ମହାରାଷ୍ଟ୍ରର ରାଜଧାନୀ ମୁମ୍ବାଇ ସ୍ଥିତ ଛତ୍ରପତି ଶିବାଜୀ ମହାରାଜ ଆନ୍ତର୍ଜାତୀୟ ବିମାନବନ୍ଦରରେ (ଟି-୨) ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଜଣେ ଯାତ୍ରୀଙ୍କର ଏକ ଛୋଟିଆ ମଜାଳିଆ କଥା ସୁରକ୍ଷା କର୍ମୀଙ୍କ ହୋସ୍ ଉଡ଼ାଇ ଦେଇଥିଲା। ସୁରକ୍ଷା ଯାଞ୍ଚ ସମୟରେ ଯାତ୍ରୀ ଜଣକ ନିଜ ବ୍ୟାଗରେ ବୋମା ଥିବା କହିବା ପରେ ବିମାନବନ୍ଦରରେ ଆତଙ୍କ ଖେଳିଯାଇଥିଲା। ଏହି କାରଣରୁ ଉଡ଼ାଣ ଭରିବା ପାଇଁ ପ୍ରସ୍ତୁତ ଥିବା ଏକ ଇଣ୍ଡିଗୋ ବିମାନକୁ ତୁରନ୍ତ ରୋକିବାକୁ ପଡ଼ିଥିଲା।

କିପରି ଘଟିଲା ଘଟଣା?

ସୂଚନା ଅନୁଯାୟୀ, ଗତ ଅଗଷ୍ଟ ୯ ତାରିଖ ଦିନ ମୁମ୍ବାଇରୁ ଦିଲ୍ଲୀ ଯିବାକୁ ଥିବା ଏକ ଇଣ୍ଡିଗୋ ଏୟାରଲାଇନ୍ସ ଫ୍ଲାଇଟ୍ ଉଡ଼ାଣ ଭରିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଥିଲା। ଟର୍ମିନାଲ୍-୨ ର ବୋର୍ଡିଂ ଗେଟ୍ ନିକଟରେ ସୁରକ୍ଷା ଯାଞ୍ଚ ଚାଲିଥିବା ବେଳେ ଜଣେ ଯାତ୍ରୀ ହଠାତ୍ କହିଥିଲେ ଯେ ତାଙ୍କ ବ୍ୟାଗରେ ଏକ ବୋମା ଅଛି। ଯାତ୍ରୀଙ୍କ ମୁହଁରୁ ଏହି ପଦକ କଥା ଶୁଣିବା ମାତ୍ରେ ସେଠାରେ ଉପସ୍ଥିତ ଥିବା ସୁରକ୍ଷା କର୍ମୀ ଏବଂ ଏୟାରଲାଇନ୍ସ କର୍ମଚାରୀଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ବିମାନବନ୍ଦରରେ ତୁରନ୍ତ ଆଫ୍ରାତଫ୍ରି ସ୍ଥିତି ଉପୁଜିବା ସହ ଉକ୍ତ ଦିଲ୍ଲୀଗାମୀ ବିମାନକୁ ଅଟକା ଯାଇଥିଲା।

ସିଆଇଏସଏଫ୍ ଦ୍ୱାରା ଅଟକ ଓ ଯାଞ୍ଚ

ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ସୁରକ୍ଷା ଏଜେନ୍ସିଗୁଡ଼ିକୁ ତୁରନ୍ତ ଆଲର୍ଟ କରାଯାଇଥିଲା। କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (ସିଆଇଏସଏଫ୍) ଯବାନମାନେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଉକ୍ତ ଅଭିଯୁକ୍ତ ଯାତ୍ରୀଙ୍କୁ ହେପାଜତକୁ ନେଇଥିଲେ। ଏହାପରେ ବିମାନ ଏବଂ ଉକ୍ତ ଯାତ୍ରୀଙ୍କ ବ୍ୟାଗକୁ ବ୍ୟାପକ ଭାବେ ଯାଞ୍ଚ କରାଯାଇଥିଲା। ତେବେ ଟିକିନିଖି ଯାଞ୍ଚ ପରେ ସେଥିରୁ କୌଣସି ସନ୍ଦିଗ୍ଧ ବସ୍ତୁ କିମ୍ବା ବୋମା ମିଳିନଥିଲା। ଏହା କେବଳ ଏକ ଦାୟିତ୍ୱହୀନ ମଜା ଥିଲା ବୋଲି ପରେ ସ୍ପଷ୍ଟ ହୋଇଥିଲା।

ଦାୟିତ୍ୱହୀନ ଆଚରଣ ଯୋଗୁଁ ହଇରାଣ

ବିମାନବନ୍ଦର କର୍ତ୍ତୃପକ୍ଷ ଏବଂ ସୁରକ୍ଷା ବଳଙ୍କ କହିବା ଅନୁଯାୟୀ, ସୁରକ୍ଷା ପ୍ରସଙ୍ଗରେ ଏଭଳି ଦାୟିତ୍ୱହୀନ ମଜା କରିବା ଆଦୌ ଗ୍ରହଣୀୟ ନୁହେଁ। ଏହାଦ୍ୱାରା କେବଳ ସୁରକ୍ଷା ବ୍ୟବସ୍ଥାରେ ବାଧା ଉପୁଜେ ନାହିଁ, ବରଂ ଅନ୍ୟ ଶହ ଶହ ଯାତ୍ରୀଙ୍କୁ ମଧ୍ୟ ହଇରାଣ ହେବାକୁ ପଡ଼ିଥାଏ। ସୁରକ୍ଷା ଯାଞ୍ଚ ପ୍ରକ୍ରିୟା ଶେଷ ହେବା ପରେ ଏବେ ଉକ୍ତ ଯାତ୍ରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ସୂଚନା ମିଳିଛି। ଏହି ଘଟଣା ପ୍ରମାଣିତ କରୁଛି ଯେ ବିମାନବନ୍ଦର ଭଳି ସମ୍ବେଦନଶୀଳ ସ୍ଥାନରେ କୌଣସି ପ୍ରକାର ମଜାଳିଆ ମନ୍ତବ୍ୟ ମହଙ୍ଗା ପଡ଼ିପାରେ।

ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନ ବନ୍ଦରରେ ମଙ୍ଗଳବାର ଏକ ବଡ଼ ଦୁର୍ଘଟଣା ଟଳିଯାଇଛି। ଟ୍ୟାକ୍ସିୱେରେ ଥିବାବେଳେ ଦୁଇଟି ଯାତ୍ରୀବାହୀ ବିମାନର ଡେଣା ପରସ୍ପର ସହ ଘଷି ହୋଇଯିବା ଫଳରେ ଏହି ଅଘଟଣ ଘଟିଥିଲା। ତେବେ ସୌଭାଗ୍ୟବଶତଃ ଏଥିରେ କୌଣସି ଯାତ୍ରୀ କିମ୍ବା କ୍ରୁ ସଦସ୍ୟ ଆହତ ହୋଇନାହାନ୍ତି ଏବଂ ଏକ ବଡ଼ ବିପଦରୁ ସମସ୍ତେ ଅଳ୍ପକେ ବର୍ତ୍ତି ଯାଇଛନ୍ତି।

ମିଳିଥିବା ସୂଚନା ଅନୁଯାୟୀ, ଏୟାର ଇଣ୍ଡିଆର ବିମାନ (ଏଆଇ୨୭୩୨) ମୁମ୍ବାଇରୁ କୋଏମ୍ବାଟୁର ଯିବା ପାଇଁ ପ୍ରସ୍ତୁତ ହେଉଥିବା ବେଳେ ଟ୍ୟାକ୍ସିୱେରେ ଅପେକ୍ଷା କରିଥିଲା। ଠିକ୍ ଏହି ସମୟରେ ପାଖ ଦେଇ ଗତି କରୁଥିବା ଏକ ଇଣ୍ଡିଗୋ ବିମାନର ଡେଣା ଏୟାର ଇଣ୍ଡିଆ ବିମାନର ଡେଣା ସଂସ୍ପର୍ଶରେ ଆସିଥିଲା। ତେବେ ବିମାନର ଗତି ଧୀର ଥିବାରୁ କୌଣସି ବଡ଼ ଧରଣର କ୍ଷୟକ୍ଷତି ହୋଇନାହିଁ।

ସୁରକ୍ଷା ଦୃଷ୍ଟିରୁ ତୁରନ୍ତ ଉଭୟ ବିମାନର ଉଡାଣକୁ ବାତିଲ କରିଦିଆଯାଇଛି। ବିମାନରେ ଥିବା ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ଓହ୍ଲାଇ ଦିଆଯାଇଛି ଏବଂ ସେମାନଙ୍କ ଗନ୍ତବ୍ୟସ୍ଥଳରେ ପହଞ୍ଚାଇବା ପାଇଁ ବିକଳ୍ପ ବ୍ୟବସ୍ଥା କରାଯାଇଛି। ଘଟଣାସ୍ଥଳରେ ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (DGCA)ର ଅଧିକାରୀମାନେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ବୈଷୟିକ ଯାଞ୍ଚ ପରେ ହିଁ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସୂଚନା ମିଳିଛି।

ମୁମ୍ବାଇର ସାହାର ପୋଲିସ ଏକ ଟ୍ୟାକ୍ସି ଡ୍ରାଇଭରକୁ ଜଣେ ଆମେରିକୀୟ ମହିଳା ପର୍ଯ୍ୟଟକଙ୍କୁ ଠକିବା ଅଭିଯୋଗରେ ଗିରଫ କରିଛି। ଅଭିଯୋଗ ଅନୁଯାୟୀ, ଡ୍ରାଇଭର ଜଣକ ବିମାନବନ୍ଦରରୁ ମାତ୍ର ୪୦୦ ମିଟର ଦୂରରେ ଥିବା ଏକ ହୋଟେଲକୁ ଯିବା ପାଇଁ ପର୍ଯ୍ୟଟକଙ୍କ ଠାରୁ ୧୮,୦୦୦ ଟଙ୍କା (୨୦୦ ଡଲାର) ଭଡ଼ା ଆଦାୟ କରିଥିଲା। ଗିରଫ ଅଭିଯୁକ୍ତର ନାମ ଦେଶରାଜ ଯାଦବ (୫୦) ବୋଲି ଜଣାପଡିଛି।

ପୋଲିସ ସୂଚନା ମୁତାବକ, ଘଟଣାଟି ଗତ ଜାନୁଆରୀ ୧୨ ତାରିଖରେ ଘଟିଥିଲା। ପୀଡିତା ଆମେରିକୀୟ ନାଗରିକ ଆର୍ଜେଣ୍ଟିନା ଆରିଆନୋ ମୁମ୍ବାଇ ବିମାନବନ୍ଦରରେ ଓହ୍ଲାଇବା ପରେ ପାଖରେ ଥିବା ଏକ ପଞ୍ଚତାରକା ହୋଟେଲକୁ ଯିବା ପାଇଁ ଟ୍ୟାକ୍ସି ନେଇଥିଲେ। କିନ୍ତୁ ଡ୍ରାଇଭର ତାଙ୍କୁ ସିଧା ହୋଟେଲ ନନେଇ ଅନ୍ଧେରି ଅଞ୍ଚଳରେ ପ୍ରାୟ ୨୦ ମିନିଟ୍ ଧରି ଘୁରାଇଥିଲା ଏବଂ ଶେଷରେ ସେହି ସମାନ ସ୍ଥାନକୁ ଫେରାଇ ଆଣି ହୋଟେଲରେ ଛାଡିଥିଲା। ଏହି ଛୋଟ ଯାତ୍ରା ପାଇଁ ସେ ମହିଳାଙ୍କ ଠାରୁ ମୋଟା ଅଙ୍କର ଅର୍ଥ ଦାବି କରିଥିଲା।

Please help @MumbaiPolice @CPMumbaiPolice #india @MTPHereToHelp #scam @TimesNow @tourismgoi @TOIIndiaNews @mybmc https://t.co/oIg9MeixNI pic.twitter.com/TqvaztFChB

— Argentina Ariano (@ArgentinaAriano) January 26, 2026

ସୋସିଆଲ ମିଡିଆ ପୋଷ୍ଟରୁ ଖୋଲିଲା ଗୁମର

ପୀଡିତା ମହିଳା ଜାନୁଆରୀ ୨୬ରେ 'ଏକ୍ସ' (ପୂର୍ବରୁ ଟ୍ୱିଟର)ରେ ଏକ ନୂଆ ଆକାଉଣ୍ଟ ଖୋଲି ନିଜର ଅଭିଜ୍ଞତା ବର୍ଣ୍ଣନା କରିବା ପରେ ଘଟଣାଟି ସାମ୍ନାକୁ ଆସିଥିଲା। ସେ ନିଜ ପୋଷ୍ଟରେ ଟ୍ୟାକ୍ସି ନମ୍ବର MH 01 BD 5405 ଉଲ୍ଲେଖ କରିଥିଲେ। ପୋଷ୍ଟ ଭାଇରାଲ ହେବା ପରେ ସାହାର ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ଯଦିଓ ପୀଡିତା ସେତେବେଳକୁ ଭାରତ ଛାଡି ପଳାଇଥିଲେ, ପୋଲିସ ନିଜ ଆଡୁ ମାମଲା (Suo-motu FIR) ରୁଜୁ କରି ମାତ୍ର ତିନି ଘଣ୍ଟା ମଧ୍ୟରେ ଅଭିଯୁକ୍ତକୁ ଠାବ କରି ଗିରଫ କରିଥିଲା।

ପୋଲିସ ବର୍ତ୍ତମାନ ଅଭିଯୁକ୍ତର ଲାଇସେନ୍ସ ରଦ୍ଦ କରିବା ପାଇଁ RTOକୁ ସୁପାରିଶ କରିବାକୁ ଯାଉଛି ଏବଂ ତା’ର ସହଯୋଗୀକୁ ଖୋଜୁଛି। ସୂଚନାଯୋଗ୍ୟ ଯେ, ମୁମ୍ବାଇ ବିମାନବନ୍ଦରରେ ବିଦେଶୀ ପର୍ଯ୍ୟଟକଙ୍କୁ ଠକିବା ଘଟଣା ବୃଦ୍ଧି ପାଇବାରେ ଲାଗିଛି। ଗତ ଡିସେମ୍ବର ମାସରେ ମଧ୍ୟ ଜଣେ ଅଷ୍ଟ୍ରେଲିଆନ୍ ବ୍ୟବସାୟୀ ଏବଂ ଜଣେ ଆମେରିକୀୟ ଛାତ୍ରଙ୍କ ଠାରୁ ଟ୍ୟାକ୍ସି ଚାଳକମାନେ ଅତ୍ୟଧିକ ଭଡ଼ା ଆଦାୟ କରିବା ଅଭିଯୋଗରେ ଗିରଫ ହୋଇଥିଲେ। ବିଶେଷଜ୍ଞମାନେ ବିମାନବନ୍ଦର ବାହାରେ ପର୍ଯ୍ୟଟକଙ୍କ ସୁରକ୍ଷା ପାଇଁ ସ୍ପଷ୍ଟ ସୂଚନା ଫଳକ ଏବଂ ହେଲ୍ପ ଡେସ୍କ ବ୍ୟବସ୍ଥା କରିବାକୁ ପରାମର୍ଶ ଦେଇଛନ୍ତି।

ମୁମ୍ବାଇ: ମୁମ୍ବାଇ ବିମାନ ବନ୍ଦରରେ ଅଘଟଣ । ଲ୍ୟାଣ୍ଡିଂବେଳେ ରନ୍‌ୱେରେ ପିଟି ହୋଇ ଦୁଇଫାଳ ହେଲା ଚାର୍ଟର ବିମାନ । ବିମାନରେ ମୋଟ ୮ ଜଣ ଯାତ୍ରୀ ଥିଲେ। ତେବେ ଘଟଣାରେ ୩ ଜଣ ଗୁରୁତର ଭାବେ ଆହତ ହୋଇଛନ୍ତି। ସୂଚନା ଅନୁସାରେ, ପ୍ରବଳ ବର୍ଷା ଯୋଗୁଁ ଚାର୍ଟାର୍ଡ ବିମାନ ଅବତରଣ କରିବା ସମୟରେ ରନୱେରେ ଭାରସାମ୍ୟ ହରାଇଥିଲା । ଏହା ପରେ ପ୍ଲେନ୍ ରନ୍‌ୱେରେ ପିଟି ହୋଇ ଦୁଇ ଫାଳ ହୋଇ ନିଆଁ ଲାଗି ଯାଇଥିଲା । ଘଟଣା ସମ୍ପର୍କରେ ସୂଚନା ପାଇବା ପରେ ଅଗ୍ନିଶମ ବାହିନୀ ଟିମ୍ ଘଟଣାସ୍ଥଳରେ ପହଞ୍ଚି ନିଆଁ ଲିଭାଇଥିଲେ। ଦୁର୍ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି।

ବିମାନରେ ୬ ଯାତ୍ରୀ ଏବଂ ୨ ଜଣ କ୍ରୁ ସଦସ୍ୟ ଥିଲେ । ଯେଉଁ ସମୟରେ ଏହି ଦୁର୍ଘଟଣା ହୋଇଥିଲା ସେ ସମୟରେ ପ୍ରବଳ ବର୍ଷା ହେଉଥିଲା । ରନୱେ ଠିକସେ ନଦେଖା ଯିବା କାରଣରୁ ଏହି ଦୁର୍ଘଟଣା ହୋଇଥିବା କୁହାଯାଉଛି । ଦୁର୍ଘଟଣା ପରେ ବିମାନଟି ଦୁଇଖଣ୍ଡ ହୋଇଯାଇଛି । ଦୁର୍ଘଟଣା ହେବା କ୍ଷଣି ଉଦ୍ଧାର କାର୍ଯ୍ୟ ଜୋରଦାର କରାଯିବା ସହ ବିମାନରେ ଲାଗିଥିବା ନିଆଁ ଲିଭାଯାଇଥିଲା । ସନ୍ଧ୍ୟା ପ୍ରାୟ ୫ଟା ସମୟରେ ଏହି ଦୁର୍ଘଟଣା ଘଟିଛି ।

ଡିଜିସିଏ ଦେଇଥିବା ସୂଚନା ଅନୁଯାୟୀ ବିଶାଖାପାଟନମରୁ ମୁମ୍ବାଇ ଅଭିମୁଖେ ଆସୁଥିବା ଭିଏସଆର ଭେଞ୍ଚର୍ସ Learjet 45 ପ୍ଲେନ୍ ଭିଟି-ଡିଭିଏଲ ମୁମ୍ବାଇ ବିମାନ ବନ୍ଦରର ରନୱେ ୨୭ରେ ଅବତରଣ କରିବା ସମୟରେ ଖସିଯାଇଥିଲା । ପ୍ରବଳ ବର୍ଷା ଯୋଗୁଁ ଏହି ଦୁର୍ଘଟଣା ଘଟିଥିବା କହିଛି ଡିଜିସିଏ । ବର୍ଷା ଯୋଗୁଁ ଭିଜିବିଲିଟି ୭୦୦ ମିଟର ଥିଲା ।