ବଲାଙ୍ଗିର: ଗଞ୍ଜେଇ ଚାଲାଣର ଅଭିନବ ପ୍ରୟାସ । କ୍ଷୀର ପାତ୍ରରେ ହେଉଥିଲା ଗଞ୍ଜେଇ ଚାଲାଣ । ବଲାଙ୍ଗିର ଜିଲ୍ଲାରେ ଗଞ୍ଜେଇ ଚାଲାଣ କରାଯାଉଥିବା ବେଳେ ଏହାକୁ ପଣ୍ଡ କରିଛି ତୁଷୁରା ଅବକାରୀ ବିଭାଗ। କ୍ଷୀର ପାତ୍ର (ମିଲ୍କ ଜାର୍) ଭିତରେ ଲୁଚାଇ ରଖାଯାଇଥିବା ପ୍ରାୟ ୪୪ କେଜି ଗଞ୍ଜେଇକୁ ଜବତ କରାଯାଇଥିବା ବେଳେ ଏହି ଘଟଣାରେ ୩ ଜଣଙ୍କୁ ଗିରଫ କରାଯାଇଛି।

ଗଞ୍ଜେଇ ମାଫିଆମାନେ ପୋଲିସ ଓ ଅବକାରୀ ବିଭାଗକୁ ଚକମା ଦେବା ପାଇଁ କ୍ଷୀର ପାତ୍ରର ବ୍ୟବହାର କରିଥିଲେ। ମିଳିଥିବା ଗୁପ୍ତ ସୂଚନା ଆଧାରରେ ତୁଷୁରା ଅବକାରୀ ବିଭାଗ ଦେଓଗାଁ ଥାନା ଅନ୍ତର୍ଗତ କୁକୁରଖାଇ ଛକ ନିକଟରେ ଛକି ରହିଥିଲା। କୁକୁରଖାଇ-ତୁଷୁରା ରାସ୍ତାରେ ଯାଉଥିବା ଦୁଇଟି ମୋଟରସାଇକେଲକୁ ଅଟକାଇ ଯାଞ୍ଚ କରିବା ପରେ ଏହି ବେଆଇନ କାରବାରର ପର୍ଦ୍ଦାଫାଶ ହୋଇଥିଲା।

ଗିରଫ ହୋଇଥିବା ତିନିଜଣ ଅଭିଯୁକ୍ତ ହେଲେ ଛତିଶଗଡ଼ ବିଳାସପୁର ଅଞ୍ଚଳର ମୋହିତ ବୈଷ୍ଣବ, ସୁରଜ ମହାନ ଏବଂ ରାଜୁ ବଂଶଲ। ଅବକାରୀ ବିଭାଗର କହିବା ଅନୁଯାୟୀ, ସେମାନେ ବୌଦ୍ଧ ଜିଲ୍ଲାର ଦେଉଳି ଅଞ୍ଚଳରୁ ବଲାଙ୍ଗିର ଅଭିମୁଖେ ଏହି ଗଞ୍ଜେଇ ଚାଲାଣ କରୁଥିଲେ। ଅବକାରୀ ଅଧିକାରୀମାନେ ଗଞ୍ଜେଇ ସମେତ ଦୁଇଟି ମୋଟରସାଇକେଲ ଏବଂ ବିଭିନ୍ନ ରାଜ୍ୟର ଏକାଧିକ ନମ୍ବର ପ୍ଲେଟ୍ ଜବତ କରିଛନ୍ତି। ତୁଷୁରା ଏବଂ ଏହାର ଆଖପାଖ ଅଞ୍ଚଳରେ ଲଗାତାର ଗଞ୍ଜେଇ ଚୋରାଚାଲାଣ ବୃଦ୍ଧି ପାଉଥିବାରୁ ପ୍ରଶାସନ ପାଇଁ ଚିନ୍ତା ବଢ଼ିଛି। 

ବାରିପଦା: ମୟୂରଭଞ୍ଜ ଜିଲ୍ଲା ଓ ଦୌରା ଜଜଙ୍କ କୋର୍ଟରେ ଗୁରୁବାର ଏକ ଗଞ୍ଜେଇ ଚୋରାଚାଲାଣ ମାମଲାର ରାୟ ପ୍ରକାଶ ପାଇଛି। ବିଚାରପତି ଅରବିନ୍ଦ ପଟ୍ଟନାୟକ ଏହାର ବିଚାର କରି ୩ଜଣ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରି ୧୦ବର୍ଷ ଲେଖାଏଁ କାରାଦଣ୍ଡ ଆଦେଶ ଦେଇଛନ୍ତି । ଏଥି ସହିତ ୧ଲକ୍ଷ ଟଙ୍କାର ଜୋରିମାନା ଅନାଦେୟ ଅଧିକ ୬ ମାସର କାରାଦଣ୍ଡ ନେଇ ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ମାନେ ହେଲେ ବାଲେଶ୍ବର ଜିଲ୍ଲା ବସ୍ତା ଥାନା ମଙ୍ଗଳପୁର ଅଞ୍ଚଳର ଶେଖ୍ ରଫାକତ ଅଲ୍ଲୀ(୪୨), ରୁପସା ଥାନା ଜାମୁଣିଆ ଅଞ୍ଚଳର ମିହିର ବିଶ୍ବାଳ(୨୦) ଏବଂ ରାସଗୋବିନ୍ଦପୁର ଥାନା ଶ୍ୟାମନନ୍ଦପୁର ଅଞ୍ଚଳର ରବୀନ୍ଦ୍ର କୁମାର ଦେ(୫୦)।

ଅଭିଯୋଗ ଅନୁଯାୟୀ, ଗତ ୨୦୨୦ ମସିହାର ନଭେମ୍ବର ୮ତାରିଖରେ ରାସଗୋବିନ୍ଦପୁର ଥାନା ପୁଲିସ ପକ୍ଷରୁ ସ୍ଥାନୀୟ ଅଞ୍ଚଳରେ ରାତ୍ରି କାଳୀନ ପେଟ୍ରୋଲିଂ ସମୟରେ ଏକ ବୋଲେରୋ ଗାଡିରେ ବେଆଇନ ଭାବେ ଗଞ୍ଜେଇ ବାଲେଶ୍ଵର ଜିଲ୍ଲାର ବସ୍ତା ଅଞ୍ଚଳରୁ ଚାଲାଣ ହେଉଥିବା ଖବର ମିଳିଥିଲା। ପେଟ୍ରୋଲିଂ ଟିମ ପକ୍ଷରୁ ସାରୁମୂଳା ନିକଟସ୍ଥ ଶ୍ୟାମନନ୍ଦପୁର ଛକ ନିକଟରେ ଉକ୍ତ ଗାଡିକୁ ଅଟକାଇବାରୁ ୩ଜଣ ଦୌଡ଼ି ପଳାଉଥିବା ବେଳେ ପୁଲିସ ତାଙ୍କୁ ଧରିବା ସହ ଗାଡି ଯାଞ୍ଚ କରି ୬୦ କିଲୋ ୯୯୦ ଗ୍ରାମ ଗଞ୍ଜେଇ ଜବତ କରିଥିଲେ। ବୋଲେରୋ ଗାଡିରେ ସମ୍ମୁଖ ପାର୍ଶ୍ୱ ଗୋଟେ ଗାଡି ନମ୍ବର ଏବଂ ପଛ ପାର୍ଶ୍ୱରେ ଆଉ ଏକ ଗାଡି ନମ୍ବର ଥାଇ ଗଞ୍ଜେଇ ଚୋରା ଚାଲାଣ କରୁଥିଲେ। ଏହାକୁ ନେଇ ରାସଗୋବିନ୍ଦପୁର ଥାନାରେ ଏନଡିପିସି ମାମଲା ରୁଜ୍ଜୁ କରିବା ସହ ପୁଲିସ ତଦନ୍ତ ଆରମ୍ଭ କରିଥିଲେ। ଏଥି ସହିତ ୩ଜଣକୁ ଗିରଫ କରି ପୁଲିସ କୋର୍ଟ ଚାଲାଣ କରିଥିଲେ। ମାମଲାର ବିଚାର ସମୟରେ ସାକ୍ଷୀଙ୍କ ବୟାନ, ତଦନ୍ତ ରିପୋର୍ଟକୁ ଭିତ୍ତି କରି ବିଚାରପତି ଉପରୋକ୍ତ ରାୟ ଶୁଣାଣି କରିଛନ୍ତି। ଉକ୍ତ ମାମଲାକୁ ସତନ୍ତ୍ର ପିପି ବଜେନ୍ଦ୍ର ମହାନ୍ତି ପରିଚାଳନା କରୁଥିଲେ।