଲେ। ସେ ଖସି ପଳାଇବାକୁ ଚେଷ୍ଟା କରୁଥିବା ବେଳେ ଶାଳକ ଏକ ଦିଆସିଲି ମାରି ନିଆଁ ଲଗାଇ ଦେଇଥିଲେ। ନିଆଁ ଲାଗିଯିବା ପରେ ସେ ଜୀବନ ବିକଳରେ ସିଡ଼ିରୁ ତଳକୁ ଦୌଡ଼ି ଆସି ଜଣେ ପଡ଼ୋଶୀଙ୍କ ଘରେ ପଶିଯାଇଥିଲେ ବୋଲି ପ୍ରତ୍ୟକ୍ଷଦର୍ଶୀମାନେ କହିଛନ୍ତି। ତାଙ୍କୁ ଉଦ୍ଧାର କରିବାକୁ ଯାଇ ଜଣେ ହାବିଲଦାର ମଧ୍ୟ ଆହତ ହୋଇଥିଲେ। ଏହି ଆକ୍ରମଣରେ ଆଶୁତୋଷଙ୍କ ଶରୀରର ପ୍ରାୟ ୮୦ ପ୍ରତିଶତ ପୋଡ଼ି ଯାଇଥିଲା।

ଅନ୍ୟପଟେ ଆଶୁତୋଷଙ୍କ ମୃତ୍ୟୁ ପରେ ବ୍ରହ୍ମପୁର ପୋଲିସ ଉପରେ ବର୍ଷିଲେ ପରିବାର । ପତ୍ନୀ ସନ୍ଧ୍ୟା ଓ ଶାଳକଙ୍କ ବିରୋଧରେ ଆକ୍ସନ ନହେବାରୁ ଅସନ୍ତୋଷ କରିବା ସହ ଘଟଣାରେ ସିବିଆଇ ତଦନ୍ତ ଦାବି କଲେ ପରିବାର ଲୋକେ ।

ସୂଚନାଯୋଗ୍ୟ ଯେ, ଗତ ମେ ୧୮ ତାରିଖରେ ପତ୍ନୀଙ୍କ ଅଭିଯୋଗ କ୍ରମେ ପାରିବାରିକ ହିଂସା ମାମଲାରେ ଆଶୁତୋଷ ଗିରଫ ହୋଇଥିଲେ। ଜୁନ ୨ ତାରିଖରେ ସେ ଜାମିନରେ ମୁକୁଳିବାର ମାତ୍ର ତିନି ଦିନ ପରେ ଏହି ମର୍ମନ୍ତୁଦ ଘଟଣା ଘଟିଥିଲା। ତାଙ୍କ ମୃତ୍ୟୁ ପରେ ଘଟଣାଟି ଏବେ ଏକ ହତ୍ୟା ମାମଲାରେ ପରିଣତ ହୋଇଥିବାରୁ ପୋଲିସ ସମସ୍ତ ଦିଗରୁ ତଦନ୍ତ ପ୍ରକ୍ରିୟାକୁ ଆହୁରି ଜୋରଦାର କରିଛି।

ରାଜସ୍ଥାନର ଜୟପୁରରୁ ଏକ ହୃଦୟ ବିଦାରକ ଅପରାଧ ସାମ୍ନାକୁ ଆସିଛି। ଏଠାରେ ଜଣେ ମହିଳା ନିଜ ସ୍ୱାମୀଙ୍କୁ ତାଙ୍କ ଜନ୍ମଦିନରେ ନିର୍ମମ ଭାବେ ହତ୍ୟା କରିଛନ୍ତି। ହତ୍ୟା ପରେ ପରିଚୟ ଲୁଚାଇବା ପାଇଁ ମହିଳା ଜଣକ ନିଜ ନାବାଳକ ପୁଅ ସହ ମିଶି ଶବକୁ ଏକ ଅଳିଆ ବୁହା ଗାଡ଼ିରେ ନେଇ ଏକ ଖାଲି ପ୍ଲଟରେ ଫିଙ୍ଗି ଦେବା ସହ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ। ପୋଲିସ ଅଭିଯୁକ୍ତ ପତ୍ନୀଙ୍କୁ ହେପାଜତକୁ ନେବା ସହ ଘଟଣାର ତଦନ୍ତ ଜାରି ରଖିଛି।

ଜନ୍ମଦିନରେ ବୀଭତ୍ସ ହତ୍ୟାକାଣ୍ଡ

ସୂଚନା ଅନୁଯାୟୀ, ମୃତକ ଯୁବକ ଜଣକ ପଶ୍ଚିମବଙ୍ଗର ବାସିନ୍ଦା ବୋଲି ଜଣାପଡ଼ିଛି। ଅଭିଯୁକ୍ତ ପତ୍ନୀ ନୋକ୍ଷମ ପୋଲିସ ଆଗରେ ସ୍ୱୀକାର କରିଛନ୍ତି ଯେ, ତାଙ୍କ ସ୍ୱାମୀ ପ୍ରତିଦିନ ମଦ ପିଇ ତାଙ୍କୁ ମାଡ଼ ମାରୁଥିଲେ। ବୁଧବାର ରାତିରେ ସ୍ୱାମୀଙ୍କର ଜନ୍ମଦିନ ଥିବାବେଳେ ଉଭୟଙ୍କ ମଧ୍ୟରେ କୌଣସି କାରଣରୁ ବଚସା ହୋଇଥିଲା। ଏହି ଝଗଡ଼ା ଉଗ୍ର ରୂପ ନେବାରୁ ରାଗରେ ନୋକ୍ଷମ ଏକ ହାତୁଡ଼ି ସାହାଯ୍ୟରେ ସ୍ୱାମୀଙ୍କ ମୁଣ୍ଡକୁ ଆକ୍ରମଣ କରିଥିଲେ। ଗଭୀର ଆଘାତ ଲାଗିବାରୁ ସ୍ୱାମୀ ଚେତାଶୂନ୍ୟ ହୋଇ ତଳେ ପଡ଼ିଯାଇଥିଲେ ଏବଂ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା।

ପ୍ରମାଣ ନଷ୍ଟ ପାଇଁ ଅଳିଆ ଗାଡ଼ିର ବ୍ୟବହାର

ସ୍ୱାମୀଙ୍କ ମୃତ୍ୟୁ ପରେ ପ୍ରମାଣ ନଷ୍ଟ କରିବା ପାଇଁ ଅଭିଯୁକ୍ତ ମହିଳା ଏକ ଭୟଙ୍କର ଷଡ଼ଯନ୍ତ୍ର ରଚିଥିଲେ। ସେ ନିଜ ନାବାଳକ ପୁଅ ସହ ମିଶି ଶବକୁ ଏକ ପ୍ଲାଷ୍ଟିକ ବସ୍ତାରେ ବାନ୍ଧି ଅଳିଆ ବୁହା ଗାଡ଼ିରେ ପକାଇଥିଲେ। ପରେ କରଧନୀ ଥାନା ଅନ୍ତର୍ଗତ ନିବାରୁ ପୁଲିଆ ନିକଟସ୍ଥ ଏକ ଖାଲି ପ୍ଲଟ୍‌ର ବୁଦା ମୂଳରେ ଶବକୁ ଫିଙ୍ଗି ଦେଇଥିଲେ। ଶବର ପରିଚୟ ଯେପରି କେହି ପାଇପାରିବେ ନାହିଁ, ସେଥିପାଇଁ ତା' ଉପରେ ପେଟ୍ରୋଲ ଏବଂ ଅନ୍ୟାନ୍ୟ ଜ୍ୱଳନଶୀଳ ରାସାୟନିକ ପଦାର୍ଥ ଢାଳି ନିଆଁ ଲଗାଇ ଦେଇଥିଲେ। କିନ୍ତୁ ଶବଟି ସମ୍ପୂର୍ଣ୍ଣ ରୂପେ ଜଳି ନଥିଲା ଏବଂ ଅର୍ଦ୍ଧଦଗ୍ଧ ଅବସ୍ଥାରେ ରହିଯାଇଥିଲା।

ନିଖୋଜ ଅଭିଯୋଗ ଆଉ ପୋଲିସର ତଦନ୍ତ

ଗୁରୁବାର ସକାଳେ ସ୍ଥାନୀୟ ଲୋକେ ଏକ ଅର୍ଦ୍ଧଦଗ୍ଧ ମୃତଦେହ ଦେଖି ପୋଲିସକୁ ଖବର ଦେଇଥିଲେ। ଘଟଣାସ୍ଥଳରେ FSL ଟିମ୍ ଏବଂ ଡଗ୍ ସ୍କ୍ୱାଡ୍ ପହଞ୍ଚି ଛାନ୍‌ଭିନ୍ ଆରମ୍ଭ କରିଥିଲେ। ସେପଟେ, ପୋଲିସକୁ ବିଭ୍ରାନ୍ତ କରିବା ପାଇଁ ଅଭିଯୁକ୍ତ ପତ୍ନୀ ଗୁରୁବାର ସକାଳେ ଅନ୍ୟ ଏକ ଥାନାରେ ନିଜ ସ୍ୱାମୀଙ୍କ ନିଖୋଜ ହେବା ନେଇ ଏତଲା ଦେଇଥିଲେ। ତେବେ ପୋଲିସ ଆଖପାଖର ସିସିଟିଭି (CCTV) ଫୁଟେଜ୍ ଯାଞ୍ଚ କରିବା ବେଳେ ସନ୍ଦେହରେ ନୋକ୍ଷମଙ୍କୁ ପଚରାଉଚରା କରିଥିଲା। ପ୍ରଥମେ ସେ ପୋଲିସକୁ ବିଭ୍ରାନ୍ତ କରିବାକୁ ଚେଷ୍ଟା କରିଥିଲେ ମଧ୍ୟ ପରେ କଡ଼ା ଜେରା ଆଗରେ ନିଜ ଦୋଷ ସ୍ୱୀକାର କରିଥିଲେ।

ମହାରାଷ୍ଟ୍ରର ବୀଡ୍ (Beed) ଜିଲ୍ଲାରୁ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ଲଗାତାର ୩ଟି ଝିଅ ଜନ୍ମ ଦେଇଥିବାରୁ ଜଣେ ମହିଳାଙ୍କୁ ତାଙ୍କ ଶାଶୁଘର ଲୋକେ ଶାରୀରିକ ଓ ମାନସିକ ସ୍ତରରେ ନିର୍ଯାତନା ଦେଉଥିଲେ। ସ୍ୱାମୀଙ୍କୁ ଦ୍ୱିତୀୟ ବିବାହ ପାଇଁ ଅନୁମତି ଦେବାକୁ ତାଙ୍କ ଉପରେ ଚାପ ପକାଯାଉଥିଲା। ଶେଷରେ ଏହି ନିର୍ଯାତନା ସହି ନପାରି ମହିଳା ଜଣକ ବିଷ ପିଇ ଆତ୍ମହତ୍ୟା କରିଛନ୍ତି।

ଘଟଣାର ବିବରଣୀ

ମୃତ ମହିଳାଙ୍କ ନାମ ହେଉଛି ଭକ୍ତି ଅମୋଲ କୋରଡେ (୨୪ ବର୍ଷ)। ସେ ବୀଡ୍ ତାଲୁକା ଅନ୍ତର୍ଗତ ମ୍ହାଳସାପୁର ଗାଁର ବୋହୂ ଥିଲେ। ପୋଲିସରେ ଦିଆଯାଇଥିବା ଅଭିଯୋଗ ଅନୁଯାୟୀ, ଭକ୍ତିଙ୍କର ୩ଟି ଝିଅ ଥିଲେ। ଏହି କାରଣରୁ ବିଗତ ଅଢ଼େଇ ବର୍ଷ ହେବ ଶାଶୁଘର ଲୋକେ ତାଙ୍କୁ ଲଗାତାର ହଇରାଣ ହରକତ କରିଆସୁଥିଲେ। ସ୍ୱାମୀଙ୍କର ଦ୍ୱିତୀୟ ବିବାହ କରାଇବା ପାଇଁ ସେମାନେ ଭକ୍ତିଙ୍କୁ ବାଧ୍ୟ କରୁଥିଲେ। ଏପରିକି ଏକ ବଣ୍ଡ ପେପର ଉପରେ ଲିଖିତ ସମ୍ମତି ଦେବାକୁ ମଧ୍ୟ ତାଙ୍କ ଉପରେ ଚାପ ପକାଯାଉଥିଲା ଏବଂ ତାଙ୍କୁ ନିସ୍ତୁକ ମାଡ଼ ମରାଯାଉଥିଲା।

ଚିକିତ୍ସାଧୀନ ଅବସ୍ଥାରେ ମୃତ୍ୟୁ

ଏହି ଦୈନନ୍ଦିନ ଅତ୍ୟାଚାରରେ ଅତିଷ୍ଠ ହୋଇ ଭକ୍ତି ଗତ ଫେବୃଆରୀ ୨, ୨୦୨୬ ସକାଳେ ନିଜ ଘରେ କୌଣସି ବିଷାକ୍ତ ପଦାର୍ଥ ପିଇ ଦେଇଥିଲେ। ତାଙ୍କୁ ତୁରନ୍ତ ବୀଡ୍ ଜିଲ୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ତାଙ୍କୁ ଏକ ଘରୋଇ ଡାକ୍ତରଖାନାକୁ ନିଆଯାଇଥିଲେ ମଧ୍ୟ ଆର୍ଥିକ ଅନାଟନ କାରଣରୁ ପୁଣିଥରେ ସରକାରୀ ମେଡିକାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ଦୀର୍ଘ ଦିନ ଧରି ମୃତ୍ୟୁ ସହ ସଂଗ୍ରାମ କରିବା ପରେ ଗତ ମାର୍ଚ୍ଚ ୬, ୨୦୨୬ରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି।

ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ

ଭକ୍ତିଙ୍କ ମା' ଗଙ୍ଗୁବାଈ ପ୍ରଭୁ ଠୋକଳଙ୍କ ଏତଲା ଆଧାରରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ପିମ୍ପଳନେର ପୋଲିସ ଷ୍ଟେସନରେ ମୃତ ମହିଳାଙ୍କ ସ୍ୱାମୀ ଅମୋଲ ଅର୍ଜୁନ କୋରଡେ, ଶ୍ୱଶୁର ଅର୍ଜୁନ ସାଧୁ କୋରଡେ ଏବଂ ଶାଶୁ ଆଶାବାଈ ଅର୍ଜୁନ କୋରଡେଙ୍କ ବିରୋଧରେ ମାମଲା ରୁଜୁ କରାଯାଇଛି। ଭାରତୀୟ ନ୍ୟାୟ ସଂହିତା (BNS)ର ଧାରା ୧୦୮, ୧୧୫(୨), ୩(୫) ଏବଂ ୮୫ ଅନୁଯାୟୀ ଏକ ମାମଲା ପଞ୍ଜିକୃତ ହୋଇଛି। ପୋଲିସ ସବ୍-ଇନ୍ସପେକ୍ଟର ଅର୍ଜୁନ ଘୋଲୱାଲ ଏହି ଘଟଣାର ଅଧିକ ତଦନ୍ତ ଚଳାଇଛନ୍ତି।

ମହାରାଷ୍ଟ୍ରର ବୁଲଢାଣା ଜିଲ୍ଲାରୁ ଏକ ଅତ୍ୟନ୍ତ ସମ୍ବେଦନଶୀଳ ଘଟଣା ସାମ୍ନାକୁ ଆସିଛି। ଜଣେ ବ୍ୟକ୍ତି ନିଜ ସ୍ତ୍ରୀକୁ ମାରିବା ପାଇଁ ତିନି ତିନି ଥର ଖାଦ୍ୟରେ ବିଷ ଦେଇ ହତ୍ୟା ଉଦ୍ୟମ କରିଥିଲେ। ମାତ୍ର ସେଥିରେ ବିଫଳ ହେବା ପରେ, ସେ ଜଣେ ସୁପାରି କିଲରକୁ ୧ ଲକ୍ଷ ଟଙ୍କା ଦେଇ ଏକ ସୁଚିନ୍ତିତ ଦୁର୍ଘଟଣା ମାଧ୍ୟମରେ ନିଜ ସ୍ତ୍ରୀର ଜୀବନ ନେଇଛନ୍ତି।

ପୋଲିସ ସୂଚନା ଅନୁଯାୟୀ, ଅଭିଯୁକ୍ତ ପ୍ରକାଶ ଗାୱାଣ୍ଡେ ତାଙ୍କ ପତ୍ନୀ ବୃଷାଳୀଙ୍କୁ ହତ୍ୟା କରିବା ପାଇଁ ଏହି ଷଡ଼ଯନ୍ତ୍ର ରଚିଥିଲେ। ବୃଷାଳୀ ବୃତ୍ତିରେ ଜଣେ ଶିକ୍ଷୟିତ୍ରୀ ଥିଲେ। ମାର୍ଚ୍ଚ ୨ ତାରିଖରେ ଏହି ଘଟଣା ଘଟିଥିଲା, ଯେତେବେଳେ ବୃଷାଳୀ ନିଜ ସ୍କୁଟରରେ ଯାଉଥିବା ସମୟରେ ଏକ ଧଳା ରଙ୍ଗର ଟାଟା ଇଣ୍ଟ୍ରା ଗାଡ଼ି ତାଙ୍କୁ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ ସେ ଘଟଣାସ୍ଥଳରେ ହିଁ ପ୍ରାଣ ହରାଇଥିଲେ। ପ୍ରଥମେ ଏହା ଏକ ସାଧାରଣ ଦୁର୍ଘଟଣା ଭଳି ମନେ ହେଉଥିଲା।

ତଦନ୍ତ ସମୟରେ ପୋଲିସର ସନ୍ଦେହ ବୃଦ୍ଧି ପାଇଥିଲା ଯେତେବେଳେ ସେମାନେ ଏକ ନିର୍ଦ୍ଦିଷ୍ଟ ନମ୍ବର ପ୍ଲେଟ୍ (MH 28 BB 5753) ଥିବା ଗାଡ଼ିକୁ ଘଟଣାସ୍ଥଳ ଆଖପାଖରେ ବାରମ୍ବାର ଦେଖିବାକୁ ପାଇଲେ। ଅନୁସନ୍ଧାନରୁ ଜଣାପଡିଥିଲା ଯେ ଏହି ଗାଡ଼ିଟି ମନୀଷ ସୂର୍ଯ୍ୟବଂଶୀ ନାମକ ଜଣେ ବ୍ୟକ୍ତିଙ୍କର। ପୋଲିସ ତାଙ୍କୁ ଅଟକ ରଖି ପଚରାଉଚରା କରିବା ପରେ ସ୍ୱାମୀ ପ୍ରକାଶ ଗାୱାଣ୍ଡେଙ୍କର ସମ୍ପୂର୍ଣ୍ଣ ହତ୍ୟା ଯୋଜନା ବିଷୟରେ ଜଣାପଡିଥିଲା।

ଏକ ଲକ୍ଷ ଟଙ୍କାର ସୁପାରି

ପୋଲିସ ଅଧିକାରୀଙ୍କ କହିବା ଅନୁଯାୟୀ, ପ୍ରକାଶ ତାଙ୍କ ପତ୍ନୀଙ୍କୁ ହତ୍ୟା କରିବା ପାଇଁ ମଙ୍ଗେଶ ଚୁଲକରଙ୍କୁ ୧ ଲକ୍ଷ ଟଙ୍କାର ସୁପାରି ଦେଇଥିଲେ। ମଙ୍ଗେଶ ଏହି କାମ ପାଇଁ ଡ୍ରାଇଭର ସୂର୍ଯ୍ୟବଂଶୀଙ୍କୁ ନିୟୋଜିତ କରିଥିଲେ। ପୂର୍ବରୁ ପ୍ରକାଶ ତିନିଥର ବିଷ ଦେଇ ବୃଷାଳୀଙ୍କୁ ହତ୍ୟା କରିବାକୁ ଚେଷ୍ଟା କରିଥିଲେ ମଧ୍ୟ ସେଥିରେ ସଫଳ ହୋଇପାରିନଥିଲେ। ପୋଲିସ ବର୍ତ୍ତମାନ ସ୍ୱାମୀ ସମେତ ତିନି ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କୁ ତିନି ଦିନିଆ ପୋଲିସ ହେପାଜତକୁ ପଠାଯାଇଛି। ପାରିବାରିକ କଳହ ଯୋଗୁଁ ଏହି ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଉଥିଲେ ମଧ୍ୟ ଅଧିକ ତଦନ୍ତ ଜାରି ରହିଛି।

ମଧ୍ୟପ୍ରଦେଶର ରାଜଧାନୀ ଭୋପାଳରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଏଠାରେ ଜଣେ ମହିଳାଙ୍କ ରକ୍ତ ଜୁଡୁବୁଡୁ ମୃତଦେହ ତାଙ୍କ ଘର ବାହାରେ ପଡ଼ିଥିବା ଅବସ୍ଥାରେ ଉଦ୍ଧାର କରାଯାଇଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଘଟଣାର ପୂର୍ବ ରାତିରେ ମହିଳା ଏବଂ ତାଙ୍କ ସ୍ୱାମୀଙ୍କ ମଧ୍ୟରେ ମୋବାଇଲ ଫୋନ ବ୍ୟବହାରକୁ ନେଇ ଝଗଡ଼ା ହୋଇଥିଲା। ପୋଲିସ ବର୍ତ୍ତମାନ ଏହାକୁ ଆତ୍ମହତ୍ୟା ବୋଲି ସନ୍ଦେହ କରୁଥିଲେ ମଧ୍ୟ ହତ୍ୟା ଦିଗରେ ମଧ୍ୟ ତଦନ୍ତ ଜାରି ରଖିଛି।

ଘଟଣାଟି କ’ଣ?

ଭୋପାଳର କଜଲିଖେଡ଼ା ଥାନା ଅନ୍ତର୍ଗତ ‘ଦେବ ଗ୍ରୀନ୍ ସିଟି’ କଲୋନୀରେ ଏହି ଘଟଣା ଘଟିଛି। ମୃତ ମହିଳାଙ୍କ ନାମ ସୋନମ ପ୍ରଜାପତି (୩୩) ବୋଲି ଜଣାପଡ଼ିଛି। ସୋମବାର ସକାଳେ ସ୍ଥାନୀୟ ଲୋକେ ସୋନମଙ୍କ ମୃତଦେହ ଘର ବାହାରେ ଥିବା ପଥର ଉପରେ ପଡ଼ିଥିବା ଦେଖିବାକୁ ପାଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ମହିଳା ଜଣକ ଦ୍ୱିତୀୟ ମହଲାରୁ ତଳକୁ ଡେଇଁ ପଡ଼ିଥିବା ପୋଲିସ ଅନୁମାନ କରୁଛି।

ମୋବାଇଲ ପାଇଁ ସ୍ୱାମୀ-ସ୍ତ୍ରୀଙ୍କ ମଧ୍ୟରେ କଳହ

ପୋଲିସର ପଚରାଉଚରା ବେଳେ ମୃତକଙ୍କ ସ୍ୱାମୀ ଜିତେନ୍ଦ୍ର ପ୍ରଜାପତି କହିଛନ୍ତି ଯେ ରବିବାର ବିଳମ୍ବିତ ରାତିରେ ସୋନମ ତାଙ୍କୁ ମୋବାଇଲ ମାଗିଥିଲେ। କିନ୍ତୁ ଜିତେନ୍ଦ୍ର ଫୋନ ଦେବାକୁ ମନା କରି ଶୋଇପଡ଼ିଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ସକାଳେ ଉଠିବା ବେଳକୁ ସୋନମ ଘରେ ନଥିଲେ ଏବଂ ପରେ ତାଙ୍କ ମୃତଦେହ ବାହାରେ ମିଳିଥିଲା। ପଡ଼ୋଶୀ ଏବଂ ପିଲାମାନଙ୍କ କହିବା ଅନୁଯାୟୀ, ଦମ୍ପତିଙ୍କ ମଧ୍ୟରେ ପ୍ରାୟତଃ ଝଗଡ଼ା ଲାଗିରହୁଥିଲା। ଏପରିକି କିଛି ଦିନ ପୂର୍ବରୁ ସନ୍ଦେହ କରି ଜିତେନ୍ଦ୍ର ସୋନମଙ୍କ ଏକ ମୋବାଇଲ ଫୋନ ଭାଙ୍ଗି ଦେଇଥିଲେ।

ପୋଲିସର ତଦନ୍ତ ଜାରି

କଜଲିଖେଡ଼ା ଥାନା ଅଧିକାରୀ ପଲ୍ଲବୀ ପାଣ୍ଡେଙ୍କ ସୂଚନା ଅନୁସାରେ, ବର୍ତ୍ତମାନ ଏହା ଏକ ଆତ୍ମହତ୍ୟା ମାମଲା ଭଳି ମନେହେଉଛି, କିନ୍ତୁ ପୋଲିସ ସମସ୍ତ ଦିଗକୁ ଧ୍ୟାନରେ ରଖି ତଦନ୍ତ କରୁଛି। ଫୋରେନସିକ ଟିମ୍ ଘଟଣାସ୍ଥଳରୁ ରକ୍ତ ନମୁନା ଏବଂ ଅନ୍ୟାନ୍ୟ ପ୍ରମାଣ ସଂଗ୍ରହ କରିଛନ୍ତି। ପୋଷ୍ଟମର୍ଟମ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି ପୋଲିସ କହିଛି।

ଉତ୍ତରପ୍ରଦେଶର ବରେଲି ଜିଲ୍ଲାରୁ ଏକ ଅତ୍ୟନ୍ତ ଆଶ୍ଚର୍ଯ୍ୟଜନକ ଏବଂ ଦୁଃଖଦ ଖବର ସାମ୍ନାକୁ ଆସିଛି। ସାମାନ୍ୟ ଘରୋଇ କଳହରୁ ଜଣେ ମହିଳା ନିଜ ଝିଅ ସହ ମିଶି ନିଜ ସ୍ୱାମୀଙ୍କୁ ପିଟି ପିଟି ହତ୍ୟା କରିଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି। ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତ ମା’ ଓ ଝିଅକୁ ଗିରଫ କରିଛି।

ମିଛର ଆଶ୍ରୟ ନେଇଥିଲେ ହତ୍ୟାକାରୀ

ସୂଚନା ଅନୁଯାୟୀ, ଘଟଣାଟି ବରେଲିର ଇଜ୍ଜତନଗର ଥାନା ଅନ୍ତର୍ଗତ ଛୋଟୀ ବିହାର ଅଞ୍ଚଳରେ ଘଟିଛି। ମୃତକଙ୍କ ନାମ ବାଲକରାମ (୪୮) ବୋଲି ଜଣାପଡିଛି। ରବିବାର ଦିନ ବାଲକରାମ ଏକ ବିବାହ ଉତ୍ସବରେ ଯୋଗଦେବାକୁ ଯାଇଥିଲେ ଏବଂ ସେଠାରୁ ମଦ୍ୟପାନ କରି ଘରକୁ ଫେରିଥିଲେ। ଘରେ ପହଞ୍ଚିବା ପରେ କୌଣସି କାରଣରୁ ତାଙ୍କର ପତ୍ନୀ ରେଖା (୪୬) ଏବଂ ଝିଅ ପିଙ୍କି (୩୦)ଙ୍କ ସହ ଯୁକ୍ତିତର୍କ ହୋଇଥିଲା। ଏଥିରେ ଉତ୍ତ୍ୟକ୍ତ ହୋଇ ମା’ ଓ ଝିଅ ମିଶି ବାଲକରାମଙ୍କୁ ବାଡ଼ିରେ ନିର୍ମମ ଭାବେ ପିଟିବା ଆରମ୍ଭ କରିଥିଲେ, ଯାହା ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା।

ପୋଷ୍ଟମର୍ଟମ ରିପୋର୍ଟ ଖୋଲିଲା ଗୁମର

ହତ୍ୟାକାଣ୍ଡକୁ ଲୁଚାଇବା ପାଇଁ ଅଭିଯୁକ୍ତ ମା’-ଝିଅ ଏକ ନାଟକ ରଚିଥିଲେ। ସେମାନେ ପ୍ରଚାର କରିଥିଲେ ଯେ ବାଲକରାମ ସିଡ଼ିରୁ ଖସିପଡ଼ି ପ୍ରାଣ ହରାଇଛନ୍ତି। କିନ୍ତୁ ପୋଲିସର ସନ୍ଦେହ ହେବାରୁ ମୃତଦେହକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଥିଲା। ପୋଷ୍ଟମର୍ଟମ ରିପୋର୍ଟରେ ମୃତକଙ୍କ ଶରୀରରେ ପ୍ରାୟ ୧୫ଟି ଗୁରୁତର ଆଘାତ ଚିହ୍ନ ମିଳିଥିଲା ଏବଂ ମୃତ୍ୟୁର କାରଣ ରକ୍ତସ୍ରାବ ଓ ଶକ୍ (Shock and Hemorrhage) ବୋଲି ସ୍ପଷ୍ଟ ହୋଇଥିଲା।

ପୋଲିସର କାର୍ଯ୍ୟାନୁଷ୍ଠାନ

ମୃତକଙ୍କ ପୁତୁରା ପୁଷ୍କର ସାଗରଙ୍କ ଅଭିଯୋଗ କ୍ରମେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ପୋଲିସ ହତ୍ୟାରେ ବ୍ୟବହୃତ ବାଡ଼ି ଜବତ କରିବା ସହ ଅଭିଯୁକ୍ତ ପତ୍ନୀ ରେଖା ଏବଂ ଝିଅ ପିଙ୍କିଙ୍କୁ ଗିରଫ କରି ଜେଲ ପଠାଇଛି। ପୋଲିସର କହିବା ମୁତାବକ, ଉଭୟ ଅଭିଯୁକ୍ତ ନିଜର ଦୋଷ ସ୍ୱୀକାର କରିଛନ୍ତି।

ଆନ୍ଧ୍ରପ୍ରଦେଶର ଗୁଣ୍ଟୁର ଜିଲ୍ଲାରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ସାମାନ୍ୟ ଟିଭି ଭଲ୍ୟୁମକୁ ନେଇ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ଆରମ୍ଭ ହୋଇଥିବା ଝଗଡ଼ା ଶେଷରେ ହତ୍ୟାକାଣ୍ଡର ରୂପ ନେଇଛି। ଟିଭିର ଶବ୍ଦ କମାଇବାକୁ କହିବାରୁ ଉତ୍ତ୍ୟକ୍ତ ହୋଇ ସ୍ତ୍ରୀ ନିଜ ସ୍ୱାମୀଙ୍କୁ ଛୁରୀ ଭୁଷି ହତ୍ୟା କରିଥିବା ଅଭିଯୋଗ ହୋଇଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି।

ସାମାନ୍ୟ କଥାରୁ ଭୟଙ୍କର ପରିଣାମ

ପୋଲିସ ସୂଚନା ଅନୁଯାୟୀ, ମୃତକ ଜଣକ ହେଲେ ଶେଖ ଅହମ୍ମଦ (୨୭), ଯିଏକି ପେଶାରେ ଜଣେ ଏସି ମେକାନିକ ଥିଲେ। ସେ ତାଙ୍କ ପତ୍ନୀ କ୍ରାନ୍ତିଙ୍କ ସହ ମଙ୍ଗଳଗିରି ସ୍ଥିତ ଟିଡକୋ ହାଉସିଂ କଲୋନୀରେ ରହୁଥିଲେ। ରିପୋର୍ଟ ଅନୁସାରେ, ଅହମ୍ମଦ ରମଜାନ ଉପବାସରେ ଥିଲେ ଏବଂ କାମ ସାରି ଘରକୁ ଫେରିବା ପରେ ବିଶ୍ରାମ ନେଉଥିଲେ। ଏହି ସମୟରେ ତାଙ୍କ ପତ୍ନୀ ଜୋରରେ ଟିଭି ଚଳାଇଥିଲେ। ଅହମ୍ମଦ ଟିଭିର ସାଉଣ୍ଡ କମାଇବାକୁ କହିବାରୁ ଉଭୟଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା।

ଘଟଣାର ସମ୍ପୂର୍ଣ୍ଣ ବିବରଣୀ

ଝଗଡ଼ା ବଢିବାରୁ ରାଗିଯାଇ କ୍ରାନ୍ତି ଘରେ ଥିବା ଏକ ଛୁରୀ ଆଣି ଅହମ୍ମଦଙ୍କ ଉପରେ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ପଡ଼ୋଶୀମାନେ ତାଙ୍କୁ ତୁରନ୍ତ ବିଜୟୱାଡା ସରକାରୀ ଡାକ୍ତରଖାନାକୁ ନେଇଥିଲେ ମଧ୍ୟ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସୂଚନାଯୋଗ୍ୟ ଯେ, କ୍ରାନ୍ତିଙ୍କର ଏହା ଦ୍ୱିତୀୟ ବିବାହ ଥିଲା ଏବଂ ତାଙ୍କ ପ୍ରଥମ ସ୍ୱାମୀ ବର୍ତ୍ତମାନ ଜେଲରେ ଅଛନ୍ତି। ପ୍ରାୟ ଦେଢ଼ ବର୍ଷ ତଳେ ଅହମ୍ମଦ ଏବଂ କ୍ରାନ୍ତିଙ୍କ ବିବାହ ହୋଇଥିଲା।

ପୋଲିସର ତଦନ୍ତ ଜାରି

ଘଟଣା ସମ୍ପର୍କରେ ଖବର ପାଇ ମଙ୍ଗଳଗିରି ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି। ମୃତକଙ୍କ ମା’ଙ୍କ ଅଭିଯୋଗ ଆଧାରରେ ପୋଲିସ ଏକ ହତ୍ୟା ମାମଲା ରୁଜୁ କରି ଅଭିଯୁକ୍ତ ପତ୍ନୀ କ୍ରାନ୍ତିଙ୍କୁ ଅଟକ ରଖି ପଚରାଉଚରା କରୁଛି।

ମହମ୍ମଦ ଶାମି ଏବଂ ତାଙ୍କ ପତ୍ନୀ ହାସିନ ଜାହାନଙ୍କ ମଧ୍ୟରେ ଚାଲିଥିବା ବିବାଦ ଏବେ ଏକ ନୂଆ ମୋଡ଼ ନେଇଛି। ହାସିନ ଜାହାନ ନିଜର ଭରଣପୋଷଣ ରାଶି ବୃଦ୍ଧି କରିବା ସହ କୋଲକାତାରେ ଚାଲିଥିବା ମାମଲାକୁ ଦିଲ୍ଲୀ ସ୍ଥାନାନ୍ତର କରିବା ପାଇଁ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଏହି ଆବେଦନ ଉପରେ ଶୁଣାଣି କରି ଜଷ୍ଟିସ ମନୋଜ ମିଶ୍ର ଏବଂ ଜଷ୍ଟିସ ଉଜ୍ଜ୍ୱଳ ଭୁୟାଁଙ୍କ ଖଣ୍ଡପୀଠ ଶାମି ଏବଂ ପଶ୍ଚିମବଙ୍ଗ ସରକାରଙ୍କୁ ନୋଟିସ ଜାରି କରି ଜବାବ ମାଗିଛନ୍ତି।

୪ ଲକ୍ଷ ନୁହେଁ ୧୦ ଲକ୍ଷ ଟଙ୍କା ଦାବି

ବର୍ତ୍ତମାନ ଶାମି ନିଜ ପତ୍ନୀ ଏବଂ ଝିଅଙ୍କ ପାଇଁ ମାସିକ ୪ ଲକ୍ଷ ଟଙ୍କାର ଅନ୍ତରୀଣ ଭରଣପୋଷଣ ପ୍ରଦାନ କରୁଛନ୍ତି। ଗତ ବର୍ଷ କୋଲକାତା ହାଇକୋର୍ଟ ଏହି ରାଶି ଧାର୍ଯ୍ୟ କରିଥିଲେ। ମାତ୍ର ଏହି ଅର୍ଥରେ ସେ ସନ୍ତୁଷ୍ଟ ନାହାନ୍ତି ଏବଂ ଏହାକୁ ମାସିକ ୧୦ ଲକ୍ଷ ଟଙ୍କାକୁ ବୃଦ୍ଧି କରିବା ପାଇଁ ସେ ସର୍ବୋଚ୍ଚ ନ୍ୟାୟାଳୟରେ ଦାବି କରିଛନ୍ତି। ହାସିନଙ୍କ ମତରେ, ଶାମିଙ୍କ ଆୟ ତୁଳନାରେ ଏହି ରାଶି ଯଥେଷ୍ଟ ନୁହେଁ।

ଦିଲ୍ଲୀକୁ ମାମଲା ସ୍ଥାନାନ୍ତର ପାଇଁ ଆବେଦନ

ହାସିନ ଜାହାନ ସୁପ୍ରିମକୋର୍ଟରେ ଏକ ସ୍ଥାନାନ୍ତର ଆବେଦନ (Transfer Petition) ଦାଖଲ କରିଛନ୍ତି। ସେ କୋଲକାତାରେ ଚାଲିଥିବା ଘରୋଇ ହିଂସା ଏବଂ ଭରଣପୋଷଣ ମାମଲାକୁ ଦିଲ୍ଲୀର କୌଣସି ଅଦାଲତକୁ ସ୍ଥାନାନ୍ତର କରିବାକୁ ଚାହୁଁଛନ୍ତି। ଏହି ବିଷୟକୁ ଗୁରୁତ୍ୱର ସହ ଗ୍ରହଣ କରି ଶୀର୍ଷ ଅଦାଲତ ଶାମିଙ୍କୁ ତାଙ୍କର ପକ୍ଷ ରଖିବାକୁ କହିଛନ୍ତି। ଏହାଫଳରେ ପଡ଼ିଆ ବାହାରେ ଶାମିଙ୍କ ପାଇଁ ଆଇନଗତ ସମସ୍ୟା ଜଟିଳ ହେବାରେ ଲାଗିଛି।

ଶାମି ଏବଂ ହାସିନ ଜାହାନ ୨୦୧୪ ମସିହା ଏପ୍ରିଲ ୭ ତାରିଖରେ ବିବାହ କରିଥିଲେ। ୨୦୧୫ରେ ତାଙ୍କର ଏକ କନ୍ୟା ସନ୍ତାନ ଜନ୍ମ ହୋଇଥିଲା। କିନ୍ତୁ କିଛି ବର୍ଷ ପରେ ଉଭୟଙ୍କ ମଧ୍ୟରେ ବିବାଦ ଆରମ୍ଭ ହୋଇଥିଲା। ୨୦୧୮ରେ ହାସିନ, ଶାମି ଓ ତାଙ୍କ ପରିବାର ବିରୋଧରେ ଶାରୀରିକ ଓ ମାନସିକ ନିର୍ଯାତନା ଅଭିଯୋଗ ଆଣି ଘରୋଇ ହିଂସା ଅଧିନିୟମ ଅନୁଯାୟୀ ମାମଲା ରୁଜୁ କରିଥିଲେ। ଏହି ମାମଲାରେ ଯାଦବପୁର ଥାନାରେ ଏକ ଏଫଆଇଆର ମଧ୍ୟ ରୁଜୁ ହୋଇଥିଲା।

୨୦୧୯ ଅଗଷ୍ଟରେ ଆଲିପୁରର ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ ଶାମି ଓ ତାଙ୍କ ପରିବାର ବିରୋଧରେ ଗିରଫ ପରୱାନା ଜାରି କରିଥିଲେ, ଯାହାକୁ ପରବର୍ତ୍ତୀ ସମୟରେ ଏକ ସେସନ୍ସ କୋର୍ଟ ସ୍ଥଗିତ ରଖିଥିଲେ। ବର୍ତ୍ତମାନ ଏହି ଆଇନଗତ ଲଢ଼େଇ ସୁପ୍ରିମକୋର୍ଟରେ ପହଞ୍ଚିଥିବାରୁ ଏହାର ପରିଣାମ କଣ ହେବ, ସେଥିପ୍ରତି ସମସ୍ତଙ୍କ ନଜର ରହିଛି। ପଡ଼ିଆରେ ନିଜର ଶାଣିତ ବୋଲିଂ ପାଇଁ ପରିଚିତ ଶାମିଙ୍କୁ ଏବେ କୋର୍ଟରେ ମଧ୍ୟ ଏକ କଠିନ ଲଢ଼େଇର ସାମ୍ନା କରିବାକୁ ପଡୁଛି।